கிளிநொச்சி – பளையைச் சேர்ந்த 23 வயதான தமிழ் வேகப்பந்து மற்றும் கடினப்பந்து வீச்சாளரை வன்னி பிராந்திய பிரதிப் பொலிஸ்மா அதிபர் அழைத்து கலந்துரையாடியுள்ளார்.

செபஸ்ரியாம்பிள்ளை விஜயராஜ் என்ற குறித்த இளைஞனின் பயற்சிகளுக்குத் தேவையான உபகரணங்களை பெற்றுக்கொடுப்பதாகவும், இலங்கை தேசிய கிரிக்கெட் அணியில் இணைத்துக் கொள்வதற்கு வசதிகளையும் வழங்க தயாராகவுள்ளதாக தெரிவித்துள்ளார்.

அத்துடன் குறித்த இளைஞர் விரும்பும் பட்சத்தில் அவரை பொலிஸ் கிரிக்கட் அணியில் உள்வாங்குவதற்கும் நடவடிக்கைகள் மேற்கொள்ளத் தயாராக இருப்பதாகவும் சுட்டிக்காட்டியுள்ளார்.

இதன்போது அவர் விஜயராஜிற்கு வாழ்த்துக்களைத் தெரிவித்ததுடன், மேலும் அவரது திறமைகளை வளர்த்துக் கொள்ளத் தேவையான வசதிகளையும் பயிற்சிகளையும் வழங்க முன்வந்துள்ளார்.

 
அம்பாந்தோட்டை பிரதேசத்திலுள்ள காடு ஒன்றில் தலை மற்றும் வாய்ப் பகுதியில் துப்பாக்கிச் சூட்டுக் காயங்களுடன் அவதியுற்ற காட்டு யானை ஒன்றை காப்பாற்றுவதற்கான முயற்சியில் வன இலாகா அதிகாரிகள் ஈடுபட்டு வருகின்றனர்.

துப்பாக்கிச் சூட்டிற்கு இலக்கான குறித்த யானை சில நாட்களாக துறைமுகத்திற்கு அண்மையிலுள்ள காட்டுப் பகுதியில் சிரமப்பட்டு வருவதை துறைமுக பணியாளர்கள் கண்காணித்துள்ளனர்.

அதனைத் தொடர்ந்து வன உயிரின இலாகா அதிகாரிகளுக்கு இது தொடர்பில் அறிவிக்கப்பட்டதைத் தொடர்ந்து கால்நடை மருத்துவர் உட்பட வன உயிரின இலாகாவினர் குறித்த இடத்திற்கு விரைந்து யானைக்கு சிகிச்சை அளித்து வருகின்றனர்.

தற்போது யானை எழுந்து நடமாட முடியாத ஆபத்தான நிலையில் இருப்பதன் காரணத்தினால் இதனை யானைகள் சரணாலயத்திற்கு கொண்டு செல்வதற்கான ஏற்பாடுகள் செய்யப்பட்டுள்ளதாக தெரிவிக்கப்படுகின்றது.

3 வயது மதிக்கத்தக்க இந்த யானையின் வாயிலும், தலையிலும் துப்பாக்கிச் சூட்டுக் காயங்கள் ஏற்பட்டுள்ளதை கண்டறிந்து, அதற்கு உகந்த சிகிச்சைகள் தற்போது வழங்கப்பட்டுள்ளதாக வன விலங்கு மருத்துவ அதிகாரி வைத்தியர் மாலக்க அபேயவர்தன தெரிவித்துள்ளார்.

வாயில் ஏற்பட்டுள்ள துப்பாக்கிச் சூட்டுக் காயம் காரணமாக யானை உணவு உண்ண முடியாமல் சிரமப்படுவதாகவும், இந்த யானைக்கு ஏற்கனவே தும்பிக்கையில் அடிபட்டு காயம் ஏற்பட்டுள்ளதாகவும் அவர் மேலும் தெரிவித்துள்ளார்.

கெப்பிற்றிக்கொல்லாவ பொலிஸ் பிரிவிற்குட்பட்ட முஸ்லிம் அற்றாவ பகுதியில், மின்னல் தாக்குதலுக்கு இலக்காகி சிறுவனொருவன் இன்று மாலை உயிரிழந்துள்ளதாக தெரிவிக்கப்படுகின்றது.

கெப்பிற்றிக்கொல்லாவ, அற்றாவ புதிய வளவைச் சேர்ந்த சபீர் றுஸைத் என்ற 14 வயதுடைய சிறுவனே, இவ்வாறு உயிரிழந்துள்ளார்.

குறித்த சிறுவன் தனது வீட்டிலுள்ள மலசலகூடத்துக்குச் சென்ற போது, மின்னல் தாக்குதலுக்கு உள்ளாகி இவ்வாறு உயிரிழந்துள்ளதாக தெரிவிக்கப்படுகின்றது.

குறித்த சிறுவனின் சடலம் பிரேத பரிசோதனைக்காக கெப்பிற்றிக்கொல்லாவ வைத்தியசாலைக்கு அனுப்பி வைக்கப்பட்டுள்ளதாக தெரிவிக்கப்படுகின்றது.

வெளிநாடொன்றின் வைத்தியசாலையில் அனுமதிக்கப்பட்டுள்ள பெண்ணொருவர் தொடர்பில் தகவல் தெரிந்தவர்கள் அறிவிக்குமாறு, இலங்கை வெளிநாட்டு வேலைவாய்ப்பு பணியகம் தெரிவித்துள்ளது.

மத்திய கிழக்கு நாடொன்றின் வைத்தியசாலையில் அனுமதிக்கப்பட்டு சிகிச்சை பெறும் இலங்கை பெண் தொடர்பிலேயே அவசரமாக தகவல் தேவைப்படுவதாக பணியகம் தெரிவித்துள்ளது.

பஹ்ரைன் சல்மானியா வைத்தியசாலையில் சிகிச்சை பெறும் பெண், அந்த நாட்டு இலங்கை தூதரக அலுவலகத்தின் ஊடாக வெளிநாட்டு வேலைவாய்ப்புப் பணியகத்திற்கு தகவல் வழங்கியுள்ளார்.

பஹ்ரைன் நாட்டு பொலிஸாரினால் சல்மானியா வைத்தியசாலையில் அனுமதிக்கப்பட்டுள்ள இந்த பெண் நினைவற்ற நிலையில் உள்ளதால் அவர் தொடர்பான தகவல்கள் கோரப்பட்டுள்ளது.

கனேமுல்ல பகுதியை சேர்ந்த இனோக்கா தமயந்தி என்ற பெண்ணே இவ்வாறான நெருக்கடி நிலையில் உள்ளார். அவரிடம் விமான கடவுச்சீட்டு அல்லது அடையாளத்தை உறுதி செய்ய கூடிய வகையில் எந்த ஒரு ஆவணமும் இல்லை என குறிப்பிடப்படுகின்றது.

அவருக்கு இலங்கையில் வசித்தமை தொடர்பில் உரிய நினைவில்லை என தூதரக அதிகாரிகள் குறிப்பிட்டுள்ளனர். அவர் தொடர்பில் தகவல் தேடி பார்ப்பதற்கு அவசியம் என்பதனால் பொது மக்களின் உதவி நாடப்பட்டுள்ளது.

விசேடமாக அவர் தொடர்பில் தகவல் அறிந்தால் வெளிநாட்டு வேலைவாய்ப்புப் பணியகத்தின் 011 2 864 100 என்ற இலக்கத்திற்கு அறிவிக்குமாறு பொது மக்களிடம் கேட்டுக் கொள்ளப்பட்டுள்ளது.

அரசாங்க வைத்தியசாலை ஒன்றின் கழிப்பறைக்குள் சீ.சீ.டீ.வி கமரா பொருத்தியதாக வைத்தியர் ஒருவர் மீது குற்றம் சுமத்தப்பட்டுள்ளது.

குறித்த வைத்தியருக்கு எதிராக அனுராதபுரம் தலைமை பொலிஸார், அந்தப் பகுதி நீதிமன்றத்தில் வழக்கு தாக்கல் செய்துள்ளனர்.

வைத்தியருக்கு எதிராக வழக்கு தாக்கல் செய்வதற்கு போதுமான காரணங்கள் உள்ளதாக, சட்ட மா அதிபருக்கு கிடைத்த தகவல்களுக்கமைய இந்த வழக்கு தாக்கல் செய்யப்பட்டுள்ளது.

குற்றம் சுமத்தப்பட்டுள்ள வைத்தியரை எதிர்வரும் மாதம் 15ஆம் திகதி அனுராதபுரம் நீதிமன்றத்தில் ஆஜராகுமாறு உத்தரவிடப்பட்டுள்ளது.

அனுராதபுரம் வைத்தியசாலையின் பெண்கள் கழிப்பறையில் இவ்வாறு சீ.சீ.டீ.வி பொருத்தப்பட்டதாக வைத்தியர் மீது குற்றம் சுமத்தப்பட்டுள்ளமை குறிப்பிடத்தக்கது.

மொனராகல பொதுவில பிரதேசத்தில் தனது கன்றை தொட்ட நபர் ஒருவரை தாய்ப் பசு கடுமையாகத் தாக்கி கொன்றுள்ளது.

புல்வெளியில் மேய்ந்து கொண்டிருந்த கன்றை நபர் ஒருவர் தொட்ட போது அருகாமையில் இருந்த தாய்ப் பசு ஆத்திரம் காரணமாக, குறித்த நபரை கடுமையாகத் தாக்கியுள்ளது.

தாக்குதலினால் காயமடைந்த நபர் பானம வைத்தியசாலையில் அனுமதிக்கப்பட்ட போதிலும் சிகிச்சை பலனின்றி உயிரிழந்துள்ளார்.

78 வயதான கலப்பத்திகே பிரமேதாச என்பவரே சம்பவத்தில் உயிரிழந்துள்ளார்.

உயிரிழந்தவர் மாத்தறை கொட்டேகொட பிரதேசத்தைச் சேர்ந்தவர் எனவும், விவசாய நடவடிக்கைகளுக்காக பானம பிரதேசத்திற்கு சென்றவர் எனவும் தெரிவிக்கப்படுகிறது.

கன்றை தொட்ட போது தாய்ப்பசு குறித்த நபரின் தலையில் வயிற்றில் மற்றும் கால்களில் கடுமையாக தாக்கியுள்ளது.

இந்த சம்பவம் தொடர்பில் பானம பொலிஸார் விசாரணைகளை ஆரம்பித்துள்ளனர்.

பலப்பிட்டிய வைத்தியசாலையில் ஆறு கிலோ கிராம் எடையுடைய சிசுவொன்று பிரசவிக்கப்பட்டுள்ளது.

பலப்பிட்டிய ஆதார வைத்தியசாலையில் இவ்வாறு அதிக எடையுடைய சிசுவொன்று பிரசவிக்கப்பட்டுள்ளது. பென்தொட்ட ஹபுருகல பிரதேசத்தைச் சேர்ந்த 28 வயதான தாய் ஒருவர் இந்த சிசுவை பிரசவித்துள்ளார்.

சிசேரியன் சத்திர சிகிச்சை ஊடாக இந்த சிசு பிரசவிக்கப்பட்டதாகவும் தாயும் சேயும் நலமாக இருப்பதாகவும் வைத்தியசாலைத் தகவல்கள் தெரிவிக்கின்றன.

இந்த சிசுவின் எடை ஐந்து கிலோ மற்றும் 980 கிராம் என தெரிவிக்கப்படுகிறது. சாதாரணமாக பிறக்கும் குழந்தை ஒன்றின் நிறை 3.5 கிலோகிராம் என்பது குறிப்பிடத்தக்கது.

நாவுல அளுகொல்ல பிரதேசத்தில் வேர்க்கடலை அறுவடை செய்வதற்காக புதிய இயந்திரம் ஒன்றை இளைஞர் ஒருவர் கண்டுபிடித்துள்ளார். 28 வயதான கே.ஜீ.சந்திகஜயந்த சேனாதீர என்ற இளைஞரே இந்த இயந்திரத்தை கண்டுபிடித்துள்ளார்.

பயன்படுத்தப்படாத நெல் அறுவடை செய்யும் இயந்திரம் ஒன்றின் உதவியுடன் இந்த இயந்திரத்தை அவர் தயாரித்துள்ளார். பயன்படுத்த முடியாத பல பொருட்களை கொண்டு புதிய விடயங்களை உருவாக்குவதில் இந்த இளைஞர் திறமையான ஒருவராவார்.

இந்த இளைஞனின் பல நாள் முயற்சியின் பலனாக இந்த இயந்திரம் சிறப்பான முறையில் உருவாக்கப்பட்டுள்ளது.

இதன்மூலம் மிகவும் இலகுவாக இலகுவாக வேர்க்கடலை அறுவடை செய்ய முடிவதாக தெரிவிக்கப்படுகின்றது.

ஒரு ஏக்கர் வேர்க்கடலை அறுவடை செய்வதற்கு 10 பேர் தேவைப்படுகின்றனர். இது குறித்து சிந்தித்த பின்னரே இந்த இயந்திரம் தயாரிக்கப்பட்டதாக அந்த இளைஞன் குறிப்பிட்டுள்ளார்.

இந்த இயந்திரத்தின் ஊடாக சுத்தமான வேர்க்கடலைகளை பெற்றுக் கொள்ளலாம். மணல் அகற்றுவதற்கும் அந்த இயந்திரத்தினால் முடியும். இந்த இயந்திரத்தில் இரண்டு பேர் வேலை செய்ய முடியும். உதவிகள் கிடைத்தால் இது போல் பல இயந்திரங்களை உருவாக்கலாம் என அவர் குறிப்பிட்டுள்ளார்..