மன்னார் – மடுமாதா திருத்தலத்தின் ஆவணி மாத திருவிழாவிற்கு சென்றிருந்த இரண்டு பிள்ளைகளின் தாயொருவர் மின்னல் தாக்கி உயிரிழந்துள்ளார்.

இந்த சம்பவம் நேற்று பிற்பகல் ஒரு மணியளவில் இடம்பெற்றுள்ளதாக பொலிஸார் தெரிவித்தனர்.
சிலாபம், தொடுவாய் பகுதியைச் சேர்ந்த பெண்ணே மின்னல் தாக்கி உயிரிழந்துள்ளார்.

மடுமாதா திருத்தல வளாகத்தில் யாத்திரிகர்கள் தங்குவதற்காக அமைக்கப்பட்டுள்ள கூடாரத்தின் இரும்புக்கம்பியைப் பிடித்திருந்த சந்தர்ப்பத்தில், மின்னல் தாக்குதலுக்கு இலக்காகி அவர் உயிரிழந்ததாக பொலிஸார் குறிப்பிட்டனர்.

உயிரிழந்த பெண்ணின் சடலம் மன்னார் வைத்தியசாலையில் வைக்கப்பட்டுள்ளது

வெளிநாடொன்றில் இலங்கையரின் 6 மாத சிறைத்தண்டனை நீக்குவதற்கான மேன்முறையீடு டுபாய் நீதிமன்றத்தினால் நிராகரிக்கப்பட்டுள்ளது.

முன்னாள் காதலியின் காதை கடித்துவிட்டு அவரது பணப்பையை திருடி சென்ற இலங்கையரின் மேன்முறையீடே இவ்வாறு நிராகரிக்கப்பட்டுள்ளது.

இலங்கையை சேர்ந்த சமையல்கார் ஒருவரின் கோரிக்கையே இவ்வாறு நிராகரிக்கப்பட்டுள்ளது.

2016ஆம் ஆண்டு ஏப்ரல் மாதம், 34 வயதான இலங்கையர் ஒருவர் தெரு ஒன்றில் இலங்கை பெண்ணின் பின்னால் சென்று அவரது காதின் ஒரு துண்டை கடித்து விட்டு, அவரது பணப்பையை திருடியதோடு அங்கிருந்து தப்பியோடியுளளார். எனினும் சில வாரங்களுக்கு பின்னர், அந்த நபர் மீண்டும் அந்த பெண்ணின் பையை பறித்து பணத்தை எடுத்து விட்டு அடுத்த நாள் திருப்பி கொடுத்துள்ளார்.

எப்படியிருப்பினும் காதை கடித்த சம்பவம் தொடர்பில் அந்த பெண் பொலிஸாரிடம் முறைப்பாடு செய்துள்ளார்.

ஜுன் மாதம் டுபாய் நீதிமன்றத்தில் இடம்பெற்ற முதல் வழக்கு விசாரணையின் போது, நிரந்தர இயலாமை காரணமாகவே தான் அந்த பெண்ணுக்கு அவ்வாறு செய்ததாக குற்றம் சுமத்தப்பட்டவர் தெரிவித்துள்ளார்.

மேல்முறையீட்டு நீதிமன்றத்திற்கு முன்னால் முதன்மை தீர்ப்பை எதிர்த்து அந்த நபர் மேல்முறையீடு செய்தார்.

எனினும் டுபாய் நீதிமன்ற நீதிபதி Eisa Al Sharif மேன்முறையீட்டினை நிராகரித்து விட்டு 6 மாத சிறைத்தண்டனை உறுதி செய்துள்ளார்.

குற்றவாளியின் சிறைத்தண்டனை நிறைவடைந்த பின்னர் டுபாயில் இருந்து அவரை இலங்கைக்கு நாடு கடத்துமாறு உத்தரவிடப்பட்டுள்ளது

நாட்டின் பல பகுதிகளின் இன்று மாலை அடைமழை பெய்யும் என வளிமண்டலவியல் திணைக்களம் தெரிவித்துள்ளது.

அதற்கமைய கிழக்கு, ஊவா, வடக்கு மற்றும் வட மத்திய மாகாணங்களில் இன்றைய தினம் மழை பெய்யும் என குறிப்பிடப்பட்டுள்ளது.

நாட்டின் பல பகுதிகளின் வானம் மேக கூட்டத்தினால் நிறைந்து காணப்படும் என சுட்டிக்காட்டப்பட்டுள்ளது.

மேல், சப்ரகமுவ, மத்திய, வடமேல், வடக்கு மற்றும் கிழக்கு மாகாணங்களிலும், காலி மற்றும் மாத்தறை மாவட்டங்களிலும் மழை அல்லது இடியுடன் கூடிய மழை பெய்யும் என எதிர்பார்க்கப்படுகின்றது.

ஏனைய பிரதேசங்களில் மாலை 2 மணிக்கு பின்னர் மழை அல்லது இடியுடன் கூடிய மழை பெய்யும் என குறிப்பிடப்பட்டுள்ளது.

இரத்தினபுரி, காலி, கேகாலை, மாத்தறை, பதுளை, திருகோணமலை, மட்டக்களப்பு, வவுனியாக மற்றும் முல்லைத்தீவு பிரதேசங்களின் சில இடங்களிலும் 75 மில்லிமீற்றர் வரையிலான மழை பெய்யும் என எதிர்பார்க்கப்படுகின்றது.

இடியுடன் மழை பெய்யும் பிரதேசங்களிலும் தற்காலிகமாக கடும் காற்று வீசக்கூடும். மின்னல் தாக்கத்தினால் ஏற்படும் ஆபத்துக்களை குறைத்து கொள்வதற்கு நடவடிக்கை மேற்கொள்ளுமாறு வளிமண்டலவியல் திணைக்களம் மக்களிடம் கோரிக்கை விடுத்துள்ளது.

இதேவேளை புத்தளத்தில் இருந்து கொழும்பு மற்றும் காலி ஊடாக ஹம்பாந்தோட்டை வரையிலான கடல் பிரதேசங்களின் சில பகுதிகளில் மழை அல்லது இடியுடன் மழை பெய்யும் தன்மை காணப்படுகின்றது.

ஏனைய கடல் பிரதேசங்களில் இரவு நேரத்தில் மழை அல்லது இடியுடன் கூடியு மழை பெய்ய கூடும் என அந்த அறிக்கையில் மேலும் குறிப்பிடப்பட்டுள்ளது.

இலங்கை கிரிக்கெட் அணியின் வேகப்பந்துவீச்சாளரான லசித் மலிங்கவை விட வேகமாக பந்து வீச முடியும் என கிளிநொச்சி – புலோப்பளை பகுதியில் வசித்துவரும் செபஸ்ரியாம்பிள்ளை விஜயராஜ் என்ற இளம் கிரிக்கெட் வீரர் தெரிவித்துள்ளார்.

தான் சிறு வயது முதல் லசித் மலிங்கவின் பந்து வீச்சினை பார்த்து தான் பந்து வீசி பழகி வந்ததாகவும், தற்போது அவரின் வேகத்திற்கு தன்னால் பந்து வீச முடியும் எனவும் அவர் கூறியுள்ளார்.

தான் பாடசாலை காலங்களிலேயே மாகாண மட்ட கிரிக்கெட் போட்டிகளில் பிரகாசித்த கிரிக்கெட் வீரர் என்றாலும் வறுமையின் நிமிர்த்தம் திறமையை உலகறிய செய்ய முடியாமல் இருந்ததாக தெரிவித்துள்ளார்.

விஜயராஜின் திறமையினை அறிந்து கொண்ட வன்னி பிராந்திய பிரதிப் பொலிஸ்மா அதிபர் தேசபந்து தென்னக்கோன், அவருக்கு வாழ்த்துக்களைத் தெரிவித்ததுடன், அவருக்கு தேவையான வசதிகளையும் பயிற்சிகளையும் வழங்க முன்வந்துள்ளார்.

இந்நிலையில், விஜயராஜ் விரும்பும் பட்சத்தில் அவரை பொலிஸ் கிரிக்கெட் அணியில் உள்வாங்குவதற்கும் நடவடிக்கைகளை மேற்கொள்ளத்தயாராக இருப்பதாகவும் வன்னி பிராந்திய பிரதிப் பொலிஸ்மா தெரிவித்துள்ளார்.

சுவிஸ் நாட்டில் St-Gall மாநிலத்தில் வசித்த 22 வயதுடைய சுவிஸ் பிரஜையான தமிழ் இளைஞன் ஒருவர் கத்தியால் குத்தி கொலை செய்யப்பட்டுள்ளார்.

இச்சம்பவமானது St-Gall மாநிலத்தில் வாழும் தமிழ் மக்களை அதிர்ச்சியிலும், சோகத்திலும் ஆழ்த்தியுள்ளதாக தெரிவிக்கப்பட்டுள்ளது.

கடந்த வெள்ளிகிழமை (04.08.2017) அன்று, St-Gall மாநிலத்தில் மக்கள் நடமாட்டம் உள்ள நகர் பகுதியில் (St gallen City, Market platz ) ஒரு உணவகத்தின் மத்தியில் அமைந்துள்ள தோட்டப் பகுதியிலேயே இந்த கத்திக்குத்துச் சம்பவம் நடந்ததாக தெரியவருகிறது.

கழுத்தில் ஆழமாக கத்தியால் குத்தப்பட்டுள்ளதால், குறித்த இளைஞன் மிகவும் ஆபத்தான நிலையில் மருத்துவமனைக்கு கொண்டு செல்லப்பட்டு அங்கு தீவிர சிகிச்சை அளிக்கப்பட்டுள்ளது.

எனினும் இந்த சிகிச்சை பலனளிக்காததால் குறித்த தமிழ் இளைஞன் நேற்று 08.08.2017 செவ்வாய்க்கிழமை மரணமடைந்துள்ளார்.

கத்தியால் குத்தியவர் 42வயதுடைய சுவிஸ் பிரஜை எனவும், அவர் கைது செய்யப்பட்டு விசாரணைகள் நடைபெறுவதாகவும் செங்களான் பொலிஸார் தெரிவித்துள்ளனர்.

இக்கொலை சம்பவம் எதற்காக நடைபெற்றது என்பது இதுவரை தெரியவில்லை.