லிபியாவில் புகலிடம் பெறுவதற்காக சஹாரா பாலைவனத்தில் பயணம் மேற்கொண்ட நைஜீரியா நாட்டை சேர்ந்த 44 அகதிகள் தண்ணீர் இல்லாமல் பலியாகியுள்ளதாக தகவல்கள் வெளியாகியுள்ளன.

கானா மற்றும் நைஜீரியா நாடுகளை சேர்ந்த அகதிகள் லிபியா நாட்டிற்கு வாகனங்களில் புறப்பட்டுள்ளனர்.

சஹாரா பாலைவனம் வழியாக செல்ல வேண்டும் என்பதால் தேவைக்காக சில லிற்றர் தண்ணீரை கொண்டு சென்றுள்ளனர்.

துரதிஷ்டவசமாக பாலைவனத்தில் சென்றபோது வாகனம் பழுதாகி நின்றுள்ளது. வாகனத்தில் இருந்த தண்ணீர் முழுவதும் தீர்ந்துள்ளது.

ஆனால், நீண்ட பயணம் என்பதால் தண்ணீர் கிடைக்காமல் சோர்வுற்றுள்ளனர். பின்னர், ஒவ்வொரு நபராக மயங்கி விழுந்து உயிரிழந்துள்ளனர்.

இவ்வாறு பாலைவனத்தில் 44 பேர் சுருண்டு விழுந்து உயிரிழந்துள்ளனர். இவர்களில் குழந்தைகளும் உயிரிழந்துள்ளனர். எனினும், பாலைவனத்தில் இருந்து உயிர் தப்பிய 6 பேர் இத்தகவலை உறுதிப்படுத்தியுள்ளனர். இவர்களுக்கு ரெட் கிராஸ் அமைப்பை சேர்ந்தவர்கள் உதவி வருகின்றனர்.

ஆப்பிரிக்காவில் இருந்து மத்திய தரைக்கடல் வழியாக ஐரோப்பாவிற்கு செல்ல முயலும் அகதிகளும் விபத்தில் சிக்கி தொடர்ந்து பலியாகி வருவது குறிப்பிடத்தக்கது.

சுவிஸ்லாந்தில் காதலியின் மனதை கவரும் நோக்கில் நபர் ஒருவர் 500 கி.மீ தூரத்தை ஓடி வெற்றிகரமாக கடந்து சாதனை படைத்துள்ளார்.

அமெரிக்காவை சேர்ந்த Izyaslav Koza(33) என்ற நபர் உக்ரைன் நாட்டை சேர்ந்த பெண் ஒருவரை ஒருதலைபட்சமாக காதலித்து வந்துள்ளர். இருவரும் அமெரிக்காவில் தான் வசித்து வருகின்றனர்.

இந்நிலையில், காதலை ஏற்பதற்கு முன்னர் சுவிட்சர்லாந்து நாட்டில் ஒரு எல்லையில் இருந்து மற்றொரு எல்லை வரை ஓட முடியுமா? என அப்பெண் கேட்டுள்ளார்.

பெண்ணின் கோரிக்கையை ஏற்றுக்கொண்ட நபர் கடந்த 22-ம் திகதி சுவிட்சர்லாந்து நாட்டிற்கு பயணம் மேற்கொண்டு இத்தாலி எல்லையில் உள்ள Müstair என்ற பகுதியில் இருந்து தனது ஓட்டத்தை தொடங்கியுள்ளார்.

ஒவ்வொரு நாளும் 50 கி.மீ தூரம் வரை ஓடியுள்ளார். செல்லும் வழியில் இரவை கழிக்க ஹொட்டல்களில் தங்கியுள்ளார். இதற்கான செலவுகள் அனைத்தையும் அவரே ஏற்றுக்கொண்டுள்ளார்.

காதலிக்காக முயற்சியை கைவிடாத அந்நபர் இறுதியாக நேற்று ஜெனிவாவில் உள்ள Chancy என்ற பகுதியை அடைந்து தனது சாதனையை முடித்துள்ளார்.

அதாவது, தனது பயணத்தில் அவர் தொடர்ச்சியாக 500 கி.மீ தூரத்தை ஓடியே கடந்துள்ளார்.

இத்தகவலை காதலியிடம் தெரிவித்ததும் அவர் சுவிட்சர்லாந்து நாட்டிற்கு பயணமாக நேற்று இருவரும் நேரில் சந்தித்துள்ளனர்.

இதுமட்டுமில்லாமல், அப்பெண்ணிடம் காதலை தெரிவித்ததும் அவர் காதலை ஏற்றுக்கொண்டதாகவும், விரைவில் இருவருக்கும் திருமணம் நடக்க உள்ளதாக நபர் உற்சாகமாக தெரிவித்துள்ளார்.

புவி வெப்பமயமாதலை தடுக்க உலக நாடுகளின் ஒத்துழைப்புடன் கடந்த ஆண்டு போடப்பட்ட பாரிஸ் பருவநிலை மாற்ற ஒப்பந்தத்தில் இருந்து அமெரிக்கா வெளியேறுவதாக அமெரிக்க ஜனாதிபதி டிரம்ப் அறிவித்துள்ள்ளார்.

பல ஆண்டுகள் நடைபெற்ற சிக்கலான பேச்சுவார்த்தைகளுக்கு பின்னர் கடந்த ஆண்டு கையழுத்தானது பாரிஸ் பருவநிலை மாற்ற ஒப்பந்தம்.

இந்த ஒப்பந்தத்திற்கான முக்கிய நோக்கமே புவிவெப்ப மயமாதலை 2 டிகிரி செல்சியஸுக்கு மிகாமல் கட்டுப்படுத்துவதுதான்.

புவி வெப்பமடைதலுக்குக் காரணமான கார்பன் டை ஒக்சைட் உள்ளிட்ட பசுமை இல்ல விளைவு வாயுக்கள் வெளியேற்றத்தை பெருமளவில் கட்டுக்குள் கொண்டுவரவே இந்த ஒப்பந்தம் கையெழுத்தானது.

இந்த ஒப்பந்தத்தில் இணைந்திருக்கும் நாடுகள் தங்களுடைய கார்பன் டை ஒக்சைட் வெளியேற்றத்தை கடுமையாக குறைக்க வேண்டும் என்பதே இந்த ஒப்பந்தத்தின் சிறப்பம்சம்.

ஆனால் புதைபடிவ எரிபொருட்களின் பயன்பாட்டை குறைப்பது பொருளாதாரத்தில் நேரடியாக பாதிப்பை ஏற்படுத்தும் என்பதால் இந்த ஒப்பந்தத்தை நடைமுறைப்படுத்துவது ஒரு சவாலான காரியமாகவே பார்க்கப்பட்டு வந்தது.

இந்தியா, சீனா, ரஷ்யா, அமெரிக்கா, பிரான்ஸ் உள்ளிட்ட 195 நாடுகள் இந்த ஒப்பந்தத்தில் கையெழுத்திட்டிருந்தது.

இந்நிலையில், பாரிஸ் பருவநிலை ஒப்பந்தத்தில் இருந்து அமெரிக்கா வெளியேறுவதாக டொனால்ட் டிரம்ப் அறிவித்துள்ளார். இந்த முடிவிற்கு அமெரிக்காவின் சுற்றுச்சூழல் ஆர்வலர்கள், பொருளாதார நிபுணர்கள் என பலரும் எதிர்ப்பு தெரிவித்து வருகின்றனர்.

இன்று உலக நாடுகள் அனைத்திற்கும் பொதுவான, முக்கியமான பிரச்சினை என்று பார்த்தால் அது உலகம் வெப்ப மயமாதல் தான். சர்வதேச அளவில் பசுமை இல்ல விளைவு வாயுக்களை வெளியிடுவதில் சீனாவிற்கு அடுத்து அமெரிக்கா இரண்டாவது இடத்தில் உள்ளது.

இந்த ஒப்பந்தத்தை பின்பற்றுவதால் தொழிற்சாலைகள், எண்ணெய் நிறுவனங்கள் உள்ளிட்டவைகள் பொருளாதார ரீதியாக பின்னடைவை சந்திக்கும் என்பதால் டிரம்ப் இந்த முடிவை எடுத்துள்ளார்.

ஆனால் டிரம்பின் இந்த முடிவு உலகை அழிவிற்கு அழைத்துச் செல்லும் ஒரு ஆரம்பப்புள்ளி என்பதை அவர் உணர மறுத்துள்ளார் என்று கூறப்படுகிறது

 
உலகின் மிகப்பெரிய விமானம் ஒன்று வடிவமைக்கப்பட்டுள்ளதாக சர்வதேச செய்திகள் தெரிவிக்கின்றன.

உலக புகழ் பெற்ற மைக்ரோ-சொப்ட் நிறுவனத்தின் இணை நிறுவனரான போல் எலனினால் பெரிய விமானம் வடிவமைக்கப்பட்டுள்ளது.

ரொக்கட்களை கொண்டு செல்வதற்காக தயாரிக்கப்பட்டுள்ள இந்த விமானத்தில் 6 இயந்திரங்கள் பொருத்தப்பட்டுள்ளன. விமானத்தின் இறக்கைகள் 358 அடி நீளத்தை கொண்டுள்ளது. குறித்த விமானம் கால்பந்து மைதானத்தை விடவும் பெரியதாகும்.

இந்த திட்டத்திற்கு 300 மில்லியன் டொலர் செலவாகும் என 2011ஆம் ஆண்டு கணிப்பிடப்பட்டிருந்து. போல் எலனின் aerospace நிறுவனமே இந்த விமானத்தை தயாரித்துள்ளது.

இம் விமானத்தில் கிட்டத்தட்ட 5 இலட்சம் ராத்தல் நிறையுடனான பொருட்களை கொண்டு செல்ல முடியும் என குறிப்பிடப்படுகின்றது.

பிலிப்பைன்ஸ் நாட்டில் தீவிரவாதிகளைக் குறிவைத்து இராணுவம் நடத்திய வான்வெளி ஒத்திகைத் தாக்குதலில் குறி தவறியதால் சொந்த வீரர்கள் 11 பேர் பரிதாபமாக உயிரிழந்தனர்.

பிலிப்பைன்ஸ் நாட்டில் மாராவி தீவு பகுதிகளை ஐ.எஸ் தீவிரவாதிகள் கைப்பற்றி கடந்த 8 நாட்களாக பொதுமக்கள் பலரை மனிதக் கேடயங்களாகப் பிடித்து வைத்துள்ளனர்.

ஐ.எஸ். தீவிரவாதிகளை ஒடுக்குவதற்காக பிலிப்பைன்ஸ் இராணுவம் கடும் முயற்சி எடுத்து வருகிறது. அதன் ஒரு பகுதியாக பல்வேறு இராணுவ நடவடிக்கைகளுக்கான ஒத்திகைகள் இடம்பெற்று வருகின்றன.

இந்நிலையில், ஒத்திகையின் போது இராணுவ ஹெலிகாப்டரில் இருந்து வீசப்பட்ட சிறிய ரக ஏவுகணைகள் துரதிர்ஷ்டவசமாக குறிதவறி சொந்த வீரர்களின் நிலைகளைத் தாக்கியது. இந்த தாக்குதலில் 11 வீரர்கள் கொல்லப்பட்டனர். 8 வீரர்கள் காயமடைந்து மருத்துவமனையில் சிகிச்சைக்காக அனுமதிக்கப்பட்டுள்ளனர்.

வீரர்களிடையே சரியான ஒருங்கிணைப்பு இல்லாததே இந்த மோசமான சம்பவத்திற்கு காரணம் என இராணுவ செயலாளர் டெல்பின் தெரிவித்துள்ளார். இந்த விபத்து சரியாக எந்த இடத்தில் நடந்தது என்பதை அவர் கூற மறுத்துவிட்டார்.

 
உலகின் மகா குண்டுச் சிறுவன், ஒரு சத்திர சிகிச்சையின் பலனாக தனது உடல் எடையில் ஆறில் ஒரு பங்கைக் குறைத்திருக்கிறார்.

ஆர்யா பெர்மானா என்ற பதினொரு வயது நிரம்பிய இந்தச் சிறுவன் இந்தோனேசியாவின் மேற்கு ஜாவா மானிலத்தில் உள்ள கரவங் என்ற பகுதியைச் சேர்ந்தவர். ஐந்து நிமிடம் தொடர்ந்து நடக்கவே முடியாத இந்தச் சிறுவனின் உடல் எடை 190 கிலோகிராம். இவனது வயதையொத்த ஆறு பேரின் மொத்த எடையை இவர் கொண்டிருக்கிறார்.

பிறக்கும்போது சாதாரண உடல் எடை கொண்டிருந்த ஆர்யா, தனது ஆறாவது வயது முதல் அதீத உடல் எடை அதிகரிப்பால் அவதிப்பட்டு வருகிறார்.

தினமும் ஐந்து வேளை சாப்பிடும் இவரால் உணவை உட்கொள்வதை நிறுத்த முடியாது. என்றபோதும், இந்நிலை தொடர்ந்தால் அச்சிறுவனின் உயிருக்கே ஆபத்து என்பதை மருத்துவர்கள் சிறுவனின் பெற்றோருக்கு உணர்த்தினர். கடும் முயற்சிக்குப் பின் தமது மகனை சிகிச்சைக்கு உட்படுத்த அவர்கள் சம்மதித்துள்ளனர்.

இதையடுத்து கடந்த மாதம் அச்சிறுவனுக்கான மொத்த சிகிச்சையின் முதல் பகுதியான ‘கேஸ்ட்ரிக் ஸ்லீவ்’ என்ற ஐந்து மணி நேரம் நீடித்த சத்திர சிகிச்சையை மருத்துவர்கள் செய்து முடித்தனர். உலகிலேயே இந்த சிகிச்சையைச் செய்துகொண்ட மிகக் குறைந்த வயதுடையவரும் ஆர்யாவே! இதனால் கடந்த ஒரு மாத காலத்தில் 31 கிலோ எடை குறைந்திருப்பதாக மருத்துவர்கள் தெரிவித்துள்ளனர்.

அடுத்த பன்னிரண்டு மாதங்களுக்குள் தொடர் சிகிச்சைகள் மூலம் ஆர்யாவின் இரைப்பையின் அளவைக் குறைத்து, மொத்தமாகச் சுமார் 150 கிலோ எடையைக் குறைக்கவுள்ளதாகவும் மருத்துவர்கள் தெரிவித்துள்ளனர்.