வவுனியா மாவட்ட சமூகசேவை அலுவலகம் மேற்கொண்டுவரும் வெள்ளநிவாரணப்பணிகளில் வவுனியா தொழில் நுட்பக்கல்லூரி மாணவர்களதும் ஆசிரியர்களதும் பங்களிப்பு குறிப்பிட்டுச்சொல்லக்கூடிய வகையில் அமைந்துள்ளது.

தொழில் நுட்பக்கல்லூரி அதிபர் ஆ.நற்குனேஸ்வரன் ஏற்பாட்டில் அங்கு பயிற்றுவிக்கும் ஆசிரியர்கள் மற்றும் கல்விபயிலும் மாணவர்கள் தமது பங்களிப்பை பல வகையிலும் ஆற்றியுள்ளனர்.

வெள்ள நிவாரணப்பணிகளில் மாவட்ட சமூக சேவை அலுவலகம் ஈடுபட்ட வேளை தொழில் நுட்பக்கல்லூரி மாணவர்கள் முன்வந்து வீடுகளிலும் தனியார் நிறுவனங்களிலும் நிவாரணப்பொருட்களை சேகரிக்கும் பணியில் கொழுத்தும் வெய்யிலையும் பொருட்படுத்தாது ஈடுபட்டனர்.

இது பல பொதுமக்களின் கவனத்தை ஈர்த்துள்ளது. உயர்தர மாணவர்கள் சமூகத்துடன் இணைந்து பங்காற்றுவது சமூக அக்கறையுடன் கல்வியை கற்பது நல்ல சமூகவிழுமியமாகப் பாராட்டப்படுகிறது.

மேலும் அங்கு கற்பிக்கும் ஆசிரியர்கள் இணைந்து சிறுவர்களுக்கான அவசர நிவாரணப்பொதிகளை ஒப்படைத்துள்ளனர். இவற்றை அபிவிருத்தி உத்தியோகத்தர் கி.வசந்தரூபன் உரிய வாகனங்களில் ஏற்றி அனுப்ப ஏற்பாடுகளை செய்துள்ளார் .

தொடர்ந்தும் வவுனியா மாவட்ட சமூக சேவை அலுவலகத்தில் பொதுமக்கள் நிவாரணப்பொருட்களை ஒப்படைத்த வண்ணம் உள்ளனர் என மாவட்ட சமூக சேவை உத்தியோகத்தர் செ.ஸ்ரீநிவாஸன் தெரிவித்தார்.

 
வவுனியாவிலுள்ள வலுவிழந்த குடும்பத்தலைவரைக்கொண்ட குடும்பமொன்றுக்கு ஒருதொகுதி கூரைத் தகடுகள் வடக்கு மாகாண சுகாதார அமைச்சர் டாக்டர் பத்மநாதன் சத்தியலிங்கம் அவர்களின் 2017ம் ஆண்டுக்கான நிதியொதுக்கீட்டில் வழங்கி வைக்கப்பட்டது.

நேற்று முன்தினம் கூரைத்தகடுகள் அமைச்சரின் சார்பில் அமைச்சரின் செட்டிகுளம் பிரதேச இணைப்பாளர் சிந்துஜனால் வழங்கப்பட்டது.

அடிப்படைவசதிகள் இன்றி கொட்டில் வீட்டில் நீண்டகாலமாக வதியும் வறுமைக்கோட்டக்குட்பட்ட இந்தக்குடும்பம் விடுத்த வேண்டுகோளையடுத்து அமைச்சரின் பணிப்பின்பேரில் இந்த உதவி வழங்கப்பட்டுள்ளதாக அமைச்சரின் ஊடகபிரிவினால் வெளியிடப்பட்டுள்ள செய்திக்குறிப்பில் தெரிவிக்கப்பட்டுள்ளது.

வவுனியா சுந்தரபுரம் பகுதியில் கடந்த 2006 ஆம் ஆண்டு இடம்பெற்ற கொலை தொடர்பில் ஒரே குடும்பத்தைச் சேர்ந்த மூன்று பேருக்கு இன்று (01.06) மரண தண்டனை விதிக்கப்பட்டுள்ளது.

இந்த வழக்கு வவுனியா மேல் நீதிமன்ற நீதிபதி பாலேந்திரன் சசிமகேந்திரன் முன்னிலையில் இன்று விசாரணைக்கு எடுத்துக்கொள்ளப்பட்டது.

இதன்போது குற்றவாளிகள் மீதான அனைத்து குற்றச்சாட்டுக்களும் சந்தேகத்திற்கிடமின்றி நிரூபிக்கப்பட்டமையால் மூவருக்கும் மரண தண்டனை விதித்து நீதிபதி தீர்பளித்துள்ளார்.

மேலும், குற்றவாளிகளுக்கு தலா பத்தாயிரம் ரூபா அபராதம் விதிக்கப்பட்டுள்ளதுடன், சம்பவத்தில் காயமடைந்த இளைஞருக்கு ஐந்து இலட்சம் ரூபா நட்டஈடு வழங்க வேண்டும் எனவும் நீதிபதி உத்தரவிட்டுள்ளார்.

சுந்தரபுரத்தில் கடந்த 2006 ஆம் ஆண்டு ஜூலை மாதம் 21 ஆம் திகதி 24 வயது இளைஞர் கத்தியால் குத்தி கொலை செய்யப்பட்டிருந்தார்.

இதேவேளை வவுனியா மூன்றுமுறிப்பு பகுதியில் கடந்த 2010 ஆம் ஆண்டு ஆராச்சிலாகே தர்மகீர்த்தி என்ற குடும்பத்தலைவர் படுக்கை அறையில் வைத்து எரிக்கப்பட்ட சம்பவத்துடன் தொடர்புபட்டுள்ளார் என்ற சந்தேகத்தில் அவரது மனைவியான ரோகினி தமயந்தினி என்பரைக்கைது செய்த பொலிசார் மேற்கொண்ட விசாரணைகளின் பின்னர் நீதவான் நீதிமன்றில் இடம்பெற்ற விசாரணைகள் கடந்த 2014.01.25 அன்று சட்டமா அதிபர் திணைக்களத்தினால் வவுனியா மேல் நீதிமன்றத்திற்கு குற்றப்பத்திரம் சமர்ப்பிக்கப்பட்டு விசாரணைகள் இடம்பெற்று வந்தது.

இதையடுத்து இன்று வவுனியா மேல் நீதிமன்ற நீதிபதி பாலேந்திரன் சசிமகேந்திரன் குற்றச்சாட்டுக்கள் சந்தேகத்திற்கு அப்பால் நிரூபிக்கப்பட்டள்ளதால் அவரது மனைவியான ரோகினி தமயந்தி என்பவரே கணவனை கொலை செய்துள்ளார் என்று விசாரணைகளிலிருந்து நிரூபிக்கப்பட்டுள்ளது. எனவே எதிரிக்கு மரண தண்டனை வழங்கி தீர்ப்பளிக்கப்பட்டள்ளதாக நீதிபதி தனது தீர்ப்பில் தெரிவித்துள்ளார்.

2008ஆம் ஆண்டு வவுனியா சாஸ்திரிகூழாங்குளம் பகுதியில் வீட்டிற்குள் புகுந்து அங்கிருந்து தங்க நகைகள் மோதிரம் என்பனவற்றை கொள்ளையடித்ததுடன் அங்கு இருந்த சிவகுமார் இந்துமதி என்ற பெண்மணியை கொலை செய்த குற்றத்திற்காக இளைஞன் ஒருவர் கைது செய்யப்பட்டு விளக்கமறியலில் வைக்கப்பட்டு விசாரணைகள் இடம்பெற்று வந்தது.

சட்டமா அதிபர் திணைக்களத்தினால் 2016.06.02 வவுனியா மேல் நீதிமன்றத்தில் வழக்கு விசாரணைகள் இடம்பெற்று வந்தது. இன்று வவுனியாமேல் நீதிமன்ற நீதிபதி பாலேந்திரன் சசிமகேந்திரன் குறித்த குற்றச்சாட்டிற்கு எதிரியான வி.கனகமனோகரன் என்பவருக்கு வீட்டிற்குள் புகுந்து கொள்ளையடித்த குற்றத்திற்கு 10வருட சிறைத்தண்டனையும் சி. இந்துமதி என்பவரை படுகொலை செய்த குற்றத்திற்கு சந்தேகத்திற்கு அப்பால் நிரூபிக்கப்பட்டள்ளதால் எதிரிக்கு மரண தண்டனை வழங்கித்தீர்ப்பளித்தார்.

 
மக்களின் சமூக பொருளாதார கட்டமைப்பைச் சீரழிக்கும் சாராயக்கடைகளை இழுத்து மூட அணிதிரளுமாறு சமூக விழிப்புணர்வுக்கான மக்கள் அமைப்பினரால் நேற்று பிற்பகல் வவுனியா மத்திய பேருந்து தரிப்பிடப்பகுதிகளிலுள்ள கடைகள், பேருந்து பயணிகளிடம் துண்டுப்பிரசுர விழிப்புணர்வு நடவடிக்கை இடம்பெற்றது.

மதுவால் சீரழியும் இளைஞர்களையும் கிராமங்களையும் மீட்டெடுப்போம் என்று துண்டுப்பிரசுரத்தில் தெரிவிக்கப்பட்டுள்ளது. இதில் சமூக விழிப்புணர்வுக்கான மக்கள் அமைப்பின் பிரதிநிதிகள் பலரும் கலந்து கொண்டனர்.

 
நாட்டில் அண்மையில் இடம்பெற்ற இயற்கை அனர்த்தத்தினால் பாதிக்கப்பட்ட மக்களுக்காக உணவுப் பொருட்கள் ஏனைய அடிப்படைத் தேவைகளுக்கான பொருட்கள் வவுனியா அரச வைத்திய அதிகாரிகள் சங்கத்தினால் பாடசாலைகள் மற்றும் திணைக்களங்களில் சேகரிக்கப்பட்ட உலர் உணவுப் பொருட்கள் குறித்த பாதிக்கப்பட்ட பகுதிகளுக்கு அனுப்பிவைக்கப்பட்டுள்ளதாக வவுனியா அரச வைத்திய அதிகாரிகள் சங்கத் தலைவர் வைத்தியர் எம்.எம்.எம்.அனஸ் தெரிவித்துள்ளார்.

அத்துடன் இதற்காக அமைக்கப்பட்ட விஷேட மையத்தில் வவுனியா வைத்தியசாலையில் பணிபுரியும் வைத்தியர்கள், தாதியர்கள் மற்றும் ஊழியர்கள் உதவி வழங்கப்பட்டு வருவதாகவும் அரச வைத்திய அதிகாரிகள் சங்கத்தினால் வவுனியா கிளையின் வைத்தியர்கள் குழு ஒன்று பாதிக்கப்பட்ட பகுதிகளுக்கு அனுப்பிவைக்கப்பட்டுள்ளதாகவும் சுழற்சி முறையில் மேலும் வைத்தியர்கள் அனுப்பிவைக்க நடவடிக்கைகள் மேற்கொள்ளப்பட்டுள்ளதாகவும் வவுனியா அரச வைத்திய அதிகாரிகள் சங்கத் தலைவர் எம்.எம்.எம்.அனஸ் மேலும் தெரிவித்துள்ளார்.

வெற்றிகரமாக தனது 4வது அகவையை நிறைவு செய்து, 5வது ஆண்டில் தடம்பதிக்கும் வவுனியா நெற் இணையத்திற்கும், அதன் நிர்வாகக் குழுவினர் மற்றும் ஊழியர்கள் அனைவருக்கும் எனது உள்ளங்கனிந்த நல்வாழ்த்துக்களையும், பாராட்டுக்களையும் தெரிவித்துக்கொள்கின்றேன்.

வவுனியா நெற் இணையம் கடந்த 4 வருடங்களில் பலவேறு விதமான சிக்கல்கள், தடங்கல்கள், பிரச்சனைகளை சந்தித்து அவை யாவற்றையும் உடைத்தெறிந்து தமிழ் பேசும் பல ஆயிரக்கணக்கான இணைய பாவனையாளர்களின் அபிமான இணையமாகவும், வவுனியா மாவட்டத்தின் முன்னனி செய்தி வழங்கும் இணையமாகவும் மாற்றம் பெற்றுள்ளது.

தனது செய்திகளை வேகமாக வழங்கும் அதேநேரம் நடுநிலைமையாகவும், உண்மைத்தன்மையாகவும், பக்கச்சார்பின்றி வழங்குவதனை தனது சிறப்பம்சமாக கொண்டு வவுனியா நெற் இணையம் இன்று வரையில் தனது ஊடகப் பணியை ஆற்றி வருகின்றது என்றால் அதனை பாராட்டாமலும், மெச்சாமலும் இருக்கமுடியாது.

ஊடக தர்மத்திற்குட்பட்டு பணியாற்றிவரும் வவுனியா நெற் இணையத்தின் ஊடகவியலாளர்களையும் இந்நேரத்தில் பாராட்ட கடமைப்பட்டுள்ளேன்.

அவ்வகையில் வவுனியா நெற் இணையம் எதிர்காலத்தில் மேலும் வளர்ச்சி பெறவும், தொடர்ந்தும் தமிழ் பேசும் இணைய பாவனையாளர்களின் அபிமான இணையமாகவும் திகழ இறைவனை வேண்டுவதுடன் எனது வாழ்த்துக்களையும், ஒத்துழைப்புக்களையும் தெரிவித்துக் கொள்கின்றேன்.

என்றும் சமூகப்பணியில்,

பாலச்சந்திரன் சிந்துஐன்.
வடமாகாண சுகாதார அமைச்சரின் இணைப்புச்செயலாளர்,
தலைவர் & ஸ்தாபகர் – கலைமகள் நற்பணி மன்றம்.

 
நேற்று (31.05.2017) சர்வதேச புகைத்தல் எதிர்ப்பு தினம் அனுஸ்டிக்கபட்டது. இதனை முன்னெடுக்கும் வகையில் யுரேனஸ் இளைஞர் கழகத்தினர் சமளங்குளம் அரசினர் தமிழ் கலவன் பாடசாலை மாணவர்களுக்கு குறிப்பிட்ட பாடசாலை மண்டபத்தில் விசேட கருத்தரங்கு ஒன்றை நடத்தியிருந்தனர்.

இக்கருத்தரங்கு யுரேனஸ் இளைஞர் கழகத்தின் தலைவர் கணேசலிங்கம் சிம்சுபன் தலைமையில் ஏற்பாடு செய்யப்பட்டிருந்ததுடன் இதனை Adic Lanka நிறுவனத்தின் ஊழியர் அருளானந் விரிவுரையாளராக செயற்பட்டிருந்தார்.

இந்நிகழ்வில் மாணவர்கள் ஆசிரியர்கள் மற்றும் யுரேனஸ் இளைஞர் கழக அங்கத்தவர்கள் கலந்துகொண்டனர்.

அத்தோடு சிகரட் கம்பனியின் அடுத்த இலக்கு உங்கள் பிள்ளைகளே என்ற செய்தியையும் யுரேனஸ் இளைஞர் கழகத்தினர் பிரசுரங்கள் மூலம் அனைவருக்கும் கையளித்ததுடன் பொது இடங்களில் இது தொடர்பான சுவரொட்டிகள் ஒட்டப்பட்டமை குறிப்பிடத்தக்கது.

 
வடமாகாணசபை உறுப்பினர் மயில்வாகனம் தியாகராசாவினால் கடந்த 29.05.2017 அன்று கோழிவளர்ப்பிற்கான உதவிவழங்கப்பட்டது.

வடமாகாணசபை உறுப்பினர் மயில்வாகனம் தியாகராசா தனக்கு குறித்தொதுக்கப்பட்ட 2017ம் ஆண்டுக்கான பிரமாண அடிப்படையிலான மூலதன நன்கொடை நிதியில் இருந்து வவுனியா மாவட்டத்தில் மிகவும் வறியகுடும்பங்களின் வாழ்வாதாரத்திற்காக ஒருமாத வயதுடைய நல்ல இன கோழிக்குஞ்சுகள் வவுனியா மாவட்ட கால்நடை வைத்திய அலுவலகத்தில் வைத்து பயனாளிகளுக்கு வழங்கிவைக்கப்பட்டுள்ளது.