நாட்டின் தென்மேற்கு பகுதியில் அடைமழையுடன் கூடிய காலநிலை மேலும் தொடரும் என இலங்கை வளிமண்டலவியல் திணைக்களம் அறிவித்துள்ளது.

மேல், சப்ரகமுவ, தெற்கு, மத்திய மற்றும் வடமேல் மாகாணங்களில் இடைக்கிடையே மழை அல்லது இடியுடன் கூடிய மழை பெய்யும் என குறித்த திணைக்களம் சுட்டிக்காட்டியுள்ளது.

சில இடங்களில் 100 மில்லிமீற்றருக்கும் அதிகமான அடை மழை பெய்யும் என எதிர்பார்க்கப்படுகின்றது.

கிழக்கு மற்றும் ஊவா மாகாணங்களில் மாலை 2 மணிக்கு பின்னர் சில இடங்களில் மழை அல்லது இடியுடன் கூடிய மழை பெய்யக்கூடும்.

இதேவேளை விசேடமாக மத்திய மலைநாட்டு பிரதேசங்களில் மணிக்கு 50 கிலோ மீற்றர் வேகத்தில் காற்று வீசக்கூடும் என குறிப்பிடப்பட்டுள்ளது.

அத்துடன் நாட்டை சுற்றியுள்ள கடல் பிரதேசங்களில் மணிக்கு 60 முதல் 40 கிலோ மீற்றர் வேகத்தில் காற்று வீசக்கூடும் அவதானம் காணப்படுகின்றது.

எனவே கடல் பிரதேசங்களில் கடல் கொந்தளிப்பாக காணப்படும் எனவும் இது தொடர்பில் அவதானமாக இருக்குமாறும் வளிமண்டலவியல் திணைக்களம் விடுத்துள்ள அறிக்கையில் எச்சரித்துள்ளது.

இதேவேளை நேற்று பெய்த அடைமழை காரணமாக கொழும்பிலும் அதன் சுற்றுப்புறங்களிலும் பெரும் பாதிப்புகள் ஏற்பட்டுள்ளன. நேற்று கொழும்பு மாவட்டத்தில் அடைமழை பெய்ததுடன் பலத்த காற்றும் வீசியது. இதனால் கொழும்பின் பல இடங்களில் மரங்கள் சரிந்து வீழ்ந்ததால் வாகன போக்குவரத்து பாதிக்கப்பட்டது. கிரான்பாஸ், தெமட்டகொட, பொரளை, கிருலப்பனை, ஹைலெவல் வீதி, தும்புல்ல சந்தி முதலான இடங்களில் கடும் வாகன நெரிசல் ஏற்பட்டதாக பொலிஸ் தலைமையகம் அறிவித்துள்ளது.

யாழ்ப்பாணத்தில் பாதுகாப்பு நடவடிக்கையில் ஈடுபட்டிருந்த பொலிஸ் வாகனம் மீது இனந்தெரியாத நபர்களால் துப்பாக்கி பிரயோகம் மேற்கொள்ளப்பட்டுள்ளது.

பளை பொலிஸ் பிரிவுக்கு உட்பட்ட கரந்தவேளி சந்தியில் நேற்று நள்ளிரவில் இந்த அனர்த்தம் ஏற்பட்டுள்ளது.

துப்பாக்கி பிரயோகம் மேற்கொண்ட வானத்தில் பயணித்த பொலிஸாருக்கு எந்தவித காயங்களும் ஏற்படவில்லை.

இந்த சம்பவம் காரணமாக இந்த பகுதி மக்களிடையே பதற்ற நிலையும், அச்சமும் ஏற்பட்டுள்ளது.

துப்பாக்கி பிரயோகம் இடம்பெற்ற சம்பவ இடத்தில் இராணுவம் மற்றும் பொலிஸார் குவிக்கப்பட்டுள்ளதாக தெரிவிக்கப்படுகின்றது.

இந்த சம்பவம் தொடர்பாக பொலிஸார் மேலதிக விசாரணைகளை மேற்கொண்டு வருகின்றனர்

ஹொங்கொங் அரசாங்கத்தின் நடவடிக்கை தொடர்பில் அமெரிக்காவின் முன்னாள் புலனாய்வுதுறை அதிகாரி எட்வட் ஸ்னோவ்டன் கண்டனம் வெளியிட்டுள்ளார்.

தனக்கு அடைக்கலம் வழங்கிய அகதிகளின் புகலிடக் கோரிக்கை நிராகரிக்கப்பட்டமை தொடர்பில் ஹொங்கொங் அரசாங்கத்திற்கு கண்டனம் வெளியிட்டுள்ளார்.

2013ஆம் ஆண்டு அமெரிக்க புலனாய்வுத் துறை அதிகாரியாக செயற்பட்ட எட்வட் ஸ்னோடன், புலனாய்வுத் துறையின் ரகசியங்களை பகிரங்கப்படுத்திய பின்னர் அமெரிக்காவை விட்டுத் தப்பிச் சென்றிருந்தார்.

அதன் போது ஹொங்கொங்கில் அவர் மறைந்திருந்த இரண்டு வார காலத்தில் மூன்று இலங்கையர்கள் மற்றும் ஒரு பிலிப்பைன்ஸ் நாட்டவர்கள் அவருக்கு தங்குமிடம் வழங்கியிருந்தனர்.

குறித்த புகலிட கோரிக்கையாளர்களின் வழக்குகளுக்கு ஹொங்கொங் அரசாங்கம் உதவும் எனவும், தங்களின் தாய் நாட்டிற்கு அனுப்பப்படாமல் புகலிடம் வழங்கப்படும் எனவும் அவர்கள் பல வருடமாக நம்பியிருந்தனர். எனினும் தற்போது நாடு கடத்தலை எதிர்நோக்கியுள்ளனர்.

கடந்த திங்கட்கிழமை அந்நாட்டு குடிவரவு அதிகாரிகளினால் அவர்களின் புகலிடக் கோரிக்கை நிராகரிக்கப்பட்டது.

இந்நிலையில் குறித்த தம்பதியினர் நாடு கடத்தப்படும் சூழ்நிலைக்குத் தள்ளப்பட்டுள்ளனர். இதனால் தமக்கு சொந்த நாட்டில் ஆபத்து ஏற்படும் என்று அவர்கள் அச்சம் வெளியிட்டுள்ளனர்.

எனினும் இவர்கள் தாய் நாட்டிற்கு சென்றால் ஆபத்து ஏற்படும் என்பதற்கு போதுமான ஆதாரங்கள் இல்லையென ஹொங்கொங் அதிகாரிகள் தெரிவித்துள்ளனர்.

இதேவேளை, ” அவர்கள் சித்திரவதை, துஷ்பிரயோகம், மிரட்டல் மற்றும் போர், போன்ற மிகவும் கடினமான சூழ்நிலைகள் ஆகியவற்றால் தாய் நாடுகளில் இருந்து தூக்கி எறியப்பட்ட நல்லவர்கள்” என ஸ்னோடென் இன்று வெளியிடப்பட்ட ஒரு வீடியோவில் குறிப்பிட்டுள்ளார்.

தங்களை பாதுகாக்குமாறு கோரியவர்கள் தற்போது வெளிப்படையான அநீதியை எதிர்கொண்டுள்ளார்கள் என ஸ்னோடென் தெரிவித்துள்ளார்.

“ஹொங்காங் அரசாங்கத்தில் உள்ள ஒருவர் இந்த குடும்பங்களை உடனடியாக இல்லாமல் செய்ய வேண்டும் என்று முடிவு செய்திருக்கிறார், என ஸ்னோவ்டென் ஒரு தெளிவான வெள்ளை சுவருக்கு எதிரில் நின்று பேசிய வீடியோவில் கூறியுள்ளார்.

நம்பகத்தன்மையும் வழங்கக்கூடிய பொறுப்புக்கூறும் செயல்முறை ஒன்றை இலங்கை அரசு உருவாக்கவேண்டும் என கனேடியப் பிரதமர் ரதமர் ஜஸ்டின் ரூடோ தெரிவித்துள்ளார்.

இலங்கையில் இடம்பெற்ற இறுதிப் போரின் 8 ஆவது ஆண்டை நினைவு கூர்ந்து கனேடியப் பிரதமர் ஜஸ்டின் ரூடோ நேற்று வெளியிட்ட அறிக்கையில் இந்த விடயம் தெரிவிக்கப்பட்டுள்ளது. அவர் வெளியிட்டுள்ள அறிக்கையில்,

இலங்கையின் இறுதிப் போரின் எட்டாவது வருட நிறைவை நாம் இன்று நினைவு கூறுகின்றோம்.போரினால் பாதிக்கப்பட்டவர்களுக்கும், அவர்களின் குடும்பத்தினருக்கும் எனது ஆழ்ந்த அனுதாபங்களை தெரிவிக்கின்ற அதேவேளையில், கடந்த 26 வருட யுத்தத்தில் இழந்த உயிர்களின் கெளரவத்தை வலியுறுத்தி அவர்களை நினைவுகொள்வோம்.

எமக்கு ஏற்பட்ட பேரதிர்ச்சியையும், இழப்புக்களையும் நினைவுகூரும் இந்த வேளையில், நாம் போரின் தாக்கத்திற்கு உள்ளானவர்களின் போர் வடுக்களை ஆற்றுவதற்கு உதவுவதுடன், முரண்பாடுகளை நீக்கி நீண்டகால சமாதானத்தை நாட்டிலே உருவாக்குவதற்காக தொடர்ந்தும் உழைக்க வேண்டும்.

போரினால் பாதிக்கப்பட்ட மக்களிற்கு நம்பிக்கையையும், நம்பகத்தன்மையும் வழங்கக்கூடிய பொறுப்புக்கூறும் செயல்முறை ஒன்றை இலங்கை அரசு உருவாக்கவேண்டும் என்பதை நான் மீண்டும் வலியுறுத்திக் கூறுகின்றேன்.

இதற்கு ஏதுவாக சர்வதேச, பொதுநலவாய நாடுகளின் விசாரணையாளர்கள், வழக்கறிஞர்கள் மற்றும் நீதிபதிகள் ஆகியோரின் பங்களிப்பை உறுதிப்படுத்துவதன் மூலம் இலங்கை அரசு தனது சர்வதேச கடப்பாட்டை நிறைவேற்ற வேண்டும்.

கனேடியத் தமிழர்களுக்கு என் ஆழ்ந்த அனுதாபத்தையும் ஆதரவையும் தெரிவித்துக் கொள்வதுடன், எமது கூட்டாட்சியின் 150 வது வருடத்தை நிறைவு செய்கின்ற வேளையில், தமது துயரங்களைத் தாண்டி கனேடியத் தேசத்தின் வளர்ச்சிக்குத் தமிழ் கனேடியர்கள் வழங்கிய பங்களிப்புகளை நாம் அங்கீகரிக்கின்றோம் என்று அவர் வெளியிட்டுள்ள அறிக்கையில் குறிப்பிடப்பட்டுள்ளது.