நாட்டின் பல மாவட்டங்களில் மார்ச் மாதம் வரை மழையை எதிர்பார்க்க முடியாது என வளிமண்டவிலயல் திணைக்களம் எதிர்வுகூறியுள்ளது.

குழாய் நீரை விநியோகிக்க மூன்று மாதங்களுக்கு போதுமான நீரே தற்போது காணப்படுவதாக நீர் வழங்கல் வடிகாலமைப்பு சபை தெரிவித்துள்ளது.

நாட்டில் தொடரும் வறட்சியுடனான காலநிலை காரணமாக விவசாயிகள் பெரும் சிரமங்களை எதிர்நோக்கியுள்ளனர்.

50 அல்லது 60 வீதமான நிலத்தில் விவசாயம் செய்யுமாறு விவசாயிகளுக்கு ஆலோசனை வழங்கிய போதிலும், 75 வீதமான நிலப் பரப்பில் விவசாயம் செய்யப்படடுள்ளதாக நீர்பாசனத் திணைக்களம் தெரிவித்துள்ளது.

அதில் 24 வீதமான சுமார் 35 ஆயிரம் ஏக்கர் விளைச்சல் அழிவடையும் நிலையை எதிர்கொண்டுள்ளதுடன், 76 வீதமான விளைச்சலினை பாதுகாக்க முடியும் என நீர்பாசனத் திணைக்களம் குறிப்பிட்டுள்ளது.

பருவகாலத்தில் 8000 ஏக்கருக்கும் அதிகமான வயல் நிலத்தில் விவசாயம் மேற்கொள்ளப்படும் நாச்சாதுவ பிரதேசத்தில் இம்முறை 3000 ஏக்கரில் விவசாயம் மேற்கொள்ளப்பட்டுள்ளது.

இதேவேளை, பயிர்செய்கையை மட்டுப்படுத்துமாறு தமக்கு அதிகாரிகள் அறிவிக்கவில்லை என பலாங்கொட விவசாயிகள் தெரிவித்தனர்.

குடிநீர் இன்றி பல மாவட்டங்களைச் சேர்ந்த மக்கள் சிரமங்களை எதிர்கொண்டுள்ளனர். கண்டி, பொலன்னறுவை, அம்பாறை மற்றும் ஹம்பாந்தோட்டை ஆகிய மாவட்டங்களுக்கான நீர் விநியோகம் மட்டுப்படுத்தப்பட்டுள்ளதாக நீர் வழங்கல் மற்றும் வடிகாலமைப்பு சபை தெரிவித்தது.

தெதுரு ஓயாவின் நீர் மட்டம் குறைவடைந்துள்ளமையினால் குருநாகல் நகருக்கான நீர் விநியோகம் 12 மணித்தியாலங்களுக்கு மட்டுப்படுத்தப்பட்டுள்ளது.

ஹட்டன் நகருக்கு நீர் விநியோகிக்கும் சிங்கமலை மற்றும் இன்மோரி நீர்த்தேக்கங்களின் நீர் மட்டம் குறவைடைந்துள்ளமையால் ஹட்டன் நகருக்கான நீர் விநியோகம் மட்டுப்படுத்தப்பட்டுள்ளது.

மவுசாலை – காசல் ரீ மற்றும் மேல் கொத்மலை ஆகிய நீர் தேக்கங்களின் நீர் மட்டம் குறைவடைந்து வருகின்றது. மொனராகலை நகரை அண்மித்த சில பகுதிகளுக்கான நீர் விநியோகமும் மட்டுப்படுத்தப்பட்டுள்ளது.

நாட்டின் நீர் தேவையின் 55 வீதம் இயற்கை நீர் நிலையங்கள் மூலமே பெற்றுக்கொள்ளப்படுகின்றது.

தொடரும் நிலமையின் கீழ் பிரதான நீர் தேக்கங்களின் மின் உற்பத்தியினை மட்டுப்படுத்துவதற்கு இலங்கை மின்சார சபை இணக்கம் தெரிவித்துள்ளதாக நீர் வழங்கல் மற்றும் வடிகாலமைப்பு சபையின் தலைவர் குறிப்பிட்டார்

புதிதாக 400 குழாய் கிணறுகளை அமைப்பதற்கு நடவடிக்கை எடுத்துள்ளதுடன், நாடளாவிய ரீதியில் மேலும் 1000 குழாய் கிணறுகளை புனரமைப்பதற்கு முயற்சிகள் மேற்கொள்ளப்பட்டுள்ளன.

சகல போயா தினங்கள் மற்றும் விசேட தினங்களில் மதுபானசாலைகள் மூடப்பட வேண்டும் என இலங்கை மதுவரித்திணைக்களம் அறிவித்துள்ளது.

2017ம் ஆண்டில் மதுபானசாலைகள் மூடப்பட வேண்டிய தினங்கள் குறித்த அட்டவணையை வௌியிட்டுள்ள மதுவரித் திணைக்களம் இ்ந்த அறிவித்தலையும் விடுத்துள்ளது.

இதன்படி, போயா தினம், சுதந்திர தினம், புத்தாண்டு தினம் மற்றும் அதற்கு முதல் தினம், ரம்ழான் பண்டிகை, மது ஒழிப்பு தினம், மற்றும் நத்தார் தினம் உள்ளிட்ட விசேட தினங்களில் மதுபான சாலைகள் மூடப்பட வேண்டும் என அறிவிக்கப்பட்டுள்ளது.

 
அவுஸ்திரேலியாவில் உள்ள இலங்கை இளைஞன் தினேஷ் பலிபன (32) தற்போது அனைவராலும் பேசப்பட்டு வருகின்றார்.

நெஞ்சு பகுதிக்கு கீழ் செயலற்ற நிலையில் இருக்கும் தினேஷ் பலிபன அவுஸ்திரேலியாவின் பிரிஸ்பேன் பல்கலைக்கழகத்தில் பயின்று வைத்திய கலாநிதியாக வெளியேறி உள்ளார்.

குறித்த இலங்கை பிரஜை பிரிஸ்பேன் பல்கலைக்கழகத்தில் வைத்திய கற்கையைமேற்கொண்டு வந்த நிலையில் பிலிஸ்பேனில் வசிக்கும் அவரது பெற்றோரை சந்திக்க சென்ற போது ஏற்பட்ட விபத்தில் நெஞ்சு பகுதிக்கு கீழ் செயலற்ற நிலைக்கு உள்ளானார்.

இதன் காரணமாக, தினேஷ் பலிபனவின் வைத்திய கல்வி நடவடிக்கைகள் பாதிக்கப்பட்டிருந்தன. குறித்த விபத்தில் பாதிக்கப்பட்டுடிருந்த தினேஷ் ஐந்து வருடங்களுக்கு பின்னர் மீண்டும் தனது பட்டப்படிப்பை தொடர தீர்மானித்தார்.

வைத்தியராக வேண்டும் என்ற எண்ணத்தில் கல்வி நடவடிக்கைகளை கடந்த இரு வருடங்களுக்கு முன் அவுஸ்திரேலிய பிரிஸ்பேன் பல்கலைக்கழகத்தில் கல்வியை ஆரம்பித்தார்.

இந்த நிலையில் அவர் தனது வைத்திய பட்டப்படிப்பை தற்போது நிறைவு செய்து சாதனை படைத்துள்ளார்.

அவுஸ்திரேலியாவில் பக்கவாதத்தால் பாதிக்கப்பட்ட நிலையில் வைத்தியப்பட்டம் பெற்றுள்ள இரண்டாவது நபர் என்ற வரலாற்றுச் சாதனையையும் இலங்கையில் பிறந்த தினேஷ் பலிபன பெற்றுள்ளார்.

 
இலங்கை உட்பட உலகெங்கிலுமுள்ள தமிழர்கள் தைத்திருநாளை சிறப்பாக கொண்டாடி வருகின்றனர். யாழ்.நல்லூர் ஆலயத்தில் பொங்கள் தினத்தை முன்னிட்டு விசேட பூஜை வழிபாடுகள் இடம்பெற்று வருகின்றன.

இந்த நிலையில் பூஜை வழிபாடுகளில் கலந்துக் கொள்வதற்காக தமிழர்கள் தங்கள் பாரம்பரிய ஆடைகளை அணிந்து ஆலயத்திற்கு வருகை தந்து வழிபாடுகளை மேற்கொண்டுள்ளனர்.

குறித்த பூஜை வழிபாடுகளில் கலந்து கொள்வதற்காக வெளிநாட்டவர்களும் பாரம்பரிய ஆடைகளை அணிந்து ஆலயத்திற்கு சென்று வழிபாடுகளில் ஈடுப்பட்டுள்ளனர்.

பொங்கல் பண்டிகையை முன்னிட்டு வெளிநாட்டவர் வேஷ்டி, சேலை அணிந்து பொங்கல் தினத்தை கொண்டாடியுள்ளனர்.

தமிழர்களின் கலாசாரம், பண்பாடு, பழக்கவழக்கங்கள், மொழிகள் ஆகியவற்றை அறிந்து கொள்வதற்காகவே வெளிநாடுகளைச் சேர்ந்தவர்கள் இவ்வாறு வழிபாடுகளில் ஈடுப்பட்டு வருகின்றனர்.

தமிழர்களின் பாரம்பரிய பண்டிகையான தைப்பொங்கல் கொண்டாட்டம் உலகளாவிய ரீதியில் தமிழ் மக்களால் கொண்டாடப்பட்டு வருகின்றது.

அந்த வகையில் உலகம் முழுவது தமிழர்கள் வாழும் பகுதிகளில் உள்ள அரசியல் பிரமுகர்கள் தமது வாழ்த்துச் செய்தியினை தெரிவித்து வருகின்றனர்.

இந்நிலையில் கனடா நாட்டின் பிரதமர் ஜஸ்டின் ரூடோ கனடாவில் வாழும் தமிழ் மக்களுக்கு தனது பொங்கல் வாழ்த்தினை தமிழில் தெரிவித்துள்ளார்.

இந்திய, இலங்கை தலைவர்களிடம் இல்லாத பண்பும், அவரது தமிழ் பேசும் விதமும் தங்களை மிகவும் கவர்ந்துள்ளதாக சமூக வலைத்தளங்களில் மக்கள் கருத்துக்களை வெளியிட்டுள்ளனர்.

மேலும் கனடாவில் ஆண்டு தோறும் தை மாதத்தினை நாடளாவிய ரீதியில் தமிழர் மரபுகளை அனுஷ்டிப்பதற்குரிய மாதமாக அங்கீகரிக்கப்பட்டுள்ளமை குறிப்பிடத்தக்கது.