நிதி நிறுவனங்களில் பெற்றுக்கொள்ளப்பட்ட நுண் கடனை திருப்பிச் செலுத்த முடியாது மூன்று பிள்ளைகளின் தாய் ஒருவா் தற்கொலை செய்துகொண்டுள்ளார். இச்சம்பவம் இன்று இடம்பெற்றுள்ளதாக தெரிவிக்கப்படுகிறது.

முல்லைத்தீவு விசுவமடு இளங்கோபுரம் மூன்றாம் திட்டம் தேராவில் பகுதியைச் சேர்ந்த 32 வயதான அம்பிகைபாலன் ஜெகதீஸ்வரி என்பவரே இவ்வாறு தற்கொலை செய்துள்ளாா்.

தற்கொலை செய்யும் முன் அவர் எழுதியதாக சந்தேகிப்படும் கடிதம் ஒன்றும் மீட்கப்பட்டுள்ளது.

அக்கடிதத்தில், கணவன் கைவிட்டுச் சென்றுள்ளதாகவும், அவர் திரும்பி வரவில்லை எனவும் தனது காணியை விற்று தான் பெற்ற கடன்களை செலுத்துமாறும், தனது இறுதி கிரிகைகள் முடிந்ததும் பிள்ளைகளை சிறுவர் விடுதியில் சேர்த்துவடுமாறும் எழுதப்பட்டுள்ளதாக தெரிவிக்கப்படுகிறது.

கணவனால் கைவிடப்பட்டுள்ள குறித்த பெண்ணுக்கு 12 மற்றும் 3 வயதில் பெண் பிள்ளைகளும், எட்டு வயதில் ஒரு மகனும் உள்ளமை குறிப்பிடத்தக்கது.

இதேவேளை, புதுகுடியிருப்பு பொலிஸாருக்கு தகவல் வழங்கப்பட்டு மேலதிக விசாரணைகள் முன்னெடுக்கப்பட்டு வருகின்றமை குறிப்பிடத்தக்கது.

மீன் பிடிக்க கடலுக்கு சென்ற மீனவர்களுக்கு கிடைத்த பேரதிஷ்டம் தொடர்பான சம்பவம் ஒன்று கற்பிட்டி பகுதியில் இடம்பெற்றுள்ளது.

குறித்த பகுதியில் இருந்து கடலுக்கு சென்ற மீனவர்களுக்கு பல கோடி ரூபா பெறுமதியான திமிங்கிலத்தின் கழிவு அல்லது அம்பர் எனப்படும் அரியவகை பொருள் கிடைத்துள்ளதாக தெரிவிக்கப்படுகின்றது.

சுமார் 34 கிலோ கிராம் நிறையுடைய அம்பர் கிடைக்கப்பெற்றுள்ளதாக தெரிவிக்கப்பட்டுள்ளது. எனினும், இதனை எடுத்து வந்த மீனவர்களை கைது செய்துள்ளதாக பொலிஸார் தெரிவித்துள்ளனர்.

அத்துடன், குறித்த மீனவர்களை நீதிமன்றில் முன்னிலைப்படுத்துவதற்கான நடவடிக்கைகளை எடுத்துள்ளதாகவும் பொலிஸார் குறிப்பிட்டுள்ளனர்.

இதேவேளை, குறித்த மீனவர்களினால் கொண்டுவரப்பட்ட அம்பர் எனப்படும், திமிங்கிலத்தின் கழிவு ஒரு கிலோ கிராம் ஒரு கோடிக்கும் அதிகம் என கூறப்படுகின்றது.

அம்பர் எனப்படும் இந்த திமிங்கில கழிவுப் பொருளைக்கொண்டு வாசனைத்திரவியம், மருந்துப்பொருட்கள் உற்பத்தி செய்யப்படுகின்றதாக தெரிவிக்கப்பட்டுள்ளது.

குறைந்த செலவில் செயற்கை சுவாச இயந்திரமொன்றை இலங்கை மருத்துவர் ஒருவர் கண்டுபிடித்துள்ளார். இந்த செயற்கை சுவாச இயந்திரத்தை இலகுவில் எடுத்துச் செல்ல முடியும் என்பது குறிப்பிடத்தக்கது.

அனுராதபுரம் போதான வைத்தியசாலையின் பிரதிப் பணிப்பாளர்களில் ஒருவரான டொக்டர் துலான் சமரவீரவே இவ்வாறு நவீன சுவாச இயந்திரத்தை கண்டு பிடித்துள்ளார். தனது கண்டு பிடிப்பு பற்றி கூறுகையில்..

வார்டில் சிகிச்சை பெற்று வரும் நோயாளி ஒருவருக்கு, தீவிர சிகிச்சைப் பிரிவிற்கு மாற்றம் செய்யும் வரையில் இந்த புதிய கருவியின் மூலம் சுவாசம் வழங்கப்பட முடியும்.

வைத்தியசாலை ஒன்றிலிருந்து மற்றுமொரு வைத்தியசாலைக்கு நோயாளியை காவிச் செல்லும் போது நோயாளர் காவு வாகனத்தின் பற்றரியில் இந்த இயந்திரத்தைப் பொருத்தி செயற்கை சுவாசத்தை நோயாளிகளுக்கு வழங்க முடியும்.

தற்போது பலூன் போன்ற ஓர் இயந்திரத்தை நோயாளர் காவு வண்டியில் செல்லும் மருத்துவர் அல்லது தாதி அழுத்தி அழுத்தி சுவாசத்தை வழங்க வேண்டியிருக்கின்றது.

4-5 மணித்தியால பயணம் என்றால் இவ்வாறு தொடர்ச்சியாக அழுத்தி அழுத்தி செயற்கை சுவாசம் வழங்குவது சிரமமான காரியமாகும்.

பிரதான வைத்தியசாலையில் செயற்கை சுவாச இயந்திரங்கள் காணப்படுகின்றன. எனினும் இது போன்று இடம் நகர்த்த கூடிய இயந்திரங்கள் கிடையாது.

மேலும் செயற்கை சுவாச இந்திரமொன்றை கொள்வனவு செய்ய 8 முதல் 17 லட்சம் வரையில் செலவாகும்.

நான் உருவாக்கியுள்ள இந்த இயந்திரத்திற்கு வெறும் 15000 ரூபா மட்டுமே செலவாகியுள்ளது. எனவே இந்த இயந்திரத்தை உருவாக்கி வைத்தியசாலைளுக்கும் நோயாளர் காவு வண்டிகளுக்கும் வழங்கப்பட முடியும்.

இந்த இயந்திரத்தை உருவாக்க அரசாங்கத்தின் தலையீட்டுடன் சுகாதார அமைச்சின் ஊடாக நடவடிக்கை எடுக்கப்பட வேண்டுமென நான் கோருகின்றேன்.

நான் கண்டுபிடித்த தொழில்நுட்பம் மற்றும் ஏனைய உதவிகளை வழங்க தயாராக இருக்கின்றேன்.

கைகளினால் இயக்கக்கூடிய செயற்கை சுவாச இயந்திரத்தை பயன்படுத்துவது மிகவும் சிரமமானது என்பதனை அனுபவ ரீதியாக அறிந்து கொண்டதனால் இவ்வாறு, புதிய இயந்திரமொன்றை கண்டுபிடிக்கும் முயற்சியில் ஈடுபட்டேன் என டொக்டர் துலான் சமரவீர தெரிவித்துள்ளார்.

போக்குவர்த்து விதிகளை மீறும் சாரதிகளுக்கு விதிக்கப்படவுள்ளதாக உத்தேசி்க்கப்பட்ட 25,000 ரூபா அபராதம் விரைவில் அமுல்படுத்தப்படும் என பொலிஸ் மா அதிபர் பூஜித் ஜயசுந்தர அறிவித்துள்ளார்.

பொலிஸ் தலைமையகத்தில் நேற்று இடம்பெற்ற நிகழ்வொன்றில் பங்கேற்று உரையாற்றிய போதே அவர் இந்த தகவலை வௌியிட்டார்.

மோட்டார் போக்குவரத்து விதிகளை மீறுபவர்களுக்கு எதிராக வரவு செலவுத் திட்டத்தில் பரிந்துரை செய்யப்பட்ட அபராதத்தை விரைவில் அமுல்படுத்துவதற்கு நடவடிக்கை எடுக்கப்படும் என அவர் குறிப்பிட்டார்.

இது குறித்து பேச்சுவார்த்தைகள் இடம்பெற்று வருவதாக தெரிவித்த பொலிஸ்மா அதிபர் அதன் பின்னர் தராதரம் பாராது அபராதத்தை விதிக்க நடவடிக்கை எடுக்கப்படும் என்றார்.

குறித்த அபராத நடைமுறை கட்டாயமானது. தவறிழைப்போருக்கு எதிராகவே அபராதம் விதிக்கப்படும்.

வீதி ஒழுங்குகளை மதித்து அவற்றை முறையாக கடைப்பிடித்து, சட்ட ரீதியாக வாகனம் செலுத்தும் சாரதிகளுக்கு எந்தவித இன்னல்களும் ஏற்படாது என அவர் குறிப்பிட்டார்.

வீதி விதிமுறைகளை மீறும் சாரதிகளுக்கு எதிராக விதிக்கப்படும் அபராதத் தொகையை 25 ஆயிரம் ரூபாவாக அதிகரிக்கும் யோசனையில் திருத்தங்களை மேற்கொள்ள உள்ளதாக நிதி அமைச்சர் தெரிவித்துள்ளார்.

கொழும்பில் நேற்று ஊடகவியலாளர்களைச் சந்தித்தபோதே நிதி அமைச்சர் மேற்கண்ட விடயங்களைக் குறிப்பிட்டுள்ளார்.

திருத்தங்களை மேற்கொண்டு இந்த வருடத்தில் மீண்டும் சமர்ப்பிக்கவுள்ளதாகவும் நிதி அமைச்சர் குறிப்பிட்டுள்ளார்.

வீதி விதிகளை மீறும் சாரதிகளுக்கு விதிக்கப்படும் அபராதத் தொகையை 25 ஆயிரம் ரூபாவாக அதிகரிக்க 2017 ஆம் ஆண்டுக்கான வரவு – செலவுத் திட்டத்தில் நிதி அமைச்சரால் யோசனை முன்வைக்கப்பட்டமை குறிப்பிடத்தக்கது.