வவுனியா இராசேந்திரங்குளம் கிராமசேவகர் பிரிவிற்குட்பட்ட விக்ஸ்காடு என அழைக்கப்படும் கிராமத்தைச் சேர்ந்த 30 குடும்பங்களை அவ்விடத்தை விட்டு வெளியேறுமாறு வனத்துறை அதிகாரிகள் உத்தரவிட்டிருப்பதாக தெரியவருகிறது.

பல்வேறு இடங்களிலிருந்து யுத்தத்தின் காரணமாக இடம்பெயர்ந்து அகதிகளாக வவுனியாவிற்கு வந்த மக்கள் அகதிமுகாம்களிலும், உறவினர் வீடுகளிலும் வசித்துவந்த நிலையில் 2008ம் ஆண்டு பற்றைகளும் முட்செடிகளும் நிறைந்து காணப்படும் விக்ஸ்காடு என அழைக்கப்படும் பகுதியில் சுயமாகக் குடியேறியிருந்த நிலையில் யுத்தம் முடிவடைந்து பின்னரான காலப்பகுதியில் அம் மக்களுக்கான வாக்குரிமைகள் வழங்கப்பட்டுள்ளது.

இந் நிலையில் நேற்றையதினம் திடீரென விக்ஸ் காட்டு கிராமத்திற்குச் சென்ற வனத்துறை அதிகாரிகள் அம் மக்களை வெளியேற உத்தரவிட்டுள்ளதுடன், காடு வெட்டியதாக கிராம மக்கள் மீது குற்றஞ்சாட்டி நாளைய தினம் வவுனியாவில் அமைந்துள்ள வனத்துறையினரின் அலுவலகத்திற்கு வருமாறு உத்தரவிட்டுள்ளனர்.

இந்த நிலையிலே இன்று இராசேந்திரன்குளம் விக்ஸ் காட்டுப் பகுதியில் வசித்து வரும் 30 க்கும் மேற்பட்ட குடும்பங்களைச் சேர்ந்த மக்கள் அமைதியான முறையில் ஆர்ப்பாட்டத்தில் ஈடுபட்டமை குறிப்பிடத்தக்கது.

 
வவுனியா மாவட்ட செயலகத்தில் இன்று (02.01.2017) காலை 9 மணியளவில் அரசாங்க அதிபர் எம்.பி.றோஹன புஸ்பகுமார தலைமையில் அரச ஊழியர்கள் சத்தியப்பிரமாண நிகழ்வுகள் இடம்பெற்றது.

தேசியக்கொடியேற்றல் நிகழ்வுடன் ஆரம்பமான இந்நிகழ்வில் சமய மதத் தலைவர்களின் ஆசிச் செய்தியினையடுத்து அரசாங்க அதிபர், மேலதிக அரசாங்க அதிபர் தலைமையில் அரச உத்தியோகத்தர்களின் சத்தியப்பிரமானம் இடம்பெற்றது.

மாவட்ட செயலகத்தின் அனைத்து நிர்வாகக் கிளைகளில் பணபுரியும் உத்தியோகத்தர்கள், ஊழியர்கள் கலந்து கொண்டு தமது சத்தியப்பிரமாணத்தினை மேற்கொண்டனர்.

வவுனியாவில் இன்று (02.01.2016) மாலை 5 மணியளவில் சிறுமி ஒருவரை கடத்தும் முயற்சி வவுனியா பேரூந்து நிலையத்தில் வைத்து முறியடிக்கப்பட்டுள்ளது. இச்சம்பவம் குறித்த மேலும் தெரியவருகையில்,

சமூகவலைத்தளம் மூலமாக தொடர்பினை மட்டக்களப்பிலிருந்து ஏற்படுத்திய இளைஞர் ஒருவர் சுந்தரபுரம் பகுதியிலுள்ள 16 வயது சிறுமியுடன் தொடர்பினை ஏற்படுத்தி பல காலமாக பழகிவந்துள்ளார்

தொடர்ந்து அச் சிறுமியை இன்று (02.01.2016) மாலை வவுனியா பேரூந்து நிலையத்திற்கு வருமாறு குறித்த இளைஞன் அழைத்துள்ளார். குறித்த சிறுமியும் இளைஞனின் வார்த்தைக்கு இணங்கி வீட்டில் யாரும் இல்லாத சமயத்தில் உடுதுணிகளை எடுத்துக்கொண்டு வந்துள்ளார்.

சிறுமி வீட்டிலிருந்து வெளியேறுவதாக தந்தைக்கு அயலவர்களினால் தகவல் வழங்கப்பட்டுள்ளது. தந்தை உடனடியாக வவுனியா வர்த்தக நிலையத்தில் பணபுரியும் உறவினருக்குத் தகவல் வழங்கியுள்ளார்.

பேரூந்து நிலையத்தில் சிறுமி பேரூந்தில் வந்து இறங்கியதும் குறித்த இளைஞர் பேரூந்து தரிப்பிடத்தில் சிறுமியை அழைத்துச் செல்லத் தயாராக இருந்ததையடுத்து காத்திருந்த உறவினர்கள் குறித்த இருவரையும் கடுமையாகத்தாகியதுடன் வவுனியா பொலிஸ் நிலையத்தில் ஒப்படைத்துனர்.

இச்சம்பவம் தொடர்பாக மேலதிக விசாரணைகளை சிறுவர் பெண்கள் பொலிஸ் பிரிவினர் மேற்கொண்டு வருகின்றனர்.

 
வவுனியா ஒமந்தை பண்றிக்கெய்தகுளத்திலிருந்து இன்று (02.01.2016) காலை 11 மணியளவில் தாயும் மகனும் கிணற்றிலிருந்து சடலமாக மீட்க்கப்பட்டுள்ளனர். இச் சம்பவம் தொடர்பாக மேலும் தெரியவருவதாவது..

வவுனியா, ஓமந்தை, பன்றிக்கெய்தகுளம் வீதியில் அமைந்துள்ள வீடு ஒன்றின் கிணற்றில் இருந்தே, இளம் தாய் ஒருவரும் அவரது 7 வயது மகனும் இன்று இவ்வாறு சடலங்களாக மீட்கப்பட்டுள்ளனர்.

கிராம அலுவலர் அலுவலகத்திற்கு சென்றிருந்த, உயிரிழந்த பெண்ணின் மாமியார் வீட்டிற்கு வந்து பார்த்த போது தாயும் மகனும் வீட்டில் இல்லாத நிலையில் அவர்களை தேடியுள்ளனர்.

இதன்போதே அவர்கள் இருவரும் சடலங்களாக கிணற்றில் காணப்படுவதை தேடியவர்கள் கண்டுபிடித்துள்ளனர்.

இதன் பின்னர் குறித்த சம்பவம் தொடர்பில் பொலிஸாருக்கு தகவல் வழங்கப்பட்டுள்ளது. சம்பவ இடத்திற்கு வந்த பொலிஸாரின் உதவியுடன் குறித்த தாயும் மகனும் வீட்டின் கிணற்றிலிருந்து சடலங்களாக மீட்கப்பட்டுள்ளனர்.

30 வயதான சதீஸ்வரன் சுதாசினி மற்றும் 7 வயது அவரது மகன் சதீஸ்வரன் டினோஸன் என்பவர்களே இவ்வாறு சடலங்களாக மீட்கப்பட்டுள்ளனர்.

சம்பவம் தொடர்பான மேலதிக விசாரணைகளை ஓமந்தைப் பொலிஸார் மேற்கொண்டு வருகின்றமை குறிப்பிடத்தக்கது.