மத்திய கிழக்கு நாடுகளில் பணியில் ஈடுபடும் போது உயிரிழந்த 39 இலங்கை பணிப்பெண்களுக்காக அவர்களின் குடும்பங்களுக்கு 720 லட்சம் ரூபா இழப்பீடு வழங்கியதாக வெளிவிவகார அமைச்சு தெரிவித்துள்ளது.

சவுதி அரேபியா, ஐக்கிய அரபு இராஜ்ஜியம், கட்டார், குவைத், ஓமன், லெபனான், ஜோர்தான் ஆகிய நாடுகளில் உயிரிழந்த பணிப்பெண்களின் குடும்பங்களுக்கே இந்த இழப்பீடு வழங்கப்பட்டுள்ளது.

அவ்வாறு வெளிநாட்டில் உயிரிழந்த மற்றும் ஊனமடைந்துள்ள நிலையில் உள்ள இலங்கையர்களின் குடும்ப உறவினர்களுக்காக இழப்பீடு வழங்கும் நடவடிக்கை அமைச்சர் மங்கள சமரவீர மற்றும் தலதா அத்துகோரளவின் தலைமைத்தில் மேற்கொள்ளப்பட்டுள்ளது.

இவ்வாறு இழப்பீடு வழங்குவது இந்த வருடத்தில் ஐந்தாவது முறை என அந்த அமைச்சு குறிப்பிட்டுள்ளது.

அதற்கமைய இந்த வருடத்தின் இதுவரையிலான காலப்பகுதியினுள் வெளிநாட்டில் பணி செய்து கொண்டிருக்கும் போது உயிரிழந்த 196 பேரின் குடும்பத்தினருக்காக 3450 லட்சம் பணம் வழங்கப்பட்டுள்ளது.

அத்துடன் கடந்த 5 வருட காலத்தினுள் இழப்பீடாக வழங்கப்பட்டுள்ள பணத்தில் அதிகமான பணம் இந்த வருடம் வழங்கப்பட்டுள்ளதாக தெரிவிக்கப்படுகின்றது.

சமகாலத்தில் ஐரோப்பா, இந்தியா, சீனா உள்ளிட்ட நாடுகளில் இருந்தும் அமெரிக்கா போன்ற நாடுகளில் இருந்தும் சுற்றுலா பயணிகள் இலங்கைக்கு படையெடுத்துள்ளனர்.

இந்நிலையில், இலங்கையில் சுற்றுலா துறையினை மேம்படுத்தும் நோக்கில் பல்வேறு நடவடிக்கைகள் முன்னெடுக்கப்பட்டு வருகின்றது.

குறிப்பாக தலைநகர் கொழும்பில் பல்வேறு வேலைத்திட்டங்கள் முன்னெடுக்கப்பட்டுள்ளன. அந்த வகையில் கொழும்பில் பல வான் உயர்ந்த கட்டிடங்கள் நிர்மானிக்கப்பட்டு வருகின்றன.

அந்த வகையில் 2017ஆம் ஆண்டு இலங்கையில் நிர்மானிக்க எதிர்பார்த்துள்ள உயரமான கட்டிடம் தொடர்பில் காணொளி ஒன்று வெளியிடப்படடுள்ளது.

117 மாடிகளை கொண்ட குறித்த கட்டிடமானது 625 மீட்டர் உயரம் கொண்டது என தெரிவிக்கப்பட்டுள்ளது. அடுத்த ஆண்டு பெப்ரவரி மாதம் இதற்கான வேலைத்திட்டங்கள் ஆரம்பிக்கபடவுள்ளதாக கூறப்படுகின்றது.

முழுமையான கொழும்பு நகரம் போன்று கடலும் அழகாக தெரியும் வகையில் நிர்மாணிக்கப்படுகின்ற இந்த கட்டிடத்தில் நட்சத்திர ஹோட்டல், வீட்டுத்தொகுதிகள் மற்றும் வணிக வளாகங்கள் உட்பட பொருளாதார கேந்திர நிலையத்திற்கு அவசியமான அனைத்து வசதிகளையும் கொண்டிருக்கும்.

எவ்வாறாயினும், குறித்த கட்டிடம் நிர்மானிக்கப்பட்டு முடியும் பட்சத்தில் இலங்கையில் மிக உயரமான கட்டிடமாகவும், உலகின் 9வது உயரமான கட்டிடமாகவும் இருக்கும் என்பது குறிப்பிடத்தக்கது.

கடுமையான வரட்சி ஏற்பட்டாலும் மின்வெட்டு அமுல்படுத்தப்படாது என மின்வலு எரிசக்தி அமைச்சர் ரஞ்சித் சியம்பலாபிட்டிய தெரிவித்துள்ளார்.

மின்வலு எரிசக்தி அமைச்சில் நேற்று நடைபெற்ற செய்தியாளர் சந்திப்பில் அவர் இதனைத் தெரிவித்துள்ளார். அவர் தொடர்ந்தும் கூறுகையில்…

தொடர்ச்சியாக தரமான மின்சாரம் மக்களுக்கு விநியோகம் செய்ய அரசாங்கம் நடவடிக்கை எடுக்கும்.

மின்சாரத்தை சேமிக்கும் திட்டங்களுக்கு பொதுமக்களின் ஒத்துழைப்பும் அவசியமானது என அவர் குறிப்பிட்டுள்ளார்.

பண்டாரநாயக்க சர்வதேச விமான நிலையத்தின் ஓடுபாதை திருத்தப்பணிகள் மேற்கொள்ளப்படவுள்ளதனால் எதிர்வரும், மூன்று மாதங்களுக்கு விமான நிலையம் மூடப்படும் என அறிவிக்கப்பட்டுள்ளது.

எதிர்வரும் ஜனவரி 6ஆம் திகதியில் இருந்து ஏப்ரல் மாதம் 6ஆம் திகதி வரையிலான மூன்று மாதங்களுக்கு தினமும் காலை 8 மணியில் இருந்து பிற்பகல் 4.30 மணி வரை விமான நிலையம் மூடப்படவுள்ளது.

கடந்த மூன்று தசாப்தங்களாக கட்டுநாயக்க விமான நிலையத்துக்கு கிட்டத்தட்ட 950,000 க்கும் அதிகமான விமானங்கள் வந்து சென்றுள்ளன.

1980ஆம் ஆண்டு நடுப்பகுதியில், அப்போதைய தேவைக்கமைய வடிவமைக்கப்பட்ட ஓடுபாதையே இப்போதும் பயன்பாட்டில் உள்ளது.

குறித்த மூன்று தசாப்தங்களாக ஒரு ஓடுபாதை மாத்திரமே உள்ளதாகவும், அந்தக் காலப் பகுதியில் பாரிய புனரமைப்பு பணிகள் எதுவும் மேற்கொள்ளப்படவில்லை என குறிப்பிடப்படுகின்றது.

இதனால், ஓடுபாதை தற்போதைய தேவைக்கமைய புனரமைக்கப்பட்டு விரிவாக்கப்படவுள்ளது.

எனவே புனரமைப்பு பணிகளின் போது விமான நிலையம் மூடப்படவுள்ளது. குறித்த காலப்பகுதியில் விமான நிலையத்தின் பணிகள் மட்டுப்படுத்தப்படவுள்ளன.

இதனால், கட்டுநாயக்க விமான நிலையம் ஊடாக சேவைகளை மேற்கொள்ளும் அனைத்து விமான சேவை நிறுவனங்களையும், பிற்பகல் 4.30 மணிக்கும், காலை 8 மணிக்கும் இடையில் சேவைகளை மாற்றியமைக்குமாறு ஏற்கனவே அறிவிக்கப்பட்டுள்ளது.

இந்த அனைத்து நகர்வுகளும் வருடத்திற்கு ஒன்பது மில்லியன் பயணிகளின் தேவைக்கமைய கையாளுவதற்காகவே மேற்கொள்ளப்படுகின்றது.

மேலும் வருடத்திற்கு வரும் 9 மில்லியன் பயணிகளை 15 மில்லியான அதிகரிப்பதற்காக முயற்சிகளும் இதன் ஊடாக மேற்கொள்ளப்படுவதாக கூறப்படுகின்றது.

தபால் சேவை ஊழியர்கள் மேற்கொண்டுள்ள அடையாள பணிபகிஸ்கரிப்பின் காரணமாக நேற்று நாடுமுழுவதும் 15 இலட்சம் கடிதங்கள் தேங்கிக் கிடந்தாக தெரிவிக்கப்பட்டுள்ளது.

பதவி உயர்வு, ஆட்சேர்ப்பு மற்றும் ஊதியம் உள்ளிட்ட 7 விடயங்கள் குறித்து திருத்தங்கள் மேற்கொள்ள வேண்டும் என நேற்று முன்தினம் நள்ளிரவு முதல் 48 மணிநேர அடையாள பணிபகிஸ்கரிப்பில் நாடுமுழுவதுமுள்ள தபால் சேவை ஊழியர்கள் ஈடுபட்டள்ளனர்.

இந்த நிலையில், நேற்று நாடுமுழுவதும் தபால் சேவை முடங்கியதால் மக்கள் பெரும் அசௌகரியங்களுக்கு முகங்கொடுத்தனர்.

மேற்படி கோரிக்கைகளை முன்வைத்து சம்பந்தப்பட்ட அமைச்சருடன் நடத்திய கலந்துரையாடலில் தீர்வு கிடைக்கவில்லை எனக் குறிப்பிட்டே இந்த அடையாள பணிபகிஸ்கரிப்பில் தபால் சேவை ஊழியர்கள் ஈடுபட்டுள்ளனர்.

இந்த நிலையில், தமது கோரிக்கைகளுக்கு இன்னும் 14 நாட்களுக்கு தீர்வு கிடைக்கவில்லையாயின் தொடர் தொழிற்சங்க நடவடிக்கைகளுக்கு தயார் என தபால் சேவை ஊழியர்கள் சங்கத்தினர் எச்சரித்துள்ளனர்.

யாழ்.சாவகச்சேரி சங்கத்தானைப் பகுதியில் கடந்த சனிக்கிழமை இடம்பெற்றதென்னிலங்கை சுற்றுலாப் பயணிகள் 11 பேர் உயிரிழக்கக் காரணமான வாகன விபத்துச்சம்பவம் தொடர்பில் கைதாகி விளக்கமறியலில் வைக்கப்பட்டிருந்த இ.போ.ச பஸ் சாரதியை ஐம்பதாயிரம் ரூபா ஆட்பிணையில்செல்ல சாவகச்சேரி நீதவான் நீதிமன்றம் நேற்று செவ்வாய்க்கிழமை அனுமதியளித்துள்ளது.

சாவகச் சேரி நீதவான் நீதிமன்றப் பதில் நீதவான் செ-கணபதிப்பிள்ளை முன்னிலையில்சந்தேகநபர் ஆஜர்படுத்தப்பட்ட போதே மேற்படி அனுமதி வழங்கப்பட்டுள்ளது.

இதன்போது விபத்தை நேரில் கண்ட சாட்சிகள் மூவரின் சாட்சியமும் நீதவான் முன்னிலையில்பதிவு செய்யப்பட்டது.

அத்துடன் எதிர்வரும் ஜனவரி மாதம் 19ம் திகதி நீதவானால் குறித்த வழக்குத்தவணையிடப்பட்டுள்ளது.

இலங்கை சுற்றுலா பயணி ஒருவருக்கு யானை ஒன்று அதிர்ச்சியை ஏற்படுத்தியுள்ளது.

யால தேசிய பூங்காவில் ஜுப் வண்டியில் பயணித்துக் கொண்டிருந்த சுற்றுலா பயணிக்கு சொந்தமான பை ஒன்றை கெமுனு என்ற யானை விழுங்கியுள்ளதாக தெரிவிக்கப்படுகின்றது.

கெமுனு தனது தும்பிக்கையை ஜுப் வண்டியினுள் விட்டு அந்த பையை விழுங்கியுள்ளது.

சுற்றுலா பயணிகளின் ஜுப் வண்டியில் இருந்து பொருட்களை எடுத்துக் கொள்வதற்கு கெமுனுவுக்கு பழக்கம் ஏற்பட்டுள்ளது.

அந்த பையில் 1200 அமெரிக்க டொலர் (கிட்டத்தட்ட 180000ரூபாய்) இருந்ததாக சுற்றுலா பயணிகள் வனவிலங்கு அதிகாரிகளிடம் அறிவித்துள்ளனர்.

அதற்கு மேலதிகமாக அந்த பையில் கமரா ஒன்று காணப்பட்டதாக தெரிவிக்கப்படுகின்றது.