இலங்கையில் 18 வயது நிரம்பியதும் வாக்காளராகத் தகுதி பெறுகின்ற உரிமை அரசியலமைப்பில் உறுதி செய்யப்பட்டிருக்கின்ற போதிலும், வருடத்திற்கு ஒருமுறை ஜுன் மாதம் முதல் திகதி மட்டும் வாக்காளராகப் பதிவு செய்யும் நடவடிக்கை காரணமாக லட்சக்கணக்கான இளைஞர்கள், யுவதிகள் வயதுக்கு வந்தும்கூட வாக்காளராகப் பதிவு செய்ய முடியாதிருப்பதாக முறையிடப்பட்டிருக்கின்றது.

ஜுன் மாதம் முதலாம் திகதி, 18 வயதை எட்டாத ஒருவர் அடுத்த வருடம் ஜுன் முதலாம் திகதி வரையில் 18 வயதை எட்டி, பல மாதங்கள் கடந்த நிலையில் வாக்காளராகப் பதிவு செய்வதற்காகக் காத்திருக்க வேண்டியிருக்கின்றது என்று அந்த முறைப்பாட்டில் சுட்டிக்காட்டப்பட்டிருக்கின்றது.

வாக்காளராகப் பதிவு செய்யும் தற்போதைய இந்த நடைமுறை காரணமாக நாடாளவிய ரீதியில் லட்சக்கணக்கான இளைஞர்கள், யுவதிகள் அரசியலமைப்பில் உறுதி செய்யப்பட்டுள்ள வாக்காளராகப் பதிவு செய்து கொள்ளும் உரிமையை இழப்பதாக கவலை வெளியிடப்பட்டிருக்கின்றது.

இளைஞர், யுவதிகளுக்காகச் செயற்பட்டு வருகின்ற அவ்ரியல் எனப்படும் நிறுவனத்தினரே மனித உரிமைகள் ஆணையகத்தில் இந்த முறைப்பாட்டைச் செய்துள்ளனர்.

அதேவேளை, ஜுன் மாதம் முதலாம் திகதி, 18 வயதை எட்டியதும் வாக்காளராகப் பதிவு செய்தாலும்கூட, அந்தப் பதிவுகள் உடனடியாக அங்கீகரிக்கப்படாத காரணத்தினால் அத்தகைய பதிவின் பின் உடனடியாக வருகின்ற தேர்தல்களில் இளைஞர்கள், யுவதிகள் வாக்களிக்க முடியாத நிலை காணப்படுவதாகவும் அந்த முறைப்பாட்டில் தெரிவிக்கப்பட்டிருக்கிறது.

வாக்காளர் பதிவு செயற்பாட்டில் இத்தகைய குறைபாடு இருப்பதை ஒப்புக்கொண்டுள்ள தேர்தல் ஆணையாளர் மகிந்த தேசப்பிரிய, வாக்காளர் பதிவு நடவடிக்கையில் காணப்படுகின்ற இக்குறைபாட்டை நீக்குவது தொடர்பில் அரசியல் கட்சிகளின் தலைவர்களுடன் பேச்சுக்கள் நடத்தியிருப்பதாகத் தெரிவித்தார்.

தேர்தல் சட்டத்தில் புதிய மாற்றங்களைக் கொண்டு வருவதன் ஊடாகவே இந்தக் குறைபாட்டை நீக்க முடியும் என்பதை அரசியல் தலைவர்களுக்கு விளக்கிக் கூறியிருப்பதாகவும், அவர்களே இதற்கு உரிய நடவடிக்கையை நாடாளுமன்றத்தின் ஊடாக மேற்கொள்ள வேண்டும் என்றும் தேர்தல் ஆணையாளர் மகிந்த தேசப்பிரிய தெரிவித்தார்.

-பிபிசி-

இயங்காமலிருக்கும் நிறுவனங்களை மீள இயக்குவதன் மூலமாக கைவிடப்பட்ட நிலையில் இருக்கும் 12 ஆயிரம் முன்னாள் போராளிகள் வேலை வாய்ப்பினைப் பெறுவார்கள் என, சிறுவர் பாதுகாப்பு மற்றும் மகளிர் விவகார இராஜாங்க அமைச்சர் விஜயகலா மகேஸ்வரன் தெரிவித்தார்.

தெல்லிப்பழை – அம்பனைப் பகுதியில் அலுமினியத் தொழிற்சாலையை திறந்து வைக்கும் நிகழ்வில் சிறப்பு விருந்தினராக கலந்து கொண்டு உரையாற்றுகையிலேயே அவர் மேற்கண்டவாறு குறிப்பிட்டுள்ளார்.  அவர் மேலும் தெரிவிக்கையில்,

12 ஆயிரம் முன்னாள் போராளிகள் அரசாங்கத்தினாலும், பெற்றோரினாலும் கைவிடப்பட்ட நிலையில் இருக்கிறார்கள். இதன் காரணமாக இவர்கள் இன்று மனமுடைந்த நிலையில் பாதிக்கப்பட்டுள்ளனர்.

இவ்வாறானவர்களுக்கு தெல்லிப்பழையில் இன்று அலுமினியத் தொழிற்சாலையைத் திறந்து வைத்தது போன்று இயக்கமின்றி இருக்கும் சீமெந்து தொழிற்சாலை, பரந்தன் இரசாயனத் தொழிற்சாலை, ஆனையிறவு உப்பளம் போன்ற நிறுவனங்களை மீள உருவாக்குவதன் மூலம் வேலை வாய்ப்புக்களை பெற்றுக் கொடுக்கப்பட வேண்டும்.
இவ்வாறான முயற்சிக்கு வெளிநாட்டு முதலீட்டாளர்கள் பக்கபலமாக இருக்க வேண்டும்.

கடந்த கால அரசாங்கம் வெளிநாடுகளிலிருந்து வருகை தரும் முதலீட்டாளர்களை வடக்கு, கிழக்கில் முதலீடு செய்ய அனுமதிக்கவில்லை. அவர்கள் அதற்கான அனுமதியைப் பெறுவதற்கு பெரும் சிரமப்பட்டார்கள்.

பாதுகாப்பு அமைச்சின் செயலகத்தில் இதற்கான அனுமதியைப் பெற வேண்டியிருந்தது. ஆனால், பாதுகாப்பு அமைச்சின் செயலகத்திற்குச் செல்லக் கூடிய சூழல் அப்போதிருக்கவில்லை.

இந்த மண்ணில் பிறந்து வளர்ந்து போர் காரணமாகப் புலம்பெயர்ந்து வெளிநாட்டுக்குச் சென்ற எமது உறவுகள் மீண்டும் எமது சொந்த ஊருக்குத் திரும்ப வேண்டுமெனில் பாதுகாப்பு அமைச்சின் செயலகத்தின் அனுமதியைப் பெற வேண்டும். அவ்வாறான காலகட்டங்களை எமது மக்கள் கடந்த ஆட்சிக் காலத்தில் சந்திக்க வேண்டிய துரதிஷ்டமான நிலை காணப்பட்டது.

ஆனால் தற்போதைய நல்லாட்சிக் காலத்தில் விடுதலைப் புலிகள் அமைப்பில் அங்கம் வகித்திருந்தாலும் கூட வெளிநாட்டிலிருந்து தமது சொந்த மண்ணிற்கு வருகை தருவதற்கான சாதகமான சூழல்கள் உருவாக்கப்பட்டுள்ளன.

வெளிநாட்டு முதலீட்டாளர்கள் வடக்கு, கிழக்கு மாகாணத்திலே முதலீடு செய்வதற்கான வாய்ப்பினை தற்போது உருவாக்கிக் கொடுத்திருக்கிறது. இதன் ஒரு கட்டமாக இலங்கைக்கும், இந்தியாவுக்குமான உறவுப் பாலத்தைக் கட்டியெழுப்பும் வகையில் இன்றைய தினம் இந்த அலுமினியத் தொழிற்சாலை திறந்து வைக்கப்படுகின்றது.

தங்களுடைய முதலீடுகளை எமது மாவட்டத்தில் முதலீடு செய்வதன் மூலம் எமது மாவட்ட இளைஞர், யுவதிகள் வேலை வாய்ப்புக்களைப் பெற்றுக் கொள்வதற்கான ஏது நிலைகள் உருவாகியுள்ளன.

இவ்வாறான அலுமினியத் தொழிற்சாலைகள் கடந்த காலங்களில் எமது மண்ணைச் சேர்ந்தவர்களால் ஆரம்பித்து நடாத்தப்பட்டிருந்தன. எங்களுடைய முதலீட்டாளர்கள் போரால் பாதிக்கப்பட்ட காரணத்தால் இவ்வாறான தொழிற்சாலைகளை அமைக்க முடியாத இக்கட்டான நிலைக்குத் தள்ளப்பட்டுள்ளனர் என இராஜாங்க அமைச்சர் விஜயகலா மகேஸ்வரன் மேலும் குறிப்பிட்டுள்ளார்.

பொகவந்தலாவ – லோய்னோன் தோட்டத்தில் உள்ள ஸ்ரீ முத்துமாரியம்மன் கோயிலில் காணாமல் போன அம்மன் சிலை, நேற்று இரவு 09.00 மணி அளவில் பொலிஸாரால் மீட்கப்பட்டதோடு, இந்த சம்பவம் தொடர்பில் மூன்று பேர் கைதுசெய்யப்பட்டனர்.

அத்துடன் மற்றும் ஒருவரைக் கைதுசெய்யும் நோக்கில் பொகவந்தலாவ பொலிஸார் தேடுதல் நடவடிக்கையினை மேற்கொண்டு வருவதாக தெரிவித்துள்ளனர்.

கடந்த ஜூன் மாதம் 30ம் திகதி லோய்னோன் தோட்டத்தில் உள்ள ஆலயத்தில் வைக்கப்பட்டிருந்த, 03 அடி உயரம் கொண்ட, ஸ்ரீ முத்துமாரியம்மன் சிலை காணாமல் போனதாக, கோயில் நிர்வாகம் கடந்த 01ம் திகதி ஜூலை மாதம் பொகவந்தலாவ பொலிஸ் நிலையத்தில் முறைபாடு செய்திருந்தனர்.

இந்த முறைப்பாட்டுக்கு அமைய தேடுதல் நடவடிக்கையில் ஈடுபட்ட பொகவந்தலாவ பொலிஸார் கிடைக்கப் பெற்ற இரகசிய தகவலுக்கு அமைய பலாங்கொட பின்னவல – தெதனகல கிழ் பிரிவு தோட்டத்தில் உள்ள வீடு ஒன்றில் இருந்து குறித்த அம்மன் சிலை மீட்டனர்.

மேலும் அம்மன் சிலையினை ஏற்றிசென்ற முச்சக்கர வண்டியையும் பொலிஸார் கைபற்றியுள்ளனர்.

அத்துடன் இந்த அம்மன் சிலை கடந்த ஜந்து நாட்கள் ஜேப்பல்டன் காட்டு பகுதியில் மறைத்து வைக்கப்பட்டிருந்ததாகவும், அதன் பின்னர் பின்னவல – தெதனகல தோட்டப் பகுதிக்கு கொண்டு செல்லப்பட்டுள்ளதாகவும், பொலிஸாரின் ஆரம்பகட்ட விசாரணைகளில் இருந்து தெரியவந்துள்ளது.

இதேவேளை கைதுசெய்யப்பட்ட சந்தேகநபர்கள் பலாங்கொட – பின்னவல – தெதனகல கிழ் பிரிவு தோட்டத்தைச் சேர்ந்த இருவரும் பொகவந்தலாவ கெம்பியன் மேற்பிரிவு தோட்டத்தைச் சேர்ந்த பூசகர் ஒருவருமாவர்.

இவர்களை இன்று ஹட்டன் நீதவான் முன்னிலையில் ஆஜர்படுத்தவுள்ளதாக பொகவந்தலாவ பொலிஸார் தெரிவித்ததோடு, மேலதிக விசாரணைகளையும் மேற்கொண்டு வருகின்றனர்.

மகியங்கனை, தியபான குளத்தில் இருந்து நபர் ஒருவர் சடலமாக கண்டெடுக்கப்பட்டுள்ளார்.

அண்மையில் திஸ்ஸபுர பிரதேசத்தில் கெப் வண்டி ஒன்று கவிழ்ந்ததில் காணாமல் போயிருந்த நபரே சடலமாக கண்டெடுக்கப்பட்டுள்ளதாக பொலிஸார் கூறினர்.

விபத்து இடம்பெற்ற இடத்தில் இருந்து 5 கிலோமீற்றர் தொலைவில் குறித்த சடலம் மீட்கப்பட்டுள்ளது.

31 வயதுடைய ரிதிமாலியத்த பிரதேசத்தை சேர்ந்த ஒருவரே உயிரிழந்துள்ளார்.

பிரேத பரிசோதனை இன்று இடம்பெற உள்ளதுடன், மகியங்களை பொலிஸார் மேலதிக விசாரணைகளை முன்னெடுத்துள்ளனர்.

இலங்கையை சேர்ந்த சினிமா கலைஞர் ஒருவர் உலக சாதனை படைத்துள்ளார். வேகமாக திரைப்படம் ஒன்றை தயாரித்துள்ளமையை அடுத்து அவரின் பெயர் உலக கின்னஸ் சாதனை புத்தகத்தில் பதிவு செய்யப்பட்டுள்ளது.

திரைப்பட இயக்குனர் தந்தன ஹேவாபன்ன என்பவர் தயாரித்த “மங்கல கமன“ என்ற திரைப்படத்தின் மூலமே அவர் இந்த சாதனை நிகழ்த்தியுள்ளார்.

ஒரு மணித்தியாலமும் 25 நிமிடங்கள் நீளமான இந்த திரைப்படத்தை தயாரிக்க, அவர் 71 மணித்தியாளங்களும் 19 நிமிடங்களையும் செலவிட்டுள்ளார்.

2014ஆம் ஆண்டு மே மாதம் 21ஆம் திகதியில் இருந்து 25 திகதி வரையிலான காலப்பகுதியினுள் தயாரிக்கப்பட்டுள்ள இந்த திரைப்படம் கின்னஸ் சாதனை படைத்துள்ளமை தொடர்பாக உத்தியோகபூர்வமாக அறிவிக்கப்பட்டுள்ளது.

இது தொடர்பான தகவல் கின்னஸ் குழுவினால் www.guinnessworldrecords.com என்ற இணையதளத்தில் பதிவு செய்யப்பட்டுள்ளது.

திருமணமான ஜோடிகள் தமது முதலிரவில் முகங்கொடுக்கும் மன ரீதியான பிரச்சினைகளை அடிப்படையாக கொண்டு இந்த திரைப்படம் தயாரிக்கப்பட்டுள்ளதாக, படத்தின் இயக்குநரான நந்தன ஹேவாபன்ன தெரிவித்துள்ளார்.

சர்வதேச திரைப்பட விழாவிலும் இந்த திரைப்படம் பரிந்துரை செய்யப்பட்டுள்ளதாக அவர் குறிப்பிட்டுள்ளார்.

இதற்கு முன்னர் உலகின் வேகமான திரைப்பட தயாரிப்புக்கான கின்னஸ் சாதனையை நமீபியா திரைப்பட இயக்குனர் படைத்துள்ளார்.

அந்த நமீபியா திரைப்பட இயக்குனர் தனது திரைப்படத்தை 10 நாட்கள் மற்றும் சில மணித்தியாளங்களில் நிறைவு செய்திருந்தார்.