அமைதியாக உள்ள யாழ்ப்பாணத்தை சீரழிப்பதற்கு அனுமதிக்க முடியாது என நீதிபதி இளஞ்செழியன் தெரிவித்துள்ளார்.

கேரளாவில் இருந்து கடத்தி வரப்பட்டதாக சந்தேகிக்கப்படும் 141 கிலோ கஞ்சாவை உடைமையில் வைத்திருந்தமை தொடர்பில் கைது செய்யப்பட்டு விளக்கமறியலில் வைக்கப்பட்டுள்ள சந்தேக நபர் ஒருவரை பிணையில் செல்ல அனுமதிக்க வேண்டும் எனக்கோரி மேல் நீதிமன்றத்தில் தாக்கல் செய்யப்பட்ட விண்ணப்பம் தொடர்பான விசாரணை வவுனியா மேல் நீதிமன்றத்தில் 10ம் திகதி புதன்கிழமை நடைபெற்றது.

அப்போது, அந்தப் பிணை மனு விண்ணப்பத்திற்குப் பிணை வழங்கக் கூடாது என அரச சட்டத்தரணி ஸக்கி இஸ்மாயில் ஆட்சேபனை தெரிவித்து வாதாடினார். இதனையடுத்து அந்தப் பிணை மனுவை நிராகரித்த நீதிபதி இளஞ்செழியன் மேலும்தெரிவித்ததாவது:

யாழ்ப்பாணம் தற்சமயம் அமைதியாக உள்ளது. குற்றச் செயல்கள் குறைவடைந்து காணப்படுகின்றன. கல்விப் பொதுத் தராதர உயர்தரப்பரீட்சை நடைபெற்றுக் கொண்டிருக்கின்றது.

அதேவேளை, தரம் 5 புலமைப்பரிசில் பரீட்சை நடைபெறவுள்ளது. இந்தப் பரீட்சைக்காக மாணவர்கள் தம்மைத் தயார் செய்து கொண்டிருக்கின்றார்கள்.

அத்துடன் லட்சக்கணக்கான மக்கள் நல்லூர் திருவிழாவுக்காக படையெடுத்து வந்த வண்ணம் உள்ளனர். நாட்டின் வெளிப் பிரதேசங்களில் இருந்து வருபவர்களும், வெளிநாடுகளில் இருந்து வருபவர்களுமாக யாழ்ப்பாணம் விருந்தினர்களால் நிரம்பி வழிகின்றது.

இந்த வழக்கில் பெருந்தொகையான 141 கிலோ கஞ்சா கைப்பற்றப்பட்டுள்ளது. இதன் பெறுமதி 80 லட்ச ரூபா என மதிப்பிடப்படுகின்றது.

கைது செய்யப்படாதிருந்தால் அந்த சந்தேக நபர் லட்சாதிபதியாகியிருக்கக் கூடும். கைது செய்யப்பட்டமையால்அவர் இப்போது சிறைக் கைதியாகியுள்ளார்.

இந்தச் சூழ்நிலையில் போதைப் பொருள் குற்றசாட்டுக்கு உள்ளான நபர்களை பிணையில் விடுவது ஆபத்தான நிலைமையையே ஏற்படுத்தும்.

பொது நலனும், சமூக நலனும் பாதிக்கப்படும். ஆகவே இந்த நீதிமன்றம் இந்தப் பிணை மனுவை நிராகரிக்கின்றது என்றார் நீதிபதி இளஞ்செழியன்.

திருகோணமலை-வடக்கு கல்வி வலயத்துக்குட்பட்ட ரொட்டவெவ பிரதேசத்திலுள்ள பிரபல முஸ்லிம் பாடசாலை ஒன்றில் 11ம் தரத்தில் கல்வி பயிலும் மாணவியை, பாலியல் துஷ்பிரயோகத்துக்கு உட்படுத்திய குற்றச்சாட்டின் பேரில் ஆசிரியரொருவர் நேற்று புதன்கிழமை பிற்பகல் கைது செய்யப்பட்டுள்ளார்.

இவ்வாறு கைது செய்யப்பட்டவர் கிண்ணியா-ரொட்டவெவ பகுதியைச் சேர்ந்த இரண்டு பிள்ளைகளின் தந்தையான, டி.சபீர்கான் (வயது 33) என்பவரே இவ்வாறு கைது செய்யப்பட்டுள்ளார்.

குறித்த மாணவியை பாலியல் துஷ்பிரயோகத்துக்கு உட்படுத்தியதாக பொலிஸ் அவசர அழைப்புக்கு கிடைக்கப்பெற்ற முறைப்பாட்டுக்கமைய, விசாரணைகளை மேற்கொண்ட மொறவெவ பொலிஸார், குறித்த நபரை கைது செய்துள்ளதாக தெரியவருகின்றது.

மாணவி சட்ட வைத்திய பரிசோதனைக்காக திருகோணமலை பொது வைத்தியசாலையில் அனுமதிக்கப்பட்டுள்ளதாகவும் கைது செய்யப்பட்ட ஆசிரியரை, நீதிமன்றில் ஆஜர்படுத்த நடவடிக்கை எடுத்துள்ளதாக தெரியவருகின்றது.

கடந்த 15 மாதங்களில் 81 பௌத்த பிக்குகள் விளக்கமறியலில் வைக்கப்பட்டுள்ளதாக சிறைச்சாலைகள் புனர்வாழ்வு மற்றும் பௌத்த சாசன அமைச்சர் விஜயதாச ராஜபக்ச தெரிவித்துள்ளார். நாடாளுமன்றில் நேற்று உரையாற்றிய போது அவர் இதனைத் தெரிவித்துள்ளார்.அவர் தொடர்ந்தும் கூறுகையில்,

நீதிமன்றறை அவமரியாதை செய்த குற்றச்சாட்டுக்கு இலக்கான 8 பௌத்த பிக்குகளும் யானைக் குட்டியொன்றை சட்டவிரோதமாக வைத்திருந்த குற்றச்சாட்டில் பௌத்த பிக்கு ஒருவரும் இவ்வாறு சிறையில் அடைக்கப்பட்டனர்.

துஸ்பிரயோகங்கள், புதையல் தோண்டல் உள்ளிட்ட பல்வேறு குற்றச்சாட்டுக்களின் அடிப்படையில் இந்த பௌத்த பிக்குகள் கைது செய்யப்பட்டு சிறையில் அடைக்கப்பட்டுள்ளனர் என தெரிவித்துள்ளார்.

நாடாளுமன்ற உறுப்பினர் சனத் நிசாந்த எழுப்பிய வாய்மொழி மூல கேள்விக்கு பதிலளித்த போது அமைச்சர் இதனைத் தெரிவித்துள்ளார்.

படகு மூலம் அவுஸ்திரேலியா செல்லும் இலங்கை தமிழர்கள் உள்ளிட்ட புகலிடக் கோரிக்கையாளர்கள் தங்க வைக்கப்படும் நவுரு தீவு முகாம்களில் சிறுவர் பாலியல் துஷ்பிரயோகங்கள் இடம்பெற்று வருவதாகக் குற்றம் சுமத்தப்பட்டுள்ளது.

கடந்த காலங்களில் சுமார் 2000 சிறுவர் துஷ்பிரயோக சம்பவங்கள் அங்கு இடம்பெற்றுள்ளதாக அல் ஜெசீரா செய்திச் சேவை தெரிவித்துள்ளது

இதேவேளை சிறுவர்கள் உள்ளிட்ட பல்வேறு தரப்பினரும் பாலியல் ரீதியாக துன்புறுத்தப்படுகின்றனர் என ஐக்கிய நாடுகள் அமைப்பும், மனித உரிமைகள் அமைப்புக்களும் குற்றம் சுமத்தியுள்ளன.

இதேவேளை, சித்திரவதைகள் காரணமாக சில புகலிடக் கோரிக்கையாளர்கள் உயிரை மாய்த்துக்கொள்ள உந்தப்படுவதாக தெரிவிக்கப்படுகிறது.