இணையத்தளம் மற்றும் கையடக்கத் தொலைபேசிகள் ஊடாக சிறுவர்களுக்கு ஏற்படும் இன்னல்கள் தொடர்பில் அறிவிப்பதற்காக தேசிய சிறுவர் பாதுகாப்பு அதிகார சபையினால் தொலைபேசி இலக்கமொன்று அறிமுகப்படுத்தப்பட்டுள்ளது.

இந்த முறைப்பாடுகளை 077 322 00 32 என்ற தொலைபேசி இலக்கத்திற்கு அறிவிக்கமுடியும். மேலும், தொலைபேசி இலக்கத்திற்கு மேலதிகமாக குறுந்தகவல், வட்ஸ் அப் அல்லது வைபர் மூலமோ தெரிவிக்கலாம் எனவும் கூறப்பட்டுள்ளது.

மேலும் சிறுவர்களுக்கு விடுக்கப்படும் அச்சுறுத்தல்களைத் தடுப்பதற்காக பல்வேறு நடவடிக்கைகள் முன்னெடுக்கப்பட்டு வருவதாக தேசிய சிறுவர் பாதுகாப்பு அதிகார சபை மேலும் சுட்டிக்காட்டியுள்ளது.

நேற்று முதல் ஆகஸ்ட் 22 ஆம் திகதிவரை இந்த முறைப்பாடுகள் ஏற்றுக்கொள்ளப்படும் என அதிகார சபையின் தலைவர் நட்டாஷா பாலேந்திரா தெரிவித்துள்ளார்.

டெங்கு பரவும் வகையில் வீட்டு சூழலை வைத்திருந்த 103 வீட்டு உரிமையாளர்களுக்கு எதிராக வழக்கு தாக்கல் செய்யப்பட்டுள்ளது.

கொழும்பு நகரில் உள்ளவர்களுக்கு எதிராகவே இவ்வாறு வழக்கு தாக்கல் செய்யப்பட்டுள்ளதாக கொழும்பு பிரதான வைத்திய நிபுணர் ருவான் விஜயமுனி தெரிவித்துள்ளார்.

இது தொடர்பில் தொடர்ந்தும் கருத்து தெரிவித்த அவர், கடந்த 14ஆம் திகதி முதல் 16ஆம் திகதி வரை டெங்கு நுளம்பு கட்டுப்பாட்டு வேலைத்திட்டம் முன்னெடுக்கப்பட்டது.

சுமார் 8075 வீடுகளில் மேற்கொள்ளப்பட்ட சோதனையின் போது டெங்கு பரவக்கூடிய வகையில் சுற்றுப்புற சூழலை வைத்திருந்த 103 பேருக்கு எதிராக வழக்கு தாக்கல் செய்யப்பட்டுள்ளது.

இந்நிலையில் கொழும்பை பொருத்தமட்டில் விரைவாக டெங்கு பரவும் வகையில் நாரஹேன்பிட்டி பிரதேசம் காணப்படுவதாக அவர் கூறியுள்ளார்.

இந்த வேலைத்திட்டத்தின் போது சூழல் பாதுகாப்பு பொலிஸார் உள்ளிட்ட 9000 பேர் பங்கெடுத்திருந்ததாக அவர் குறிப்பிட்டுள்ளார்.

இதேவேளை, இந்த வேலைத்திட்டத்தின் போது 5 பாடசாலைகள் மற்றும் 14 கட்டுமான வேலைத்தளங்களில் டெங்கு நுளம்பு பரவும் பகுதிகள் அடையாளம் காணப்பட்டுள்ளதாக அவர் மேலும் தெரிவித்துள்ளார்.

கல்வி பொது தராதர உயர்தரப் பரீட்சைக்கு தோன்றும் மாணவர்கள் கையடக்க தொலைபேசிகள், ஸ்மார்ட் கைக் கடிகாரங்கள் உள்ளிட்ட இலத்திரனியல் சாதனங்கள் எடுத்து வருவதை தவிர்த்துக்கொள்ளுமாறு அறிவுறுத்தப்பட்டுள்ளது.

பரீட்சை திணைக்களம் இதனை அறிவித்துள்ளது. எனினும், பரீட்சார்த்திகள் இலத்திரனியல் சாதனங்கள் வைத்திருந்தால் பரீட்சை பெறுபேறுகள் ரத்து செய்யப்படும் என அந்த திணைக்களம் எச்சரிக்கை விடுத்துள்ளது.

அத்துடன், மாணவர்களுக்கு ஐந்து ஆண்டுகளுக்கு எந்தவொரு அரசாங்கப் பரீட்சைகளும் எழுத அனுமதிக்கப்படமாட்டார்கள் எனவும் அறிவிக்கப்பட்டுள்ளது.

மேலும் பரீட்சாத்திகளிடம் இருந்து கண்டு பிடிக்கப்படும் கையடக்கத் தொலைபேசி, ஸ்மார்ட் கைக்கடிகாரம் உள்ளிட்ட இலத்திரனியல் சாதனங்கள் அரசுடமையாக்கப்படும்.

எதிர்வரும் இரண்டாம் திகதி உயர்தரப் பரீட்சைகள் ஆரம்பமாகவுள்ளது. இந்நிலையில் இவற்றை கண்டுபிடிப்பதற்கென நான்கு விசேட குழுக்கள் நியமிக்கப்பட்டுள்ளன.

அத்துடன் வலய மட்டத்திலும் விசேட குழுக்கள், கண்காணிப்பு நடவடிக்கைகளில் ஈடுபடும் என பரீட்சைகள் திணைக்களம் குறிப்பிட்டுள்ளது.

இதேவேளை, இலத்திரனியல் சாதனங்களை மாணவர்கள் எடுத்து வருகிறார்களா என்பதனை தீவிரமாக அவதானிக்குமாறு பரீட்சை மண்டப உத்தியோகத்தர்களுக்கும் கண்காணிப்பாளர்களுக்கும் பரீட்சைகள் திணைக்களம் விசேட அறிவித்தல் விடுத்துள்ளமை குறிப்பிடத்தக்கது.

சவுதி அரேபியாவில் தாக்குதல் ஒன்றில் கொல்லப்பட்ட இலங்கையரின் உடலை அங்கேயே அடக்கம் செய்ய குடும்பத்தினரின் அனுமதி கிடைத்துள்ளது.வெளியுறவு அமைச்சின் ஆலோசனைப்பிரிவு இதனை தெரிவித்துள்ளது

கெக்கிராவையை சேர்ந்த 32 வயதான இந்த இலங்கையர் சில நாட்களுக்கு முன்னர்கொல்லப்பட்டார்.

சம்பவம் குறித்து இன்னும் பொலிஸ் அறிக்கை சமர்ப்பிக்கப்படவில்லை. எனவே தகவல்கள் எதனையும் வெளியிடமுடியவில்லை என்று வெளியுறவு அமைச்சு குறிப்பிட்டுள்ளது.

எனினும் அரப் செய்தியின்படி கொல்லப்பட்டவர் பணியாற்றிய யன்பு என்ற பிரதேசத்தின்பொலிஸார் இச்சம்பவம் தொடர்பில் யேர்மனியர் ஒருவரை கைது செய்துள்ளதாக தெரிவிக்கப்பட்டுள்ளது.

மலேரியாவை சுமந்துவரும் கொசுக்கள் சில விலங்குகளின் வாசனையால் அதிலும் குறிப்பாக கோழிகளின் வாசனையால் தடுக்கப்படுவதாக விஞ்ஞானிகள் கண்டறிந்துள்ளனர்.

அனோபிலிஸ் அராபியென்சிஸ் கொசு, விலங்குகளின் இரத்தத்தை காட்டிலும், மனித இரத்தத்தையே பெரிதும் விரும்பவதாக எத்தியோப்பியாவில் பணி செய்துவரும் ஆராய்ச்சியாளர்கள் கண்டறிந்துள்ளனர்.

மேலும் இது கால்நடைகளான ஆடு மற்றும் வெள்ளாடுகளிலிருந்து இரத்தத்தை அவ்வப்போது உறிஞ்சுகிறது. ஆனால், கோழிகளை மட்டும் தவிர்த்துவிடுகிறது.

இந்த கண்டுபிடிப்பானது மலேரியா நோய் மிக அதிகமாக தொற்றிப் பரவியுள்ள பகுதிகளிலும், பூச்சிக் கொல்லிகளுக்கு எதிராக கொசுக்களின் எதிர்ப்பு திறன் வளர்ந்து வரும் பகுதிகளிலும், பயனுள்ளதாக இருக்கும் என்று இந்த ஸ்வீடிஷ் – எத்தியோப்பிய குழு தெரிவித்துள்ளது.