கூலி வேலை செய்தோ அல்லது பிச்சை எடுத்தோ ஜீவனாம்சம் வழங்குவதில் தவறில்லை என்று சென்னை உயர்நீதிமன்ற மதுரைக் கிளை பிறப்பித்த உத்தரவில் குறிப்பிடப்பட்டுள்ளது.விருதுநகர் மாவட்டம் ஸ்ரீவில்லிபுத்தூரைச் சேர்ந்தவர் செல்வராஜன். இவருக்கும் தூத்துக்குடி மாவட்டம் கோவில்பட்டியைச் சேர்ந்த ஸ்ரீரங்க சுபத்ரா என்பவருக்கும் திருமணம் ஆகி 6 வயது மகன் உள்ளார்.

இந்நிலையில் இருவருக்கும் ஏற்பட்ட கருத்துவேறுபாடு காரணமாக விவாகரத்து பெற்றனர். இதையடுத்து தான் வசிப்பதற்கு ஒரு வீடும், ஜீவனாம்சமும் கோரி கோவில்பட்டி மாஜிஸ்திரேட் நீதிமன்றத்தில் ஸ்ரீரங்க சுபத்ரா வழக்கு தொடர்ந்துள்ளார்.அதை விசாரித்த நீதிமன்றம், வீட்டு வாடகைக்கு மாதம் ரூ.10 ஆயிரம், ஜீவனாம்சமாக மாதம் ரூ.10 ஆயிரம், இழப்பீடாக ரூ.50 ஆயிரம் வழங்க செல்வராஜனுக்கு உத்தரவிட்டுள்ளது.

இதை எதிர்த்து தூத்துக்குடி கூடுதல் அமர்வு நீதிமன்றத்தில் செல்வராஜன் மேல்முறையீடு செய்துள்ளார். இந்த மனுவை விசாரித்த நீதிமன்றம், இழப்பீடு தொகையை ரூ.25 ஆயிரமாகக் குறைத்து உத்தரவிட்டுள்ளது. மேலும் வீட்டு வாடகைத் தொகை செலுத்த தேவையில்லை என உத்தரவிட்டுள்ளது. இதையும் எதிர்த்து சென்னை உயர்நீதிமன்ற மதுரைக் கிளையில் செல்வராஜன் மேல்முறையிடு செய்திருந்தார். அதில், வேலை இல்லாத காரணத்தால் எனக்கு வருமானம் இல்லை. எனவே இவர்கள் கோரியுள்ள தொகையை வழங்க முடியாது என்று குறிப்பிட்டிருந்தார்.

இந்த மனுவை விசாரித்த நீதிபதி பிறப்பித்த உத்தரவு: மனுதாரரின் செய்கையால் அவரது மனைவி மனதளவில் பெரிதும் பாதிக்கப்பட்டுள்ளார். எனவே இதுவும் குடும்ப வன்முறையின் கீழ் அடங்கும். மனுதாரர் வேலையில்லாமல் இருப்பதாக கூறியுள்ளதற்கு எவ்வித ஆதாரமும் சமர்பிக்கவில்லை. மனைவியின் வாழ்க்கையில் ஏற்பட்ட பாதிப்புகளுக்கு கூலி வேலை செய்தோ அல்லது பிச்சை எடுத்தோ ஜீவனாம்சம் வழங்குவதில் தவறில்லை என உத்தரவில் குறிப்பிடப்பட்டுள்ளது.

மகாராஷ்டிர மாநிலத்தில் மனப்பாடப் பகுதியை சரியாக ஒப்பிக்காத 6 வயது மகளின் வாய்க்குள் வெங்காயத்தைத் திணித்து சொந்த தந்தையே கொன்ற சம்பவம் அதிர்ச்சியை ஏற்படுத்தியுள்ளது.

மகாராஷ்டிரா மாநிலம் ஔரங்காபாத்தைச் சேர்ந்தவர் சஞ்சய் குட்டே (30). இவர், கடந்த சனிக்கிழமை இரவு தனது 6 வயது குழந்தை பாரதிக்கு பாடம் சொல்லிக் கொடுத்துக் கொண்டிருந்தார். அப்போது வீட்டுப்பாடம் எழுதச் சொல்லி தனது மகளை கட்டாயப்படுத்தியுள்ளார். அந்த குழந்தை சரியாக எழுதாததால் சஞ்சய்குட்டே ஆத்திரமடைந்தாக கூறப்படுகிறது.

இதையடுத்து தண்டனை என்ற பெயரில் குழந்தைக்கு வெங்காயத்தை கொடுத்து விழுங்க சொல்லி அடித்துள்ளார் சஞ்சய் குட்டே. அடி தாங்காமல் குழந்தையும் வெங்காயத்தை விழுங்கியுள்ளது.

அப்போது திடீரென அந்த குழந்தையின் தொண்டைக்குள் வெங்காயம் சிக்கியதால் மூச்சு விட முடியாமல் பரிதாபமாக உயிரிழந்துள்ளது. சஞ்சய்யின் இந்தக் கொடூர செயலை கண்டு அவரது மனைவியும், 2 வயது மகனும் பயந்துபோய் வெளியில் சொல்லவில்லை.

இந்த நிலையில் குழந்தை பாரதியின் உடலை யாருக்கும் தெரியாமல் வீட்டின் அருகில் உள்ள இடத்தில் சஞ்சய் குட்டே புதைத்துவிட்டார். பின்னர், பயத்தில் இருந்து மீண்ட சஞ்சய்யின் மனைவி தனது உறவினர்களின் உதவியுடன் பொலிசில் புகார் செய்தார்.

இதைத் தொடர்ந்து புதைக்கப்பட்ட பாரதியின் உடலை பொலிசார் மீட்டு பிரேத பரிசோதனைக்கு அனுப்பி வைத்தனர். சஞ்சய் குட்டேயை பொலிசார் கைது செய்து நீதிமன்றத்தில் செவ்வாய்க்கிழமை ஆஜர்படுத்தியுள்ளனர்.

மானாமதுரை அருகே 6ம் வகுப்பு மாணவியை பள்ளியில் இருந்து கடத்தி சென்ற வாலிபர், அவரது கழுத்தை அறுத்து, கொடூரமாக கொலை செய்தார். மாணவியை கொலை செய்த வாலிபரை, சென்னை பெண் சுவாதி கொலை சம்பவத்தில் நடந்தது போல, கழுத்தறுபட்ட நிலையில் பொலிசார் கைது செய்துள்ளனர்.

சிவகங்கை மாவட்டம், மானாமதுரை அருகே உள்ள கணபதியேந்தலைச் சேர்ந்தவர் கார்த்திக் (23). டிரைவிங் தெரிந்த இவர் வேலையில்லாமல் இருந்துள்ளார். இவரது உறவினர் ஜெயா, அதே பகுதியில் வசித்து வருகிறார். ஜெயாவின் மகள் காளீஸ்வரி (11), மேலநெட்டூர் அரசு பள்ளியில் 6ம் வகுப்பு படித்து வந்தார்.

நேற்று மாலை பள்ளி முடிந்தும், காளீஸ்வரி வீட்டுக்கு வரவில்லை. அவரது தோழிகளிடம் ஜெயா விசாரித்தார். இதில் பள்ளி முடிவதற்கு அரை மணி நேரத்துக்கு முன்பு, கார்த்திக் அவரை டூவீலரில் அழைத்து சென்றது தெரிந்தது. இதனையடுத்து கார்த்திக்கின் செல்போனில் ஜெயா தொடர்பு கொண்டார்.

போனில் பேசிய கார்த்திக், ‘காளீஸ்வரியை கொலை செய்து விட்டேன்’ என கூறி விட்டு உடனடியாக இணைப்பை துண்டித்தார். மீண்டும் அவரைத் தொடர்பு கொண்ட போது, போன் சுவிட்ச் ஆப் செய்யப்பட்டிருந்தது.

இதனால் அதிர்ச்சியடைந்த ஜெயா மானாமதுரை போலீஸ் நிலையத்தில் புகார் அளித்தார்.இதன் பேரில் டிஎஸ்பி புருேஷாத்தமன், இன்ஸ்பெக்டர் ரமணி தலைமையில் 30க்கும் மேற்பட்ட பொலிசார் கணபதியேந்தல் பகுதியில் தீவிர தேடுதல் வேட்டையில் ஈடுபட்டனர். கிராமத்தின் அருகே உள்ள காட்டுப்பகுதியில், அரை மயக்க நிலையில் கார்த்திக் விழுந்து கிடந்தார். அவர் அருகிலேயே ஒரு பூச்சிமருந்து பாட்டிலும் கிடந்தது. போலீசாரை கண்டதும், உடனடியாக தன்னிடம் இருந்த கத்தியால், அவர் தனது கழுத்தை அறுத்து கொண்டார் என கூறப்படுகிறது.

கழுத்தில் வெட்டு காயங்களுடன் அவரை மீட்ட போலீசார், மானாமதுரை அரசு மருத்துவமனைக்கு தூக்கிச் சென்றனர். அங்கு முதலுதவி சிகிச்சைக்கு பின்னர், சிவகங்கை அரசு மருத்துவக்கல்லூரி மருத்துவமனையில் அவர் அனுமதிக்கப்பட்டார்.சிறுமி காளீஸ்வரியை கொலை செய்து விட்டதாக அவர் போலீசாரிடமும் கூறியுள்ளார்.

இதனையடுத்து அப்பகுதியில் காளீஸ்வரியின் சடலத்தை தேடும் பணியில் போலீசார் ஈடுபட்டனர். இன்று அதிகாலை 5 மணியளவில் அம்மனேந்தல் கண்மாய் பகுதியில் சீருடை அணிந்த நிலையில், கழுத்து கொடூரமாக அறுக்கப்பட்டு, காளீஸ்வரி கொலை செய்யப்பட்டு கிடந்ததை போலீசார் கண்டுபிடித்தனர். அவரது உடலை மீட்டு, பிரேத பரிசோதனைக்காக சிவகங்கை அரசு மருத்துவமனைக்கு அனுப்பி வைத்தனர். சிவகங்கை அரசு மருத்துவமனையில் கார்த்திக்குக்கு கழுத்தில் 5 தையல்கள் போடப்பட்டுள்ளன.

அவர் தொடர்ந்து மயக்க நிலையில் உள்ளதால் அவரிடம் போலீசார் விசாரணை நடத்த போலீசார் கூறுகையில், ”மாணவியை கடத்தி கொலை செய்ததாக கார்த்திக் கூறினார். கொலைக்கான காரணம் குறித்து, அவர் இதுவரை ஏதும் கூறவில்லை. அவரது கழுத்தில் 3 ஆழமான வெட்டுக்காயங்கள் உள்ளன. அவரே வெட்டி கொண்டாரா அல்லது வேறு யாராவது வெட்டினார்களா என விசாரித்து வருகிறோம்” என்றனர்.

சமீபத்தில் சென்னையில் பெண் பொறியியலாளர் சுவாதி வெட்டிக் கொல்லப்பட்ட சம்பவத்தில், வாலிபர் ராம்குமாரை, நெல்லை மாவட்டம் செங்கோட்டையில் கழுத்தில் அறுபட்ட நிலையில் போலீசார் கைது செய்தனர். அதே போன்று பள்ளி மாணவி கொடூரமாக கொலை செய்யப்பட்டுள்ளதும், கொலை செய்த வாலிபர் கழுத்து அறுபட்ட நிலையில் கைதாகியுள்ளதும் பெரும் அதிர்வலைகளை ஏற்படுத்தியுள்ளது.

படுகொலை செய்யப்பட்ட சுவாதி கொலை வழக்கு தொடர்பில் நாளுக்கு நாள் புதிய செய்திகள் வெளிவருகின்றனர். அதிலும் உண்மை எது பொய் எது என்பதை யூகிக்க முடியாத அளவுக்கு செய்திகள் வெளிவருகின்றன.

கடந்த மாதம் 24ஆம் திகதி சென்னை நுங்கம்பாக்கம் ரயில் நிலையத்தில் வைத்து பொறியியலாளர் சுவாதி கொலை செய்யப்பட்டார்.

இந்த கொலை வழக்கு தொடர்பில் செங்கோட்டை மீனாட்சிபுரம் பகுதியைச் சேர்ந்த ராம்குமார் என்பவரை கைது செய்துள்ள பொலிஸார் மேலதிக விசாரணைகளை மேற்கொண்டுள்ளனர்.

தற்போது சென்னை மத்திய புழல் சிறையில் ராம்குமார் தடுத்து வைக்கப்பட்டுள்ள நிலையில் நேற்று அடையாள அணிவகுப்பும் நடத்தப்பட்டது.

இதனையடுத்து தமிழ்நாடு முற்போக்கு சட்டத்தரணிகள் சங்கத்தை சேர்ந்த சட்டத்தரணிகள் ராம்குமாரை சந்தித்துப் பேசியிருந்தார்கள்.
சட்டத்தரணிகளுடன் பேசிய ராம்குமார் இவ்வாறு குறிப்பிட்டுள்ளார், ” நான் தங்கியிருந்த குடியிருப்புக்கு அருகிலேயே சுவாதியின் வீடும் இருந்தது.

அந்த வழியாக சுவாதி செல்லும்போது இயல்பாக எங்களுக்குள் அறிமுகம் ஏற்பட்டது. எனக்கு ஒரு நல்ல தோழியாகவே அவர் இருந்தார்.

தினமும் அந்த வழியாக செல்லும்போது இயல்பாக பார்த்து பேசிக்கொள்வது எங்களுக்குள் இருந்தது.

சம்பவம் நடந்த அன்று தான் எனது அறையில்தான் இருந்தேன். சுவாதியை நான் சந்திக்கவில்லை. சுவாதி கொலை செய்யப்பட்ட சம்பவத்தை கேள்விப்பட்டு மிகுந்த அதிர்ச்சியடைந்தேன்.

எப்போதும் ஊருக்கு செல்வதுபோல் அன்றும் எனது ஊருக்கு வந்து விட்டேன். இந்த கொலையில் எனக்கு எவ்வித தொடர்பும் இல்லை.

இந்த படுகொலை வழக்கில் பொலிஸார் என்னை சந்தேகித்து வருவார்கள் என நான் நினைக்கவில்லை. நான் வீட்டில் இருந்தபோது பொலிஸ் உடையிலும், சாதாரண உடையிலும் இருந்த 20 பேர் என்னை தாக்க வந்தார்கள்.

அடுத்த சில நிமிடங்களில் என்ன நடந்தது என்பது எனக்கு தெரியவில்லை. நான் கழுத்தை அறுத்துக்கொள்ள எந்த சூழ்நிலையிலும் முயற்சிக்கவில்லை.

அந்த நிமிடத்தில் என்ன நடந்தது என்பது குறித்து தெரியவில்லை. கண்விழித்தபோது வைத்தியசாலையில் இருந்தேன்.

இந்த வழக்கில் பொலிஸார் என்னை குற்றவாளியாக சேர்த்திருப்பது குறித்து மிகுந்த வேதனை அடைந்தேன். சுவாதியின் அப்பாவுக்கும் என்னை தெரியும்.

என்னை அவர் பார்த்திருக்கிறார். வேண்டுமென்றே இந்த வழக்கில் நான் சிக்க வைக்கப்பட்டிருக்கிறேன்” என கூறியதாக சட்டத்தரணிகள் தெரிவித்துள்ளனர்.