நாவலப்பிட்டி – கெட்டபுலா கடியன்லென தோட்டத்தில் பழமைவாய்ந்த பாரிய மரம் ஒன்று முறிந்து விழுந்ததில் ஆறு வீடுகள் சேதமாகியுள்ளதோடு 40 பேர் பாதிக்கப்பட்டுள்ளதாக தெரிவிக்கப்பட்டுள்ளது.குறித்த சம்பவம் நேற்று (8) மாலை இடம்பெற்றுள்ளதாகவும், அதன்போது மூன்று வீடுகள் முற்றாகவும், மூன்று வீடுகள் பகுதியளவிலும் சேதமடைந்துள்ளதாக தோட்ட நிர்வாகம் குறிப்பிட்டுள்ளது.

இதில் பாதிக்கப்பட்ட குடியிருப்பாளர்களுக்கு உயிர் சேதம் எதுவும் இடம்பெறவில்லை என தெரிவிக்கும் தோட்ட நிர்வாகம், வீடுகளில் உள்ள பொருட்கள் முற்றாக சேதமடைந்திருப்பதாக தெரிவித்துள்ளது.அத்தோடு பாதிக்கப்பட்ட ஆறு குடும்பங்களை சேர்ந்த 40 பேர் தற்காலிகமாக தோட்ட கலாச்சார மண்டபத்தில் தங்க வைக்கப்பட்டுள்ளனர். இவர்களுக்கான உதவிகளை தோட்ட நிர்வாகம் செய்து வருகின்றது.

மரம் முறிந்து விழுந்ததன் காரணமாக இப்பகுதிக்கான மின்சார துண்டிப்பு ஏற்பட்டுள்ளதோடு, திருத்த பணிகளை நாவலப்பிட்டி மின்சார சபையினர் மேற்கொண்டு வருகின்றனர்.பழமைவாய்ந்த குறித்த மரத்தை அப்புறப்படுத்தும் நடவடிக்கையில் தோட்ட நிர்வாகமும், பிரதேசவாசிகளும் ஈடுபட்டுள்ளனர்.

திருகோணமலை – புல்மோட்டை பிரதேசத்திலுள்ள சிங்கள பாடசாலை ஒன்றில் ஐந்து மாணவிகளை பாலியல் துஷ்பிரயோகத்திற்கு உட்படுத்தியதாக சந்தேகிக்கப்படும் ஆசிரியரை எதிர்வரும் 22ஆம் திகதி வரை விளக்கமறியலில் வைக்குமாறு குச்சவெளி சுற்றுலா நீதிமன்ற நீதவான் பெர்ணான்டோ நேற்று (08) உத்தரவிட்டுள்ளார்.

புல்மோட்டை பிரதேசத்தின் பாடசாலை ஒன்றில் 14 மற்றும் 15 வயது மாணவிகளை பாலியல் துஷ்பிரயோகத்திற்கு உட்படுத்தியதாக, பெற்றோர்கள் மூலம் மாணவர்கள் புல்மோட்டை பொலிஸ் நிலையத்தில் நேற்று முன்தினம் (07) முறைப்பாடு செய்திருந்தனர்.

குறித்த முறைப்பாட்டினையடுத்து பொத்துவில் பகுதியைச் சேர்ந்த ஜானதிலக கருணாசேன (40 வயது) என்ற ஆசிரியரை கைது செய்து விசாரணை நடாத்தப்பட்டுள்ளது.குறித்த ஆசிரியருக்கெதிராக இதுவரை 05 முறைப்பாடுகள் கிடைக்கப் பெற்றுள்ளதாகவும், இன்னும் சில மாணவர்கள் பெற்றோர்கள் ஊடாக முறைப்பாடுகளை வழங்கி வருவதாகவும் பொலிஸார் தெரிவித்தனர்.

கொழும்பில் ஏற்பட்ட வௌ்ளத்தினால், பாதிக்கப்பட்ட பகுதிகளில் உள்ள குப்பைகளை நாளைய தினத்திற்குள் முற்றாக அகற்ற முடியும் என சிவில் பாதுகாப்பு திணைக்களம் தெரிவித்துள்ளது. முப்படையினர் மற்றும் உள்ளூராட்சி மன்றங்களின் உதவியுடன் இந்த குப்பைகளை அகற்ற நடவடிக்கை எடுத்துள்ளதாக திணைக்களத்தின் ஊடகப் பேச்சாளர் மேஜர் ஜெனரல் வஜிர குமாரதுங்க தெரிவித்துள்ளார்.

இதுவரை சுமார் 250 பகுதிகளில் குப்பைகள் அகற்றப்பட்டுள்ளதாக சுட்டிக்காட்டியுள்ள சிவில் பாதுகாப்பு திணைக்களம், கொலன்னாவை பகுதியின் சில இடங்களில் குப்பைகள் அகற்றப்பட வேண்டியுள்ளதாக குறிப்பிட்டுள்ளது.

கொஸ்வத்தை – தலங்கம பகுதியில் இடம்பெற்ற கைக்குண்டு தாக்குதலில் மூவர் உயிரிழந்துள்ளனர்.

இந்த சம்பவத்தில் இரண்டு பெண்கள் மற்றும் ஆணொருவருமே பலியாகியுள்ளதாகவும் 9 வயது சிறுமி ஒருவர் காயமடைந்துள்ளதாகவும் தெரியவந்துள்ளது.

சம்பவத்தில் பலியான ஆண் புனிதத்தளம் ஒன்றில் பணிபுரிபவராகும். அவரிடம் பெண் ஒருவர் தனது தாய் மற்றும் மகளுடன் வழிபாடு நிமித்தம் சென்ற வேளை, முரண்பாடு ஏற்பட்டுள்ளது.

பின்னர், இது தொடர்பில் முறையிட குறித்த பெண் பொலிஸ் நிலையம் சென்றுள்ளார். இந்தநிலையில், அங்கு வந்த அந்த ஆண் நபர் கைக்குண்டை வெடிக்க வைத்துள்ளதாக தெரியவந்துள்ளது.

இதில், சம்பந்தப்பட்ட ஆணும், பெண்ணும் சம்பவ இடத்திலேயே உயிரிழந்துள்ளதோடு, பெண்ணின் தாய் மற்றும் மகள் படுகாயமடைந்த நிலையில் கொழும்பு தேசிய வைத்தியசாலையில் அனுமதிக்கப்பட்டுள்ளனர்.

எதுஎவ்வாறு இருப்பினும் இதன்போது தாய் பலியாகியுள்ள நிலையில், காயமடைந்த சிறுமி வைத்தியாலையில் சிகிச்சை பெற்று வருவதாக, வைத்தியசாலை வட்டாரத் தகவல்கள் குறிப்பிடுகின்றன.

-அத தெரன-

கொஸ்கம சாலாவ இராணுவ முகாமில் ஏற்பட்ட தீயினால் சேதமடைந்த வீடுகளை புனரமைக்கும் நடவடிக்கைகள் ஆரம்பிக்கப்பட்டுள்ளதாக இராணுவம் தெரிவித்துள்ளது.

நேற்று முதல் இந்த நடவடிக்கைகள் ஆரம்பிக்கப்பட்டுள்ளதாக இராணுவத் தளபதி லெப்டினன் ஜெனரல் கிருஷாந்த டி சில்வா தெரிவித்துள்ளார்.

வீடுகளை புனரமைக்கும் நடவடிக்கைகள் துரிதப்படுத்தப்பட்டு அவற்றை விரைவில் மக்களுக்கு கையளிக்க எண்ணியுள்ளதாக அவர் மேலும் தெரிவித்தார்.

இதேவேளை அபாய வலயமாக அறிவிக்கப்பட்ட பகுதிகள் தற்போது பாதுகாப்பு வலயங்களாக மாற்றப்பட்டுள்ளதாக மேற்கு பாதுகாப்புப் படையின் கட்டளைத் தளபதி மேஜர் ஜெனரல் சுதந்த ரணசிங்க தெரிவித்தார்.

குறித்த பகுதியில் காணப்படும் வெடிபொருட்களின் பாகங்கள் அகற்றப்பட்டு வருவதாகவும் அவர் குறிப்பிட்டுள்ளார்.

முகாமிலிருந்து 500 மீற்றர் சுற்றுவட்டத்திலுள்ள மக்கள் நேற்றைய தினம் இராணுவத்தினரின் உதவியுடன் தமது வீடுகளுக்கு அவற்றின் நிலை தொடர்பில் பார்வையிட்டு மீண்டும் முகாம்களுக்கு சென்றதாகவும் மேஜர் ஜெனரல் சுதந்த ரணசிங்க கூறினார்.

இராணுவ முகாமில் ஏற்பட்ட தீச்சம்பவத்தினால் 75 வீடுகள் முற்றாக சேதமடைந்ததுடன், 150 வீடுகள் பகுதியளவில் சேதமடைந்துள்ளன.

மலேசியாவில் 154,140 அகதிகள் மற்றும் புகலிட கோரிக்கையாளர்கள் வசித்து வருவதாக அகதிகளுக்கான ஐக்கிய நாடுகள் ஆணையத்தின் மலேசிய பிரதிநிதி ரிச்சர்ட் டோவி தெரிவித்துள்ளார்.

ஏப்ரல் மாத கணக்கெடுப்பின் படி, 139,780 பேர் மியன்மாரை சேர்ந்தவர்கள் என்றும் மற்றவர்கள் இலங்கை, பாகிஸ்தான், சோமாலியா, சிரியா, ஈராக், ஈரான், பாலஸ்தீனத்தை சேர்ந்த மக்கள் என்றும் தெரியவந்துள்ளது.

இவர்களுக்கு இப்போது, அகதிகள் மருத்துவ காப்பீட்டு திட்டத்தின் படி மருத்துவ செலவுகளுக்கு ஆண்டுக்கு ஒரு அகதிக்கு 164 மலேசிய ரிங்கிட்டும் (2700 இந்திய ரூபாய்), அறுவை சிகிச்சைக்காக 10,000 மலேசிய ரிங்கிட்டும் (165,227 இந்திய ரூபாய்) நிர்ணயிக்கப்பட்டுள்ளது.

ஆர்எச்பி இன்சூரன்ஸ் என்ற நிறுவனம் இத்திட்டத்தினை செயல்படுத்த இருக்கிறது.

தேசிய மன நோய் விஞ்ஞான அறிக்கைக்கு அமைய இலங்கையில் பத்து பேரில் ஒருவர் மனநிலை பாதிக்கப்பட்டுள்ளதாக சுகாதார அமைச்சர் ராஜித சேனாரத்ன தெரிவித்துள்ளார்.

அத்துடன் அதில் சிகிச்சைப் பெறுவோர் நூறில் 20 % என அமைச்சர் தெரிவித்துள்ளார்.

இன்று கொழும்பில் இடம்பெற்ற நிகழ்வொன்றில் கலந்து கொண்ட போதே அமைச்சர் இதனைத் தெரிவித்துள்ளார்.

அத்துடன் உலக சுகாதார அமைப்பினால் வெளியிடப்பட்டுள்ள அறிக்கையின் படி, தற்கொலை செய்து கொள்வோர் வரிசையில் இலங்கை நான்காம் இடத்தில் காணப்படுவதாகவும் அவர் சுட்டிக்காட்டியுள்ளார்.

மேலும், இலங்கையில் நூற்றுக்கு 50 % மதுபானத்துக்கு அடிமையாகியுள்ளதாகவும், இதுவே மனநிலை பாதிப்பதற்கான காரணம் எனவும் சுகாதார அமைச்சர் குறிப்பிட்டுள்ளார்.

இதேவேளை, மனநிலை பாதிப்பு பிரச்சினையை குறைப்பது தொடர்பில் சில நடவடிக்கைகள் முன்னெடுக்கப்பட்டுள்ளதாகவும், அதற்கான சூழலை உருவாக்குவது கட்டாயம் எனவும் அமைச்சர் ராஜித தெரிவித்துள்ளார்.

அகில இந்திய அளவில் நடத்தப்படும் தேசிய நீச்சல் போட்டிக்கான தமிழ்நாட்டு அணிக்கு ஈழத்தமிழ் சிறுமி தனுஜா ஜெயக்குமார் தேர்வாகியுள்ளார்.

தேசிய அளவிலான நீச்சல் போட்டியில் தமிழ்நாட்டு அணி சார்பில் பங்கேற்கும் வீரர்களை தேர்வு செய்யும் தகுதிச்சுற்று போட்டிகள் சென்னை வேளச்சேரியில் நடைபெற்றது.

தமிழ்நாட்டுஅணித் தேர்வுக்காக கடந்த 3,4,5 ஆகிய நாட்களில் நடைபெற்ற தகுதிச்சுற்று போட்டிகளில் Sub-Junior பிரிவில் நடைபெற்ற நீச்சல் போட்டிகளில் திருச்சி SRM அணிசார்பில் கலந்து கொண்ட ஈழத்தமிழ் சிறுமி தனுஜா ஜெயக்குமார் இரண்டு வெள்ளி, ஒரு வெண்கலப்பதக்கங்களை வென்று தேசிய அளவிலான போட்டிக்கான அணியில் தேர்வாகியுள்ளார்.

100 மீட்டர் Freestyle பிரிவு நீச்சல் போட்டியில் குறித்த தூரத்தை 1:18.69 நேரத்திலும், 50 மீட்டர் Back Stroke பிரிவில் குறித்த தூரத்தை 0:41.90 நேரத்திலும் கடந்து இரண்டாவதாக வந்து இரண்டு வெள்ளிப்பதக்கங்களையும், 50 மீட்டர் Freestyle பிரிவில் குறித்த தூரத்தை 0:34.66 நேரத்தில் கடந்து மூன்றாவதாக வந்து வெண்கலப்பதக்கத்தையும் வென்றுள்ளார்.

இதன் மூலம் தமிழ்நாட்டு அணிசார்பிலான Sub-Junior பிரிவில் 50 மீட்டர் Back Stroke, 100 மீட்டர் Freestyle ஆகிய தனிநபர் பிரிவு நீச்சல் போட்டிகளுக்கும் 50×4 மீட்டர் Freestyle தொடர்நீச்சல் பிரிவு போட்டிக்கும் தகுதி பெற்றுள்ளார் தனுஜா.

இலங்கை வல்வெட்டித்துறையை பிறப்பிடமாக கொண்டு தற்போது தமிழ்நாட்டில் வசித்துவரும் ஈழத்தமிழ் சிறுமி தனுஜா தனது அபார நீச்சல் திறமையினாலும் கடுமையான பயிற்சியினாலும் தேசிய அளவிலான போட்டிக்கு தகுதி பெற்றுள்ளார்.

தமிழ்நாட்டில் அகதிகளாக தஞ்சமடைந்துள்ள தனுஜாவின் தொடர் வெற்றிகளும் எமது தேசத்திற்கும் மக்களுக்கும் பெருமை சேர்க்கிறது.
தமிழ்நாட்டில் உள் அரசியல் தலையீடுகள் மூலம் திறமையும் தகுதியும் இருந்தும் முக்கிய போட்டிகளில் பங்கேற்க முடியாத துயரம் தோய்ந்த வரலாறு விளையாட்டு துறையையும் விட்டுவைக்கவில்லை. அவற்றையெல்லாம் தனது திறமையின் மூலம் தகர்த்தெறிந்து வெற்றிகளை குவித்து வரும் தனுஜா தேசிய அளவிலான போட்டிகளிலும் வெற்றிபெற வாழ்த்துவோம்.

அகில இந்திய அளவிலான நீச்சல் போட்டிகள் இம்மாத இறுதியில் கர்நாடக மாநிலம் பெங்களூரில் நடைபெற உள்ளமை குறிப்பிடத்தக்கது.