கடன் பிரச்சினையால் 2 மகன்களையும் கொன்றுவிட்டு பனியன் நிறுவன அதிபர், மனைவியுடன் தூக்குப்போட்டு தற்கொலை செய்துகொண்டார்.

திருப்பூரை அடுத்த பொங்கலூரை சேர்ந்தவர் தாமரைகண்ணன்(வயது 40), பனியன் நிறுவன அதிபர். அவரது மனைவி பிரபாவதி(35), மகன்கள் தனுஷ்(14), அனுஷ்(8). ஒரு தனியார் பள்ளியில் தனுஷ் 8ம் வகுப்பும், அனுஷ் 4ம் வகுப்பும் படித்துவந்தனர்.

தாமரைகண்ணன் சில ஆண்டுகளாக நொச்சிப்பாளையத்தில் தனது நண்பருடன் சேர்ந்து பனியன் நிறுவனம் நடத்திவந்தார். பல்லடம் அருகே 4 மாடி கட்டிடம் கட்டி, 4–வது மாடியில் தனது குடும்பத்துடன் வசித்துவந்தார். கட்டிடத்தின் 3 தளங்களில் பனியன் நிறுவனம் புதிதாக தொடங்குவதற்கான ஏற்பாடுகளையும் அவர் செய்துவந்தார்.

தாமரைகண்ணன் நேற்று முன்தினம் இரவு தனது மனைவி, மகன்களுடன் காரில் வெளியே சென்றுவிட்டு வீடு திரும்பினார். இரவு தாமரைகண்ணனின் கைபேசிக்கு அவருடைய தம்பி சதீஷ் தொடர்பு கொண்டார். ஆனால் அவர் எடுக்கவில்லை. பிரபாவதியின் கைப்பேசிக்கு தொடர்பு கொண்டபோது அவரும் எடுக்கவில்லை. இதுபற்றி சதீஷ் தனது தந்தை ராஜமாணிக்கத்திடம் கூறினார்.

ராஜமாணிக்கம் நேற்று காலை தாமரைகண்ணனின் வீட்டுக்கு வந்தார். கதவு உள்பக்கமாக பூட்டப்பட்டு இருந்தது. கதவை தட்டியும் யாரும் திறக்கவில்லை.

இதனால் சந்தேகம் அடைந்த ராஜமாணிக்கம் அக்கம்பக்கத்தினர் துணையுடன் கதவு கண்ணாடியை உடைத்து உள்ளே சென்றார். 4வது மாடியில் உள்ள அறையில் தாமரைகண்ணன், பிரபாவதி ஆகியோர் தூக்கில் பிணமாக தொங்கிக் கொண்டிருந்தனர். அதிர்ச்சி அடைந்த அவர் வீட்டுக்குள் சென்று பார்த்தபோது தனித்தனி அறைகளில் தனுசும், அனுசும் தூக்கில் பிணமாக தொங்கினர்.

இதைப்பார்த்து ராஜமாணிக்கம் கதறி அழுதார். இதுகுறித்து பல்லடம் போலீசுக்கு தகவல் தெரிவிக்கப்பட்டது. போலீசார் சம்பவ இடத்துக்கு விரைந்து வந்து விசாரணை நடத்தினார்கள். கைரேகை நிபுணர்கள் தடயங்களை பதிவு செய்தனர்.

தாமரைகண்ணன், பிரபாவதி ஆகியோர் தங்களின் வாயையும், கண்ணையும் துணியால் கட்டியிருந்தனர். போலீசார் நடத்திய சோதனையில், வீட்டில் இருந்த கணினியில் தாமரைகண்ணன், கடிதம் ஒன்றை ஆங்கிலத்தில் டைப் செய்து வைத்திருந்தது தெரியவந்தது. அந்த கடிதத்தை போலீசார் கைப்பற்றி விசாரணை நடத்தி வருகிறார்கள்.

4 உடல்களையும் பிரேதபரிசோதனைக்காக கோவை அரசு ஆஸ்பத்திரிக்கு போலீசார் அனுப்பிவைத்தனர்.

பொலிசார் கூறும்போது, தாமரைகண்ணனுக்கு தொழில் சம்பந்தமாக கடன் பிரச்சினை இருந்ததாக தெரியவந்துள்ளது. இதனால் பல்வேறு நெருக்கடிக்கு உள்ளான அவர் தற்கொலை முடிவை எடுத்திருக்கலாம் என்று சந்தேகிக்கிறோம். முதலில் தனது இரு மகன்களை நைலோன் கயிற்றால் தூக்குப்போட்டு கொலை செய்துவிட்டு, அதன்பிறகு கணவன், மனைவி இருவரும் தூக்குப்போட்டு தற்கொலை செய்துகொண்டதாக தெரிகிறது என்றனர்.

சென்னையில் இன்று நடைபெற்ற பெண்களுக்கான மாரத்தான் நிகழ்ச்சியின் போது, தீவுத்திடல் அருகே மரப்பாலம் உடைந்து விழுந்ததில், சுமார் 500க்கும் மேற்பட்ட பெண்கள் காயமடைந்தனர்.

சென்னை தீவுத்திடலில் பிங்கத்தான் தனியார் அமைப்பின் சார்பில் ஏற்பாடு செய்யப்பட்டிருந்த மார்பக புற்றுநோய் தொடர்பான விழிப்புணர்வு மாரத்தான் ஓட்டம் இன்று நடைபெற்றது.

தீவுத்திடலில் இருந்து அடையாறு வரை ஏற்பாடு செய்யப்பட்டிருந்த மாரத்தானில் பெண்கள் மட்டுமே பங்குபெற அனுமதி அளிக்கப்பட்டிருந்தது. அதிகாலையிலேயே தொடங்கிய இந்த மாரத்தான் போட்டியில் பெண்கள் ஆர்வமுடன் கலந்து கொண்டனர். தீவுத்திடலில் கூவம் ஆற்றை இணைக்கும் வகையில் தரைப்பாலம் அமைக்கப்பட்டு இருந்தது.

இதனை மரப்பாலம் என்றே அனைவரும் அழைத்து வருகிறார்கள். இந்த பாலம் வழியாக எளிதாக தீவுத்திடலை அடையலாம். இந்நிலையில் மாரத்தானில் பங்கேற்க வந்திருந்த பெண்கள் இந்த மரப்பாலத்தின் வழியாக தீவுத்திடலுக்கு சென்று கொண்டிருந்தனர். அப்போது ஒரே நேரத்தில் அதிக பெண்கள் பாலத்தில் ஏறி, கடக்க முயற்சித்தனர்.

இதில், திடீரென்று மரப்பாலத்தின் நடுப்பகுதி சரிந்து, உடைந்து விழுந்தது. இந்த விபத்தில் சுமார் 300க்கும் மேற்பட்ட பெண்கள் காயமடைந்தனர். உடனடியாக பாலத்தில் சிக்கியிருந்த பெண்கள் பாதுகாப்பாக மீட்கப்பட்டனர்.

கூவம் ஆற்றில் நீர் குறைவான அளவே இருந்ததால், பெரிய அளவில் பாதிப்பு ஏற்படவில்லை என சம்பவத்தை நேரில் பார்த்தவர்கள் தெரிவித்துள்ளனர்.

இந்த சம்பவத்தை அடுத்து அந்த பாதை அடைக்கப்பட்டது. இதையடுத்து மாரத்தான் ஓட்டம் ஆரம்பித்த சிறிது நேரத்திலேயே நிறுத்தப்பட்டது. ஏற்கனவே மரப்பாலத்தின் உறுதித்தன்மையை சோதிக்க வேண்டும் என்றும், பராமரிப்பு பணியை மேற்கொண்டு புதிய தடுப்பு கட்டைகள் போட வேண்டும் என்றும் பொதுமக்கள் கோரிக்கை விடுத்து வந்தனர்.

இந்த சூழ்நிலையில், இத்தகைய விபத்து ஏற்பட்டிருப்பது அனைவரையும் அதிர்ச்சியில் தள்ளியுள்ளது.

 
மும்பை-புனே எக்ஸ்பிரஸ் சாலையில் நின்று கொண்டிருந்த கார்கள் மீது பேருந்து மோதியதில் மூன்று வாகனங்களும் அருகில் இருந்த கால்வாயில் விழுந்து விபத்துக்குள்ளாகியுள்ளது, இதில் 17 பேர் பலியாகியுள்ளனர். மேலும் 30 பேர் காயமடைந்துள்ளனர்.

தனியார் சொகுசு பேருந்து ஒன்று மகாராஷ்டிரா மாநிலம் சதாரா நகரில் இருந்து மும்பைக்கு கிளம்பியது. பேருந்து இன்று காலை மும்பை-புனே எக்ஸ்பிரஸ் சாலையில் சென்று கொண்டிருந்தது.

அப்போது அந்த பேருந்து சாலையோரம் நின்று கொண்டிருந்த இனோவா மற்றும் ஸ்விப்ட் கார்கள் மீது பயங்கரமாக மோதி மூன்று வாகனங்களும் 20 அடி பள்ளத்தில் கவிழ்ந்து விபத்துக்குள்ளானது.

இதில் 10 பெண்கள், 6 ஆண்கள், 6 மாத குழந்தை என மொத்தம் 17 பேர் பலியாகியுள்ளனர். மேலும் 30 பேர் காயம் அடைந்துள்ளதாக தகவல் வெளியாகியுள்ளது.

இதுகுறித்து தகவல் அறிந்ததும் மீட்பு குழுவினர் சம்பவ இடத்திற்கு விரைந்துள்ளனர். இந்த விபத்தில் காயமடைந்தவர்களின் சிலரது நிலைமை கவலைக்கிடமாக உள்ளதால் பலி எண்ணிக்கை அதிகரிக்கும் என அஞ்சப்படுகிறது.