சிவனொளிபாத யாத்திரை காலமானது கடந்த ஞாயிற்றுக்கிழமையுடன் நிறைவடைந்துள்ளதை அடுத்து அங்கு சுற்றுப்புற சூழலை குழு ஒன்று சுத்தப்படுத்தியுள்ளது.

கடந்த 27 மற்றும் 28ஆம் திகதி சிவனொளிபாதமலையை அண்மித்த பகுதிகளில் காணப்பட்ட குப்பைகள், பிளாஸ்டிக் கழிவுகள் என்பன குறித்த குழுவால் அப்புறப்படுத்தப்பட்டுள்ளதாக தெரிவிக்கப்பட்டுள்ளது.

அத்துடன் குறித்த குழு ‘ஒன்றிணைவோம் உதவி செய்வோம்’ எனும் தொனிப்பொருளின் கீழ் இந்த சுத்தப்படுத்தும் பணியை முன்னெடுத்துள்ளதாக தெரிவிக்கப்பட்டுள்ளது.

இந்த குழு முற்று முழுதாக பேஸ்புக் நட்பு வட்டாரங்களால் உருவாக்கப்பட்ட தனியார் அமைப்பு என்றும் சுட்டிக்காட்டப்பட்டுள்ளது.

மேலும் இவ்வாறான பொதுப்பணிகளில் தாம் ஈடுபடுவது எவ்வித இலாபத்துக்கோ, புகழுக்கோ அன்றி பேஸ்புக் வலைத்தளத்தினால் சமூகத்திற்கு பல நல்ல காரியங்களையும் செய்யமுடியும் என்பதை உணர்த்துவதற்காகவே என்று அந்த அமைப்பினர் குறிப்பிட்டுள்ளனர்.

கடந்த காலத்தில் நாட்டில் இருந்த முரண்பாடுகள் மற்றும் அரசியல் காணரங்களால் புலம்பெயர்ந்துள்ள இலங்கை பிரஜைகளுக்கு இலங்கை கடவுச்சீட்டு பெறுவதற்கு எதிராக விதிக்கப்பட்டிருந்த தடை நீக்கப்பட்டுள்ளது.

இத்தடை நேற்று முதல் நீக்கப்பட்டுள்ளதாக இலங்கை அரசாங்கம் அறிவித்துள்ளது.

குருநாகல் – அளவ்வ, சியம்பலாபிடிய பிரதேசத்தில் தாய் ஒருவர், தனது 5 மாத குழந்தையுடன் கிணற்றில் குதித்து தற்கொலை செய்து கொண்டுள்ளார்.

இந்த சம்பவம் நேற்று மாலை இடம்பெற்றுள்ளதாக பொலிஸார் குறிப்பிட்டுள்ளனர்.

26 வயதுடைய இரண்டு பிள்ளைகளின் தாயே இவ்வாறு தற்கொலை செய்து கொண்டுள்ளார் என குறிப்பிடப்பட்டுள்ளது.

இந்த சம்பவம் பற்றி தெரியவருவதாவது, தனது 5 மாத குழந்தை தாய் பால் அருந்தாமை காரணமாகவே குழந்தையின் தாய் தற்கொலை செய்து கொண்டிருப்பார் என பொலிஸார் சந்தேகிக்கின்றனர்.

இதன் போது தற்கொலை செய்து கொண்ட பெண்ணின் மூத்த பிள்ளை பாடசாலை சென்றிருந்ததாகவும், சம்பவம் குறித்து சியம்பலாபிடிய பொலிஸார் மேலதிக விசாரணைகளை முன்னனெடுத்து வருவதாகவும் தெரிவிக்கப்பட்டுள்ளது.

புங்குடுதீவு மாணவி வித்தியா படுகொலை வழக்கின் சந்தேக நபரான சுவிஸ் குமார் என்று அழைக்கப்படும் மகாலிங்கம் சசிக்குமார் எவ்வாறு கொழும்புக்கு தப்பி சென்றார் என்பது தொடர்பிலான விசாரணை அறிக்கையை அடுத்த வழக்கு தவணையின் போது மன்றில் சமர்பிப்பதாக குற்றத்தடுப்பு புலனாய்வு பிரிவு பொலிசார் தெரிவித்துள்ளனர்.

அத்துடன் தொடர்ந்து பன்னிரண்டு சந்தேக நபர்களையும் எதிர்வரும் 15ம் திகதி வரை விளக்கமறியலில் வைக்குமாறு ஊர்காவற்துறை பதில் நீதவான் கருப்பையா ஜீவராணி உத்தரவிட்டார்.

புங்குடுதீவு மாணவி கொலை வழக்கு இன்றைய தினம் (01.06) புதன்கிழமை ஊர்காவற்துறை நீதவான் நீதிமன்றில் பதில் நீதவான் கருப்பையா ஜீவராணி முன்னிலையில் எடுத்துக் கொள்ளப்பட்டது.

அதன் போது மாணவி கொலை வழக்கு தொடர்பில் கைது செய்யப்பட்டு தடுத்து வைக்கப்பட்டு உள்ள பன்னிரண்டு சந்தேக நபர்களும் நீதிமன்றில் முன்னிலைப்படுத்தப்பட்டனர்.

கடந்த வழக்கு தவணையின் போது நீதிமன்றினால் கோரப்பட்ட அறிக்கைகள் தொடர்பான விசாரணைகள் முன்னெடுக்கப்பட்டு வருவதனால் அடுத்த தவணையில் அறிக்கைகளை சமர்ப்பிப்பதாக குற்ற தடுப்பு புலனாய்வு பிரிவு பொலிசார் நீதவானிடம் தெரிவித்தனர்.

அதனை தொடர்ந்து பன்னிரண்டு சந்தேக நபர்களையும் எதிர்வரும் 15ம் திகதி வரை விளக்கமறியலில் வைக்குமாறு ஊர்காவற்துறை பதில் நீதவான் கருப்பையா ஜீவராணி உத்தரவு இட்டார்.

மேலும் கடந்த மாதத்தில் புங்குடுதீவு பாடசாலை மாணவி வித்தியாவின் தாயார் சந்தேக நபர்களின் உறவினர்களினால் அச்சுறுத்தப்பட்டுள்ளார்.

இவ்விடயம் தொடர்பான வழக்கு ஊர்காவற்துறை நீதவான் நீதிமன்றில் நாளை வியாழக்கிழமை (2) விசாரணைக்கு எடுத்துக்கொள்ளப்படவுள்ளது.

எனினும் சம்பந்தப்பட்ட இரு தரப்பினரும் சமரசத்திற்கு உடன்பட்டுள்ளதாக தெரிவிக்கப்பட்டுள்ளது.

இது தவிர வழக்கின் முக்கிய திருப்பு முனைக்கு உதவும் என அறியப்பட்ட டீ.என்.ஏ அறிக்கை இன்றைய தினம் மன்றில் எடுத்துக்கொள்ளப்படவில்லை.

-அத தெரன-

பயண சீட்டின்றி ரயிலில் பயணிக்கும் போது அறவிடப்படும் தண்டப்பணம் 3,000 ரூபாவாக அதிகரிக்கப்பட்டுள்ளது.

பயண சீட்டின்றி ரயிலில் பயணிப்பதை தடுக்கும் நோக்கத்தில் இந்த நடவடிக்கை எடுக்கப்பட்டுள்ளதாக ரயில்வே போக்குவரத்து அத்தியட்சகர் ஏ.டி.ஜி செனவிரத்ன தெரிவித்துள்ளார்.

பயண சீட்டின்றி பயணித்தல், உரிய வகுப்புகளில் பயணிக்காமை, எடுக்கப்படும் பயண சீட்டுகளுக்கு மாறாக அதிக தூரம் பயணித்தல் ஆகிய குற்றங்களின் போது இந்த தொகை தண்டப்பணமாக அறவிடப்படவுள்ளது.