வவுனியா உக்குளாங்குளத்தில் பாடசாலை மாணவி ஹரிஸ்ணவி (13 வயது) பாலியல் துன்புறுத்தலுக்கு உள்ளாக்கப்பட்டு படுகொலை செய்யப்பட்டு மூன்று மாதங்கள் கடந்த நிலையில் இன்றுவரை விசாரணைகள் மந்த கதியில் இடம்பெற்று வருவதாகவும் மருத்துவ அறிக்கைகள் இன்னும் கிடைக்கப்பெறவில்லை என்றும் பொலிசார் தெரிவித்துள்ளதாகவும், விசாரணைகள் பின்செல்வதால் குற்றவாளி தப்பிக்கக்கூடிய சந்தர்ப்பம் உள்ளதாகவும் தாயார் தெரிவித்துள்ளார்.

கடந்த 16.02.2016 அன்று வீட்டில் தனியாக இருந்தபோது பாடசாலை மாணவி ஹரிஸ்ணவி பாலியல் துன்புறுத்தலுக்கு உள்ளாக்கப்பட்டு கொடூரமாக படுகொலை செய்யப்பட்டார். எனினும் இன்று வரையில் குற்றவாளி இனங்காணப்படவில்லை.

சந்தேகத்தின் பேரில் அயல்வீட்டில் இருந்தவர் ஒருவர் கைது செய்யப்பட்டு விளக்கமறியலில் வைக்கப்பட்டுள்ளதுடன் பொலிசாரால் மருத்துவ அறிக்கை பெற்றுக்கொடுக்கவில்லை என்றும் தெரியவருகின்றது.

அதிகாரிகள், நாடாளுமன்ற உறுப்பினர்கள், மாகாணசபை உறுப்பினர்கள் இவ்விடயத்தில் தலையிட்டு தீர்வினைப் பெற்றுத்தருமாறு தாயார் வேண்டுகோள் விடுத்துள்ளார்.

 
வவுனியா மன்னார் வீதி கடந்த பல வருடங்களாக சீரற்ற நிலையில் குன்றும், குழியுமாக காணப்படுகின்றது. வீதி அபிவிருத்தி அதிகாரசபையினால் அடிக்கடி செப்பணிடப்படுகின்ற போதும் அவ் வீதி செப்பனிடப்பட்டு சில வாரங்களிலே மீண்டும் பழுதடைவதாக மக்கள் விசனம் தெரிவிக்கின்றனர்.

தற்போது வவுனியா நகரிலிருந்து சாம்பல்தோட்டம் வரை 6 கிலோமீற்றர் பாதை செப்பணிடப்படுவதாக வீதி அபிவிருத்தி அதிகார சபையின் அதிகாரி ஒருவர் தெரிவித்தார்.

மேலும் இவ் வீதி புனரமைப்பு பணியின் போது மணல் போடப்படுவதனால் வீதி விபத்துக்கள் ஏற்ப்படுகின்றன.

இன்றைய தினம் இவ் வீதி புனரமைப்பின் பின்னர் போடப்பட்ட மண்ணினால் துவிச்சக்கர வண்டியில் சென்ற வயோதிபர் ஒருவர் விபத்துக்குள்ளாகியுள்ளார்.

இவ்விடயம் தொடர்பாக பொதுமகன் ஒருவர் கருத்து தெரிவிக்கையில், இவ்வாறு செப்பணிடப்படும் வீதி இன்னும் இரு வாரங்களில் மீண்டும் பள்ளமாக காணப்படும். இவ்வாறான அபிவிருத்தி எமக்கு தேவையில்லை. முழுமையாக நீண்டகால அடிப்படையில் செப்பணிட்டுத் தருமாறு அதிகாரிகளை கேட்டுக் கொள்வதாகத் தெரிவித்தார்.

உரிய அதிகாரிகளே இது உங்களின் கவனத்திற்கு.

 
செட்டிகுளம் பூவரசங்குளம் பிரதான வீதியில் கொட்டப்படும் குப்பைகளால் மக்கள் பாரிய அசௌகரியங்களுக்கு உள்ளாகின்றனர்.

வவுனியா பூவரசங்குளம் பிரதான வீதியில் குப்பைகள் மற்றும் கட்டிடப்பொருட்களின் குப்பைகள் மற்றும் கழிவுப்பொருட்கள் என்பன கொட்டப்படுவதனால் துர்நாற்றம் வீசுவதாக மக்கள் விசனம் தெரிவிக்கின்றனர்.

இவ்விடயம் தொடர்பாக வர்த்தகர் ஒருவர் கருத்து தெரிவிக்கையில், நான் இவ் வீதியூடாக தினசரி பயணிக்கின்றேன். இவ்வாறு வீதியில் குப்பைகள் கொட்டுவதனால் சுற்றுப்புற சூழல் மாசடைவதுடன் துர்நாற்றமும் வீசுகின்றது. இவ் விடயத்தில் அரச அதிகாரிகளை குறைகூறமுடியாது. மக்கள் தான் இதற்கு முழுப்பொறுப்பும் என தெரிவித்தார்.

எமது சுற்றுப்புற சூழலினை பாதுகாப்பது எமது கடமை. சிந்திப்போம் செயற்படுவோம்.

தமிழக அரசியல் எமக்கு அவசியமில்லை. ஆனால் தமிழக மக்களின் அன்பும் – ஆதரவும் – அரவணைப்பும் எப்போதும் எமக்கு அவசியம் என்று தெரிவித்தார் யாழ்மேல் நீதிமன்ற நீதிபதி இளஞ்செழியன்.

வவுனியாவில் முன்தினம் நடைபெற்ற அனைத்துலக 14வது ஆய்வு மாநாட்டுக் கருத்தரங்கில் முதன்மை விருந்தினராகக் கலந்து கொண்டு உரையாற்றுகையிலேயே அவர் மேற்கண்டவாறு குறிப்பிட்டார். இதன்போது யாழ் மேல் நீதிமன்ற நீதிபதி மா. இளஞ்செழியன் தொடர்ந்து தெரிவிக்கையில்..

தமிழ்நாட்டு தமிழ்மொழியை செம்மொழி என்பார்கள். எங்கள் நாட்டு தமிழை செந்தமிழ் என்பார்கள். இலங்கைத் தமிழ் உச்சரிப்பு உரைநடை வேறு எங்கும் இல்லாதது மிகவும் வித்தியாசமானது. ஒரு காலத்தில் தமிழகத்தில் உள்ளவர்கள் இலங்கை வானொலியைக் கேட்பார்கள். கே.எஸ்.ராஜா அப்துல் ஹமீட் ஆகியோரின் உரையை கேட்பார்கள்.

போரின் போது நாம் அழுதபோது தமிழகம் அரவணைத்து உணவு தந்தது. பல்கலைக்கழகங்களில் படிப்பதற்கு அனுமதி தந்தது. தமிழகத்தின் அரசியல் எமக்கு அவசியமில்லை. ஆனால் தமிழக மக்களின் அன்பும் – ஆதரவும் – அரவணைப்பும் எப்போதும் எமக்கு அவசியம். எங்களுக்கு தொப்புள் கொடி உறவுகள் தான் முக்கியம்.

தமிழக மக்கள் – வடக்கு,கிழக்கு மக்களின் எதிர்காலத்துக்கு வழிகாட்ட வேண்டும். முன்பைப் போன்று பல்கலைக்கழக அனுமதி எமது தமிழ் மக்களுக்கு வழங்கவேண்டும். எங்களுடைய கல்விக்கு உதவி செய்ய வேண்டும். போரின்போது எமக்கு எவ்வாறு உதவி செய்தார்களோ அதேபோன்று ஆதரவு தரவேண்டும்.

எங்களுடைய தேச வழமைச் சட்டத்துக்கும், இந்தியாவின் மலபார் (மலையாள தேசத்துக்கும்) தொடர்பு உண்டு. தமிழகத்தின் கன்னியாகுமாரி மாவட்டத்துக்கும் எமது யாழ்ப்பாண மக்களுக்கும் இடையில் தொடர்புகள் இருந்திருக்கின்றன. எமது உறவுகள் தொடர்ந்து இருக்க வேண்டும். பாரதியின் கருத்துக்கு ஏற்ப தமிழ் எங்கும் ஒலிக்க வேண்டும். தமிழனை இலங்கை பார்த்துக் கொள்ளட்டும். தமிழ் மொழியை தமிழ் நாடு பார்த்துக் கொள்ளட்டும் என்று தெரிவித்தார்.

 
வவுனியா பூவரசங்குளம் தாலிக்குளம் அ.த.க பாடசாலையில் கல்வி கற்கும் வறுமைகோட்டுக்கு உட்பட 40 மாணவர்களுக்கு தாலிக்குளம் சிவில் பாதுகாப்பு குழு தலைவர் ப.அந்தோணிபிள்ளை தமிழ் விருட்சத்திடம் அவர்களின் நிலையை எடுத்து கூறி அவர்களுக்கு கற்றல் உபகரணங்கள் வழங்கும் படி விடுத்த வேண்டுகோளுக்கு அமைவாக பிரான்ஸ் வாழ் உறவு மூலம் 21.05.2016 அன்று தாலிக்குளம் அ.த .க பாடசாலை மண்டபத்தில் வைத்து கற்றல் உபகரணங்கள் வழங்கி வைக்க பட்டது.

இந்த நிகழ்வில் பாடசாலை ஆசிரியர் திரு கா.பிரதீஸ், தமிழ் விருட்சம் அமைப்பின் தலைவர் சந்திரகுமார் (கண்ணன் ), செயலாளர் மாணிக்கம் ஜெகன், சமூக ஆர்வலர் அன்றூ, சிவில் பாதுகாப்பு குழு தலைவர் ப.அந்தோணிபிள்ளை, செயலாளர் திருமதி இ.புனிதவதி, நிர்வாக உறுப்பினர்களான புனிதவதி, ஜெயபாரதி, ஜூலியட், கபலீஸ்வரி, மு.நாகலிங்கம் உட்பட பெற்றோர்கள், மாணவர்கள் கலந்து கொண்டனர்.

வவுனியா மாவட்ட புகையிரத கடவை காப்பாளர் சங்கம் இயற்கை அனர்த்தத்தில் பாதிக்கப்பட்ட மக்களுக்கு உதவும் முகமாக அனைத்து ஊழியர்களினதும் ஒரு நாள் கொடுப்பனவான 250 ரூபாவை பாதிக்கப்பட்ட மக்களுக்கு வழங்க முன்வந்துள்ளதாக வவுனியா மாவட்ட புகையிரத கடவை காப்பாளர் சங்கத்தின் தலைவர் ஏஸ்.கே.றொகான் ராஜ்குமார் தெரிவித்துள்ளார். தொடர்ந்து கருத்து தெரிவித்த அவர்..

புகையிரத கடவை ஊழியர்களுக்கு பொலிஸ் திணைக்களம் ஊடாகவே சம்பளம் வழங்கப்படுவதாகவும் தற்போது நாட்டில் ஏற்பட்டிருக்கும் வெள்ள அனர்த்தம் காரணமாக அசாதாரண சூழ்நிலைக்குள் சிக்கித் தவிக்கும் எம் உறவுகளுக்கு உதவும் முகமாக வவுனியா மாவட்டத்தில் பணியாற்றும் 75 ஊழியர்களின் விருப்பத்திற்கு அமைவாக தலைவர் செயலாளர் ஆகியோரின் தீர்மானத்திற்கு இணங்க ஒருநாள் கொடுப்பனவை அனர்த்த நிவாரண முகாமைத்துவ மத்திய நிலையத்திற்கு அனுப்பி வைக்குமாறு வவுனியா பொலிஸ் அத்தியட்சகரை கடிதம் மூலம் கோரியிருப்பதாகவும் பொலிஸ் அத்தியட்கர் இச் செயற்பாட்டுக்கு பாராட்டு தெரிவித்ததுடன் உடனடியாக நடவடிக்கை மேற்கொண்டு பணத்தை நிவாரணத்திற்கு அனுப்பி வைப்பதாக உறுதியளித்ததாகவும் தெரிவித்தார்.