சந்தானம் தற்போது நகைச்சுவை வேடத்தில் நடிக்காமல், கதாநாயகனாக நடித்து வருகிறார். அதனால் அஜித் படத்தில் சந்தானம் நடிக்க வில்லை.

சின்னத்திரையில் இருந்து சினிமாவுக்கு வந்த சந்தானம், முதன் முதலில் சிம்புவின் மன்மதன் படத்தில் அறிமுகம் ஆனார். அதைத் தொடர்ந்து நகைச்சுவை வேடங்களில் நடித்து வந்தார்.

சிவா மனசுல சக்தி படத்தில் முக்கிய வேடத்தில் நடித்தார். இதன் பின்னர் தமிழ் படங்களில் சந்தானத்துக்கு முக்கிய இடம் கிடைத்தது. இந்த நிலையில் வடிவேலு சினிமாவை விட்டு ஒதுங்கினார்.

இதனால் சந்தானத்தின் மார்க்கெட் சூடுபிடிக்கத் தொடங்கியது. இவர் இல்லாத படம் இல்லை என்ற நிலை உருவானது. மற்ற நடிகர்களுடன் நகைச்சுவை வேடங்களில் நடித்த சந்தானம் கண்ணா லட்டு தின்ன ஆசையா படத்தில் இரண்டு ஹீரோக்களில் ஒருவர் ஆனார். அதன் பின்னர் வல்லவனுக்கு புல்லும் ஆயுதம், இனிமே இப்படித்தான் படங்களில் கதாநாயகனாக நடித்தார்.

இப்போது தில்லுக்கு துட்டு என்ற படத்தில் சந்தானம் நடித்து இருக்கிறார். இது விரைவில் திரைக்கு வருகிறது. இந்த நிலையில் ஏற்கனவே, அஜித்தின் வீரம் படத்தில் நடித்த சந்தானத்தை அடுத்து அஜித் நடிக்க இருக்கும் அவரது 57வது படத்தில் நடிக்க அணுகி உள்ளனர்.

ஆனால் அதில் காமெடியனாக நடிக்க விரும்ப வில்லை. இதுபற்றி கூறிய சந்தானம்.. “எல்லோருக்கும் வாழ்க்கையில் அடுத்த கட்டத்துக்கு போகவே விரும்புகிறார்கள். நகைச்சுவைப் படங்கள் நிறைய வருகின்றன. ஆனால் இதிலேயே நீண்ட காலம் நிலைத்திருக்க விரும்பவில்லை என்று தெரிவித்துள்ளார்.

விஜய்யின் தெறி படத்திலும் நகைச்சுவை வேடத்தில் சந்தானம் நடிக்க சம்மதிக்கவில்லை.

கதாநாயனாக நடிக்கும் படங்களின் கால்ஷீட் பாதித்து விடக் கூடாது என் பதற்காகவே அஜித் படத்தையும் ஏற்கவில்லை என்று கூறப்படுகிறது.

அனுஷ்கா சிங்கம் படத்தின் 3ம் பாகமாக தயாராகும் எஸ்3 படத்தில் சூர்யா ஜோடியாக நடித்துக்கொண்டு இருக்கிறார். பாகுபலி இரண்டாம் பாகத்திலும் நடிக்கிறார். அனுஷ்காவுக்கு 34 வயது ஆகிறது. ஆனாலும் கதாநாயகி வாய்ப்புகள் குவிகின்றன. இதற்கு அவருடைய அழகே காரணம் என்கின்றனர்.

தனது அழகை கவனமாக அவர் பராமரித்து வருகிறார். அழகாக இருப்பது எப்படி என்பது குறித்து அனுஷ்கா அளித்த பேட்டி வருமாறு.

நான் அழகாக இருப்பதாக ரசிகர்கள், பட உலகினர் பாராட்டுகின்றனர். ஒரு படத்தில் குண்டுப் பெண் வேடத்தில் நடித்தேன். அந்த பருமன் கூட அழகுதான் என்றும் கூறினர். நான் அழகாக இருப்பதற்கான ரகசியம் என்ன என்று பலரும் கேட்டவண்ணம் இருக்கிறார்கள். அழகு என்பது அவரவர் கையில் இருக்கிறது.

சிலர் அந்த அழகை காப்பாற்றிக்கொள்கிறார்கள். வேறு சிலரோ அதை தொலைத்து விடுகிறார்கள். அழகு என்பது கடைகளில் கிடைக்கும் கிரீம்களை தடவுவதால் வருகிறது என்று நினைப்பவர்களும் உண்டு. அது தவறு. அழகு சருமம் சம்பந்தப்பட்டது என்று நினைத்து சருமத்தை மட்டும் மெருகேற்றினால் அழகு வராது. அது மனம் சம்பந்தப்பட்டது.

இரவு தூங்காமல் இருப்பது, எப்போது பார்த்தாலும் கவலைப்பட்டுக் கொண்டு இருப்பது, சாதாரண பிரச்சினைகளை பெரிதாக எடுத்துக்கொண்டு அதிலேயே குழம்பிப்போய் இருப்பது, போன்றவை அழகை கெடுத்து விடும். நான் எந்த பிரச்சினை வந்தாலும் வருத்தப்பட மாட்டேன். எல்லா விஷயங் களையும் பொசிட்டிவ் ஆகவே பார்ப்பேன்.

மனதில் என்ன கவலை இருந்தாலும் முகத்தில் தெரியும். எனவே கவலைகளை நெருங்க விடமாட்டேன். மனதை எப்போதும் தூய்மையாக வைத்து இருப்பேன். மனம் அழகாக இருந்தால் வெளிப்புற தோற்றமும் அழகாகும். தினமும் யோகா பயிற்சிகள் செய்கிறேன். அதுவும் எனது அழகுக்கு முக்கிய காரணமாக இருக்கிறது என்று அனுஷ்கா தெரிவித்தார்.

படப்பிடிப்பில் பாலியல் தொல்லை கொடுத்ததாக தயாரிப்பாளர் மீது நடிகை புவிஷா புகார் தெரிவித்துள்ளார்.

மலேசியாவைச் சேர்ந்த தமிழ் பெண் புவிஷா மனோகரன். பரதநாட்டியம் கற்றவர். இவர் பாலா இயக்கிய பரதேசி படத்தில் நடித்து சினிமாவில் அறிமுகமானார். ஷாருக்கான், தீபிகா படுகோனே ஜோடியாக நடித்து தமிழ், இந்தியில் வெளியாகி வெற்றிகரமாக ஓடிய சென்னை எக்ஸ்பிரஸ் படத்தில் தீபிகா படுகோனேயின் தங்கை கதாபாத்திரத்தில் வந்தார்.

இந்த நிலையில் புவிஷாவுக்கு கன்னடத்தில் தயாரான ஜில் ஜில் என்ற படத்தில் கதாநாயகியாக நடிக்க வாய்ப்பு கிட்டியது. இந்த படத்தை மது இயக்கினார். வெங்கடேஷ் பிரசாத் தயாரித்தார். உதய் பல்லால் ஒளிப்பதிவு செய்தார். இந்த படத்தின் படப்பிடிப்பில் தயாரிப்பாளரும் ஒளிப்பதிவாளரும் தனக்கு பாலியல் தொல்லை கொடுத்ததாக புவிஷா பரபரப்பு புகார் தெரிவித்துள்ளார். இதுகுறித்து அவர் கூறியதாவது..

ஜில் ஜில் படத்தில் என்னை கதாநாயகியாக ஒப்பந்தம் செய்ததில் இருந்தே தயாரிப்பாளர் வெங்கடேஷ் பிரசாத்தும், ஒளிப்பதிவாளர் உதய் பல்லாலும் என்னிடம் தவறாக நடக்க முயன்றனர். படப்பிடிப்பில் அடிக்கடி பாலியல் தொல்லை கொடுத்தார்கள். தயாரிப்பாளர் என்னை ஹோட்டல் அறைக்கு வரும்படி அழைத்தார்.

இது எனக்கு மிகுந்த மன உளைச்சலை ஏற்படுத்தியது. படப்பிடிப்பில் எனக்கு பாலியல் தொந்தரவு கொடுத்த இவர்கள் தண்டிக்கப்பட வேண்டும். எனவே இருவர் மீதும் பொலிஸில் புகார் அளிக்க முடிவு செய்துள்ளேன் என்று புவிஷா கூறினார்.

புவிஷா பொலிசில் புகார் அளித்ததும் இருவரும் கைது செய்யப்படலாம் என்று கன்னட பட உலகில் பரபரப்பு ஏற்பட்டுள்ளது.