கடவத்த, கோப்பியவத்த பகுதியில் கையடக்கத்தொலைபேசியில் விளையாடிக்கொண்டிருந்த பாடசாலை மாணவன் ஒருவன் மின்னல் தாக்கி பரிதாபமான முறையில் உயிரிழந்த சம்பவம் ஒன்று இடம்பெற்றுள்ளது.

பாடசாலை மாணவன் ஒருவன் கட்டிலில் இருந்தவாறே தனது கையடக்கத்தொலைபேசியில் விளையாடிக்கொண்டிருந்தபோது, திடீரெனெ மின்னல் தாக்கியதையடுத்து பரிதாபமாக உயிரிழந்துள்ளான்.

குறித்த மாணவன் கிரிவெல்ல மகா வித்தியாலத்தில் உயர் தரத்தில் கல்வி கற்றுவந்த, குடும்பத்திற்கு ஒரே ஆண் மகன் ஆவான். இச்சம்பவம் குறித்து அவரது சகோதரி கூறுகையில்,

தம்பி எப்போதும் கையடக்கத்தொலைபேசியை கைகளில் வைத்துக்கொண்டே இருப்பான், யார் சொன்னாலும் கேட்பதில்லை.
சாதாரண தரப் பரீட்சையில் சித்தியடைந்ததையடுத்து, தந்தை கையடக்கத்தொலைபேசியொன்றை அவனுக்கு பரிசளித்தார்.

மழைகாலங்களிலும் அவன் அதை பயன்படுத்திய வண்ணமே இருப்பான். குறித்த சம்பவதினத்தன்றும் அதேபோல் கட்டிலில் இருந்தவாறே விளையாடிக்கொண்டிருந்தான் அப்போது இடி முழங்கும் சத்தம் கேட்டது. அதையடுத்து, அக்கா என்று என்னை அழைக்கும் சத்தமும் கேட்டது விரைந்துசென்று பார்த்தேன்.

அவன் கட்டிலிருந்து சில அடிகள் முன்னோக்கி கீழே விழுந்திருந்தான்.
நான் என்னவென்று விசாரித்த போது பதில் வராததால் தொட்டுப்பார்த்தேன், கைகள் உறைந்து போய்க் காணப்பட்டன.

அத்துடன் பயத்து போய் நான் அனைவரையும் சத்தம் இட்டு அழைத்து தம்பியை அவசரமாக வைத்தியசாலைக்கு தூக்கிச் சென்றேன் என அவர் தெரிவித்தார்.

ஊழலற்ற நல்லாட்சியை உருவாக்குவதற்கான இலங்கை அரசாங்கத்தின் அர்ப்பணிப்பை பிரித்தானிய பிரதமர் டேவிட் கெமரன் பாராட்டியுள்ளார்.

லண்டனில் நேற்று (12.05) நடைபெற்ற ஊழலுக்கு எதிரான சர்வதேச மாநாட்டில் கலந்துகொள்வதற்கு முன்னதாக ஜனாதிபதி மைத்திரிபால சிறிசேனவுடன் இடம்பெற்ற இருதரப்பு சந்திப்பின் போதே பிரித்தானிய பிரதமர் பாராட்டு தெரிவித்ததாக ஜனாதிபதி ஊடகப் பிரிவு விடுத்துள்ள அறிக்கையில் சுட்டிக்காட்டப்பட்டுள்ளது.

ஊழலற்ற உலகத்தை உருவாக்கும் நோக்கிலான ஊழலுக்கு எதிரான சர்வதேச மாநாட்டில், ஊழலை ஒழிப்பதற்காக நடவடிக்கைகள் பலவற்றை எடுத்துள்ள தலைவராக ஜனாதிபதி மைத்திரிபால சிறிசேன கலந்துகொள்கின்றமை சிறப்பானதாகும் என்றும் பிரித்தானிய பிரதமர் மேலும் குறிப்பிட்டுள்ளார்.

எவரெஸ்ட் சிகரத்தின் உச்சியை சென்றடைந்து சாதனை படைக்கும் நோக்கில் இரு இலங்கையர்கள் காத்திருக்கின்றனர். உலகின் மிக உயரமான எவரெஸ்ட் சிகரத்தின் உச்சிக்கும் செல்லும் இறுதிக்கட்டத்தை எட்டியுள்ளதாக அவர்கள் தெரிவித்துள்ளனர்.

ஜயந்தி குருஉத்தும்பால மற்றும் யோஹான் பீரிஸ் (Jayanthi Kuru Utumpala – Johann Peiris) ஆகிய இருவரும் எவரெஸ்ட் சிகரத்தின் உச்சிக்கு செல்லும் எதிர்பார்ப்பில் உள்ள இலங்கையர்களாகும்.

இவர்களின் எண்ணம் ஈடேறுமானால், எவரெஸ்ட் சிகரத்தின் உச்சிக்கு சென்ற முதலாவது இலங்கையர்கள் என வரலாற்று சாதனை பதிவு செய்வர்.

இமயமலை எனப்படும் எவரெஸ்ட் மலைப் பகுதி அதிக குளிராக உள்ள நிலையில் வளிமண்டலத்தில் ஒட்சிசன் குறைந்த அளவில் உள்ளது.

இந்த நிலைமையினை தாங்கிக்கொள்ள கூடிய வகையில் அவர்களின் உடல்களை தயார்படுத்த ஒன்றரை மாதம் பயிற்சி பெற்று, உரிய முறையை நடைமுறைப்படுத்தவுள்ளதாக ஜயந்தி குருஉத்தும்பால மற்றும் யோஹான் பீரிஸ் தெரிவித்துள்ளனர்.

அதற்காக எவரெஸ்ட் மலைகளின் அடிவாரத்தில் அமைந்துள்ள முகாம்களில் இருந்து முறையே இலக்கம் 1, 2 மற்றும் 3 ஆகிய முகாம்களுக்கு சென்று மீண்டும் வருகை கட்டங்களை நிறைவு செய்துள்ளதாக யோஹான் பீரிஸ் தெரிவித்துள்ளார்.

முதலாம் இலக்க முகாமிற்கு சென்று மீண்டும் மலையின் அடிவாரத்தில் அமைந்துள்ள முகாம்களுக்கு வருவதாகவும், அதன் பின்னர் அரை நாள் ஓய்வு பெற்றுக்கொண்டு மீண்டும் இரண்டாம் இலக்க முகாமிற்கு சென்று மீண்டும் அதே இடத்திற்கு வரவேண்டும். அத்தகைய ஒரு சுழற்சி முறையை பின்பற்ற வேண்டும் எனவும், அவை அனைத்தையும் தாங்கள் நிறைவு செய்துள்ளதாக ஜயந்தி குறிப்பிட்டுள்ளார்.

மலை உச்சியில் 10 நாட்களுக்கு காலநிலை சிறப்பான நிலையில் காணப்படும் எனவும், அதனை இலக்கு வைத்து மலை உச்சிக்கான பயணத்தை ஆரம்பிப்பதாக அவர்கள் கூறியுள்ளனர்.

தாங்கள் தற்போது இறுதி கட்டமாக மலை உச்சிக்கு செல்லவுள்ளதாகவும், அதற்கு அவசியமான காலநிலைக்காக காத்திருப்பதாகவும், தாங்கள் நினைத்ததனை விடவும் இது மிகவும் கடினமான விடயம் என குறிப்பிட்டுள்ளனர்.

குழு என்ற ரீதியில் தமக்கு எவரெஸ்ட் சவாலை வெற்றி கொள்ள முடியும் என ஜயந்தி மற்றும் பீரிஸ் எதிர்பார்த்துள்ளனர்.

இதுவரையில் எவரெஸ்ட் மலை உச்சிக்கு வெற்றிகரமான முறையில் மூவாயிரம் பேர் வரையில் சென்றுள்ளனர்.

எவரெஸ்ட் மலை உச்சிக்கு ஏறிய சந்தர்ப்பத்தில் உயிரிழந்தவர்களின் எண்ணிக்கை 210 என பதிவாகியுள்ளது.

கல்விப் பொதுத் தராதர உயர்தரப் பரீட்சையை ஏப்ரல் மாதம் நடாத்துவது குறித்து பேச்சுவார்த்தை நடத்தப்பட்டு வருவதாக உயர்கல்வி இராஜாங்க மொஹான் லால் கிரேரு தெரிவித்துள்ளார்.

அரசாங்கத் தகவல் திணைக்களத்தில் நேற்று நடைபெற்ற செய்தியாளர் சந்திப்பில் அவர் இதனைக் குறிப்பிட்டுள்ளார். அவர் மேலும் கூறுகையில்,

ஏப்ரல் மாதம் பரீட்சை நடாத்தி ஜனவரி மாதம் மாணவர்களை பல்கலைக்கழகங்களுக்கு உள்ளீர்ப்பதே இதன் நோக்கமாகும்.
தற்போதைய நடைமுறையில் பல்கலைக்கழக அனுமதிக்காக மாணவ மாணவியர் சுமார் இருபது மாதங்கள் காத்திருக்க நேரிட்டுள்ளது.

ஏப்ரல் மாதம் பரீட்சை நடாத்தினால் இந்தக் காலத்தை எட்டு மாதங்களாக குறைக்க முடியும். பல்கலைக்கழக அனுமதி காலம் தாழ்த்தப்படுவதனால் தனியார் நிறுவனங்கள் நோக்கிப் போவதும் அதிகரித்துள்ளது.

இந்த நிலைமையை சரி செய்வதே அரசாங்கத்தின் நோக்கமாக அமைந்துள்ளது.ஏப்ரல் மாதம் பரீட்சை நடாத்துவது குறித்து கல்வி அமைச்சின் செயலாளர் மற்றும் பரீட்சைத் திணைக்களத்துடன் பேச்சுவார்த்தை நடத்தப்பட்டுள்ளது எனவும் கிரேரு தெரிவித்துள்ளார்.

 
இலங்கை வம்சாவளியைச் சேர்ந்த சிறுமியான நிஷி உக்லே இங்கிலாந்தில் சாதனை படைத்துள்ளார்.

நுண்ணறிவில் சிறந்த விஞ்ஞானியான அல்பட் என்ஸ்டைனின் சாதனை 10 வயது சிறுமியான நிஷி உக்லேயால் முறியடிக்கப்பட்டுள்ளது.

இங்கிலாந்தின் மென்சா நிறுவனத்தினால் முன்னெடுக்கப்பட்ட நுண்ணறிவுத் தேர்விலேயே கலந்துகொண்டு சாதனையை முறியடித்துள்ளார்.

குறித்த இச்சிறுமி தனது முதலாவது தேர்வில் 162 புள்ளிகளையும் இரண்டாவது தேர்வில் 142 புள்ளிகளை பெற்றுக்கொண்டுள்ளார்.

இவரின் அறிவுத்திறமையைக்கண்டு வியந்த அவ் அமைப்பினர் இச்சிறுமியை அவர்களின் அமைப்பில் இணைத்துக்கொண்டுள்ளனர்.

இச்சிறுமி அல்பட் அய்ன்ஸ்டைனை விட 2 புள்ளிகள் அதிகமாக பெற்றுக்கொண்டமை குறிப்பிடத்தக்கது.

நிஷி உக்லேவின் பெற்றோரான நிலங்க மற்றும் ஷிரோமி கடந்த 2001 ஆம் ஆண்டு இலங்கையிலிருந்து இங்கிலாந்தின் மென்சஸ்டர் பகுதிக்கு சென்றனர்.

இவரின் சாதனை தொடர்பாக சிறுமியின் தந்தை கூறுகையில்,

அவள் எங்களுக்கு கிடைத்த வரம். வெகு சீக்கிரத்திலேயே அவள் எழுத படிக்க கற்றுக்கொண்டாள் , அத்துடன் அவள் கணிதத்தில் தேர்ச்சி பெற்றுக்காணப்பட்டாள்.

நாங்களும் பல சுவாரஸ்யமான சோதனைகளை அவளுக்கு வழங்கினோம். எந்தப்பெற்றோரும் தமது பிள்ளைகளின் திறமைகள் வீணாக்கப்படுவதை ஏற்றுக்கொள்ள மாட்டார்கள் இருப்பினும் அவர்களின் குழந்தைப்பருவத்தை சரி சமமான வகையில் பேணப்பட வேண்டும்.

அவளும் ஏனைய சிறுவர்களைப்போல் 10 வயதுச்சிறுமி . அவளுக்கு படிக்கவும் சைக்கிள் ஓட்டவும் மிகவும் பிடிக்கும். அவள் குறித்து நான் மிகவும் பெருமையடைகிறேன்.

கடந்த மாதம் மென்சஸ்டரில் இடம்பெற்ற தேர்வை எழுதிய முதல் குழந்தை நிஷி ஆகும். முதல் தேர்வில் 150 கேள்விகளுக்கும் விடையளித்தாள், ஆனால் இரண்டாவது வினாத்தாளை சரியான நேரத்திற்குள் விடையளிக்க தவறிவிட்டாள்.

இது குறித்து சிறுமி நிஷி தெரிவிக்கையில்,

விடையளிப்பது அவ்வளவு இலகுவான விடயமல்ல. அதேவேளை அவ்வளவு கடினமானதாகவும் இருக்கவில்லை . முதல் வினாத்தாள் எழுதி முடித்த பின் போதியளவு நேரம் இருந்தமையினால் விடைகளை சரி பார்க்க முடிந்தது என தெரிவித்தார்.