இலங்கை வரலாற்றிலேயே அதிகூடிய வெப்பநிலையைக் கொண்ட நாட்களாக கடந்த சில நாட்கள் கணிக்கப்பட்டிருப்பதாக வானிலை அவதான நிலையம் தெரிவித்துள்ளது.

இந்து சமுத்திரத்தில் காற்றின் வேகம் வெகுவாகக் குறைவடைந்துள்ளமை, வானத்தில் மேகங்கள் குறைந்துள்ளமை, சூரியன் பூமிக்கு சரி நேராக சஞ்சரித்தல் போன்ற காரணங்களாலேயே இந்த அதி உஷ்ண காலநிலை தோன்றியிருப்பதாக வானிலை அவதான நிலையத்தின் பணிப்பாளர் சரத் பிரேமலால் தெரிவித்துள்ளார்.

நாட்டின் அதிகூடிய வெப்பநிலையான 38.9 பாகை (செல்சியஸ்) வவுனியாவிலும் அதற்கடுத்து பொலநறுவையில் 36.9 பாகையும், குருநாகல் மற்றும் இரத்தினபுரியில் 36.2 பாகையும், பொத்துவிலில் 35.2 பாகையும் பதிவாகியுள்ளதாக அவர் தெரிவித்தார்.

கொழும்பின் சராசரி வெப்பநிலை 33 பாகை செல்சியஸாகப் பதிவாகியுள்ளதாகவும் இங்கு காற்றின் வேகம் மணிக்கு 16 கிலோமீற்றர்களாகக் குறைந்துள்ளமையே இதற்குக் காரணம் எனவும் கூறிய சரத் பிரேமலால்,

வசதி வாய்ப்புள்ள கொழும்பு வாசிகள் இந்தக் கோடை காலத்தை சமாளிப்பதற்காக நுவரெலியா போன்ற மலைப் பிரதேசங்களில் முற்றுகையிட்டுள்ளனர் எனவும் தெரிவித்தார்.

அரசாங்க வைத்தியசாலைகள் அனைத்திலும் இரத்த பரிசோதனை செய்ய நடவடிக்கை எடுக்கப்படும் என சுகாதார மற்றும் போசாக்கு அமைச்சர் டாக்டர் ராஜித சேனாரட்ன தெரிவித்துள்ளார்.புதுவருடத்தின் பின்னர் சுப நேரத்தில், சுகாதார அமைச்சில் கடமைகளை ஆரம்பித்த போது அமைச்சர் இதனைத் தெரிவித்துள்ளார்.

அவர் தொடர்ந்தும் கூறுகையில்…

இந்த ஆண்டின் இறுதிக்குள் நாட்டின் சகல அரசாங்க வைத்தியசாலைகளிலும் இரத்த பரிசோதனை நடாத்தக் கூடிய வசதிகள் ஏற்படுத்தப்படும்.ஆசிய பிராந்திய வலயத்தில் வெளிநாட்டவர்களை ஈர்க்கும் வகையில் சுகாதாரத் துறை மேம்படுத்தப்படும்.நாட்டு மக்களுக்கு தரமான ஓர் மருத்துவ சேவையை வழங்க நடவடடிக்கை எடுக்கப்படும்.

இந்த ஆண்டில் தட்டுப்பாடு இன்றி அனைத்து அரசாங்க வைத்தியசாலைகளிலும் மருந்துப் பொருட்களை விநியோகம் செய்ய நடவடிக்கை எடுக்கப்படும் என சுகாதார அமைச்சர் டாக்டர் ராஜித சேனாரட்ன தெரிவித்துள்ளார்.

நாட்டில் காணப்படும் சில அரசாங்க வைத்தியசாலைகளில் இரத்த பரிசோதனை செய்யக்கூடிய வசதிகள் கிடையாது.தனியார் ஆய்வு கூடங்களில் பரிசோதனைகளை மேற்கொண்டு அந்த அறிக்கைகளை அரசாங்க வைத்தியசாலைகளில் சமர்ப்பிக்க வேண்டிய சந்தர்ப்பங்கள் காணப்படுகின்றமை குறிப்பிடத்தக்கது.

பெற்ற மகனை மிகவும் கொடூரமாக நடாத்திய தாய் மற்றும் தந்தைக்கு நீதிமன்றம் சிறைத்தண்டனை மற்றும் அபராதம் விதித்துள்ளது. நீர்கொழும்பு உயர் நீதிமன்றம் அண்மையில் இந்த தண்டனையை விதித்துள்ளது.

14 வயதான பாடசாலை மாணவர் ஒருவரை தாயும் தந்தையும் மிகவும் கொடூரமான முறையில் தாக்கி சித்திரவதைக்கு உட்படுத்தியதாக குற்றம் சுமத்தப்பட்டு வழக்குத் தொடரப்பட்டிருந்தது.

சம்பவத்துடன் தொடர்புடைய பெற்றோருக்கு இரண்டு ஆண்டுகால கடூழிய சிறைத்தண்டனை விதிக்கப்பட்டு, அந்த தண்டனை பத்தாண்டுகளுக்கு ஒத்தி வைக்கப்பட்டதுடன், 5000 ரூபா அபராதம் செலுத்துமாறும் உயர் நீதிமன்றம் உத்தரவிட்டுள்ளது.

நீர்கொழும்பு உயர் நீதிமன்ற நீதவான் ஜானகீ ஜயரட்ன இந்த தண்டனையை விதித்துள்ளார்.

கே.ஏ. சுதேஸ் லக்மால் என்ற தரம் 8ல் கல்வி கற்று வந்த மாணவரை பெற்றோர் கொடூரமாக தாக்கியதாக தெரிவிக்கப்படுகிறது. 2006ம் ஆண்டு மார்ச் மாதம் 19ம் திகதி குறித்த சம்பவம் இடம்பெற்றுள்ளது.

கொடகமுவ உடவெல வீதியைச் சேர்ந்த தம்பதியினரே இவ்வாறு தண்டிக்கப்பட்டுள்ளனர். இந்த பெற்றோர் இருவரும் கடுமையாக சட்டவிரோத மதுபானம் (கசிப்பு) அருந்தும் பழக்கத்திற்கு அடிமையாகியிருந்தனர் எனத் தெரிவிக்கப்படுகிறது.

இரவு உணவு சாப்பிட முன்னதாக சட்டவிரோத மதுபானம் வாங்கிக் கொண்டு வந்து தருமாறு தரம் 8ல் கல்வி கற்ற மாணவரை பெற்றோர் வற்புறுத்தியுள்ளனர்.

இதனை மறுத்த மாணவரின் கை கால்களை கட்டிய பெற்றோர் கம்பி ஒன்றை சூடாகி கால்களை சுட்டு, உப்பு தடவி வீட்டைச் சுற்றி இழுத்துச் சென்றுள்ளனர்.

இந்தக் காலப்பகுதியில் மாணவர் மடம்பெல்ல பாடசாலையில் தரம் 8ல் கல்வி கற்று வந்துள்ளார், மறுநாள் குறித்த மாணவர் சம்பவத்தை பாடசாலையின் அருட்சகோதரி ஒருவரிடம் கூறியுள்ளார்.

இதனைத் தொடர்ந்து இந்த சம்பவம் தொடர்பில் பொலிஸில் முறைப்பாடு செய்து வழக்குத் தொடரப்பட்டுள்ளது.

தமிழ் சிங்கள புதுவருட காலத்தில் அதிகளவு எண்ணெய் மற்றும் இனிப்பு உணவுப் பண்டங்களை உட்கொண்டிருந்தால் அது தொடர்பில் பின்பற்ற வேண்டிய சில மருத்துவ ஆலோசனைகள் வழங்கப்பட்டுள்ளன.

பொதுவாக புதுவருட பண்டிகைக் காலத்தில் அதிகளவு எண்ணெய் கொண்டு தயாரிக்கப்பட்ட இனிப்பு திண் பண்டங்களான பலகாரங்கள், கொகீஸ் போன்றவற்றை மக்கள் உட்கொள்கின்றனர்.

இவ்வாறு அதிகளவில் எண்ணெய் மற்றும் இனிப்பு சுவை கொண்ட உணவுப் பொருட்களை உட்கொண்டவர்கள் அதற்கு பரிகாரமாக உடற் பயிற்சியில் ஈடுபட வேண்டும் அல்லது உடலை வருத்தி வேலை செய்ய வேண்டியது அவசியமாகின்றது.

பண்டிகைக் காலத்தில் அதிகளவில் இனிப்பு சுவை அல்லது எண்ணெய் உணவுகளை உட்கொண்டவர்கள் குறைந்தபட்சம் 30 நிமிடங்கள் நாள் ஒன்றுக்கு உடலை வருத்தி வேலை செய்யவோ அல்லது உடற் பயிற்சி செய்யவோ வேண்டுமென இலங்கையின் பிரபல்யமான போசாக்கு நிபுணத்துவ மருத்துவர் ரேணுகா ஜயதிஸ்ஸ கொழும்பு ஊடகமொன்றின் ஊடாக கோரியுள்ளார்.

இனிப்பு சுவை மற்றும் எண்ணெய் தன்மையுடன் கூடிய உணவுப் பொருட்களை உட்கொள்ளும் பலர் அதிகளவு உடலை வருத்தி வேலை செய்வதோ அல்லது உடற்பயிற்சியில் ஈடுபடுவதோ கிடையாது என அவர் சுட்டிக்காட்டியுள்ளார்.

இவ்வாறான உணவுப் பொருட்களை உட்கொண்டு எந்த வேலையயும் செய்யாமல் இருக்கக் கூடாது எனவும், உடலை வருத்தி வேலை செய்யாவிட்டால் நீரிழிவு போன்ற நோய்கள் தாக்கக் கூடும் எனவும் ஆலோசனை வழங்கியுள்ளார்.

நாளின் எந்தவொரு நேரத்திலேனும் குறைந்த பட்சம் அரை மணித்தியாலம் உடற்பயிற்சி அல்லது உடலை வருத்தி வேலை செய்யுமாறு அவர் கேட்டுக்கொண்டுள்ளார்.

கடந்த 3 மாதங்களுக்குள் 70 எயிட்ஸ் நோயாளிகள் அடையாளம் காணப்பட்டுள்ளதாக சுகாதார அமைச்சு தகவல் தெரிவித்துள்ளது.மேலும் ஓரினச் சேர்க்கை மூலமே அதிகளவு எயிட்ஸ் நோயாளிகள் அடையாளம் காணப்பட்டுள்ளதாகவும் எயிட்ஸ் நோய் தடுப்பு பிரிவின் பணிப்பாளர் வைத்தியர் சிசிர லியனகே தெரிவித்துள்ளார்.

இவ்வாறு எயிட்ஸ் தொற்றுக்கு உள்ளானவர்களுள் 100க்கு 70 வீதமானோர் ஆண்கள் என்றும் அவர் மேலும் குறிப்பிட்டுள்ளார்.அத்துடன் 25 தொடக்கம் 46 வயதுக்கு இடைப்பட்டவர்களே எயிட்ஸ் நோயினால் பாதிக்கப்பட்டுள்ளதாகவும் தெரிவிக்கப்பட்டுள்ளது.

இதனால் எயிட்ஸ் நோய் தொடர்பாக மக்களை தெளிவுபடுத்தும் வேலைத்திட்டம் ஒன்று முன்னெடுக்கப்படவுள்ளதாக வைத்தியர் சிசிர லியனகே தெரிவித்துள்ளார்.

பொகவந்தலாவ மேற்பிரிவு தோட்டத்தில் கடந்த 14ம் திகதி பிறந்த 45 நாள் சிசுவை தாக்கி விட்டு தலைமறைவாகியிருந்த தந்தையை நேற்று மாலை கைதுசெய்துள்ளதாக, பொலிஸார் தெரிவித்துள்ளனர்.

குறித்த நபர் கடந்த 14ம் திகதி மது போதையில் வந்து தகாத வார்த்தைகளால் பேசி தன்னையும் தனது சிசுவையும் கடுமையாக தாக்கிவிட்டு தலைமறைவாகியிருந்ததாக சந்தேகநபரின் மனைவி கடந்த 15ம் திகதி பொகவந்தலாவ பொலிஸ் நிலையத்தில் முறைபாடு ஒன்றை பதிவு செய்திருந்தார்.

தாக்கப்பட்ட சிசுவும் தாயும் பொகவந்தலாவ மாவட்ட வைத்தியசாலையில் அனுமதிக்கப்பட்ட பின்னர், மேலதிக சிகிச்சைக்காக டிக்கோயா கிளங்கன் மாவட்ட வைத்தியசாலையில் அனுமதிக்கப்பட்டதாக பொகவந்தலாவ பொலிஸார் மேலும் தெரிவித்தனர்.

எனவே கைது செய்யப்பட்ட சந்தேகநபர் இன்று (19) செவ்வாய்க்கிழமை ஹட்டன் நீதவான் முன்னிலையில் ஆஜர்படுத்தப்படவுள்ளனர்.

சம்பவம் தொடர்பிலான மேலதிக விசாரணைகளை பொகவந்தலாவ பொலிஸார் மேற்கொண்டு வருகின்றனர்.

புதிய கல்வியாண்டு தொடர்பில் பல்கலைக்கழகங்களில் விண்ணப்பங்களை பெற்றுக் கொள்ளும் நடவடிக்கை எதிர்வரும் 24ம் திகதி முதல் ஆரம்பமாகவுள்ளதாக, பல்கலைக்கழக மானியங்கள் ஆணைக்குழு தெரிவித்துள்ளது.

இது குறித்த விண்ணப்பங்களை இணையம் மற்றும் எழுத்து மூலம் பல்கலைக்கழக மானியங்கள் ஆணைக்குழுவுக்கு அனுப்பி வைக்க மாணவர்களுக்கு முடியும். கடந்த வருடம் கல்விப் பொதுத் தராதர உயர்தரப் பரீட்சைக்கு தோற்றிய மாணவர்களுக்கே இந்த வாய்ப்பு கிட்டியுள்ளது.

இதேவேளை, புதிய கல்வி ஆண்டு தொடர்பில் பல்கலைக்கழக மாணவர்களை இணைத்துக் கொள்வது குறித்த அனுமதிப் பத்திர கையேடு எதிர்வரும் 22ம் திகதி வௌியிடப்படவுள்ளது.

இது தொடர்பில் நாளை ஊடகங்களுக்கு தெரியப்படுத்த பல்கலைக்கழக மானியங்கள் ஆணைக்குழு நடவடிக்கை எடுத்துள்ளது.

இதன்படி, புதிய கல்வியாண்டு தொடர்பில் பல்கலைக்கழகங்களில் விண்ணப்பங்களை பெற்றுக் கொள்ளும் நடவடிக்கை எதிர்வரும் 24ம் திகதி முதல் ஆரம்பமாகவுள்ளது.

பங்களாதேஷ் நாட்டின் மத்திய வங்கியில் கொள்ளையிட்டதாக கூறப்படும் எட்டு இலங்கையர்கள் உட்பட 20 பேர் அடையாளம் காணப்பட்டுள்ளதாக, அந்தநாட்டு பொலிஸார் குறிப்பிட்டுள்ளனர்.

குறித்த வங்கியின் கணனி கட்டமைப்பில் இரகசியமாக ஊடுருவி பில்லியன் அமெரிக்க டொலர்களுக்கும் அதிக பணத்தை பிறிதொரு வங்கிக் கணக்குக்கு மாற்றிய சம்பவம் கடந்த பெப்ரவரி மாதம் 5ம் திகதி நடைபெற்றது.

குறித்த பணம் பிலிப்பைன்ஸ் மற்றும் இலங்கையிலுள்ள சில கணக்குகளுக்கே இவ்வாறு அனுப்பப்பட்டுள்ளதாக, தெரியவந்துள்ளது.

இதனையடுத்து மேற்கொள்ளப்பட்ட, விசாரணைகளின் படி இந்த சம்பவம் தொடர்பில் 20 பேர் அடையாளம் காணப்பட்டுள்ளதாக பங்களாதேஷ் பொலிஸார் நேற்று குறிப்பிட்டுள்ளனர்.

இவர்களில் 12 பேர் பிலிப்பையின்ஸ் நாட்டினர் எனவும் எட்டுப் பேர் இலங்கையர் எனவும் வௌிநாட்டு ஊடகங்கள் செய்தி வௌியிட்டுள்ளன.

எது எவ்வாறு இருப்பினும் சந்தேகநபர்கள் இந்தக் குற்றத்தை எவ்வாறு இழைத்தனர் என்பது குறித்து தகவல் வௌியிடப்படவில்லை.

இது தொடர்பில் மேற்கொள்ளப்பட்ட விசாரணை அறிக்கை பிலிப்பைன்ஸ் மற்றும் இலங்கைக்கு அனுப்பட்டுள்ளதாக, பங்களாதேஷ் பாதுகாப்புப் பிரிவினர் குறிப்பிட்டுள்ளனர்.

இந்த கொள்ளை தொடர்பில் குற்றப் புலனாய்வுத் திணைக்களத்தினரால் தற்போது விசாரணைகள் ஆரம்பிக்கப்பட்டுள்ளதாக தெரியவந்துள்ளது.

சித்திரை புத்தாண்டு பண்டிகை காலத்தில் அனுராதபுரத்தில் வீடொன்றில் இடம் பெற்ற விருந்துபசாரத்தின் போது கேக் சாப்பிட்ட பாடசாலை மாணவியொருவர் உயிரிழந்துள்ளார்.

குறித்த சம்பவத்தில் உயிரிழந்தது அனுராதபுரம் மத்திய கல்லூரியில் 11 ஆம் தரத்தில் கல்வி கற்கும் மாணவி என்பது குறிப்பிடத்தக்கது.

குறித்த மாணவி கேக் சாப்பிட்ட பின்னர் சுயநினைவிழந்ததையடுத்து அனுராதபுரம் வைத்தியசாலையில் அனுமதிக்கப்பட்ட பின் உயிரிழந்துள்ளார்.

 
வன்னிகுறாஸ் கலாச்சாரப் பேரவையின் ஒழுங்குபடுத்தலுடன் நாள் முழுவதும் காத்தவராயன் சிந்துநடை கூத்து போட்டி ஞாயிற்றுக்கிழமை நடைபெற்றது.

மேற்படி நிகழ்வில் துணுக்காய் தமிழ் தாய் கலாமன்றம், பெரிய புளியங்குளம் சுந்தராலய கலாமன்றம், கூழாமுறிப்பு அண்ணா கலாமன்றம், முள்ளியவளை பொன்நகர் பாரதி கலாமன்றம், முள்ளியவளை பொன்நகர் இளந்தளிர் கலாமன்றம், புதுக்குடியிருப்பு சிறி முத்துமாரி கலாமன்றம் மற்றும் வேனாவில் கலைமகள் கலாமன்றம் ஆகிய 07 மன்றங்கள் கலந்து கொண்டன.

இந்நிகழ்வில் வன்னி மாவட்ட பாராளுமன்ற உறுப்பினர் சி.சிவமோகன் வடமாகாண சபை பிரதி அவைத் தலைவர் அன்ரனி ஜெகநாதன் ஆகியோர் கலந்து கொண்டனர்.

இந்நிகழ்வு இலங்கை தமிழரசுக்கட்சியின் ஆதரவுடனும், வன்னிகுறாஸ் கலாச்சாரப் பேரவையின் ஒழுங்குபடுத்தலுடனும் நடைபெற்றது.
மேலும் அங்கு கருத்து தெரிவித்த டாக்டர் சிவமோகன்..

உலகின் ஒவ்வொரு இனமும் தனது அடையாளத்தை நிலை நிறுத்த பாவிக்கும் ஆயுதம் இனத்தின் கலாச்சாரமாகும். தமிழ் நாட்டு மக்களுக்கும் இலங்கை தமிழ் மக்களுக்கும் பாலமாக அமைவது கலாச்சாரமே. பணத்தால் என்றும் விலைபேச முடியாதது எமது கலாச்சாரம்.

முள்ளிவாய்கால் முடிவின் பின் தமிழரின் அனைத்தும் அழிந்துவிட்டது என எக்காளம் இட்டது சிங்கள அரசு. இன்று எமது கையில் எஞ்சியிருப்பது எமது கல்வியறிவும் கலாச்சாரமுமே. எஞ்சியிருப்பதனை வைத்துக்கொண்டு மீண்டெழுவான் தமிழன் என்பதனை மீண்டும் ஒருமுறை நிருபித்திருக்கிறது இந்த நிகழ்வு.
தொடர்ந்து பேசிய அவர்..

அதிகார துஸ்பிரயோகம், பணமோசடிகள் செய்தவர்கள் பணமோசடிக்காரர்கள்தான். ஆட்கடத்தல் கொலைகளை தங்கள் சுயநலத்துக்காக செய்தவர்கள் சமூக விரோதிகள்தான். 2009 க்கு பின்னான காலத்தில் தமிழ் தேசியத்தினுள் உள்வாங்கப்பட்ட பின் தங்கள் பழைய வரலாறுகளை மறந்தவர்கள் மக்களை ஏமாற்றி பிழைப்பு நடாத்தப் பார்க்கிறார்கள். எமது மக்களின் மறதி நோய் அவர்களின் ஏமாற்று வேலைகளுக்கு சந்தர்ப்பமாக அமைகிறது. வாய் கூசாத அறிக்கைகள் மூலம் தங்களை தேசியவாதிகளாக காட்ட முனைகின்றனர் என்றார்.

இந்த வன்னி மண்ணை ஒரு கலாச்சார பூமியாக்குவது, அரிய வகை மரங்கள் நிறைந்த சோலையாக்குவது மட்டுமே என் இலட்சியம். அதை செய்து முடிக்க எனக்கு அரசியல் தேவையில்லை. என் வாழ் நாளில் வன்னி மண்ணில் எதை சாதிக்கலாம் என்பது மட்டுமே என் இலட்சியமாக இருக்கும்,

மருத்துவம்தான் எனது அரசியல் ஆரம்பம். நோயாளிகளாக என்னிடம் வந்த மக்களே எனது ஆதரவாளர்கள். அது முல்லை மாவட்டத்துடன் நின்று விடாமல் மன்னார், வவுனியா வரை வியாபித்திருக்கின்றது. அந்த மருத்துவத்தின் புதிய வன்னிநில பரிமாணம் உங்கள் கண்ணின் முன் எதிர்காலத்தில் பரிணமிக்கும் என்றார்.