திக்கோவிட்ட விகாரையில் 54 வயது ஸ்காட்லாந்து நாட்டவரின் சடலம் மரத்தில் தொங்கிக்கொண்டிருந்த நிலையில் மீட்கப்பட்டுள்ளது. மாத்தறை, திக்கோவிட்ட பலோல்பிட்டியாவில் உள்ள ஒரு விசாரையில், 54 வயதான ஸ்காட்லாந்து நாட்டவர் ஒருவர் வேப்பமரத்தில் தொங்கிய நிலையில் சடலமாக மீட்கப்பட்டுள்ளார்.
சம்பவ இடத்திற்கு அருகில் ஒரு ஜோடி காலணிகள், ஒரு மோட்டார் சைக்கிள் தலைக்கவசம் மற்றும் வாடகைக்கு எடுக்கப்பட்ட ஒரு ஸ்கூட்டர் ஆகியவற்றை பொலிஸார் மீட்டுள்ளன.
ஹம்பாந்தோட்டைக்கு புறப்படுவதற்கு முன்பு, அந்த நபர் வெலிகம, மிடிகமவில் உள்ள ஒரு சுற்றுலா விடுதியில் தங்கியிருந்ததாகக் கூறப்படுகிறது. இந்த மரணம் தற்கொலையா அல்லது கொலையா என்பது குறித்து பொலிஸார் விசாரித்து வருகின்றனர்.
மும்பையை சேர்ந்த இளம் நடிகை அனன்யா ராஜ் கடந்த மாதம் உயிரிழந்தது குறித்து அவரது குடும்பத்தினர் தற்போது தெரிவித்திருப்பது பரபரப்பை ஏற்படுத்தியுள்ளது .
27 வயதான , மும்பையை சேர்ந்த இளம் நடிகை அனன்யா ராஜ் 7 Hours to Go, The Final Exit, Ghost உள்ளிட்ட படங்களில் நடித்து பிரபலமானவர். இந்தி மட்டுமின்றி தெலுங்கு உள்ளிட்ட பிராந்திய மொழி படங்களிலும் நடித்துள்ளார்.
திரைப்படங்கள் மட்டுமின்றி, பல்வேறு இசை வீடியோக்களிலும் அனன்யா ராஜ் நடித்துள்ளார். தெலுங்கில் Thaggede Le படத்திலும், Madrasi Gang என்ற மும்மொழி படத்திலும் நடித்திருந்தார்.
இந்நிலையில், அனன்யா ராஜ் காலமானதாக அவரது குடும்பத்தினர் நேற்று (16) அறிவித்துள்ளனர். அனன்யா ராஜ், கடந்த ஜூலை 15-ம் தேதி உயிரிழந்ததாக தற்போது அவரது குடும்பத்தினர் தெரிவித்துள்ளனர்.
ஆனால், அவரது மரணச் செய்தி உடனடியாக வெளியிடப்படவில்லை. சுமார் ஒரு மாதத்திற்குப் பிறகு, ஆகஸ்ட் 16-ம் தேதி குடும்பத்தினர் அவரது சமூக வலைதள பக்கத்தின் மூலம் மரணத்தை அறிவித்துள்ளனர்.
அனன்யா ராஜ்-இன் மறைவு செய்தி அவரது ரசிகர்கள், திரைத்துறையினர் மத்தியில் பெரும் அதிர்ச்சியை ஏற்படுத்தியுள்ளது.
கொழும்பு 09 பகுதியிலுள்ள அடுக்குமாடி குடியிருப்பொன்றில் இருந்து சிறுவன் ஒருவன் கீழே விழுந்து உயிரிழந்தார். உயிரிழந்தவர் கொழும்பு 09 பகுதியைச் சேர்ந்த 12 வயதுடையவர் என தெரியவந்துள்ளது.
குறித்த சிறுவன் 14 மாடிகளைக் கொண்ட அந்த குடியிருப்பின் மேல் மாடியில் அமைந்துள்ள நீச்சல் தடாகத்திற்கு அருகில், மேலும் சில சிறுவர்களுடன் இணைந்து சுற்றியுள்ள காட்சிகளைப் பார்த்துக் கொண்டிருந்த போதே கீழே விழுந்துள்ளதாக ஆரம்பக்கட்ட விசாரணைகளில் தெரியவந்துள்ளது.
இந்தச் சம்பவம் தொடர்பில் மருதானை பொலிஸார் மேலதிக விசாரணைகளை மேற்கொண்டு வருகின்றனர்.
மும்பை அருகே பிறந்தநாள் கொண்டாட்டத்திற்காக வாங்கப்பட்ட கேக்கில் இறந்த பல்லி கிடந்த அதிர்ச்சிச் சம்பவத்தால், அதைச் சாப்பிட்ட 11 பேருக்குத் திடீரென உடல்நலக் குறைவு ஏற்பட்டு மருத்துவமனையில் அனுமதிக்கப்பட்டுள்ளனர்.
மும்பை அருகே உள்ள நாலாசோபரா பகுதியில் நடைபெற்ற பிறந்தநாள் விழாவிற்காக உள்ளூர் கடையில் இருந்து கேக் ஒன்று வாங்கப்பட்டுள்ளது.
கொண்டாட்டத்தின் போது கேக்கை வெட்டி அனைவருக்கும் கொடுத்துள்ளனர். அப்போது அந்த கேக்கிற்குள் இறந்த நிலையில் பல்லி ஒன்று கிடந்ததைக் கண்டு அனைவரும் அதிர்ச்சியடைந்தனர்.
கேக்கைச் சாப்பிட்ட குழந்தைகள் உட்பட 11 பேருக்கு அடுத்தடுத்து வாந்தி, மயக்கம் மற்றும் வயிற்றுப்போக்கு போன்ற தீவிர உடல்நலக் குறைவு ஏற்பட்டது.
பாதிக்கப்பட்ட 11 பேரும் உடனடியாக மீட்கப்பட்டு அருகில் உள்ள மருத்துவமனையில் அவசரச் சிகிச்சைப் பிரிவில் அனுமதிக்கப்பட்டுள்ளனர். பண்டிகை மற்றும் பிறந்தநாள் போன்ற கொண்டாட்டத் தருணங்களில் கடைகளில் வாங்கி உட்கொள்ளும் உணவுகளைப் பரிமாறுவதற்கு முன்,
அவை சுத்தமாகவும் பாதுகாப்பாகவும் இருக்கிறதா என்பதைப் பொதுமக்கள் மிகுந்த கவனத்துடன் பார்த்து உட்கொள்ள வேண்டும் என மருத்துவர்கள் எச்சரித்துள்ளனர்.
உத்தரப் பிரதேச மாநிலத்தில் மனைவியுடன் ஏற்பட்ட தகராறில், ஒரு வயது பெண் குழந்தையைச் செல்ஃபி எடுப்பது போல் நடித்து ஆற்றில் வீசிய தந்தையைப் பொதுமக்கள் பிடித்துக் காவல்துறையினரிடம் ஒப்படைத்தனர்.
உத்தரப் பிரதேச மாநிலம் ஆக்ரா அருகே உள்ள பகுதியைச் சேர்ந்த ரிங்கு என்பவருக்கும், அவரது மனைவிக்கும் இடையே குடும்பப் பிரச்சினை காரணமாகக் கடுமையான வாக்குவாதம் ஏற்பட்டுள்ளது.
ஆத்திரமடைந்த ரிங்கு, மனைவியுடன் யமுனை ஆற்றின் கரைப் பகுதிக்குச் சென்றுள்ளார். அங்கு வைத்துத் தனது 1 வயது பெண் குழந்தையுடன் செல்ஃபி எடுப்பது போல் நடித்து, எதிர்பாராத விதமாகக் குழந்தையை ஆற்று வெள்ளத்தில் தூக்கி வீசியுள்ளார்.
குழந்தையை வீசிய கையோடு தனது மனைவியையும் ஆற்றில் தள்ளிவிட முயன்றுள்ளார். இதைக் கண்டு அதிர்ச்சியடைந்த அங்கிருந்த பொதுமக்கள், உடனடியாக அவரைத் தடுத்து நிறுத்தித் தர்மஅடி கொடுத்துப் பிடித்து வைத்தனர்.
பிடிபட்ட ரிங்குவை பொதுமக்கள் காவல் துறையிடம் ஒப்படைத்தனர். ஆற்று வெள்ளத்தில் அடித்துச் செல்லப்பட்ட 1 வயது குழந்தையைத் தீயணைப்புத் துறையினர் மீட்புப் படகுகள் மூலம் தீவிரமாகத் தேடி வருகின்றனர்.
இப்படியெல்லாம் கூட மரணம் நேருமா என்கிற அதிர்ச்சியில் இருக்கிறார்கள். விடுமுறை தினத்தில் சந்தோஷமாக தந்தைக்கு உதவி செய்துக் கொண்டிருந்த மகன் தற்போது உயிருடன் இல்லை.
கர்நாடக மாநிலத்தில் வாழை மரத்தை வெட்டியபோது எதிர்பாராத விதமாகக் குளவிக் கூடு கலைந்து தாக்கியதில் 8 வயதுச் சிறுவன் உயிரிழந்த சம்பவம் அதிர்ச்சியை ஏற்படுத்தியுள்ளது.
கர்நாடக மாநிலம் சிவமொக்கா மாவட்டம் சாகர் தாலுகாவிற்கு உட்பட்ட பகுதியில், 2-ம் வகுப்பு படித்து வந்த நிச்சித் (8) என்ற சிறுவன் தனது தந்தை வெங்கடேஷுடன் தோட்டத்தில் இருந்துள்ளான்.
தோட்டத்தில் இருந்த வாழை மரத்தை வெட்டிய போது, அதில் மறைந்திருந்த குளவிக் கூடு எதிர்பாராத விதமாகக் கலைந்தது. கூட்டமாக வந்த குளவிகள் தந்தையையும் மகனையும் சரமாரியாகக் கொட்டின.
குளவிகளின் கொடூரத் தாக்குதலில் படுகாயமடைந்த சிறுவன் நிச்சித், மருத்துவமனைக்குக் கொண்டு செல்லும் வழியிலேயே பரிதாபமாக உயிரிழந்தான்.
படுகாயங்களுடன் மீட்கப்பட்ட தந்தை வெங்கடேஷ் சாகர் அரசு மருத்துவமனையில் அனுமதிக்கப்பட்டுத் தீவிர சிகிச்சை பெற்று வருகிறார். இச்சம்பவம் குறித்துச் சாகர் காவல் நிலையப் போலீசார் வழக்குப் பதிவு செய்து விசாரணை நடத்தி வருகின்றனர்.
மேற்கு வங்க மாநிலம் கொல்கத்தாவில் ஓட்டுநர் பயிற்சிக்காகக் காரை எடுத்துச் சென்ற 42 வயதுப் பெண், எதிர்பாராத விதமாகக் காரோடு குளத்தில் மூழ்கி உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது.
கேஸ்டோபூர் பிரஃபுல்லா கானன் பகுதியைச் சேர்ந்த சுமித்ரா தாஸ் (42) என்பவர், ஆகஸ்ட் 22-ஆம் தேதி நடைபெறவிருந்த ஓட்டுநர் உரிமத்திற்கான தேர்வுக்குத் தயாராகி வந்தார்.
சம்பவத்தன்று தனது மகளைப் பள்ளியில் விட்டுவிட்டு வீட்டிற்குத் திரும்பிய அவர், வீட்டில் இருந்த ஹூண்டாய் இயான் (Hyundai Eon) காரை எடுத்துக்கொண்டு தனியாக ஓட்டிப் பழகியுள்ளார்.
பயிற்சியின் போது சுமித்ரா பிரேக்கிற்குப் பதிலாக தவறுதலாக ஆக்சிலரேட்டரை அழுத்தியதாகக் கூறப்படுகிறது. இதனால் கட்டுப்பாட்டை இழந்த கார் அதிவேகமாகச் சென்று அருகில் இருந்த குளத்திற்குள் பாய்ந்து மூழ்கியது.
இது குறித்து தகவலறிந்து சம்பவ இடத்திற்கு விரைந்து வந்த போலிஸாரும் தீயணைப்புத் துறையினரும் சுமார் ஒரு மணி நேரத்திற்கும் மேலாகப் போராடி, நீரில் மூழ்கிய காரை மீட்டு வெளியே கொண்டு வந்தனர்.
இருப்பினும், காரின் உள்ளே சிக்கியிருந்த சுமித்ரா தாஸ் பரிதாபமாக உயிரிழந்தார். இச்சம்பவம் குறித்து போலிஸார் வழக்குப்பதிவு செய்து விசாரணை நடத்தி வருகின்றனர்.
நுவரெலியா கிரிகரி ஏரியில் ஜெட்ஸ்கி கவிழ்ந்து விபத்துக்குள்ளானதில் நீரில் மூழ்கும் அபாயத்தில் இருந்த 11 மற்றும் 13 வயதுடைய இரு சிறுவர்களை இலங்கை கடற்படையினர் பாதுகாப்பாக மீட்டுள்ளனர்.
இந்த சம்பவம் நேற்று (16) கிரிகரி ஏரியில் நீர் விளையாட்டில் ஈடுபட்டிருந்தபோது இடம்பெற்றுள்ளது.
கிரிகரி ஏரியில் உயிர்காக்கும் பணியில் ஈடுபடுத்தப்பட்டிருந்த இலங்கை கடற்படையின் Rapid Response Rescue and Relief Unit (4RU) பிரிவைச் சேர்ந்த கடற்படையினர், சம்பவத்தை நேரில் கண்டு உடனடியாக மீட்பு நடவடிக்கையில் ஈடுபட்டுள்ளனர்.
இதன்போது, நீரில் மூழ்கும் அபாயத்தில் இருந்த இரு சிறுவர்களையும் கடற்படையினர் மீட்டு பாதுகாப்பாக கரைக்கு அழைத்து வந்துள்ளனர். மீட்கப்பட்ட சிறுவர்கள் இருவரும் மினுவாங்கொடை பகுதியைச் சேர்ந்தவர்கள் என தெரிவிக்கப்பட்டுள்ளது.
மீட்பு நடவடிக்கையின் பின்னர், இரு சிறுவர்களும் மேலதிக நடவடிக்கைகளுக்காக நுவரெலியா பொலிஸாரிடம் ஒப்படைக்கப்பட்டுள்ளனர்.
புத்தளம், கற்பிட்டி பிரதேசத்தில் மோட்டார் சைக்கிள் ஒன்று மின் கம்பத்தில் மோதியதில் ஏற்பட்ட விபத்தில் தந்தை மற்றும் மகன் உயிரிழந்துள்ளனர். மோட்டார் சைக்கிளில் பயணம் செய்த தந்தை மற்றும் மகன் இருவரும் வைத்தியசாலையில் அனுமதிக்கப்பட்டதன் பின்னர் உயிரிழந்துள்ளதாக கற்பிட்டி பொலிஸார் தெரிவித்தனர்.
தனது மகனுடன் வீட்டிற்குத் தேவையான பொருட்களைக் கொள்வனவு செய்வதற்காக சந்தைக்கு சென்று கொண்டிருந்த போதே இந்த விபத்து ஏற்பட்டுள்ளது.
மோட்டார் சைக்கிளில் பயணம் செய்த தந்தை மற்றும் மகன் இருவரும் தலைக்கவசம் அணியாமல் பயணித்துள்ளனர். இதனால் தலையில் ஏற்பட்ட பலத்த காயங்களே மரணத்திற்கான காரணம் என வைத்தியசாலை தரப்பில் தெரிவிக்கப்பட்டுள்ளது.
உயிரிழந்தவர்கள் துஸ்மந்த ரோஹண என்ற மீனவரும், அவரது மகனான ரவீன் கனிஷ்க என்ற 6 வயது பாடசாலை மாணவனும் என தெரியவந்துள்ளது.
குறித்த சிறுவன் கந்தக்குளிய குடாவ புனித செபஸ்தியார் பாடசாலையில் இரண்டாம் ஆண்டில் கல்வி கற்று வந்துள்ளார். விபத்து தொடர்பில் பொலிஸார் மேலதிக விசாரணைகளை மேற்கொண்டு வருகின்றனர்.
இலங்கையில் எரிபொருள் விலையை மீளாய்வு செய்ய வேண்டிய கட்டாயம் ஏற்பட்டுள்ளதாக எரிசக்தி அமைச்சர் அநுர கருணாதிலக தெரிவித்துள்ளார். சர்வதேச சந்தையில் எரிபொருள் விலை உயர்வு, காப்புறுதி, போக்குவரத்து செலவுகள் அதிகரித்துள்ளதன் காரணமாக இந்த நிலைமை ஏற்பட்டுள்ளதாக அவர் குறிப்பிட்டுள்ளார்.
இது தொடர்பில் அவர் மேலும் தெரிவிக்கையில், எரிபொருள் இறக்குமதிக்காக செலவிடப்படும் தற்போதைய செலவுகளை ஆய்வு செய்த பின்,
அரசாங்கத்திடம் புதிய மானியத்தை கோருவதற்கோ அல்லது எரிபொருள் விலையை திருத்துவது உள்ளிட்ட மாற்று நடவடிக்கைகளை மேற்கொள்வதற்கோ எரிசக்தி அமைச்சு தீர்மானித்துள்ளது.
இது தொடர்பான முழுமையான மீளாய்வு அடுத்த இரண்டு வாரங்களுக்குள் முன்னெடுக்கப்படவுள்ளது.
முன்னர் அரசாங்கத்தால் வழங்கப்பட்டு பின்னர் இடைநிறுத்தப்பட்ட 15 பில்லியன் ரூபா மானியத்தை மீண்டும் பெற்றுக் கொள்வது அல்லது நஷ்டத்தை ஈடுசெய்ய விலையை திருத்துவது குறித்து இதன்போது பரிசீலிக்கப்படவுள்ளது.
கடைசியாக ஜூன் மாதத்தில் எரிபொருள் விலை திருத்தம் செய்யப்பட்டு ஜூலையில் நடைமுறைப்படுத்தப்பட்ட நிலையில், இந்த மாதம் விலையில் எந்த மாற்றமும் செய்யப்படவில்லை என தெரிவித்துள்ளார்.
இதேவேளை, மேற்கு ஆசியப் போர் தொடங்கிய பெப்ரவரி மாதத்துடன் ஒப்பிடுகையில், எரிபொருள் விலைகள் தற்போது 48 சதவீதத்தால் அதிகரித்துள்ளதாக இலங்கை பெற்றோலியக் கூட்டுத்தாபனத்தின் தலைவர் ஜனக ராஜகருண தெரிவித்துள்ளார்.
இந்தியா, சிங்கப்பூர் மற்றும் தென்கொரியா உள்ளிட்ட நாடுகளில் இருந்து எரிபொருள் இறக்குமதி செய்யப்பட்டாலும், சர்வதேச சந்தையில் நிலவும் விலை உயர்வு மற்றும் அதிகரித்துள்ள காப்புறுதி மற்றும் போக்குவரத்து கட்டணங்கள் பாரிய சவாலாக மாறியுள்ளதாக அவர் மேலும் சுட்டிக்காட்டியுள்ளமை குறிப்பிடத்தக்கது.
வாகன இறக்குமதி வரிகள் மீதான 50 சதவீத கூடுதல் கட்டணம் நீடிக்கப்பட்டுள்ளமையினால் மே 15 ஆம் திகதிக்கு பின்னர் கடன் கடிதங்கள் மூலம் இறக்குமதி செய்யப்படும் வாகனங்களின் விலை அதிகரிக்கும் என இலங்கை வாகன இறக்குமதியாளர்கள் சங்கத்தின் தலைவர் பிரசாத் மனேஜ தெரிவித்துள்ளார்.
இதன்படி, வாகனங்களின் விலை ரூ. 1.5 முதல் 5 மில்லியன் வரை அதிகரிக்கும் என்று வாகன இறக்குமதியாளர்கள் கூறுகின்றனர். வாகன இறக்குமதி வரிகள் மீது அரசாங்கத்தால் விதிக்கப்பட்ட 50 சதவீத கூடுதல் கட்டணம் டிசம்பர் 31 வரை நீட்டிக்கப்பட்டுள்ளது.
1988 ஆம் ஆண்டின் 83 ஆம் இலக்கச் சட்டத்தினால் திருத்தப்பட்ட (235 ஆம் அத்தியாயம்) சுங்கக் கட்டளைச் சட்டத்தின் 10அ பிரிவின் கீழ் ஜனாதிபதிக்களிக்கப்பட்ட அதிகாரங்களுக்கு அமைவாக இந்த நீடிப்பு மேற்கொள்ளப்பட்டுள்ளது.
வாகனங்கள் மீதான கூடுதல் கட்டணத்தை நீட்டிக்க அரசாங்கம் நடவடிக்கை எடுக்காது என்று வாகன இறக்குமதியாளர்கள் எதிர்பார்த்திருந்த நிலையில், டிசம்பர் 31 வரையிலான நீட்டிப்பு வாகனங்களின் விலையை அதிகரிக்கும் என்று கூறுகின்றனர்.
அதன்படி, மே 15 ஆம் திகதிக்குப் பிறகு இறக்குமதி செய்யப்படும் வாகனங்களின் விலைகள் அதிகரிக்கும் என எதிர்பார்க்கப்படுவதாக இலங்கை வாகன இறக்குமதியாளர்கள் சங்கத்தின் தலைவர் பிரசாத் மனேஜ தெரிவித்தார்.
வாகன இறக்குமதிக்காக மே 15 ஆம் திகதிக்கு முன்னர் வழங்கப்பட்ட கடன் கடிதங்களில் மேலிருப்பு (overdraft) வசதி சேர்க்கப்படவில்லை என்றும்,
பல வாகன விற்பனை நிலையங்கள் தற்போது மேற்கூறிய திகதிக்கு முன்னர் வழங்கப்பட்ட கடன் கடிதங்களின் கீழ் இறக்குமதி செய்யப்பட்ட வாகனங்களை விற்பனை செய்து வருவதாகவும் வாகன இறக்குமதியாளர்கள் கூறுகின்றனர்.
இதற்கமைய, மே 15 ஆம் திகதிக்கு பின்னர் வழங்கப்பட்ட கடன் கடிதங்களின் கீழ் இறக்குமதி செய்யப்படும் ஒரு வெகன் ஆர் (Wagon R) வகை காரின் விலை 5 இலட்சமும்,
ஒரு டொயோட்டா ரெய்ஸ் (Toyota RAIZE) காரின் விலை 10 இலட்சத்திலும், வெசல் (Vessel) வகை காரின் விலை 15 முதல் 20 இலட்சம் வரையிலும், ஒரு பிராடோ (Prado) ஜீப்பின் விலை 30 இலட்சத்திலும்,
ஒரு லேண்ட் குரூசரின் (Land Cruiser) விலை சுமார் 50 இலட்சத்திலும் அதிகரிக்க வாய்ப்புள்ளது என வாகன இறக்குமதியாளர்கள் தெரிவிக்கின்றனர்.
அதன்படி, ஒரு யாரிஸ் எக்ஸ் கிரேடு (YARIs X GRADE) காரின் விலை எதிர்காலத்தில் ரூ. 10.5 மில்லியனாகவும், ஒரு டொயோட்டா ரெய்ஸ் ஹைப்ரிட் (Toyota RAIZE hybrid) காரின் விலை ரூ. 15.5 மில்லியனாகவும் அதிகரிக்கும் என வாகன இறக்குமதியாளர்கள் கூறுகின்றனர்.
வாகன விலைகளை அடிக்கடி மாற்றாமல், பல்வேறு வழிமுறைகளைக் கையாண்டால், வாகன விலை ஏற்ற இறக்கங்களை தடுக்க வாய்ப்புள்ளது என்றும் கூறுகின்றனர்.
கடந்த வாரத்துடன் ஒப்பிடுகையில் இன்று (17.0.2026) நாட்டில் தங்கத்தின் விலை 2000 ரூபாவினால் அதிகரித்துள்ளது. கொழும்பு செட்டியார் தெருவின் இன்று காலை நிலவரப்படி, 22 கரட் ஒரு பவுன் தங்கத்தின் விலை 351,500.00 ரூபாவாக அதிகரித்துள்ளது.
இதேவேளை, 24 கரட் ஒரு பவுன் தங்கத்தின் விலை, இன்று 382,000 ரூபாய் வரை அதிகரித்துள்ளதாகத் தகவல்கள் தெரிவிக்கின்றன.
உலகச் சந்தையில் தங்கத்தின் விலை அதிகரித்துள்ளதைத் தொடர்ந்து, இலங்கையிலும் தங்கத்தின் விலை கணிசமாக உயர்ந்துள்ளது. இன்று உலகச் சந்தையில் ஒரு அவுன்ஸ் தங்கத்தின் விலை 4,398 அமெரிக்க டொலர்கள் வரை அதிகரித்துள்ளமை குறிப்பிடத்தக்கது.
புதிய இணைப்பு : பீகாரில் கோவில் கூட்ட நெரிசலில் சிக்கி உயிரிழந்த 7 பேரும் அடையாளம் காணப்பட்டுள்ளதாக தெரிவிக்கப்பட்டுள்ளது.
கோவிலின் சுற்றுப்புறச்சுவர்கள் இடிந்து விழுந்ததாகவும், மின் கம்பங்கள் சரிந்து விழுந்து பக்தர்கள் மீது மின்சாரம் பாய்ந்ததாக தவறான தகவல் பரவியமையினால் மக்கள் அலறியடித்து ஓடியதாகவும்,
இதனால் ஏற்பட்ட கூட்ட நெரிசலில் சிக்கி உயிரிழப்புகள் ஏற்பட்டதாகவும் தெரிவிக்கப்படுகின்றது. மேலும், அரசு சார்பில் உயிரிழந்தவர்களின் குடும்பங்களுக்கு இரங்கலும், நிவாரணத் தொகையும் அறிவிக்கப்பட்டுள்ளது.
இந்த கூட்ட நெரிசலில் சிக்கி 7 பேர் பலியான சம்பவம் அப்பகுதியில் பெரும் சோகத்தை ஏற்படுத்தியுள்ளது.
முதலாம் இணைப்பு : இந்தியாவின் – பீகாரில் கோவிலில் ஏற்பட்ட கூட்ட நெரிசல் சிக்கி 7 பேர் உயிரிழந்துள்ளனர்.
இன்று அதிகாலை (17) சுமார் 50,000 பக்தர்கள் கோவிலில் திரண்டிருந்த நிலையில், கோவில் வளாகத்தில் மின்சார கம்பியொன்று அறுந்து விழுந்ததால், மக்கள் அச்சத்தில் ஓடியபோது இந்த கூட்ட நெரிசல் ஏற்பட்டுள்ளதாக கூறப்படுகின்றது.
இந்த சம்பவத்தில் 7 பேர் உயிரிழந்துள்ளதுடன், அவர்களில் பெரும்பாலானோர் பெண்கள் என முதற்கட்ட அறிக்கைகள் தெரிவிக்கின்றன. 12 பேர் படுகாயமடைந்துள்ளதாக கூறப்படுகிறது.
இந்த விபத்தில் காயமடைந்த 12 பேர் சிகிச்சைக்காக வைத்தியசாலையில் அனுமதிக்கப்பட்டுள்ளதாக இந்திய ஊடகங்கள் தெரிவிக்கின்றன.
உயிரிழந்தவர்களில் 4 பேர் அடையாளம் காணப்பட்டுள்ளதுடன், ஏனைய 3 பேரை அடையாளம் காணும் பணி நடந்து வருகின்றது. இந்த சம்பவம் தொடர்பாக சிலர் காவலில் எடுக்கப்பட்டுள்ளதுடன், பீகார் பொலிஸார் விசாரணையை தொடங்கியுள்ளனர்.
வவுனியா தாண்டிக்குளம் பகுதியில் இன்று காலை இடம்பெற்ற சோகமான தொடரூந்து விபத்தில் 23 வயதுடைய இளைஞர் ஒருவர் சம்பவ இடத்திலேயே உயிரிழந்துள்ளார்.
யாழ்ப்பாணத்திலிருந்து கொழும்பு நோக்கிப் பயணித்த தொடரூந்துடன் மோதியதாலேயே இவ்விபத்து சம்பவித்துள்ளது.
விபத்தில் உயிரிழந்தவர் வவுனியா, திருநாவற்குளம் பகுதியைச் சேர்ந்த 23 வயதுடைய இளைஞர் என அடையாளம் காணப்பட்டுள்ளார்.
இன்று( 17.08.2026) காலை தாண்டிக்குளம் தொடரூந்து பாதையைக் கடக்க முயன்றபோதோ அல்லது பாதைக்கு அருகில் நின்றபோதோ இவ்விபத்து இடம்பெற்றிருக்கலாம் எனச் சந்தேகிக்கப்படுகிறது.
சம்பவம் தொடர்பில் தகவலறிந்த வவுனியா பொலிஸார் உடனடியாக விரைந்து உடலைக் கைப்பற்றியதுடன், விபத்துக்கான சரியான காரணம் குறித்தும், இது கவனக்குறைவால் நடந்த விபத்தா அல்லது வேறு ஏதேனும் காரணமா என்பது குறித்தும் தீவிர விசாரணைகளை மேற்கொண்டு வருகின்றனர்.
வவுனியா ஓமந்தை பொலிஸ் நிலையத்திற்கு அருகில் உள்ள காணியில் புத்தர் சிலை ஒன்றை அமைத்து, அக்காணியை சட்டவிரோதமாக ஆக்கிரமிப்பதற்கான முயற்சிகள் முன்னெடுக்கப்பட்டு வருவதாகப் பொதுமக்கள் குற்றம்சாட்டியுள்ளனர்.
இது தொடர்பான அவசர முறைப்பாடு தமிழ் தேசிய மக்கள் முன்னணியின் கவனத்திற்கு கொண்டு செல்லப்பட்டது.
அரசங்குளத்தில் பொலிஸ் நிலையத்தின் பயன்பாட்டிற்காக 5 ஏக்கர் காணியும் கட்டிடங்களும் ஏற்கனவே ஒதுக்கப்பட்டிருந்த போதிலும், பொலிஸார் அங்கு செல்லாமல் தொடர்ந்து மறுத்து வருகின்றனர். தற்போது பலநோக்கு கூட்டுறவுச் சங்கத்திற்குச் சொந்தமான காணியிலேயே பொலிஸ் நிலையம் இயங்கி வருகிறது.
இந்நிலையில், பொலிஸ் நிலையத்திற்கு அருகாமையில் உள்ள மேலதிக காணியையும் ஆக்கிரமித்தால், ஓமந்தை பிரதேசத்தின் எதிர்கால அபிவிருத்தித் திட்டங்கள் கடுமையாகப் பாதிக்கப்படும் அபாயம் நிலவுவதாகப் பொதுமக்கள் அச்சம் வெளியிட்டுள்ளனர்.
பொதுமக்களின் கோரிக்கையை ஏற்று, தமிழ்த் தேசிய மக்கள் முன்னணி (TNPF) தலைவரும் நாடாளுமன்ற உறுப்பினருமான கஜேந்திரகுமார் பொன்னம்பலம், சட்டத்தரணி ந. காண்டீபன், வவுனியா வடக்கு பிரதேச சபையின் உபதவிசாளர் வி. சஞ்சுதன், பிரதேச சபை உறுப்பினர் க. பிரதீபன் மற்றும் மாவட்ட அமைப்பாளர் வி.எஸ். தவபாலன் ஆகியோர் சம்பவ இடத்திற்கு நேரில் சென்று கள ஆய்வு மேற்கொண்டனர்.
சட்டவிரோத நில ஆக்கிரமிப்பு மற்றும் புத்தர் சிலை அமைக்கும் முயற்சிக்கு எதிராக உடனடி சட்ட மற்றும் அரசியல் ரீதியிலான அடுத்தகட்ட நடவடிக்கைகள் முன்னெடுக்கப்படும் என TNPF மக்கள் பிரதிநிதிகள் தெரிவித்துள்ளனர்.
வவுனியாவில் வீடு உடைத்து 51 வயது பெண் ஒருவரை கூட்டு துஸ்பிரயோகம் செய்து கொள்ளைச் சம்பவத்தில்ஈடுபட்ட ஐவர் கைது செய்யப்பட்டுள்ளதுடன் திருடப்பட்ட பொருட்களும் பொலிசாரால் கைப்பற்றப்பட்டது.
கடந்த 8 ஆம் திகதி வவுனியா, மடுகந்தை, மயிலங்குளம் பகுதியில் உள்ள வீடு ஒன்றை உடைத்து உட் சென்ற சிலர் அங்கிருந்த வாகனச் சாரதி மீது வாள் வெட்டு தாக்குதலை மேற்கொண்டு விட்டு, வீட்டு உரிமையாளரான 51 வயது பெண்ணை வாயை பிலாஸ்டரால் ஒட்டி கைகளை பின்பக்கமாக கட்டி,
அவர் அணிந்திருந்த நகைகளை கழற்றி எடுத்து விட்டு மூவரும் சேர்ந்து கூட்டு துஸ்பிரயோகம் செய்து விட்டு வீட்டில் மறைத்து வைத்திருந்த 80 இலட்சம் பெறுமதியான இரத்தினக் கல், 56 இலட்சம் பெறுமதியான 15 பவுணுக்கு அதிகமான தங்க நகைகள், 5 இலட்சத்து 70 ஆயிரம் ரூபாய் பணம், காணி மற்றும் வீட்டு உறுதிப்பத்திரங்கள் என பலவற்றை திருடிச் சென்றுள்ளனர்.
பாதிக்கப்பட்டவர்கள் சார்பாக வவுனியா தலைமைப் பொலிஸ் நிலையத்தின் குற்த்தடுப்பு பிரிவிற்கு கிடைத்த முறைப்பாட்டையடுத்து விரைந்து செயல்பட்ட பொலிசார் ஆபத்தான நிலையில் இருந்த, பாதிக்கப்பட்ட பெண்ணை மீட்டு வவுனியா வைத்தியசாலையின் அவசர சிகிச்சை பிரிவில் அனுமதித்தனர்.
இதன்போது, பாதிக்கப்பட இப்பெண்ணின் தொழில்சாலையில் பணியாளர்களாக வேலை செய்த 35 வயதான உக்குவெல மாத்தறை பகுதியை சேர்த்த நபர் ஒருவரையும், 29 வயதான களேமிதுனுவெல, சிவலாங்குளம் பகுதியை சேர்ந்த மற்றொரு இளைஞரையும் சந்தேகத்தின் பேரில் கைது செய்தனர். அதனைத்தொடர்ந்து நேற்றயதினம் குறித்த சம்பவத்துடன் தொடர்புடைய மேலும் மூவர் கைதுசெய்யப்பட்டனர்.
சந்தேக நபர்களிடம் மேற்கொள்ளப்பட்ட விசாரணைகளையடுத்து, காடு ஒன்றில் மறைத்து வைக்கப்பட்டிருந்த நிலையில் திருடப்பட்ட இரத்தினக்கற்கள், தங்க நகைகள், வாகனப் புத்தகங்கள், திறப்புகள், 35 காணி மற்றும் வீட்டு உறுதிப்பத்திரங்கள்,கடத்தலுக்கு பயன்படுத்தப்பட்ட வாகனம் என்பவற்றை மீட்கப்பட்டது.
குறித்த கைது நடவடிக்கை வவுனியா தலைமை பொலிஸ் நிலைய பொறுப்பதிகாரி ஆர்.எம்.யே.எஸ்.ரத்னமலலா அவர்களின் வழிகாட்டலில் வவுனியா குற்றத்தடுப்பு பிரிவின் பொறுப்பதிகாரி லங்காசிங்க, பதில் பொறுப்பதிகாரி ஆர்.பந்துல தலைமையில் பொலிஸ் சார்ஜன்டுகளான சந்தன (16446), கேரத் (14692), பிரியங்கர(47358) உபாலி(60954)
சம்பத் ( 11388) ஆகியோர் அடங்கிய பொலிஸ் குழுவினரால் மேற்கொள்ளப்பட்டது.
கைது செய்யப்பட்ட சந்தேக நபர்களை நாளையதினம் நீதிமன்றில் முற்படுத்தவுள்ளதாகவும் பொலிசார் தெரிவித்தனர்.
