திருகோணமலை பொது வைத்தியசாலையில் சிகிச்சை பெற்று வந்த 52 வயதுடைய நபர் ஒருவரின் மிக நீளமான சிறுநீரக கல்லை சத்திர சிகிச்சை மூலம் அகற்றி சாதனை படைத்துள்ளனர்.

சிறுநீரக அறுவை சிகிச்சை நிபுணர் டொக்டர் பிரகலாதன் பாலகிருஷ்ணன் (Pragalathan Balakrishnan) தலைமையில் இன்று (14) குறித்த சத்திர சிகிச்சை இடம்பெற்றது.

பிரேசில் நாட்டில் 2003 ஆம் ஆண்டு 1.9 கிரேம் நிறையுடைய சிறுநீரக கல் அகற்றப்பட்டதாகவும் உலக சுகாதார திணைக்கள அறிக்கைகள் மூலம் தெரிய வந்துள்ளது.

ஆனாலும் திருகோணமலை பொது வைத்தியசாலையில் இன்று (14) வெள்ளிக்கிழமை மேற்கொள்ளப்பட்ட சத்திர சிகிச்சையின் போது 03 கிலோ 100 கிரேம் எடையுள்ள சிறுநீரக கல் அகற்றப்பட்டதாகவும் தெரியவந்துள்ளது.

திருகோணமலை பகுதியில் வசித்து வரும் 52 வயதுடைய நபருக்கே குறித்த சத்திர சிகிச்சை முன்னெடுக்கப்பட்டுள்ளது.

சிறுநீரக அறுவை சிகிச்சை நிபுணர் டொக்டர் பிரகலாதன் பாலகிருஷ்ணன் (Pragalathan Balakrishnan தலைமையில்
டொக்டர் எம். எம் ரிஷ்லி, டொக்டர் ஜே.எம்.இஹ்ஸான் டொக்டர் சீ. பிரகலாதன் உட்பட மயக்க மருந்து வைத்திய நிபுணர் டொக்டர் அமில ஜெயக்கடு ஆகியோர் முன்னிலையில் சத்திர சிகிச்சை முன்னெடுக்கப்பட்டதும் குறிப்பிடத்தக்கது.

கண்டி – வத்தேகம நகரில், சிறுமி ஒருவர் கொடூரமாக தாக்கப்பட்ட நிலையில் வீதியில் விட்டுச் செல்லப்பட்ட சம்பவம் அதிர்ச்சியை ஏற்படுத்தியிருந்தது. இந்நிலையில் இச்சம்பவம் தொடர்பில் அவரது தாய் உள்ளிட்ட இருவர் கைது செய்யப்பட்டுள்ளனர்.

நான்கு வயது சிறுமி ஒருவர் கொடூரமாக தாக்கப்பட்ட நிலையில் முச்சக்கர வண்டியில் அழைத்து செல்லப்பட்டு நடுவீதியில் விட்டு சென்ற காட்சி அங்கிருந்த சிசிடிவி கெமராவில் பதிவாகியுள்ளது.

குறித்த காணொளியின் அடிப்படையில் விசாரணைகளை ஆரம்பித்த பொலிஸார் சிறுமியின் தாயையும் அவரது காதலர் என அடையாளம் காணப்பட்ட நபரையும் இன்று (14.08.2026) கைது செய்துள்ளனர்.

ஹாலிஎல – கெடவல வீதியில் முச்சக்கர வண்டியில் பயணித்துக் கொண்டிருந்த போது ஹாலிஎல பொலிஸாரினால் இருவரும் கைது செய்யப்பட்டுள்ளனர்.

இந்நிலையில், கைது செய்யப்பட்டுள்ள இருவரிடமும் ஹாலிஎல பொலிஸார் தற்போது விசாரணைகளை முன்னெடுத்து வருகின்றனர்.

கம்பஹா – வெயங்கொடை பொலிஸ் பிரிவிற்குட்பட்ட பகுதியில் மின்கம்பத்தில் வானொன்று மோதி விபத்திற்குள்ளானதில் இருவர் உயிரிழந்துளள்னர்.

நேற்று மாலை 5.00 மணியளவில் இடம்பெற்ற விபத்தில் வானின் சாரதியான 21 வயதான நவோத் சதுரங்க, அவரது பாட்டியான 80 வயது மூதாட்டி டபிள்யூ.ஏ. விக்கிரமாராச்சி ஆகியோர் உயிரிழந்தவர்கள் என அடையாளம் காணப்பட்டுள்ளனர்.

இவர்கள் தனது மூத்த சகோதரியின் திருமணத்திற்கு சென்று வெயங்கொடை ஹீந்தெனியா பகுதியில் உள்ள தனது வீட்டிற்குத் திரும்பிக்கொண்டிருந்தபோது இந்த விபத்து நிகழ்ந்துள்ளது.

மணப்பெண்ணின் சகோதரர் வானை செலுத்திச்சென்ற நிலையில், மணப்பெண்ணின் பாட்டி, தாய் மற்றும் தந்தை உட்பட 9 பேர் அந்த வானில் பயணித்துள்ளனர்.

இந்த விபத்தில் இருவர் உயிரிழந்த நிலையில், வானில் பயணித்த ஏனைய 7 பேர் காயமடைந்து கம்பஹா மாவட்ட பொது மருத்துவமனையில் அனுமதிக்கப்பட்டுள்ளதாக பொலிஸார் தெரிவித்துள்ளனர்.

இது தொடர்பில் முன்னெடுக்கப்பட்ட விசாரணையில், சாரதி வாகனம் செலுத்தும்போது உறங்கிவிட்டதாகவும் தெரியவந்துள்ளது.

அடுத்த ஆண்டுக்குத் தேவையான நிலக்கரியைக் கொள்முதல் செய்வதற்கான நடவடிக்கைகள் முழுமையாக நிறைவடைந்துள்ளதாகவும் நாட்டில் மின்வெட்டு இடம்பெறாது என்றும் எரிசக்தி அமைச்சர் அனுர கருணாதிலக தெரிவித்துள்ளார்.

செப்டம்பர் முதல் வாரத்தில் இருந்து புதிய நிலக்கரி கப்பல்கள் நாட்டை வந்தடையும் என்று எதிர்பார்க்கப்படுவதாக அவர் கூறியுள்ளார்.

எதிர்க்கட்சியை சேர்ந்த சிலர் கூறும் இதுபோன்ற அறிக்கைகளால் பொதுமக்கள் தேவையற்ற முறையில் பீதியடைய வேண்டாம் என்றும் அமைச்சர் கூறியுள்ளார்.

மேலும், அடுத்த ஆண்டு காற்றாலைகள் மூலம் 400 கிலோவாட் மின் உற்பத்தித்திறன் தேசிய மின் கட்டமைப்புடன் இணைக்கப்பட உள்ளதாகவும் அவர் தெரிவித்துள்ளார்.

தற்போது நாட்டின் மின்சார தேவையில் 48% புனல்மின் உற்பத்தி மூலம் பூர்த்தி செய்யப்படுவதாகவும், மின் உற்பத்திப் பற்றாக்குறை காரணமாக இந்த ஆண்டு மின்வெட்டு ஏற்படாது என்றும் அமைச்சர் பொதுமக்களுக்கு உறுதியளித்துள்ளார்.

கொழும்பில் பெரிய அளவிலான போதைப்பொருள் வர்த்தகத்தில் ஈடுபட்டு வந்த தொட்டலங்க பொட்டி எனப்படும் பெண், சட்டவிரோத சொத்துக்கள் விசாரணைப் பிரிவினால் நேற்று கைது செய்யப்பட்டுள்ளார்.

போதைப்பொருள் வர்த்தகம் மூலம் முறையற்ற விதத்தில் சுமார் எட்டுக் கோடி ரூபாய்க்கும் அதிகமான பணம் மற்றும் சொத்துக்களைச் சம்பாதித்தமை தொடர்பில் அவர் கைது செய்யப்பட்டுள்ளார்.

இந்த பெண்ணிடம் உள்ள சொத்துக்களில் இதுவரை 8.25 கோடி ரூபாய் பெறுமதியான சொத்துக்கள் கண்டுபிடிக்கப்பட்டுள்ளது. அத்துடன், அவரிடம் உள்ள சொத்துக்களின் பெறுமதி மேலும் பல கோடி ரூபாய் இருக்கும் என விசாரணை அதிகாரிகள் தெரிவித்துள்ளனர்.

தொட்டலங்க பொட்டி வசம் உள்ள ஏனைய சொத்துக்களைக் கண்டுபிடிப்பதற்காக விரிவான விசாரணைகள் ஆரம்பிக்கப்பட்டுள்ளதாகவும் விசாரணை அதிகாரிகள் மேலும் குறிப்பிட்டுள்ளனர்.

கொழும்பின் பிரதான போதைப்பொருள் வர்த்தகர்களில் ஒருவரான தொட்டலங்க பொட்டி, பொலிஸாரை ஏமாற்றி நீண்ட காலமாக தலைமறைவாக செயற்பட்டுள்ளார்.

போதைப்பொருள் வர்த்தகத்தில் ஈடுபட்டு வந்த அவரிடம் உள்ள சொத்துக்கள் தொடர்பில் சட்டவிரோத சொத்துக்கள் விசாரணைப் பிரிவு சில மாதங்களுக்கு முன்பிருந்து விரிவான விசாரணைகளை ஆரம்பித்திருந்தது.

அதற்கமைய, போதைப்பொருள் வர்த்தகம் மூலம் தொட்டலங்க பொட்டி ஈட்டிய பணத்தைச் செலவிட்டு கொள்வனவு செய்திருந்த வீடுகள், கட்டடங்கள், கடை அறைகள், தங்க நகைகள் உள்ளிட்ட பல பெறுமதியான சொத்துக்களைச் சட்டவிரோத சொத்துக்கள் விசாரணைப் பிரிவு கைப்பற்றியுள்ளது.

இது தவிர, அவருக்குச் சொந்தமான பல வங்கிக் கணக்குகளில் வைப்பிலிடப்பட்டுள்ள பணத்தினையும் புலனாய்வாளர்களால் கண்டுபிடித்துள்ளனர். தொட்டலங்க பொட்டி இன்று நீதிமன்றத்தில் முன்னிலைபடுத்தப்படவுள்ளார்.

களுத்துறை, புலத்சிங்கல பகுதியில் வீடு ஒன்றின் அருகில் வைத்து இரு இளைஞர்கள் மீது பெட்ரோல் ஊற்றி தீ வைத்த சம்பவம் தொடர்பில் கணவன், மனைவி உள்ளிட்ட மூவரை பொலிஸார் கைது செய்துள்ளனர்.

கடந்த 10 ஆம் திகதி இரவு இடம்பெற்ற இத்தாக்குதலில் இரு இளைஞர்களும் படுகாயமடைந்து மருத்துவமனையில் அனுமதிக்கப்பட்டுள்ளனர். பெண் ஒருவரை இளைஞர்கள் கேலி செய்தமையால் ஏற்பட்ட வாக்குவாதம் வன்முறையாக மாறியதாக தெரிவிக்கப்படுகிறது.

புலத்சிங்ஹல பிரதேசத்தை சேர்ந்த இரண்டு இளைஞர்களே இவ்வாறு படுகாயமடைந்துள்ளனர். சம்பவம் தொடர்பாக 29 வயதுடைய கணவன், மனைவி மற்றும் அவர்களின் 19 வயதுடைய சகோதரன் கைது செய்யப்பட்டுள்ளனர்.

கைது செய்யப்பட்ட தம்பதியினர் பெண் ஆடைத் தொழிற்சாலை ஒன்றில் பணியாற்றி வருகின்றனர்.

கடந்த 10 ஆம் திகதி இரவு பெண் பணியை முடித்துவிட்டு பேருந்தில் இறங்கி கணவருடன் வீடு நோக்கிச் சென்று கொண்டிருந்த போது இளைஞர்கள் கேலி செய்துள்ளனர்.

இதனால் கோபமடைந்த கணவன் அந்த இளைஞர்களைத் எச்சரித்து விட்டு சென்றுள்ளார். குறித்த இளைஞர்கள் அந்த பெண்ணின் வீட்டிற்கு அருகில் சென்றுள்ளனர்.

இதன்போது இரு தரப்பினருக்கும் இடையில் ஏற்பட்ட வாய்த்தர்க்கத்தைத் தொடர்ந்து, தம்பதி இளைஞர்களை நோக்கி பெட்ரோல் போத்தலை வீசியதுடன் தீ வைத்துள்ளதாக பொலிஸார் தெரிவிக்கின்றனர்.

தாக்குதலில் படுகாயமடைந்த இரண்டு இளைஞர்களும் முதலில் ஹொரணை ஆதார மருத்துவமனையில் அனுமதிக்கப்பட்டதுடன், மேலதிக சிகிச்சைக்காக பின்னர் கொழும்பு தேசிய மருத்துவமனைக்கு மாற்றப்பட்டுள்ளனர்.

இச்சம்பவத்தால் ஆத்திரமடைந்த பிரதேசவாசிகள் சந்தேகநபர்களின் வீட்டின் மீது தாக்குதல் நடத்தி சொத்துகளுக்கு சேதம் ஏற்படுத்தியுள்ளனர்.

பதுளை, மஹியங்கனை வெலம்பொட பொலிஸ் பிரிவிற்குட்பட்ட பம்பரகஹஎல பிரதேசத்திலிருந்து கையடக்கதொலைபேசியைக் கொடுக்கவில்லை என்ற மனவேதனை காரணமாக 16 வயது பாடசாலை மாணவி ஒருவர் உயிரை மாய்த்துள்ளார்.

இம்முறை கல்விப் பொதுத் தராதர சாதாரண தரம் தோற்றவிருந்த மாணவியே இவ்வாறு உயிரிழந்துள்ளார். மாணவியின் மரண விசாரணையை யட்டிநுவர திடீர் மரண விசாரணை அதிகாரி சேனக கருணாரத்ன மேற்கொண்டுள்ளார்.

பாடசாலை முடிந்து வீடு திரும்பியதும் மகள் எப்போதும் கையடக்கதொலைபேசியுடனேயே பொழுதை கழிப்பதாக சாட்சியமளித்த உயிரிழந்த மாணவியின் தந்தை தெரிவித்துள்ளார். கல்வி நடவடிக்கைகளுக்கு இடையூறு ஏற்படுவதால் மாணவி அது தொடர்பில் அடிக்கடி புத்திமதி கூறுவதாகவும் அவர் தெரிவித்துள்ளார்.

சம்பவத்தன்று மகள் கையடக்கதொலைபேசியை பயன்படுத்திக் கொண்டிருந்த போது மாணவி அதனைப் பறித்த நிலையில் தண்ணீர் எடுப்பதற்காக கிணற்றுக்குச் சென்றுள்ளார். அந்தச் சந்தர்ப்பத்தில் மகள் அறையில் தூக்கிட்டுக் கொண்டதாகவும் அவர் மேலும் சாட்சியமளித்துள்ளார்.

உயிரிழந்த சிறுமி கல்வி நடவடிக்கைகளில் மிகவும் திறமையானவர் என்றும், அவர் பரீட்சைகளின் போது எப்போதும் வகுப்பில் முதலாம் அல்லது இரண்டாம் இடங்களை பெற்றுவந்துள்ளாரென்றும் விசாரணையின் போது தெரியவந்துள்ளது.  சம்பவம் தொடர்பில் பொலிஸார் மேலதிக விசாரணைகளை மேற்கொண்டு வருகின்றனர்.

பிரித்தானியாவில் கடலில் மூழ்கி இலங்கையை சேர்ந்த இளைஞன் ஒருவர் உயிரிழந்துள்ளார். பிரபல சுற்றுலாத் தலமான ஈஸ்ட் சசெக்ஸ் பகுதியிலுள்ள கேம்பர் சேண்ட்ஸ் கடற்கரையில் நேற்று முன்தினம் இந்த துயர சம்பவம் பதிவாகி உள்ளது.

லண்டனில் இருந்து குழுவாக சுற்றுலா சென்ற நிலையில், மூன்று பேர் கடலில் மூழ்கிய நிலையில் இருவர் பாதுகாப்பாக மீட்கப்பட்டுள்ளனர். எனினும் 18 வயதான பதின்ம வயது இளைஞன் நீரில் மூழ்கி உயிரிழந்துள்ளார்.

16 வயதுச் சிறுவன் மற்றும் 24 வயது நபர் ஆகிய இருவர் பாதுகாப்பாகக் கரை திரும்பியுள்ளதாக பொலிஸார் தெரிவித்துள்ளனர். பொலிஸாருக்கு கிடைத்த தகவலை அடுத்து, உடனடியாக சம்பவ இடத்திற்கு சென்ற மீட்பு குழுவினர் இளைஞனை காப்பாற்ற போராடினர்.

நீண்ட போராட்டத்திற்கு மத்தியில் இளைஞன் மீட்கப்பட்ட போதும், சிறிது நேரத்தில் உயிரிழந்துள்ளதாக மருத்துவ குழுவினர் தெரிவித்துள்ளனர். இந்த உயிரிழப்பு சம்பவத்தில் சந்தேகத்திற்கிடமான சூழ்நிலைகள் எதுவும் இல்லை என பொலிஸார் உறுதிப்படுத்தியுள்ளனர்.

வத்தேகம பகுதியில் நான்கு வயது சிறுமியை முச்சக்கர வண்டியில் அழைத்துச் சென்று பின்னர் வீதியில் கைவிட்டதாகக் கூறப்படும் சந்தேகநபரும் தாயும் ஹாலிஎல பகுதியில் வைத்து கைது செய்யப்பட்டுள்ளதாக பொலிஸார் தெரிவித்துள்ளனர்.

நேற்று (13) வீதியில் கைவிடப்பட்ட நிலையில் காணப்பட்ட சிறுமியை வத்தேகம பொலிஸார் மீட்டுள்ளனர். சிறுமியை தாக்கி வீதியில் கைவிட்டதாக சந்தேகிக்கப்படும் தாயாரையும் அவருடன் தொடர்பில் இருந்த நபரையும் கைது செய்வதற்காக பொலிஸார் விசாரணைகளை முன்னெடுத்து வந்தனர்.

இந்நிலையில், சந்தேகநபர்கள் இருவரும் இன்று (14) ஹாலிஎல – கெட்டவல வீதியில் முச்சக்கரவண்டியில் பயணித்துக்கொண்டிருந்தபோது ஹாலிஎல பொலிஸாரால் கைது செய்யப்பட்டுள்ளனர்.

நாட்டின் பல மாவட்டங்களில் இன்று (14) மனித உடலில் உணரப்படும் வெப்பநிலை அதிகரித்த நிலையில் காணப்படும் என வளிமண்டலவியல் திணைக்களம் தெரிவித்துள்ளது.

இதன்படி, வவுனியா, முல்லைத்தீவு, திருகோணமலை, பொலன்னறுவை, மட்டக்களப்பு, அம்பாறை மற்றும் மொனராகலை ஆகிய மாவட்டங்களில் வெப்பநிலை அதிகரிக்கும் என எதிர்பார்க்கப்படுவதாக திணைக்களம் கூறியுள்ளது.

இந்த மாவட்டங்களில் வெப்பநிலை 39 முதல் 45 டிகிரி செல்சியஸ் வரை இருக்கும் என்று கூறப்படுகிறது.

அதன்படி, கடினமான வெளிப்புறச் செயல்பாடுகளைக் குறைத்துக் கொள்ளவும், போதுமான அளவு தண்ணீர் அருந்தவும் பொதுமக்கள் அறிவுறுத்தப்பட்டுள்ளனர்.

இதேவேளை, மேல், சபரகமுவ மற்றும் வடமேல் மாகாணங்களிலும் கண்டி, நுவரெலியா, காலி மற்றும் மாத்தறை மாவட்டங்களிலும் அவ்வப்போது மழை அல்லது இடியுடன் கூடிய மழை பெய்யக்கூடும் என வளிமண்டலவியல் திணைக்களம் எதிர்வுகூறியுள்ளது.