அவுஸ்திரேலியாவின் மெல்போர்ன் நகரில் நாளை நடக்கும் உலகக்கிண்ண இறுதிப் போட்டியில் பலம் வாய்ந்த அணிகளான நியூசிலாந்து, அவுஸ்திரேலியா மோதுகின்றன.

11வது உலகக்கிண்ணத்தை நடத்தும் நாடுகளான அவுஸ்திரேலியாவும், நியூசிலாந்தும் இறுதிப்போட்டிக்குள் அடியெடுத்து வைத்துள்ளன. இவ்விரு நாடுகளின் மோதல் எதிர்பார்ப்பை அதிகரித்துள்ளது.

உலகக்கிண்ண கிரிக்கெட்டில் நியூசிலாந்துக்கு எதிராக அவுஸ்திரேலியாவே கணிசமான ஆதிக்கம் செலுத்தி வந்திருப்பதை புள்ளி விவரங்கள் தெளிவாக கூறுகிறது.

உலகக்கிண்ண போட்டிகளில் இவ்விரு அணிகளும் இதுவரை 9 ஆட்டங்களில் நேருக்கு நேர் மோதி 6ல் அவுஸ்திரேலியாவும், 3ல் நியூசிலாந்தும் வெற்றி பெற்றிருக்கின்றன.

நடப்பு உலகக்கிண்ணத் தொடரில் தொடர்ந்து 8 ஆட்டங்களில் வெற்றி பெற்றுள்ள பிரன்டன் மக்கலம் தலைமையிலான நியூசிலாந்து முதன்முறையாக உலகக்கிண்ண மகுடத்தைக் கைப்பற்றும் உத்வேகத்துடன் ஆயத்தமாகி வருகிறது.

நாளை ஆட்டத்தில் வெற்றி பெற்றால் அது நியூசிலாந்து அணியின் 300வது ஒருநாள் போட்டி வெற்றியாகவும் அமையும். அதே சமயம் 5வது பட்டத்திற்கு குறி வைத்துள்ள மைக்கல் கிளாக் தலைமையிலான அவுஸ்திரேலியாவும் எதிரணியை துவம்சம் செய்ய பல வியூகங்களை தீட்டி வருகிறது.

இந்த உலகக்கிண்ணத்தை பொறுத்தவரையில் நியூசிலாந்து அணி லீக் முதல் அரையிறுதி வரையிலான தனது அனைத்து ஆட்டங்களையும் சொந்த நாட்டிலேயே விளையாடி இருக்கிறது.

இப்போது தான் முதன்முறையாக அவுஸ்திரேலிய மண்ணில் விளையாடப் போகிறது. இது தங்களுக்கு சாதகமாக இருக்கும் என்று அவுஸ்திரேலியா கருதுகிறது.

நடப்பு உலகக்கிண்ணத் தொடரில் இவ்விரு அணிகளும் ஒரே பிரிவில் (ஏ பிரிவு) இடம் பெற்றிருந்ததால் லீக்கில் சந்திக்க நேர்ந்தது.

ஒக்லாந்து ஈடன் பார்க்கில் நடந்த இந்த ஆட்டத்தில் முதலில் துடுப்பெடுத்தாடிய அவுஸ்திரேலியா 32.2 ஓவர்களில் 151 ஓட்டங்களில் சுருண்டது. பின்னர் எளிய வெற்றியை பெறும் வகையில் களமிறங்கிய நியூசிலாந்தை அவுஸ்திரேலிய வீரர்கள் கலங்கடித்தனர்.

இருப்பினும் நியூசிலாந்து அணி 23.1 ஓவர்களில் 9 விக்கெட்டுக்கு 152 ஓட்டங்கள் எடுத்து ஒரு விக்கெட் வித்தியாசத்தில் திரில் வெற்றி பெற்றது.

இந்நிலையில் லீக் ஆட்டத்தில் சந்தித்த தோல்விகளுக்கு இறுதிப் போட்டியில் பதிலடி கொடுக்கப் போவதாக அவுஸ்திரேலிய அணித்தலைவர் கிளார்க் சவால் விடுத்துள்ளார்.

நடப்பு உலகக்கிண்ணத் தொடரில் சாதனை படைக்க இவ்விரு அணிகளில் யார் சம்பியன் ஆகப் போகிறார்கள் என்பதை பொறுத்திருந்து தான் பார்க்க வேண்டும்.

உலகக்கிண்ணத் தொடரில் இந்திய அணியின் தோல்வியைத் தொடர்ந்து பாகிஸ்தான், வங்கதேச ரசிகர்கள் இந்திய கிரிக்கெட் சபைக்கு அழைப்பை எடுத்து `மோக்கா.. மோக்கா’ என்று கேலி செய்ய ஆரம்பித்துள்ளனர்.

இந்தியா லீக் போட்டியில் பாகிஸ்தானையும், காலிறுதியில் வங்கதேசத்தையும் எளிதில் வென்றது. எனவே, இந்தியா எப்போது தோற்கும் என்ற ஆசையில் இவ்விரு அணிகளின் ரசிகர்ளும் ஆவலுடன் காத்திருந்தனர்.

இந்நிலையில் 7 போட்டிகளிலும் தொடர்ச்சியாக வெற்றிபெற்ற இந்தியா, அரையிறுதியில், அவுஸ்திரேலியாவிடம் 95 ஓட்டங்கள் வித்தியாசத்தில் தோல்வியடைந்து உலகக்கிண்ணத்தை விட்டு வெளியேறியது.

இந்நிலையில் மும்பையிலுள்ள பி.சி.சி.ஐ தலைமை அலுவலகத்திற்கு தொடர்ந்து பல தொலைபேசி அழைப்புகள் வந்துள்ளன. அவற்றை ஊழியர்கள் எடுத்து பேசினால் மறுமுனையில், `மோக்கா.. மோக்கா’ என்று பாடுவதும், இப்போ என்ன பண்ணுவீங்க என்று கேட்பதுமாக இருந்துள்ளது.

இந்த போன் அழைப்புகள் எங்கிருந்து வந்துள்ளன என்று பார்த்தபோது, அதில் பெரும்பாலும் வங்கதேசத்தில் இருந்தும், சில போன் அழைப்புகள், பாகிஸ்தானில் இருந்தும் வந்துள்ளதாக தெரியவந்துள்ளது.

தொடர்ந்து சுமார் 200 போன் அழைப்புகள் வந்ததால், பிசிசிஐ தற்காலிகமாக தொலைபேசி இணைப்பை துண்டித்து வைத்துள்ளது.

இதுகுறித்து பிசிசிஐ அதிகாரி ஒருவர் கூறுகையில், “மோக்கா.. மோக்கா விளம்பரங்கள் நல்ல வரவேற்பை பெற்றிருந்தன. ஆனால், அது எங்களை திருப்பி தாக்கும் என்பதை எதிர்பார்க்கவில்லை என்று தெரிவித்துள்ளார்.

நாளை ஞாயிற்றுக்கிழமை நடைபெறவுள்ள உலகக்கிண்ண கிரிக்கெட் இறுதிப் போட்டியில் இலங்கையை சேர்ந்த குமார் தர்மசேன நடுவர்களில் ஒருவராக செயற்படவுள்ளார்.

இதேவேளை கடந்த இரண்டு ஆண்டுகளாக உலகின் சிறந்த நடுவர் என தேர்வு செய்யப்பட்ட இங்கிலாந்தைச் நடுவர் ரிச்சர்ட் கெட்டல்பரோ, நாளைய போட்டியில் மற்றுமொரு நடுவராக செயற்படவுள்ளார் எனவும் தெரிவிக்கப்பட்டுள்ளது.

உலகக்கிண்ணத்தை நான்கு முறை வென்ற அவுஸ்திரேலியா நாளை முதல் முறையாக இறுதிப்போட்டியில் களம் இறங்கும் நியூசிலாந்து அணியுடன் மோதும்.

அவுஸ்திரேலிய அணியின் தலைவர் மைக்கல் கிளார்க் உலக கிண்ண இறுதி போட்டியுடன் ஒரு நாள் போட்டிகளில் இருந்து ஓய்வு பெறப்போவதாக அறிவித்துள்ளார்.

இந்திய அணிக்கு எதிரான டெஸ்ட் தொடரின்போது மைக்கல் கிளார்க்கின் காலில் காயம் ஏற்பட்டது. தொடர்ந்து காயத்தால் அவதிப்பட்டு வந்த அவர் முதுகு வலியுடன் நீண்டநாள் விளையாடி வருகிறார்.

இதனால் டெஸ்ட் தொடரில் இருந்து விலகிய அவர் அதன் பிறகு முத்தரப்பு ஒரு நாள் தொடரிலும் பங்கேற்கவில்லை. ஆகவே, உலகக்கிண்ண அணியில் இடம்பெறுவாரா என்ற சந்தேகமும் எழுந்தது. ஆனால், அவர் உடல்தகுதியை நிரூபித்ததால் அணியில் சேர்க்கப்பட்டார்.

நீண்ட நாட்களாக அவுஸ்திரேலிய அணிக்காக விளையாடி வரும் கிளார்க் நாளை நடைபெறும் இறுதி போட்டி பற்றி செய்தியாளர்களிடம் கருத்து வௌியிட்ட போது இந்த ஓய்வு அறிவிப்பை தெரிவித்தார்.

இதனால் நாளைய போட்டி அவருக்கு உணர்ச்சிகரமான போட்டியாக இருக்கப்போகிறது. அவுஸ்திரேலியாவிற்கு உலகக்கிண்ணத்தை பெற்று தந்த சந்தோசத்துடன் ஓய்வு பெறுவாரா என்பது நாளை தெரியும்.