கணவனை விளக்கமறியலில் வைக்குமாறு உத்தரவிட்ட நீதிபதி ஒருவர் மனைவியை துஷ்பிரயோகத்திற்கு உட்படுத்திய சம்பவம் ஒன்று கம்பளை பிரதேசத்தில் இடம்பெற்றுள்ளது.

தங்க ஆபரணங்களை போன்று போலியான ஆபரணங்களை தயாரித்து அவற்றை வங்கியில் அடகுவைத்து பணம் சம்பாதித்தமை தொடர்பில் கணவன் மற்றும் மனைவிக்கு எதிராக வழக்கொன்று விசாரிக்கப்பட்டுள்ளது.

வழக்கை விசாரித்த நீதிபதி இளம் பெண்ணான மனைவியை மட்டும் பிணையில் விடுதலை செய்து கணவனை விளக்கமறியலில் வைக்குமாறு உத்தரவிட்டுள்ளார்.

அன்றையதினம் இரவு பிரதான சந்தேக நபரின் இளம் மனைவியை கம்பளை நகரில் உள்ள விடுதி ஒன்று அழைத்துச் சென்ற நீதிபதி குறித்த பெண்ணை பல முறை துஷ்பிரயோகத்திற்கு உட்படுத்தியுள்ளார்.

இதற்காக அந்த நீதிபதி சந்தேக நபர்கள் சார்பில் ஆஜரான சட்டத்தரணியின் உதவியையும் பெற்றுக்கொண்டுள்ளார்.

நீதிபதி மனைவியை துஷ்பிரயோகத்திற்கு உட்படுத்தியதை அறிந்து கொண்ட விளக்கமறியலில் இருந்த கணவர் நீதிமன்றத்தில் வழக்கு விசாரணை நடைபெற்ற தினத்தில் நீதிபதி மீது மனித கழிவை வீசி தாக்குதல் நடத்தியுள்ளார்.

இரண்டாம் வகுப்பில் பயிலும் சிறுமியை துஷ்பிரயோகத்திற்கு உட்படுத்திய கடற்படை வீரரை பிரதேசவாசிகள் பிடித்து கடுமையாக தாக்கி, மரத்தில் கட்டி வைத்து பொலிஸாரிடம் ஒப்படைத்துள்ளனர்.

இந்த சம்பவம் கண்டியில் இடம்பெற்றுள்ளது. கண்டியில் உள்ள பாடசாலை ஒன்றில் இரண்டாம் வகுப்பில் பயிலும் சிறுமி வீட்டு முற்றத்தில் விளையாடிக் கொண்டிருந்தார்.

அப்போது அங்கு சென்ற கடற்படை வீரர் மலர் ஒன்றை தருவதாக கூறி சிறுமியை ஏமாற்றி அருகில் உள்ள தனது வீட்டுக்கு அழைத்துச் சென்று துஷ்பிரயோகத்திற்கு உட்படுத்தியுள்ளதாக பொலிஸார் தெரிவித்தனர்.

சம்பவம் குறித்து சிறுமி பெற்றோரிடம் கூறியதை தொடர்பில் பிரதேச வாசிகள் கடற்படை வீரரை பிடித்து கடுமையாக தாக்கியதுடன் மரத்தில் கட்டி வைத்து பின்னர் பொலிஸாரிடம் ஒப்படைத்துள்ளனர்.

துஷ்பிரயோகத்திற்கு உள்ளாக்கப்பட்ட சிறுமி வைத்தியசாலையில் அனுமதிக்கப்பட்டுள்ளார். சம்பவம் தொடர்பில் கைது செய்யப்பட்ட கடற்படை வீரர் நீதிமன்றத்தில் ஆஜர்ப்படுத்தப்பட்டு எதிர்வரும் 14 ஆம் திகதி வரை விளக்கமறியலில் வைக்கப்பட்டுள்ளார்.

கடுமையாக தாக்கப்பட்டதால் காயமடைந்துள்ள சந்தேக நபர் சிறைச்சாலையின் பாதுகாப்பின் கீழ் கண்டி வைத்தியசாலையில் சிகிச்சை பெற்று வருகிறார்.

ஜப்பான் அரசாங்கத்தின் விசேட பிரதிநிதி யசூசி அக்காசி 6 நாட்கள் உத்தியோகபூர்வ விஜயம் மேற்கொண்டு நேற்று இலங்கையை வந்தடைந்தார்.

அவர் எதிர்வரும் 13 ஆம் திகதிவரை இங்கு தங்கியிருந்து நடவடிக்கைகளை மேற்கொள்வார் என்று வெளிவிவகாரத்துறை அமைச்சு தெரிவித்துள்ளது. இதன்போது ஜனாதிபதி மஹிந்த ராஜபக்ஷ, வெளிவிவகாரத்துறை அமைச்சர் மற்றும் அரசாங்கத்தின் உயர்மட்ட அதிகாரிகளையும் எதிர்க்கட்சித் தலைவர் ஆகியோரை யசூசி அக்காசி சந்திக்கவுள்ளார்.

இலங்கையில் சமாதானத்தை கட்டியெழுப்புதல், புனர்நிர்மாணம், புனர்வாழ்வு போன்ற விடயங்கள் தொடர்பாக அவர் நடவடிக்கை எடுப்பார் என்று தெரிவிக்கப்பட்டுள்ளது.

ஜப்பானின் விசேட பிரதிநிதி யசூசி அக்காசி இலங்கைக்கு விஜயம் செய்துள்ள 23 வது தடவை இதுவென்பது குறிப்பிடத்தக்கது.

யாழ்ப்பாண பிராந்தியத்தின் கல்வி வளர்ச்சி பாரிய முன்னேற்றத்தை கண்டுள்ளதாக ஜனாதிபதி மஹிந்த ராஜபக்ஷ தெரிவித்துள்ளார்.

விடுதலைப்புலிகளிடம் இருந்து யாழ்ப்பாண பிராந்தியம் விடுவிக்கப்பட்ட பின்னர் இது பாரிய அடைவு ஏற்பட்டுள்ளதாக அவர் குறிப்பிட்டுள்ளார். பயங்கரவாதத்தினால் மக்கள் கவரப்பட்ட நிலையில் அங்கு கல்வி முன்னேற்றம் ஏற்பட்டுள்ளதாக ஜனாதிபதி தெரிவித்துள்ளார்.

இந்த கல்வி முன்னேற்றம் விடுதலைப்புலிகள் காரணமாகவோ அல்லது தமிழ் தேசியக் கூட்டமைப்பு காரணமாகவே ஏற்பட்டடதல்ல என்றும் அவர் சுட்டிக்காட்டியுள்ளார்.

இந்தநிலையில் அந்த கல்வி சமூகத்துக்கு மத்தியில் இனவாதம் மற்றும் மதவாதத்தை உருவாக்கமுடியாது என்றும் ஜனாதிபதி குறிப்பிட்டுள்ளார்.

மத்திய கிழக்கு நாடுகளுக்கு வேலை வாய்ப்புக்காக செல்லும் இலங்கையர்கள் தொடர்பான ஒப்பந்தத்தை தயாரிப்பது தொடர்பில் புதிய இணக்கப்பாடு எட்டப்பட்டுள்ளது.

மத்திய கிழக்கில் பணியாற்றுவதற்காக பணியாளர்களை அனுப்பும் 6 ஆசிய நாடுகள் மற்றும் 6 மத்திய கிழக்கு ராச்சியங்களுக்கு இடையில் நடத்தப்பட்ட பேச்சுவார்த்தையின் போது இந்த இணக்கம் காணப்பட்டுள்ளது.

இந்த கலந்துரையாடலில் உலக தொழில் அமைப்பு, ஐக்கிய நாடுகளின் மகளீர் விவகார காரியாலயம் மற்றும் சர்வதேச குடிவரவு அமைப்பு ஆகியனவும் பங்கேற்றிருந்தன.

குறிப்பாக மத்திய கிழக்கு வீட்டுப்பணிகளுக்காக செல்லும் பணியாளர்களின் சேவை நிலைமைகள் மற்றும் கடைபிடிக்கப்படும் ஒப்பந்தங்கள் தொடர்பாக விவாதிக்கப்பட்டுள்ளது.

புதிய இணக்கப்பாட்டின் அடிப்படையில் சர்வதேச தொழில் சட்டங்களுக்கு அமைவாக குறித்த நாடுகளின் தொழிலாளர் கொள்கைகள் தயாரிக்கப்பட வேண்டும்.

அதேபோன்று நீண்டகால ஒப்பந்தங்களை புரிந்துகொள்ளக் கூடிய மொழிகளில் பெற்றுக்கொடுக்கவும் இணக்கப்பாடு எட்டப்பட்டுள்ளமை குறிப்பிடத்தக்கது.

யாழ். கைதடியில் இலங்கை போக்குவரத்துச் சபைக்குச் சொந்தமான பஸ் மீது நேற்று இரவு கல்வீச்சுத் தாக்குதல் மேற்கொள்ளப்பட்டது.

யாழ்ப்பாணத்திலிருந்து தங்காலை நோக்கிச் சென்றுகொண்டிருந்த பஸ் மீதே கல்வீச்சுத் தாக்குதல் மேற்கொள்ளப்பட்டுள்ளது.
இத்தாக்குதலில் குறித்த பஸ்ஸில் பயணம் செய்தவர்களில் நான்கு பேர் காயமடைந்துள்ளதாக சாவகச்சேரி பொலிஸார் தெரிவித்துள்ளனர்.

காயமடைந்த நால்வரும் சாவகச்சேரி ஆதார வைத்தியசாலையில் அனுமதிக்கப்பட்டுள்ளனர். இச்சம்பவம் தொடர்பிலான விசாரணைகளினை சாவகச்சேரி பொலிஸார் மேற்கொண்டு வருகின்றனர்.

கிளிநொச்சியில் 27 தாய்மார்கள் தங்களின் சுயவிருப்பின்படியே இக்கருத்தடையை பெற்றுக்கொண்டனர் என சுகாதார அமைச்சின் பெண்ணியல் நிபுணர்கள் அடங்கிய விசாரணை குழு தெரிவித்துள்ளது.

கடந்த சில நாட்களாக இலத்திரனியல் மற்றும் அச்சு ஊடகங்களில் கிளிநொச்சி மாவட்டத்தில் கட்டாயக் கருத்தடை இடம்பெற்றதாக வெளிவந்த செய்திகளையடுத்து வட மாகாண அமைச்சினால் விசேட மகப்பேற்று மற்றும் பெண்ணோயியல் நிபுணர் அடங்கிய விசேட விசாரணைக் குழு நியமிக்கப்பட்டு கள ஆய்வு மேற்கொள்ளப்பட்டு சுகாதார அமைச்சருக்கு வழங்கப்பட்டுள்ள அறிக்கையிலேயே இவ்வாறு தெரிவிக்கப்படுள்ளது.

இவ் விடயம் தொடர்பாகவும் விசாரணைக்குழுவின் அறிக்கை தொடர்பாகவும் நேற்று வட மாகாண சுகாதார அமைச்சர் வைத்திய கலாநிதி ப.சத்தியலிங்கத்தால் சுகாதார அமைச்சின் வவுனியா உப அலுவலகத்தில் தெளிவுபடுத்தும் ஊடகவியலாளர் சந்திப்பின் போதே இவ் அறிக்கை வழங்கப்பட்டது. இவ் அறிக்கையில் மேலும் தெரிவிக்கப்பட்டுள்ளதாவது..

தேசிய போசாக்கு மாதத்திற்கான வேலைத்திட்டத்தின்போது கிராஞ்சி வேரவில் மற்றும் வலைப்பாடு ஆகிய கிராமங்களை உள்ளடக்கிய கிராஞ்சி, வேரவில் குடும்ப சுகாதார உத்தியோகத்தர் பிரிவுகளில் ஐந்து வயதுக்குட்பட்ட பிள்ளைகளது ஊட்டம் குறித்த தரவானது மிகக் குறைவாகவே பதிவாகியிருந்தமையால் மேற்படி கிராமங்களை உள்ளடக்கியதான போசாக்கு ஊட்டம் குறித்த தரவுப்பதிவுகள் குடும்ப சுகாதாரப் பணியகத்தின் ஆலோசனையின்படி புரட்டாதி மாதம் 30 திகதியன்று மீளவும் மேற்கொள்ளப்பட்டது.

இக்கிராமங்களில் நிரந்தரமான குடும்பநல உத்தியோகத்தர்கள் கடமையில் இல்லாதமையைக் கருத்திற்கொண்டு, மாவட்ட தாய்சேய் நல வைத்திய அதிகாரி மற்றும் அனைத்து சுகாதார வைத்திய அதிகாரிகளும் அவர்களது பிரிவுகளில் பணியாற்றும் குடும்ப நல உத்தியோகத்தர்களுடன் இக்கிராமங்களுக்கு குறித்த தினத்தில் வருகை தந்திருந்தனர்.

அவ்வேளையில் போசாக்குத் தரவுப்பதிவிற்கு வருகைதந்திருந்த தாய்மார்களுக்கு சுகாதாரக் கல்வியும் வழங்கப்பட்டது. அப்போது யாராவது குடும்பத்திட்ட முறைகளைப் பாவிக்க விரும்பினால் அவர்களை வேரவில் பிரதேச வைத்தியசாலைக்கு அழைத்துச் சென்று அதனை வழங்குவதாகக் கூறியுள்ளனர்.

இதற்கமைவாக அங்கு சமூகமளித்திருந்த தாய்மார்களில் சிலர் இக்கருத்தடை முறையை பாவிப்பதற்கு விருப்பம் தெரிவித்து வேரவில் பிரதேச வைத்தியசாலைக்குச் சென்று மேற்படி கருத்தடை சிகிச்சையைப் பெற்றுள்ளனர்.

விசாரித்ததன் அடிப்படையில், குடும்பத்திட்ட முறையினைப் பெற்றுக்கொண்ட தாய்மார்களில் மேற்கொண்ட தினத்தில் சமூகமளித்திருந்த 27 தாய்மார்கள் தங்களின் சுயவிருப்பின்படியே இக்கருத்தடையை பெற்றுக்கொண்டதாகவும் தம்மை யாரும் வலோத்காரம் பண்ணியோ அல்லது பயமுறுத்தியோ அதனைப் பெறவில்லை என்றும் கூறியுள்ளார்கள்.

இவ் விடயங்கள் தொடர்பாக விசாரணைக்குழு சுகாதார அமைச்சுக்கு கொடுத்துள்ள பரிந்துரைகள். நியமிக்கப்பட்ட குழுவினர் விசாரணையின் அடிப்படையில் பின்வரும் அவதானங்களை முன்வைத்துள்ளனர்.

1. யாரையும் வற்புறுத்தியோ பயமுறுத்தியோ இக்கருத்தடை முறைமையை ஒருவருக்கும் வழங்கவில்லை என்பது தெளிவாகின்றது.

2. மேற்படி கருத்தடை சிகிச்சையானது அதிகமானவர்களுக்கு ஒரே நேரத்தில் ஒரே இடத்தில் மேற்கொண்டுள்ளதால் சமூகமட்டத்தில் விளம்பரப்படுத்தப்பட்டு தப்பபிப்பிராயம் ஏற்படக் காரணமாயுள்ளது.

3. குறித்த தினம் முறையான சுகாதாரக் கல்வி வழங்கப்பட்டதன் பின்னர் தாய்மார் தமது சுயவிருப்பத்தின் பேரில் மேற்படி கருத்தடையை ஏற்றுக்கொண்டாலும் அவர்கள் நிதானமாகச் சிந்தித்து முடிவெடுப்பதற்குரிய கால அவகாசம் வழங்கப்படாமையே குற்ற உணர்வு மற்றும் சமூக நெருக்கீடு ஏற்படக் காரணமாகியுள்ளது.

4. எனவே கால அவகாசம் போதுமானதாக இருந்திருந்தால் இக்கருத்தடை முறையினை பெற்றுக்கொண்டவர்கள் சமூக மட்டத்திலும் வீட்டிலும் நன்றாகக் கலந்தாலோசித்து நேரான சிந்தனையுடன் செயற்பட்டிருப்பார்கள். மேலும் பத்திரிகைகள் இணையத்தளங்களில் பிரசுரமான தவறான கருத்துகள் ஏற்படாது தடுத்திருக்கலாம் என இக்குழு கருதியிருந்தது.

மேற்படி குழுவினரது அவதானிப்புகள் மற்றும் பரிந்துரைகளின் அடிப்படையில் வடமாகாண சுகாதார சுதேச வைத்தியத்துறை அமைச்சு பொறுப்புக்கூறுதல், அடிப்படைச் சுகாதார வசதிகள் மற்றும் மகளிர் இனப்பெருக்க சுகாதார உரிமை என்பவற்றை உறுதிப்படுத்துமுகமாக பின்வரும் தீர்மானங்களை மேற்கொண்டு உடனடியாக நடைமுறைக்குக் கொண்டுவருகிறது.

சகல குடும்பத்திட்ட முறைகள் (நிரந்தர மற்றும் தற்காலிக) தொடர்பிலான பயனாளர் தகவல்கள் தமிழ்மொழியில் வழங்குதல். குடும்பத்திட்ட முறைகளை வழங்கும்போது பயனாளர்கள் தமது குடும்பத்தினருடன் கலந்தாலோசித்து முடிவுகளை மேற்கொள்ள போதிய கால அவகாசம் வழங்குதல்.

குடும்பத்திட்ட சேவைகளை வழங்கும்போது ஒருதடவையில் பெரும்தொகையினருக்குச் சேவை வழங்குவதை முற்றாகத் தவிர்த்தல் நடைமுறையிலுள்ள குடும்பத்திட்ட முறைகள் தொடர்பான தமிழ்மொழிமூலத் தகவல்களை அனைத்து சுகாதார நிலையங்களிலும் பார்வைக்கு வைத்தல்.

குடும்பத் திட்ட சுகாதாரக் கல்வி வழங்குதல் தொடர்பில் பொதுச் சுகாதார உத்தியோகத்தர்களுக்கு விசேட பயிற்சி வகுப்புகளை சுகாதாரக்கல்விப் பணியகம் மற்றும் குடும்ப சுகாதாரப் பணியகம் ஆகியவற்றின் ஊடாக வழங்குதல்.

மகளிர் இனப்பெருக்க சுகாதார உரிமை தொடர்பிலான விசேட பயிற்சிகளைப் பொதுச் சுகாதார உத்தியோகத்தர்களுக்கு வழங்குதல்.

அமைச்சு பின்வரும் விடயங்களைத் தெளிவாக்க விரும்புகிறது.

1. ஒரு சிறிய கிராமப்பகுதிக்கு இவ்வாறு பெரும்தொகையான சுகாதார உத்தியோகத்தர்கள் ஒரே நாளில் சென்று குடும்பத்திட்ட முறைகளை அறிமுகப்படுத்தியமை முற்றாகத் தவிர்த்திருக்கவேண்டிய விடயமாக அமைச்சு கருதுகிறது.

2. இவ்வாறான சம்பவங்கள் எதிர்வரும் காலங்களில் இடம்பெறாதிருப்பதை உறுதிப்படுத்தும் விதமாக அமைச்சு திணைக்கள நடைமுறைகள் ஊடாகப் பொருத்தமான நடவடிக்கைகளை மேற்கொண்டுள்ளது.

3. போருக்குப் பின்னரான இந்தக் காலப் பகுதியில் போரினால் உயிரிழப்புக்களைச் சந்தித்த எமது பிரதேசங்களில் குடும்பக்கட்டுப்பாட்டு முறைகளை ஊக்குவிப்பதற்கான அவசியமோ அவசரமோ தற்போது இல்லை என அமைச்சு கருதுகிறது.

4. இருந்தபோதும் குடும்பதிட்டமிடல் தொடர்பான ஆலோசனைகள் தேவையுடையோர் அவற்றை சுகாதார நிலையங்களில் பெற்றுக் கொள்வதற்கான வசதிகள் செய்யப்படல் வேண்டும்.

5. கிராஞ்சி, வேரவில் மற்றும் வலைப்பாடு ஆகிய கிராமங்களில் பயன்படுத்தப்பட்டது ஒரு தற்காலிக குடும்பத்திட்ட (கருத்தடைச்) சாதனம்.

6. இது இலங்கையின் அனைத்து மாவட்டங்களிலும் பாவனையில் உள்ள ஒரு குடும்பத்திட்ட சாதனம்.

7. இதனை ஆகக் கூடியது ஐந்து வருடங்கள் ஒருவர் பயன்படுத்தலாம்.

8. இதனை உடலில் பதித்துக்கொண்ட எந்தவொரு தாயாரும் அதனை மீள எடுத்துவிட விரும்பினால் தத்தமது கிராமங்களுக்குரிய மருத்துவ மாதுக்களுடன் தொடர்புகொள்வதன் மூலம் உடனடியாக அதனை மேற்கொள்ளமுடியும்.

இதற்காகக் கட்டணம் எதுவும் செலுத்த வேண்டியதில்லை என இவ் அறிக்கையில் தெரிவிக்கப்பட்டுள்ளது.