வவுனியா வர்த்தசங்கத்தின் ஒழுங்கமைப்பில் தமிழ்தேசிய கூட்டமைப்பு மற்றும் கோவில்குளம் இளைஞர் கழகத்தின் அனுசரணையில் சேகரிக்கப்பட்ட 15 இலட்சம் பெறுமதியான நிவாரண பொருட்கள், பதுளை உறவுகளுக்காக நேற்றைய தினம்(22.11) வவுனியா மாவட்ட வர்த்தக சங்கத்தின் தலைவர் திரு.ரி.எஸ்.இராசலிங்கம் தலைமையிலான குழுவினரால் மக்களிடம் நேரடியாக கையளிக்கப்பட்டதாக எமது செய்தியாளர் தெரிவித்தார்.

அத்துடன் இவ் நிகழ்வுகளில் பூனாகல பிரதேச செயலாளரும் கலந்து கொண்டிருந்தார். இக் குழுவில் முன்னாள் வன்னி மாவட்ட பாராளுமன்ற உறுப்பினரும், தமிழீழ மக்கள் விடுதலைக் கழகத்தின்(புளொட்) தலைவரும் தற்போதைய தமிழ் தேசியக் கூட்டமைப்பின் வட மாகாண சபை உறுப்பினருமான கௌரவ தர்மலிங்கம் சித்தார்த்தன், தமிழ் தேசியக் கூட்டமைப்பின் வட மாகாண சபை உறுப்பினர் திரு.எஸ்.தியாகராசா, வவுனியா நகரசபையின் முன்னாள் உப நகர பிதாவும் தமிழீழ மக்கள் விடுதலைக் கழகத்தின்(புளொட்) வவுனியா மாவட்ட இணைப்பாளருமான திரு க.சந்திரகுலசிங்கம்(மோகன்),

வர்த்தக சங்கத்தின் இயக்குனர் குழு உறுப்பினர் வாடி வீடு அதிபர் கதிர்காமராஜா, தமிழீழ மக்கள் விடுதலைக் கழகத்தின்(புளொட்) நோர்வே அமைப்பாளர் ராஜன், கோவில்குளம் இளைஞர் கழகத்தின் தலைவர் திரு சு.காண்டீபன், கழக உறுப்பினர் திரு ந.தினேஷ் ஆகியோருடன் நிகழ்வுகளில் பூனாகல பிரதேச செயலாளரும் கலந்து கொண்டமை குறிப்பிடத்தக்கது.

இயற்கையின் சீற்றத்தால் உயிர்கள் உட்பட உடைமைகளையும் இழந்து சொல்லொனா துயரத்தில் வாடும் கொஸ்லந்த மீரியபெத்த உறவுகள் தங்க வைக்கப்பட்டுள்ள மாகந்த தொழிற்சாலைக்கு முதலில் தமது நிவாரண பொருட்களுடன் சென்ற குழுவினர், அங்கு தங்க வைக்கப்பட்டிருந்த 78 குடும்பங்களுக்கான நிவாரண பொருட்களை கையளித்தனர்.

தொடர்ந்து தியகல, மீரியபெத்த போன்ற பகுதிகளில் அபாய எச்சரிக்கை விடப்பட்ட பகுதியில் இருந்து வெளியேற்றப்பட்ட மக்கள் தங்க வைக்கப்பட்டிருக்கும் பூனாகல தமிழ் மகா வித்தியாலயத்தில் உள்ள 72 குடும்பங்களுக்கான நிவாரண பொருட்கள் வர்த்தக சங்கத்தினர் மற்றும் இணைந்த குழுவினரால் மக்களிடம் நேரடியாக கையளிக்கப்பட்டது.

தொடர்ந்து அபாய எச்சரிக்கை விடப்பட்ட பூனாகல தொழிற்சாலைப் பிரிவைச் சேர்ந்த 39 குடும்பங்கள் தங்க வைக்கப்பட்டிருக்கும் எதிரொலி விளையாட்டு மைதானத்துக்கான பொருட்கள் கிராம அபிவிருத்தி சங்கத்தினூடாக கையளிக்கப்பட்டது.

22.11.2014 அன்று எச்சரிக்கை விடப்பட்டு உடனடியாக வெளியேற்றப்பட்டு கீழ்ப்புற லுணுகல தோட்ட பிரிவைச் சேர்ந்த 58 குடும்பங்களுக்கு தலா 1000 ரூபா வீதம், பிள்ளையார் ஆலயத்தில் தங்க வைக்கப்பட்டிருந்த மக்களிடம் வர்த்தக சங்கத்தினர் மற்றும் இணைந்த குழுவினரால் நேரடியாக கையளிக்கப்பட்டது.

வவுனியா, பொன்னாவரசன் குளம் பகுதியிலுள்ள வீடொன்றின் மீது மின்னல் தாக்கியதில், வீட்டு உடமைகளை முழுமையாக இழந்து கற்றலுக்கு எந்தவிதமான வசதிகளுமின்றி வாழ்ந்த மாணவனுக்கு உதவிகள் வழங்கப்பட்டுள்ளன.

வவுனியா பாடசாலையொன்றில் தரம் 7ல் கல்விகற்கும் எஸ்.கஜன் என்ற குறித்த மாணவனுக்கு வவுனியா தமிழ் விருட்சம் சமூக ஆர்வலர் அமைப்பு மற்றும் ஊடகவியலாளர்கள் இணைந்து இன்று ஞாயிற்றுக்கிழமை காலை இந்த உதவிகளை வழங்கியுள்ளனர்.

கடந்த செவ்வாய்க்கிழமை அதிகாலை 1 மணியளவில் குறித்த சிறுவனின் வீட்டின் மீது மின்னல் தாக்கியதால் வீடு முழுமையாக எரிந்தது. யுத்தத்தினால் பெற்றோரை இழந்த குறித்த சிறுவன் தனது அம்மம்மாவின் தயவிலேயே வசித்து வருகின்றான். சம்பவ தினத்தன்று வேலை நிமித்தம் அம்மம்மா வெளியில் சென்றமையால் சிறுவன் அயல் வீட்டில் தங்கியுள்ளான். இதனால் உயிரிழப்பு தவிர்க்கப்பட்டுள்ளது.

இந்நிலையில், அனர்த்தம் தொடர்பில் செய்தி சேகரிக்கச் சென்ற ஊடகவியலாளர்கள் சிறுவனின் நிலை கண்டு தமிழ் விருட்சம் சமூக ஆவர்வலர் அமைப்பிடம் கேட்டுக் கொண்டதற்கிணங்க, அம் மாணவனுக்கான உடைகள், உலர் உணவுப்பொருட்கள், பாடசாலை புத்தகப்பை மற்றும் பாடசாலை கொப்பிகள் என்பன வழங்கப்பட்டன.

தமிழ் விருட்சம் சமூக ஆர்வலர் அமைப்பானது, சிற்றி வர்த்தக நிலைய உரிமையாளர் ஆ.சபாநாதன் உதவியுடன் உடுபுடவைகளையும், உலர் உணவுப் பொருட்கள் மற்றும் புத்தகப் பையினை வர்த்தகர் ந.சுந்தரதாசனின் உதவியுடனும் கற்றல் உபகரணங்களை தமிழ் விருட்சம் சமூக ஆர்வலர்கள் அமைப்பைச் சேர்ந்த செ.சந்திரகுமாரின் உதவியுடனும் சேகரித்து இன்று கையளித்தது.

இந்நிகழ்வில், வர்த்தகர் ஆ.சபாநாதன், வர்த்தகர் ந.சுந்தரதாசன், தமிழ் விருட்சம் சமூக ஆர்வலர்கள் அமைப்பின் தலைவர் சந்திரகுமார், செயலாளர் மாணிக்கம் ஜெகன், ஊடகவியலாளர்களான ந.கபில்நாத், கி.வசந்தரூபன், கோ.ரூபகாந் மற்றும் சமூக ஆர்வலர் சர்மிலன் ஆகியோர் கலந்துகொண்டனர்.

வவுனியா, குருமன்காடு காளிகோவில் வீதியில் தூக்கிட்டு இளைஞன் ஒருவர் தற்கொலை செய்து கொண்டுள்ளதாக திடீர் மரணவிசாரணை சிவநாதன் கிசோர் தெரிவித்துள்ளார். இச் சம்பவம் தொடர்பில் அவர் மேலும் தெரிவிக்கையில்..

வவுனியா, குருமன்காடு காளிகோவில் வீதியில் உள்ள தனது வீட்டில் பெற்றோருடன் வசித்து வந்த இளைஞன் வீட்டின் தாவரப் பகுதியில் கட்டப்பட்டிருந்த உடை போடுவதற்கான கொடிக் கயிற்றினால் தூக்கிட்டு மரணமடைந்த நிலையில் இன்று சனிக்கிழமை காலை மீட்கப்பட்டார்.

இவ்வாறு மீட்கப்பட்டவர் மொரிஸ் டிசாந்த் (30) என்பவராவார். வீட்டில் உறங்கிக் கொண்டிருந்த தாயார் விடிந்ததும் வெளியில் வந்து பார்த்த போதே மகன் தூக்கிட்டு தற்கொலை செய்து கொண்டமை தெரியவந்துள்ளது.

வெளிநாடு ஒன்றில் வசிக்கும் குறித்த இளைஞனின் காதலியுடன் ஏற்பட்ட முரண்பாடே தூக்கிட காரணம் என ஆரம்ப விசாரணைகளில் தெரியவந்துள்ளதாகவும் அவர் மேலும் தெரிவித்தார். இது தொடர்பான விசாரணைகளை வவுனியா பொலிசார் மேற்கொண்டு வருகின்றனர்.