யாழ்ப்பாணம் – கிளிநொச்சிக்கிடையே குறுந்தூர ரயில் சேவை ஒன்று இன்று புதன்கிழமை ஆரம்பிக்கப்பட்டுள்ளதாக ரயில்வே திணைக்களம் அறிவித்துள்ளது.

இதன்படி இன்று காலை 6.05 மணிக்கு யாழ்ப்பாணத்திலிருந்து புறப்பட்ட ரயில் கிளிநொச்சியிலிருந்து மீண்டும் 8.05 மணிக்கு புறப்பட்டது. இதேபோன்று மாலை 4 மணிக்கு யாழ்ப்பாணத்திலிருந்து புறப்படும் ரயில் மீண்டும் 5.55 மணிக்கு கிளிநொச்சியிலிருந்து புறப்படும்.

இந்த சேவை இன்றிலிருந்து கிரமமாக இடம்பெறும் என்று அறிவிக்கப்பட்டுள்ளது. இந்த சேவையில் பயணக்கட்டணமாக 90 ரூபா அறவிடப்படும் என்றும், இந்த ரயில் யாழ்ப்பாணத்துக்கும் கிளிநொச்சிக்குமிடையிலான அனைத்து தரிப்பிடங்களிலும் தரித்து செல்லும் என்றும் அறிவிக்கப்பட்டுள்ளது.

மன்னார் மடு பிரதேசத்தில் குழந்தைக்கு விஷத்தை கொடுத்து விட்டு தானும் விஷம் அருந்தி தற்கொலை செய்து கொள்ள முயற்சித்த நபர் வைத்தியசாலை அனுமதிக்கப்பட்டுள்ளார்.

விஷம் கொடுக்கப்பட்ட குழந்தை பெரிய பண்டிவிரிச்சான் வைத்தியசாலையில் அனுமதிக்கப்பட்ட பின் உயிரிழந்துள்ளது.

ஒன்றரை வயதான குழந்தையே இவ்வாறு உயரிழந்துள்ளது. விஷம் அருந்தியவர் குழந்தையின் தந்தை எனவும் அவர் பெரிய பண்டிவிரிச்சான் வைத்தியசாலை அனுமதிக்கப்பட்டு, மேலதிக சிகிச்சைக்காக மன்னார் வைத்தியசாலைக்கு மாற்றப்பட்டுள்ளார்.

இறந்து போன குழந்தையின் தாய் சில மாதங்களுக்கு முன்னர் விஷம் அருந்தி தற்கொலை செய்து கொண்டதாக பொலிஸார் தெரிவித்தனர்.

இந்த மரணத்தால் ஏற்பட்ட மன உளைச்சல் காரணமாக தந்தை குழந்தைக்கு விஷத்தை கொடுத்து கொலை செய்து விட்டு தானும் தற்கொலை செய்ய முயற்சித்துள்ளதாகவும் பொலிஸார் கூறினர்.

சம்பவம் குறித்து மடு பொலிஸார் விசாரணைகளை மேற்கொண்டு வருகின்றனர்.

யாழ்ப்பாணத்தில் இந்த வருடத்தில் மாத்திரம் 13 போ் எயிட்ஸ் நோய்க்கு ஆளாகியுள்ளதாக யாழ் போதனா வைத்தியசாலை மருத்துவ வட்டாரங்கள் தெரிவித்துள்ளன.

எயிட்ஸ் தொற்றுக்கு இலக்கானவா்களில் 3 போ் குழந்தைகள் எனவும் மற்றையவா்களில் பெரும்பாலோனோர் இளவயதுப் பெண்கள் எனவும் தெரிவிக்கப்படுகிறது.

தற்போது யாழ் மாவட்டத்தில் நுாற்றுக்கணக்கான எயிஸ்ட் நோய் தொற்றுக்குள்ளானவா்கள் உலாவி வருவதாகவும் அவா்களுக்கே தெரியாது அவா்களிடம் எயிட்ஸ் தொற்று ஏற்பட்டுள்ளதாகவும் வைத்தியசாலைத் தகவல்கள் மேலும் தெரிவிக்கின்றன.

இதுவரை 70 பேருக்கு மேல் எயிட்ஸ் நோயாளா்களாக அடையாளப் படுத்தியுள்ளதாகவும் தெரிவிக்கப்படுகிறது.

ஐக்கிய மக்கள் சுதந்திர கூட்டமைப்பு அரசாங்கத்தின் 2015ம் நிதியாண்டுக்கான வரவு செலவுத் திட்டம் மேலதிக 95 வாக்குகளால் சற்று முன்னர் பாராளுமன்றில் நிறைவேற்றப்பட்டுள்ளது.

இந்த வரவு செலவுத் திட்டத்திற்கு ஆதரவாக 152 வாக்குகளும் எதிராக 57 வாக்குகளும் கிடைக்கபெற்றுள்ளதாக தெரிவிக்கப்படுகின்றது.

வரவு செலவுத் திட்டத்திற்கு எதிராக ஐக்கிய தேசியக் கட்சி, தமிழ்த் தேசியக் கூட்டமைப்பு , ஜே.வி. பி போன்ற கட்சிகள் வாக்களித்த நிலையில் ஆதரவாக ஆளும் கட்சியின் கூட்டணி கட்சிகள் வாக்களித்தன.

பொது வேட்பாளருடன் அரசாங்கத்தில் இருந்து வெளியேறிய எவரும் வாக்களிப்பில் கலந்து கொள்ளவில்லை. அதன்படி வரவு செலவுத் திட்டம் மேலதிக 95 வாக்குகளால் நிறைவேற்றப்பட்டுள்ளது.

யாழ்.நாவாந்துறை பகுதியில் உதைபந்தாட்டப் போட்டியினால் இரு இளைஞர் குழுக்களுக்கிடையில் இடம்பெற்ற மோதல் மற்றும் வன்முறை காரணமாக பல வீடுகள் சேதமாக்கப்பட்டுள்ளதுடன், 6 பேர் காயமடைந்தும், பொதுச்சொத்துக்கள் சேதமாக்கப்பட்டும் உள்ள நிலையில் அப்பகுதியில் பொலிஸார் மற்றம் படையினர் குவிக்கப்பட்டுள்ளனர்.

குறித்த பகுதியில் உள்ள சென் நீக்ளஸ் மற்றும் சென் மேரிஸ் ஆகிய விளையாட்டுக் கழகங்களுக்கிடையில் தொடர்ச்சியாக விடுதலைப் புலிகளின் காலத்திலிருந்தே முறுகல் நிலை இருந்து வருகின்றது

இந்நிலையில் மென்பான விற்பனை நிறுவனம் ஒன்று நேற்றைய தினம் யாழ்.மாவட்ட உதைபந்தாட்ட அணிகளுக்கிடையிலான, சுற்றுப்போட்டியை நடத்திய நிலையில் சென் மேரிஸ் அணி வெற்றி பெற்றது.

அவர்கள் தமது வெற்றியை கொண்டாடிய நிலையிலேயே குறித்த மோதல் இடம்பெற்றதாக கூறப்படும் நிலையில் யார் மோதலை தொடக்கினர் என்பதற்கு இரு தரப்பும் ஒருவரயொருவர் குற்றம்சாட்டி வருகின்றனர்.

இந்நிலையில் இன்றைய தினமும் கடற்றொழிலுக்குச் சென்ற சென் நிக்ளஸ் பகுதி கடற்றொழிலாளர்கள் சென் மேரிஸ் பகுதி கடற்றொழிலாளர்களினால் தாக்கப்பட்டுள்ளதாக குற்றம் சாட்டப்பட்டுள்ள நிலையில் அப்பகுதியில் இன்று காலை தொடக்கம் பொலிஸார் மற்றும் படையினர் குவிக்கப்பட்டுள்ளனர்.

எனினும் அப்பகுதியில் இன்றைய தினமும் அமைதியான சூழல் உருவாகாத நிலையில் பதற்றமான சூழல் தொடர்ந்து வருகின்றமை குறிப்பிடத்தக்கது.

இதேவேளை நேற்றிரவு இடம்பெற்ற வன்முறையில் பல வீடுகள் உடைத்து நொருக்கப்பட்டுள்ளதுடன், கடற்கரை வீதி முழுவதும் குளிர்பான போத்தல்கள் உடைக்கப்பட்டு. கண்ணாடி போத்தல் ஓடுகளாக காணப்படுகின்றது.

இந்நிலையில் இன்றிரவும் மோதல் உருவாகலாம் என பொலிஸார் தெரிவித்துள்ளதுடன், மோதலை தடுக்கும் விசேட பாதுகாப்பு ஒழுங்குகளை தாம் மேற்கொண்டிருப்பதாகவும் கூறியிருக்கின்றனர்.

முல்லைத்தீவு மாஞ்சோலை மாவட்ட வைத்தியசாலையில் இன்று காலை திடீரென ஏற்பட்ட தீ, பரவியதால் வைத்தியசாலையின் கதிரியக்கப்பிரிவு (எக்ஸ்ரே) சேதமடைந்துள்ளதாக தகவல்கள் தெரிவிக்கின்றன.

இந்த தீயை கட்டுப்படுத்த இராணுவத்தினர் வரவழைக்கப்பட்டு தீ கட்டுப்படுத்தப்பட்டுள்ளதாகவும் இதில் வைத்தியசாலை ஊழியர்களும் உதவியதாகவும் தெரியவருகின்றது. இந்த தீயில் கதிரியக்கப் பிரிவில் இயந்திரமொன்று முற்றாக கருகியுள்ளதாகவும் அறிவிக்கப்படுகின்றது.