தமிழ்ச் சினிமாவின் உன்னத படைப்பாளியான இயக்குநர் பாலுமகேந்திராவின் மறைவிற்கு தமிழ்த் தேசியக் கூட்டமைப்பின் கிளிநொச்சி பணிமனை உறுப்பினர்கள் உறுப்பினர்கள் இரங்கல் தெரிவித்துள்ளார். அவ்விரங்கல் செய்தியில்,

தமிழ் உணர்வாளர்களை, தியாகிகள் பலரை இந்த மண்ணுக்கு தந்த பெருமை மிகு எமது மண்ணின் மட்டக்களப்பின் கிராமமான அமிர்தகழி தந்த தனித்துவமான இந்திய திரை உலகால் முதல்நிலையில் மதிக்கப்பட்ட அல்லது இந்திய திரை உலகை வேறு திரை ஊடகங்கள் திரும்பி பார்க்கவைத்த திரை உலக மேதை இயக்குனர் பாலுமகேந்திராவின் மரணச் செய்திகேட்டு அதிர்ந்தோம்.

ஒரு ஒளிப்பதிவு கலைஞனாக தன் கலை வாழ்க்கையை தொடக்கிய இந்த கலைச்சிற்பி, ஒளிப்பதிவு, திரைக்கதை, இயக்கம் என துறைசார் நிபுணத்துவத்துடன் விரிந்து அந்த துறைமூன்றிலும் இந்திய தேசிய விருதுகளை பெற்றுக்கொண்டார் என்பதிலிருந்து அவர் சினிமாவின் பிறவி என்பதை எவரும் உணர்வார்கள்.

மட்டக்களப்பில் பிறந்த பாலுமகேந்திரா 1974ம் ஆண்டு மலையாளபடமான நெல்லு படம் மூலம் ஒளிப்பதிவாளராக அறிமுகமானார். அந்த முதல் படத்திலேயே அவருக்கு தேசிய விருதும் கிடைத்தது.

இது தமிழன் ஆற்றலின் பெருமை. பாலுமகேந்திரா செதுக்கிய என்றும் அழகுகெடாத சினிமா சிற்பங்களான கோகிலா, அழியாதகோலங்கள், மூடுபனி, வீடு, மூன்றாம்பிறை, நீங்கள் கேட்டவை எப்போதும் இரசிக நெஞ்சங்களில் நிலைத்திருக்கும் சினிமாவுக்கான வரங்கள்.

புதிய சினிமாக்காரன் படிக்கவேண்டிய புத்தகங்கள். பாலுமகேந்திரா என்ற ஈழத்து படைப்பாளியூடா பார்க்கின்றபோது அவன் வேரில் வேறுதளிர்கள் வீரியத்துடன் முளைக்காதா என்ற ஏக்கமும் எங்கள் நெஞ்சில் இருக்கின்றது.

இந்திய கலைத்தாய் யாதும் ஊரெ யாவரும் கேளீர் என்ற பண்புடன் வாரி அணைத்துக் கொண்டதற்கு இயக்குநர் பெருமை பாலுமகேந்திரா மிகச்சிறந்த உதாரணம்.

வாழ்வுக்கும் படைப்புக்கும் இடைவெளியற்று ஒரு இயற்கையான சினிமா பிறவியாக பாலுமகேந்திரா நம்மிடையே வாழ்ந்து சாதித்து மரணித்திருக்கிறார். அத்தகு நம் பெருமைக்கு கிளிநொச்சி மாவட்ட தமிழ் தேசிய கூட்மைப்பு பா.உறுப்பினர் சி.சிறீதரனின் அலுவலகமான அறிவகமும் அதன் நிர்வாகிகளும் மற்றும் தமிழ் மக்களும் தமது இதய அஞ்சலிகளை தெரிவித்துக் கொள்கின்றனர்.

சமூக வலைத்தளங்கள் ஊடக அறிமுகமாகும் நண்பர்கள் மீது கடுமையான நம்பிக்கை வைப்பது துரதிஷ்டவசமான சம்பவங்களுக்கு காரணமாகக் கூடும் என ஜனாதிபதி மகிந்த ராஜபக்ஷ தெரிவித்தார்.

பிள்ளைகள் தமது பெற்றோர் மீது அதிகமான நம்பிக்கை வைக்க வேண்டும் எனவும் ஜனாதிபதி கூறினார்.

கொழும்பு 12 பாத்திமா முஸ்லிம் பெண்கள் பாடசாலையில் புதிய கட்டிடம் ஒன்றை நேற்று மாலை திறந்து வைக்கும் வைபவத்தில் உரையாற்றும் போதே அவர் இதனை குறிப்பிட்டார்.

பிள்ளைகளுக்காக அரசாங்கத்தினால் கொடுக்க முடிந்த மிகப் பெரிய சொத்து கல்வியாகும் எனவும் ஜனாதிபதி தெரிவித்தார்.

ரயில் ஓட்டுனர்கள் மேற்கொண்டு வரும் பணிப்பகிஷ்கரிப்பால் ரயில் சேவை தொடர்ந்தும் பாதிக்கப்பட்டுள்ளது. சில ரயில் சேவைகள் ரத்து செய்யப்பட்டுள்ளதோடு சில ரயிலிகள் மட்டுப்படுத்தப்பட்ட சேவையில் ஈடுபடுத்தப்பட்டுள்ளன.

இன்று போயா விடுமுறை தினம் என்பதால் தூர இடங்களுக்குச் செல்லவென பயணிகள் கொழும்பு ரயில் நிலையத்தில் காத்திருந்ததை அவதானிக்க முடிந்தது.

மேலும் பஸ் நிலையங்களிலும் பயணிகளின் எண்ணிக்கை அதிகரித்து காணப்படுகிறது. சில சமயம் ரயில் தாமதமானதால் பயணிகள் அதிகாரிகளுடன் முரண்பட்ட சம்பவங்களும் பதிவாகியதாக தெரிவிக்கப்படுகின்ரது.

மாத்தறை சென்ற ரயிலின் உதவி நேரக்கணிப்பீட்டாளர் மீது மொரட்டுவ ரயில் நிலையத்தில் வைத்து பயணிகள் தாக்குதல் நடத்தியுள்ளனர்.

உலகெங்கும் கொண்டாடப்படும் காதலர் தினத்தையொட்டி இராணுவப் படையின் சமிக்ஞை படைப்பிரிவு வித்தியாசமான காதல் பரிசொன்றை அங்கவீனமுற்ற படைவீரரொருவருக்கு வழங்கத் தீர்மானித்துள்ளது.

2008 ஜுலை 25 ஆம் திகதி மாங்குளம் பகுதியிலுள்ள புலிகளின் பங்கரொன்றை கைப்பற்றுவதற்காக நடத்தப்பட்ட இராணுவ நடவடிக்கையின் போது நளின் குமார எனும் இராணுவ வீரர் காயமடைந்ததோடு இவரின் கண்பார்வையும் பாதிக்கப்பட்டது.

இந்த சம்பவத்துக்கு ஒன்றரை மாதத்துக்கு முன்னர் நளின் குமாரவுக்கு பெண் ஒருவருடன் காதல் தொடர்பு ஏற்பட்டது. இருவரும் நேரில் காணாமல் தொலைபேசியிலே காதல் செய்துள்ளனர்.

இருவருக்கும் நேரில் சந்திக்க அவகாசம் கிடைக்கவில்லை. யுத்தத்தினால் தன் பார்வையை இழந்து அங்கவீனமுற்ற போதும் அவரின் காதலி அவரை கைவிடவில்லை.

இருவரும் திருமணம் செய்துகொண்டதோடு இவர்கள் நளினின் சிறிய வீட்டிலே வாழ்ந்து வந்தனர். இது குறித்து அறிந்த இராணுவ சமிக்ஞை படைப் பிரிவு தளபதி ஜெனரல் அபேசேகர இவர்களுக்கு தலாவ பகுதியில் வீடொன்றை கட்டியுள்ளதோடு காதலர் தினமான இன்று அதனை கையளிக்க ஏற்பாடு செய்யப்பட்டுள்ளது.

குடும்ப வாழ்க்கையை சீர்குலைத்தமைக்காக நபர் ஒருவருக்கு உச்ச நீதிமன்றம் 150 லட்ச ரூபா அபராதம் விதித்துள்ளது. திருமணமான பெண் ஒருவருடன் தகாத உறவு கொண்டிருந்த விமானப் பொறியியலாளர் ஒருவருக்கே இவ்வாறு தண்டனை விதிக்கப்பட்டுள்ளது.

நுகேகொடை பிரதேச வர்த்தகர் ஒருவரே இவ்வாறு நட்ட ஈட்டைப் பெற்றுக்கொள்ள உள்ளார். குறித்த வர்த்தகரின் மனைவியுடன், விமானப் பொறியாளர் தகாத உறவைப் பேணியதாக தெரிவிக்கப்படுகிறது.

குடும்ப ஐக்கியத்தை சீர்குலைத்தமை, திருமண வாழ்க்கைக்கு இடையூறு ஏற்படுத்தியமை, அநாகரீகமாக செயற்பட்டமை உள்ளிட்ட பல்வேறு குற்றச்சாட்டுக்கள் குறித்த விமானப் பொறியியலாளருக்கு எதிராக சுமத்தப்பட்டிருந்தது.

வர்த்தகரின் மனைவியுடன் கள்ளத் தொடர்பு ஒன்றைப் பேணிய விமானப் பொறியியலாளர், ஹோட்டல் ஒன்றில் உல்லாசமாக இருந்த போது அங்கு சென்ற வர்த்தகர் அவரைத் தாக்கியுள்ளார். அதன் பின்னர் இந்த சம்பவம் தொடர்பில் பொலிஸ் நிலையத்தில் முறைப்பாடு செய்துள்ளார்.

தமது குடும்ப வாழ்க்கையை சீர்குலைத்ததாகத் தெரிவித்து வர்த்தகர் நீதிமன்றில் வழக்குத் தாக்கல் செய்திருந்தார்.

மாவட்ட மற்றும் மேன்முறையீட்டு நீதிமன்றங்களில் அளிக்கப்பட்ட தீர்ப்பினை உச்ச நீதிமன்றமும் உறுதி செய்துள்ளது. இதன்படி குறித்த விமானப் பொறியியலாளர், குறித்த வர்த்தகருக்கு 150 லட்ச ரூபா நட்ட ஈடாக வழங்க வேண்டுமென உத்தரவிடப்பட்டுள்ளது.

தற்கொலை செய்து கொள்ள போவதாக காதலிக்கு குறுஞ் செய்தி அனுப்பி அறிவித்த காதலன், தனது வீட்டிற்குள் சேலை பயன்படுத்தி சுருக்கிட்டு தற்கொலை செய்து கொண்டுள்ளதாக கந்தப்பளை பொலிஸார் தெரிவித்தனர்.

கந்தப்பளை கொங்கொடி தோட்டத்தை சேர்ந்த இளைஞரே இவ்வாறு தற்கொலை செய்து கொண்டுள்ளார். கடந்த 11ம் திகதி வீட்டில் எவரும் இல்லாத சூழ்நிலையில் அவர் தற்கொலை செய்துள்ள பொலிஸார் கூறினர்.

குறித்த இளைஞர் சில வருடங்களுக்கு முன்னர் கொழும்புக்கு தொழில் தேடி சென்றுள்ளதுடன் அங்கு ஒரு பெண்ணை சந்தித்துள்ளார்.

பெண் வீட்டாரின் எதிர்ப்பு காரணமாக 10 நாட்களுக்கு முன்னர் தனது சொந்த இடத்திற்கு திரும்பியதாக இளைஞரின் தாய் பொலிஸாரிடம் கூறியுள்ளார்.

தோட்டத்தில் வேலை முடிந்து மாலை 4 .30 அளவில் வீட்டுக்கு திரும்பிய போது தனது மகன் வீட்டில் தூக்கில் தொங்கிய நிலையில் காணப்பட்டதாக தாய் குறிப்பிட்டுள்ளார்.

யாழ்ப்பாண மக்களுக்கு தண்ணீர் கொடுக்க வேண்டாம் என யாரும் சொல்லவில்லை கிளிநொச்சியில் உள்ள தண்ணீர் தேவைகளை பூர்த்தி செய்து விட்டு யாழ்ப்பாணத்திற்கு தண்ணீர் கொண்டு செல்லுங்கள் என்றே சொல்கிறோம் என பாராளுமன்ற உறுப்பினர் சி.சிறிதரன் தெரிவித்துள்ளார்.

யாழ் ஊடக அமையத்தில் நேற்று மதியம் நடைபெற்ற ஊடகவியலாளர் சந்திப்பிலையே அவர் இதனை தெரிவித்தார்.
அவர் மேலும் தெரிவிக்கையில்..

கிளிநொச்சி இரணைமடு குளத்தில் இருந்து யாழ்ப்பாணத்திற்கு தண்ணீர் கொண்டுவர உள்ளதாகவும் அதனை கிளநொச்சி மக்கள் எதிர்ப்பதாகவும் சொல்கிறார்கள். ஆனால் உண்மை அதுவல்ல, இரணைமடு குளத்து நீர் கிளிநொச்சிக்கே போதாது உள்ளது.

அந் நீரினை கொண்டு இப்பொழுது 8 ஆயிரம் ஏக்கர் விவசாயமே செய்ய முடிகிறது. அதனை 16 ஆயிரம் ஏக்கராகவோ 24 ஆயிரம் ஏக்கராகவோ விவசாயம் செய்யும் அளவுக்கு தண்ணீர் சேகரித்து விட்டு யாழ்ப்பாணத்திற்கு தண்ணீர் கொண்டு செல்லாம்.

யாழ்ப்பாணத்தை பொருத்தவரை தண்ணீர் பற்றாக்குறை உண்டு என யாருமே இதுவரை கூறவில்லை. யாழ்ப்பாணத்தில் காணப்படும் நன்னீர் நிலைகளை பாதுகாத்து சீரமைத்தாலே யாழ்ப்பான தண்ணீர் பிரச்சினைகளுக்கு தீர்வு கிடைக்கும்.

யாழ்ப்பாணத்தில் உள்ள இதுவரை ஆழமே காணப்படாத நிலாவரை கிணறு, வழுக்கையாறு மற்றும் இடியுண்டு குளம் ஆகியவற்றை புனரமைத்து நன்னீர் ஆக்கலாம். அதேபோல தொண்டமனாறு அரியாலையில் உள்ள நன்னீர் தடுப்பு சுவர்களை புனரமைப்பதன் மூலம் நிலத்தடி நீரை பாதுகாக்கலாம்.

இவ்வாறு யாழ்ப்பாண நீர்நிலைகளை முகாமைத்துவம் செய்யாமல் யாழ்ப்பாண உணவு களஞ்சியமான கிளிநொச்சி விவசாயத்தை அழித்து யாழ்ப்பாணத்திற்கு தண்ணீர் கொண்டு வர முயற்சிக்கின்றார்கள்.

கிளிநொச்சியில் பாரிய தண்ணீர் பிரச்சினை உள்ளது. கிளிநொச்சி மாவட்டத்தில் உள்ள பூநகரி பிரதேசத்தில் வாழும் 6 ஆயிரம் குடும்பங்களுக்கு நன்னீர் இல்லை. அதேபோல கிளிநொச்சி மாவட்டத்தில் உள்ள இன்னும் சில கிராமங்களுக்கு நன்னீர் இல்லை விவசாயத்திற்கு நீர் போதாமல் உள்ளது .

அதுமட்டுமின்றி இம்முறை மழைவீழ்ச்சி போதாமையால் இரணைமடு குளத்தில் 15 அடி தண்ணீரே சேகரிக்கப்பட்டுள்ளது. இது இம்முறை சிறு போக நெற்செய்கைகே போதாது.

யாழ்ப்பாணத்திற்கு தண்ணீர் கொண்டு செல்லப்பட்ட பின்னர் கோடை காலத்தில் குளத்தில் நீர் இல்லாத போது பயிரா? உயிரா? என்ற பிரச்சினை உருவாகும். பின்னர் இந்தியாவில தமிழ் நாட்டுக்கும் கேரளாவுக்கும் உள்ளது போல இங்கும் பிரச்சினைகள் உருவாகும்

யாழ்ப்பாணத்தில் கோவில் வீதியில் மற்றும் அச்சுவேலியில் போத்தல்களில் தண்ணீர் அடைத்து விற்கும் தொழிற்சாலைகள் இயங்குகின்றன. இந் நிலையில் யாழ்ப்பாணத்திற்கு நன்னீர் தட்டுப்பாடு என கூறி இரணைமடுவில் இருந்து யாழ்ப்பாணத்திற்கு தண்ணீர் கொண்டுவர முயல்கிறார்கள்.

எனவே எமது சுதேசியம் அழிக்கப்பட்டு பல்தேசியம் ஊடுருவ வேண்டும் என நாம் எதிர்பார்க்கிறோமா என நாம் அனைவரும் சிந்திக்க வேண்டும் என மேலும் தெரிவித்தார்.