அமெரிக்க பாடகர் ஒருவரை ஒப்பந்தம் செய்து தருவதாக கூறி 2 பேர் கோடிக்கணக்கில் தன்னை மோசடி செய்து விட்டதாக இயக்குனர் டி.ராஜேந்தர் சென்னை பொலிஸ் கமிஷனர் அலுவலகத்தில் புகார் மனு ஒன்றை கொடுத்துள்ளார்.

இயக்குனர் டி.ராஜேந்தர் சென்னை பொலிஸ் கமிஷனர் அலுவலகத்தில் அவரது குறள் டி.வி. கிரியேசன் நிறுவனம் சார்பில் இன்று புகார் மனு ஒன்றை கொடுத்தார்.

இது தொடர்பாக டி.ராஜேந்தர் கூறுகையில் எனது மகன் சிலம்பரசன் பாடி தயாரித்துள்ள லவ் ஆந்தம் என்ற இண்டர் நேஷனல் இசை ஆல்பத்துக்காக அமெரிக்காவை சேர்ந்த பிரபல பாடகர் ஏகானை ஒப்பந்தம் செய்ய முடிவு செய்தோம்.

இதற்காக தமிழகத்தில் வசித்து வரும் ராம்ஜி சோமா மற்றும் கனடாவைச் சேர்ந்த டெரிபாத் ஆகியோருடன் ஒரு ஒப்பந்தம் போடப்பட்டது.

அந்த ஒப்பந்தத்தின் படி பாடகர் ஏகானை அவர்கள் புக் செய்து தரவேண்டும் முடியாத பட்சத்தில் நான் கொடுக்கும் பணத்தை திருப்பி தர வேண்டும் ஆனால் இருவரும் அவர்கள் கூறியபடி நடந்து கொள்ளவில்லை.

இதனால் அவர்களிடம் கொடுத்த 1 லட்சத்து 60 ஆயிரம் அமெரிக்க டொலரை (1 கோடி) திருப்பிக் கேட்டேன்.

ஆனால் அவர்கள் திருப்பி தராமல் இழுத்தடித்தனர். இதற்கிடையே வேறு ஒரு நிறுவனத்தின் மூலம் பாடகர் ஏகானை நான் ஒப்பந்தம் செய்து அவரை சென்னைக்கு வரவழைத்து பாடல் பதிவுகளையும் முடித்து விட்டேன்.

இதன் பிறகுதான் ராம்ஜி சோமாவும் டெரிபாத்தும் மோசடி பேர்வழி என எனக்கு தெரியவந்தது. இது தொடர்பாக நான் அனுப்பிய வக்கீல் நோட்டீசையும் வாங்கிக் கொள்ளாமல் அவர் திருப்பி அனுப்பி உள்ளனர். இதற்கிடையே வேறு சிலரையும் இதே போல் ஏமாற்ற நினைப்பது எனக்கு தெரிய வந்துள்ளது.

இது தொடர்பாக பொலிஸ் கமிஷனர் அலுவலகத்தில் புகார் கொடுத்துள்ளேன் என்று தெரிவித்துள்ளார்.

மும்பையில் பிரபல தொலைக்காட்சி நடிகைக்கு நடு ரோட்டில் காரில் வந்த ஆசாமி தொந்தரவு கொடுத்தது தொடர்பாக பொலிசில் புகார் அளிக்கப்பட்டுள்ளது.

மும்பை பைசுல்லா பகுதியில் வசித்து வரும் தொலைக்காட்சி நடிகை அலெபியா கபாடியா(28), சனிக்கிழமை மாலை பந்த்ரா குர்லா காம்ப்ளச்சில் இருந்து வீட்டிற்கு தனது குழந்தையுடன் காரில் சென்றுகொண்டிருந்தார். உடன் அவரது தோழியும் சென்றுள்ளார்.

அப்போது ஒரு சொகுசு காரில் வந்த நபர் கபாடியாவின் காரின் அருகே தனது காரை உரசியபடி நிறுத்தினான். பின்னர், அந்த நபர் கபாடியாவிடம், நீங்கள் பேஸ்புக்கில் இருக்கிறீர்களா, நான் உங்களுடன் பேஸ்புக் நண்பராகலாமா, என்று கேட்டு நச்சரித்துள்ளார்.

இதற்கு பதிலளிக்க கபாடியா மறுத்தபோதும் விடாமல் அவருடன் பேச விரும்புவதாக அந்த நபர் கூறியுள்ளார். இதனால் அவரை புகைப்படம் எடுத்த கபாடியா பேசாமல் சென்றுவிடும்படி கூறியுள்ளார்.

இந்த மிரட்டலுக்கும் பயப்படாத அந்த நபர் மீண்டும் தொந்தரவு கொடுத்துள்ளார். பின்னர் அவர் தனது கைப்பேசியை எடுத்து உதவிக்கு சிலரை அழைத்ததும், அந்த நபர் அங்கிருந்து தப்பிச் சென்றுவிட்டார்.

இது தொடர்பாக கபாடியா காவல் நிலையத்தில் புகார் அளித்துள்ளார். மேலும் தனக்கு தொந்தரவு கொடுத்த நபரின் புகைப்படத்தை பேஸ்புக்கில் வெளியிட்டு, தான் சந்தித்த பிரச்சனை குறித்து விவரித்துள்ளார்.

தெலுங்கு திரையுலகின் பிரபல நடிகரும் தயாரிப்பாளருமான மோகன்பாபு மற்றும் நகைச்சுவை நடிகர் பிரமானந்தம் ஆகிய இருவருக்கும் 2007 மற்றும் 2009ம் ஆண்டு முறையே பத்மஸ்ரீ விருதுகள் வழங்கப்பட்டன. இந்நிலையில் கடந்த 2012ம் ஆண்டு மோகன்பாபு தயாரித்த தேனிகைனா ரெடி என்ற திரைப்படைத்தில் அவரது மகன் விஷ்ணு மஞ்சு, ஹன்சிகா மோத்வானியுடன் ஜோடி சேர்ந்து நடித்திருந்தார்.

நகைச்சுவை படமான இதில் பிரபலமான நடிகர் பிரமானந்தாவும் நடித்து இருந்தார். இந்த படத்தில் பிரமாணர்களை மாமிசம் சாப்பிடுபவர்களாக காட்டி கேவலப்படுத்தியிருப்பதாக அப்போது போராட்டம் நடந்தது. மேலும் பட நன்மதிப்பிற்காக பத்மஸ்ரீ பட்டத்தை அவர்கள் தவறாக பயன்படுத்தியதாக பாரதிய ஜனதா தலைவர் இந்திரசேனா ரெட்டி என்பவர் ஐதராபாத் உயர் நீதிமன்றத்தில் புகார் அளித்திருந்தார்.

இந்த மனுவை நேற்று நீதிபதிகள் கல்யாண் ஜோதி சென்குப்தா மற்றும் சஞ்சய்குமார் விசாரித்தனர். இதுகுறித்து நீதிபதிகள் கூறுகையில், சர்ச்சைக்குரிய இந்த படத்தின் விளம்பரத்திற்காக பத்மஸ்ரீ பட்டத்தை நடிகர் மோகன்பாபுவும், பிரமானந்தாவும் தவறாக பயன்படுத்தியிருக்கின்றனர். இது அந்த பட்டத்தை அவமதிக்கும் செயலாகும். எனவே அவர்கள் இருவரும் பத்மஸ்ரீ பட்டத்தை கவுரவமாக நீதிமன்றத்தில் ஒப்படைக்க வேண்டும் என்றும் கூறினர்.
இதுகுறித்த அடுத்த விசாரணை வரும் 30ம் திகதி நடக்கும் என்றும் நீதிபதிகள் கூறினர்.

காமசூத்ரா 3D படம் தரக்குறைவான செக்ஸ் படமல்ல. ஆஸ்கர் விருது பரிந்துரைப் பட்டியலில் உள்ள படம் என்று அதன் இயக்குநர் ரூபேஷ் பால் விளக்கம் அளித்தார்.

காமசூத்ரா 3D என்ற தலைப்பில் இயக்குநர் ரூபேஷ் பால், இந்தியிலும் ஆங்கிலத்திலும் ஒரு படம் இயக்கியுள்ளார். இந்த படத்தில் சர்ச்சைக்குரிய நடிகை ஷெர்லின் சோப்ரா, மிலிந்த் குணாஜி, கிங் மால்கான், சலிம்குமார், நாசர், மகராந்த் தேஷ்பாண்டே, மலீனா கான், சுஷ்மித்ரா முகர்ஜி உள்ளிட்டவர்கள் நடித்துள்ளனர்.

இந்த படத்தின் தலைப்பு இது ஒரு செக்ஸ் படமாக இருக்கக்கூடும் என்ற எதிர்பார்ப்பை ஏற்படுத்தி உள்ளது. இதனை படத்தின் இயக்குநர் ரூபேஷ் பால் மறுத்துள்ளார். அவர் கூறுகையில்..

இந்த படம் ஆஸ்கார் விருது பரிந்துரை போட்டியில் உள்ளது. அசல் இசைக் கோர்ப்பு, அசல் பாடல்கள் பிரிவில் இந்தப் படம் போட்டியிடுகிறது. இதுகுறித்த அறிவிப்பு ஜனவரி 16ஆம் திகதி வெளியாகிறது என்றார்.

மேலும் அவர் கூறுகையில் இந்தபடம், தவறாக மதிப்பிடப்பட்டுள்ளது. அரை நிர்வாண படங்களால் சர்ச்சைக்கு ஆளான நடிகை ஷெர்லின் சோப்ரா முக்கிய வேடத்தில் நடிப்பதாக தகவல்கள் வந்ததும் இந்தபடம் தரம் குறைந்த ஆபாசப்படமாக இருக்கலாம் எனவும் தவறாகக் கருதப்படுகிறது.

ஆனால் இதைப் பொருட்படுத்தாமல் சர்வதேச தரத்தில் நல்ல தொழில்நுட்பத்துடன் இந்த படத்தை எடுத்திருக்கிறோம். சர்வதேச நாடுகளில் நல்ல விலைக்கு முன்கூட்டியே விற்பனை ஆகி இருக்கிறது.

சென்னை எக்ஸ்பிரஸ், கிரிஷ் 3 போன்ற படங்களை விட இரண்டு மடங்கு விலைக்கு இந்த படம் விற்பனை செய்யப்பட்டுள்ளது. இந்த படம் வாத்சாயனரின் காமசூத்ரா அடிப்படையில் தயாரிக்கப்பட்டுள்ளது. ஆஸ்கார் பரிந்துரைப் போட்டியில் இருப்பதால் சிறந்த இதிகாசப்படைப்பாக அமைந்துள்ளதால் மிகுந்த எதிர்பார்ப்பை ரசிகர்களிடையே ஏற்படுத்தி உள்ளது என்றார்.

இந்த படம் பழங்கால இந்தியாவை பின்னணியாகக் கொண்டது. தனது கணவரைத் தேடி ஒரு அழகான இளவரசி கடற்பயணம் மேற்கொள்கிறாள். ஆனால் சகப் பயணி ஒருவருடன் அவள் மேற்கொள்ளும் இந்த பயணம், அவளது உடல், மனம், ஆன்மா என அத்தனையையும் புரட்டிப்போட்டு விடுகிறது. அது எப்படி என்பதை மையக் கருத்தாகக் கொண்டுதான் இந்த படம் எடுக்கப்பட்டுள்ளதாக தகவல்கள் கூறுகின்றன.