தற்போது தமிழ் சினிமாவில் பிஸியாக யார் இருக்கிறார்கள் என்று கேட்டால், அது கண்டிப்பாக விஜய் சேதுபதி தான். சுந்தரபாண்டியன் படத்திற்கு பிறகு, பீட்சா, நடுவுல கொஞ்சம் பக்கத்த காணோம், சூது கவ்வும் என தொடர்ச்சியாக ஹாட்ரிக் ஹிட் அடித்த விஜய் சேதுபதி அதை தொடர்ந்து தொடர்ச்சியாக 5க்கும் மேற்பட்ட படங்களில் நடித்து வருகிறார்.

பண்ணையாரும் பத்மினியும், இதற்குதானே ஆசைப்பட்டாய் பாலகுமாரா, ரம்மி, சங்குதேவன் உள்ளிட்ட படங்களில் தற்போது நடித்து வரும் விஜய் சேதுபதி, அதைதொடர்ந்து இன்னும் பல படங்களில் ஒப்பந்தமாகி கொண்டு இருக்கிறாராம்.

இயக்குனர் சேரன் மகள் தாமினி, சூளைமேட்டை சேர்ந்த சந்த்ரு என்ற வாலிபருடன் காதல் வயப்பட்டு கடந்த 2 வாரங்களுக்கு முன்னர் வீட்டை விட்டு வெளியேறினார். சந்த்ருவின் குடும்பத்தினருடன் சென்னை பொலீஸ் கமிஷனர் அலுவலகத்துக்கு வந்து புகார் கொடுத்த அவர் சந்த்ருவை கொலை செய்ய சேரன் முயற்சி செய்வதாக பரபரப்பான குற்றச்சாட்டை கூறினார்.

இதைதொடர்ந்து சேரன், பொலீசில் அளித்த புகாரில் சந்த்ருவின் நடவடிக்கை சரியில்லை என்றும், எனவேதான் அவரது காதலை நான் ஏற்றுக் கொள்ளவில்லை என்றும் கூறியிருந்தார். இது தொடர்பாக கண்ணீர் மல்க பேட்டி அளித்த சேரன் “தனது மகளுக்கு கணவனாக வருபவர் நல்லவராக இருக்க வேண்டும் என்றுதான் நான் நினைக்கிறேன். காதலுக்கு நான் எதிரி இல்லை” என்று தெரிவித்தார்.

இதையடுத்து சேரனின் மகள் தாமினிக்கு பெண் பொலீசார் கவுன்சிலிங் அளித்தனர். கல்லூரி படிப்பை முடித்த பின்னர் காதலை பற்றி சிந்திக்கலாம் என்று அறிவுரை கூறினர். ஆனால் தாமினி காதலன் சந்த்ருவுடன்தான் செல்வேன் என்று பிடிவாதமாக கூறினார்.
இதனால் அவரை பொலீசார் காப்பகத்தில் தங்க வைத்தனர்.

இதற்கிடையே சந்த்ருவின் தாய் உயர்நீதிமன்றத்தில் ஹேபியஸ் கார்பஸ் மனு ஒன்றை தாக்கல் செய்தார். இதனை விசாரித்த நீதிபதிகள் 2 வாரங்களுக்கு தாமினி, தான் படித்த பள்ளி தலைமை ஆசிரியரின் வீட்டில் தங்கி இருக்க உத்தரவிட்டனர்.

இதன்படி கடந்த 10 நாட்களுக்கும் மேலாக அவர் தனது குடும்பத்தினரை பிரிந்து வெளியில் தங்கியுள்ளார். இந்நிலையில் இந்த வழக்கு இன்று மீண்டும் விசாரணைக்கு வருகிறது. அப்போது தாமினி நீதிமன்றத்தில் ஆஜர்படுத்தப்படுகிறார்.

தனது மகள் மனம் மாறி எப்படியும் தன்னுடன் வந்து சேர்ந்து விடுவாள் என்று சேரன் மிகுந்த எதிர்பார்ப்புடன் காத்திருக்கிறார். தலைமை ஆசிரியரின் வீட்டில் தாமினி தங்கி இருந்த போது அவருக்கு தினமும் கவுன்சிலிங் அளிக்கப்பட்டுள்ளது. இதனால் தாமினி மனம் மாறியுள்ளாரா? என்பது தெரியவில்லை.

இன்று நீதிமன்றத்தில் ஆஜர் படுத்தப்படும் போது நீதிபதிகள் அவரிடம் யாருடன் செல்ல விரும்பம்? என்று கேட்க உள்ளனர். இதற்கு தாமினி என்ன பதில் சொல்லப் போகிறார் என்ற எதிர்பார்ப்பு ஏற்பட்டுள்ளது.
காதலை மறந்து தந்தை சேரனுடன் தாமினி செல்வாரா? இல்லை குடும்பத்தினரை உதறிவிட்டு காதலனை கரம் பிடிப்பாரா? என்பதை பொறுத்திருந்துதான் பார்க்க வேண்டும்.

இன்றுடன் தாமினியின் காதல் போராட்டம் முடிவுக்கு வரும் என்று தெரிகிறது.

கடந்த 9 ஆம் தேதியே ரிலீஸ் ஆகியிருக்க வேண்டிய விஜய்யின் தலைவா சில தலையீடுகளின் காரணமாக தள்ளிப் போய், ஆகஸ்ட் 20 நாளை ரிலீசாகிறது.

9 ஆம் தேதி படத்திற்கு இருந்த எதிர்பார்ப்பு 20 ஆம் தேதி இருக்குமா என்ன? எதிர்பார்ப்பு அன்று இருந்ததைக் காட்டிலும் குறைந்திருக்கிறது.

இதற்கு காரணம், படத்தை எல்லோரும் திருட்டு டிவிடியில் பார்த்துவிட்டார்கள், இணையதளத்தில் பார்த்து விட்டார்கள் என்ற காரணங்களை சொல்லிவிட்டுப் போய்விட முடியாது. காரணம், படத்தை தியேட்டரில் பார்ப்பவர்கள் என்று இருந்தாலும் தியேட்டரில்தான் பார்ப்பார்கள், அதே நேரத்தில் அடுத்தவன் உழைப்பை சுரண்டி வாழ்பவர்கள் திருட்டு விசிடியில் பார்த்துவிடுவார்கள்.

படத்தின் எதிர்பார்ப்பு கொஞ்சம் குறையக் காரணம் படத்தினைப் பற்றிய எதிர்மறையான விமர்சனங்கள்தான்.

ஆனாலும் படத்திற்கான புக்கிங் ஆரம்பித்து இப்போது வரைக்கும் முதல் நாள், இரண்டாம் நாள் காட்சிகள் பல திரையரங்குகளில் டிக்கெட்டுகள் விற்றுத் தீர்ந்து விட்டன.பரபரப்பாக விற்பனை ஆகிக் கொண்டும் இருக்கின்றன.

தலைவா படத்தைப் போன்றே விஸ்வரூபமும் தாமதமாகத்தான் ரிலீஸ் செய்தார்கள். ஆனால் அந்தப் படத்திற்கு இந்த அளவுக்கு திருட்டு விசிடிகள் வரவில்லை என்பது குறிப்பிடத்தக்கது.

மேலும் ஆரோ தொழில்நுட்பம் போன்றவற்றை கமல் பயன்படுத்தியிருந்ததால் படத்தை திரையரங்குகளில் பார்க்க வேண்டும் என்று நினைத்தவர்கள் ஏராளம். அதுவும் கூட விஸ்வரூபம் பெரும் வெற்றியடைய ஒரு காரணம்.

தலைவாவை எதிர்மறை விமர்சனங்களைத் தாண்டி, ரசிகர்கள் வெற்றியடைய வைப்பார்களா என்பதைப் பொறுத்திருந்துதான் பார்க்க வேண்டும்!

துருவநட்சத்திரம் கதையில் சீயான் விக்ரம் நடிக்கப்போவதாக தகவல்கள் வெளியாகியுள்ளன.
விக்ரம் நடிப்பில், கண்ணன் இயக்கத்தில் பூஜை போடப்பட்ட படம் ‘கரிகாலன்.’

சில நாட்கள் படப்பிடிப்பு நடைபெற்ற பின்பு திடீரென அந்தப் படத்தை நிறுத்திவிட்டார்கள்.

தற்போது ஷங்கர் இயக்கத்தில் ‘ஐ’ படத்தில் நடித்து வருகிறார் விக்ரம்.

‘கரிகாலன்’ படத்தில் நடிப்பதற்காக விக்ரமுக்கு கொடுத்த சம்பளத்தை திருப்பி வாங்காமல், அடுத்த படத்திற்கு புக் செய்துவிட்டது சில்வர் லைன் பிலிம் பேக்டரி.

இந்தப் படத்தை கெளதம் மேனன் இயக்கப் போகிறார்.

கதாநாயகியாக நடிக்க த்ரிஷாவிடம் பேச்சுவார்த்தை நடந்து வருகிறது.

அநேகமாக சூர்யாவுக்காகத் தயார் செய்த ‘துருவ நட்சத்திரம்’ கதையைத்தான் எடுக்கப் போகிறார் என்கிறார்கள்.

இந்தப் படத்திலும், தரணி இயக்கும் ‘ராஸ்கல்’ படத்திலும் ஒரே நேரத்தில் நடிக்கப் போகிறாராம் விக்ரம்.

இயக்குனர் பாரதிராஜாவின் மகன் மனோஜ் இயக்கத்தில் சிவகார்த்திகேயன் நடிக்க இருப்பதாகத் தகவல் வெளியாகியுள்ளது.

தான் இயக்கிய ‘தாஜ்மகால்’ படம் மூலம் மனோஜை ஹீரோவாக அறிமுகப்படுத்தினார் பாரதிராஜா.

அதன் பின்பு ‘சமுத்திரம்’, ‘கடல் பூக்கள்’, ‘ஈரநிலம்’ என சில படங்களில் நடித்தார். ஆனால், எதுவுமே கைகொடுக்கவில்லை.

நடிக்க வருவதற்கு முன்பே இயக்குனர் மணிரத்னத்திடம் ‘பம்பாய்’ படத்தில் உதவியாளராகப் பணிபுரிந்துள்ளார் மனோஜ்.

பின்பு, பாரதிராஜா இயக்கிய ‘பொம்மலாட்டம்’ படத்தில் அப்பாவிடமே உதவி இயக்குனநராகப் பணியாற்றினார்.

இதனைத் தொடர்ந்து ரஜினி நடிப்பில் ஷங்கர் இயக்கிய ‘எந்திரன்’ படத்திலும் உதவி இயக்குனராகப் பணிபுரிந்துள்ளார்.

இப்படி உதவி இயக்குநர், நடிகர் என இரட்டைக் குதிரையில் சவாரி செய்துவந்த மனோஜ், இயக்குனராகக் களம் இறங்குகிறார்.

தான் இயக்கும் முதல் படத்தில் கதாநாயகனா சிவகார்த்திகேயனை புக் செய்துள்ளாராம் மனோஜ்.