இந்திய கிரிக்கெட் அணியின் துணை கேப்டனாக வீராட் கோலி சிம்பாப்வே சுற்றுப்பயணத்தில் கேப்டனாக பணியாற்றினார். டோனிக்கு ஓய்வு கொடுக்கப்பட்ட அந்த போட்டியில் இந்தியா 5 ஆட்டத்திலும் வென்று முத்திரை பதித்தது.

இந்த நிலையில் வீராட் கோலியை கேப்டன் டோனி பாராட்டியுள்ளார். சிறந்த கேப்டனாக உருவாகுவார் என்று கூறியுள்ளார். இது குறித்து டோனி கூறியதாவது:–

கடந்த ஒரு ஆண்டில் வீராட் கோலியிடம் மிகப்பெரிய மாற்றம் ஏற்பட்டுள்ளது. ஆக்ரோஷத்துடன் செயல்படுவது அவரை பற்றிய சிறந்த விஷயமாக கருதப்படுகிறது.

இது கேப்டன் பதவியிலும் அவருக்கு உதவியாக இருக்கிறது. அவரது அணுகுமுறை பீல்டிங்கில் நல்ல மாற்றத்தை தந்தது. சிம்பாப்வே தொடரில் அவரது செயல்பாடு மிகவும் சிறப்பாக இருந்தது. கோலி சிறந்த கேப்டனாக உருவாகுவார்.

அனைத்து இளைஞர்களை கொண்ட அணியை நான் உருவாக்கியதாக கூறப்படுவதை ஏற்க முடியாது.

அணிக்கு தேர்வு செய்யப்படுவதற்கு உடல் தகுதி மற்றும் திறமையே காரணம். அதிக வயது என்பது பிரச்சினை இல்லை. 40 அல்லது42 வயது வீரராக இருந்தாலும் உடல் தகுதியே முக்கியம். உடல் தகுதியுடன் இருந்தால் தான் சிறப்பாக பீல்டிங் செய்ய முடியும்.

அனைத்து காலக்கட்டத்திலும் விளையாடிய சிறந்த வீரர்களை வைத்து கனவு அணியை தேர்வு செய்வது கடினம். அதனால் கனவு அணியை தேர்வு செய்ய மாட்டேன். இந்திய அணிக்காக விளையாடிய அத்தனை வீரர்களையும் மதிக்க வேண்டும். இவ்வாறு டோனி கூறியுள்ளார்.

நியூசிலாந்து கிரிக்கெட் வீரர் ஜெசி ரைடர். சர்ச்சைகளில் சிக்கி கொள்வது அவருக்கு வாடிக்கையான ஒன்றாகும்.

கடந்த சில மாதங்களுக்கு முன்பு ரைடர் மதுபான பாரில் குடித்துவிட்டு ரகளையில் ஈடுபட்டார். இதுதொடர்பான மோதலில் அவர் கடுமையாக தாக்கப்பட்டார். ஆபத்தான நிலைக்கு சென்று அவர் உயிர் பிழைத்து வந்தது ஆச்சரியமே.

இந்த நிலையில் ஜெசி ரைடர் ஊக்க மருந்து பயன்படுத்திய தகவல் தெரிய வந்துள்ளது. கடந்த மார்ச் மாதம் உள்ளூர் போட்டியில் விளையாடியபோது ஊக்க மருந்து பயன்படுத்தியது சோதனையில் தெரியவந்தது. உடல் எடையை குறைக்க அவர் ஊக்க மருந்தை உட்கொண்டு இருப்பதாக கூறப்பட்டது.

நியூசிலாந்து விளையாட்டு தீர்ப்பாயம் இதுதொடர்பாக விசாரணை நடத்தியது. இதில் அவர் ஊக்க மருந்து பயன்படுத்தியது உறுதி செய்யப்பட்டது.

அதன்படி நியூசிலாந்து விளையாட்டு தீர்ப்பாயம் ரைடருக்கு 6 மாதம் தடை விதித்துள்ளது. ஏப்ரல் மாதத்தில் இருந்து இந்த தடை அமுலுக்கு வந்தது. அக்டோபர் மாதத்தின் அவரது தடை முடிகிறது. அதன்பிறகு அவரால் விளையாட முடியும்.

29 வயதான ரைடர் 18 டெஸ்டில்1269 ரன் எடுத்துள்ளார். சராசரி40.93 ஆகும்.39 ஒருநாள் போட்டியில் 1,100 ரன் எடுத்துள்ளார். கடைசியாக கடந்த ஆண்டு பிப்ரவரி மாதம் சர்வதேச போட்டியில் விளையாடினார்.

பாகிஸ்தான் அணியின் முன்னணி பேட்ஸ்மேன்களில் ஒருவர் உமர் அக்மல். இவர் வெஸ்ட்இண்டீசில் நடைபெறும் கரீபியன் ´லீக்´ போட்டியில் விளையாட சென்றபோது விமானத்தில் சுய நினைவு இல்லாமல் மயங்கி விழுந்தார்.

ஆண்டிகுவா மருத்துவமனையில் சேர்க்கப்பட்டு அவருக்கு பல்வேறு பரிசோதனை செய்யப்பட்டது. வலிப்பு நோயால் அவர் பாதிக்கப்பட்டு இருந்தது தெரியவந்தது.

இதைத்தொடர்ந்து உமர் அக்மலுக்கு மருத்துவ பரிசோதனை செய்ய பாகிஸ்தான் கிரிக்கெட் வாரியம் ஏற்பாடு செய்துள்ளது. வெஸ்ட்இண்டீசில் இருக்கும் அவரை உடனடியாக அனுப்பி வைக்குமாறு கேட்டுக்கொள்ளப்பட்டுள்ளது.

குடிபோதையில் ரகளை செய்த பனேசர், சசக்ஸ் கவுண்ட் அணியிலிருந்து நீக்கப்பட்டுள்ளார்.

இங்கிலாந்து அணியின் சுழற்பந்து வீச்சாளரான மொன்டி பனேசர்(வயது 31) இந்திய வம்சாவளி வீரர் ஆவார்.

இவரது மோசமான பார்ம் காரணமாக ஆஷஸ் தொடருக்கான இங்கிலாந்து அணியில் சேர்க்கப்படவில்லை.

சமீபத்தில் கடந்த 5ம் திகதி போதையில் இரவு கிளப் காவலாளிகள் மீது சிறுநீர் கழித்து மோசமாக நடந்து கொண்டதாக குற்றம் சாட்டப்பட்டது.

இதனையடுத்து பனேசருடனான, சசக்ஸ் கிளப் ஒப்பந்தத்தை முடித்து கொள்ள முடிவெடுக்கப்பட்டது.

இதுகுறித்து அவர் கூறுகையில், கடந்த 2010ம் ஆண்டு முதல் சசக்ஸ் அணியில் விளையாடி வருகிறேன்.

இந்த போட்டிகளில் எனது திறமையை வெளிப்படுத்தியதால், இங்கிலாந்து அணியில் இடம்பெறும் வாய்ப்பு கிடைத்தது.

ஆனால் இந்த ஆண்டு களத்துக்கு வெளியே நடந்த சில செயல்களால் ஏமாற்றமே மிஞ்சியது.

இதற்காக எனது சசக்ஸ் கிளப் நிர்வாகம் நண்பர்களிடமும், ரசிகர்களிடமும் மன்னிப்பு கேட்டு கொள்வதாக தெரிவித்துள்ளார்.

சம்பியன்ஸ் லீக் டுவென்டி டுவென்டி தொடரில் இந்தியன் பிறீமியர் லீக் அணியிலா அல்லது தனது நாட்டைப் பிரதிநிதித்துவப்படுத்தும் அணியையா பிரதிநிதித்துவப்படுத்துவது என்ற தெரிவு வீரர்களுக்குக் கிடையாது என இலங்கை அணியின் வீரர் குமார் சங்கக்கார தெரிவித்துள்ளார்.

இடம்பெறவுள்ள சம்பியன்ஸ் லீக் டுவென்டி டுவென்டி தொடரில் குமார் சங்கக்கார பங்குபற்றிய இரண்டு அணிகளான சண் றைசர்ஸ் ஹைதராபாத், கந்துரட்ட அணி ஆகியன தகுதிபெற்றுள்ளன.

இதில் எந்த அணியில் குமார் சங்கக்கார பங்குபற்றுவார் என்ற சந்தேகம் காணப்படும் நிலையில், இதுகுறித்துக் கருத்துத் தெரிவித்த குமார் சங்கக்கார, இது தொடர்பான முடிவை எடுக்கும் தெரிவு வீரர்களுக்குக் கிடையாது எனக் குறிப்பிட்டார்.

இந்தியன் பிறீமியர் லீக் ஒப்பந்தத்தின் படி சம்பியன்ஸ் லீக் தொடருக்கு வீரரொருவரின் இரண்டு அணிகள் தகுதிபெற்றால், அந்த வீரரினைத் தெரிவுசெய்யும் முதன்மைத் தெரிவு ஐ.பி.எல் அணிக்கே காணப்படும். இதனடிப்படையில் குமார் சங்கக்கார தொடர்பான தெரிவை சண் றைசர்ஸ் ஹைதராபாத் அணியே எடுக்க வேண்டிய நிலை காணப்படுகிறது.

குமார் சங்கக்காரவை சண் றைசர்ஸ் அணி தெரிவு செய்தால் அவ்வணி சார்பாக குமார் சங்கக்கார பங்குபற்றுவார் என்பதோடு, கந்துரட்ட அணிக்கு 150,000 ஐக்கிய அமெரிக்க டொலர்கள் அவ்வணியால் வழங்கப்படும் என்பது குறிப்பிடத்தக்கது.