இணையத்தில் தனது பெயரில் மோசடிகள் நடப்பதாக நடிகர் கார்த்தி கூறினார். பிரியாணி பாடல்களை திருடி நெட்டில் யாரோ வெளியிட்டு விட்டதாக சமீபத்தில் தான் சி.பி.சி.ஐ.டி. போலீசுக்கு போய் புகார் அளித்து விட்டு வந்தார். தற்போது சமூக வலைத்தளங்களான பேஸ்புக், டுவிட்டரிலும் தனது பெயரில் போலி கணக்குகள் துவங்கப்பட்டு உள்ளதாக வருத்தப்பட்டார்.

நான் டுவிட்டர், பேஸ்புக் போன்ற சமூக வலைத்தளங்கள் எதிலும் இல்லை. ஆனாலும் என் பெயரில் நிறைய போலி கணக்குகள் உள்ளன. இந்த போலிகளை நம்பி ரசிகர்கள் ஏமாற வேண்டாம் என்று கேட்டுக் கொள்கிறேன்.

என் பெயரை பயன்படுத்தி பணம் வசூலிப்பதாகவும் ரசிகர் ஒருவர் மூலம் தெரிய வந்தது. இதில் எனக்கு எந்த சம்பந்தமும் இல்லை. அகரம் போன்ற அமைப்புகளுக்கு நான் நிதி திரட்டும் பணிகள் எதையும் செய்யவில்லை. யாரோ என் பெயரை தவறாக பயன்படுத்தி மோசடி செய்வது தெரிகிறது. இதனை மக்கள் புரிந்து கொள்ள வேண்டும் என்று கேட்டுக் கொள்கிறேன் என்று கார்த்தி கூறினார்.

பிரியாணி படத்தின் பாடல்களை வருகிற 31ம் திகதி விழா நடத்தி வெளியிட கார்த்தியும் இயக்குனர் வெங்கட்பிரபுவும் திட்டமிட்டனர். ஆனால் பாடல்கள் இணையத்தில் வெளியாகி விட்டதால் இன்றே பாடல் சி.டி.க்கள் கடைகளில் விற்பனைக்கு வந்தன.

ஜோன்ஆபிரகாம் நடித்த மெட்ராஸ் கபே படம் இந்தி, தமிழ் மொழியில் வருகிற 23ம் திகதி ரிலீசாகிறது. விடுதலைப்புலிகளை தீவிரவாதிகளாக இப்படத்தில் சித்தரித்து இருப்பதாக குற்றம் சாட்டப்பட்டு உள்ளது. எனவே படத்தை தடை செய்ய வேண்டும் என்று எதிர்ப்புகள் கிளம்பியுள்ளது.

இதில் ஜோன் ஆபிரகாம் இந்திய “ரோ” அதிகாரியாக வருகிறார். கதாநாயகி நர்கிஸ் பக்ரி இங்கிலாந்து பத்திரிகை நிருபராக வருகிறார். அஜய் ரத்னம் பிரபாகரன் கரக்டரில் நடித்துள்ளார். பியூஷ் பாண்டே இந்திய அமைச்சரவை செயலாளராக வருகிறார். லீனா மரியா, டினு ஆகியோர் தமிழ் அகதிகளாக வருகின்றனர்.

இலங்கையில் அஜய் ரத்னம் விடுதலைப் புலிகளுக்கு யுத்த வியூகம் அமைத்து கொடுப்பது போன்றும் அவரை பிடிக்க ஜோன் ஆபிரகாம் துப்பறிவது போன்றும் காட்சிகள் இடம் பெற்றுள்ளதாக கூறப்படுகிறது. தீவிரவாதியாக சித்தரிக்கப்பட்ட பிரபாகரன் வேடத்தில் அஜய்ரத்னம் நடித்ததற்கு இந்து மக்கள் கட்சி எதிர்ப்பு தெரிவித்து உள்ளது.

அக்கட்சியின் சென்னை மண்டல தலைவர் முத்து ரமேஷ் வெளியிட்ட அறிக்கையில் பிரபாகரன் விடுதலை போராட்ட வீரன். தமிழர்களின் அடையாளம். அப்பாவி சிங்களர்களை பிரபாகரன் கொன்றது இல்லை. பிரபாகரனை தீவிரவாதியாக்கி மெட்ராஸ் கபே படத்தை எடுத்துள்ளனர். இந்த படத்தில் பிரபாகரன் வேடத்தில் அஜய்ரத்னம் நடிக்க ஒப்புக்கொண்டது கண்டிக்கத்தக்கது.

இதில் நடிக்க மாட்டேன் என்ற அவர் மறுத்து இருக்க வேண்டும். ஆனால் அதை அவர் செய்யவில்லை. அஜய்ரத்னம் படங்களை தமிழர்கள் புறக்கணிக்க வேண்டும். இயக்குனர்கள் புதுப்படங்களில் அவரை ஒப்பந்தம் செய்யக்கூடாது என்று குறிப்பிட்டு உள்ளார்.

ரஜினி சினிமாவுக்கு வந்து 38 வருடங்கள் ஆகிறது. இன்று நாடே சுப்பர் ஸ்டார் என கொண்டாடும் அவரது ஆரம்ப கால வாழ்க்கை கரடுமுரடானது.

சிவாஜிராவ் கெய்க்வாட் ஆக பெங்களூரில் வசித்த காலங்கள் கஷ்டமாகவே நகர்ந்தன. இதுகுறித்து சென்னை தின விழாவில் நடிகர் மோகன்ராமன் பேசிய விவரம் வருமாறு:–

ரஜினி பார்த்த முதல் வேலை ஆபீஸ் பியூன். தொடர்ந்து நிறைய சிறுசிறு வேலைகளில் இருந்தார். அதன் பிறகு கண்டக்டர் ஆனார்.
ரஜினி பணியாற்றிய பஸ்சில் ராஜ்பகதூர் டிரைவராக இருந்தார். அவருக்கு சினிமா பார்க்க பிடிக்கும். இருவரும் ஒரே நாளில் லீவு போட்டுக் கொண்டு சிவாஜி கணேசன் படம் பார்க்க போய் விடுவார்கள்.

ரஜினி நாடகங்களில் நடித்தார். அவரது நடிப்பு ஆர்வத்தை ராஜ்பகதூர் ஊக்குவித்தார். ரஜினி நடிப்பு கல்லூரியில் சேர்ந்து நடிப்பதற்கும் அவரே பண உதவி செய்தார். கட்ட பொம்மன் படத்தில் உள்ள வசனங்களை பேசி பயிற்சி எடுத்தார்.

டைரக்டர் கே.பாலச்சந்தர் ஒருநாள் ரஜினி படித்த கல்லூரிக்கு சென்றார். அங்கு ரஜினி வேகமாக பேசி நடித்த ஸ்டைல் அவருக்கு பிடித்தது. அபூர்வ ராகங்கள் படத்தில் நடிக்க வாய்ப்பு கொடுத்தார்.

அதன் பிறகு சிவாஜி ராவ் கெய்க்வாட் என்ற பெயரை ரஜினிகாந்த் என மாற்றினார் பாலச்சந்தர். மேஜர் சந்திரகாந்த் என்ற பெயரில் படம் எடுத்து இருந்தார். அந்த தலைப்பை மனதில் வைத்தே ரஜினிகாந்த் என்ற பெயரை தேர்வு செய்தார்.

தியாகராயநகரில் உள்ள கிருஷ்ணவேணி தியேட்டரில் டிக்கெட் வாங்கிதான் முதலாவதாக நடித்த படத்தை பார்க்க போனார். யாராவது தன்னை அடையாளம் கண்டு கொள்கிறார்களா என்று சுற்று முற்றும் பார்த்தார்.

10 வயது சிறுமி மட்டும் அவரை அடையாளம் கண்டார். அந்த சிறுமிதான் ரஜினியின் முதல் ரசிகை. 1975 மார்ச் 27ம் திகதி ஹோலி பண்டிகை அன்றுதான் ரஜினிகாந்த் பெயரை பாலச்சந்தர் சூட்டினார். அந்த நாளைதான் சூப்பர் ஸ்டார் பிறந்த நாளாக கொண்டாட வேண்டும்.

ரஜினி படப்பிடிப்பில் அடிக்கடி சிகரெட்டை மேலே சுண்டி விட்டு வாயில் பிடித்து புகை பிடிப்பது உண்டு. இந்த ஸ்டைல் பாலச்சந்தரை கவர்ந்தது. தனது படங்களில் அதை பயன்படுத்தினார்.

ரஜினிக்கு பிடித்த பாடல் ரா…ரா.ரா. ராமையா எட்டுக்குள்ள உலகம் இருக்கு ராமையா.இவ்வாறு அவர் பேசினார்.

கதாநாயகனர்கள் எல்லோரும் ஆரம்பத்தில் மென்மையான கரக்டர்களில் நடித்தே உயர்ந்தார்கள். ஆனால் ரஜினி வில்லனாக இருந்து கதாநாயகனாக சினிமாவுக்கு வருவதற்கு முன் மேடை நாடகததில் துரியோதனனாக நடித்தார்.

மூன்று முடிச்சு படத்தில் வில்லன் வேடம். பிறகு புவனா ஒரு கேள்விக்குறி, ஆறிலிருந்து அறுபது வரை படங்களில் மென்மையான கரக்டரில் வந்தார். பில்லா படத்துக்கு பிறகுதான் அக்சன் ஹீரோ ஆனார்.

பெர்னடைன் டிசோசா என்ற பெண் தனது சிறுவயது முதலே அமிதாப்பின் பரம ரசிகையாக இருந்து வருகிறார். தற்போது வரும் 18ம் திகதி 100 வயதை எட்டும் இவர், முதுமை காரணமாக வரும் அல்சைமர் என்னும் மறதி நோயினால் பாதிக்கப்பட்டுள்ளார்.

குடும்ப உறுப்பினர்களை எல்லாம் மறந்துவிட்ட நிலையிலும் அவருக்கு அமிதாப்பின் பெயர் மட்டும் நினைவில் இருக்கின்றது. அவருக்கு சாப்பாடு கொடுக்கக்கூட அமிதாப் அவரை வந்து பார்க்கப் போகின்றார் என்று சொல்லியே உணவு ஊட்டுவதாக அவரது குடும்பத்தினர்கள் தெரிவித்துள்ளார்கள்.

அவரை சந்தோஷப்படுத்த விரும்பிய அவரது குடும்பத்தினர், டிசோசா பற்றி அமிதாப்பிற்கு ஒரு தகவல் அனுப்பியிருந்தனர். அவருக்கு 100 வயதாவதை ஒட்டி அமிதாப் தனது ரசிகைக்கு ஒரு பிறந்தநாள் வாழ்த்து அனுப்ப வேண்டும் என்ற கோரிக்கையையும் அவர்கள் தெரிவித்திருந்தனர்.

இத்தனை தள்ளாத வயதிலும் முதுமை மறதி நோயினால் பாதிக்கப்பட்டிருந்த போதிலும் தன்னுடைய பெயரை மட்டும் அவர் ஞாபகம் வைத்திருப்பதை அறிந்த அமிதாப் மிகவும் மனம் நெகிழ்ந்து போனார். உடனடியாக தன்னுடைய ரசிகைக்கு வீடியோ மூலம் வாழ்த்துச் செய்தியையும் அனுப்பியுள்ளார்.