நடிகர்கள் சிவகுமார், விஷால், சந்தானம், நாசர், போன்றோருக்கு மிரட்டல் கடிதங்கள் வந்துள்ளன. கையெழுத்து இல்லாமல் மொட்டை கடிதங்களாக இவை அனுப்பப்பட்டு உள்ளன. இது கோழைத்தனம் என்றும் மிரட்டல் கடிதங்கள் எழுதியவர்கள் மீது போலீஸ் மூலம் நடவடிக்கை எடுப்போம் என்றும் நடிகர் சங்கம் எச்சரித்து உள்ளது.

மிரட்டல் கடிதங்களை நடிகர்கள் தற்போது வெளியிட்டு உள்ளனர். விஷாலுக்கு அனுப்பப்பட்ட கடிதத்தில் கூறியிருப்பதாவது..

பிழைப்பு தேடி ஆந்திராவை விட்டு ஓடிவந்து தமிழ்நாட்டில் ஒண்டியது மட்டும் அல்லாமல் சூப்பர் ஸ்டாராக ஆகவும் கனவு காண்கிறாய். சொந்த தயாரிப்பில் கதாநாயகனாக நடித்தாலும் தகுதியான பொருத்தமான வேஷம் கொடுத்தவர் இயக்குனர் பாலா.

தோற்றுப்போன நடிகர்களையும் திருவிழாவில் காணாமல் போன குழந்தைகள் போல் அலைகின்ற பெயர் தெரியாத நடிகர்களையும் கூட்டமாக சேர்த்துக் கொண்டு வந்தால் நீ பெரிய ஆளா?. நாசர், சந்தானத்துடன் சேர்ந்து வந்தாலும் நீங்கள் புல்லை போன்றவர்கள். சாய்ந்ததுபோல் சாய்ந்து மழை பெய்தவுடன் திரும்பவும் தளிர் விடுவீர்கள். சங்கத்தின் நலனுக்காக உங்களை வேறொடு பிடுங்கி எறிவோம். வந்தாய் ஒண்டினாய், சொந்த படம் எடுத்து கதாநாயகனாக இருக்கிறாய் அத்தோடு இருந்துகொள் என்று குறிப்பிட்டு உள்ளது.

சந்தானத்துக்கு எழுதியுள்ள கடிதத்தில் கூறியிருப்பதாவது..

உனக்கு என்.எஸ்.கிருஷ்ணன், கே.ஏ.தங்கவேலு, காக்கா ராதாகிருஷ்ணன், நாகேஷ், சுருளிராஜன், கவுண்டமணி, சார்லி போன்ற மாபெரும் நகைச்சுவை நடிகர்கள் எங்கிருந்து வந்தார்கள் என்று தெரியுமா, தெரிந்துகொள். எங்களைபோல் நாடக நடிகர்களாக இருந்தவர்கள். நீ எந்த அட்ரசோடு யார் ஏமாந்தான் என்று நடிகனானாய். ஏதோ மக்கள் ஏமாந்தார்கள். என்று காலம் ஓட்டுகிறார்.

வீணாய் போன நாசரோடு சேர்ந்து கூச்சல் போடுகிறார். ஆனானப்பட்ட வடிவேலுவே ஓரங்கட்டப்பட்டார். நீ எம்மாத்திரம். தெருவோடு போகிற நாய்களோடு சேர்ந்து குரைப்பதை நிறுத்திக்கொள். காமெடியனுக்கு குரல்தான் முக்கியம். அந்த குரலை பிழைப்புக்காக மட்டும் பயன்படுத்து என்று குறிப்பிடப்பட்டு உள்ளது.

நாசருக்கு வந்துள்ள கடிதம் விவரம் வருமாறு..

நடிகர் சங்கத்தை காட்டிக்கொடுத்த ஒண்ணரைக் கண்ணன் குமரிமுத்துக்கு குரல் கொடுக்கிறீர்கள். சங்க நிர்வாகிகள்மீது அபாண்டமாக பழி சுமத்துகிறீர்கள். நேற்று முளைத்த நடிகர்களை சேர்த்து வைத்து சண்டைக்கு வருகிறீர்கள். இவர்களுக்கு சினிமாவில் சண்டை போடவே டூப் தேவைப்படுகிறது. ஹீரோவாகும் தகுதி இல்லை.

பிழைப்புக்காக மாநிலம் விட்டு மாநிலம் போகிறீர்கள். ஊர் ஊராக பிச்சை பாத்திரத்தை எடுத்துக்கொண்டு அலை குரல் எழுப்பினால் பாத்திரம் ஏந்த முடியாமல் போகும். தேவர் மகனில் வடிவேல் சொன்ன வாசகம் ஞாபகம் இருக்குமே என்று நினைக்கிறோம் என்று குறிப்பிடப்பட்டு உள்ளது.

இந்த கடிதங்கள் திரைப்பட நாடக நடிகர்கள் மதுரை என்ற பெயரில் இருந்து வந்துள்ளது.

இயக்குனர் டி.ராஜேந்தரின் மகள் இலக்கியா எம்.பி.ஏ. பட்டம் பெற்றவர். இவருக்கும் அபிலாஷ் சிங்கப்பூருக்கும் சென்னையில் உள்ள லீலா பேலஸ் நட்சத்திர ஹோட்டலில் கிறிஸ்தவ முறைப்படி நேற்று திருமணம் நடந்தது.

தி.மு.க.தலைவர் கருணாநிதி, பொருளாளர் மு.க.ஸ்டாலின், கருணாநிதியின் துணைவியார் ராஜாத்தி அம்மாள், முன்னாள் மத்திய மந்திரிகள் தயாநிதி மாறன், டாக்டர் அன்புமணி ராமதாஸ், தினத்தந்தி இயக்குனர் சி.பாலசுப்பிரமணியன் ஆதித்தன், மலேசிய இந்திய ஐக்கிய கட்சியின் தேசிய தலைவர் டத்தோ கே.எஸ்.நல்லா, புதிய நீதிகட்சி தலைவர் ஏ.சி.சண்முகம், இந்திய ஜனநாயக கட்சி தலைவர் பாரிவேந்தர், டி.ஆர்.பாலு எம்.பி., முன்னாள் அமைச்சர் ஆற்காடு வீராசாமி ஆகியோர் நேரில் வந்து மணமக்களை வாழ்த்தினார்கள்.

நடிகர்கள் ரஜினிகாந்த், கமல்ஹாசன், விஜய், பிரபு, விக்ரம் பிரபு, ஜெயம் ரவி, கார்த்தி, நடிகைகள் குஷ்பூ, மீனா, மும்தாஜ், பூர்ணிமா பாக்கியராஜ், இயக்குனர்கள் கே.பாலசந்தர், பாரதிராஜா, ஷங்கர், பாக்யராஜ், கே.எஸ்.ரவிகுமார், சுந்தர்.சி, வசந்த், சேரன், விஜய், பாண்டிராஜ், தமிழ் திரைப்பட தயாரிப்பாளர்கள் சங்க தலைவர் கேயார், செயலாளர்கள் ஞானவேல்ராஜா, டி.சிவா, விநியோகஸ்தர்கள் சங்க தலைவர் அருள்பதி, பட அதிபர்கள் எஸ்.தாணு, ஆர்.பி.சவுத்திரி, ஏ.எல்.அழகப்பன் மற்றும் ஏராளமான திரையுலக பிரமுகர்கள் கலந்துகொண்டு மணமக்களை வாழ்த்தினார்கள்.

அனைவரையும் டி.ராஜேந்தர், அவருடைய மனைவி உஷா ராஜேந்தர், மகன்கள் சிலம்பரசன், குறளரசன் ஆகியோர் வரவேற்றார்கள்.

ரன், சண்டக்கோழி உள்ளிட்ட பல்வேறு தமிழ் படங்களில் நடித்து பிரபலம் ஆனவர் நடிகை மீராஜாஸ்மின். கேரளாவைச் சேர்ந்த இவர் மலையாளத்திலும் முன்னணி நடிகையாக வலம் வந்தார். தற்போது தமிழில் விஞ்ஞானி என்ற படத்திலும், மலையாளத்தில் இதுக்கப்புறம் என்ற படத்திலும் நடித்து வருகிறார்.

மீராஜாஸ்மினுக்கும், மாண்டலின் இசைக்கலைஞர் ராஜேசுக்கும் இடையே காதல் என்று கிசுகிசுக்கள் வெளியானது. இருவரும் திருமணம் செய்து கொள்ளப்போவதாகவும் செய்திகள் வெளியானது.

இந்த நிலையில் மீரா ஜாஸ்மின் துபாயில் பொறியியலாளராக பணிபுரியும் அனில் ஜான் டைட்டஸ் என்பவரை நாளை (12 ம் திகதி) திருமணம் செய்து கொள்ளப்போவதாக அறிவித்தார். இது பெற்றோர் ஏற்பாடு செய்த திருமணம் என்றும் கூறினார்.

ஆனால் ஆலயத்தில் திருமணம் நடக்கும் முன்பே நேற்று முன்தினம் இரவு கொச்சியில் உள்ள மீராஜாஸ்மின் வீட்டில் அவருக்கும், அனில் ஜான் டைட்டசுக்கும் திடீரென ரகசிய பதிவு திருமணம் நடந்தது. இதற்காக சார்பதிவாளர் அவரது வீட்டுக்கே சென்று திருமணத்தை சட்டப்படி பதிவு செய்தார்.

இதற்காக கொண்டு வந்த புத்தகத்தில் மீரா ஜாஸ்மினும், அனில் ஜான் டைட்டசும் கையெழுத்திட்டனர். பின்னர் இருவரும் மாலை மாற்றி திருமணம் செய்து கொண்டனர்.

நிகழ்ச்சியில் இரு வீட்டைச் சேர்ந்த நெருங்கிய உறவினர்கள் மட்டும் கலந்து கொண்டனர். அனில் ஜான் டைட்டஸ்–மீராஜாஸ்மின் இருவரும் ரகசிய பதிவு திருமணம் செய்து கொண்டாலும் ஏற்கனவே அறிவித்தபடி இவர்களின் திருமணம் திருவனந்தபுரம் பாளையத்தில் உள்ள எல்.எம்.எஸ். ஆலயத்தில் நாளை காலை 11 மணிக்கு நடக்கும் என அவர்களின் நெருங்கிய உறவினர்கள் தெரிவித்தனர். அதன்பிறகு ஒரு மணிக்கு வரவேற்பு நிகழ்ச்சியும் நடக்கிறது.

திருமணத்துக்கு பிறகும் மீராஜாஸ்மின் சினிமாவில் தொடர்ந்து நடிப்பார் என்று தெரிகிறது. மீராஜாஸ்மினை திருமணம் செய்து கொண்ட அனில் ஜான் டைட்டஸ் திருவனந்தபுரத்தைச் சேர்ந்தவர். இவரது பெற்றோர் டைட்டஸ் – சுகுதகுமாரி. அனில் ஜான் டைட்டஸ் சென்னை ஐ.ஐ.டி.யில் பி.டெக். படித்தவர். தற்போது துபாயில் மென்பொருள் பொறியியலாளராக பணிபுரிந்து வருகிறார்.

அஞ்சான் படத்தில் சூர்யா-சமந்தா இருவரும் முதல் தடவையாக ஜோடியாக நடிக்கின்றனர். லிங்குசாமி இப்படத்தை இயக்குகிறார். இதன் படிப்பிடிப்பு மும்பை பகுதிகளில் விறுவிறுப்பாக நடக்கிறது.

அங்கு சூர்யா, சமந்தா நடித்த பாடல் காட்சியொன்றை படமாக்கினர். டான்ஸ் மாஸ்டர் ராஜுசுந்தரம் இதற்கான நடனத்தை அமைத்து கொடுத்தார். சென்னையில் இருந்து சென்ற நடன கலைஞர்களுடன் சூர்யா, சமந்தா ஆட இக்காட்சி படமாகிக் கொண்டு இருந்தது.

அப்போது மும்பையைச் சேர்ந்த இந்தி நடன கலைஞர்கள் கும்பலாக அங்கு வந்தனர். படப்பிடிப்பை நிறுத்தும்படி ஆவேசமாக கத்தியபடி கலாட்டாவில் ஈடுபட்டனர். படப்பிடிப்பு சாதனங்களை உடைக்கவும் பாய்ந்தனர். இதனால் படப்பிடிப்பில் இடையூறு ஏற்பட்டது.

நடன கலைஞர்கள் முப்பது சதவீதம் பேரை மும்பை நடன கலைஞர்கள் சங்கத்தில் இருந்துதான் பணியாற்ற தேர்வு செய்ய வேண்டும். வெளியாட்களை வைத்து படப்பிடிப்பை நடத்தக்கூடாது என்று கோஷம் போட்டார்கள்.

இதையடுத்து அஞ்சான் படக்குழுவினர் 60 ஆயிரம் அபராத கட்டணம் செலுத்தினார்கள். அதன்பிறகே படப்பிடிப்பை தொடர அவர்கள் அனுமதி அளித்தனர்.

கிழக்கே வரும் பாட்டு, ஒயிலாட்டம், முஸ்தபா உள்ளிட்ட தமிழ் படங்களில் நடித்தவர் ஷர்மிளா. இவர் 6 ஆண்டுகளுக்கு முன் ராஜேஷ் என்பவரை காதல் திருமணம் செய்து கொண்டார். இவர்களுக்கு ஐந்து வயதில் ஆண் குழந்தை உள்ளது.

இந்நிலையில், ஷர்மிளாவுக்கும், ராஜேசுக்கும் தற்போது கருத்து வேறுபாடு ஏற்பட்டு உள்ளது. கணவர் தன்னை மிரட்டுவதாக போலீஸ் கமிஷனரிடம் ஷர்மிளா புகார் அளித்துள்ளார். கணவரை விவாகரத்து செய்யவும் முடிவு செய்துள்ளார். இதுகுறித்து ஷர்மிளா கூறியதாவது..

நான் கிறிஸ்தவ பெண். என்னை இந்து மதத்துக்கு மாறும்படி கணவர் நிர்ப்பந்திக்கிறார். வெளியாட்களுடன் பேசவும் தடை போடுகிறார். என் மேல் அவர் சந்தேகப்படுகிறார். இரவில் செல்போனில் பேசி மிரட்டுகிறார். அவருடன் இனிமேல் வாழமுடியாது. எனவே அவரை விவாகரத்து செய்ய முடிவு எடுத்துள்ளேன்.

ஆரம்பத்தில் இருவரும் ஒருவருக்கொருவர் சம்மதத்துடன் பிரிய திட்டமிட்டோம். தற்போது விரைவில் அவரை விவாகரத்து செய்ய முடிவு செய்துள்ளேன். இதற்கான பணிகள் துவங்கி உள்ளன. எனது மாமியாரும் தொல்லை கொடுக்கிறார். என் குழந்தையையும் கடத்தி போய் விட்டனர். இவ்வாறு ஷர்மிளா கூறினார்.