யாழ். மாவட்டத்தில் இன்று அதிகாலை 2 மணி தொடக்கம் கடுமையான மழை பெய்து வருகின்றது. காற்றழுத்த தாழமுக்கம் காரணமாக வடமாகாணத்தின் கரையோரப் பகுதிகளில் இன்று திங்கட்கிழமை பகல் காற்றுடன் கூடிய கடும் மழை பெய்யும் என வானிலை ஆய்வு மையம் அறிவித்துள்ளது.

சீரற்ற காலநிலை காரணமாக யாழ். மாவட்டத்திலுள்ள வடமராட்சி மற்றும் தீவகக் கரையோரப் பாடசாலைகளுக்கும் முல்லைத்தீவு மாவட்டத்திலுள்ள கரையோரப் பாடசாலைகளுக்கும் இன்று திங்கட்கிழமை விடுமுறை வழங்கப்பட்டுள்ளது.

காற்றழுத்த தாழமுக்கம் காரணமாக வடமாகாண கரையோரப் பகுதிகளில் இன்று பகல் காற்றுடன் கூடிய கடும் மழை பெய்யும் என வானிலை ஆய்வு மையம் அறிவித்துள்ள நிலையிலேயே மேற்படி பாடசாலைகளுக்கு விடுமுறை வழங்கப்பட்டுள்ளது.

பத்து ரூபா நாணயக்குற்றிகள் அறிமுகம் செய்யப்பட உள்ளன. இலங்கையின் சகல மாவட்டங்களையும் பிரதிநிதித்துவம் செய்யும் வகையில் இந்த நாணயக்குற்றிகள் அறிமுகம் செய்யப்பட உள்ளன.

ஒவ்வொரு மாவட்டத்திற்கும் உரித்தான தொல்பொருள், கலாச்சார, பொருளாதார, சுற்றாடல், சமய மற்றும் சமூக விடயங்களை உள்ளடக்கிய வகையில் நாணயக்குற்றி வடிவமைக்கப்பட்டுள்ளது.

ஒரு பத்து ரூபா நாணயக்குற்றி கொழும்பு நகரத்தை பிரதிபலிக்கும் வகையிலான உருவப்படமொன்றை உள்ளடக்கியுள்ளது. கொழும்புத் துறைமுகம் மற்றும் நகர காட்சிகள் உள்ளடக்கப்பட்டுள்ளன.

இலங்கையில் சிறைக் கைதிகளின் சம்பளங்களை உயர்த்துவதற்கு அரசாங்கம் தீர்மானித்துள்ளதாக சிறைச்சாலை திணைக்களம் அறிவித்துள்ளது.

இதன்படி நாள் ஒன்றுக்கு ஒரு ரூபா சம்பளம் பெற்றுக் கொள்ளும் கைதியின் சம்பளம் 60 ரூபாவாகவும், நாள் ஒன்றுக்கு ஒரு ரூபா ஐம்பது சதம் சம்பளம் பெற்றுக் கொள்ளும் கைதியின் சம்பளம் 75 ரூபாவாகவும், நாள் ஒன்றுக்கு இரண்டு ரூபா சம்பளம் பெற்றுக் கொள்ளும் கைதியின் சம்பளம் 85 ரூபாவாகவும், நாள் ஒன்றுக்கு இரண்டு ரூபா ஐம்பது சதம் சம்பளம் பெற்றுக் கொள்ளும் கைதியின் சம்பளம் 100 ரூபாவாகவும் உயர்த்தப்படவுள்ளது.

சிறைகளில் தண்டனை அனுபவித்து வரும் கைதிகள் தண்டனைக் காலத்தை பூர்த்தி செய்து நாடு திரும்பும் போது அவர்களுக்கு வாழ்வாதாரத்தை ஏற்படுத்திக் கொடுக்கும் நோக்கில் இவ்வாறு சிறைச்சாலைகளில் பணிகள் வழங்கப்படுகின்றன.

சிறைச்சாலைகளில் தண்டனை அனுபவித்து வரும் பதினோராயிரம் கைதிகள் மேசன், சவர்க்கார தயாரிப்பு, தச்சு, அச்சு உள்ளிட்ட தொழில்களில் ஈடுபட்டு வருகின்றமை குறிப்பிடத்தக்கது.

மீனவர் பிரச்சனை பற்றி பேச்சுவார்த்தை நடத்துவதற்காக இந்திய மத்திய அரசின் அழைப்பின்பேரில் இந்தியா செல்லவுள்ள இலங்கை மீன்பிடித்துறை அமைச்சர் ராஜித்த சேனாரத்ன, தமிழ்நாட்டு மீனவர்களை டில்லியில் சந்தித்துப் பேசுவதற்கு நடவடிக்கை எடுக்கப்பட்டுள்ளது.

தமிழக மீனவர் அமைப்பின் பிரதிநிதிகளின் வேண்டுகோளுக்கு இணங்க இந்த சந்திப்புக்கு அமைச்சர் ராஜித்த சேனாரத்ன இணக்கம் தெரிவித்துள்ளதாக இலங்கை மீன்பிடித்துறை அமைச்சின் ஆலோசகர்களில் ஒருவரும் இந்திய – இலங்கை மீனவர்கள் சங்க அமைப்பின் இலங்கை இணைப்பாளருமான எஸ்.பி.அந்தோனிமுத்து தெரிவித்தார்.

இதற்கிடையே தமிழகத்தில் எதிர்வரும் 20ம் திகதி நடத்த திட்டமிடப்பட்டுள்ள இலங்கை-இந்திய மீனவர்கள் இடையிலான பேச்சுவார்த்தைக்காக இலங்கைத் தரப்பினருக்கு இன்னும் உத்தியோகபூர்வமான அழைப்பு கிடைக்கவில்லை என்றும் அந்தோனிமுத்து கூறினார்.

எனினும் தமிழகம் சென்று பேச்சுவார்த்தை நடத்துவதற்கான மீனவர் பிரதிநிதிகள் குழுவினரை இலங்கை மீன்பிடித்துறை அமைச்சு ஏற்பாடு செய்துள்ளதாகவும் இந்திய – இலங்கை மீனவர்கள் சங்க அமைப்பின் இலங்கை இணைப்பாளர் தெரிவித்தார்.

டில்லியில் தமிழக மீனவர்கள் இலங்கை அமைச்சரை சந்திப்பதற்கான திகதி இன்னும் குறிக்கப்படவில்லை என்றபோதிலும், இந்த சந்திப்பு நிச்சயம் நடப்பதற்கான ஏற்பாடுகள் நடந்துள்ளன´ என்றார் அந்தோனிமுத்து.

அமைச்சர் ராஜித்த சேனாரத்ன அடுத்த வாரம் இந்தியா செல்வார் என்றும் இலங்கை மீன்பிடித்துறை அமைச்சின் ஆலோசகர் கூறினார்.

இதனிடையே இலங்கையிலிருந்து இந்தியா செல்ல ஏற்பாடாகியுள்ள இலங்கை மீனவர் பிரதிநிதிகள் 15 பேரில் 10 பேர் வரை வடக்கு கிழக்கைச் சேர்ந்தவர்கள் என்றும் அவர் தெரிவித்தார்.

வடக்கு மீனவர் பிரதிநிதிகள் இந்தக் குழுவில் இடம்பெறவில்லை என்று அண்மையில் வெளியாகியிருந்த செய்திகளில் உண்மை இல்லை என்று மீன்பிடித்துறை அமைச்சு அதிகாரிகள் உறுதிப்படுத்தியுள்ளமையை அவர் சுட்டிக்காட்டினார்.

அதேநேரம் இலங்கை – இந்திய மீனவர்கள் இடையிலான சந்திப்பிற்கு இந்த விவகாரத்தில் ஏற்கனவே அனுபவமுள்ள மீனவர் பிரதிநிதிகளுக்கு அழைப்பு விடுக்கப்படவில்லை என்ற விமர்சனங்களும் எழுந்துள்ளன.

இருதரப்பு மீனவர் பிரச்சனைகள் தொடர்பில் காலங்காலமாக பேச்சுவார்த்தை நடத்திவந்துள்ள இலங்கையின் முக்கிய மீனவர் பிரதிநிதிகளை உள்ளடக்காமல் இந்த சந்திப்பின் முடிவுகள் பயன் இருக்குமா என்றும் இலங்கை தேசிய மீனவர் ஒத்துழைப்பு இயக்கத்தின் ஏற்பாட்டாளர் ஹேர்மன்குமார சந்தேகம் வெளியிட்டமை குறிப்பிடத்தக்கது.

தமிழக முதலமைச்சர் ஜெயலலிதாவின் அண்மைய சில தீர்மானங்களே மீனவர் பிரச்சனை மோசமடையக் காரணம் என்று அண்மையில் இலங்கை மீன்பிடித்துறை அமைச்சர் ராஜித்த சேனாரத்ன கூறியிருந்தார்.

இந்திய மத்திய அரசின் அழைப்பின் பேரிலேயே தான் இந்தியா செல்வதாகவும், அழைப்பு கிடைத்தால் தமிழக அரசுடனும் பேச்சுநடத்தத் தயார் என்றும் அவர் கூறியமை குறிப்பிடத்தக்கது.

-BBC தமிழ்-

முஸ்லிம் பெண் போன்று முகத்தை மறைத்து பர்தா உடை அணிந்து அரச வங்கியில் கொள்ளையிட முயற்சித்த வேளை கைது செய்யப்பட்ட இராணுவ கெப்டன் நீதிமன்றில் ஆஜர் செய்யப்பட்டு இரண்டு வருடங்கள் கடூழிய சிறையில் அடைக்கப்பட்டுள்ளார்.

அத்துடன் இராணுவத்திற்கு இழுக்கு ஏற்படுத்திய அவரை பணிநீக்கம் செய்ய இராணுவ நீதிமன்றம் தீர்மானித்துள்ளது.

கண்டி – மஹியாவ நகர் அரச வங்கியொன்றில் பர்தா உடை அணிந்து கொள்ளையிட முயற்சித்த வேளை கடந்த வருடம் பெப்ரவரி மாதம் அவர் கைது செய்யப்பட்டார். குறித்த நபருக்கு எதிராக கண்டி நீதிமன்றில் சிவில் வழக்கு தாக்கல் செய்யப்பட்டுள்ளது.