முல்லைத்தீவில் தொடர்ந்தும் காற்றழுத்த நிலை காணப்படுவதாக அறிவிக்கப்பட்டுள்ளது. முல்லைத்தீவு உள்ளிட்ட வடக்கு பகுதிகளில் கடல் கொந்தளிப்பு காணப்படும் எனவும் கடும் காற்றுடன் கூடிய காலநிலை நிலவும் எனவும் அனர்த்த முகாமைத்துவ மத்திய நிலையம் தெரிவித்துள்ளது.

காற்றின் வேகம் கிலோ மீற்றருக்கு 80ற்கும் மேலிருக்கும் என எச்சரிக்கப்பட்டுள்ளது. முல்லைத்தீவில் கடும் காற்றுடன் கூடிய மழை பெய்துவருகிற அதேவேளை கடலும் பேரலைகளுடன் நிலப்பகுதியுள் சிலமீற்றர் தூரம் முன்நகர்ந்துள்ளது.

இத்திடீர் காலநிலை மாற்றம் குறித்து முல்லை மாவட்ட செயலக அனர்த்த முகாமைத்துவ பிரிவால் முல்லைக்கரையோரம் உள்ள மக்களிடம் விழிப்புணர்வூட்டும் நடவடிக்கைகள் மேற்கொள்ளப்பட்டுள்ளன.

கொக்கிளாய் தொடக்கம் மாத்தளன் வரையான கரையோரப் பகுதிகளைச் சேர்ந்த மக்கள் கரையோரத்திலிருந்து 100 மீட்டர் தூரத்திற்கப்பால் செல்லுமாறு அறிவுறுத்தப்பட்டுள்ளனர். முல்லைக் கரையோர மீனவர்களுக்கும் அவர்கள் உடைமைகளைப் பாதுகாக்கும் நோக்கிலான அறிவுறுத்தல்கள் வழங்கப்பட்டுள்ளன.

இதேவேளை வட மாகாணசபை உறுப்பினர் துரைராசா ரவிகரன் முல்லைத்தீவின் கரையோரப்பகுதிகளுக்கு நேரில் சென்று மக்கள் பிரதிநிதிகளுடன் கலந்துரையாடி அனர்த்த நிலைமையை பார்வை செய்து வருகிறார்.

கடற்கரையோரப் பகுதிகளில் தற்சமயம் மழை குறைந்துள்ளபோதும் கடல்நிலைமை இன்னும் சீரடையவில்லை என்று அவர் தெரிவித்தார்.

முல்லைத்தீவு மாவட்டத்தின் சாலை கடற்பரப்பில் இன்று ஞாயிற்றுக்கிழமை சிறிய படகொன்றில் தத்தளித்துக் கொண்டிருந்த அவுஸ்திரேலியப் பிரஜைகள் இருவர் இலங்கைக் கடற்படையினரால் காப்பாற்றப்பட்டுள்ளதாக அனர்த்த முகாமைத்துவ நிலையம் தெரிவித்துள்ளது.

காப்பாற்றப்பட்ட இருவரும் ஆரோக்கியமாக உள்ளனர் தெரியவருகிறது. இது தொடர்பில் கொழும்பிலுள்ள அவுஸ்திரேலிய உயர்ஸ்தானிகராலயத்திற்கு அறிவிக்கப்படுவதற்கான நடவடிக்கைகள் முன்னெடுக்கப்பட்டுள்ளதாகவும் அந்த நிலையம் கூறியுள்ளது.

கடற்படையினரால் காப்பற்றப்பட்ட அவுஸ்திரேலியப் பிரஜைகள் இருவரும் முல்லைத்தீவுப் பொலிஸாரிடம் ஒப்படைக்கப்பட்டுள்ளதாக முல்லைத்தீவு மாவட்ட அரசாங்க அதிபர் நாகலிங்கம் வேதநாயகம் தெரிவித்தார்.

வடபகுதியில் நிலவுகின்ற சீரற்ற காலநிலையை அறியாமல் இவர்கள் கடலுக்குச் சென்றிருக்கலாம் எனவும், இதனாலேயே இவர்களின் படகு காற்றில் சிக்கியிருக்கலாம் எனவும் அவர் கூறினார்.

இவர்களிடம் முல்லைத்தீவு பொலிஸார் விசாரணைகளை மேற்கொண்டு வருகின்றனர்.

முல்லைத்தீவு கடல் வழமைக்கு மாறாக இன்று காலை முதல் கொந்தளிப்பாக உள்ளமையின் காரணமாக கடற்கரையோர மக்களை பாதுகாப்பான இடங்களிற்கு இடம்பெயருமாறு தற்போது அறிவித்தல் விடுக்கப்பட்டுள்ளது.

முல்லைத்தீவு பொலிஸார் கடற் கரையோரங்களிற்கு சென்று இந்த அறிவித்தலை தற்போது விடுத்துள்ளனர். முல்லைத்தீவு கடற்கரையிலிருந்து 100 மீற்றருக்கு உட்பட்ட பிரதேசங்களில் வசிக்கும் மக்களே இவ்வாறு அறிவுறுத்தப்பட்டுள்ளனர்.

இதன்பின்னதாக கரையோர மக்கள் சிலர் இடம்பெயரத் தொடங்கியுள்ளனர்.

இந்நிலையில் இன்று பிற்பகல் 3 மணியளவில் முல்லைத்தீவு கடற்பரப்பை காற்று கடக்கும் என இடர் முகாமைத்துவ நிலையம் அறிவித்துள்ளதாக முல்லைத்தீவு மாவட்ட அரசாங்க அதிபர் நாகலிங்கம் வேதநாயகம் தெரிவித்தார்.

தீத்தக்கரை, கொக்கிலாய், அலம்பில், செம்மலை, கள்ளப்பாடு கடற் பிரதேச மக்களை அவ்விடங்களிலிருந்து பாதுகாப்பான இடத்திற்கு செல்லுமாறு தாம் அறிவித்தல் விடுத்துள்ளதாக நாகலிங்கம் வேதநாயகம் குறிப்பிட்டார்.

கடல் அலை மூன்று மீற்றர் வரை உயரக் கூடும் என இடர் முகாமைத்துவ நிலையம் அறிவுறுத்தல் விடுத்துள்ளதாக முல்லைத்தீவு மாவட்ட அரசாங்க அதிபர் நாகலிங்கம் வேதநாயகம் தெரிவித்தார்.

ஆனையிறவு புகையிரத நிலையத்தின் பெயர் மாற்றப்படாது என கல்வி அமைச்சர் பந்துல குணவர்தன தன்னிடம் உறுதியளித்ததாக இலங்கை தொழிலாளர் காங்கிரஸின் உபதலைவரும் முன்னாள் பிரதி அமைச்சருமான பெ.இராதாகிருஷ்ணன் தெரிவித்தார்.

ஆனையிறவு புகையிரத நிலையத்தின் புனர்நிர்மாண பணிகளுக்காக தெற்கு மக்கள் தமது உதவிகளை வழங்கியுள்ளார்கள்.

எனவே ஆனையிறவு புகையிரத நிலையம் என்ற பெயருக்கு அருகில் அடைப்புக் குறிக்குள் தெற்கிற்கும் வடக்கிற்கும் உறவுப் பாலமாக அமையும் தொனிப்பொருளில் வாசகம் ஒன்றை பொறிக்கப்படும் எனவும் தன்னிடம் கூறியதாக அவர் தெரிவித்தார்.
இது தொடர்பில் அவர் மேலும் தெரிவிக்கையில்,

தமிழ் மக்களது உரிமைகளுக்கு பாதகம் அல்லது குந்தகம் விளைவிக்கப்பட்டால் அதற்கு நாம் ஒருபோதும் துணைபோக மாட்டோம். மாறாக அரசாங்கத்துடன் பேச்சுவார்த்தைகளை நடத்தி அவ்வாறான செயற்பாடுகளை தடுத்து நிறுத்துவதற்கு சகல நடவடிக்கைகளையும் எடுப்போம்.

நாம் அரசாங்கத்துடன் இணைந்திருக்கின்றோம் என்பதற்காக அரசாங்கம் போடும் தாளத்துக்கெல்லாம் ஆடுகின்றவர்கள் என்று அர்த்தமில்லை. எமது மக்களுக்கு சேவையாற்றுவதற்கும் அநீதியிழைக்கப்படுகின்ற பட்சத்தில் அதனை தடுத்து நிறுத்துவதற்குமே நாம் அரசுடன் இணைந்திருக்கின்றோம்.

அரசாங்கத்துக்கு வெளியில் இருந்து கொண்டு மக்களுக்காக குரல் கொடுக்கலாம். ஆனால், வேறேதும் செய்ய முடியாது எனவே தான் அரசுடன் இணைந்து மக்களது தேவைகளை உணர்ந்து நாம் சேவையாற்றி வருகின்றோம். இது ஒரு அரசியல் சாணக்கியம்.

நான் பிரதி அமைச்சராக இருந்த காலத்தில் எமது மக்களுக்கு ஏற்பட்ட பல்வேறு பிரச்சினைகளை நேரடியாக தலையிட்டு தீர்த்து வைத்திருக்கின்றேன். அதேபோன்று மேலும் பல சேவைகளை செய்திருக்கின்றேன். அதனை மக்கள் நன்கு அறிவார்கள்.

இன்று இலங்கை தொழிலாளர் காங்கிரஸில் இணைந்து எனது மக்கள் சேவையினை தொடர்ந்துள்ளேன். இலங்கை தொழிலாளர் காங்கிரஸ் என்பது மக்களுக்கு நீண்ட காலமாக சேவையாற்றிவரும் மிகப்பெரிய அமைப்பாகும். எனவே, அதனோடு இணைந்து சேவையாற்ற கிடைத்தமை மகிழ்ச்சியளிக்கிறது எனவும் தெரிவித்தார்.

ஜெனீவாவில் நடைபெறவுள்ள ஐக்கிய நாடுகள் மனித உரிமைப் பேரவை மாநாட்டில் இலங்கைக்கு எதிரான சவால்களை முறியடிக்க பல நாடுகள் ஆதரவளிக்கும் என சிங்களப் பத்திரிகையொன்று செய்தி வெளியிட்டுள்ளது. எதிர்வரும் மார்ச் மாதம் 3ம் திகதி மாநாடு ஆரம்பமாகவுள்ளது.

சீனா, ரஸ்யா, பாகிஸ்தான், கியூபா, வியட்நாம் உள்ளிட்ட பல நாடுகள் இலங்கைக்கு ஆதரளிப்பதாக உறுதியளித்துள்ளன.
ஈராக் மற்றும் பாகிஸ்தானில் சிவிலியன்கள் கொல்லப்பட்டமை குறித்து கேள்வி எழுப்பப்பட உள்ளதாக அரசாங்கம் தெரிவித்துள்ளது.

எனவே இம்முறை மனித உரிமைப் பேரவை மாநாடு சர்ச்சைகள் நிறைந்ததாக அமையும் என எதிர்பார்க்கப்படுகிறது. எதிர்வரும் 26ம் திகதி நவனீதம்பிள்ளை வெளியிட உள்ள அறிக்கைக்கு இலங்கை சவால் விடுக்க உள்ளது.

அறிக்கையின் உண்மை தன்மை குறித்து இலங்கையிடம் கேள்வி எழுப்பவில்லை என அரசாங்கம் குற்றம் சுமத்தியுள்ளது. போர்க்குற்றச் செயல்களை நேரில் பார்த்த 2000 பேர் யார் என்பதனை வெளிப்படுத்த வேண்டுமென அரசாங்கம் கோரியுள்ளது.