கனகராயன்குளம் பகுதியில் பொது கிணற்றில் விழுந்து சிறுவன் ஒருவன் பரிதாபமாக உயிரிழந்துள்ளான். இச்சம்பவம் நேற்று இரவு 8 மணியளவில் நடைபெற்றுள்ளதாக கனகராயன்குளம் பொலிஸார் தெரிவித்தனர்.

கிணற்றில் விழுந்த 7 வயதான விஜயன் ஆதித்தியன் என்பவர் பிரதேச மக்களால் மீட்கப்பட்டு கிளிநொச்சி வைத்தியசாலையில் அனுமதிக்கப்பட்ட பின் உயிரிழந்துள்ளார்.

சடலம் கிளிநொச்சி வைத்தியசாலையில் வைக்கப்பட்டுள்ளது.
பிரேத பரிசோதனை இன்று இடம்பெறவுள்ளது.

கேஸ் விலையை அதிகரிப்பது குறித்து எந்தத் தீர்மானமும் எடுக்கவில்லை என நுகர்வோர் அதிகார சபையின் தலைவர் ரூமி மஸ்ருக் தெரிவித்துள்ளார்.

ஆனால் கேஸ் விலையை அதிகரிக்க வேண்டும் என நிறுவனங்களிடம் இருந்து கோரிக்கை முன்வைக்கப்பட்டுள்ளதாக அவர் குறிப்பிட்டார்.

இதேவேளை, பால் மா நிறுவனங்கள் மீதான புதிய சட்டத்தை அறிமுகப்படுத்த நடவடிக்கை எடுக்கப்பட்டுள்ளதாக அவர் கூறினார். சந்தையில் பால் மா தட்டுப்பாட்டை ஏற்படுத்த சில நிறுவனங்கள் முயற்சிப்பதாக அவர் குற்றம் சுமத்தினார்.

அதன்மூலம் பால் மா விலையை உயர்த்திக் கொள்ள அந்நிறுவனங்கள் எதிர்பார்ப்பதாக அவர் சுட்டிக்காட்டினார்.
அதனால் பால் மாவை களஞ்சியசாலையில் மறைத்து வைக்கும் நடவடிக்கையில் சில நிறுவனங்கள் முனைப்புக் காட்டுவதாக ரூமி மஸ்ருக் தெரிவித்தார்.

இதனை தடுக்கும் வகையில் புதிய சட்டம் அறிமுகப்படுத்தப்படும் என அவர் குறிப்பிட்டார்.

வடமாகாண ஆளுநர் குறித்த எந்தவொரு விடயமும் அரசியலமைப்புக்கு அமைய முன்னெடுக்கப்படுமே தவிர எந்தவொரு சபைகளின் அழுத்தங்களுக்கு கட்டுப்பட்டு எடுக்கப்படாதென அமைச்சரவை பேச்சாளரும் தகவல் ஊடகத்துறை அமைச்சருமான கெஹலிய ரம்புக்வெல்ல நேற்று கூறினார்.

சிவில் ஆளுநர், இராணுவப் பிரசன்னம் உள்ளிட்ட பல்வேறு விடயங்கள் தொடர்பில் கத்தோலிக்க ஆயர் பேரவை சார்பில் மன்னார் மறை மாவட்ட ஆயர் அதி வணக்கத்துக்குரிய இராயப்பு ஜோசப் பல்வேறு கருத்துக்களை முன்வைத்துள்ள போதிலும் அவை வெறும் யோசனைகளாக மாத்திரமே ஏற்றுக்கொள்ள முடியுமே தவிர எக்காரணம் கொண்டும் அரசியலமைப்பு விதிகளை மீறிச் செயற்படுத்த முடியாதெனவும் அமைச்சர் உறுதியாகக் கூறினார்.

மன்னார் மறை மாவட்ட ஆயர் அதி வணக்கத்துக்குரிய இராயப்பு ஜோசப் அக்காலம் முதல் எல். ரி.ரி. ஈ. யினருக்கு ஒத்துழைப்பு வழங்கி வருபவர் என்பது என்னுடைய தனிப்பட்ட கருத்து எனவும் அவர் தெரிவித்தார். அமைச்சரவை முடிவுகளை அறிவிக்கும் செய்தியாளர் மாநாடு நேற்றுப் பிற்பகல் தகவல் ஊடகத்துறையமைச்சில் நடைபெற்றது.

இதன்போது கத்தோலிக்க ஆயர் பேரவை வடமாகாணத்தில் சிவில் ஆளுநர் ஒருவரை நியமிக்க வேண்டுமெனவும் இராணுவ பிரசன்னம் குறைக்கப்பட வேண்டுமெனவும் வலியுறுத்தியுள்ளமை தொடர்பில் அரசாங்கத்தின் நிலைப்பாடு என்னவென கேள்வியெழுப்பிய போது அதற்கு பதிலளிக்குமுகமாகவே அமைச்சர் கெஹெலிய ரம்புக்வெல்ல மேற்கண்டவாறு கூறினார்.

ஆயர் வண. இராயப்பு ஜோசப் எல். ரி. ரி. ஈ. யினர் சார்பாக குரல் கொடுப்பவர். மோதல் இடம்பெற்ற காலத்தில் எமது படையினர் மடுவை நோக்கி படையெடுத்த போது மடு மாதாவின் சிலையை பாதுகாக்கும் நோக்கில் அவர் எல். ரி. ரி. ஈ. யினரிடம் ஒப்படைத்திருந்தார்.

அவர் நினைத்திருந்தால் அதனை படையினரிடம் பாதுகாப்பாக ஒப்படைத்திருக்கலாம் தானே? எல். ரி. ரி. ஈ. யினர் மடு மாதாவின் சிலையை சுமார் 40 கிலோ மீற்றருக்கு அப்பால் கொண்டு சேர்த்திருந்தனர்.

இத்தகைய செயற்பாடுகள் மூலம் அவர் எல். ரி. ரி. ஈ. ஆதரவாளர் என்பது எனது அபிப்பிராயம் என அமைச்சர் கூறினார்.

எமது நாட்டிற்கென ஒரு அரசியல் யாப்பு உண்டு. பாராளுமன்ற உறுப்பினராக பதவியேற்கும் நாம் ஒவ்வொருவரும் அரசியலமைப்பின்படி ஒழுகுவதாகவே நாம் வாக்குறுதி அளித்துள்ளோம்.

அரசியலமைப்பில் குறிப்பிடப்பட்டுள்ளதன் பிரகாரமே வடமாகாண ஆளுநர் உள்ளிட்ட அனைத்து செயற்பாடுகளும் முன்னெடுக்கப்படுமே தவிர அரசாங்கம் எச்சந்தர்ப்பத்திலும் அரசியலமைப்பை மீறி செயற்படுத்த மாட்டாது என்றும் அவர் கூறினார்.

அரசாங்கம் அனைத்து தரப்பினரினதும் கருத்துக்களையும் யோசனைகளையும் வரவேற்கும் அதேசமயம் நாட்டின் அரசியலமைப்புக்கு பொருந்தக் கூடியனவற்றை மாத்திரமே செயற்படுத்தும் என்றும் அமைச்சர் விளக்கமளித்தார்.

உள்ளுராட்சி மன்றங்களின் வரவு செலவுத் திட்டங்களை தோற்கடித்த ஆளும் கட்சி உறுப்பினர்கள் பற்றிய தீர்மானம் இன்றைய தினம் எடுக்கப்பட உள்ளது.

உள்ளுராட்சி மன்றங்களின் வரவு செலவுத் திட்டங்களை தோற்கடித்த கூட்டமைப்பு உறுப்பினர்களுக்கு எதிராக எவ்வாறான நடவடிக்கை எடுக்கப்படும் என்பது இன்று அறிவிக்கப்படும்.

குறித்த உறுப்பினர்களின் உறுப்புரிமையை ரத்து செய்வதா இல்லையா என்பது தீர்மானிக்கப்படும்.

ஶ்ரீலங்கா சுதந்திரக் கட்சி மத்திய செயற்குழு மற்றும் கூட்டபைம்பின் நிறைவேற்றுக்குழு ஆகியன இன்று ஜனாதிபதி தலைமையில் கூட உள்ளன.

வரவு செலவுத் திட்டத்தை தோற்கடித்த உறுப்பினர்களின் உறுப்புரிமையை இடைநிறுத்துமாறு சில முக்கிய அமைச்சர்கள் கோரியுள்ளனர்.மேலும் சிலர் உறுப்புரிமையை ரத்து செய்யுமாறு கோரியுள்ளனர்,

இலங்கையின் படையினருக்கு பயிற்சியளிக்கும் விடயத்தை நாடாளுமன்ற விவாதத்துக்கு எடுத்துக்கொள்ள வேண்டாம் என்று இந்திய பாதுகாப்பு அமைச்சு அந்த நாட்டின் நாடாளுமன்ற செயலகத்திடம் கோரியுள்ளது.

இரண்டு நாடுகளுக்கு இடையிலான பயிற்சி பாதுகாப்பு இராஜதந்திர நிலைக்குள் வருவதால் அதனை விவாதத்துக்கு விடுவது சாத்தியமில்லை என்று இந்திய பாதுகாப்பு அமைச்சு குறிப்பிட்டுள்ளது.

இந்திய பாதுகாப்பு அமைச்சர் ஏ.கே.அந்தோனியின் அமைச்சில் இருந்து இதற்கான வேண்டுகோள் இந்திய நாடாளுமன்ற செயலகத்துக்கு அனுப்பிவைக்கப்பட்டுள்ளது.

இந்த தகவலை தமிழக தென்காசி மாவட்ட நாடாளுமன்ற உறுப்பினர் லிங்கம் நேற்று நாடாளுமன்றத்தில் வெளியிட்டார்.
பாதுகாப்பு அமைச்சின் இது தொடர்பான வேண்டுகோள் கடந்த 13 ஆம் திகதி நாடாளுமன்ற செயலகத்துக்கு அனுப்பிவைக்கப்பட்டுள்ளதாகவும் அவர் குறிப்பிட்டார்.

வெளிநாடுகளுக்கு பயிற்சிகளை வழங்குவது என்பது அந்த நாடுகளின் கோரிக்கைகளின் அடிப்படையிலேயே மேற்கொள்ளப்படுகிறது.

அது தேசிய நலன்சார்ந்த விடயமாக உள்ளதால் அதனை நாடாளுமன்ற விவாதத்துக்கு உட்படுத்துவது பொருத்தமாகாது என்று இந்திய பாதுகாப்பு அமைச்சு குறிப்பிட்டுள்ளது.

எனினும் தமிழகத்தை சேர்ந்த அண்ணா திராவிட முன்னேற்றக்கழகம், திராவிட முன்னேற்றக்கழகம், மறுமலர்ச்சி திராவிட முன்னேற்றக்கழகம், இந்திய கொம்யூனிச கட்சி என்பன இந்த விடயத்தை நாடாளுமன்றத்தில் விவாதிக்க வேண்டும் என்று கோரி வருகின்றன.

கொழும்பில் நடத்தப்பட்ட இரவு நேர கார் பந்தயம், சட்டவிரோதமானது எனவே இது தொடர்பில் லஞ்ச ஊழல்களுக்கு எதிரான ஆணைக்குழுவில் முறையிடப் போவதாக ஐக்கிய தேசியக் கட்சி தெரிவித்துள்ளது.

ஐக்கிய தேசியக்கட்சியின் மாநகரசபை உறுப்பினர் முஜிபுர் ரஹ்மான் இதனை தெரிவித்துள்ளார். இந்த கார் பந்தயத்துக்கான அனுமதிச்சீட்டு விற்பனைக்கு கொழும்பு மாநகரசபை அனுமதியளிக்கவில்லை.

எனினும் அனுமதி சீட்டுக்கள் விநியோகிக்கப்பட்டுள்ளன என்றும் அவர் குறிப்பிட்டுள்ளார். இது தர்ம பணி என்ற வகைக்குள் வராமை காரணமாக இதற்கு அனுமதி சீட்டு வரியை அறவிடாமல் இருக்கமுடியாது.

எனவே இது சட்டவிரோத செயல் என்ற அடிப்படையில் லஞ்ச ஊழல் ஆணைக்குழுவில் முறையிடப் போவதாக ரஹ்மான் குறிப்பிட்டுள்ளார்.

தமிழர் ஒருவருக்கு அவர் தமிழ் என்று தெரிந்தும் தனிச் சிங்களத்தில் கடிதம் அனுப்புவது அவரை கத்தியால் குத்துவதற்கு சமனாகும் என்று அமைச்சர் வாசுதேவ நாணயக்கார நேற்று பாராளுமன்றத்தில் தெரிவித்தார்.

தனித் தமிழ்ப் பிரதேசங்களில் தமிழ் மொழியிலும், தனிச் சிங்கள பிரதேசங்களில் சிங்கள மொழியிலும் கடமையாற்றக் கூடியவாறு அரச ஊழியர்களுக்கு மொழி அறிவு வழங்கப்பட வேண்டும் என்றும் அமைச்சர் தெரிவித்தார்.

மொழி அமுலாக்கல் மற்றும் அரச மொழிகள் அமைச்சு உட்பட தெரிவுக்குழுவுக்கு ஆற்றுப்படுத்தப்பட்ட 10 சிரேஷ்ட அமைச்சுகளுக்கான நிதி ஒதுக்கீட்டு குழுநிலை விவாதம் நேற்று நடைபெற்ற போதே அமைச்சர் மேற்கண்டவாறு தெரிவித்தார்.

அமைச்சர் தொடர்ந்தும் உரையாற்றுகையில், அரச அலுவலகங்களில் தமிழ், சிங்கள மொழி பெயர்ப்பாளர்கள் இருக்க வேண்டும். அரச அலுவலகங்களில் வெளியிடப்படும் சுற்று நிருபங்கள் விண்ணப்பப்படிவங்கள் அனைத்தும் மும்மொழிகளிலும் இருக்க வேண்டும்.

அரச அலுவலகங்களுக்கு செல்லும் மக்கள் அங்கு சென்று மொழிப் பிரச்சினைக்கு உள்ளானால் 1956 என்ற இலக்கத்துடன் தொடர்பு கொண்டு உதவிகளை பெற முடியும். அதே இடத்தில் தீர்வு பெற்றுக்கொடுக்கப்படும்.

தனியார் பஸ் வண்டிகளில் இப்போது மும்மொழியிலும் பெயர்ப்பலகைகள் இடப்படுகின்றன. ஆனால் இ.போ.ச. பஸ் வண்டிகளில்தான் இன்னமும் அமுல்படுத்தவில்லை. அவர்களுக்கு வழக்கு தாக்கல் செய்யப்படும்.

இந்த நாட்டில் மொழிப் பிரச்சினைக்கு முற்றுப்புள்ளி வைத்தாலேயே நல்லிணக்கத்தை ஏற்படுத்த முடியும். மொழி அமுலாக்கல் தொடர்பாக பலவிதமான திட்டங்கள் முன்னெடுத்த போதும் அவை சரியான முறையில் வெற்றியளிக்கவில்லை.

2014 ல் கிளிநொச்சியிலும் இரத்தினபுரியிலும் மொழி அலுவலகம் திறக்கப்படும். இதேபோன்று அடுத்தாண்டு தேசிய ஒற்றுமை மாநாடும் இலங்கையில் நடத்த திட்டமிடப்பட்டுள்ளது.

இதில் சகல இனங்களிலும் தலைவர்கள், மதத் தலைவர்கள், பிரதிநிதிகளும் கலந்து கொள்வர். மொழிப் பிரச்சினைக்கு தீர்வு எடுக்கப்படாமல் எதனையும் சாதிக்க முடியாது. நானும் மொழியை கற்கவுள்ளேன்.

சிங்கள மக்கள் இல்லாமல் தமிழருக்கு தீர்வு இல்லை. இதேபோன்று தமிழ் மக்களின் உடன்பாடு இல்லாமல் சிங்களவர்களுக்கு இந்த நாட்டில் ஒற்றுமைப்பாட்டை ஏற்படுத்தவும் முடியாது என்பதை நாம் நினைவில் வைத்துக்கொள்ள வேண்டும்.

மேலும் வடக்கு மாகாண முதலமைச்சர் ஜனாதிபதி முன்னிலையில் சத்தியப்பிரமாணம் செய்த போதும் வடக்கு மாகாண சபை நடவடிக்கைகளில் தொய்வு நிலை ஏற்பட்டுள்ளது. இது தொடர்பில் இருதரப்புக்கும் இடையே பேச்சுக்கள் இடம்பெற வேண்டும் என்றும் அமைச்சர் வாசுதேவ நாணயக்கார கூறினார்.