ஜேர்மனியில் அரைவாசிக்கும் மேற்பட்டவர்கள் ஓய்வு பெறுவதற்கே பயப்படுகின்றனர் என்று சமீபத்திய ஆய்வொன்றின் மூலம் தெரியவந்துள்ளது.

ஜேர்மன் தொழிற்சங்க கூட்டமைப்பு பணியாளர்களின் ஓய்வு மற்றும் ஓய்வூதியம் குறித்த ஆய்வொன்றை நடத்தியது.
இதில் 42 சதவிகிதம் பேர் தாங்கள் ஓய்வு பெறுவதற்கே பயப்படுவதாகவும், இதற்கு ஓய்வூதியம் மிக குறைவாக கிடைப்பதே காரணம் என்றும் தெரிவித்துள்ளனர்.

18 சதவிகிதம் பேர் ஓய்வு பெற்ற பிறகு நிம்மதியான வாழ்க்கையை வாழ வேண்டும் என ஆசைப்படுவதாக தெரிவித்துள்ளனர். மேலும் 69 சதவிகிதம் பேர் பணியிடங்களில் மிக அரிதாகவே பயனுள்ள ஓய்வூதிய திட்டத்தை பெறுவதாக தெரிவித்துள்ளனர்.

இதன் மூலம் குறித்த அமைப்பு, நிரந்தரமான ஓய்வூதிய திட்டத்தை அறிமுகப்படுத்துமாறு அரசாங்கத்தை கேட்டுக் கொண்டுள்ளது.

அமெரிக்காவில் நடுவானில் பறந்த விமானத்தின் கதவு திடீரென கழன்று விழுந்தமையால் பெரும் பரபரப்பு ஏற்பட்டுள்ளது.
அமெரிக்காவின் கலிபோர்னியா மாகாணத்தின் மான்டரி விமான நிலையத்திலிருந்து கடந்த வாரம் சிறிய ரக விமானம் ஒன்று புறப்பட்டது.

இந்த விமானம் நடுவானில் வேகமாக பறந்து கொண்டிருந்த போது திடீரென சத்தம் கேட்டது. இதையடுத்து திரும்பி பார்த்த விமானி விமானத்தின் கதவு காணாதது கண்டு பதற்றம் அடைந்தார்.

விமானத்தை தாழ்வாக பறக்க செய்து கதவு எங்கே விழுந்திருக்கிறது என்று தேடினார். இரண்டு மூன்று முறை வட்டமடித்து தேடி பார்த்தும் கதவு கிடைக்காததால் விமான நிலையத்தில் விமானத்தை தரையிறக்கி விட்டு விஷயத்தை அங்குள்ள அதிகாரிகளிடம் தெரியப்படுத்தினார்.

இந்நிலையில் அப்பகுதியிலுள்ள ஹோட்டல் உரிமையாளர் தன்னுடைய ஹோட்டல் மீது விமானத்தின் கதவு விழுந்ததாக பொலிஸாரிடம் தெரிவித்தார். எனினும் இந்த சம்பவத்தின் போது எவருக்கும் பாதிப்பு ஏற்படவில்லை என்பது குறிப்பிடத்தக்கது.

பிலிப்பைன்சில் இன்று காலை சக்திவாய்ந்த நிலநடுக்கம் ஏற்பட்டது 6 பேர் பலியாகி உள்ளனர்.

பிலிப்பைன்ஸின் பொஹோல் தீவில் உள்ள கார்மன் நகரை மையமாகக் கொண்டு இன்று காலை 8.12 மணிக்கு சக்திவாய்ந்த நிலநடுக்கம் ஏற்பட்டது. இது ரிக்டர் அளவுகோலில் 7.2 ஆக பதிவாகி இருந்தாகவும், 56 கிமீ ஆழத்தில் ஏற்பட்டதாகவும் தெரிவிக்கப்பட்டுள்ளது.

நிலநடுக்கம் ஏற்பட்டதையடுத்து செபு நகர் அருகில் உள்ள மீன் துறைமுகத்தின் ஒரு பகுதி இடிந்து விழுந்ததில் 4 பேர் பலியாகினர். மேலும் செபு மாகாணத்தில் சந்தையின் மேற்கூரை இடிந்து விழுந்ததில் 2 பேர் பலியாகினர் மற்றும் 19 பேர் காயம் அடைந்தனர்.

நிலநடுக்கம் ஏற்பட்டவுடன் மக்கள் அலறியடித்துக் கொண்டு வீடுகளை விட்டு வெளியே ஓடி வந்தனர். செபுவில் 2 அடுக்குமாடி கட்டிடம் ஒன்று இடிந்து விழுந்ததில் இடிபாடுகளில் இருந்து 8 மாத குழந்தை உள்பட 2 பேர் உயிருடன் மீட்கப்பட்டதாக ஊடகங்கள் தெரிவித்துள்ளன.

தக்பிலாபன் பகுதியில் உள்ள ஒரு தேவாலயம் சேதம் அடைந்துள்ளது. மேலும் நகரில் உள்ள மஹால் ஒன்றின் ஒரு பகுதி இடிந்து விழுந்ததில் ஒருவர் காயம் அடைந்தார். மேலும் கார்மனின் தென்மேற்கு பகுதியில் உள்ள லோபோக் நகரில் இருக்கும் 17வது நூற்றாண்டு தேவாலயம் இடிந்து விழுந்தது.

இது தவிர அப்பகுதியில் உள்ள பல பழைய தேவாலயங்கள் சேதம் அடைந்துள்ளன. இன்று பிலிப்பைன்ஸில் தேசிய விடுமுறை என்பதால் பள்ளிகள் மற்றும் அலுவலகங்கள் மூடப்பட்டுள்ளன.

இங்கிலாந்தின் அரச குடும்பத்தினர் வாழும் வரலாற்று பெருமை மிக்க பக்கிங்காம் அரண்மனை லண்டன் நகரில் உள்ளது.
இந்த அரண்மனையின் பிரமாண்டத்தையும் உள்ளே அமைக்கப்பட்டுள்ள அழகிய பூந்தோட்டத்தையும் கண்டு களிக்க உள்நாட்டினர் மற்றும் வெளிநாட்டு சுற்றுலா பயணிகளுக்கு சில தினங்களில் மட்டுமே அனுமதி அளிக்கப்படுகிறது.

இதன்படி நேற்று எராளமான மக்கள் அரண்மனையின் உள்ளே அனுமதிக்கப்பட்டனர். அப்போது அரண்மனை வடக்கு வாயில் வழியாக கத்தியுடன் நுழைந்த 44 வயது மதிக்கத்தக்க ஒருவரை லண்டன் பொலிஸார் கைது செய்தனர்.

குறித்த நபரை ரகசிய இடத்தில் வைத்து பொலிஸார் விசாரித்து வருகின்றனர். கடந்த மாதம் இந்த அரண்மனைக்குள் நுழைந்து திருட முயன்றதாக 2 பேரை பொலிஸார் கைது செய்திருந்தனர்..

இச்சம்பவத்தையடுத்து அரண்மனையின் காவல் பலப்படுத்தப்பட்டது. இதற்கு 2 நாட்கள் கழித்து ராணி எலிசபத்தின் மகன் அண்ட்ரூவை வாசலில் தடுத்து நிறுத்திய பொலிஸார் அடையாள அட்டையை காட்டிய பின்னரே அவரை உள்ளே அனுமதித்தனர்.

நேற்றைய சம்பவம் நடைபெற்றபோது ராணி அரண்மனையில் இல்லை என்று கூறப்படுகிறது. கடந்த 1982-ம் ஆண்டு சுவர் ஏறி குதித்த மைக்கல் பேகன் என்பவன் ராணி உறங்கிக் கொண்டிருந்த அறையில் சுற்றித் திரிந்தபோது காவலர்களிடம் பிடிபட்டார் என்பது குறிப்பிடத்தக்கது.

முஸ்லிம் அல்லாதோர் அல்லா என்ற சொல்லை பயன்படுத்தக் கூடாது என மலேசிய நீதிமன்றம் உத்தரவிட்டுள்ளது. மலேசியாவிலிருந்து வெளிவரும் கத்தோலிக்க பத்திரிக்கை அல்லா என்ற சொல்லை தனது இதழில் பயன்படுத்தி வந்தது. இதை எதிர்த்து பழமைவாத முஸ்லிம்கள் அங்குள்ள தேவாலயத்தின் மீது தாக்குதல் நடத்தினர்.

முஸ்லிம் அல்லாதோர் அல்லா என்ற சொல்லை பயன்படுத்துவதால் குழப்பம் ஏற்படுகிறது. எனவே, மற்றவர்கள் இந்த சொல்லை பயன்படுத்த வேண்டாம் என மலேசிய உள்துறை அமைச்சகம் 2009ல் உத்தரவிட்டது.

இதை எதிர்த்து கத்தோலிக்க பத்திரிகை உயர் நீதிமன்றில் வழக்கு தொடர்ந்தது. அல்லா´ என்ற சொல் கடவுளை குறிக்கிறது. எனவே இந்த சொல்லை பயன்படுத்த நீதிமன்று அனுமதி அளித்தது.

ஆனால் இந்த உத்தரவை எதிர்த்து மேல் முறையீடு செய்யப்பட்டது. இந்த மனுவை மூன்று நீதிபதிகள் கொண்ட பெஞ்ச் விசாரித்தது.

முஸ்லிம் அல்லாதவர்கள் அல்லா என்ற சொல்லை பயன்படுத்தக்கூடாது என நீதிபதிகள் தங்கள் தீர்ப்பில் குறிப்பிட்டுள்ளனர்.

இஸ்லாம் மதம் தோன்றுவதற்கு முன்னரே, “அல்லா´ என்ற சொல் வழக்கில் உள்ளது. கடவுள் என்பதை குறிக்கும் இந்த சொல்லை அனைவரும் பயன்படுத்த உரிமை உண்டு.

மேல் நீதிமன்றின் இந்த தீர்ப்பை எதிர்த்து மேல் முறையீடு செய்யப்போவதாக, கத்தோலிக்க பத்திரிக்கை தெரிவித்துள்ளது.