யாழ். போதனா வைத்தியசாலையில் நிரந்தர நியமனம் கோரி போராட்டம் நடத்தி வரும் தொண்டர்களுக்கு ஆதரவாக வைத்தியசாலை அனைத்து துறையினரும் இன்று ஒரு மணி நேர பணிப்புறக்கணிப்பில் ஈடுபட்டனர்.

ஆறாவது நாளாக தொடரும் யாழ்.வைத்தியசாலைத் தொண்டர்களின் போராட்டத்தில், அங்கு பணி புரியும் மருத்துவர்கள், தாதியர்கள், நிறைவு காண் மருத்துவவியல் தொழில் வல்லுனர்கள், சிற்றூழியர்கள், சாரதிகள், மற்றும் நிர்வாக உத்தியோகஸ்தர்கள் என அனைவரும் ஒரு மணி நேர பணி பகிஸ்கரிப்பில் ஈடுபட்டனர்.

சிற்றூழியர்களும், நிறைவு காண் மருத்துவவியல் தொழில் வல்லுனர்களும் காலை 9 மணிமுதல் 10 மணிவரையும் ஏனையோர் 11 மணிமுதல் 12 மணிவரையும் போராட்டத்தில் ஈடுபட்டனர். இது தொடர்பாக போராட்டத்தில் ஈடுபட்டவர்கள் கருத்து தெரிவிக்கையில்,

நியமனம் கோரி போராட்டத்தில் ஈடுபட்டுள்ள தொண்டர்கள் பல நெருக்கடியான சூழ்நிலையில் எமக்கு உதவியாக செயற்பட்டவர்கள். இவர்கள் நாளொன்றுக்கு 175 ரூபாய் என்ற குறைந்த ஊழியத்திற்கு பணி புரிந்துள்ளார்கள். தாம் வாங்கும் ஊதியத்திற்கு மேலாக பணியாற்றியவர்கள்.

அப்போற்பட்டவர்களுக்கு கல்வித்தகமை இல்லை என்ற காரணத்தை காட்டி அவர்களுக்கு நியமனம் வழங்காமல் விடாது, அவர்கள் சேவையை கருத்தில் கொண்டு விஷேட ஏற்பாட்டின் கீழ் இவர்களுக்கு நிரந்தர நியமனம் வழங்க வேண்டும் என கோரியே இன்றைய தினம் வைத்தியசாலையில் பணிபுரியும் அனைவரும் ஒரு மணி நேர பணி பகிஸ்கரிப்பில் ஈடுபட்டுள்ளோம் என தெரிவித்தனர்.

இதேவேளை நாளையும் எமக்கான தீர்வு கிடைக்காவிடின் சாகும் வரையிலான உண்ணாவிரத போராட்டத்தை முன்னெடுப்போம் என போராட்டத்தில் ஈடுபட்டுள்ள தொண்டர்கள் தெரிவித்தனர்.

பௌத்த பிக்குகள் மத்தியில் காவி உடை அணிந்தவர்களும் இருப்பதாகவும் காவி அணிந்திருந்தாலும் அவர்களுக்கு புத்தியில்லை எனவும் பிரதமர் டி.எம். ஜயரத்ன நேற்று நாடாளுமன்றத்தில் தெரிவித்தார்.

இப்படியானவர்கள் கூறும் விடயங்கள் தொடர்பில் குழப்பமடைய தேவையில்லை. இப்படியானவர்கள் சகல மதங்களிலும் இருக்கின்றனர் என்றும் பிரதமர் கூறினார்.

ஹெரோயின் போதைப் பொருள் கொள்கலனை விடுவிக்க பிரதமரின் அலுவலகத்தில் இருந்து கடிதம் அனுப்பி வைக்கப்பட்டமை தொடர்பில் பிரதமர் கைது செய்யப்பட வேண்டும் என ஜாதிக ஹெல உறுமயவின் தலைவர் ஓமல்பே சோபித தேரர் தெரிவித்திருந்தார்.

அத்துடன் பிரதமர் பதவியில் இருந்து நீக்கப்பட வேண்டும் எனவும் அவர் கூறியிருந்தார் என்பது குறிப்பிடத்தக்கது.

கிளிநொச்சி மாவட்டத்தின் இரணைமடு குளத்தில் இருந்து யாழ்ப்பாணத்திற்குக் குடிநீர்த் தேவைக்காகத் தண்ணீரைக் கொண்டு செல்லுகின்ற பல மில்லியன் ரூபா செலவிலான திட்டமானது பல வழிகளிலும் விவசாயிகளின் வாழ்வாதாரத்தைப் பாதிக்கும் என்று கிளிநொச்சி மாவட்ட விவசாய அமைப்புக்களின் தலைவர்கள் தெரிவித்துள்ளனர்.

இந்தத் திட்டத்தில் காணப்படுகின்ற கிளிநொச்சி மாவட்ட விவசாயிகளுக்குப் பாதகமான பல விடயங்கள் குறித்து வடமாகாண சபை கவனத்தில் கொள்ளவில்லை என்று கிளிநொச்சி மாவட்ட விவசாய அமைப்புக்களின் சம்மேளத் தலைவர் செ.சிவப்பிரகாசம் இன்று புதன்கிழமை கிளிநொச்சியில் செய்தியாளர்களிடம் பேசுகையில் குற்றம் சுமத்தியிருக்கின்றார்.

இந்தத் திட்டம் பற்றி கிளிநொச்சி மாவட்ட விவசாயிகளுக்கு என்ன சொல்லப் போகின்றோம், இந்தத் திட்டத்தில் நாங்கள் உங்களுக்கு உறுதியாக இருப்போம். இதனை நாங்கள் ஏற்கவில்லை. இதனை உடனடியாக நிறுத்துவோம் என்று மாகாண சபையில் இருந்து எங்களுக்கு இன்று வரையில் எந்த பதிலும் வரவில்லை. மாறாக, இரணைமடு குளத்தில் இருந்து தண்ணீரை யாழ்ப்பாணத்திற்குக் கொண்டு போக வேண்டும் என்று தீர்மானம் எடுத்திருக்கின்றார்கள்.

ஆகவே, எங்களுக்கு மாகாண சபையோ அரசியல்வாதிகளோ எவரும் எங்களுக்குத் தேவையில்லை. அவர்களை நாங்கள் நம்பவில்லை. நம்பக் கூடிய வகையில் அவர்கள் நடந்து கொள்ளவில்லை. இறுதியாக, உறுதியாக, தெட்டத்தெளிவாக நாங்கள் எங்களுடைய தீர்மானத்தை முன்னெடுப்போம்.

இந்தத் திட்டத்தை எங்களால் நிறுத்த முடியும். அதை நாங்கள் செய்து காட்டுவோம். இதுதான் எங்களுடைய கருத்து, முடிவு என்று கிளிநொச்சி மாவட்ட விவசாய அமைப்புக்களின் சம்மேளனத் தலைவர் செ.சிவப்பிரகாசம் தெரிவித்தார்.

இங்கு கருத்து வெளியிட்ட பெரிய பரந்தன் விவசாய அமைப்பின் தலைவர் யோகநாதன் இரணைமடு குளத்தின் தண்ணீரானது கிளிநொச்சி மாவட்டத்து மக்களுக்கே காணாமல் இருக்கும் போது இங்கிருந்து தண்ணீரை யாழ்ப்பாணத்திற்குக் கொண்டு செல்ல முயற்சிப்பது பொருத்தமற்ற செயலாகவே நாங்கள் கருதுகின்றோம் என்றார்.

கிளிநொச்சி மாவட்டத்தில் பெருமளவான காணிகளுக்கு இந்தக் குளத்தில் இருந்து நீர் வழங்கப்பட வேண்டிய தேவை இருக்கின்றது. ஆகவே இந்தக் குளத்தை அபிவிருத்தி செய்து அதிக நீரைப் பெற்று அதனை இந்த காணிகளுக்கு வழங்க வேண்டும்.

எங்களுடைய விவசாய நிலங்களுக்குத் தண்ணீர் காணாமல் உள்ள நிலையில் யாழ்ப்பாணத்திற்கு இங்கிருந்து தண்ணீர் கொண்டு செல்வதை நாங்கள் விரும்பவில்லை என்றும் யோகநாதன் செய்தியாளர்களிடம் கூறினார்.

கிளிநொச்சி மாவட்ட விவசாயிகளின் நிலைப்பாடு குறித்து செய்தியாளர்களிடம் கருத்து வெளியிட்ட இராமநாதபுரம் விவசாய அமைப்புத் தலைவர் சிவமோகன், 22 ஆயிரம் ஏக்கர் நிலப்பரப்புக்கு இப்போது நீர் வழங்கப்படுகின்றது.

இன்னும் 15 ஆயிரத்துக்கும் மேற்பட்ட விவசாய நிலத்திற்கு இந்தக் குளத்தில் இருந்து நீர் வழங்கப்பட வேண்டிய தேவை இருந்தும் நீர் வழங்கப்படாமல் இருக்கின்றது இந்த நிலையில் இங்கிருந்து தண்ணீரை எவ்வாறு வெளியில் கொண்டு செல்ல முடியும் என்று வினா எழுப்பினார்.

இரணைமடு குளத்தை அபிவிருத்தி செய்ய வேண்டாம் என்று நாங்கள் கூறவில்லை. இதனை அபிவிருத்தி செய்யுங்கள். அதில் அதிக நீரைச் சேமிப்பதற்கும் அதன் மூலம் எங்களுடைய விவசாய நிலங்கள் பயனடைய வேண்டும் என்றுதான் நாங்கள் கேட்கின்றோம்.

இந்த அபிவிருத்திக்கென வருகின்ற பணத்தை வேண்டாம் திரும்பிப் போகட்டும் என்று நங்கள் ஒருபோதும் கூறவில்லை என்றும் சிவமோகன் கூறினார்

இரணைமடு குளத்தின் கீழ் விவசாயம் மேற்கொள்கின்ற 21 விவசாய அமைப்புக்களின் தலைவர்கள் உட்பட முக்கியஸ்தர்கள் இந்த செய்தியாளர் சந்திப்பில் கலந்து கொண்டனர்.

ஐந்தாம் ஆண்டு புலமைப் பரிசில் பரீட்சையில் மாணவர்கள் பெற்ற வெட்டுப்புள்ளிகளும், அதனடிப்படையில் தெரிவு செய்யக் கூடிய பாடசாலை விபரங்களும் வெளியிடப்பட்டுள்ளன.

இரண்டு மொழி ஊடகங்களுக்கான வெட்டுப்புள்ளிகள் அறிக்கை கல்வியமைச்சினால் வெளியிடப்பட்டுள்ளது.

கொழும்பு 4 முஸ்லிம் மகளீர் கல்லூரி – 174
வின்சன்ட் மகளீர் உயர் கல்லூரி மட்டக்களப்பு -172
பதுர்தீன் மகளீர் கல்லூரி கண்டி – 168
புனித அன்டனி மகளீர் பாடசாலை -167 புள்ளிகள்
ஸ்ரீ சண்முகா ஹிந்து மகளீர் பாடசாலை திருகோணமலை -166
வேம்படி மகளிர் உயர் பாடசாலை யாழ்ப்பாணம் -163
மகமூத் மகளீர் பாடசாலை கல்முனை -162

இதுதவிர ஆண்கள் பாடசாலைகளாக..
டி.எஸ்.சேனாநாயக்க மகா வித்தியாலயம் – 174
ஹாட்லி கல்லூரி பருத்தித்துறை -167
யாழ்ப்பாணம் ஹிந்து கல்லூரி -164
புனித மைக்கல் கல்லூரி மட்டக்களப்பு -164
சாஹிரா வித்தியாலயம் கல்முனை -162
கோணேஸ்வரா இந்து மகாவித்தியாலயம் – 159
கொழும்பு இந்துக் கல்லூரி -154

கலவன் பாடசாலைகளாக..
கொட்டகலை கேம்பிரிஜ் தமிழ் வித்தியாலயம் -165
மாவனெல்ல சாஹிரா முஸ்லிம் மத்திய மகா வித்தியாலயம் -163
கொக்குவில் இந்துக் கல்லூரி -162
ஹப்புகஸ்தலாவ அல்-மின்ஹாஜ் முஸ்லிம் மத்திய மகா வித்தியாலயம் -160
மடவல பஜார் மதீனா முஸ்லிம் மத்திய மகாவித்தியாலயம் -159
ஏறாவூர் அலிகார் முஸ்லிம் மத்திய மகா வித்தியாலயம் – 159
கொழும்பு விவேகாநந்தா வித்தியாலயம் -157 புள்ளிகள்
வவுனியா தமிழ் மகா வித்தியாலயம் -156
கெக்குனகொல்ல முஸ்லிம் மகா வித்தியாலயம் -156
மாவனெல்ல பதுரியா மத்திய மகா வித்தியாலயம் -156
கின்னியா மத்திய மகா வித்தியாலயம் -155
சியம்பலாகஸ் கொட்டுவ, பகமுனே, மதீனா முஸ்லிம் மகா வித்தியாலயம் -152 புள்ளிகள் என்றும் அறிவிக்கப்பட்டுள்ளது.