பிரிட்டனின் முடிக்குரிய இளவரசர் சாள்ஸ் தமது துணைவியார் கெமிலா சீமாட்டியுடன் பொதுநலவாய நாடுகள் அரச தலைவர்களின் உச்சி மாநாட்டில் கலந்து கொள்வதற்காக இம்மாதம் 14ம் திகதி இலங்கை வரவுள்ளார்.

அன்றைய தினம் இளவரசர் சாள்ஸின் 65வது பிறந்த நாளாகும்.
தனது 65வது பிறந்த நாளை இளவரசர் சாள்ஸ் தனது பாரியாருடன் இலங்கையிலுள்ள தனது நண்பர்கள் மற்றும் அரசத் தலைவர்களுடன் கொண்டாடுவதற்கான ஒழுங்குகள் செய்யப்பட்டுள்ளதாக அறிவிக்கப்படுகிறது.

இவ்வுச்சிமாநாட்டின் போது இளவரசர் சாள்ஸ் பல அரசாங்கத் தலைவர்களுடன் பேச்சுவார்த்தைகளை நடத்துவார்.

87 வயதான பிரிட்டிஷ் எலிசபத் மகாராணியார் 22 வது உச்சிமாநாட்டில் கலந்து கொள்ள இருந்த போதிலும் அவரது உடல் நிலை காரணமாக இம்முறை கலந்து கொள்ளாமல் தனது மகன் இளவரசர் சாள்ஸை அனுப்பி வைத்துள்ளார்.

எலிசபத் மகாராணியார் 1971ம் ஆண்டில் நடைபெற்ற முதலாவது உச்சி மாநாட்டில் கலந்து கொள்ள முடியாவிட்டாலும் 1973 முதல் 2011 வரையிலான சகல உச்சி மாநாடுகளிலும் கலந்து கொண்டார்.

இந்திய பிரதமர் மன்மோகன்சிங் இலங்கையில் இடம்பெறும் பொதுநலவாய மாநாட்டில் பங்கேற்காமையானது மாநாட்டுக்கு பின்னடைவல்ல என்று இலங்கை தெரிவித்துள்ளது. இலங்கையின் வெளியுறவு அமைச்சர் ஜி.எல்.பீரிஸ் இந்தக்கருத்தை வெளியிட்டுள்ளார்.

கொழும்பில் நடைபெறும் பொதுநலவாய மாநாட்டின் வெற்றியை மன்மோகன்சிங்கின் வருகையின்மை பாதிக்காது என்றும் அவர் குறிப்பிட்டுள்ளார். தமது வருகையின்மைக்கான காரணத்தை விளக்கி மன்மோகன்சிங் இலங்கை ஜனாதிபதிக்கு கடிதம் அனுப்பியுள்ளார்.

அதில் தனிப்பட்ட ரீதியில் இந்த மாநாட்டில் பங்கேற்க முடியவில்லை என்று அவர் குறிப்பிட்டுள்ளதாக பீரிஸ் தெரிவித்துள்ளார். எனினும் மன்மோகன்சிங் இலங்கை மாநாட்டுக்கு வந்திருந்தால் அது இலங்கைக்கு சந்தோசத்தை கொடுத்திருக்கும் என்று பீரிஸ் குறிப்பிட்டுள்ளார்.

குடிவரவு குடியகல்வு சட்ட விதிகளை மீறினார்களென்ற குற்றச்சாட்டின் பேரில் அவுஸ்திரேலியா மற்றும் நியூஸிலாந்து நாடுகளின் பாராளுமன்ற உறுப்பினர்கள் இருவரும் நேற்று அவர்களது நாடுகளுக்கு திருப்பியனுப்பப்பட்டனர்.

நவம்பர் 08ம் திகதி விசிட்டிங் வீஸா மூலம் இலங்கைக்குள் வந்திருந்த மேற்படி அவுஸ்திரேலிய மற்றும் நியூஸிலாந்து அரசியல்வாதிகள் நேற்றுக் காலை பத்திரிகையாளர் மாநாடு ஒன்றை நடத்த தயாரான நிலையிலேயே, தடுத்து விசாரணைக்குட்படுத்தப் பட்டதாக குடிவரவு, குடியகல்வு திணைக்களத்தின் தலைவர் சூலானந்த பெரேரா தெரிவித்தார்.

விசிட்டிங் வீஸா வில் நாட்டி ற்குள் வந்தவர்கள் பத்திரிகையாளர் மாநாட்டை நடத்துவது குடிவரவு குடியகல்வு சட்டவிதிகளை மீறும் செயலெனவும் அவர் சுட்டிக்காட்டினார்.

மேற்படி வெளிநாட்டு அரசியல்வாதிகள் கொழும்பு ரீட் அவெனியுவில் பத்திரிகையாளர் மாநாடொன்றினை நடத்த தயாராவதாக கிடைத்த செய்தியினை தொடர்ந்து குடிவரவு, குடியகல்வு திணைக்கள அதிகாரிகள் சம்பவ இடத்திற்கு விரைந்து அவர்களை தடுத்து வைத்து விசாரணை செய்துள்ளனர்.

விசாரணைகளைத் தொடர்ந்து அரசியல்வாதிகள் தமது நாடுகளுக்கு திரும்ப இணக்கம் தெரிவித்ததாகவும் சூலானந்த பெரேரா கூறினார்.

அவுஸ்திரேலியாவில் செனட் சபையைச் சேர்ந்த வீ.ரைனோன் மற்றும் நியூஸிலாந்தின் பசுமைக் கட்சி எம்.பி. யான யான் லொக்கி ஆகிய இருவருமே இலங்கையிலிருந்து திருப்பியனுப்பப்பட்டதாக தெரிய வருகிறது.

இவ்விருவரும் வடக்கிற்கு விஜயம் செய்ததுடன் யாழ். மாவட்டத்தின் தற்போதைய நிலைமைகள் குறித்து ஆராய்ந்ததுடன் வடமாகாண முதலமைச்சரை சந்தித்து கலந்துரையாடியதன் பின்னரே கொழும்பில் நேற்று பத்திரிகையாளர் மாநாடொன்றினை நடத்த தயாரானமை குறிப்பிடத்தக்கது.