இந்திய பிரதமர் மன்மோகன் சிங், ஜனாதிபதி மஹிந்த ராஜபக்‌ஷவுக்கு பொதுநலவாய மாநாட்டில் கலந்து கொள்ளாமைக்கு வருத்தம் தெரிவித்து கடிதம் எழுதியுள்ளார்.

அதில் முன்கூட்டிய திட்டமிட்ட பல நிகழ்ச்சிகள் இருப்பதால் பங்கேற்க முடியவில்லை.

தான் இலங்கை வராமல் போனது வருத்தம் அளிக்கிறது. இவ்வாறு அவர் கூறியுள்ளார். பெரும் சர்ச்சைக்கிடையே கொழும்பில் பொதுநலவாய மாநாடு ஞாயிற்றுக்கிழமை தொடங்குகிறது.

இந்த மாநாட்டில் பிரதமர் மன்மோகன்சிங் கலந்து கொள்ளக்கூடாது என தமிழக அரசியல் கட்சிகள், தமிழர் அமைப்புகள் போர்க்கொடி உயர்த்தி உள்ளன.

பொதுநலவாய மாநாட்டில் இந்தியா பங்கேற்கக்கூடாது என தமிழக சட்டசபையிலும் சமீபத்தில் ஒருமனதாக தீர்மானம் நிறைவேற்றப்பட்டது.

பிரதமர் மன்மோகன்சிங் கலந்துகொள்ள பலத்த எதிர்ப்பு உள்ளதால் இதுபற்றி முடிவு எடுக்க காங்கிரஸ் கட்சியின் உயர்மட்டக்குழு இரண்டு முறை கூடியது.

ஆனால் சாதக, பாதகங்கள் விவாதிக்கப்பட்டதே தவிர முடிவு எடுக்க முடியவில்லை. இந்தியா சார்பில் வெளியுறவு துறை அமைச்சர் சல்மான் குர்ஷித் மாநாட்டில் கலந்து கொள்வார் என்று அறிவிக்கப்பட்டது.

உயர் பாதுகாப்பு வலயங்களாகக் கையகப்படுத்தப்பட்டுள்ள காணிகளை குடாநாட்டின் இன விகிதாசாரத்தினை மாற்றியமைக்கும் வகையில் திட்டமிட்ட செயற்பாடுகளுக்கு பயன்படுத்த தூபமிடப்படுகின்றது.

இதனை அரசாங்கம் உடனடியாக நிறுத்தவேண்டும் என புளொட் அமைப்பின் தலைவரும் வட மாகாணசபை உறுப்பினருமான தர்மலிங்கம் சித்தார்த்தன் கோரிக்கை விடுத்துள்ளார்.

உயர் பாதுகாப்பு வலயம் என்ற போர்வையில் வலி. வடக்கில் காங்கேசன்துறை தொகுதி முழுவதும் உள்ளடங்கலாக இளவாலை வரையில், சுற்றியுள்ள நிலப்பரப்பினை இராணுவம் தமக்குள் வைத்துள்ளது.

அரசாங்கம் இன்றைய நிலையில் யுத்தம் முடிவடைந்து விட்டது என திரும்பத் திரும்ப கூறிவருகின்றது. இவ்வாறானதோர் சூழ்நிலையில் பாதுகாப்பு வலயங்களுக்கு என ஏன் இவ்வளவு பெருவாரியான காணிகளை அரசாங்கம் கையகப்படுத்தியுள்ளது என்ற கேள்வியுள்ளது, இதற்குப்பின்னால் வேறு நோக்கங்களே இருப்பதாக நாம் பார்க்கின்றோம்.

நாம் மக்களின் வீடுகள் இடித்தழிக்கப்படுகின்றன என்றவுடன் குறித்த பகுதிகளுக்கு நேரில் சென்று எதற்காக வீடுகளை இடித்தழிக்கின்றீர்கள் என இராணுவத்தினரிடம் கேட்டோம்.
அதற்கு அங்கிருந்த படை அதிகாரி தாம் வேறு கட்டிடங்களை அமைத்து இராணுவத்தினரையும் அவர்களது குடும்பங்களையும் குடியமர்த்தப் போவதாக வெளிப்படையாகவே கூறினார்.

அத்துடன் அந்த அதிகாரி யாழ்பாணத்திற்கு வெளியில் உள்ள இராணுவத்தினரை மீளப்பெறவுள்ளதனால் தமக்கு இடவசதிகள் தேவையாக உள்ளதாகவும் அதற்காக இக் காணிகளில் கட்டிடம் அமைத்து உபயோகப்படுத்தப் போவதாகவும் குறிப்பிட்டிருந்தார்.

கொழும்பில் இருப்பவர்கள் வேறு கருத்துக்களைக் கூறினாலும் இவ் அதிகாரியின் கருத்துக்களை நாம் நிராகரித்துவிட்டுப் பார்க்க முடியாது. இவ்விடயம் தொடர்பில் வழக்குகள் கூடத் தாக்கல் செய்யப்பட்டுள்ளன.

இராணுவத்தினரால் முன்னெடுக்கப்படும் இந் நடவடிக்கையினை நாம் குடாநாட்டின் குடிப்பரம்பலை மாற்றுவதற்கான ஓர் முயற்சியாகவே பார்க்கின்றோம்.

வன்னியில் அரச காணிகளை பெருவாரியாக எடுக்கின்றனர். யாழில் அதற்கான சூழ்நிலை காணப்படாத நிலையில் உயர் பாதுகாப்பு வலயங்களாக மக்களின் காணிகளைக் கையகப்படுத்தி அதனுள்ளாக திட்டமிட்ட வகையில் சிங்களக் குடிப்பரம்பலை ஏற்படுத்த அரசாங்கமும் படைத்தரப்பும் முயற்சிக்கின்றன என அவர் மேலும் குறிப்பிட்டுள்ளார்.

பொதுநலவாய மாநாட்டை முன்னிட்டு இலங்கைக்கு விஜயம் செய்யும் இரு அரச தலைவர்களது போக்குவரத்து காரணமாக கொழும்பு – கட்டுநாயக்க அதிவேக நெடுஞ்சாலை இன்று சில மணித்தியாலங்கள் மூடப்படவுள்ளது.

இதன்படி இன்று பிற்பகல் 12.45 தொடக்கம் பிற்பகல் 2 மணிவரை கொழும்பு – கட்டுநாயக்கா அதிவேக நெடுஞ்சாலையூடான மக்கள் போக்குவரத்து தற்காலிகமாக தடை செய்யப்படவுள்ளது.

இதேவேளை களனி பாலத்திலிருந்து பொரளை கனத்த சந்தி வரை பேஸ்லைன் வீதி, கனத்த சந்தியிலிருந்து பம்பலப்பிட்டி வரையான பௌத்தாலோக மாவத்தை, பம்பலப்பிட்டியிலிருந்து பழைய பாராளுமன்ற சுற்றுவட்டம் வரையான காலி வீதியூடான மக்கள் போக்குவரத்து குறித்த நேரத்தில் தற்காலிகமாக தடை செய்யப்படவுள்ளது.

இலங்கையில் பொதுநலவாய மாநாடு நடந்துகொண்டிருக்கிறது. இதில் பிரதமர் மன்மோகன் சிங் கலந்துகொள்ளவில்லை என்று அறிவிக்கப்பட்டுள்ளது.

அவருக்கு பதிலாக வெளியுறவு துறை அமைச்சர் சல்மான் குர்ஷித் தலைமையில் ஒரு குழு 15ம் திகதி கலந்துகொள்கிறது. இது பிரச்சினையை எழுப்பியுள்ளது. இதுகுறித்து பிரதமர் அலுவலக விவகாரத்துறை அமைச்சர் நாராயணசாமி கூறியுள்ளதாவது..

2009ம் ஆண்டு இனப்படுகொலைகளை நிகழ்த்திய இலங்கை அரசுக்கு எதிராக கொதித்து எழுந்துள்ள தமிழர்கள், பொதுநலவாய மாநாட்டில் பிரதமர் கலந்துகொள்ளக்கூடாது என்று கூறி வருகின்றனர்.

தமிழர்கள் அதிகமுள்ள புதுச்சேரியிலிருந்து வந்திருக்கும் நானும், அவர்களின் மனநிலையை ஆரம்பத்திலிருந்து பிரதிபலித்துக்கொண்டு வந்திருக்கிறேன். தமிழர்கள் அதிகம் வசிக்கும் பகுதிகளில் இருந்து இலங்கை ராணுவத்தினர் வெளியேறவில்லை.

20 வருடங்களாக நடந்த சண்டையில் இடம்பெயர்ந்துள்ள தமிழர்களின் நிலங்களை இலங்கை அரசு இன்னும் அவர்களிடம் கொடுக்கவில்லை.

நீண்டகாலமாக நீடித்துவரும் இந்த பிரச்சினைக்கு தீர்வுகாண பொதுநலவாய மாநாட்டு பயணத்தை கைவிட வேண்டுமென தமிழகத்தை சேர்ந்த பி.சிதம்பரம், ஜெயந்தி நடராஜன், ஜி.கே.வாசன் மற்றும் நானும் கேட்டுக்கொண்டோம். இதையடுத்து பிரதமர் அந்த பயணத்தை கைவிட முடிவெடுத்தார்.

இலங்கையுடன் தூதரக உறவுகள் இருந்தும் தமிழகத்தை சேர்ந்த மீனவர்கள் தொடர்ந்து இலங்கை ராணுவத்தினரால் தாக்கப்பட்டு கொண்டிருப்பது அடுத்த பிரச்சினை.

இலங்கையில் தேர்தல் நடத்த இந்தியா எடுத்துக்கொண்ட முயற்சியானது, இலங்கையில் ஆதிக்கம் செலுத்தும் சீனாவின் நடவடிக்கைகளை முடிவுக்கு கொண்டுவரும் என்று அரசியல் ஆலோசகர்கள் கூறுகின்றனர் என்று அவர் கூறினார்.