இலங்கைக்கான விஜயத்தை மேற்கொண்டுள்ள அவுஸ்திரேலியா மற்றும் நியூஸிலாந்து பாராளுமன்ற உறுப்பினர்கள் இருவர் தடுத்து வைக்கப்பட்டுள்ளதாக குடிவரவு மற்றும் குடியகல்வு ஆணையாளர் தெரிவித்தார்.
விசா சட்டத்தை மீறிய குற்றச்சாட்டில் இவர்கள் தடுத்து வைக்கப்பட்டுள்ளனர்.
வடக்கு மாகாண சபையின் இரண்டாவது அமர்வு நாளை திங்கட்கிழமை காலை 08.30 மணிக்கு சபை முதல்வர் சீ.வீ.கே.சிவஞானம் தலைமையில் கைதடியில் அமைந்துள்ள வட மாகாண சபைக் கட்டிடத்தில் நடைபெறவுள்ளது.
இக்கூட்டத்தில் சம்பிரதாய பூர்வமாக வட மாகாண ஆளுநர் ஜீ.ஏ.சந்திரசிறியை சபை முதல்வர் உரையாற்றுவதற்காக அழைத்ததற்கமைய வட மாகாண சபையின் ஆளுநர் உரையாற்றவுள்ளார் என அறிவிக்கப்பட்டுள்ளது.
தொடர்ந்து முதலமைச்சர் விக்னேஸ்வரனின் உரையும், சபை முதல்வர் சிவஞானம் அவர்களின் உரையும் இடம்பெற்று தேநீர் இடைவேளை விடப்படும். அதனைத் தொடர்ந்து சபை உறுப்பினர்கள் உரையாற்றுவதற்கு சந்தர்ப்பங்கள் வழங்கப்படவுள்ளன.
கடந்த அமர்வில் சபையின் உறுப்பினர்களில் 17 பேர் உரையாற்றியுள்ள நிலையில், ஏனைய அங்கத்தவர்கள் நாளை நடைபெறவுள்ள இரண்டாம் அமர்வில் தமது கன்னி உரைகளை ஆற்றவுள்ளமை குறிப்பிடத்தக்கது.
டெல்லியில் உள்ள தொழில் அதிபர் ஒருவரின் வீட்டில் வேலை செய்து வந்த நபர் ஒருவர், தன்னுடன் அதே வீட்டில் வேலை செய்யும் இளம்பெண்ணை பாலியல் பலாத்காரம் செய்து அதை வீடியோ எடுத்து இணையத்தில் வெளியிட்டுள்ளார்.
டெல்லியில் உள்ள கிரேட்டர் கைலாஷ் ரெசிடன்ஸில் வசிக்கும் தொழில் அதிபர் ஒருவரின் வீட்டில் வேலை செய்தவர் கார்த்திக் குலியா(32). கடந்த ஆண்டு அவர் அதே வீட்டில் வேலை செய்யும் 20 வயது பெண்ணை பாலியல் பலாத்காரம் செய்து அதை வீடியோ எடுத்துள்ளார்.
இதையடுத்து தனது ஆசைக்கு இணங்காவிட்டால் வீடியோவை இணையத்தில் வெளியிடுவேன் என்று கூறி மிரட்டியே அப்பெண்ணுடன் உறவு வைத்து வந்துள்ளார்.
இந்நிலையில் அந்த பெண்ணின் சகோதரரின் நண்பர் ஒருவர் எம்.எம்.எஸ். ஒன்றை இணையதளத்தில் பார்த்துள்ளார். உடனே அந்த பெண்ணின் சகோதரரிடம் வந்து நான் ஒரு எம்.எம்.எஸ். பார்த்தேன், அதில் வந்த பெண்ணை பார்த்தால் உன் சகோதரி போன்று உள்ளது என்று தெரிவித்துள்ளார்.
இதையடுத்து அந்த பெண்ணிடம் விசாரித்தபோது தான் உண்மை வெளியே வந்தது. இதையடுத்து அந்த பெண்ணை அவரது சகோதரர் பொலிஸ் நிலையத்திற்கு அழைத்துச் சென்று புகார் கொடுக்க வைத்தார். அவரது புகாரின்பேரில் வழக்குப் பதிவு செய்த பொலிசார் கார்த்திக்கை கைது செய்தனர்.
பிலிப்பைன்ஸ் தாக்கிய தைப்பூன் ஹையான் என்னும் பெரும் சூறாவளியில் பத்தாயிரம் பேர் வரையில் உயிரிழந்திருக்கலாம் என அந்நாட்டு பொலிஸார் தெரிவித்துள்ளனர். லெய்தே என்னும் தீவின் தக்லோபான் என்னும் நகர் இந்த சூறாவளியில் மிகவும் கடுமையாக பாதிக்கப்பட்டுள்ளது.
இப்பிரதேசத்தில் மட்டும் ஆயிரம் பேருக்கும் அதிகமானோர் இதில் இறந்திருக்கலாம் என்று செஞ்சிலுவைச் சங்கம் மதிப்பிட்டுள்ளது.
சமர் மாகாணத்திலும் 200 பேர் வரை இறந்ததாகக் கூறப்படுகின்றது.
இதற்கிடையே அரசாங்க அமைச்சர் ஒருவர் பாதிக்கப்பட்ட பகுதிகளை விமானத்தின் மூலம் சென்று பார்த்திருக்கிறார்.
இராணுவமும் பாதிக்கப்பட்ட பகுதிகளில் மீட்பு நடவடிக்கைகளுக்காக செல்ல முயற்சித்துக்கொண்டிருக்கிறது. ஆனால், வீதிகள் உடைந்தும் நீரில் மூழ்கியும் இருப்பதால், பாதிக்கப்பட்ட இடங்களைச் சென்றடைவது மிகவும் சிரமமாக இருப்பதாகக் கூறப்படுகின்றது.
சட்டவிரோதமாக வீடொன்றில் நடத்தப்பட்டுவந்த வெளிநாட்டு வேலைவாய்ப்பு நிலையம் சுற்றிவளைக்கப்பட்டு மூவர் கைதுசெய்யப்பட்டுள்ளனர்.
வாத்துவ பொலிஸ் பிரிவின் அரலியஉயன, மாலேகம பிரதேசத்தில் இந்த நிலையம் நடத்தப்பட்டு வந்ததாக பொலிஸார் தெரிவித்துள்ளனர்.
நேற்றையதினம் வாத்துவ பொலிஸாருக்கு கிடைத்த தகவலின் அடிப்படையில் மேற்கொள்ளப்பட்ட சுற்றிவளைப்புக்களின் போதே, ஒரே குடும்பத்தைச் சேர்ந்த பெண்ணொருவர் உள்ளிட்ட மூவர் கைதாகியுள்ளனர். இவர்கள் தந்தை, மகன் மற்றும் மருமகள் எனத் தெரியவந்துள்ளது.
சந்தேகநபர்கள் வெளிநாட்டில் வேலைபெற்றுத் தருவதாக கூறி 25,000 ரூபா முதல் 50,000 ரூபா வரை பணம் பெற்று வந்தமை ஆரம்பகட்ட விசாரணைகளில் இருந்து தெரியவந்துள்ளது.
இவர்களால் இவ்வாறு 160 பேரிடம் இருந்து சுமார் 80 இலட்சம் வரை மோசடி செய்யப்பட்டுள்ளதாக பொலிஸார் குறிப்பிட்டுள்ளனர்.
இது தொடர்பில் 33 முறைப்பாடுகள் வாத்துவ பொலிஸாரிடம் முன்வைக்கப்பட்டுள்ளன.
சந்தேகநபர்கள் இன்று களுத்தறை நீதவான் நீதிமன்றத்தில் ஆஜர்படுத்தப்படவுள்ளதோடு, வாத்துவ பொலிஸார் சம்பவம் தொடர்பிலான மேலதிக விசாரணைகளை மேற்கொண்டு வருகின்றனர்.
இலங்கை வரலாற்றின் பாரிய பாதுகாப்பு திட்டம் ஒன்று பொதுநலவாய அரச தலைவர்களது மாநாட்டை முன்னிட்டு இன்று நடைமுறைக்கு வருகிறது.
இதன்படி 676 இராணுவ அதிகாரிகளின் கீழ் 18,000 இராணுவ சிப்பாய்கள் மற்றும் 20,000 பொலிஸ் அதிகாரிகள் கடமையில் ஈடுபடுத்தப்படுகின்றனர். இதேவேளை வெளிநாட்டு தலைவர்கள் பலரும் இன்று இலங்கை வரவுள்ளனர்.
பிரித்தானிய இளவரசர் சார்ள்ஸ் மற்றும் கெமிலா பர்கர் தம்பதியினர் எதிர்வரும் வியாழக்கிழமை இலங்கைக்கான விஜயத்தை மேற்கொள்ளவுள்ளனர்.
எதிர்வரும் 15ம் திகதி அரச தலைவர்கள் வருகைதரவுள்ள அதேவேளை, இவர்கள் எதிர்வரும் 16 தொடக்கம் 18ஆம் திகதிகளுக்கிடையில் இலங்கையிலிருந்து வெளியேறவுள்ளனர்.
இந்நிலையில் பொதுநலவாய மாநாட்டை முன்னிட்டு விசேட போக்குவரத்து ஒழுங்குகள் நேற்றிலிருந்து எதிர்வரும் 18ம் திகதிவரை நடைமுறைப்படுத்தப்பட்டுள்ளன.
சுற்றுப் புறச் சூழலுக்கு தீங்கை விளைவிக்க கூடிய வகையில் அதிகளவான புகையை வெளியிட்ட 3000 வாகனங்களை கறுப்பு பட்டியலில் இடுவது தொடப்பில் மோட்டார் வாகன போக்குவரத்து அதிகாரசபை நடவடிக்கை எடுத்துள்ளது.
இந்த வருடத்தின் இதுவரையான காலத்தினுள் மேற்கொண்ட தேடுதலின்போது இவ் வாகனங்கள் தொடர்பில் கண்டறியப்பட்டுள்ளது.
குறித்த வாகனங்கள் போக்குவரத்துக்கு உகந்த நிலையில் இல்லாமையின் காரணமாக கறுப்பு பட்டியலில் சேர்க்கப்பட்டுள்ளன.
இந்நிலையில் எதிர்வரும் காலங்களிலும் நாடு முழுவதிலும் வாகனங்களை பரிசோதிக்கும் நடவடிக்கைகள் முன்னெடுக்கப்படவுள்ளன.
பொதுநலவாய இளைஞர் மாநாட்டை ஜனாதிபதி மஹிந்த ராஜபக்ஷ ஹம்பாந்தோட்டை சர்வதேச மாநாட்டு மண்டபத்தில் உத்தியோகபூர்வமாக ஆரம்பித்து வைத்துள்ளார்.
கொழும்பில் எதிர்வரும் 15ம் திகதி முதல் 17ம் திகதி வரை நடைபெறவுள்ள பொதுநலவாய அரச தலைவர்களின் 23ஆவது உச்சி மாநாட்டுக்கு முன்னோடியாக இன்று இரண்டு மாநாடுகள் ஆரம்பமாகின்றன.
எம்.பி. மீது புகார் கூறியது விளம்பரத்துக்காக அல்ல என்றார் நடிகை சுவேதா மேனன் தெரிவித்துள்ளார். கேரளாவில் நடந்த ஒரு பொது நிகழ்ச்சியில் சுவேதா மேனன் பங்கேற்றார். அப்போது விழாவை ஏற்பாடு செய்திருந்த காங்கிரஸ் எம்.பி. பீதாம்பர குருப் என்பவர் தன்னிடம் பாலியல் சில்மிஷம் செய்ததாக பொலிசில் புகார் அளித்தார்.
இது பெரிய பிரச்சினையாக உருவெடுத்தது. இந்நிலையில் பீதம்பர குருப் நடந்த சம்பவத்துக்கு மன்னிப்பு கேட்டார். இதையடுத்து புகாரை வாபஸ் பெற்றார் சுவேதா. இதனால் பிரச்சினை முடிவுக்கு வந்தது. ஆனால் பீதம்பர குருப் ஆதரவாளர்கள் சிலர் சுவேதா மேனன் விளம்பரத்துக்காகவே இதுபோல் புகார் கூறினார் என்று குற்றம்சாட்டி வருகின்றனர்.
இதைக்கேட்டு மீண்டும் கோபம் அடைந்திருக்கிறார் சுவேதா. அவர் கூறும்போது பப்சிட்டி தேடுவதற்காக நான் புகார் சொல்லவில்லை. பொது இடத்தில் என்னிடம் தவறாக நடக்க முயன்றவரை பற்றித்தான் புகார் செய்தேன். மும்பையில் ஹிந்தி படங்களில் நடித்தபோதுகூட நான் பப்ளிசிட்டி ஸ்டண்ட் அடித்ததில்லை. இதை மற்றவர்கள் உணர வேண்டும் என்றார்.
ரஜினியின் பிறந்த நாளன்றும் கோச்சடையான் வெளியாகாது என்பது உறுதியாகிவிட்டது. அநேகமாக இந்தப் படம் ரஜினிக்கு ராசியான ஏப்ரல் 14ம் திகதிதான் வெளியாகும் என்று தெரிகிறது.
ரஜினி உடல் நலம் பெற்று வந்த பிறகு தொடங்கிய படம் கோச்சடையான்.கேஎஸ் ரவிக்குமாரின் கதை-திரைக்கதை-வசனத்தில், சௌந்தர்யாவின் இயக்கத்தில் உருவாகியுள்ள இந்தப் படத்தின் படப்பிடிப்பு முடிந்து கிராபிக்ஸ் மற்றும் அனிமேஷன் பணிகள் நடந்து வருகின்றன.
இந்தப் படத்தின் ஒரு டீசரும், ஒரு பாடலின் ஒலிக் கோப்பும் மட்டும் இதுவரை வெளியாகியுள்ளன. பல முறை படத்தின் வெளியீட்டுத் திகதி அறிவிக்கப்பட்டு தள்ளிப் போடப்பட்டது.
இந்த நிலையில், படத்தின் இசை அக்டோபர் மாதம் வெளியாகும் என்றும், படம் ரஜினி பிறந்த நாளில் வெளியாகும் என்றும் செப்டம்பர் மாதம் அறிவித்தனர்.
அக்டோபர் மாதம் முடிந்த நிலையிலும் படத்தின் இசை வெளியாகவில்லை. எனவே டிசம்பர் 12ம் திகதி இந்தப் படம் வெளியாவது சந்தேகத்துக்கிடமாகியுள்ளது.
அநேகமாக ரஜினிக்கு ராசியான ஏப்ரல்14 ம் திகதி கோச்சடையான் வெளியாகும் எனத் தெரிகிறது.
இந்தியாவிற்கு போகின்றீர்களா முக்கியமாக அஸ்ஸாம் பக்கம் போகாதீர்கள், இளம் பெண்கள் கட்டாயம் போக வேண்டாம் என அமெரிக்க இணையத்தளத்தில் தகவல் வெளியாகி பரபரப்பை ஏற்படுத்தியுள்ளது.
அமெரிக்காவில் பிரபல செய்தி இணையம் நஷனல் ரிப்போர்ட்.நெட். இது சமீபத்தில் ஒரு செய்தியை வெளியிட்டுள்ளது. இந்தியாவில் பெண்களுக்கு பாதுகாப்பு இல்லை என்று உங்களுக்கு தெரிந்தது தான்.
அதிலும் நவம்பர் 3ம் திகதியில் இருந்து ஒரு வாரம் அஸ்ஸாம் மாநிலத்தில் ‘பாலியல் பலாத்கார விழா’ கொண்டாடப்படுகிறது.
அதனால் பெண்கள் பலரும் பாதுகாப்பான இடத்துக்கு ஓடிக்கொண்டிருக்கின்றனர். அந்த மாநிலத்துக்கு நீங்கள் யாரும் போக வேண்டாம் என செய்தி ஒன்றை வெளியிட்டது.
இதனை உண்மை என நம்பியவர்கள் பேஸ்புக் மூலம் தகவலை பரிமாறிக் கொண்டனர். ட்விட்டரிலும் சில ஆயிரம் பேர் இதை பரிமாறியுள்ளனர். கருத்து வெளியிட்ட பலரும், ‘இந்த அமெரிக்க வெப்சைட் எப்போதும் போலி செய்தியை வெளியிட்டு பரபரப்பை ஏற்படுத்தும். அதை நம்ப வேண்டாம்’ என்று கூறியுள்ளனர்.
இதனையடுத்து அசாம் கிரைம் பிரிவு பொலிஸ், குறித்த இணையத்தளத்தின் மீது அவதூறு கிளப்பியதாக வழக்கு பதிவு செய்துள்ளது. இதனை தொடர்ந்து இந்த இணையத்தளம் இந்தியாவில் தெரிவது முடக்கப்பட்டதுடன் சர்ச்சையை கிளப்பிய செய்தியை அகற்றி உள்ளது.
எங்களை மூன்றரை வருடங்களாக ஏமாற்றுகிறார்கள் என வவுனியா பொது வைத்தியசாலை சிற்றூழியர்கள் துண்டுப்பிரசுரம் தயாரித்து ஊடகங்களுக்கும் பொது மக்களுக்கும் விநோயோகித்துள்ளனர் இது தொடர்பாக அவர்கள் விடுத்துள்ள துண்டுப்பிரசுரம் கிழே இணைக்கப்பட்டுள்ளது.
அமெரிக்காவில் நடந்த மரதன் போட்டியில் பங்கேற்ற முதியவர் மரணம் அடைந்தார். அமெரிக்காவின் கலிபோர்னியாவில் உள்ள சான் ஜோஸ் பகுதியைச் சேர்ந்தவர் ஜோய் ஜோன்சன்(86).
அமெரிக்காவின் ஐந்து நகரங்களை இணைக்கும் 26.2 மைல் தூரத்திற்கான மரதன் ஓட்டப் பந்தயம், நியூயோர்க் நகரத்தில் இம்மாதம் 3ம் திகதி நடந்தது.
இந்தப் பந்தயத்தில் பங்கேற்ற, ஜோய் பந்தய தூரத்தை ஓடி முடித்தபின் மருத்துவ மையத்திற்கு சென்றார். அங்கு அவரை பரிசோதித்த மருத்துவர்கள் உடனடியாக மருத்துவமனைக்கு செல்லுமாறு கூறினர்.
இதனையடுத்து மருத்துவமனையில் அனுமதிக்கப்பட்டிருந்த ஜோய் பரிதாபமாக உயிரிழந்தார். கடந்த 1991ல் முதன் முறையாக மரதன் போட்டியில் கலந்து கொண்டவர், 4 மணி நேரத்தில் பந்தய தூரத்தைக் கடந்தார்.
இதுவரை 25 முறை பந்தயத்தில் கலந்து கொண்ட ஜோய் ஆறு முறை முதலிடத்தைப் பிடித்துள்ளார்.
டெஸ்ட் போட்டிகளில் போராடி நல்ல சாதகமான நிலையை பெற்ற பிறகு, அதை வீணடிப்பது வாடிக்கையான ஒன்றாக மாறிவிட்டது என மேற்கிந்திய தீவுகள் அணியின் அணித்தலைவர் சமி தெரிவித்துள்ளார்.
இந்தியாவுக்கு எதிரான முதல் டெஸ்ட் போட்டியில் இன்னிங்ஸ் மற்றும் 51 ஓட்டங்கள் வித்தியாசத்தில் மேற்கிந்திய தீவுகள் தோல்வி அடைந்தது.
இதுகுறித்து மேற்கிந்திய தீவுகள் அணியின் அணித்தலைவர் சமி கூறுகையில், டெஸ்ட் போட்டிகளில் நல்ல சாதகமான நிலையை போராடி பெற்ற பிறகு அதை வீணடிப்பது எங்களுக்கு வாடிக்கையாகிவிட்டது.
இந்தியா துடுப்பெடுத்தாடும் போது, தொடக்கத்தில் விக்கெட்டுகளைக் கைப்பற்றி கடும் நெருக்கடி கொடுத்தோம்.
ஆனால் அதன் பிறகு பெரிய இணைப்பாட்டம் அமைய வாய்ப்பு கொடுத்தது தோல்விக்கு முக்கிய காரணமாக அமைந்துவிட்டது.
60 , 70 ஓவர்களில் அல்ல வீரர்களையும் ஆட்டமிழக்க செய்வது எந்த வகையிலும் வெற்றிக்கு உதவாது. குறைந்தபட்சம் 120 ஓவர் வரை தாக்குப்பிடிக்க வேண்டும் என நினைத்தோம், அது நடக்கவில்லை.
ஷில்லிங்போட் அபாரமாகப் பந்துவீசினார், தொடர்ச்சியாக 50 ஓவர் போடுவது என்பது சாதாரண காரியம் இல்லை. நான் உட்பட மற்ற பந்துவீச்சாளர்களும் அவருக்கு போதிய ஒத்துழைப்பு கொடுப்பது அவசியம்.
அடுத்து மும்பை டெஸ்ட் போட்டியில் சிறப்பாக விளையாட முயற்சிப்போம் என்று தெரிவித்துள்ளார்.
நடிகை அஞ்சலி தொடரும் சர்ச்சைகளால் தவிக்கிறார். நீதிமன்றம் பிடிவாரண்டு பிறப்பித்துள்ளதால் எந்த நேரமும் கைதாகலாம் என்ற சூழ் நிலையும் ஏற்பட்டுள்ளது. கடந்த ஏப்ரல் மாதம் சென்னை வீட்டில் இருந்து வெளியேறி மாயமானார்.
சித்தி பாரதிதேவியும், இயக்குனர் களஞ்சியமும் கொடுமைபடுத்தியதாக பரபரப்பு பேட்டியும் அளித்தார். அஞ்சலி கடத்தப்பட்டதாக வழக்கு பதிவானது. இதையடுத்து ஐதராபாத் போலீசில் ஆஜராகி வாக்கு மூலம் அளித்தார். சென்னைக்கு வரமாட்டேன். தமிழ் படங்களில் நடிக்க மாட்டேன் என்று கூறி வருகிறார்.
ஐதராபாத்திலேயே முகாமிட்டு தெலுங்கு படங்களில் நடித்து வருகிறார். இந்த நிலையில் அஞ்சலிக்கு எதிரான வழக்குகள் தற்போது விஸ்வரூபம் எடுக்க துவங்கியுள்ளன. இயக்குனர் களஞ்சியம் சைதாப்பேட்டை, நீதிமன்றத்தில் அஞ்சலி மீது அவதூறு வழக்கு தொடர்ந்துள்ளார். சித்தி பாரதிதேவி அஞ்சலி மாதம் தோறும் 50 ஆயிரம் ஜீவனாம்சம் தர வேண்டும் என்று குடும்ப நல நீதிமன்றத்தில் வழக்கு தொடர்ந்துள்ளார்.
அஞ்சலி கடைசியாக தமிழில் ஊர் சுற்றி புராணம் படத்தில் நடித்தார். இந்த படம் முடிவடையாமல் பாதியில் நிற்கிறது. படத்தின் இயக்குனர் களஞ்சியம் நடிகர் சங்கம், தயாரிப்பாளர் சங்கம், இயக்குனர் சங்கங்களில் அஞ்சலி மீது புகார் அளித்துள்ளார்.
சைதாப்பேட்டை நீதிமன்றத்தில் தொடரப்பட்ட அவதூறு வழக்கில் அஞ்சலிக்கு பிடிவாரண்டு பிறப்பிக்கப்பட்டு உள்ளது. இது அவரை வேதனை படுத்தி உள்ளது. கைதாவதை தவிர்க்க நீதிமன்றத்தில் சரண் அடையலாமா என்று வக்கீல்களிடம் ஆலோசிக்கிறார்.
ஊர் சுற்று புராணம் படம் பிரச்சினையில் அஞ்சலி மீது நடவடிக்கை எடுப்பது குறித்து திரையுலகத்தினர் ஆலோசனை நடத்தி வருகிறார்கள்.
தமிழக கலாசாரத்தால் ஈர்க்கப்பட்ட பிரான்ஸ் மருத்துவருக்கும், இத்தாலியை சேர்ந்த ஆசிரியைக்கும் முறைப்படி திருமணம் நடந்தது.
இத்தாலி நாட்டை சேர்ந்த ஆசிரியை பாஸ்கால் ஹிட்டோ.
இவர் இத்தாலிக்கு சென்ற போது மருத்துவர் ஆலன் ஹிட்டோவுடன் பழக்கம் ஏற்பட்டு காதலாக மாறியது.
ஏற்கனவே விவாகரத்து பெற்ற இவர்கள் தமிழக கலாசாரப்படி திருமணம் செய்து கொள்ள முடிவு செய்தனர். தங்கள் விருப்பத்தைப் பிரான்சில் வசிக்கும் நெல்லை மாவட்டத்தை சேர்ந்த போஸ்கோ குணசீலன் என்பவரிடம் தெரிவித்தனர்.
பின்னர் குணசீலனின் சொந்த ஊருக்கு வந்த தம்பதியினர், அங்குள்ள புனித அந்தோனியார் மேரி மாதா வளாகத்தில் வைத்து தமிழக கத்தோலிக்க முறைப்படி நெல்லை மாவட்ட ஆயர் ஜீடு பால் ராஜ் தலைமையில் திருமணம் செய்து கொண்டனர்.
பிரான்ஸ் நாட்டைச் சார்ந்த மோனிக் கபிர்மேல், கத்தோலிக்க சபையினர் ஊராட்சித் தலைவர் மற்றும் ஊர் பொதுமக்கள் பலரும் கலந்து கொண்டு தம்பதியரை வாழ்த்தினர்.
