காமெடி நடிகர்கள் சந்தானம், பரோட்டா சூரி மீது வடிவேலு மறைமுகமாக சாடியுள்ளார். நகைச்சுவை காட்சிகளை குடும்பத்தோடு பார்க்க முடிய வில்லை என்றார். வடிவேலு இரண்டு வருடத்துக்கு முன் சினிமாவில் நடிப்பதை திடீரென நிறுத்தினார்.

தமிழ் திரையுலகில் முன்னணி காமெடியராக இருந்த அவரது இடத்தை சந்தானம், சூரி போன்றோர் பிடித்தனர். வடிவேலுவுக்கு பதில் முன்னணி ஹீரோக்கள் படங்களில் சந்தானம் காமெடி வேடம் செய்து வருகிறார். தினசரி சம்பளமாக 10 லட்சத்துக்கு மேல் வாங்குவதாக கூறப்படுகிறது.

சந்தானம் காமெடியில் ஆபாசம் இருப்பதாகவும் பெண்களை இழிவுபடுத்தி வசனம் பேசுகிறார் என்றும் பெண்கள் இயக்கங்கள் போராட்டம் நடத்தி வருகிறது.

ஆல் இன்ஆல் அழகுராஜா படத்தில் சந்தானம் பேசிய ஆபாச வசனம் பெண்கள் சங்கத்தினர் எதிர்ப்பால் நீக்கப்பட்டது. தற்போது வடிவேலுவும் புதுப்படங்களில் இடம் பெறும் காமெடி காட்சிகளை கண்டித்துள்ளார். இதுகுறித்து வடிவேலு கூறும்போது..

நான் நடிக்காத கால கட்டத்தில் சினிமாவுக்கு நிறைய காமெடியர்கள் வந்து விட்டார்கள் என்கின்றனர். நல்ல காமெடி யார் பண்ணினாலும் சிரிப்பு வந்தால் சிரிக்கலாம். நான் ஓரிரு படங்கள் பார்த்தேன். ஆனால் சிரிப்பு வரவில்லை.

முழு படத்தையும் உட்கார்ந்து பார்த்தால் எனது காமெடி நடிப்பை மறந்து விடுவேனோ என்ற பயம் வந்து விட்டது. இதனால் படம் பார்ப்பதையே நிறுத்தி விட்டேன். உயிருக்கும் மனதுக்கும் கெடுதலான விஷயங்களை நம்மிடம் நெருங்க விடக்கூடாது.

காமெடி என்கிற பெயரில் கெட்ட விஷயங்களை காட்டுகிறார்கள். மனைவி, குழந்தைகளோடு அவற்றை எப்படி உட்கார்ந்து பார்க்க முடியும். அந்த காட்சிகளை பார்க்கும் போது மன அழுத்தம்தான் வருகிறது. இதுபோன்றவற்றை பார்த்து மனதையும், கண்ணையும் கெடுத்துக் கொள்ளாதீர்கள் என்று தமிழக மக்களை கேட்டுக் கொள்கிறேன் என்றார்.

அஜித், நயன்தாரா, ஆர்யா, டாப்சி ஆகியோர் நடிப்பில் விஷ்ணுவர்தன் இயக்கிய ஆரம்பம் படம் தீபாவளிக்கு முன் வெளியாகி வெற்றிகரமாக ஓடிக்கொண்டிருக்கிறது. இந்நிலையில் நயன்தாரா அளித்த பேட்டி வருமாறு..

தீபாவளியன்று சென்னையில் இருந்தேன். ஆரம்பம் படம் பார்த்தேன். மாலையில் ஐதராபாத் புறப்பட்டுச் சென்றேன். அஜித்துடன் நான் நடித்துள்ள மூன்றாவது படம் ஆரம்பம். அஜித் தன்னை சுற்றி இருப்பவர்களை அக்கறையோடு கவனித்துக் கொள்கிறார். எனவேதான் சினிமாவில் இருப்பவர்களுக்கும் வெளியில் இருப்பவர்களுக்கும் அஜித்தை பிடிக்கிறது.

நான் 10 வருடங்களாக சினிமாவில் இருக்கிறேன். வெற்றி தோல்விகளையும் பார்த்து விட்டேன். என் வாழ்க்கையில் நிறைய நல்ல விஷயங்கள் நடந்துள்ளன. சந்தோஷமாகவும், மகிழ்ச்சியாகவும் இருந்துள்ளேன். இரண்டு வருடத்துக்கு பிறகு மீண்டும் நடிக்க வந்தேன்.

ரசிகர்கள் ஏற்றுக் கொண்டார்கள் சினிமா துறையினரும் வரவேற்றுள்ளனர். சினிமாவில் விடா முயற்சியும், நேர்மையான உழைப்பும், தன்னம்பிக்கையும் கடவுள் அருளும் இருந்தால் ஜெயிக்கலாம். எனக்கு அது இருக்கிறது.

கவர்ச்சி என்பது உடலோடு சம்பந்தப்பட்டது அல்ல. நீச்சல் உடையை விட பாவாடை தாவணியில் அதிகம் கவர்ச்சியாக தோன்ற முடியும். கரக்டருடன் பொருந்தினால் கவர்ச்சியாக நடிக்கலாம்.

ஆர்யாவுக்கும் எனக்கும் காதல் இல்லை. இருவரும் நண்பர்களாகத்தான் பழகுகிறோம். சினிமாவை தவிர எனக்கும், ஆர்யாவுக்கும் தனித்தனி வாழ்க்கை உள்ளது. காதல் இருந்தால் வெளிப்படையாக அறிவிப்பேன். நாங்கள் நண்பர்கள்தான். நாங்கள் படங்களில் பொருத்தமான ஜோடியாக தெரிகிறோம். எனவேதான் இப்படி வதந்தி பரவுகிறது. நான் இன்னும் தனியாகத்தான் இருக்கிறேன் என்று நயன்தாரா கூறினார்.

தமிழ், தெலுங்கில் முன்னணி நடிகர்களுடன் ஸ்ரேயா நடித்துள்ளார். 2001ல் இருந்து நடித்து வருகிறார். ரஜினி ஜோடியாக சிவாஜி படத்தில் நடித்து மேலும் பிரபலமானார். கடைசியாக தமிழில் ரெளத்திரம் படத்தில் ஜீவா ஜோடியாக நடித்தார். 2011ல் இப்படம் வந்தது. அதன் பிறகு தமிழ் படங்களில் நடிக்கவில்லை.

சமீபத்தில் கன்னடத்தில் நடித்த சந்திரா படத்தை தமிழிலும் வெளியிட்டனர். ஸ்ரேயா மார்க்கெட் வெகுவாக சரிந்து விட்டது. இளம் கதாநாயகிகள் வரத்தால் ஸ்ரேயாவுக்கு படவாய்ப்புகள் வரவில்லை. ஸ்ரேயாவுக்கு 31 வயது ஆகிறது. எனவே அவருக்கு திருமண ஏற்பாடுகள் நடப்பதாகவும் தகவல் வெளியாகியுள்ளது.

இந்த நிலையில் காஜல் அகர்வாலிடம் சினிமாவில் உயர்ந்த நிலையில் இருந்த நடிகை ஒருவர் இப்போது ஓய்வு பெறவேண்டும் என்றால் எந்த நடிகையை சொல்வீர்கள் என்று நிகழ்ச்சியொன்றில் கேட்கப்பட்டது.

அதற்கு ஸ்ரேயா என்று காஜல் பதில் அளித்தார். தொடர்ந்து அவர் கூறும்போது, ரஜினியுடன் நடிக்க வாய்ப்பு கிட்டினால் சம்பளம் வாங்காமல் நடிப்பேன் என்றார். ஸ்ரேயா பற்றி காஜல் அகர்வால் சொன்ன கருத்து திரையுலகில் பரபரப்பை ஏற்படுத்தியுள்ளது.