நடிகை சுவேதா மேனன், கேரள மாநிலம் கொல்லம் தொகுதி எம்.பி. பீதாம்பர குரூப் மீது பாலியல் புகார் கூறினார். இதனைத்தொடர்ந்து கொல்லம் போலீசார் அவர் மீது போலீசார் வழக்குப் பதிவு செய்துள்ளனர்.

தமிழில் அரவான் மற்றும் ஏராளமான மலையாள படங்களில் கவர்ச்சியாக நடித்துள்ளவர் நடிகை சுவேதா மேனன். சமீபத்தில் இவர் தனது பிரசவத்தை மலையாள படம் ஒன்றுக்காக நேரடியாக படமாக்கி பெரும் பரபரப்பை ஏற்படுத்தியவர்.

கொல்லத்தில் நடந்த ஒரு படகு விழாவின் போது கொல்லம் தொகுதி எம்.பி.யும், காங்கிரஸ் மூத்த நிர்வாகியுமான பீதாம்பர குரூப்(71) தன்னிடம் அத்துமீறி பாலியல் சில்மிஷத்தில் ஈடுபட்டதாக சுவேதா மேனன் பரபரப்பு புகார் கூறினார்.

இதுபற்றி சுவேதா மேனன் கூறுகையில், விழாவில் கலந்து கொண்ட என்னிடம் காங்கிரஸ் மூத்த அரசியல்வாதி அத்துமீறி நடந்து கொண்டார். என்னை தொட்டு தொட்டு பேசினார். அதை நான் தவிர்க்க முயன்றபோதும் தொடர்ந்து என்னை துன்புறுத்தி என் நிம்மதியை கெடுத்து விட்டார் என்றார்.

மேலும் தனக்கு பாலியல் சில்மிஷம் செய்த அரசியல்வாதி பற்றி தான் கொல்லம் கலெக்டரிடம் புகார் தெரிவித்ததாகவும், ஆனால் எந்த நடவடிக்கையும் எடுக்காதது தனக்கு வேதனை அளிப்பதாகவும் சுவேதா மேனன் கூறினார். நடிகை சுவேதா மேனனுக்கு நடந்த சம்பவம் கேரளாவில் பரபரப்பை ஏற்படுத்தி உள்ளது. அவருக்கு ஆதரவாக மலையாள திரைப்பட துறையினரும் பெண்கள் அமைப்பினரும் போர்க்கொடி உயர்த்தினார்.

இதனைத்தொடர்ந்து நடிகை சுவேதா மேனனின் பாலியல் புகார் முதல்-மந்திரி உம்மன் சாண்டியின் கவனத்திற்கும் கொண்டு செல்லப்பட்டது. அவர் கொல்லம் உயர்அதிகாரிகளுக்கு இதுகுறித்து நடவடிக்கை எடுக்க உத்தரவிட்டார்.

இதையடுத்து, கொல்லம் எம்.பி. பீதாம்பர குரூப் மீது கொல்லம் போலீசார் நேற்று வழக்குப் பதிவு செய்தனர்.

இந்நிலையில், நடந்த சம்பவத்துக்கு பீதாம்பர குரூப் தன்னிடம் தனிப்பட்ட முறையிலும், பகிரங்கமாகவும் மன்னிப்பு கேட்டதால் போலீசாரிடம் அளித்த புகாரை திரும்ப பெற்றுக் கொண்டதாக சுவேதா மேனன் இ-மெயில் மூலம் ஊடகங்களுக்கு தெரிவித்தார்.

இந்த முடிவு எனது குரு, தந்தை மற்றும் கணவர் ஆகியோருடன் கலந்தாலோசித்த பின்னர் எடுக்கப்பட்டது. எனது மனமாற்றத்தின் பின்னணியில் வேறெந்த நிர்பந்தமும் இல்லை எனவும் அவர் கூறியுள்ளார்.

இந்தி நடிகர் ஷாருக்கான் 47 வயது முடிவடைந்து 48வது வயதில் அடியெடுத்து வைத்தார். இதையொட்டி தனது பிறந்த நாளை அவர் கேக் வெட்டி கொண்டாடினார். இந்த நிகழ்ச்சியில் அவரது குடும்பத்தினர், நெருங்கிய நண்பர்கள் மற்றும் உறவினர்கள் கலந்து கொண்டனர்.

ஏராளமான இந்தி திரையுலக பிரமுகர்கள் டெலிபோன், டுவிட்டர் மூலம் வாழ்த்து தெரிவித்தனர். பின்னர் வீட்டின் வெளியே காத்திருந்து வாழ்த்து தெரிவித்த ரசிகர்களை நோக்கி ஷாருக்கான் கையசைத்து நன்றி தெரிவித்தார். பின்னர் இதுகுறித்து தன் கருத்தை ஷாருக்கான், டுவிட்டர் வலைதளத்தில் பதிவு செய்தார். அதில் அவர் கூறி இருப்பதாவது..

அனைவருக்கும் நன்றி. எனது வீட்டிற்கு வெளியே கையில் பட்டாசு மற்றும் சுவரொட்டிகளை கொண்டு எனக்காக வாழ்த்து தெரிவிக்க வந்த என் ரசிகர்களுக்கு நன்றியை தெரிவித்து கொள்கிறேன். உங்கள் அன்பு என்னை எப்போதும் மகிழ்ச்சியாக வைத்திருக்க உதவுகிறது என்று குறிப்பிட்டு இருந்தார்.

இந்தி நடிகர் அபிசேக் பச்சன், எனது அருமை நண்பரும் வாழ்வின் சிறந்த வழிகாட்டியுமான ஷாருக்கானுக்கு பிறந்த நாள் வாழ்த்தை தெரிவித்து கொள்கிறேன். அவருக்கு இந்த ஆண்டு சிறப்பாக அமையும் என வாழ்த்துச் செய்தி அனுப்பியிருந்தார்.

ராஜஸ்தான் ரோயல் கிரிக்கெட் அணி உரிமையாளர் ராஜ் குந்த்ரா, நடிகர் போமான் இரானி, நடிகர் ரிதேஷ் தேஷ்முக் உள்ளிட்ட ஏராளமான திரையுலக பிரபலங்களும் நடிகர் ஷாருக்கானுக்கு வாழ்த்து தெரிவித்து உள்ளனர்.

2000வது ஆண்டில் உலக அழகி பட்டம் வென்றவர் பிரியங்கா சோப்ரா. அதன் பிறகு இந்திப் படங்களில் கதாநாயகியாக நடித்து வருகிறார். தமிழில் தமிழன் படத்தில் நடித்துள்ளார். 31 வயதாகும் பிரியங்கா சோப்ராவுக்கு ஐஸ்வர்யாராய் மாதிரி திருமண ஆசை வந்துவிட்டது.

தகுதியான மணமகனுக்கு காத்திருப்பதாக கூறியுள்ளார். சமீபத்தில் பிரியங்கா சோப்ராவின் தம்பி சித்தார்த் சோப்ராவுக்கு திருமண நிச்சயதார்த்தம் நடந்தது. அடுத்த ஆண்டு திருமணம் நடக்கிறது. அப்போது பிரியங்கா சோப்ரா தனது திருமணம் பற்றி கூறியதாவது..

எனது தம்பி கனிகா மாத்தூர் என்ற பெண்ணை 3 ஆண்டுகளாக காதலித்தான். அவர்கள் திருமணம் செய்ய முடிவு செய்தனர். அது அவர்கள் முடிவு. அவர்களுக்கு நாங்கள் ஆதரவு கொடுக்க வேண்டியது கட்டாயம். ஆனால் நான் திருமணம் செய்வதற்கு எந்த நெருக்கடியும் இல்லை.

பெற்றோரோ குடும்பத்தினரோ எந்த நிர்பந்தமும் செய்யவில்லை. என்றாலும் எனக்கு தகுதியான மணமகன் கிடைக்கவில்லை. தகுதியான மணமகன் கிடைத்தால் திருமணத்துக்கு தயார். திருமணம் செய்து குடும்ப வாழ்க்கையில் மூழ்கி விடுவேன் என்று பிரியங்கா சோப்ரா கூறினார்.

சிம்பு நடிப்பில் உருவாகும் வாலு படத்தின் வேலைகள் கிட்டத்தட்ட முடிவடைந்ததையடுத்து தற்போது பாண்டிராஜ் இயக்கும் புதிய படமொன்றில் நடித்து வருகிறார். இப்படத்தின் படப்பிடிப்புகள் தொடங்கி விறுவிறுப்பாக நடந்து வருகிறது.

இதுவரை ஆக்ஷன், ரொமாண்டிக் ஹீரோவாக வலம்வந்த சிம்பு இந்த படத்தில் முதன்முறையாக காமெடிக்கு முக்கியத்துவம் கொடுத்து நடிக்கப் போகிறாராம். அதற்காக சிம்பு-சந்தானம் கூட்டணி போட்டிருக்கும் இந்த படத்தில் இப்போது இன்னொரு காமெடி நடிகரான சூரியையும் களமிறங்கியுள்ளனர்.

இப்படத்தின் படப்பிடிப்பு நடக்கும் இடங்களில் சிம்புவை பார்க்க ஏராளமான ரசிகர்கள் படையெடுக்கின்றனராம். இதுவரை இல்லாத அளவுக்கு தன்னை பார்க்க இவ்வளவு ரசிகர்கள் கூடுவது சிம்புவை உற்சாகத்தில் ஆழ்த்தியுள்ளதாம். அதே உற்சாகத்துடன் இந்த படத்திலும் நடித்து வருகிறாராம் சிம்பு.

கமல் தற்போது விஸ்வரூபம் படத்தின் இரண்டாம் பாகத்தில் பிசியாக இருக்கிறார். முதல் பாகத்தை வெளியிடுவதில் பெரும் சர்ச்சைகளை சந்தித்து அப்படத்தை வெளியிடுவதற்குள் படாதாபாடு பட்டுவிட்டார். இறுதியில் அப்படம் வெளியாகி அவருக்கு சுமார் 200 கோடி வரை வசூலை வாரித் தந்தது.

இதேபோல் விஸ்வரூபம்-2 பாகத்திலும் வசூலை வாரிக்குவித்துவிட வேண்டும் என்று முனைப்பில் உள்ளார். நல்ல படங்களை கொடுத்தால் ஆயிரம் கோடி ரூபாய் வரை வசூலிக்க முடியும் என்கிறார் கமல்.

இதுகுறித்து அவர் கூறும்போது 200 கோடியெல்லாம் பெரிய வசூல் கிடையாது. அதிகபட்சமாக ஆயிரம் கோடி ரூபாய் வரை நம்மால் வசூலிக்க முடியும். காரணம், 100 கோடி ரசிகர்களை நாம் வைத்திருக்கிறோம். அதனால், அவர்கள் விரும்பும் வகையில் படங்கள் கொடுத்தால் கண்டிப்பாக 1000 கோடி வரை வசூல் செய்துவிடலாம். வருங்காலத்தில் இதை செய்து காட்டவேண்டும் என்ற ஆர்வம் என்னுள் உள்ளது என்று அவர் கூறினார்.