கேரளாவில் கோவிலில் சாமி தரிசனம் செய்துவிட்டுத் திரும்பிய பல்பொருள் அங்காடி ஊழியர் ஒருவருக்கு, கேரள அரசின் ‘சம்மர் பம்பர்’ லொத்தர் சீட்டில் 10 கோடி ரூபாய் (இந்திய மதிப்பு) பரிசாகக் கிடைத்துள்ள சம்பவம் இன்று இடம்பெற்றுள்ளது.

இது தொடர்பில் இந்திய ஊடகங்கள் குறிப்பிட்டுள்ளதாவது, கேரள மாநிலம் மலப்புரம் மாவட்டம், பரப்பனங்காடியைச் சேர்ந்த 51 வயதான நதுவெட்டில் பத்மநாபன் என்பவர், கடந்த 8 ஆண்டுகளாக கோழிச்சேனாவில் உள்ள குடும்பத்தினர் அளவற்ற மகிழ்ச்சிபல்பொருள் அங்காடி ஒன்றில் ஊழியராகப் பணியாற்றி வருகிறார்.

வழக்கமாக லொத்தர் சீட்டு வாங்கும் பழக்கம் இல்லாத பத்மநாபன், அண்மையில் கோயம்புத்தூரில் உள்ள ஒரு கோவிலுக்குச் சென்று சாமி தரிசனம் செய்துள்ளார்.

தரிசனம் முடிந்து கடந்த மார்ச் 26 ஆம் திகதி கோயம்புத்தூரிலிருந்து பாலக்காடு நோக்கிச் சென்றபோது, தற்செயலாக 250 ரூபாய் மதிப்புள்ள கேரள அரசின் ‘சம்மர் பம்பர்’ லொத்தர் சீட்டு ஒன்றை வாங்கியுள்ளார்.

குலுக்கல் முடிவுகள் வெளியானபோது, பத்மநாபன் வாங்கிய SB 517026 என்ற இலக்கமுடைய சீட்டிற்கு முதல் பரிசான 10 கோடி ரூபாய் கிடைத்துள்ளதாக அதிகாரபூர்வமாக அறிவிக்கப்பட்டது. எதிர்பாராத இந்த இமாலயப் பரிசுத் தொகையினால் பத்மநாபன் மற்றும் அவரது குடும்பத்தினர் அளவற்ற மகிழ்ச்சியில் ஆழ்ந்துள்ளனர்.

வெற்றி பெற்ற லொத்தர் சீட்டை பத்மநாபன் பரப்பனங்காடியில் உள்ள எஸ்பிஐ (SBI) வங்கி மேலாளரிடம் ஒப்படைத்து, பரிசுத் தொகையைப் பெறுவதற்கான நடவடிக்கைகளை முன்னெடுத்துள்ளார்.

ஒரு சாதாரண பல்பொருள் அங்காடி ஊழியராகத் தனது வாழ்க்கையை நகர்த்தி வந்த பத்மநாபனின் வாழ்வில், இந்த அதிர்ஷ்டம் ஒரு மிகப்பெரிய திருப்புமுனையை ஏற்படுத்தியுள்ளது.

பெங்களூருவில் 11 மாத குழந்தை உயிரிழந்த சோகத்தில் தாய் உயிரை மாய்த்துக் கொண்ட சம்பவம் அதிர்ச்சியை ஏற்படுத்தியுள்ளது. கடந்த புதன்கிழமை பெங்களூருவில் 29 வயது மென்பொறியாளரான தாய் பிரதீபா துவைத்த துணிகளை மாடியில் போடுவதற்காக சென்றுள்ளார்.

அப்போது சலவை இயந்திரம் வைக்கப்பட்டிருந்த பகுதிக்கு தவழ்ந்த வந்த அவரது 11 மாத குழந்தை அங்கிருந்த தண்ணீர் நிரப்பப்பட்ட வாளிக்குள் எதிர்பாராதவிதமாக விழுந்து மூழ்கியுள்ளது.

தாய் பிரதீபா மாடியிலிருந்து கீழே இறங்கி வரும் போது தண்ணீர் வாளிக்குள் குழந்தை அசைவு இல்லாமல் கிடப்பதை பார்த்து நிலைகுலைந்து உள்ளார்.

குழந்தை இறப்பிற்கு தானே காரணம் என்ற குற்ற உணர்ச்சியில் ஆழ்ந்த பிரிதீபா தன் உயிரை மாய்த்துக் கொள்ளவும் முடிவெடுத்துள்ளார்.

பிரதீபாவின் கணவர் வேலை முடிந்து வீட்டிற்கு வந்து பார்த்த போது மனைவி மற்றும் குழந்தை சடலமாக கிடப்பதை பார்த்து அதிர்ச்சியடைந்துள்ளார்.

இதையடுத்து சம்பவ இடத்திற்கு விரைந்த காவல்துறையினர், பிரிதீபா எழுதி வைத்திருந்த கடிதத்தை கைப்பற்றினர்.

அதில் தான் மாடிக்குச் சென்ற போது இந்த சம்பவம் நடந்தததால் குழந்தை உயிரிழப்பிற்கு நான் மட்டுமே பொறுப்பு என்று உருக்கமாக குறிப்பிட்டுள்ளார்.

இது தொடர்பாக வழக்குப்பதிவு செய்துள்ள காவல்துறையின் தற்போது தீவிர விசாரணையை முடுக்கி விட்டுள்ளனர்.

உத்தரப் பிரதேச மாநிலம் பரேலியில் தனியார் மருத்துவமனையில் செவிலியராகப் பணியாற்றி வந்த இளம்பெண் ஒருவர், காதல் திருமணம் செய்த 15 நாட்களிலேயே தற்கொலை செய்துகொண்ட சம்பவம் பெரும் அதிர்ச்சியை ஏற்படுத்தியுள்ளது.

பதாயூன் பகுதியைச் சேர்ந்த இளைஞரைத் தீவிரமாகக் காதலித்து வந்த இவர், இருவீட்டாரின் எதிர்ப்பையும் மீறி கடந்த 15 நாட்களுக்கு முன்புதான் நீதிமன்றத்தில் முறைப்படி திருமணம் செய்துகொண்டார்.

திருமணத்திற்குப் பிறகு கணவர் வீட்டில் வசித்து வந்த அந்தப் பெண், திடீரென தனது சகோதரர் வீட்டிற்குத் திரும்பிய நிலையில் இந்தத் துயர முடிவு எடுத்துள்ளார்.

வெள்ளிக்கிழமை இரவு தனது அறையில் தூக்கிட்டுத் தற்கொலை செய்துகொண்ட நிலையில் கண்டெடுக்கப்பட்ட அந்தப் பெண்ணின் உடலை மீட்ட காவல்துறையினர், அங்கு ஒரு கடிதத்தையும் கைப்பற்றினர்.

அந்தத் தற்கொலைக் குறிப்பில் தனது மரணத்திற்கு யாரும் காரணமல்ல என்று அவர் குறிப்பிட்டிருந்தாலும், சிறுவயதிலேயே பெற்றோரை இழந்தது முதல் அவர் நீண்டகாலமாக மன உளைச்சலில் இருந்ததாகத் தெரியவருகிறது.

காதலித்து கரம் பிடித்த கணவருடன் வாழ்ந்த சில நாட்களிலேயே இவருக்குள் ஏற்பட்ட மன அழுத்தமே இந்த விபரீத முடிவுக்குக் காரணமாக இருக்கலாம் என அக்கம் பக்கத்தினர் தெரிவிக்கின்றனர்.

காவல்துறையினரின் முதற்கட்ட விசாரணையில், திருமணமான சில நாட்களிலேயே கணவன் மற்றும் மனைவிக்கு இடையே கடுமையான கருத்து வேறுபாடுகள் நிலவி வந்தது வெளிச்சத்திற்கு வந்துள்ளது.

கடந்த 5 நாட்களுக்கு முன்பு இவரது கணவர் விஷம் குடித்துத் தற்கொலைக்கு முயன்றதும், 2 நாட்களுக்கு முன்பு இருவருக்கும் இடையே நேரில் வாக்குவாதம் நடந்ததும் விசாரணையில் உறுதி செய்யப்பட்டுள்ளது.

தற்கொலைக் குறிப்பில் யாரையும் குற்றஞ்சாட்டவில்லை என்றாலும், குடும்ப வாழ்க்கையில் ஏற்பட்ட சிக்கல்கள் குறித்து காவல்துறையினர் தொடர்ந்து தீவிர விசாரணை மேற்கொண்டு வருகின்றனர்.

தூத்துக்குடி மாவட்டம் ஓட்டப்பிடாரம் அருகேயுள்ள புதியம்புத்தூரைச் சேர்ந்த செல்வகுமார் என்பவரின் மகள் செல்வசுஹாசினி தூத்துக்குடியில் உள்ள தனியார் பள்ளியில் பதினொன்றாம் வகுப்பு பயின்று வந்தார்.

கடந்த இரண்டு மாதங்களுக்கு முன்பு வீட்டில் வளர்க்கும் நாயுடன் விளையாடிக்கொண்டிருந்தபோது எதிர்பாராத விதமாக அந்த நாயின் நகம் பட்டு மாணவிக்கு உடலில் சிறு கீறல் ஏற்பட்டுள்ளது.

நாய் கீறல் தானே என்று அலட்சியமாக இருந்த மாணவி அதற்குரிய முறையான மருத்துவ சிகிச்சையோ அல்லது தடுப்பூசியோ எடுத்துக்கொள்ளவில்லை என்று கூறப்படுகிறது.

இந்த நிலையில் கடந்த 28 ஆம் தேதி மாணவிக்குத் திடீரென உடல்நலக் குறைவு ஏற்பட்டதை அடுத்து அவர் உடனடியாக தூத்துக்குடி அரசு மருத்துவமனையில் அனுமதிக்கப்பட்டார்.

அங்கு அவரைப் பரிசோதித்த மருத்துவர்கள் நாய் கீறியதன் மூலம் பரவிய விஷம் மாணவியின் உடல் முழுவதும் பரவி இருப்பதை உறுதி செய்தனர்.

இதையடுத்து மேல் சிகிச்சைக்காக மதுரை ராஜாஜி அரசு மருத்துவமனைக்கு மாற்றப்பட்ட மாணவிக்கு அங்கு தீவிர சிகிச்சை பிரிவில் மருத்துவர்கள் தொடர்ந்து சிகிச்சை அளித்து வந்தனர்.

மருத்துவர்களின் தீவிர கண்காணிப்பில் இருந்த மாணவி செல்வசுஹாசினி சிகிச்சை பலனின்றி நேற்று முன்தினம் பரிதாபமாக உயிரிழந்தார்.

வளர்ப்பு நாயின் நகம் பட்டதைச் சாதாரணமாக நினைத்து உரிய நேரத்தில் தடுப்பூசி செலுத்தாததால் 16 வயது மாணவியின் உயிர் பறிபோன சம்பவம் அந்தப் பகுதியில் பெரும் சோகத்தை ஏற்படுத்தியுள்ளது.

இந்தத் துயர சம்பவம் குறித்து காவல் துறையினர் வழக்குப் பதிவு செய்து விசாரணை நடத்தி வரும் நிலையில் வளர்ப்பு விலங்குகளிடம் பொதுமக்கள் எச்சரிக்கையாக இருக்க அறிவுறுத்தப்பட்டுள்ளனர்.

கர்நாடக மாநிலம் மைசூரு மாவட்டம் உன்சூர் அருகே உள்ள தொட்ட ஹெஜ்ஜூரு கிராமத்தில், விளையாடிக் கொண்டிருந்த 7 மாத ஆண் குழந்தை செம்பருத்தி பூவின் காம்பை விழுங்கியதால் உயிரிழந்த சோகம் நிகழ்ந்துள்ளது.

சுதர்சன் மற்றும் நவ்யா தம்பதியினரின் மகனான சின்மயி என்ற அந்தச் சிறுவன், வீட்டில் தவழ்ந்து விளையாடிக் கொண்டிருந்தான்.

அப்போது வீட்டின் பூஜை அறை கதவில் அலங்காரத்திற்காக வைக்கப்பட்டிருந்த செம்பருத்தி பூவை எடுத்து விளையாடிய குழந்தை, எதிர்பாராத விதமாக அதன் காம்புப் பகுதியை விழுங்கியுள்ளது.

சமையல் அறையில் தாய் நவ்யா வேலை செய்து கொண்டிருந்தபோது, குழந்தையின் அண்ணன் தம்பியின் வாயில் பூவின் காம்பு சிக்கியிருப்பதைப் பார்த்து எடுக்க முயற்சி செய்துள்ளான்.

ஆனால், அந்தக் காம்பு குழந்தையின் தொண்டையில் ஆழமாகச் சிக்கிக் கொண்டதால் சிறுவனால் சுவாசிக்க முடியாமல் திணறல் ஏற்பட்டுள்ளது. பதற்றமடைந்த குடும்பத்தினர் உடனடியாகக் குழந்தையை மீட்டு அருகில் உள்ள தனியார் மருத்துவமனைக்குக் கொண்டு சென்றனர்.

அங்கு குழந்தையைப் பரிசோதித்த மருத்துவர்கள், சுவாசப் பாதையில் பூவின் காம்பு சிக்கியிருப்பதை உறுதி செய்து தீவிர சிகிச்சை அளித்தனர்.

மருத்துவர்களின் தீவிர முயற்சி தோல்வியில் முடிந்த நிலையில், சிகிச்சை பலனின்றி 7 மாதக் குழந்தை சின்மயி பரிதாபமாக உயிரிழந்தான்.

தன் கண் முன்னாலேயே விளையாடிக் கொண்டிருந்த குழந்தை இப்படி ஒரு விபத்தில் சிக்கி உயிரிழந்ததைக் கண்டு பெற்றோர் கதறி அழுதது அங்கிருந்தவர்களைக் கலங்கச் செய்தது.

இந்தத் துயரச் சம்பவம் குறித்து உன்சூர் புறநகர்க் காவல்துறையினர் வழக்குப் பதிவு செய்து விசாரணை நடத்தி வருகின்றனர். பச்சிளம் குழந்தைகள் இருக்கும் வீடுகளில் பெற்றோர்கள் மிகுந்த எச்சரிக்கையுடன் இருக்க வேண்டும் என்பதை இந்தச் சம்பவம் உணர்த்துகிறது.