மிரிகான பொலிஸ் பிரிவிற்குட்பட்ட நாவல வீதியில், நாவல சந்தியிலிருந்து மிரிகானை நோக்கிப் பயணித்த ஜீப் வண்டியொன்று திறந்த பல்கலைக்கழகத்திற்கு முன்னால் உள்ள பாதசாரிக் கடவையில் பெண் ஒருவர் கடப்பதற்காக நிறுத்தப்பட்டிருந்தது.
இதன்போது, பின்னால் வந்த கெப் ரக வாகனமொன்று குறித்த ஜீப் வண்டியின் பின்புறத்தில் மோதியுள்ளது. இம்மோதலின் அழுத்தத்தினால் ஜீப் வண்டி முன்னோக்கி நகர்ந்து வீதியைக் கடக்க முயன்ற பெண் மீது மோதியுள்ளது.
இவ்விபத்தில் படுகாயமடைந்த பல்லேவெல பகுதியைச் சேர்ந்த 23 வயதுடைய பெண் களுபோவில வைத்தியசாலையில் அனுமதிக்கப்பட்டு சிகிச்சை பெற்று வந்த நிலையில் உயிரிழந்துள்ளார். இவ்விபத்துடன் தொடர்புடைய ஜீப் மற்றும் கப் ரக வாகனங்களின் சாரதிகள் இருவரும் கைது செய்யப்பட்டுள்ளனர்.
தமிழ்நாட்டில் நடைபெற்ற மாநில அளவிலான கல்லூரி மற்றும் பாடசாலைகளுக்கு இடையிலான நீச்சல் போட்டியில் அபார திறமையை வெளிப்படுத்தி, சாம்பியன் பட்டத்தையும் பதக்கங்களையும் வென்று ஈழத்துச் சகோதரிகளான தனுஜா மற்றும் டிலாஜினி ஆகியோர் சாதனை படைத்துள்ளனர்.
கடந்த சனிக்கிழமை நாமக்கல் மாவட்டத்தில் இம்மாநில அளவிலான நீச்சல் போட்டிகள் நடைபெற்றன. இதில் கல்லூரி மாணவிகளுக்கான பிரிவில் பங்கேற்ற தனுஜா சாம்பியன் கிண்ணத்தைக் கைப்பற்றி முதலிடம் பிடித்தார்.
அதேவேளை, பாடசாலை மாணவிகளுக்கான பிரிவில் பங்கேற்ற டிலாஜினி, மூன்று போட்டிகளில் முதலிடத்தைப் பெற்று 3 தங்கப் பதக்கங்களையும், இரண்டு போட்டிகளில் இரண்டாம் இடத்தைப் பெற்று 2 வெள்ளிப் பதக்கங்களையும் வென்று சாதனை படைத்தார்.
தமிழ்நாட்டில் அகதிகளாக வாழ்ந்து வரும், யாழ்ப்பாணம் – வல்வெட்டித்துறையைச் சேர்ந்த ஜெயக்குமார் – அருள்ஜோதி தம்பதியரின் புதல்விகளான தனுஜா மற்றும் டிலாஜினி ஆகியோர்,
நீண்டகாலமாகவே இந்தியளவில் நடைபெறும் பல்வேறு நீச்சல் போட்டிகளில் பங்கேற்றுத் தமது அபார திறமைகளை வெளிப்படுத்தித் தொடர்ச்சியாகச் சாதனைகளைப் படைத்து வருகின்றமை குறிப்பிடத்தக்கது.
டுபாய் சர்வதேச விமான நிலையத்தில் காணாமல் போன தனது பூனையை தேடி 28 மணி நேரமாக அலைந்து திரிந்த இலங்கை பெண், மீண்டும் நாடு திரும்பியுள்ளார். அவிஷ்கா கவுமதி என்ற இலங்கை பெண்ணின் பூனை டுபாய் சர்வதேச விமான நிலையத்தில் காணாமல் போயுள்ள நிலையில் அதனை கண்டுபிடிக்கும் முயற்சியில் ஈடுபட்டுள்ளார்.
விமான நிலையத்தில் காணாமல் போன தனது செல்லப் பிராணி இன்றி இலங்கை செல்ல மறுத்த பெண், பல மணி நேரம் அதனை தேடும் நடவடிக்கையில் ஈடுபட்டார். எனினும் பூனை கிடைக்காத நிலையில் இலங்கைக்கு திருப்ப வேண்டிய கட்டாய நிலை அவருக்கு ஏற்பட்டுள்ளது.
இந்நிலையில் காணாமல் போன பூனையை கண்டுபிடித்து தரும்படி டுபாய் வாழ் இலங்கையர்களிடம் சமூக வலைத்தளம் ஊடாக கோரிக்கை விடுத்துள்ளார். அத்துடன் டுபாய் விமான நிலையத்தில் பணியாற்றும் ஊழியர்களிடமும் உருக்கமான கோரிக்கை ஒன்றும் குறித்த பெண் முன்வைத்துள்ளார்.
தலவாக்கலையில் 13 வயதான தனது மகளை தகாத செயற்பாட்டுக்கு உட்படுத்திய 39 வயதான தந்தையை பொலிஸார் கைது செய்துள்ளனர். குறித்த சிறுமி சில வாரங்களாக பாடசாலைக்கு வராத நிலையில், அது குறித்து ஆராயுமாறு பாடசாலையின் அதிபர் பொலிஸாரிடம் கோரிக்கை விடுத்திருந்தார்.
அதற்கமைய, தலவாக்கலை பொலிஸார் சிறுமி, தந்தை மற்றும் தாயாரை பொலிஸ் நிலையத்திற்கு வரவழைத்துள்ளனர். அங்கு சிறுமி பாடசாலைக்கு செல்லாததற்கான காரணத்தை கேட்டு விசாரணை நடத்தியுள்ளனர். இதன்போது, தந்தையின் தகாத செயற்பாடு குறித்து பொலிஸாரிடம் தெரிவித்துள்ளார்.
இதனை தொடர்ந்து சந்தேகநபரை பொலிஸார் கைது செய்து நுவரெலியா மாவட்ட நீதிமன்றத்தில் முன்னிலைப்படுத்தியதை அடுத்து அவர் இன்று வரை விளக்கமறியலில் வைக்கப்பட்டார்.
சிறுமி மருத்துவ பரிசோதனைகளுக்காக நுவரெலியா ஆதார வைத்தியசாலையில் அனுமதிக்கப்பட்டுள்ளார். தலவாக்கலை பொலிஸ் நிலையப் பொறுப்பதிகாரி பிரதான பொலிஸ் பரிசோதகர் நலின் திசாநாயக்கவின் அறிவுறுத்தலின் பேரில் மேலதிக விசாரணைகள் முன்னெடுக்கப்பட்டுள்ளது.
கனடாவின் பிராம்ப்டன் பகுதியில் இடம்பெற்ற கத்திக்குத்துச் சம்பவம் தொடர்பாக, கொலை முயற்சி குற்றச்சாட்டில் தேடப்பட்டு வந்த 35 வயதான தமிழ் இளைஞர் பொலிஸில் சரணடைந்துள்ளதாக பீல் பிராந்திய பொலிஸார் தெரிவித்துள்ளனர்.
விமல் மோகன் என்ற குறித்த இளைஞர், தன்னிச்சையாக முன்வந்து உள்ளூர் பொலிஸ் நிலையத்தில் சரணடைந்துள்ளதாகத் தெரிவிக்கப்படுகிறது. பிராம்ப்டன் பகுதியில் கடந்த 7ஆம் திகதி இடம்பெற்ற கத்திக்குத்துச் சம்பவத்தில் ஒருவர் காயமடைந்திருந்தார்.
கத்திக்குத்துக்கு இலக்கான அவர் உடனடியாக வைத்தியசாலையில் அனுமதிக்கப்பட்டு, தீவிர சிகிச்சைப் பிரிவில் சிகிச்சை பெற்று வந்ததாகத் தெரிவிக்கப்பட்டுள்ளது.
இந்தச் சம்பவத்துடன் விமல் மோகனுக்குத் தொடர்பு இருப்பதாகக் கண்டறிந்த பொலிஸார், அவருக்கு எதிராகக் கொலை முயற்சி குற்றச்சாட்டில் வழக்குப் பதிவு செய்து தேடுதல் நடவடிக்கைகளை முன்னெடுத்திருந்தனர்.
இந்நிலையில், தேடப்பட்டு வந்த விமல் மோகன் பொலிஸ் நிலையத்திற்குச் சென்று சரணடைந்துள்ளதாக பீல் பிராந்திய பொலிஸார் தெரிவித்துள்ளனர். இந்தச் சம்பவம் தொடர்பான மேலதிக சட்ட நடவடிக்கைகள் குறித்த தகவல்கள் இதுவரை வெளியாகவில்லை.
நாட்டின் பல பகுதிகளில் தற்போது இன்ஃபுளுவென்சா நோயாளர்களின் எண்ணிக்கை அதிகரித்து வருவதாக தொற்றுநோயியல் பிரிவு தெரிவித்துள்ளது. இது தொடர்பில் பொதுமக்கள் தேவையற்ற அச்சம் கொள்ளத் தேவையில்லை என அதன் பிரதான தொற்றுநோயியல் நிபுணர், விசேட வைத்தியர் பாலித கருணாபேம தெரிவித்துள்ளார்.
சுகாதார மேம்பாட்டுப் பணியகத்தில் நடைபெற்ற ஊடகவியலாளர் சந்திப்பில் கலந்துகொண்டு கருத்துத் தெரிவிக்கும்போதே விசேட அவர் மேற்கண்டவாறு குறிப்பிட்டார்.
“எங்களின் கண்காணிப்பு அமைப்பு ஊடாக கடந்த 3, 4 வாரங்களாக இன்ஃபுளுவென்சா நோயாளர்களின் அதிகரிப்பை எம்மால் அவதானிக்க முடிகிறது. கடந்த வார நிலவரப்படி பெறப்பட்ட மாதிரிகளில் சுமார் 35% ஆனோர் இன்ஃபுளுவென்சா நோயாளர்கள் என்பது தெரியவருகிறது.
அதாவது, இக்காலப்பகுதியில் பரவிவரும் இருமல், சளி, காய்ச்சல் போன்ற நோய்களால் பாதிக்கப்படுவோரில் பெரும்பான்மையினருக்கு இன்ஃபுளுவென்சா தொற்று ஏற்பட்டுள்ளதை நாம் காண்கிறோம்.
எனினும், இந்நோய் நிலையானது முறையான சிகிச்சைகளுடன் 3 முதல் 4 நாட்களுக்குள் எவ்வித பெரிய சிக்கலுமின்றி குணமடையக் கூடியதாகும். எனவே, இது குறித்து பொதுமக்கள் தேவையற்ற அச்சம் கொள்ளத் தேவையில்லை.
அதேசமயம், கர்ப்பிணித் தாய்மார்கள், சிறுவர்கள், முதியவர்கள் மற்றும் நீரிழிவு, இதய நோய், சிறுநீரக நோய் போன்ற தொற்றா நோய்களால் பாதிக்கப்பட்டுள்ள நபர்களுக்கு இன்ஃபுளுவென்சா தொற்றினால் சிலவேளைகளில் சிக்கல்கள் ஏற்படக்கூடும்.
எனவே, இது குறித்து விழிப்புடன் இருக்க வேண்டும்.” என்றார். இதன்போது மேலும் கருத்துத் தெரிவித்த விசேட வைத்தியர் பாலித கருணாபேம,”இந்நோயானது இருமல் மற்றும் சளி போன்றவற்றுடன் வெளிவரும் நீர்த்துளிகள் ஊடாகப் பரவுகிறது. அதுமட்டுமின்றி தொடுகை மூலமாகவும் இந்நோய் பரவக்கூடும். எனவே, இந்நோயைத் தவிர்ப்பதற்கான முன்னெச்சரிக்கை நடவடிக்கைகளை எடுக்குமாறு நாம் எப்போதும் குறிப்பிடுகிறோம்.
இந்நோய் தாக்கியவர்கள் 2, 3 நாட்கள் வீட்டில் தங்கி ஓய்வெடுப்பது அவசியமாகும். மேலும், அடிக்கடி சவர்க்காரம் கொண்டு கைகளைக் கழுவுதல் மற்றும் நோய்த் தாக்கம் உள்ளவர்கள் முகக்கவசம் அணிவதன் மூலம் நோய்ப் பரவலைத் தடுத்துக்கொள்ள முடியும்” என்றார்.
கனடா குடியுரிமை பெற்ற இலங்கை வம்சாவளியைச் சேர்ந்த 48 வயதுடைய நபர் ஒருவரை, நாகப்பட்டினம் கோடியக்கரையில் கியூ பிரிவு பொலிஸாரால் தடுத்து வைத்து விசாரணை செய்துவருவதாக இந்திய ஊடகம் செய்தி வௌியிட்டுள்ளது.
பைபர் படகு (Fibre boat) மற்றும் படகு மோட்டார் இயந்திரம் ஒன்றை கொள்வனவு செய்தமை தொடர்பிலேயே அவரிடம் இந்த விசாரணை இடம்பெற்று வருவதாக தெரிவிக்கப்படுகின்றது. ஏ.போல் என அடையாளம் காணப்பட்ட அந்த நபர், திங்கட்கிழமை மாலை முதல் கோடியக்கரையில் உள்ள தனியார் விருந்தினர் விடுதி ஒன்றில் தங்கியிருந்துள்ளார்.
சந்தேகத்தின் பேரில் அவரைச் செவ்வாய்க்கிழமை காலை கைது செய்த கியூ பிரிவு அதிகாரிகள், விசாரணைகளைத் தொடங்கியுள்ளனர். சந்தேகநபர் செப்டம்பர் 23 ஆம் திகதி அன்று கனடாவில் இருந்து, கட்டார் வழியாக செப்டம்பர் 25 ஆம் திகதி அன்று சென்னை விமான நிலையத்தை வந்தடைந்துள்ளார்.
சென்னையில் ஒரு நாள் தங்கியிருந்த அவர், செப்டம்பர் 27 ஆம் திகதி அன்று வேதாரண்யத்திற்குப் பயணம் செய்து, அங்குள்ள தனியார் விடுதி ஒன்றில் தங்கியுள்ளார்.
பின்னர் கோடியக்கரையில் உள்ள தனியார் விருந்தினர் விடுதிக்கு மாறியுள்ளதாக பொலிஸ் ஆரம்ப கட்ட விசாரணையில் தெரியவந்துள்ளது. சுற்றுலா விசா மூலம் இந்தியாவுக்குள் நுழைந்ததாகக் கூறப்படும் இவர், 1.29 இலட்சம் இந்திய ரூபாய் மதிப்பில் படகு இயந்திரத்தையும், 50,000 ரூபாய் மதிப்பில் பைபர் படகு ஒன்றையும் கொள்முதல் செய்துள்ளார்.
அந்தப் படகு, இயந்திரம் மற்றும் ஏனைய பொருட்களைப் பறிமுதல் செய்துள்ள பொலிஸார், இவற்றை கொள்வனவு செய்ததன் நோக்கத்தைக் கண்டறிவதற்காக அவரிடம் தீவிர விசாரணை நடத்தி வருவதாகவும் த ஹிந்து செய்தி வௌியிட்டுள்ளது.
மாத்தளை பொலிஸ் பிரிவுக்குட்பட்ட கண்டி – யாழ்ப்பாணம் வீதியின் மரதன்கடவல பகுதியில், மாத்தளையிலிருந்து தம்புள்ளை நோக்கிச் சென்ற மோட்டார் சைக்கிள் ஒன்று எதிரே வந்த காருடன் மோதி விபத்துக்குள்ளாகியுள்ளது.
விபத்தில் படுகாயமடைந்த மோட்டார் சைக்கிள் ஓட்டுநர் மாத்தளை வைத்தியசாலையில் அனுமதிக்கப்பட்ட பின்னர் உயிரிழந்துள்ளார்.
உயிரிழந்தவர் ஹதரலியத்த பகுதியைச் சேர்ந்த 19 வயதுடைய இளைஞராவார். சம்பவம் தொடர்பில் பொலிஸார் மேலதிக விசாரணைகளில் ஈடுபட்டு வருகின்றனர்.
வவுனியா மாவட்ட செயலகமும் தேசிய முதியோர் செயலகமும் இணைந்து ஏற்பாடு செய்த மாவட்ட முதியோர் தின விழா நிகழ்வு இன்று (14.10.2026) மாவட்ட செயலக மண்டபத்தில் மிகவும் சிறப்பாக நடைபெற்றது.
சமூகத்திற்கு முதியவர்கள் ஆற்றிய பங்களிப்பைக் கௌரவிக்கும் வகையிலும், அவர்களின் அறிவையும் அனுபவத்தையும் போற்றும் வகையிலும் இந்நிகழ்வு ஒருங்கிணைக்கப்பட்டிருந்தது.
முதியோர்களின் கலை நிகழ்ச்சிகள்
இவ்விழாவில் வவுனியா மாவட்டத்தின் நான்கு பிரதேச செயலகப் பிரிவுகளையும் பிரதிநிதித்துவப்படுத்தி பெருமளவிலான முதியவர்கள் ஆர்வத்துடன் கலந்து கொண்டனர்.
நிகழ்வின் சிறப்பம்சமாக முதியோர்களின் திறமைகளை வெளிப்படுத்தும் வகையில் நடனம், நாடகம் மற்றும் பாடல் உள்ளிட்ட பல்வேறு வண்ணமயமான கலை நிகழ்ச்சிகள் இடம்பெற்று அரங்கை மகிழ்வித்தன.
இந்நிகழ்வில் வவுனியா மாவட்ட செயலாளர், மேலதிக மாவட்ட செயலாளர் (காணி), உதவி மாவட்ட செயலாளர் மற்றும் உதவித் திட்டமிடல் பணிப்பாளர் உள்ளிட்ட பல உயர் அதிகாரிகளும் அரசு அலுவலர்களும் கலந்து சிறப்பித்தனர்.
விழாவின் போது கருத்து தெரிவித்த அதிகாரிகள், “முதியோர்கள் எமது சமூகத்தின் விலைமதிப்பற்ற பொக்கிஷங்கள். அவர்களின் அனுபவமும் வழிகாட்டலும் இளைய தலைமுறைக்கு என்றும் வழிகாட்டும் ஒளியாக அமைகின்றன.
அவர்களை அன்புடனும் மரியாதையுடனும் அரவணைத்து, அவர்களுக்கான கண்ணியமான வாழ்வை உறுதிப்படுத்துவது நம் அனைவரினதும் தலையாய கடமையாகும்” என வலியுறுத்தினர். நிகழ்வின் இறுதியில் பங்குபற்றிய முதியவர்களுக்கு வாழ்த்துகளும் கௌரவங்களும் வழங்கப்பட்டன.
டிப்பர் ரக வாகனங்களை நிதி நிறுவனங்களில் இருந்து குத்தகை அடிப்படையில் பெற்று அவற்றின் பகுதிகளை பிரித்து விற்பனை செய்த ஒருவர் வவுனியா மாவட்ட குற்றவிசாரணை பொலிசாரால் கைதுசெய்யப்பட்டார்.
இது தொடர்பான முறைப்பாடுகள் பொலிசாருக்கு வழங்கப்பட்டிருந்தது. இதனையடுத்து விசாரணைகளை முன்னெடுத்த பொலிசார் வவுனியா தாண்டிக்குளம் பகுதியில் வைத்து ஒருவரை கைதுசெய்துள்ளனர்.
அவரிடம் மேற்கொள்ளப்பட்ட விசாரணைகளில் தொடர்ச்சியாக பல டிப்பர் வாகனங்களை இவ்வாறு கொள்வனவு செய்து அதன் பகுதிகளை பிரித்து விற்பனை செய்துவந்துள்ளமை தெரியவந்துள்ளது. கைதுசெய்யப்பட்டவரிடம் இருந்து வாகனத்தின் இயந்திர அடிச்சட்டங்கள் ஒரு தொகை கைப்பற்றப்பட்டதுடன் அவர் நீதிமன்றில் முற்ப்படுத்தப்பட்டிருந்தார்.
குறித்த கைது நடவடிக்கை மாவட்ட குற்றவிசாரணை பிரிவின் உப பரிசோதகர் ராஜகுரு தலைமையில் சாஜன்களான ரூபசிங்க, அசங்க,மற்றும் ரெஜினோல், றொசான், மிதுசன், சுபுண் ஆகியோரை உள்ளடக்கிய பொலிஸ் குழுவினரால் மேற்கொள்ளப்பட்டது.
கன்னியாகுமரி மாவட்டம் குளச்சல் அருகே உள்ள ரீத்தாபுரம் பகுதியில் நடைபெற்ற திருமண வரவேற்பு நிகழ்ச்சியின்போது, மதுபோதையில் இருந்த புதுமாப்பிள்ளை (ராணுவ வீரர்), மணப்பெண்ணின் தந்தை மற்றும் புதுப்பெண்ணைக் கடுமையாகத் தாக்கிவிட்டுத் தப்பியோடிய சம்பவம் அப்பகுதியில் பெரும் பரபரப்பையும் அதிர்ச்சியையும் ஏற்படுத்தியுள்ளது.
கன்னியாகுமரி மாவட்டம் குளச்சல் அருகே உள்ள ரீத்தாபுரம் பகுதியைச் சார்ந்தவர் 31 வயதான ராணுவ வீரர் ஒருவர். இவரும், கேரள மாநிலம் திருவனந்தபுரத்தைச் சேர்ந்த 26 வயது இளம்பெண் ஒருவரும் கடந்த நான்கு ஆண்டுகளாகக் காதலித்து வந்துள்ளனர்.
இவர்களின் காதலுக்கு இருவீட்டுப் பெற்றோரும் சம்மதம் தெரிவித்ததைத் தொடர்ந்து, இவர்களது திருமணம் கடந்த முன்தினம் கோலாகலமாகத் திட்டமிடப்பட்டது.
இரு வீட்டார் மற்றும் உறவினர்கள் புடைசூழ இவர்களது திருமணம் எந்தவிதத் தடங்கலுமின்றி இனிதே நடந்து முடிந்தது. அதனைத் தொடர்ந்து, அன்றைய தினம் மாலையில் ரீத்தாபுரத்தில் உள்ள ஒரு தனியார் திருமண மண்டபத்தில் மணமக்களுக்கான வரவேற்பு நிகழ்ச்சிக்கு ஏற்பாடு செய்யப்பட்டிருந்தது.
உறவினர்களும் நண்பர்களும் கலந்துகொண்டு மணமக்களை வாழ்த்திக் கொண்டிருந்ததால் அந்த இடமே மகிழ்ச்சிக் கோலாகலமாக இருந்தது.
ஆனால், அந்த மகிழ்ச்சியான தருணம் சில மணி நேரங்களிலேயே சோகமாகவும் பதற்றமாகவும் மாறியது. வரவேற்பு நிகழ்ச்சியின்போது புதுமாப்பிள்ளை அளவுக்கு அதிகமாக மதுபோதையில் இருந்துள்ளார். போதை தலைக்கேறிய நிலையில் இருந்த அவர், மண்டபத்தில் இருந்தவர்களிடம் முறைகேடாகவும் வரம்பு மீறியும் நடந்து கொண்டதாகக் கூறப்படுகிறது.
இதனைக் கண்டுகளித்த மணப்பெண்ணின் தந்தை, மருமகனிடம் சென்று அன்பாகவும் கண்டிப்புடனும் இவ்வாறான செயல்களைத் தவிர்க்குமாறு அறிவுறுத்தியுள்ளார்.
இதனால் ஆத்திரமடைந்த அந்த ராணுவ வீரர், தனது சொந்த மாமனார் என்றும் பாராமல் அவருடன் கடுமையான வாக்குவாதத்தில் ஈடுபட்டுள்ளார். தகராறு முற்றவே, தன் மனைவியின் தந்தை என்று கூடப் பார்க்காமல் மாமனாரைக் கடுமையாகத் தாக்கியுள்ளார்.
அதைத் தடுத்து தனது தந்தையைக் காப்பாற்ற முயன்ற தன் மனைவியையும் (புதுமணப்பெண்) கண்மூடித்தனமாகத் தாக்கியுள்ளார். திருமணமான சில மணி நேரங்களிலேயே சொந்தக் கணவரால் புதுப்பெண்ணும் அவரது தந்தையும் உறவினர்கள், நண்பர்கள் முன்பாகத் தாக்கப்பட்டதைக் கண்டு அங்கிருந்த அனைவரும் கடும் அதிர்ச்சியடைந்தனர்.
இந்த திடீர் தாக்குதலைத் தொடர்ந்து நிலைமையின் தீவிரத்தை உணர்ந்து கொண்ட அந்தப் புதுமாப்பிள்ளை, அங்கிருந்து உடனடியாகத் தப்பியோடிவிட்டார். மதுபோதையில் தன் மனைவியையும் மாமனாரையும் தாக்கிவிட்டுத் தலைமறைவாகியுள்ள அவர் மீது உரிய நடவடிக்கை எடுக்கக் கோரி, காயமடைந்த மணப்பெண்ணும் அவரது தந்தையும் குளச்சல் காவல் நிலையத்தில் நேரில் புகார் அளித்தனர்.
பாதிக்கப்பட்டவர்களின் புகாரின் அடிப்படையில் காவல்துறையினர் வழக்குப் பதிவு செய்து தலைமறைவாகியுள்ள ராணுவ வீரரைத் தீவிரமாகத் தேடி வருகின்றனர். திருமணமான கையோடு புதுப்பெண்ணை மதுபோதையில் கணவரே தாக்கிய இந்தச் சம்பவம் அப்பகுதியில் பெரும் சோகத்தையும் விவாதத்தையும் ஏற்படுத்தியுள்ளது.
கேரள மாநிலம் கண்ணூர் மாவட்டம் பையனூர் பகுதியைச் சேர்ந்த இளம் பெண் ஒருவர், தமக்குத் திருமணம் நின்றுபோனதால் ஏற்பட்ட கடுமையான மனவேதனையின் காரணமாக ஆற்றில் குதித்துத் தற்கொலை செய்துகொண்ட சம்பவம் அப்பகுதியில் பெரும் சோகத்தையும் அதிர்ச்சியையும் ஏற்படுத்தியுள்ளது.
கேரளாவின் கண்ணூர் மாவட்டத்திலுள்ள பையனூர் பகுதியைச் சேர்ந்தவர் ஸ்ருதி (24). இவருக்குப் பெற்றோர் மற்றும் உறவினர்கள் முறைப்படி பேசித் திருமணம் ஒன்றை நிச்சயமிருந்தனர். இதற்கான அனைத்து ஏற்பாடுகளும் தீவிரமாக நடைபெற்று வந்த நிலையில், அடுத்த ஆண்டு ஜனவரி மாதத்தில் இவர்களது திருமணம் நடைபெறவிருந்தது.
திருமணத்திற்கு இன்னும் சில மாதங்களே உள்ள நிலையில், திடீரென்று அந்த இளைஞர் ஸ்ருதியைத் திருமணம் செய்து கொள்ள மறுத்துத் தன் முடிவிலிருந்து பின்வாங்கியுள்ளார். இதனால் திருமணம் நின்றுபோனது.
தனக்கு நிச்சயிக்கப்பட்ட திருமணம் திடீரென நின்று போனதை எண்ணி ஸ்ருதி கடும் மனஉளைச்சலுக்கும் மனவேதனைக்கும் ஆளாகியுள்ளார். இந்த நிலையில், கடந்த நேற்று இரவில் பெரும்பா ஆற்றுப்பகுதிக்குச் சென்ற அவர், ஆற்றில் குதித்துத் தற்கொலை செய்து கொண்டுள்ளார்.
அவர் வீடு திரும்பாததால் அதிர்ச்சியடைந்த குடும்பத்தினரும் உறவினர்களும் அவரைத் தேடியுள்ளனர். அப்போது பெரும்பா ஆற்றுப் பகுதியில் ஸ்ருதி தற்கொலை செய்து கொண்ட தகவல் தெரியவந்துள்ளது.
இது குறித்துத் தகவலறிந்த காவல்துறையினர் உடனடியாக நிகழ்விடத்திற்கு விரைந்து சென்று உடலைக் கைப்பற்றிப் பிரேதப் பரிசோதனைக்காக மருத்துவமனைக்கு அனுப்பி வைத்தனர். திருமணம் நின்றுபோன விரக்தியில் இளம் பெண் உயிரைவிட்டுக் கொண்ட இந்தச் சம்பவம் குறித்துக் காவல்துறையினர் வழக்குப் பதிவு செய்து தீவிர விசாரணை நடத்தி வருகின்றனர்.
மனைவியுடனான சண்டை தவிர்க்க முயற்சித்து பால்கனியில் இருந்து விழுந்து கணவன் உயிரிழந்த சம்பவம் சோகத்தை ஏற்படுத்தியுள்ளது. உத்தரப் பிரதேச மாநிலத்தின் கிரேட்டர் நொய்டாவில் உள்ள சென்சுரியன் பார்க் டிராபிகல் கார்டன் சொசைட்டியின்(Centurion Park Tropical Garden Society) அடுக்குமாடி குடியிருப்பின் 21 வது மாடியில் இருந்து தவறி விழுந்து 31 வயது கணவர் உயிரிழந்துள்ளார். மனைவியுடனான வாக்குவாதத்தை தவிர்க்க முயற்சி செய்த போது இந்த விபரீதம் நிகழ்ந்துள்ளது.
கடந்த 2024ம் ஆண்டு 31 வயதான ஹர்ஷித் லவானியாவுக்கு(Harshit Lavania) திருமணம் நடைபெற்றுள்ளது. ஆனால் திருமணமான சில மாதங்களிலேயே தம்பதியினர் இடையே கருத்து வேறுபாடு ஏற்பட்டு இருவரும் தனித்தனியாக பிரிந்து வாழ்ந்து வந்துள்ளனர்.
ஹர்ஷித் மனைவியிடம் இருந்து பிரிந்து தனியாக வீடு எடுத்து வசித்து வந்துள்ளார். இந்நிலையில் சம்பவத்தன்று ஷர்ஷித்தின் மனைவி அவரது வீட்டிற்கு வந்து கதவை தட்டியுள்ளார்.
ஆனால் மனைவி உடன் மீண்டும் ஒரு வாக்குவாதம் ஏற்படுவதை விரும்பாத கணவன் ஹர்ஷித், கதவை திறக்க மறுத்ததுடன் மட்டும் இல்லாமல் தான் வசித்து வந்த 21 வது மாடியின் பால்கனியில் இருந்து கீழ் மாடிக்கு இறங்க முயற்சி செய்துள்ளார்.
அப்போது எதிர்பாராத விதமாக கால் தவறி கீழே விழுந்தார். இதில் அவருக்கு பலத்த காயம் ஏற்பட்ட நிலையில் உடனடியாக அவர் மருத்துவமனையில் சிகிச்சைக்காக அனுமதிக்கப்பட்டார். துரதிர்ஷ்டவசமாக அவர் ஏற்கனவே உயிரிழந்து விட்டதாக மருத்துவர்கள் தெரிவித்துள்ளனர்.
இந்த சம்பவம் தொடர்பாக எந்தவொரு புகாரும் இதுவரை அளிக்கப்படவில்லை என்று பொலிஸார் தகவல் தெரிவித்துள்ளனர். மேலும் இந்த சம்பவம் தொடர்பான சிசிடிவி காட்சிகள் மற்றும் அவரது மனைவியிடம் பொலிஸார் தீவிர விசாரணை நடத்தி வருகின்றனர்.
அனோஜன் சிவராசாவுக்கு விதிக்கப்பட்டிருந்த மரண தண்டனையை இரத்து செய்ய சவூதி அரேபிய உயர் நீதிமன்றம் எடுத்துள்ள முடிவை நான் வரவேற்கிறேன் என ஜனாதிபதி அநுர குமார திஸாநாயக்க தெரிவித்துள்ளார்.
இது தொடர்பில் அவர் சற்று முன்னர் வெளியிட்ட எக்ஸ் தள பதிவில் குறிப்பிட்டுள்ளார். குறித்த பதிவில், “சவூதியின் இந்த முடிவு அனோஜனுக்கும், அவரது குடும்பத்தினருக்கும், அத்துடன் அவரது வழக்கை மிகுந்த அக்கறையுடன் கவனித்து வந்த அனைத்து இலங்கையர்களுக்கும் பெரும் நிம்மதியை அளிக்கிறது.
பொறுமையான இராஜதந்திர அணுகுமுறை, நட்பு நாட்டின் சட்ட நடைமுறைகள் மீதான மரியாதை மற்றும் வெளிநாட்டில் உள்ள ஒரு இலங்கை குடிமகனுக்குத் துணையாக நின்றவர்களின் அயராத உழைப்பு ஆகியவற்றின் முக்கியத்துவத்தை இது பிரதிபலிக்கிறது.
இந்த முடிவை எட்டியதற்காக சவூதி அரேபிய அரசாங்கத்திற்கு எனது மனமார்ந்த நன்றியைத் தெரிவித்துக் கொள்கிறேன்.
அத்துடன், இதற்காக அர்ப்பணிப்புடன் பணியாற்றிய சவூதி அரேபிய மற்றும் இலங்கை இராஜதந்திரிகள், அரச அதிகாரிகள் மற்றும் சட்டக் குழுவினர் அனைவருக்கும் எனது நன்றியைத் தெரிவித்துக் கொள்கிறேன்.
எஞ்சிய சட்ட நடைமுறைகள் நிறைவடையும் வரை, அனோஜனுக்கும் அவரது குடும்பத்தினருக்கும் தேவையான அனைத்து உதவிகளையும் எனது அரசாங்கம் தொடர்ந்து வழங்கும். வாழ்வாதாரத்தைத் தேடி நாட்டை விட்டுச் செல்லும் எந்தவொரு இலங்கையரும் ஒருபோதும் தாங்கள் தனித்து விடப்பட்டதாக உணரக்கூடாது” என ஜனாதிபதி குறிப்பிட்டுள்ளார்.
கொழும்பிலுள்ள முன்னணி தனியார் வைத்தியசாலையொன்றில் சந்தேகத்திற்கிடமான முறையில் பெண் ஒருவர் உயிரிழந்துள்ளார். உயிரிழந்ததாக கூறப்படும் பெண் தொடர்பில் உடனடியாக பிரேத பரிசோதனை நடத்துமாறு மாளிகாகந்த பதில் நீதவான் பிரேமலால் அத்துகோரள, கொழும்பு பிரதான நீதிவான் மருத்துவ அதிகாரிக்கு உத்தரவிட்டுள்ளார்.
இரண்டு நாட்களுக்கு முன்னர் கொழும்பிலுள்ள முன்னணி தனியார் வைத்தியசாலையொன்றில் குறித்த பெண் உயிரிழந்துள்ளார்.
உயிரிழந்ததாக கூறப்படும் தனது தாயாரின் உடலை இறுதிச் சடங்குகளை நடத்துவதற்காக தனக்கு ஒப்படைக்காமல் குறித்த தனியார் வைத்தியசாலையில் வைத்துள்ளதாக உயிரிழந்த பெண்ணின் மகள் மருதானை பொலிஸ் நிலையத்தில் முறைப்பாடு செய்திருந்தார்.
இது தொடர்பில் பொலிஸார் நீதிமன்றத்தில் விசாரித்த போதே இந்த உத்தரவு பிறப்பிக்கப்பட்டுள்ளது. அதற்கமைய, குறித்த பிரேத பரிசோதனையை நடத்தி சடலத்தை உயிரிழந்த பெண்ணின் மகளிடம் ஒப்படைக்குமாறும் பதில் நீதவான் இதன்போது உத்தரவிட்டுள்ளார்.
மொனராகலை மாவட்டம், பிபிலை பகுதியில் இடம்பெற்ற வீதி விபத்தில் ஏழு வயது சிறுவன் ஒருவர் உயிரிழந்துள்ளதுடன், அவரது தந்தை படுகாயமடைந்துள்ளார். இந்த துயர சம்பவம் நேற்று (13.10.2026) மாலை இடம்பெற்றுள்ளது.
பிபிலைப் பகுதியைச் சேர்ந்த தந்தை தன் மகனுடன் ஓட்டோவில் பயணித்துக்கொண்டிருந்த போது, எதிரே வந்த டிப்பர் வாகனத்துடன் முச்சக்கர வண்டி நேருக்கு நேர் மோதி விபத்துக்குள்ளாகியுள்ளது. இந்த கோர விபத்தில் முச்சக்கர வண்டியில் பயணித்த 7 வயது சிறுவன் சம்பவ இடத்திலேயே பரிதாபமாக உயிரிழந்துள்ளார்.
முச்சக்கர வண்டியை செலுத்திச்சென்ற சிறுவனின் 38 வயதுடைய தந்தை படுகாயமடைந்த நிலையில் வைத்தியசாலையில் சேர்க்கப்பட்டுள்ளார். சம்பவத்துடன் தொடர்புடைய டிப்பர் வாகனத்தின் சாரதியைப் பொலிஸார் கைதுசெய்துள்ளதுடன், விபத்து தொடர்பான மேலதிக விசாரணைகளையும் முன்னெடுத்து வருகின்றனர்.
