இலங்கையில் மணமகன் மற்றும் மணப்பெண்ணுக்கு திருமணப் பொருத்தம் பார்த்து தருவதாக கூறி பண மோசடியில் ஈடுபடும் பேஸ்புக் கணக்கிற்கு எதிராக முறைப்பாடு செய்யப்பட்டுள்ளது. பெலியத்தை பகுதியை சேர்ந்த 30 வயதான வர்த்தகர் ஒருவரே பொலிஸ் நிலையத்தில் முறைப்பாடு செய்துள்ளார்.

மணமகன் மற்றும் மணமகள்களை தேடித் தருவதாக கூறும் பேஸ்புக் கணக்கொன்றுடன் குறித்த நபர் தொடர்புகொண்டு உரையாடியுள்ளார். மணமகளை தேடித் தருவதாயின் மணமகனிடமிருந்து 8,000 ரூபா வைப்புத்தொகையும், மணமகள் தரப்பிற்கு 4,000 ரூபாவும் எனவும் இரு தரப்பினருக்கும் அறிவிக்கப்பட்டுள்ளது.

முறைப்பாடு செய்த நபர், மணமகளைக் கண்டுபிடிக்கும் நம்பிக்கையில் 8,000 ரூபாவை சந்தேகநபர்களின் வங்கிச் கணக்கில் வைப்பிலிட்டுள்ளார். இதனையடுத்து, மோசடியாளர்கள் பெண் ஒருவரின் கையடக்க தொலைபேசி இலக்கத்தை கொடுத்துள்ளனர்.

குறித்த கைப்பேசி இலக்கத்திற்கு அழைப்பு மேற்கொண்டபோது பெண் ஒருவர் பதிலளித்துள்ளார். அத்துடன், அவ்வழைப்பு சில வினாடிகள் மட்டுமே நீடித்துள்ளது. அதன்பின்னர் பலமுறை அந்த இலக்கத்திற்கு அழைப்பு விடுத்தபோதிலும் எவ்வித பதிலும் கிடைக்கவில்லை.

இது குறித்து தெரிவிப்பதற்காக குறித்த பேஸ்புக் கணக்கின் உரிமையாளர்களுக்கு அழைப்பு மேற்கொண்டபோதிலும் அவர்களும் அவ்வழைப்புகளைத் தவிர்த்துள்ளனர். இதன் காரணமாகவே அந்நபர் குறித்த பேஸ்பு கணக்கிற்கு எதிராக முறைப்பாடு செய்ய நடவடிக்கை எடுத்துள்ளார்.

இலங்கையின் அனைத்து மாகாணங்களையும் உள்ளடக்கும் வகையில் பலத்த மின்னல் தொடர்பான எச்சரிக்கையை வளிமண்டலவியல் திணைக்களம் வெளியிட்டுள்ளது. இன்று (14.10.2026) காலை 11.00 மணிக்கு வெளியிடப்பட்ட இந்த எச்சரிக்கை, நாளை அதிகாலை 1.00 மணி வரை செல்லுபடியாகும் என அறிவிக்கப்பட்டுள்ளது.

இதன்படி, நாட்டின் பல பகுதிகளில் இடியுடன் கூடிய மழையுடன் பலத்த மின்னல் ஏற்படுவதற்கான அதிக வாய்ப்புள்ளதாகத் தெரிவிக்கப்பட்டுள்ளது. இடியுடன் கூடிய மழை பெய்யும் சந்தர்ப்பங்களில் தற்காலிகமாகப் பலத்த காற்றும் வீசக்கூடும் என எச்சரிக்கப்பட்டுள்ளது.

எனவே, மின்னல் தாக்கத்தால் ஏற்படக்கூடிய ஆபத்துகளைக் குறைப்பதற்குத் தேவையான முன்னெச்சரிக்கை நடவடிக்கைகளை மேற்கொள்ளுமாறு பொதுமக்களை வளிமண்டலவியல் திணைக்களம் அறிவுறுத்தியுள்ளது.

யாழ்ப்பாணத்தில் இடம்பெற்ற மோட்டார் சைக்கிள் – கனரக வாகன விபத்தில் இரு இளைஞர்களும்சம்பவ இடத்திலையே உயிரிழந்துள்ளனர். கைதடி பகுதியில் செவ்வாய்க்கிழமை நண்பகல் இடம்பெற்ற குறித்த விபத்தில் மோட்டார் சைக்கிளில் பயணித்த இரு இளைஞர்களும் சம்பவ இடத்திலையே உயிரிழந்துள்ளனர்.

குறித்த இரு இளைஞர்களும் தமது தொலைபேசியில் காணொளி பதிவு செய்தவாறு மிக வேகமாக மோட்டார் சைக்கிளை செலுத்தி சென்று வேக கட்டுப்பாட்டை இழந்து கனரக வாகனத்துடன் மோதி விபத்துக்குள்ளானதாக சம்பவத்தை நேரில் பார்த்தவர்கள் தெரிவித்தனர்

புன்னாலைக்கட்டுவன் தெற்கை சேர்ந்த நிசாந்தன் நிதர்சன் (வயது 23) மற்றும் கமலேந்திரன் கஜந்தன் (வயது 20) ஆகிய இருவரே பலியானவர்கள் என பொலிசார் தெரிவித்துள்ளனர். சம்பவம் தொடர்பில் சாவகச்சேரி பொலிஸார் விசாரணைகளை முன்னெடுத்துள்ளனர்.

புதிய இணைப்பு :  அனோஜன் சிவராசாவின் மரண தண்டனையை சவூதி உயர் நீதிமன்றம் இரத்து செய்தமைக்கு, இலங்கை அரசாங்கம் சவூதி அரேபியாவுக்கு நன்றி தெரிவித்துள்ளது.

நேற்றைய தினம், சவூதி உயர் நீதிமன்றம் அனோஜன் சிவராசாவின் மரண தண்டனையை இரத்து செய்ததாக இலங்கை வெளிவிவகார, வெளிநாட்டு வேலைவாய்ப்பு மற்றும் சுற்றுலா அமைச்சு உறுதிப்படுத்தியுள்ளது.

இது தொடர்பில் இன்று (14) அமைச்சு ஊடக அறிக்கை வெளியிட்டுள்ளது. அதில், அனோஜனின் வழக்கில் சாதகமான முடிவை எட்டுவதற்கான முயற்சிகளில் இது ஒரு குறிப்பிடத்தக்க திருப்புமுனை என அமைச்சு விவரித்துள்ளது.

முதலாம் இணைப்பு : அனோஜன் சிவராசாவுக்கு விதிக்கப்பட்டிருந்த மரண தண்டனையை சவுதி அரேபியாவின் உயர் நீதிமன்றம் இரத்து செய்துள்ளது. வெளிவிவகார பிரதி அமைச்சர் அருண் ஹேமசந்திரா இந்த தகவலை வெளியிட்டுள்ளார்.

இலங்கை அரசாங்கம் மேற்கொண்ட தொடர்ச்சியான இராஜதந்திர மற்றும் சட்டரீதியான முயற்சிகளின் விளைவாகவே இது சாத்தியமானது என அமைச்சர் தெரிவித்தார். அனோஜன் விவகாரத்தில் இந்த அறிவிப்பு ஒரு முக்கிய மைல்கல்லாக அமைந்துள்ளது. இருப்பினும், அவரது தற்போதைய சட்ட நிலை மற்றும் அடுத்தகட்ட நடவடிக்கைகள் குறித்த கூடுதல் விவரங்கள் எதுவும் இதுவரை வெளியிடப்படவில்லை.

தர்மபுரம் பகுதியில் இருந்து தமது புகைப்படக் கடையை திறப்பதற்காக கிளிநொச்சி நோக்கி மோட்டார் சைக்கிளில் பயணம் செய்த குடும்பஸ்தர் விபத்தில் சிக்கி, ஐந்து நாட்கள் சிகிச்சை பெற்று வந்த நிலையில் உயிரிழந்துள்ளார்.

இந்த சம்பவம் நேற்று (12.10.2026) இடம்பெற்றுள்ளதாக தெரிவிக்கப்பட்டுள்ளது.  சம்பவம் தொடர்பில் மேலும் தெரியவருகையில்,

தர்மபுரம் பகுதியில் இருந்து தமது புகைப்படக் கடையை திறப்பதற்காக கிளிநொச்சி நோக்கி மோட்டார் சைக்கிளில் பயணித்த கணவன் – மனைவி இருவரும் விபத்துக்குள்ளான நிலையில், கிளிநொச்சி வைத்தியசாலையில் சிகிச்சைப் பெற்று வந்துள்ளனர்.

மனைவி சிகிச்சையை முடிந்து வீடு திரும்பியுள்ளதாகவும், கணவன் சிகிச்சை பலனின்றி இன்று(12) உயிரிழந்துள்ளதாக தெரிவிக்கப்படுகின்றது.

இவ்வாறு உயிரிழந்த நபர், பாரதிபுரம் பகுதியைச் சேர்ந்த 29 வயதுடைய ஜெகதீஸ்வரன் மதுஜன் ஆவார். இந்த நிலையில், விபத்து தொடர்பில் கிளிநொச்சி பொலிஸார் மேலதிக விசாரணைகளை மேற்கொண்டு வருகின்றனர்.

கிளிநொச்சி கோணாவில் பகுதியை சேர்ந்த உயர்தரத்தில் கல்வி பயிலக்கூடிய பாடசாலை மாணவி ஒருவர் தவறான முடிவால் உயிரிழந்த சம்பவம் பெரும் சோகத்தை ஏற்படுத்தியிருக்கிறது.

17 வயதான மாணவியே இவ்வாறு நேற்றையதினம் (12) உயிரிழதுள்ளார். அதேவேளை கடந்தவாரம் கிளிநொச்சி உருத்திரபுரம் பகுதியை சேர்ந்த மாணவியொருவரும் தவறான முடிவால் உயிரிழந்த நிலையில் மறுமொரு மாணவியும் உயிரிழந்துள்ளமை அதிர்ச்சியை ஏற்படுத்தியுள்ளது.

அதேவேளை கடந்த 09 ஆம் திகதி கிளிநொச்சி – முரசுமோட்டை பகுதியில் இடம்பெற்ற விபத்தில் மோட்டார் சைக்கிளில் பயணித்த புகைப்பட கலையகம் நடாத்தி வருகின்ற இளைஞன் (வயது-29) படுகாயமடைந்து ஆபத்தான நிலையில் யாழ் போதனா வைத்தியசாலையில் அனுமதிக்கப்பட்ட நிலையில் உயிரிழந்துள்ளார்.

மோட்டார் சைக்கிள் மீது கயஸ் வாகன மோதியதில் இந்த விபத்து இடம்பெற்று இருந்தது. கிளிநொச்சியில் அடுத்தடுத்து இளம் உயிர்கள் பறிபோகும் சோகம் அப்பகுதி மக்களை பெரும் அதிர்ச்சியில் ஆழ்த்தியுள்ளது.

தமிழர் பிரதேசங்க்களில் அடுத்தடுத்து இளவயது மரணங்கள் அதிகரித்துள்ளமை , பெரும் துயரத்தை ஏற்படுத்தியுள்ளது.

உலகில் நிகழும் அணு ஆயுத மோதல்கள் மற்றும் செயற்கை நுண்ணறிவின் தீங்கிழைக்கும் பயன்பாடு உள்ளிட்ட காரணங்களால், 2100ஆம் ஆண்டுக்குள் மனித இனத்தின் இருப்புக்கே பெரும் அச்சுறுத்தல் ஏற்படக்கூடும் என The Lancet மருத்துவ ஆய்விதழில் வெளியிடப்பட்டுள்ள புதிய ஆய்வறிக்கை எச்சரித்துள்ளது.

அடுத்த 75 ஆண்டுகளில் மனிதர்களின் ஆரோக்கியத்துக்கும் உயிர்வாழ்வுக்கும் பெரும் பாதிப்பை ஏற்படுத்தக்கூடிய 17 முக்கிய அச்சுறுத்தல்களை இந்த ஆய்வறிக்கை அடையாளம் கண்டுள்ளது.

அவற்றில் காலநிலை மாற்றம், காற்று மாசுபாடு, குழந்தைகளின் ஊட்டச்சத்துக் குறைபாடு, தொற்றுநோய்கள், நுண்ணுயிர் எதிர்ப்பு சக்தி அதிகரிப்பு, வழக்கமான போர்கள், அணு ஆயுத மோதல்கள் மற்றும் செயற்கை நுண்ணறிவின் தீங்கிழைக்கும் பயன்பாடு ஆகியவை அடங்குகின்றன.

குறிப்பாக, அணு ஆயுத மோதல்களும் செயற்கை நுண்ணறிவின் தீங்கிழைக்கும் பயன்பாடும் மனித இனத்தின் அழிவுக்குக்கூட வழிவகுக்கக்கூடிய அபாயங்களாக இந்த மதிப்பீட்டில் சுட்டிக்காட்டப்பட்டுள்ளன.

இருப்பினும், இத்தகைய பேரழிவுகள் நிச்சயமாக நிகழும் என்று ஆய்வறிக்கை கூறவில்லை. இந்த அச்சுறுத்தல்கள் ஒன்றோடொன்று தொடர்புடையவை என்பதால், அவற்றைத் தனித்தனியாக அணுகாமல், சுகாதாரம், சுற்றுச்சூழல், தொழில்நுட்பம் மற்றும் பாதுகாப்பு உள்ளிட்ட துறைகளில் ஒருங்கிணைந்த நடவடிக்கைகளை முன்னெடுக்க வேண்டியதன் அவசியத்தையும் ஆய்வாளர்கள் வலியுறுத்தியுள்ளனர்.

அதேசமயம் மனித இனத்தின் எதிர்காலத்தைப் பாதுகாப்பதற்காக, உலக நாடுகளின் அரசுகள் முன்கூட்டியே திட்டமிட்டு, சுகாதாரக் கட்டமைப்புகளை வலுப்படுத்துவதுடன், புதிய தொழில்நுட்பங்களால் ஏற்படக்கூடிய அபாயங்களைக் கண்காணித்து, அவற்றைத் தடுப்பதற்கான நடவடிக்கைகளையும் விரைவுபடுத்த வேண்டும் என ஆய்வறிக்கை வலியுறுத்துகிறது.

ஒரே இலக்க தகடுகள் கொண்ட இரண்டு முச்சக்கர வண்டிகளை நுவரெலியா பிரதேச குற்றப் புலனாய்வுப் பிரிவினர் பறிமுதல் செய்துள்ளனர். பறிமுதல் செய்யப்பட்ட இரண்டு முச்சக்கர வண்டிகளும் நுவரெலியாவின் ராகலை மற்றும் சாந்திபுரப் பகுதிகளில் கண்டறியப்பட்டுள்ளது.

சம்பவம் தொடர்பில் இரண்டு முச்சக்கரவண்டிகளின் சாரதிகளும் கைது செய்யப்பட்டுள்ளதாக தெரிவித்த பொலிஸார் ,கைதான இருவரும் உறவினர்கள் என முதற்கட்ட விசாரணையில் தெரியவந்துள்ளது.

பறிமுதல் செய்யப்பட்ட முச்சக்கர வண்டிகளின் ஒன்று, வாடகைக்கு ஈடுபடுத்தப்பட்டிருந்ததாகவும் மற்றொன்று மறைத்து வைக்கப்பட்டிருந்ததாகவும் கூறப்படுகின்றது. பறிமுதல் செய்யப்பட்ட முச்சக்கரவண்டிகள் ஏதேனும் குற்றச் செயல்களுக்கு பயன்படுத்தப்பட்டதா? என்பது தொடர்பில் நுவரெலியா பொலிஸார் மேலதிக விசாரணைகளை முன்னெடுத்து வருகின்றனர்.

நாட்டிலுள்ள பல மாகாணங்களுக்கு பலத்த மின்னல் தாக்கம் தொடர்பில் வளிமண்டலவியல் திணைக்களம் எச்சரிக்கை விடுத்துள்ளது. அதன்படி, மேல், சப்ரகமுவ, மத்திய, ஊவா, வடமேல் மற்றும் தென் மாகாணங்களில் பலத்த மின்னல் தாக்கம் ஏற்பட வாய்ப்பு உள்ளதாக திணைக்களம் தெரிவித்துள்ளது.

இன்று (13) முற்பகல் 11.00 மணிக்கு வெளியிடப்பட்ட இந்த அறிவிப்பு நாளை அதிகாலை 1.00 மணி வரை செல்லுபடியாகும் என அறிவிக்கப்பட்டுள்ளது.

இதன்படி, மேல், சப்ரகமுவ, மத்திய, ஊவா, வடமேல் மற்றும் தென் மாகாணங்களில் மாலை அல்லது இரவு வேளையில் ஆங்காங்கே இடியுடன் கூடிய மழையுடன் பலத்த மின்னல் தாக்கம் ஏற்படுவதற்கான அதிக சாத்தியக்கூறுகள் உள்ளன.

இடியுடன் கூடிய மழை பெய்யும் போது அப்பகுதிகளில் தற்காலிகமாகப் பலத்த காற்றும் வீசக்கூடும். மின்னல் தாக்கங்களினால் ஏற்படும் விபத்துகளைக் குறைப்பதற்குத் தேவையான முன்னெச்சரிக்கை நடவடிக்கைகளை எடுக்குமாறு வளிமண்டலவியல் திணைக்களம் பொதுமக்களை அறிவுறுத்தியுள்ளது.

யாழ்ப்பாணத்தில் இடம்பெற்ற பாரிய வாகன விபத்தில் இரு இளைஞர்கள் சம்பவ இடத்திலேயே உயிரிழந்துள்ளனர். யாழ். கைதடி பகுதியில் இன்று (13.10.2026) மோட்டார் சைக்கிளும் கனரக வாகனமும் மோதியதில் இந்த விபத்து இடம்பெற்றுள்ளது.

குறித்த விபத்தில் மோட்டார் சைக்கிளில் பயணித்த இரு இளைஞர்களுமே சம்பவ இடத்தில் உயிரிழந்துள்ளதாக தெரிவிக்கப்படுகின்றது. புன்னாலைக்கட்டுவன் தெற்கை சேர்ந்த நிசாந்தன் நிதர்சன் (வயது 23) மற்றும் கமலேந்திரன் கஜந்தன் (வயது 20) ஆகிய இரண்டு இளைஞர்களே உயிரிழந்தவர்களாவர்.

விபத்தில் உயிரிழந்த இரு இளைஞர்களும் தமது தொலைபேசியில் காணொளி பதிவு செய்தவாறு மிக வேகமாக மோட்டார் சைக்கிளை செலுத்திச் சென்று வேக கட்டுப்பாட்டை இழந்து கனரக வாகனத்துடன் மோதி விபத்துக்குள்ளானதாக சம்பவத்தை நேரில் பார்த்தவர்கள் தெரிவித்துள்ளனர். விபத்து தொடர்பில் சாவகச்சேரி காவல்துறையினர் மேலதிக விசாரணைகளை முன்னெடுத்து வருகின்றமை குறிப்பிடத்தக்கது.

2027 ஆம் கல்வியாண்டிற்காக, 15 இலட்சம் பாடசாலை மாணவர்களுக்கு தலா 6,000 ரூபாய் எழுதுபொருள் உதவித்தொகை வழங்க அமைச்சரவை ஒப்புதல் அளித்துள்ளது. அதன்படி, அஸ்வெசும திட்டத்தில் சேர்க்கப்பட்டுள்ள குடும்பங்களைச் சேர்ந்த 10 இலட்சம் பாடசாலை மாணவர்களின் வங்கிக்கணக்குகளில் இந்த தொகை நேரடியாக வரவு வைக்கப்பட உள்ளது.

இதேபோல், கல்வி, உயர் கல்வி மற்றும் தொழிற்கல்வி அமைச்சகத்தால் அடையாளம் காணப்பட்ட மேலும் 50 இலட்சம் மாணவர்களுக்கு 6,000 ரூபாய் மதிப்புள்ள பற்றுச்சீட்டுகளை வழங்கவும் திட்டமிடப்பட்டுள்ளது.

இதன்படி, பாடசாலை எழுதுபொருள் உதவித்தொகை திட்டம் 2025 ஆம் ஆண்டு முதல் செயல்படுத்தப்படுவதாகவும் அறிவிக்கப்பட்டுள்ளது. 2027 ஆம் ஆண்டிற்கான இத்திட்டத்தை செயல்படுத்த தேவையான நடவடிக்கைகள் எடுக்கப்படும் என்றும் ஜனாதிபதி அமைச்சரவைக்கு தெரிவித்துள்ளார்.

தென்கிழக்கு வங்காள விரிகுடாவில் குறைந்த காற்றழுத்த பகுதி இன்று (13.10.2026) உருவாகலாம் என்று வளிமண்டலவியல் திணைக்களம் தெரிவித்துள்ளது. இநதன் தாக்கத்தால், இன்று முதல் அடுத்த சில நாட்களுக்கு நாட்டைச் சுற்றியுள்ள ஆழ்கடல் மற்றும் ஆழமற்ற கடல் பகுதிகளிலும் மழைப்பொழிவு அதிகரிக்கும் என எதிர்பார்க்கப்படுகிறது.

அதன்படி, இன்று நாட்டின் பெரும்பாலான பகுதிகளில் அவ்வப்போது மழை அல்லது இடியுடன் கூடிய மழை பெய்யும். மேற்கு, சபரகமுவ, மத்திய, ஊவா மற்றும் தெற்கு மாகாணங்களில் சில இடங்களில் சுமார் 100-150 மிமீ வரை கனமழை பெய்ய வாய்ப்புள்ளது.

நாட்டின் ஏனைய பகுதிகளில் சில இடங்களில் 75 மி.மீ-க்கு மேல் ஓரளவு கனமழை பெய்ய வாய்ப்புள்ளது.

இடியுடன் கூடிய மழையின் போது, ​​தற்காலிகமாக ஒரு குறிப்பிட்ட பகுதியில் வீசும் பலத்த காற்று மற்றும் மின்னலால் ஏற்படும் சேதங்களைக் குறைக்க, பொதுமக்கள் தகுந்த முன்னெச்சரிக்கை நடவடிக்கைகளை மேற்கொள்ளுமாறு கேட்டுக் கொள்ளப்பட்டுள்ளனர்.

இரத்தினபுரியில் தங்க ஆபரணங்களை அடகு பிடிக்கும் தனியார் நிறுவனமொன்றில் போலி நகைகளை ஏமாற்றிய வழங்கிய அதன் உதவி முகாமையாளர் கைது செய்யப்பட்டுள்ளதாக பொலிஸார் தெரிவித்துள்ளனர்.

7 இலட்சத்து 50 ஆயிரம் ரூபா பெறுமதியான இரண்டு தங்கச் சங்கிலிகளுக்கு பதிலாக இரண்டு போலிச் சங்கிலிகளை வைத்து, மோசடி செய்தமை தொடர்பில் அவர் கைது செய்யப்பட்டுள்ளார். இவ்வாறு கைது செய்யப்பட்டவர் பெல்மடுல்ல, பலங்கொட பகுதியில் வசிக்கும் 2 பிள்ளைகளின் தாய் என தெரியவந்துள்ளது.

அவர் இரத்தினபுரி, மல்வல வீதியில் உள்ள அரலிய உயன பகுதியில் தற்காலிகமாக வசித்து வருவதாக பொலிஸார் தெரிவித்தனர். இரத்தினபுரி பிரதான வீதியில் அமைந்துள்ள குறித்த அடகு பிடிக்கும் நிறுவனத்தின் உரிமையாளரால் மாதாந்த சோதனை மேற்கொள்ளப்பட்டுள்ளது.

இதன்போது, 7 லட்சத்து 52 ஆயிரத்து 348 ரூபா பெறுமதியான இரண்டு தங்கச் சங்கிலிகளின் உறைகளுக்குள் போலியாக தயாரிக்கப்பட்ட இரண்டு சங்கிலிகள் இருப்பது கண்டறியப்பட்டுள்ளது. இது தொடர்பில் நிறுவனத்தின் உதவி முகாமையாளரிடம் விசாரணை நடத்தப்பட்டுள்ளது.

இந்த நிலையில், தான் எந்த மோசடியும் செய்யவில்லை என அவர் கூறியதால், நிறுவனத்தின் உரிமையாளர் இரத்தினபுரி பொலிஸ் நிலையத்தில் முறைப்பாடு செய்துள்ளார். இதனடிப்படையில் மேற்கொள்ளப்பட்ட சோதனையில், பாதுகாப்பு கமராக்களில் திருட்டு நடக்கும் விதம் பதிவாகியிருந்தது.

அதன்பின்னர் குறித்த ஊழியர் கைது செய்யப்பட்டு மேற்கொள்ளப்பட்ட மேல் விசாரணைகளின் போது, இரண்டு சந்தர்ப்பங்களில் தங்கச் சங்கிலிகள் இரண்டையும் திருடி போலிச் சங்கிலிகளை வைத்தமை தெரியவந்துள்ளது.

ஒரு தங்கச் சங்கிலியை ஒரு லட்சத்து 70 ஆயிரம் ரூபாவிற்கு விற்று, மற்றைய தங்கச் சங்கிலியை அடகு வைத்து சுமார் 3 லட்சம் ரூபாவை பெற்றுக் கொண்டதாகவும் சந்தேக நபரான பெண் தெரிவித்துள்ளார்.