புதிய இணைப்பு : கொழும்பு – தலவத்துகொட பகுதியில் உள்ள உணவகமொன்றில் ஏற்பட்ட தீ விபத்தில் காயமடைந்து வைத்தியசாலையில் அனுமதிக்கப்பட்டிருந்த மூவர் உயிரிழந்துள்ளதாக தெரிவிக்கப்படுகின்றது.

தீ விபத்தில் காயமடைந்த நான்கு பேர் கொழும்பு தேசிய வைத்தியசாலையில் சேர்க்கப்பட்ட நிலையில், அவர்களில் மூவர் சிகிச்சை பலனின்றி உயிரிழந்துள்ளதாக தெரிவிக்கப்பட்டுள்ளது.

இன்று காலை (09) குறித்த உணவகத்தில் தீ விபத்து ஏற்பட்டுள்ளதுடன், தீயை அணைப்பதற்காக கோட்டை மாநகர சபைக்குச் சொந்தமான 03 தீயணைப்பு வாகனங்கள் ஈடுபடுத்தப்பட்டுள்ளன. இருப்பினும், எரிவாயு கசிவின் காரணமாக தீ விபத்து ஏற்பட்டிருக்கலாம் என பொலிஸார் சந்தேகிக்கின்றனர்.

முதலாம் இணைப்பு : கொழும்பு – தலவத்துகொட பகுதியில் உள்ள உணவகமொன்றில் இன்று காலை (09) திடீரென தீ விபத்து ஏற்பட்டுள்ளது. தீயை கட்டுப்படுத்த மூன்று தீயணைப்பு வாகனங்கள் சம்பவ இடத்திற்கு வரவழைக்கப்பட்டுள்ளதாக தெரிவிக்கப்படுகின்றது.

இதன் காரணமாக நான்கு பேர் காயமடைந்து கொழும்பு தேசிய வைத்தியசாலையில் அனுமதிக்கப்பட்டுள்ளதாக பொலிஸார் தெரிவித்துள்ளனர் எரிவாயு கசிவின் காரணமாக தீ விபத்து ஏற்பட்டிருக்கலாம் என பொலிஸார் சந்தேகிக்கின்றனர்.

இருப்பினும், தீ விபத்துக்கான உண்மையான காரணம் இன்னும் கண்டறியப்படாத நிலையில், தலவத்துகொட பொலிஸார் மேலதிக விசாரணைகளை மேற்கொண்டு வருகின்றனர்.

அமெரிக்க டொலருக்கு நிகரான இலங்கை ரூபாவின் பெறுமதி மேலும் வீழ்ச்சியடைந்துள்ளது. இலங்கை மத்திய வங்கி இன்று (09) தினசரி நாணய மாற்று விகித அறிவிப்பை வெளியிட்டுள்ளது.

அமெரிக்க டொலர் ஒன்றின் கொள்வனவு விலை 332.38 ரூபாவாகவும், விற்பனை விலை 342.08 ரூபாவாகவும் பதிவாகியுள்ளது.

கடந்த 03ஆம் திகதிக்குப் பின்னரான ஒரு வார காலப்பகுதியில், அமெரிக்க டொலருக்கான கொள்வனவு மற்றும் விற்பனை விலைகள் அதிகூடிய அளவை எட்டியுள்ள நாள் இன்றாகும் என மத்திய வங்கியின் தரவுகள் தெரிவிக்கின்றன.

இதன் மூலம், அண்மைய நாட்களில் அமெரிக்க டொலருக்கு எதிராக இலங்கை ரூபாவின் பெறுமதி தொடர்ந்து அழுத்தத்திற்குள்ளாகி வருவதை அவதானிக்க முடிகின்றது.

யாழ்ப்பாணம் நீர்வேலிப் பகுதியில் கணவரின் கொடுர தாக்குதலை தாங்கிக் கொள்ளா முடியாத மனைவி மண்ணெண்ணை ஊற்றி தீமுட்டியுள்ளார். 3 பிள்ளைகளின் தாயானா ஒருவரே இந்த விபரீத முடிவை எடுத்துள்ளார்.

நீர்வேலிப் பகுதியில் வசித்துவந்த குறித்த குடும்பப் பெண், கணவரால் தொடர்ந்து சித்திரவதைகளை அனுபவித்த நிலையில் கோப்பாய் பொலிஸ் நிலையத்தில் 3 தடவை கணவருக்கு எதிராக முறைப்பாடு பதிவு செய்துள்ளார்.

கோப்பாய் பொலிஸார் அவ்விடயம் தொடர்பில் எந்த நடவடிக்கையும் எடுக்காத காரணத்தால், யாழ்ப்பாணம் தலமைப் பொலிஸ் நிலையத்தில் முறைப்பாடு பதிவு செய்த்துள்ளார்.

எனினும் பொலிஸ் தரப்பினரால் எந்த நடவடிக்கையும் எடுக்கப்படாத நிலையில் நேற்று முந்தினம் கணவரின் தாக்குதலை தாங்காது உடலில் மண்ணெண்ணை ஊற்றி தீ மூட்டியுள்ளார்.

சம்பவத்தின் போது வீட்டில் இருந்த கணவர், தீயை அணைக்காமல் அங்கிருந்து தப்பி ஓடியுள்ளார். பெண்ணின் தாய் தீயை அணைத்து, அவரை சிகிச்சைக்காக யாழ்.போதனா வைத்தியசாலையில் அனுமதித்துள்ளார்.

வைத்தியசாலையில் திவிர சிகிச்சை பிரிவில் சிகிச்சை பெற்றுவரும் பெண்ணிடம் வாக்குமூலம் பதிவு செய்துள்ளதுடன் மேலதிக விசாரணைகளை மேற்கொண்டு வருகின்றனர்.

அம்பலாந்தோட்டை பொலிஸ் பிரிவிற்குட்பட்ட மல்பெத்தாவ பகுதியில் இன்று (08) திங்கட்கிழமை அதிகாலை மாமனாரின் தாக்குதலில் மருமகன் உயிரிழந்துள்ளார்.

இச்சம்பவத்தில் மாமடல பகுதியைச் சேர்ந்த 26 வயதுடையவரே உயிரிழந்துள்ளார். சம்பவம் தொடர்பில் தெரியவருவதாவது,

இறந்தவரின் மனைவி, குடும்பத் தகராறு காரணமாக அம்பலந்தோட்டா மாவட்டம், மல்பெத்தாவாவில் உள்ள அவரது தந்தையின் வீட்டிற்கு வந்திருந்தார். இதன்போது குடிபோதையில் இருந்த கணவன் தன் மனைவியை தாக்கியுள்ளார்.

இந்நிலையில் குறித்த பெண்ணின் தந்தை தன் மருமகன் மீது மாமனார் கொடூரமான முறையில் தாக்குதல் நடத்தியுள்ளார். இந்த தாக்குதலில் காயமடைந்தே மருமகன் உயிரிழந்துள்ளதாக ஆரம்பகட்ட பொலிஸ் விசாரணைகளில் தெரியவந்துள்ளது.

இக்கொலைச் சம்பவத்துடன் தொடர்புடைய மாமனார் பொலிஸாரால் கைது செய்யப்பட்டுள்ளார். உயிரிழந்தவரின் சடலம் அம்பலாந்தோட்டை வைத்தியசாலையின் பிரேத அறையில் வைக்கப்பட்டுள்ளதுடன், அம்பலாந்தோட்டை பொலிஸார் இது தொடர்பான மேலதிக விசாரணைகளில் ஈடுபட்டு வருகின்றனர்.

காளுத்துறை – ஹொரணை காவல்துறைப் பிரிவுக்குட்பட்ட அரம்பகந்த பகுதியில் நேற்று (07) அதிகாலை ஏற்பட்ட குடும்பத் தகராறின் போது, கணவனைக் கூர்மையான ஆயுதத்தால் தாக்கி கொலை செய்த சம்பவம் அதிர்ச்சியை ஏற்படுத்தியுள்ளது.

கணவனை கொலை செய்த மனைவி கைது செய்யப்பட்டுள்ளார். சம்பவத்தில் அரம்பகந்த பகுதியைச் சேர்ந்த 49 வயதான ஒருவரே உயிரிழந்துள்ளதாக பொலிஸார் தெரிவித்துள்ளனர்.

தம்பதியினருக்கு இடையே ஏற்பட்ட வாக்குவாதம் முற்றிய நிலையிலேயே, வீட்டின் உள்ளே வைத்து கூர்மையான ஆயுதத்தால் தாக்குதல் நடத்தப்பட்டுள்ளதாக முதற்கட்ட விசாரணைகளில் இருந்து தெரியவந்துள்ளது.

சம்பவம் நடந்த சில மணிநேரங்களிலேயே, உயிரிழந்தவரின் மனைவியான சந்தேகநபர் ஹொரணை பொலிஸாரால் கைது செய்யப்பட்டுள்ளார். இந்த கொலைச் சம்பவம் தொடர்பான மேலதிக விசாரணைகளை ஹொரணை பொலிஸார் மேற்கொண்டு வருகின்றனர்.

இலங்கையில் கடந்த வார தங்க விலையுடன் ஒப்பிடுகையில் இன்று (08) 24 கரட் தங்கம் பவுண் ஒன்றுக்கு 1000 ரூபாயால் குறைந்துள்ளதாக அகில இலங்கை நகையக வியாபாரிகள் சங்கம் தெரிவித்துள்ளது.

நாட்டில் இன்று தங்க விலை நிலவரப்படி, 24 கரட் தங்கம் பவுண் ஒன்று 383,000 ரூபாயாக விற்பனை செய்யப்படுகிறது. 22 கரட் தங்கம் பவுண் ஒன்று 352,400 ரூபாயாகவும், விற்பனை செய்யப்படுகிறது.

இதன்படி, 24 கரட் தங்கத்தின் ஒரு கிராமின் விலை 47,875 ரூபாயாகவும், 22 கரட் தங்கத்தின் ஒரு கிராமின் விலை 44,050 ரூபாயாகவும், விற்பனை செய்யப்படுகிறது

மொனராகலை, கொடிகமுவ முஸ்லிம் கிராமத்தில் வசிக்கும் 4 பிள்ளைகளின் தாய் ஒருவர் கொலை செய்யப்பட்டுள்ளார். நேற்று அதிகாலை பெட்ரோல் ஊற்றி தீ வைக்கப்பட்ட நிலையில் பியகம ஆதார மருத்துவமனையில் அனுமதிக்கப்பட்ட நிலையில் மனைவி உயிரிழந்துள்ளார்.

இவ்வாறு உயிரிழந்தவர் பிபில, கொடிகமுவ முஸ்லிம் கிராமத்தைச் சேர்ந்த ரினோஷா உம்மா என்ற நான்கு பிள்ளைகளின் தாயாராவார்.

அவர் தனது பிள்ளைகள் மற்றும் கணவனுடன் இரவு உணவின் பின் உறங்கச் சென்றுள்ளார். பிள்ளைகள் தனி அறையொன்றில் உறங்கிக் கொண்டிருந்தனர்.

இந்தநிலையில், அதிகாலையில் அறையில் தீப்பிழம்பு எரிவதைக் கண்டு பிள்ளைகள் கதவைத் திறந்து பார்த்த போது, தாய் தீப்பற்றி எரிவதைக் கண்டுள்ளனர்.

உடனடியாக தீயை அணைத்து, அவரை பிபில ஆதார மருத்துவமனையில் அனுமதித்த போதிலும் அவர் உயிரிழந்துள்ளார். அவர் மீது பெட்ரோல் ஊற்றி தீ வைத்ததாக சந்தேகிக்கப்படும் கணவர் தற்போது பிரதேசத்தை விட்டு தப்பியோடி தலைமறைவாகியுள்ளார்.

அவர் கோழி இறைச்சிக் கடையொன்றை நடத்தி வரும் ஒரு வர்த்தகர் என பொலிஸார் குறிப்பிட்டுள்ளனர். இருவருக்கும் இடையே ஏற்பட்ட வாக்குவாதம் முற்றியதாலேயே இந்தக்கொலை இடம்பெற்றிருக்கலாம் என பொலிஸார் சந்தேகிக்கின்றனர்.

இலங்கையில் எதிர்வரும் ஜுலை மாதம் முதலாம் திகதி முதல் கடன் அட்டைகளுக்கான வட்டி வீதத்தை 1 முதல் 3 சதவீதம் வரையான தொகையினால் அதிகரிப்பதற்கு வங்கிகளும் நிதி நிறுவனங்களும் தீர்மானித்துள்ளன.

அதற்கமைய, தற்போதைய பொருளாதார சூழ்நிலைக்கு மத்தியில் இலங்கையில் கடன் அட்டைகளை பயன்படுத்தும் 22 லட்சம் வாடிக்கையாளர்கள் பாதிக்கப்படவுள்ளனர்.

அன்றாடத் தேவைகளை நிறைவு செய்வதற்காக பலரும் இந்த அட்டைகளை பயன்படுத்தி வரும் நிலையில், ஜுலை மாதம் முதலாம் திகதி முதல் இந்த அதிகரிப்பு அவர்களுக்குப் பெரும் சுமையாக இருக்கும் என நிதி ஆய்வாளர்கள் சுட்டிக்காட்டுகின்றனர்.

சமீபத்தில் தனது கொள்கை வட்டி வீதத்தை ஒரு சதவீதத்தினால் அதிகரிப்பதற்கு இலங்கை மத்திய வங்கி நடவடிக்கை மேற்கொண்டிருந்தது.

இதன் நேரடித் தாக்கம் கடன் அட்டை வைத்திருப்பவர்கள் மீது விழுந்துள்ளதாக தெரிவிக்கப்படுகின்றது.

அதற்கமைய, இதுவரையில் கடன் அட்டைகளுக்கு நிலவிய 26 சதவீதம் என்ற வருடாந்த வட்டி வீதத்தை, ஜுலை முதலாம் திகதி முதல் 28 சதவீதமாக அதிகரிப்பதற்கு சில வங்கிகள் ஏற்கனவே தீர்மானித்துள்ளன.

மத்திய வங்கியின் தரவு அறிக்கைகளுக்கமைய, இந்த ஆண்டு மார்ச் மாதமளவில் இலங்கையிலுள்ள கடன் அட்டை வைத்திருப்பவர்கள் வங்கிகளுக்குத் திருப்பிச் செலுத்த வேண்டிய மொத்தக் கடன் நிலுவை 194,105 மில்லியன் ரூபாய் என தெரிவிக்கப்பட்டுள்ளது.

இலங்கையில் ஒரு பவுண் தங்கத்துக்கு அரசாங்கத்தினால் சுமார் 82 ஆயிரம் ரூபா வரி விதிக்கப்படுவதாக தெரியவந்துள்ளது. தற்போது ஒரு பவுன் தங்கத்தின் உண்மையான தங்க மதிப்பு சுமார் 358,700 ரூபாவாகும். ஆயினும் ஒரு பவுன் தங்கத்தின் விலை தற்போது 400,000 ரூபாயைத் தாண்டியுள்ளது.

இந்நிலையில் தங்க நகை கொள்வனவின் போது நுகர்வோரால் செலுத்தப்படும் இறுதி விலையில் சுமார் 82,00 ரூபாய் அளவில் வரிகள் மட்டுமே உள்ளடங்கியிருப்பதாக தெரியவந்துள்ளது.

அத்துடன் செய்கூலி மற்றும் அதனுடன் தொடர்புடைய செலவுகளை உள்ளடக்கியே தங்க நகைககளின் இறுதி விலையை தீர்மானிக்கப்படுகின்றது.

தங்க நகை வர்த்தகர்களின் கருத்துப்படி, தற்போதைய வரி முறையானது தங்கத்தின் மதிப்பு மற்றும் செய்கூலி (கூலி) ஆகிய இரண்டிற்கும் 18 சதவீத பெறுமதி சேர்க்கப்பட்ட வரியையும் (VAT), அதனுடன் கூடுதலாக 2.5 சதவீத சமூகப் பாதுகாப்புப் பங்களிப்பு வரியையும் (SSCL) விதிக்கின்றது.

இந்த வரிகள் தங்க நகைகளின் சில்லறை விலையை கணிசமாக உயர்த்தியுள்ளதால், விற்பனையில் பாரிய வீழ்ச்சி ஏற்பட்டுள்ளதாக அவர்கள் சுட்டிக்காட்டுகின்றனர்.

எனவே தங்கம் மீதான வரி அமைப்பை உடனடியாக மாற்றியமைக்குமாறு கொழும்பு, புறக்கோட்டைப் பகுதியிலுள்ள நகை வியாபாரிகள் அரசாங்கத்திடம் அவசர கோரிக்கை விடுத்துள்ளனர்.

அதிகப்படியான வரிவிதிப்பு காரணமாக நகைகளின் விலைகள் சாதாரண நுகர்வோரின் கைக்கு எட்டாத அளவிற்கு உயர்ந்துள்ளதோடு, உள்ளூர் நகைத்தொழில் கிட்டத்தட்ட 75 சதவீதத்தால் சுருங்கிப் போயுள்ளதாகவும் அவர்கள் சுட்டிக்காட்டியுள்ளனர்.

வட் (VAT) வரி அமைப்பில் திருத்தம் செய்வது நுகர்வோர் மற்றும் திறைசேரி (TREASURY) ஆகிய இரு தரப்பினருக்கும் பயனளிக்கும் என்று அவர்கள் நம்புகின்றனர்.

நிதி அமைச்சின் வசம் சமர்ப்பிக்கப்பட்டுள்ள முன்மொழிவொன்றில், தங்கத்தின் மதிப்பு மீதான வட் வரியை நீக்கிவிட்டு, அதனைச் செய்கூலிக்கு (Labor Charge) மாத்திரம் விதிக்குமாறும், அதேநேரம் நடைமுறையிலுள்ள சமூகப் பாதுகாப்பு வரியைத் தக்கவைத்துக் கொள்ளுமாறும் நகை வியாபாரிகள் கோரிக்கை விடுத்துள்ளனர்.

-தமிழ்வின்-

அம்பலாங்கொட, போனதூவ பகுதியில் பேஸ்புக் விருந்து ஒன்று முற்றுகையிடப்பட்டு, 3 பெண்கள் உட்பட 25 பேர் கைது செய்யப்பட்டுள்ளனர்.

பொலிஸ் நிலைய அதிகாரிகள் மற்றும் விசேட அதிரடிப்படை அதிகாரிகள் குழுவினர் மேற்கொண்ட முற்றுகையின் போதே இவர்கள் கைது செய்யப்பட்டுள்ளனர்.

கைது செய்யப்பட்ட சந்தேகநபர்களிடமிருந்து 225 மில்லிகிராம் கொகெய்ன், 8 கிராம் 125 மில்லிகிராம் ஐஸ் போதைப்பொருள், 2 கிராம் 400 மில்லிகிராம் கஞ்சா மற்றும் சட்டவிரோத சிகரெட்டுகள் என்பன கைப்பற்றப்பட்டுள்ளன.

கைது செய்யப்பட்ட பெண்கள் மற்றும் ஆண்கள் 18 முதல் 44 வயதுக்கு இடைப்பட்டவர்கள் என தெரியவந்துள்ளது. அவர்கள் படபொல, பலபிட்டிய, ஹோமாகம, பேருவளை, அம்பலாங்கொடை, மீடியாகொட, வத்துகெதர மற்றும் அஹுங்கல்ல ஆகிய பகுதிகளைச் சேர்ந்தவர்கள் என பொலிஸார் தெரிவித்துள்ளனர்.

இலங்கைப் பெண்ணொருவரும் அவரது பிள்ளைகளும் 14 நாட்களுக்குள் பிரித்தானியாவை விட்டு வெளியேறவேண்டும் என உத்தரவிடப்பட்டுள்ள நிலையில், என் குடும்பத்தைப் பிரித்துவிடாதீர்கள் என அவர் பிரித்தானிய உள்துறை அலுவலகத்துக்குக் கோரிக்கை விடுத்துள்ளார்.

2022ஆம் ஆண்டு, கல்வி கற்பதற்காக பிரித்தானியா வந்த இலங்கையரான Rasika Samarasinghe (46), சட்டப்படி தன் மனைவி பிள்ளைகளையும் பிரித்தானியாவுக்கு அழைத்துவந்தார். அவர் இப்போது இங்கிலாந்தில் care worker ஆக பணி செய்துவருகிறார்.

Rasikaவின் மனைவியான Chamila Dilrakshi (45), உதவி ஆசிரியையாக பணியாற்றிவருகிறார். தம்பதியருக்கு, Thedara (12), Vivas (9) மற்றும் Hiran (8) ஆகிய மூன்று பிள்ளைகள் இருக்கிறார்கள்.

இந்நிலையில், Chamilaவும் அவரது பிள்ளைகளும் 14 நாட்களுக்கும் பிரித்தானியாவை விட்டு வெளியேறவேண்டும் என பிரித்தானிய உள்துறை அலுவலகம் உத்தரவிட்டுள்ளது.

அதாவது, 2024ஆம் ஆண்டு, மார்ச் மாதம் முதல், care worker ஆக பணி புரிவோர் தங்கள் குடும்பங்களை பிரித்தானியாவுக்கு அழைத்துவர அனுமதி இல்லை என அரசு அறிவித்துள்ளது. அதேபோல, 2025ஆம் ஆண்டு, ஜூலை மாதம், வெளிநாடுகளிலிருந்து care worker பணியாளர்களை வேலைக்கு எடுக்க தடை விதிக்கப்பட்டுள்ளது.

விடயம் என்னவென்றால், தற்போது பிரித்தானியாவை விட்டு வெளியேறும்படி உள்துறை அலுவலகத்தால் அறிவுறுத்தப்பட்டுள்ளவர்கள், இந்த விதிகள் அமுலுக்கு வரும் முன்பே பிரித்தானியாவுக்கு வந்தவர்கள்.

இந்நிலையில், நாங்கள் முறைப்படிதான் புலம்பெயர்ந்தோம், சட்டத்துக்கு உட்பட்டு நடக்கிறோம், இருந்தும் இப்படி எங்கள் பிள்ளைகளை தங்கள் தந்தையை விட்டுப் பிரிப்பது அவர்களுடைய மன நலனை பாதிக்கும் என்று கூறியுள்ள Chamila,

தங்களை நாட்டை விட்டு வெளியேற்றும் முன், தானும் தன் கணவரும் சமுதாயத்துக்கு ஆற்றியுள்ள சேவைகளை கருத்தில் கொள்ளுமாறு உள்துறை அலுவலகத்தைக் கோரியுள்ளார்.

Chamila குடும்பத்தினருக்கு ஆதரவாக, உள்ளூர் நாடாளுமன்ற உறுப்பினரான Victoria Collins உட்பட ஏராளமானோர் குரல் கொடுத்துவருகிறார்கள்.