இலங்கையில் தங்கத்தின் விலை இன்று (22.07.2026) மீண்டும் அதிகரித்துள்ளதாக அகில இலங்கை நகையக வியாபாரிகள் சங்கம் தெரிவித்துள்ளது.
நேற்றைய தினம் 24 கரட் தங்கம் ஒரு பவுண் 377,000 ரூபாவாக விற்பனை செய்யப்பட்டிருந்தது. இந்த நிலையில், இன்று அதன் விலை 3000 ரூபாவால் அதிகரித்து 380,000 ரூபாவாகப் பதிவாகியுள்ளது.
இதேவேளை 22 கரட் தங்கம் ஒரு பவுண் 349,600 ரூபாவாக விற்பனை செய்யப்படுகிறது.
அதேவேளை, 24 கரட் தங்கத்தின் ஒரு கிராம் ரூ.47,500 ஆகவும், 22 கரட் தங்கத்தின் ஒரு கிராம் ரூ.43,700 ஆகவும் விற்பனை செய்யப்படுவதாக தெரிவிக்கப்பட்டுள்ளது.
புதிய இணைப்பு : நல்லதண்ணியிலிருந்து மஸ்கெலியா நோக்கிப்பயணித்த முச்சக்கர வண்டியொன்று மோஹினி நீர்வீழ்ச்சிக்கு அருகே பள்ளத்தில் விழுந்து விபத்துக்குள்ளானதில், பலத்த காயமடைந்த மூன்று பாடசாலை மாணவர்கள் நாவலப்பிட்டி/டிக்கோயா ஆதார வைத்தியசாலைக்கு மாற்றி அனுப்பப்பட்டுள்ளனர்.
இந்த விபத்தில் படுகாயமடைந்த மூன்று மாணவர்களும் மஸ்கெலியா பிரதேச வைத்தியசாலையில் அனுமதிக்கப்பட்ட பின்னர் மேலதிக சிகிச்சைக்காக டிக்கோயா ஆதார வைத்தியசாலைக்கு மாற்றப்பட்டுள்ளனர்.
விபத்து நடந்த போது முச்சக்கர வண்டியில் 5 பேர் பயணித்துள்ளதாக பொலிஸார் மேலும் தெரிவித்துள்ளனர். குறித்த விபத்தில் முச்சக்கர வண்டியின் சாரதியும், அதில் பயணித்த முதியவர் ஒருவருமே உயிரிழந்துள்ளனர்.
அதிவேகமாக சென்ற முச்சக்கர வண்டி சாரதியின் கட்டுப்பாட்டை இழந்து பள்ளத்தில் விழுந்ததால் இந்த விபத்து ஏற்பட்டுள்ளதாக நல்லதன்னி பொலிஸ் அதிகாரி தெரிவித்துள்ளார்.
முதலாம் இணைப்பு : நல்லத்தண்ணியில் இருந்து மஸ்கெலியா நோக்கி சென்ற முச்சக்கர வண்டி ஒன்று மோகினி எல்லயிலிருந்து கீழே கவிழ்ந்து விபத்துக்குள்ளானதில் இருவர் உயிரிழந்துள்ளனர்.
முச்சக்கர வாகனம் வீதியிலிருந்து விலகிச் சென்று பள்ளத்தில் விழுந்து இந்த விபத்து நிகழ்ந்ததாக பொலிஸார் தெரிவித்துள்ளனர். முச்சக்கர வண்டியில் இரு முதியவர்களும் சிறுவர்களும் பயணித்ததாக தெரிவிக்கப்படுகின்றது.
காயமடைந்த இரண்டு சிறுவர்களும் தற்போது கவலைக்கிடமான நிலையில் வைத்தியசாலையில் அனுமதிக்கப்பட்டுள்ளதாக குறிப்பிடப்படுகின்றது.
வவுனியாவில் இடம்பெற்ற பல திருட்டுச் சம்பவங்கள் தொடர்பில் மூவர் கைது செய்யப்பட்டுள்ளதாக வவுனியா தலைமை பொலிஸ் நிலைய குற்றத் தடுப்பு பிரிவு பொலிசார் தெரிவித்துள்ளனர்.
இந்தக் கைது நடவடிக்கையானது நேற்றைய தினம்(21.07.2026) முன்னெடுக்கப்பட்டுள்ளது. கடந்த மூன்று நாட்களுக்கு முன் வவுனியா வைத்தியசாலைக்கு முன்பாக நிறுத்தி வைக்கப்பட்டிருந்த மோட்டார் சைக்கிள் திருடப்பட்டிருந்தது.
அத்துடன் இறம்பைக்குளம் பகுதியில் உள்ள கருமாரி அம்மன் கோயில் மற்றும் அதே பகுதியில் உள்ள நாகபூசனி அம்மன் கோயில், குட்செட் வீதியில் உள்ள கருமாரி அம்மன் கோயில், வவுனியா நகர் இலுப்பையடி பகுதியில் உள்ள உணவகம் என பல இடங்களில் இவ்வாறான திருட்டுச் சம்பவங்கள் இடம்பெற்றிருந்தன.
திருடப்பட்ட மோட்டார் சைக்கிளின் உரிமையாளர், உணவக உரிமையாளர் மற்றும் கோயில் நிர்வாகத்தினர், வவுனியா தலைமை பொலிஸ் நிலைய குற்றத் தடுப்பு பிரிவு பொலிசில் முறைப்பாடு செய்திருந்தனர்.
குறித்த முறைப்பாட்டுக்கமைய, வவுனியா தலைமை பொலிஸ் நிலைய பொறுப்பதிகாரி தலைமையிலான அதிகாரிகள் விசாரணைகளை மேற்கொண்டுள்ளனர்.
இதன்போது தேக்கவத்தை பகுதியில் வசிக்கும் 25 வயதுடைய நபர் ஒருவர் மற்றும் சகோதரர்களான கள்ளிக்குளம் பகுதியில் வசிக்கும் 23 வயதுடைய தம்பி மற்றும் மகாறம்பைக்குளம் பகுதியைச் சேர்ந்த 28 வயதுடைய அண்ணா உட்பட மூவர் கைது செய்யப்பட்டுள்ளனர்.
அவர்களிடம் மேற்கொள்ளப்பட்ட விசாரணைகளில் சபாரி மோட்டார் சைக்கிள் உட்பட ஏனையப்பொருட்கள் மீட்கப்பட்டுள்ளன.
அத்துடன், குறித்த சம்பவம் தொடர்பில் மேலதிக விசாரணைகளை மேற்கொண்டுள்ள வவுனியா தலைமை பொலிஸ் நிலைய குற்றத் தடுப்பு பிரிவினர் சந்தேக நபர்களை நீதிமன்றில் முன்னிலைப்படுத்த நடவடிக்கை எடுத்துள்ளதாகத் தெரிவித்துள்ளனர்.
எதிர்வரும் ஆகஸ்ட் 8 ஆம் திகதி உலக பூனைகள் தினம் கொண்டாடப்படவுள்ள நிலையில், பின்னவளை மிருகக்காட்சிசாலையில் உள்ள மூன்று மீன்பிடிப் பூனைக் குட்டிகளுக்குப் பெயரிடுவதற்காகப் பொதுமக்களுக்கான திறந்த போட்டி ஒன்று அறிவிக்கப்பட்டுள்ளது.
விலங்குப் பிரியர்கள் இந்த இளம் பூனைகளுக்குச் படைப்பாற்றல் மிக்க மற்றும் அர்த்தமுள்ள பெயர்களைப் பரிந்துரைக்குமாறு மிருகக்காட்சிசாலை அழைப்பு விடுத்துள்ளது.
சிறந்த பெயர்ப் பரிந்துரைகள் நடுவர் குழுவினால் தேர்ந்தெடுக்கப்படுவதுடன், வெற்றி பெறுபவர்களுக்கு உலக பூனைகள் தினக் கொண்டாட்டங்களின் போது சிறப்புக் பரிசுகள் வழங்கப்படும் எனத் தெரிவிக்கப்பட்டுள்ளது.
பொதுமக்கள் பின்னவளை மிருகக்காட்சிசாலையால் பகிரப்பட்ட கூகுள் படிவம் (Google Form) ஊடாகத் தமது கருத்துக்களைச் சமர்ப்பிக்கலாம். இதற்கான விண்ணப்பங்கள் ஆகஸ்ட் 7, 2026 அன்று நிறைவடையவுள்ளன.
அரிதான மீன்பிடிப் பூனைக் குட்டிகளின் தனித்துவமான ஆளுமைக்குப் பொருத்தமான பெயர்களைத் தேர்ந்தெடுப்பதன் மூலம் அவற்றின் பயணத்தில் பங்கெடுத்துக்கொள்ளுமாறு குடும்பங்கள், வனவிலங்கு ஆர்வலர்கள் மற்றும் பார்வையாளர்களுக்கு மிருகக்காட்சிசாலை அழைப்பு விடுத்துள்ளது.
வவுனியா வெங்கலசெட்டிக்குளம் பிரதேச சபையின் புதிய செயலாளராக திருமதி கலைச்செல்வி றொபின்சன் கடந்த திங்கட்கிழமை (20.07.2026) தனது கடமைகளை உத்தியோகபூர்வமாகப் பொறுப்பேற்றுக்கொண்டார்.
கடந்த காலங்களில் பிரதேச சபையின் உள்ளக கணக்காய்வாளராகவும் (முகாமைத்துவ சேவை உத்தியோகத்தர்) பணியாற்றிய இவர், தனது அர்ப்பணிப்பான மற்றும் நேர்மையான சேவையின் மூலம் அனைவரது மதிப்பையும் பெற்றவர்.
சிறப்பான சேவையை வழங்கிய அனுபவம் மிக்க ஒருவர், மீண்டும் அதே நிறுவனத்தின் தலைமைப் பொறுப்பில் இணைந்துள்ளமை பிரதேச சபை ஊழியர்களுக்கும் அப்பகுதி மக்களுக்கும் பெருமையையும் மிகுந்த மகிழ்ச்சியையும் அளித்துள்ளது.
அவரது பரந்த அனுபவம், திறமை மற்றும் அர்ப்பணிப்பான சேவை என்பன பிரதேச சபையின் நிர்வாகச் செயல்பாடுகளை மேலும் வலுப்படுத்தும் என எதிர்பார்க்கப்படுகிறது.
புதிய பொறுப்பை ஏற்றுள்ள அவருக்கு நிர்வாகத்தினரும் ஊழியர்களும் தமது இதயபூர்வமான வாழ்த்துகளையும் நல்வரவேற்பையும் தெரிவித்துக்கொள்கின்றனர்.
வவுனியா தெற்கு தமிழ் பிரதேச சபையில் தகவல் அறியும் உரிமைச் சட்டத்தின் (RTI) மூலம் பெறப்பட்ட தகவல்களின் அடிப்படையில், சபையின் நிதி வீண்விரயம் செய்யப்பட்டுள்ளதாக வவுனியா பிராந்திய ஊடகவியலாளர் பா.கதீசன் செய்தி வெளியிட்டிருந்தார்.
இச்செய்தியானது சபைக்கும், தனக்கும் அபகீர்த்தியை ஏற்படுத்தும் வகையில் அமைந்திருப்பதாகக் கூறி, இலங்கைத் தமிழரசுக்கட்சியைச் சேர்ந்த வவுனியா தெற்கு தமிழ் பிரதேச சபையின் தவிசாளரினால் ஊடகவியலாளர் பா.கதீசனுக்கு எதிராக நெளுக்குளம் பொலிஸ் நிலையத்தில் முறைப்பாடு ஒன்று பதிவு செய்யப்பட்டுள்ளது.
இச்சம்பவத்தைத் தொடர்ந்து, வவுனியா தெற்கு தமிழ் பிரதேச சபையின் அமர்வு இன்று நடைபெற்றது. அமர்வின் நிறைவில், ஊடகவியலாளரால் வெளியிடப்பட்ட நிதி வீண்விரயம் தொடர்பான குற்றச்சாட்டுகளுக்கு தெளிவுபடுத்தல் வழங்கும் வகையில் தவிசாளரினால் ஊடக சந்திப்பு ஒன்று ஏற்பாடு செய்யப்பட்டிருந்தது.
குறித்த ஊடக சந்திப்பில் பிரதேச சபையின் ஏனைய உறுப்பினர்கள் கலந்து கொண்டிருந்த போதிலும், தேசிய மக்கள் சக்தியைச் (NPP) சேர்ந்த 6 சபை உறுப்பினர்கள் இந்த ஊடக சந்திப்பைப் புறக்கணித்து கலந்து கொள்ளவில்லை. அத்துடன் ஏனைய சில உறுப்பினர்களும் இதில் பங்கேற்கவில்லை என்பது குறிப்பிடத்தக்கது.
யாழ்ப்பாணம் – கண்டி (A9) பிரதான வீதியின் மருதன்கடவலை மிதிவத்த பிரதேசத்தில் சொகுசு பேருந்து ஒன்றும் லொறி ஒன்றும் மோதி விபத்துக்குள்ளாகியுள்ளன.
கொழும்பில் இருந்து வவுனியா நோக்கிப் பயணித்த சொகுசுப் பேருந்து, வீதியின் வலதுபுறமாகத் திரும்ப முயன்ற லொறியின் பின்புறத்தில் மோதியதாலேயே இவ்விபத்து சம்பவித்துள்ளதாக பொலிஸார் தெரிவித்துள்ளனர்.
இன்று (21) இடம்பெற்ற இவ்விபத்தில் பேருந்தின் சாரதி காயமடைந்து கெகிராவ ஆரம்ப வைத்தியசாலையில் அனுமதிக்கப்பட்டு சிகிச்சை பெற்று வருகிறார். சம்பவம் தொடர்பில் மருதன்கடவலை பொலிஸார் மேலதிக விசாரணைகளை ஆரம்பித்துள்ளனர்.
டெங்கு இரத்தக்கசிவு காய்ச்சல் காரணமாக நான்கு வயது சிறுமியொருவர் உயிரிழந்துள்ளார். காலி தேசிய வைத்தியசாலையின் குழந்தைகள் தீவிர சிகிச்சைப்பிரிவில் சிகிச்சை பெற்று வந்த சிறுமியே நேற்று (20) உயிரிழந்துள்ளார்.
இவ்வாறு உயிரிழந்தவர் திக்வெல்ல, நில்வெல்ல, அதுலஸ்ஸவத்த பிரதேசத்தைச் சேர்ந்தவர் என தெரியவந்துள்ளது. கடுமையான காய்ச்சல் காரணமாக திக்வெல்ல மாவட்ட வைத்தியசாலையில் அனுமதிக்கப்பட்ட நிலையில்,
உடல்நிலை மோசமடைந்ததால் மாத்தறை பொது வைத்தியசாலைக்கும், பின்னர் அதே நாளில் மேலதிக சிகிச்சைக்காக காலி தேசிய வைத்தியசாலையின் குழந்தைகள் தீவிர சிகிச்சைப் பிரிவுக்கும் மாற்றப்பட்டுள்ளார். இதன்போது அங்கு சிகிச்சை பெற்று வந்த நிலையில் அச்சிறுமி உயிரிழந்துள்ளார்.
டெங்கு இரத்தக்கசிவு காய்ச்சலால் ஏற்பட்ட சிக்கல்களே மரணத்திற்குக் காரணம் என, காலி தேசிய வைத்தியசாலையில் நேற்று நடத்தப்பட்ட பிரேதப் பரிசோதனையில் உறுதி செய்யப்பட்டுள்ளது.
அம்பாந்தோட்டை துறைமுகத்தில் நிறுத்தப்பட்டுள்ள வாகனங்களுக்கு விதிக்கப்படும் அதிகப்படியான தடுத்துவைப்பு கட்டணங்கள் காரணமாக இறக்குமதியாளர்கள் இறக்குமதி செய்யப்பட்ட சுமார் 1000 சொகுசு கார்களை விடுவிக்காமல் இருப்பதாக இலங்கை சுங்கத்துறை வட்டாரங்கள் தெரிவிக்கின்றன.
அம்பாந்தோட்டை துறைமுகத்தில் சுமார் 40,000 இறக்குமதி செய்யப்பட்ட கார்கள் நிறுத்தப்பட்டுள்ளன. இவை மறு ஏற்றுமதி மற்றும் போர் காரணமாக துபாய் போன்ற நாடுகளுக்கு அனுப்ப முடியாததால் இந்த வாகனங்களில் பெரும்பாலானவை இறக்கப்பட்டுள்ளதாகவும் கூறப்படுகின்றது.
இதேவேளை, மறுஏற்றுமதிக்காக அம்பாந்தோட்டைக்கு வரும் வாகனங்களும் தடுத்துவைப்பு கட்டண சிக்கலை எதிர்கொண்டுள்ளதாக தகவல் வெளியாகியுள்ளது.
கடந்த 6 ஆண்டுகளுக்கு முன்பு இறக்குமதி செய்து அம்பாந்தோட்டை துறைமுகத்தில் நிறுத்தியிருந்த, சுமார் 2 கோடி ரூபாய் மதிப்புள்ள ஒரு சொகுசு காரை விடுவிக்க முயன்றபோது,
இலங்கை இறக்குமதியாளர் கிட்டத்தட்ட 5 கோடி ரூபாய் கட்டணம் செலுத்த வேண்டிய கட்டாயத்திற்கு உள்ளாகியுள்ளார் என்று சுங்கத்துறை தெரிவித்துள்ளது.
இந்த தடுத்துவைப்பு கட்டணத்துடன், வாகனத்தின் விலை தற்போது 7 கோடி ரூபாயாக உயர்ந்துள்ளதாகவும், வாகனத்தின் விலை அதன் உண்மையான விலையை விட கிட்டத்தட்ட மூன்று மடங்கு அதிகரித்துள்ளதாகவும் சுங்கத்துறை அதிகாரி கூறியுள்ளார்.
அதிகப்படியான தடுத்துவைப்பு கட்டணம் காரணமாக வாகனத்தை விடுவிக்கும் முயற்சியை இறக்குமதியாளர் பலர் கைவிட்டுள்ளதாகவும் தெரிவிக்கப்படுகின்றது.
அம்பாந்தோட்டை துறைமுகத்தின் நிர்வாகம் ஒரு சீன நிறுவனத்திற்கு மாற்றப்பட்ட பின்னரே இந்த நிலைமை ஏற்பட்டதாகவும் சுங்கத்துறை அதிகாரி கூறியுள்ளார்.
2026ஆம் ஆண்டுக்கான க.பொ.த சாதாரண தரப் பரீட்சைக்கு தோற்றவுள்ளவர்களுக்கு விசேட அறிவிப்பொன்றை பரீட்சைகள் திணைக்களம் வழங்கியுள்ளது.
அதன்படி பரீட்சைக்கு விண்ணப்பிக்கும் காலம் எதிர்வரும் 23ஆம் திகதியுடன் நிறைவடைவதாக பரீட்சைகள் திணைக்களம் அறிவித்துள்ளது. தேசிய அடையாள அட்டை இல்லாமை ஒரு தடையாக இருக்காது என்பதால், அனைத்து விண்ணப்பதாரர்களும் அதற்கு முன் விண்ணப்பிக்குமாறு திணைக்களம் கேட்டுக்கொண்டுள்ளது.
விண்ணப்பதாரர்கள் பரீட்சை அறிவித்தலில் வழங்கப்பட்டுள்ள அறிவுறுத்தல்களின்படி விண்ணப்பங்களைச் சமர்ப்பிக்க வேண்டும் எனத் தெரிவிக்கப்பட்டுள்ளது.
எந்த காரணம் கொண்டும் விண்ணப்பங்களை ஏற்றுக்கொள்ளும் இறுதித் திகதி நீடிக்கப்பட மாட்டாது என்றும் பரீட்சைகள் திணைக்களம் திட்டவட்டமாக வலியுறுத்தியுள்ளது.
இது தொடர்பான மேலதிக விசாரணைகள் அல்லது சந்தேகங்களுக்கு 1911 என்ற துரித சேவை இலக்கம் மற்றும் 0112784537, 0112786616, 0112784208 ஆகிய தொலைபேசி இலக்கங்கள் அல்லது 0112784422 என்ற தொலைநகல் இலக்கம் ஊடாக தகவல்களை பெற்றுக் கொள்ள முடியும் எனப் பரீட்சைகள் திணைக்களம் மேலும் குறிப்பிட்டுள்ளது.
நுவரெலியா, லிந்துலை பகுதியில் மகன் ஒருவர், தனது தந்தையை கூரிய ஆயுதத்தால் தாக்கியதில் தந்தை படுகாயமடைந்துள்ளார். கோழியைக் கொன்று இறைச்சிக்காக உட்கொண்டதால் ஆத்திரமடைந்த மகன் தந்தையை தாக்கியுள்ளார்.
சம்பவத்தில் படுகாயமடைந்த தந்தை கவலைக்கிடமான நிலையில் வைத்தியசாலையில் அனுமதிக்கப்பட்டுள்ளார். இவ்வாறு வைத்தியசாலையில் அனுமதிக்கப்பட்டவர் லிந்துலை, மவுஸ்வெல்ல தோட்டத்தைச் சேர்ந்த 65 வயதுடைய நபர் என தெரியவந்துள்ளது.
குறித்த நபரால் வீட்டில் வளர்க்கப்பட்ட கோழியொன்று கொல்லப்பட்டு இறைச்சிக்காக உட்கொள்ளப்பட்டுள்ளது. இதனால் கோபமடைந்த மகன் தந்தையுடன் தகராற்றில் ஈடுபட்டுள்ளார். இதன்போது இருவருக்கும் இடையில் ஏற்பட்ட வாக்குவாதம் முற்றியதன் காரணமாக, மகன் தந்தையை கூரிய ஆயுதத்தால் தாக்கியதாக தெரிவிக்கப்படுகிறது.
இதன்போது பலத்த வெட்டுக் காயங்களுக்குள்ளான தந்தை லிந்துலை பிரதேச வைத்தியசாலையில் அனுமதிக்கப்பட்டதுடன், மேலதிக சிகிச்சைக்காக நுவரெலியா மாவட்ட பொது வைத்தியசாலைக்கு மாற்றப்பட்டுள்ளார்.
தாக்குதலை நடத்திய மகன் பிரதேசத்திலிருந்து தப்பியோடியுள்ளதாகவும், அவரைக் கைது செய்வதற்கான விசாரணைகளை ஆரம்பித்துள்ளதாகவும் பொலிஸார் தெரிவித்தனர்.
பழங்களை பழுக்க வைப்பதற்கு நச்சு இரசாயனங்களை பயன்படுத்துவதை தடுப்பதற்கான சட்ட விதிகளை அறிமுகப்படுத்த நடவடிக்கைகள் எடுக்கப்படும் என்று வர்த்தகம், வாணிபம், உணவுப் பாதுகாப்பு மற்றும் கூட்டுறவு அபிவிருத்தி அமைச்சர் வசந்த சமரசிங்க தெரிவித்துள்ளார்.
நச்சு இரசாயனங்களை பயன்படுத்தி பழுக்க வைக்கப்பட்ட பழங்கள் சந்தையில் விற்பனை செய்யப்படுவது தொடர்பாக நுகர்வோர் விவகார அதிகாரசபைக்கு பல முறைப்பாடுகள் வந்துள்ளதாகவும் அவர் சுட்டிக்காட்டியுள்ளார்.
நுகர்வோர் விவகார அதிகாரசபையின் அதிகாரிகள் பங்கேற்புடன் நடைபெற்ற ஒரு கலந்துரையாடலின் போது அமைச்சர் வசந்த சமரசிங்க இந்த அறிவிப்பை வெளியிட்டுள்ளார்.
சமூகத்தில் ஏற்பட்டுள்ள பெரும் பிரச்சினை
வாழைப்பழங்கள், மாம்பழங்கள் மற்றும் பப்பாளி பழங்களில் இதுபோன்றவற்றிற்கு நச்சு இரசாயனங்களைப் பயன்படுத்துவது சமூகத்தில் ஒரு பெரும் பிரச்சினையாகிவிட்டது என்று அமைச்சர் கூறியுள்ளார்.
அத்தகைய நச்சு இரசாயனங்கள் பயன்படுத்தப்படும் இடங்களில் சோதனை நடத்துவதே அடுத்தகட்ட நடவடிக்கையாக இருக்கும் என்றும் குறிப்பிட்டுள்ளார்.
இது தொடர்பிலான அறிவிப்புகள் வெளியிடப்பட்ட பின்னரும் வர்த்தகர்கள் இந்த முறையை தொடர்ந்து பயன்படுத்தினால், இது தொடர்பாக கடும் சட்ட நடவடிக்கை எடுக்கப்படும் என்றும் அமைச்சர் தெரிவித்துள்ளார்.
கிண்ணியா வைத்தியசாலையில் அனுமதிக்கப்பட்ட கைமுறிந்த சிறுவனுக்கு ஒரு நாள் கடந்தும் உரிய சிகிச்சை அளிக்கப்படவில்லை என அச்சிறுவனின் தந்தை கடுமையான குற்றச்சாட்டுக்களை முன்வைத்துள்ளார்.
இது தொடர்பில் அவர் முகப்புத்தகத்தில் வெளியிட்ட காணொளி, அதிகம் பகிரப்பட்டு வருகிறது.
குறித்த காணொளியில், கடந்த 18ஆம் திகதி சிறுவன் கைமுறிந்த நிலையில் சிகிச்சைக்காக வைத்தியசாலையில் அனுமதிக்கப்பட்டதாக சிறுவனின் தந்தை குறிப்பிடுகின்றார்.
எனினும், ஒரு நாள் கடந்தும் வைத்தியசாலை நிர்வாகம் எவ்வித சிகிச்சையும் அளிக்கப்படவில்லை எனவும் அவர் சுட்டிக்காட்டுகின்றார். அதேநேரம், குறித்த வைத்தியசாலைக்குச் செல்லும் நோயாளிகள் இரத்தப் பரிசோதனை, சிறுநீர்ப் பரிசோதனை,
எக்ஸ்ரே (X-Ray) மற்றும் சிகிச்சையளிக்கப் பயன்படும் பொருட்கள் வரை அனைத்தையும் வெளியிலுள்ள தனியார் மருந்தகங்களிலேயே பெற வேண்டிய துர்ப்பாக்கிய நிலை காணப்படுவதாக பொதுமக்கள் தெரிவிக்கின்றனர்.
கிண்ணியா வைத்தியசாலையின் இவ்வாறான குறைபாடுகள் குறித்து அதிகாரிகளும் அரசியல்வாதிகளும் கண்டுகொள்வதில்லை எனப் பலரும் விசனம் வெளியிட்டுள்ளனர்.
ஜிப்லைன் சாகச விளையாட்டின் போது ஏற்பட்ட விபத்தில் கர்நாடகாவை சேர்ந்த நபர் ஒருவர் பலத்த காயமடைந்துள்ளார். டான்டேலி ரிசார்ட் ஒன்றில் ஜிப்லைன் சவாரியின் போது பாதுகாப்பு சாதனம் பழுதடைந்ததால் 40 அடி உயரத்தில் இருந்து சுற்றுலா பயணி ஒருவர் கீழே விழுந்தது சோகத்தை ஏற்படுத்தியுள்ளது.
விஜயபுராவை சேர்ந்த குபேர் சுர்பூர்(Kuber Surpur) என்ற நபர் ஜிப்லைன் சவாரியை தொடங்கிய சில நொடிகளில் அவரது பாதுகாப்பு பூட்டு திடீரென கழன்று விழுந்தது. இதனால் 40 அடி உயரத்தில் இருந்து கீழே விழுந்த குபேர் சுர்பூர் பலத்த காயமடைந்துள்ளார்.
அவருக்கு கை, கால்களில் எலும்பு முறிவு ஏற்பட்டு இருப்பதுடன், நரம்பு பாதிப்புகளும் ஏற்பட்டு இருப்பதாக அவரது குடும்பத்தினர் தகவல் தெரிவித்துள்ளனர்.
மேலும் சம்பந்தப்பட்ட ரிசார்ட்டில் இருந்த உபகரணங்கள் துருப்பிடித்தும், முறையாக பராமரிக்கப்படாமலும் இருந்ததாக குபேரின் குடும்பத்தினர் ரிசார்ட் நிர்வாகத்தின் மீது குற்றம் சாட்டியுள்ளனர்.
விபத்தில் பாதிக்கப்பட்ட குபேர் முதலில் டான்டேலி அரசு மருத்துவமனைக்கு கொண்டு செல்லப்பட்ட நிலையில், பின்னர் மேல் சிகிச்சைக்காக மிராஜ் பகுதியில் உள்ள மருத்துவமனைக்கு மாற்றப்பட்டுள்ளார். இந்த சம்பவம் தொடர்பான வீடியோ பதிவு சமூக வலைதளங்களில் பரவி பலரது கண்டனங்களையும் பெற்று வருகிறது.
இந்தியாவின் தலை நகரான புதுடெல்லியில், மருத்துவமனையில் அனுமதிக்கப்பட்டிருந்த நோயாளி ஒருவர் மீது கூரையில் பொருத்தப்பட்டிருந்த மின்விசிறி கழன்று விழுந்தது. மூன்று மணி நேரத்தில் அந்த நோயாளி உயிரிழந்ததால் பரபரப்பு உருவாகியுள்ளது.
ஞாயிற்றுக்கிழமை இரவு 9.30 மணியளவில் புதுடெல்லியிலுள்ள குரு தேஜ் பகதூர் மருத்துவமனையில், முகம்மது அக்பர் (42) என்னும் நபர் அனுமதிக்கப்பட்டுள்ளார்.
உயர் இரத்த அழுத்தம், மூளை வீக்கம் மற்றும் நுரையீரல் பிரச்சினை ஆகிய பிரச்சினைகளுக்காக அவர் மருத்துவமனையில் அனுமதிக்கப்பட்டதாக கூறப்படுகிறது.
அக்பர் மருத்துவமனையின் அவசர சிகிச்சைப்பிரிவிலுள்ள படுக்கை ஒன்றில் படுத்திருக்க, திடீரென கூரையில் பொருத்தப்பட்டிருந்த மின் விசிறி கழன்று அவர் மீது விழுந்துள்ளது.
சுமார் மூன்று மணி நேரத்தில், அதாவது, அதிகாலை 12.16 மணிக்கு அக்பர் உயிரிழந்துவிட்டார். இந்த சம்பவம் பெரும் பரபரப்பை உருவாக்கியுள்ள நிலையில், அக்பர் குடும்பத்தினர் அவரது மரணம் தொடர்பில் விசாரணை கோரியுள்ளனர்.
இதற்கிடையில், அக்பர் உயர் இரத்த அழுத்தம், மூளை வீக்கம் மற்றும் நுரையீரல் பிரச்சினை ஆகிய காரணங்களால் உயிரிழந்துவிட்டதாக மருத்துவமனை தெரிவித்துள்ளது.
வவுனியாவில் மாணவர்களின் கல்விக்கு உதவும் நோக்கில் வவுனியா சிற்றி ரொட்டரி கழகத்தால் (Rotary Club of Vavuniya City) பின்தங்கிய பிரதேசங்களில் இருந்து தெரிவுசெய்யப்பட்ட 60 மாணவர்களுக்கு துவிச்சக்கரவண்டிகள் தாண்டிக்குளம் பகுதியில் உள்ள ரேனகம் (Renaham) தனியார் மண்டபத்தில் வைத்து கடந்த வெள்ளிக்கிழமை (17.07.2026)வழங்கப்பட்டது.
ரொட்டரி சர்வதேச மாவட்டம் 2982, ரொட்டரி சர்வதேச மாவட்டம் 3220 மற்றும் வவுனியா சிற்றி ரொட்டரி கழகம் ஆகியவற்றின் ஏற்பாட்டில் “Hope on Wheels 2.0” என்ற பெயரில் இந்த நிகழ்வு இடம்பெற்றது.
நிகழ்வில் ரோட்டரி சர்வதேச மாவட்ட 3220 ஆளுநர் Rtn. குமார் சுந்தரராஜ், மாவட்ட 2982 ஆளுநர் Rtn.C.செந்தில்குமார், முன்னாள் மாவட்ட ஆளுநர் Rtn. S.லோகநாதன் மற்றும் திட்ட ஒருங்கிணைப்பாளர் Rtn. ரொபின்சன் B.பிரசாந்தன் ஆகியோர் சிறப்பு விருந்தினர்களாக கலந்து கொண்டனர்.
மேலும் வவுனியா பிரதேச செயலாளர் இந்திரராசா பிரதாபன், வவுனியா தெற்கு வலயக் கல்விப் பணிப்பாளர் T.முகுந்தன் மற்றும் வவுனியா வடக்கு வலயக் கல்விப் பணிப்பாளர் திருமதி வி.தட்ஷாயினி ஆகியோரும் சிறப்பு விருந்தினர்களாக கலந்து சிறப்பித்தனர்.
இந்த திட்டத்தின் மூலம் கல்வி பயிலும் மாணவர்களுக்கு போக்குவரத்து வசதியை மேம்படுத்தும் நோக்கில் 60 துவிச்சக்கரவண்டிகள் வழங்கப்பட்டன. வவுனியாவில் பல்வேறு சமூக சேவைகளை செய்துவரும் வவுனியா சிற்றி ரொட்டரி கழகத்தின்(Rotary Club of Vavuniya City ) முக்கிய நிகழ்வாக இந்நிகழ்வு அமைந்திருந்தது.
