அரசினால் ஆரம்பிக்கப்பட்டுள்ள “எனக்கென ஒரு இடம் – அழகான வாழ்க்கை” என்ற கருப்பொருளிலான தேசிய வீடமைப்பு அபிவிருத்தி வேலைத்திட்டத்தின் கீழ், வவுனியா மாவட்டத்தில் நிர்மாணிக்கப்பட்ட 4 புதிய வீடுகள் நேற்று முன்தினம் (17.07.2026) உத்தியோகபூர்வமாகத் திறந்து வைக்கப்பட்டு பயனாளிகளிடம் கையளிக்கப்பட்டன.
வீடமைப்பு, நிர்மாணம் மற்றும் நீர்வழங்கல் அமைச்சர் டாக்டர் சுசில் ரணசிங்க அவர்களால் இவ்வீடுகள் திறந்து வைக்கப்பட்டன. வவுனியா மாவட்டத்தின் அவுசதபிட்டி , கலுகுன்னம்மடுவ, புளியங்குளம் , கிறிஸ்தவகுளம் கிராமங்களில், தலா 10 இலட்சம் ரூபாய் அரசாங்க செலவில் இவ்வீடுகள் நிர்மாணிக்கப்பட்டுள்ளன.
வீடுகளைக் கையளிக்கும் நிகழ்வில் உரையாற்றிய அமைச்சர் டாக்டர் சுசில் ரணசிங்க, இத்திட்டத்தின் எதிர்கால இலக்குகள் குறித்துப் பகிர்ந்து கொண்டார்.
“இவ்வாண்டுக்குள் வவுனியா மாவட்டத்தில் மட்டும் இதுபோன்ற 410 வீடுகளை நிர்மாணிப்பதற்கு திட்டமிடப்பட்டுள்ளது. இதற்கென அரசாங்கத்தினால் 410 மில்லியன் ரூபாய் நிதி ஒதுக்கப்பட்டுள்ளது. மேலும், இந்த ஆண்டின் இறுதிக்குள் நாடு முழுவதும் உள்ள குறைந்த வருமானம் பெறும் குடும்பங்களுக்காக 12,000 வீடுகளை வழங்குவதே அரசாங்கத்தின் முதன்மை இலக்காகும்,” என்று அவர் குறிப்பிட்டார்.
இந்நிகழ்வில் பாராளுமன்ற உறுப்பினர் எம்.ஜெகதீஸ்வரன், வவுனியா மாவட்ட செயலாளர் பி.ஏ.சரத்சந்திர, மேலதிக மாவட்ட செயலாளர் என்.கமலதாசன் மற்றும் அரச அதிகாரிகள், பொதுமக்கள் எனப் பலரும் கலந்து கொண்டனர்.
வவுனியாவின் வரலாற்றுச் சிறப்புமிக்க பெரியகட்டு புனித அந்தோனியார் ஆலயத்தின் வருடாந்த பெருவிழா எதிர்வரும் 23ஆம் திகதி ஆரம்பமாகவுள்ள நிலையில், அதற்கான முன்ஆயத்தங்கள் மற்றும் பாதுகாப்பு ஏற்பாடுகள் குறித்த விசேட கலந்துரையாடல் ஒன்று ஆலய வளாகத்தில் நடைபெற்றது.
இவ்வரலாற்றுச் சிறப்புமிக்க திருவிழாவானது எதிர்வரும் 23ஆம் திகதி கொடியேற்றத்துடன் ஆரம்பமாகி, எதிர்வரும் 01.08.2026 அன்று கூட்டுத் திருப்பலி மற்றும் நற்கருணை ஆசீர்வாதத்துடன் நிறைவடையவுள்ளது.
இவ்விழாவில் நாடளாவிய ரீதியில் இருந்து வருகை தரும் பல்லாயிரக்கணக்கான பக்தர்களுக்கான பொதுமக்கள் வசதிகள், குடிநீர் மற்றும் சுகாதார ஏற்பாடுகள், போக்குவரத்து ஒழுங்குகள் மற்றும் பாதுகாப்பு நடைமுறைகள் குறித்து இக்கலந்துரையாடலில் விரிவாக ஆராயப்பட்டது.
இக்கலந்துரையாடலில் வவுனியா மாவட்டச் செயலாளர் பி.ஏ. சரத்சந்திர, மேலதிக மாவட்டச் செயலாளர் என்.கமலதாசன் ஆகியோருடன் வன்னி பாராளுமன்ற உறுப்பினர் ம.ஜெகதீஸ்வரன், பொலிஸ் அதிகாரிகள், அரச திணைக்களங்களின் அதிகாரிகள் உள்ளிட்ட பலரும் இக்கலந்துரையாடலில் கலந்துகொண்டு தத்தமது துறைகள் சார்ந்த ஏற்பாடுகள் மற்றும் பொறுப்புகள் குறித்துக் கலந்துரையாடினர்.
திருவிழாக் காலங்களில் பக்தர்களுக்கு எவ்வித இடையூறுகளும் இன்றி, சிறப்பான முறையில் வழிபாடுகளை மேற்கொள்வதற்கான அனைத்துப் பணிகளையும் ஒருங்கிணைந்து முன்னெடுக்குமாறு இதன்போது அதிகாரிகளுக்கு அறிவுறுத்தப்பட்டுள்ளது.
பல்வேறு பகுதிகளில் நீண்டகாலமாகத் தொலைபேசி கம்பிகளை வெட்டி விற்பனை செய்து வந்த கும்பலைச் சேர்ந்த பிரதான சந்தேகநபர் ஒருவர் பேராதனை பொலிஸாரால் கைது செய்யப்பட்டுள்ளார்.
கைது செய்யப்பட்ட சந்தேகநபர் மற்றும் சிலருடன் சேர்ந்து வாகனமொன்றில் வந்து, தொலைபேசி கம்பிகளை பழுதுபார்ப்பது போல் நடித்து மேற்படி திரட்டுச்சம்வத்தை மேற்கொண்டுள்ளனர்.
இவர்கள் நீண்டகாலமாக கெலிஓயா, உடபேராதனை, சங்கபோகம, மஹகந்த உள்ளிட்ட பல பிரதேசங்களில் இந்தத் திருட்டுச் செயலைத் தொடர்ந்து முன்னெடுத்து வந்துள்ளனர்.
இவ்வாறு சட்டவிரோதமாக வெட்டப்பட்ட தொலைபேசி கம்பிகள் அனைத்தும் கம்பளை பிரதேசத்திலுள்ள வர்த்தக நிலையமொன்றிற்கு விற்பனை செய்யப்பட்டுள்ளமை பொலிஸ் விசாரணைகளில் தெரியவந்துள்ளது.
சம்பவம் தொடர்பில் கைது செய்யப்பட்ட சந்தேகநபர் நேற்று வியாழக்கிழமை (16.07.2026) நீதிமன்றில் ஆஜர்படுத்தப்பட்டதோடு, இந்த சம்பவம் குறித்து பேராதனை பொலிஸார் மேலதிக விசாரணைகளைத் தீவிரமாக மேற்கொண்டு வருகின்றனர்.
சமூக ஊடகங்களில் வைரலாக பரவிய காணொளியைத் தொடர்ந்து, வீதிகளில் ஆபத்தான முறையில் மோட்டார் சைக்கிள்களை இயக்கி பொதுமக்கள் மற்றும் வாகனப் போக்குவரத்துக்கு இடையூறு விளைவித்த
குற்றச்சாட்டில் கைது செய்யப்பட்ட இளைஞர்கள் இன்று (16) சம்மாந்துறை நீதவான் நீதிமன்றில் ஆஜர்படுத்தப்பட்டனர். குறித்த வழக்கு விசாரணையின் போது, சந்தேகநபர்களான இளைஞர்கள் தலைக்கவசம் அணியாமல், ஒரே மோட்டார் சைக்கிளில் மூன்று மற்றும் நான்கு பேர் பயணித்ததுடன்,
வீதியை மறித்து ஆபத்தான சாகசங்களில் ஈடுபட்டிருந்தமை சமூக ஊடகங்களில் பகிரப்பட்ட வைரல் வீடியோ ஆதாரங்கள் மூலம் நீதிமன்றில் சுட்டிக்காட்டப்பட்டது.
மேலும், இவர்களின் இத்தகைய அத்துமீறிய நடவடிக்கைகள் குறித்து பொதுமக்கள் தரப்பிலிருந்து பொலிஸ் மா அதிபருக்கு முறைப்பாடு செய்யப்பட்டிருந்ததுடன்,
சம்மாந்துறை நீதவானின் அதிகாரப்பூர்வ வாகனத்தின் முன்னிலையிலும் இவர்கள் இதேபோன்ற ஆபத்தான செயற்பாடுகளில் ஈடுபட்டிருந்தமை இங்கு குறிப்பிடத்தக்கது.
இந்நிலையில், சந்தேகநபர்களின் இந்தச் செயற்பாடு பொதுமக்களுக்கு பெரும் இடையூறையும் அச்சுறுத்தலையும் ஏற்படுத்தியுள்ளமை கருதி, சம்மாந்துறை நீதவான் நீதிமன்ற நீதிபதி நூர்டீன் சர்ஜூன் விசேட உத்தரவொன்றைப் பிறப்பித்தார்.
சம்மாந்துறை பகுதியில் உள்ள அனைத்து பள்ளிவாசல்களிடமும் குறித்த இளைஞர்கள் மன்னிப்பு கோரி, அதற்கான எழுத்து மூலமான கடிதங்களைப் பெற்று நீதிமன்றத்தில் சமர்ப்பிக்க வேண்டும் என நீதவான் உத்தரவிட்டார்.
அத்துடன், அந்த மன்னிப்புக் கடிதங்களைச் சமர்ப்பித்த பின்னரே, இந்த வழக்கை மேலும் முன்னெடுக்க முடியும் என அறிவித்த நீதிபதி, வழக்கை அடுத்த கட்ட விசாரணைக்காக ஒத்திவைத்துள்ளார்.
மாதுளை பழம் மிகவும் சுவையான, சத்துக்கள் நிறைந்த பழம் தான். தினமும் சிறிதளவு சாப்பிடுவது நல்லதுதான். ஹீமோகுளோபின் அதிகரிப்பது முதல் ரத்தத்தை சுத்தப்படுத்துவது வரை நிறைய நன்மைகளை தரும்.
ஆனால் அதை நீங்கள் தப்பா தான் சாப்பிடறீங்கனு உங்களுக்கு தெரியுமா? மாதுளை பழம் சாப்பிடும்போது பொதுவாக செய்யும் 5 தவறுகள் என்ன? அதை ஏன் செய்யக்கூடாது? என்பது பற்றி நாம் இங்கு பார்க்கலாம்.
நிறைய பேர் மாதுளை பழத்தை நறுக்கும்போது ஒழுங்காக நறுக்கத் தெரியாமல் அதன் சாறு முழுக்க கீழே சிந்திவிடுவார்கள். அதிலேயே பாதி சத்துக்கள் வீணாகி போய்விடும். அதோடு பழத்தை மென்று விட்டு அதன் விதைகளை தூக்கி கீழே வீசி விடுவார்கள். அப்படி செய்ய கூடாது.
மாதுளை பழத்தை பொறுத்தவரை அதன் விதைகளையும் சேர்த்து தான் சாப்பிட வேண்டும். அதில்தான் நிறைய ஆண்டி அக்கிட்சிட்டுங்கள் இருக்கின்றன.
குறிப்பாக குழந்தைகளுக்கு கொடுக்கும்போது அவர்களுக்கு விதைகளோடு சாப்பிட கற்றுக் கொடுங்கள். பெரும்பாலான குழந்தைகள் விதைகளை துப்பி விடுகிறார்கள்.
மாதுளை சாப்பிடும்போது செய்யும் இரண்டாவது தவறு என்னவென்றால் மாதுளையின் மேல் பகுதி தோலை உரித்தவுடன் அதன் உட்புறத்தில் இருக்கும் மெலிதான வெள்ளை நிற தோல்களை நீக்கிவிட்டு மாதுளையின் முத்துக்களை மட்டும் சாப்பிடுவார்கள். அது மிக மிகத் தவறு.
மாதுளையின் உட்புறத்தில் இருக்கும் மெல்லிய தோலில் உள்ள துவர்ப்புத் தன்மை தான் அந்த பழத்தின் ஒட்டுமொத்த பயன்களையுமே தாங்கி இருக்கிறது.
குறிப்பாக அந்த பகுதியில் தான் நார்ச்சத்து இருக்கிறது. அது செரிமான ஆற்றலை மேம்படுத்த உதவி செய்யும். அதை நீக்கிவிட்டால் அதிலுள்ள நார்ச்சத்துக்கள் முழுமையாக நீங்கிவிடும்.
மாதுளை பழம் மட்டுமல்ல எந்த வகை பழமாக இருந்தாலும் அது உடலுக்கு நல்லது என்பதற்காக நிறைய சாப்பிடக் கூடாது. ஏனென்றால் பழங்களில் இயற்கையாகவே சர்க்கரை இருக்கும். அது ரத்தத்தின் சர்க்கரை அளவை அதிகரிக்கச் செய்து விடும்.
குறிப்பாக மாதுளை அளவுக்கு அதிகமாக சாப்பிட்டால் செரிமானக் கோளாறுகள் ஏற்படலாம். அதிலும் சிலருக்கு குடல் சென்சிடிவிட்டி அதிகமாக இருக்கும். அவர்களுக்கு இந்த அஜீரணக் கோளாறு சார்ந்த பிரச்சினைகள் ஏற்படும்.
மற்ற பழங்களையாவது நறுக்குவதற்கு முன்போ பின்போ கழுவிவிட்டு சாப்பிடுவோம். ஆனால் நன்கு யோசித்துப் பாருங்கள்.
மாதுளை பழத்தை நாம் கழுவுவதே கிடையாது. மாதுளை முத்துக்கள் உள்ளுக்குள் தானே இருக்கிறது என்று உரித்து அப்படியே சாப்பிடுகிறோம். அப்படி செய்யக்கூடாது.
மாதுளை பழத்தின் தோலில் நிறைய பாக்டீரியாக்கள் இருக்கும். அதேபோல பழங்களில் நிறைய பூச்சிக்கொல்லிகள் தெளித்து இருப்பார்கள்.
அதனால் மாதுளை வெட்டுவதற்கு முன் பழத்தை நன்கு கழுவிவிட்டு தான் நறுக்க வேண்டும்.
தனது 14 மகன்களுக்கும் ஒரே நேரத்தில், ஒரே மேடையில், விவசாயி ஒருவர் திருமணம் செய்து வைத்தமை சமூக ஊடகங்களில் வைரலாகி வருகின்றது.
ஆண்டுதோறும் விண்ணைத் தொடும் திருமணச் செலவுகள் மற்றும் பணவீக்கத்திற்கு அஞ்சி, தனது குடும்பத்தைக் கடனில் இருந்து காப்பாற்ற அவர் எடுத்த இந்த முடிவு, சமூக வலைதளங்களில் விவாதப் பொருளாகியுள்ளது.
இந்த திருமணத்தில் வழக்கமான சொகுசு கார்களுக்குப் பதிலாக, அலங்கரிக்கப்பட்ட டிராக்டர்-டிராலிகளில் 14 மணமகன்களும், மற்றொரு டிராக்டரில் 14 மணப்பெண்களும் ஊர்வலமாக அழைத்து வரப்பட்டனர்.
இந்தத் தனித்துவமான ஊர்வலக் காணொளி இணையவாசிகளைத் திகைப்பில் ஆழ்த்தியுள்ளது. 14 தனித்தனி திருமணங்களை நடத்தினால் மண்டபம், உணவு, போக்குவரத்து எனப் பல மில்லியன் ரூபாய் செலவாகியிருக்கும்.
ஆனால், அனைத்தையும் ஒரே மேடையில் முடித்ததால் பல கோடி ரூபாய் மிச்சமாகியுள்ளது என்கிறது அந்தக் குடும்பம். நிர்வாக ரீதியாகவும், பொருளாதார ரீதியாகவும் இது ஒரு புத்திசாலித்தனமான முடிவாகப் பார்க்கப்பட்டாலும், இணையத்தில் ஒரு பெரும் விவாதமே வெடித்துள்ளது.
ஆடம்பர மோகத்தில் சிக்கித் தவிக்கும் இன்றைய தலைமுறைக்கு, சிக்கனம் மற்றும் நடைமுறைத் தீர்வுகளே மிக முக்கியம் என்ற செய்தியை இந்தத் திருமணம் உரக்கச் சொல்லியிருக்கிறது .
ஆடம்பரத்தை விட அன்பும், கடன் இல்லாத நிம்மதியான வாழ்வுமே முக்கியம் என்ற அந்த விவசாயியின் நோக்கம் உண்மையிலேயே பாராட்டத்தக்கது.
லட்சக்கணக்கில், ஏன் கோடிக்கணக்கில் செலவு செய்து கடனாளியாக மாறும் இந்தத் திருமணக் கலாச்சாரத்திற்கு மத்தியில், மத்திய பிரதேச மாநிலம் சத்னாவைச் சேர்ந்த ஒரு விவசாயி செய்த இந்த செயல் இந்தியா முழுவதையும் ஆச்சரியத்தில் ஆழ்த்தியுள்ளது
இலங்கை பிரீமியர் லீக் (LPL) தொடரில் பங்கேற்கும் யாழ்ப்பாண கிங்ஸ் அணியின் உரிமையாளர் போட்டி நிர்ணயம் தொடர்பான குற்றச்சாட்டில் விசேட புலனாய்வுப் பிரிவினரால் கைதுசெய்யப்பட்டுள்ளார்.
2026 இலங்கை பிரீமியர் லீக் தொடரின் உத்தியோகபூர்வ தொடக்க விழா நடைபெறவிருந்த நிலையில், இன்று இந்தக் கைது நடவடிக்கை மேற்கொள்ளப்பட்டதாக பொலிஸ் தெரிவித்துள்ளது.
சூதாட்ட மோசடி குற்றச்சாட்டு ஒன்று தொடர்பாக, விளையாட்டுத் துறையுடன் தொடர்புடைய குற்றங்களைத் தடுக்கும் பொலிஸ் விசேட விசாரணைப் பிரிவினால் அவர் கைது செய்யப்பட்டுள்ளதாக தெரிவிக்கப்படுகின்றது.
இன்று நடைபெறும் 2026 லங்கா பிரீமியர் லீக் தொடரின் உத்தியோகபூர்வ ஆரம்பத்திற்கு முன்னதாக இந்த விவகாரத்தில் கைது நடவடிக்கை மேற்கொள்ளப்பட்டுள்ளதாக பொலிஸார் உறுதிப்படுத்தியுள்ளனர்.
விளையாட்டுத் துறையுடன் தொடர்புடைய குற்றங்களைத் தடுக்கும் சட்டத்தின் கீழ், விளையாட்டு ஊழலுக்கு எதிராக உலகின் மிகக் கடுமையான சட்டங்களைக் கொண்ட நாடுகளில் ஒன்றாக இலங்கை விளங்குகின்றது.
இச்சட்டம் போட்டி மோசடி , ஸ்பாட்-பிக்ஸிங் மற்றும் விளையாட்டுகளில் மேற்கொள்ளப்படும் ஏனைய முறைகேடுகளைக் குற்றச்செயல்களாக வரையறுப்பதுடன், குற்றம் நிரூபிக்கப்பட்டால் தவறிழைப்பவர்களுக்கு கணிசமான அபராதங்களும் சிறைத்தண்டனைகளும் விதிக்கப்பட வாய்ப்புள்ளது.
விளையாட்டு தொடர்பான ஊழல் குற்றச்சாட்டுகள் குறித்த விசாரணையின் ஒரு பகுதியாக சந்தேகநபர் கைதுசெய்யப்பட்டு மேலதிக விசாரணைகளுக்காக காவலில் வைக்கப்பட்டுள்ளார்.
ஆந்திர மாநிலம் சித்தூரில் கோவிலுக்கு அழைத்துச் சென்று கணவனை காதலனுடன் சேர்ந்து மனைவி தீர்த்துக் கட்டிய சம்பவம் அதிர்ச்சியை ஏற்படுத்தியுள்ளது. கணவனை காதலனுடன் சேர்ந்து கொலை செய்த மனைவி
தமிழ்நாடு, கிருஷ்ணகிரி மாவட்டம் சூளகிரியைச் சேர்ந்த 23 வயது ரமேஷ் என்பவருக்கும், 19 வயது ஹாசினி என்ற பெண்ணுக்கு கடந்த இரண்டு ஆண்டுகளுக்கு முன்பு திருமணமாகி பெண் குழந்தை ஒன்றும் உள்ளது.
இதற்கிடையில் ஹாசினிக்கு அவரது நண்பரான யுகந்தருடன்(20) தொடர்பு இருந்ததாக கூறப்படுகிறது. மேலும் இருவரும் சேர்ந்து ரமேஷை கொல்லவும் திட்டமிட்டு வந்துள்ளனர்.
இந்நிலையில், அம்மாவாசை நாளான செவ்வாய்க்கிழமை அன்று கணவன் ரமேஷை மல்லப்பா கொண்டையில் உள்ள ஶ்ரீ மல்லேஸ்வர சுவாமி கோவிலுக்கு அழைத்துச் செல்லுமாறு மனைவி ஹாசினி வற்புறுத்தியுள்ளார்.
ரமேஷும் அதற்கு சம்மதம் தெரிவித்து கோயிலுக்கு சென்று விட்டு திரும்பிய வழியில் மனைவி ஹாசினி தன்னுடைய கையில் இருந்த கைப்பையை கீழே போட்டுள்ளார்.
அதை எடுப்பதற்காக ரமேஷ் பைக்கை நிறுத்திய போது புதருக்குள் மறைந்திருந்த காதலன் யுகந்தர் ரமேஷை சுற்றி வளைத்து காட்டுப் பகுதிக்குள் வைத்து கூர்மையான ஆயுதங்களால் வெட்டிக் கொலை செய்துள்ளனர்.
ரமேஷ், ஹாசினி மற்றும் அவர்களது குழந்தை யாரும் வீடு திரும்பாததால் சந்தேகமடைந்த அவரது தாயார் பொலிஸாரிடம் தகவல் கொடுத்துள்ளார்.
இதனை தொடர்ந்து விசாரணையை தொடங்கிய பொலிஸார், சிசிடிவி காட்சிகளை ஆராய்ந்ததில் ஹாசினியும் ரமேஷும் கோவிலுக்கு வந்ததும், பின்னர் ஹாசினி அதே இருசக்கர வாகனத்தில் ஹாசினி வேறு இரண்டு ஆண்களுடன் செல்வதும் பதிவாகியிருந்தது.
மேலும், ஹாசினியின் செல்போன் அழைப்புகள் மற்றும் இருப்பிட தரவுகளை ஆய்வு செய்து கொலை நடந்த இடத்தையும் ரமேஷின் உடலையும் கண்டுபிடித்தனர். தற்போது கொலை குற்றச்சாட்டில் சிக்கியுள்ள 4 பேரும் பொலிஸாரால் கைது செய்யப்பட்டுள்ளார்.
அதே சமயம் ஹாசினிக்கு திருமணம் நடைபெற்ற போது அவர் ஒன்பதாம் வகுப்பு மட்டுமே படித்துக் கொண்டிருந்ததாகவும், அவர் மைனராக இருந்த போது திருமணம் நடைபெற்றதாக கூறப்படும் நிலையில், குழந்தை திருமணத் தடுப்புச் சட்டத்தின் கீழும் விசாரணை நடைபெற்று வருகிறது.
வங்காள விரிகுடாவில் மியான்மர் கடற்கரைக்கு அருகில் ரோஹிங்கியா அகதிகளை ஏற்றிச் சென்ற இரண்டு படகுகள் கவிழ்ந்ததில், 500க்கும் மேற்பட்டோர் உயிரிழந்திருக்கலாம் அல்லது காணாமல் போயிருக்கலாம் என அச்சம் வெளியிடப்பட்டுள்ளது.
சர்வதேச இடம்பெயர்வு அமைப்பு (IOM) மற்றும் ஐக்கிய நாடுகளின் அகதிகளுக்கான உயர் ஆணையம் (UNHCR) இன்று(16.07.2026) வெளியிட்ட அறிக்கையின்படி, இந்தத் துயரச் சம்பவம் ஜூன் மாத இறுதியில் அல்லது ஜூலை மாத தொடக்கத்தில் நிகழ்ந்துள்ளது.
இந்தக் கடல்வழிப் பாதையில், சமீபகால வரலாற்றில் இதுவே மிக மோசமான மற்றும் அதிக உயிரிழப்புகளை ஏற்படுத்திய கடல்சார் பேரழிவு எனக் குறிப்பிடப்பட்டுள்ளது.
கிடைத்த தகவல்களின்படி, அந்த இரண்டு படகுகளும் ஜூன் மாத இறுதியில் மியான்மரின் மேற்கு ராகைன் மாநிலத்திலிருந்து புறப்பட்டுள்ளது.
இதன்போது, அந்த படகு சுமார் 250 பேரை ஏற்றிச் சென்ற முதல் படகு, புறப்பட்ட சிறிது நேரத்திலேயே மற்ற படகுகளுடனான தொடர்பை இழந்துள்ளது.
இதனைத் தொடர்ந்து சுமார் 280 பேரை ஏற்றிச் சென்ற இரண்டாவது படகு, ஜூலை 8 ஆம் திகதி அல்லது அதற்குச் சற்று முன்னதாக மியான்மரின் அயேயார்வாடி ஆற்றுக் கடற்கரைக்கு அப்பால் கவிழ்ந்திருக்கலாம் என நம்பப்படுகிறது.
வழக்கமான படகுப் பயணக் காலத்திற்கு வெளியேயும், கனமழை மற்றும் வெள்ளப்பெருக்கிற்கு மத்தியிலும் மேற்கொள்ளப்பட்ட இந்த அபாயகரமான பயணம், ஆபத்தை மேலும் அதிகரித்துள்ளது.
அதிகாரப்பூர்வ இறப்பு எண்ணிக்கை இன்னும் முழுமையாக உறுதிப்படுத்தப்படவில்லை, ஆனால் உயிரிழப்பு மிக அதிகமாக இருக்கலாம் என்று ஐக்கிய நாடுகள் சபை கவலை வெளியிட்டுள்ளது.
பயணிகளில் பெரும்பான்மையானவர்கள் மியான்மரில் குடியுரிமையற்ற முஸ்லிம் சிறுபான்மையினரான ரோஹிங்கியர்கள் ஆவர்.
அவர்களில் சிலர், வங்கதேசத்தின் காக்ஸ் பஜாரில் உள்ள நெரிசல் மிகுந்த அகதிகள் முகாம்களில் இருந்து ரகைன் மாநிலத்திற்குத் திரும்பி, பின்னர் இந்த அபாயகரமான பயணத்தை மேற்கொண்டுள்ளனர்.
மியான்மரின் ரகைன் மாநிலத்தில் உள்ள ரோஹிங்கிய மக்கள், பல தசாப்தங்களாக அரசின் ஆதரவுடன் கூடிய துன்புறுத்தலுக்கும் கடுமையான கட்டுப்பாடுகளுக்கும் உள்ளாக்கப்பட்டுள்ளனர்.
இதனை அமெரிக்கா இனப்படுகொலை என்று வகைப்படுத்தியுள்ளது. 2017-ல் மியான்மர் இராணுவம் மேற்கொண்ட ஒடுக்குமுறைக்குப் பின்னர்,
பத்து லட்சத்திற்கும் அதிகமான ரோஹிங்கியர்கள் வங்கதேசத்திற்குத் தப்பிச் சென்றுள்ளனர். அதே நேரத்தில் மேலும் 630,000 பேர் ரகைன் மாநிலத்தில் மிகவும் மோசமான நிலையில் வாழ்கின்றனர்.
வங்காளதேசத்தில் உள்ள முகாம்களில் நிலவும் குறைந்த வாய்ப்புகளும், காக்ஸ் பஜார் முகாம்களில் சமீபத்தில் பெய்த கனமழை மற்றும் வெள்ளத்தால் குழந்தைகள் உட்பட ஏராளமானோர் உயிரிழந்துள்ளதுடன், அகதிகளை இந்த அபாயகரமான பயணத்திற்கு காரணமாக அமைந்துள்ளது.
இந்த சமீபத்திய துயரச் சம்பவத்திற்கு முன்பு, 2026-ஆம் ஆண்டில் இதுவரை சுமார் 300 பேர் உயிரிழந்துள்ளனர் அல்லது காணாமல் போயுள்ளனர். ஐக்கிய நாடுகள் அகதிகள் உயர் ஆணையரின் கூற்றுப்படி, 2025-ஆம் ஆண்டில் சுமார் 6,500 பேர் அந்தப் பாதையைக் கடக்க முயன்றுள்ளனர்,
அவர்களில் கிட்டத்தட்ட 900 பேர் உயிரிழந்துள்ளனர் அல்லது காணாமல் போயுள்ளனர். இதுவே இதுவரை இல்லாத அளவுக்கு மிக மோசமான ஆண்டாகப் பதிவாகியுள்ளது.
தொடரும் மோதலும், பாதுகாப்பான மாற்று வழிகள் இல்லாததும், கடலில் பெண்கள், குழந்தைகள் மற்றும் பச்சிளங்குழந்தைகள் உட்பட ஆயிரக்கணக்கான ரோஹிங்கியா மக்களின் உயிர்களைப் பறிக்க வழிவகுக்கிறது.
சர்வதேச இடம்பெயர்வு அமைப்பும், ஐக்கிய நாடுகள் அகதிகள் உயர் ஆணையரும் (UNHCR), தேடுதல் மற்றும் மீட்பு நடவடிக்கைகளை வலுப்படுத்தவும்,
அகதிகளுக்குப் பாதுகாப்பும் கவனிப்பும் வழங்கவும், மனிதக் கடத்தல் வலையமைப்புகளை ஒடுக்கவும் பிராந்திய மற்றும் சர்வதேச சமூகத்திடம் அவசரமாக வேண்டுகோள் விடுத்துள்ளன.
கொழும்பு, கொள்ளுப்பிட்டி பிரதேசத்திலுள்ள பிரபல இரவு விடுதியொன்றில், சூதாட்டத்தின் போது 5 கோடி ரூபா பணத்தை மோசடி செய்த குற்றச்சாட்டில், அங்கு பணிபுரிந்த பெண் ஒருவர் கொள்ளுப்பிட்டி பொலிஸாரால் கைது செய்யப்பட்டுள்ளார். சீட்டுக்கட்டுகளைக் கையாள்வதன் மூலம் இந்த மோசடி இடம்பெற்றுள்ளதாக தெரியவந்துள்ளது.
அந்த விடுதிக்கு கிடைத்த அநாமதேய தொலைபேசி அழைப்பொன்றை தொடர்ந்து மேற்கொள்ளப்பட்ட விசாரணைகளிலேயே இந்த மாபெரும் மோசடி தொடர்பான தகவல் வெளியாகியுள்ளது.
கைது செய்யப்பட்ட 21 வயதுடைய பெண் அத்திடிய பிரதேசத்தைச் சேர்ந்தவராவார் என தெரியவந்துள்ளது.
சூதாட்டத்தில் சீட்டுக்கட்டுகளைக் கலைக்கும்போது, அந்த பெண் சூதாட்டத்தில் ஈடுபடுபவர்களுக்கு தெரியும்படி அதைக் கையாண்டு, அந்தத் தரவுகளைக் காணொளி எடுப்பதற்கும் வசதி செய்து கொடுத்துள்ளார்.
இவ்வாறு பெறப்பட்ட காணொளி காட்சிகளை பயன்படுத்தி, சூதாட்டத்தில் ஈடுபட்ட நபர் ஒருவர் பெரும் தொகையை வென்றுள்ளார். அத்துடன், அதில் 5 கோடி ரூபாவை சந்தேகநபரான அந்தப் பெண்ணுக்கு பகிர்ந்தளித்துள்ளதாக பொலிஸார் தெரிவிக்கின்றனர்.
கடந்த இரண்டரை மாதங்களாக திட்டமிட்டு இந்த மோசடி முன்னெடுக்கப்பட்டுள்ளது. அந்த மேசையில் பணிபுரிந்த மேலும் ஐந்து ஊழியர்களுக்கு தொடர்பு இருப்பதாக தகவல்கள் வெளியாகியுள்ளன.
இந்தச் சம்பவம் தொடர்பான மேலதிக விசாரணைகள் குற்றப்புலனாய்வுத் திணைக்களத்திடம் ஒப்படைக்கப்பட்டுள்ளதாக கொள்ளுப்பிட்டி பொலிஸார் மேலும் தெரிவித்தனர்.
மத்திய ஆபிரிக்க நாடான கொங்கோ ஜனநாயகக் குடியரசின் லோமாமி தேசிய பூங்காவில், செம்மஞ்சள் நிற உதடுகளையும் கருப்பு முகத்தையும் கொண்ட முற்றிலும் புதிய குரங்கு இனம் ஒன்றை விஞ்ஞானிகள் கண்டறிந்துள்ளனர்.
உள்ளூர் மக்களால் ‘லிக்வேலி’ என்று அழைக்கப்படும் இந்த இனம், அடர்ந்த காடுகளில் மரங்களின் உச்சியில் வசிக்கும் ஒரு இரகசிய வகை உயிரினமாகும்.
ஆபிரிக்காவில் கடந்த 75 ஆண்டுகளில் கண்டறியப்பட்ட ஐந்தாவது புதிய குரங்கு இனமாகும். அத்துடன், இதன் தனித்துவமான குரல் மற்றும் மரபணு சோதனைகள் மூலம் இது புதிய இனம் என்பது அதிகாரப்பூர்வமாக உறுதி செய்யப்பட்டுள்ளது.
எரிபொருள் விநியோகத்திற்கான கியூஆர் (QR) முறையை உடனடியாக நீக்கும் திட்டம் எதுவும் இல்லை என இலங்கை பெட்ரோலியக் கூட்டுத்தாபனம் அறிவித்துள்ளது.
உலகளாவிய எரிபொருள் சந்தையில் நிலவும் ஸ்திரத்தன்மையின்மையின் காரணமாக இந்த நடவடிக்கை எடுக்கப்பட்டுள்ளதாக நிர்வாக இயக்குநர் மயூர நெத்திகுமரகே தெரிவித்துள்ளார். அவர் மேலும் தெரிவிக்கையில்,
கியூஆர் முறையின் பயன்பாடு எரிபொருள் மற்றும் டொலர் கையிருப்பு இரண்டையும் கட்டுப்படுத்தும் நிலையில், போர்ச் சூழல் மீண்டும் மோசமடைந்தால் நாட்டில் எரிபொருள் பற்றாக்குறையைத் தடுக்கவும் உதவியாக இருக்கும்.
மக்களுக்கு ஏற்படும் சிரமங்களைத் தவிர்க்கவும் கியூஆர் முறைமை தொடர்ந்து பயன்பாட்டில் இருக்கும் என இலங்கை பெட்ரோலியக் கூட்டுத்தாபனம் தெரிவித்துள்ளதுடன், அதற்கான நடவடிக்கையையும் எடுத்துள்ளது.
மேலும், போர்ச் சூழல் மீண்டும் உருவானதால் நாட்டின் எரிபொருள் விநியோக வலையமைப்பு பாதிக்கப்படவில்லை என்றும், எரிபொருள் விலையில் மீண்டும் உயர்வு ஏற்படுமா என்பதை இலங்கை பெட்ரோலியக் கூட்டுத்தாபனம் தொடர்ந்து கண்காணித்து வருவதாகவும் அவர் குறிப்பிட்டுள்ளார்.
கர்நாடக மாநிலம் பண்ட்வால் அருகே ஒருதலைக் காதல் விவகாரத்தில், இளம் செவிலியர் ஒருவர் பொதுமக்கள் முன்னிலையிலேயே கொடூரமாக வெட்டிக்கொலை செய்யப்பட்ட சம்பவம் அப்பகுதியில் பெரும் அதிர்ச்சியையும் சோகத்தையும் ஏற்படுத்தியுள்ளது.
பண்ட்வால் பகுதியைச் சேர்ந்த லாவண்யா (25) என்ற இளம் பெண், அங்குள்ள மருத்துவமனை ஒன்றில் செவிலியராகப் பணிபுரிந்து வந்தார்.
வழக்கம்போல் தனது பணியை முடித்துவிட்டு, ஊருக்குத் திரும்புவதற்காகப் பேருந்து நிலையத்திற்கு வந்துள்ளார். பின்னர் அங்கிருந்த பேருந்து ஒன்றில் ஏறி அமர்ந்துள்ளார்.
அப்போது, லாவண்யாவை நீண்ட நாட்களாக ஒருதலையாகக் காதலித்து வந்த வாலிபர் ஒருவர், திடீரெனப் பேருந்திற்குள் புகுந்து தான் மறைத்து வைத்திருந்த வாளால் அவரை வெட்ட முயன்றுள்ளார்.
வாலிபரின் கொடூரத் தாக்குதலில் இருந்து தப்பித்துத் தன் உயிரைக் காப்பாற்றிக் கொள்ளப் பயந்து நடுங்கிய லாவண்யா, அலறியடித்தபடி பேருந்திலிருந்து கீழே இறங்கிப் பொதுமக்களை நோக்கிக் ஓடியுள்ளார்.
இருப்பினும், விடாமல் துரத்திச் சென்ற அந்த வாலிபர், பேருந்து நிலையத்தில் பொதுமக்கள் பலரும் பார்த்துக் கொண்டிருக்கும் போதே லாவண்யாவை வாளால் கொடூரமாக வெட்டிச் சாய்த்தார். இதில் ரத்த வெள்ளத்தில் சரிந்த லாவண்யா, சம்பவ இடத்திலேயே பரிதாபமாக உயிரிழந்தார்.
கொடூரக் கொலையை அரங்கேற்றிய அந்த இளைஞர், பேருந்து நிலையத்திற்கு வெளியே தயார் நிலையில் நிறுத்தி வைக்கப்பட்டிருந்த காரில் ஏறித் தப்பியோடிவிட்டார்.
இச்சம்பவம் குறித்துத் தகவல் அறிந்து விரைந்து வந்த உள்ளூர் போலீஸார், லாவண்யாவின் உடலைக் கைப்பற்றிப் பிரேதப் பரிசோதனைக்கு அனுப்பி வைத்தனர்.
மேலும், பேருந்து நிலையப் பகுதியில் இருந்த சிசிடிவி காட்சிகளை ஆய்வு செய்து, தப்பியோடிய கொலையாளியைப் பிடிப்பதற்காகத் தனிப்படைகள் அமைத்துத் தீவிரமாகத் தேடி வருகின்றனர்.
பகல் நேரத்திலேயே அரங்கேறிய இந்தத் துணிகரக் கொலைச் சம்பவம் அந்தப் பகுதியில் பெரும் பரபரப்பை ஏற்படுத்தியுள்ளது.
தர்மபுரி மாவட்டம் அரூர் அருகே காதலுக்குப் பெற்றோர்கள் கடுமையான எதிர்ப்புத் தெரிவித்ததால், மனமுடைந்த கல்லூரி மாணவர் மற்றும் பிளஸ்-1 மாணவி ஆகிய இருவர் ரயில் முன் பாய்ந்து தற்கொலை செய்து கொண்ட சம்பவம் அப்பகுதியில் பெரும் சோகத்தை ஏற்படுத்தியுள்ளது.
தர்மபுரி மாவட்டம் அரூர் சுற்றுவட்டாரப் பகுதியைச் சேர்ந்தவர் கன்சிராம் ராணா (19). இவர் கல்லூரியில் படித்து வந்தார். இதே பகுதியைச் சேர்ந்தவர் அறிவுஜோதி (16). இவர் அருகில் உள்ள பள்ளியில் பிளஸ்-1 படித்து வந்தார்.
இவர்கள் இருவரும் கடந்த சில மாதங்களாகக் காதலித்து வந்ததாகக் கூறப்படுகிறது. இவர்களின் காதல் விவகாரம் இருதரப்புப் பெற்றோருக்கும் தெரியவந்த நிலையில்,
தம்பதியரின் வயது மற்றும் குடும்பச் சூழலைக் காரணம் காட்டி காதலுக்குப் பெற்றோர் தரப்பில் கடுமையான எதிர்ப்புத் தெரிவிக்கப்பட்டுள்ளது.
பெற்றோரின் எதிர்ப்பால் கடும் மன உளைச்சலுக்கு ஆளான காதல் ஜோடி, வீட்டை விட்டு வெளியேறி நேற்று சேலம் – சென்னை முக்கிய ரயில் பாத தண்டவாளப் பகுதிக்குச் சென்றுள்ளனர்.
அப்போது அந்த வழியே வந்த அதிவேக ரயில் முன் இருவரும் ஒன்றாகப் பாய்ந்து தற்கொலை செய்து கொண்டனர்.
இன்று அதிகாலை அந்த வழியே சென்ற பொதுமக்கள், தண்டவாளத்தில் இருவரின் உடல்களும் சிதைந்த நிலையில் கிடப்பதைக் கண்டு உடனடியாக ரயில்வே போலீசாருக்குத் தகவல் கொடுத்தனர்.
சம்பவ இடத்திற்கு விரைந்து வந்த ரயில்வே போலீசார், சிதறி கிடந்த உடல்களைக் கைப்பற்றிப் பிரேதப் பரிசோதனைக்காக அரசு மருத்துவமனைக்கு அனுப்பி வைத்தனர்.
இச்சம்பவம் குறித்துப் போலீசார் முறைப்படி வழக்குப் பதிவு செய்து, தற்கொலைக்கு முன்னதாக ஏதேனும் கடிதங்கள் எழுதப்பட்டதா அல்லது வேறு ஏதேனும் காரணங்கள் உள்ளனவா என்பது குறித்து இருதரப்புப் பெற்றோரிடமும் தீவிர விசாரணை மேற்கொண்டு வருகின்றனர்.
காதல் விவகாரத்தில் அடுத்தடுத்து நிகழும் இதுபோன்ற இளம் வயதினரின் தற்கொலைச் சம்பவங்கள் சமூக ஆர்வலர்களிடையே பெரும் கவலையை ஏற்படுத்தியுள்ளது.
உங்களுக்குள் ஏதேனும் மன உளைச்சல் அல்லது தற்கொலை எண்ணங்கள் தோன்றினால், தயவுசெய்து மாநில அரசின் இலவச உதவி எண்களைத் தொடர்பு கொண்டு ஆலோசனை பெறலாம். சினேகா தற்கொலை தடுப்பு உதவி எண்: 044-24640050. மாநில சுகாதாரத் துறை உதவி எண்: 104
வவுனியா மாவட்டத்தில் சிறுபோக நெல் அறுவடையை முன்னிட்டு, விவசாயிகளிடமிருந்து நெல்லினைக் கொள்முதல் செய்யும் நடவடிக்கைகள் நேற்று (16.07.2026) முதல் உத்தியோகபூர்வமாக ஆரம்பிக்கப்பட்டுள்ளதாக வவுனியா மாவட்டச் செயலாளர் பி.ஏ.சரத்சந்திர தெரிவித்துள்ளார்.
இம்முறை சிறுபோக நெல் அறுவடையை முறையான விலையில் விவசாயிகளிடமிருந்து பெற்றுக்கொள்வதற்காக மாவட்டத்தில் மொத்தம் 6 நெல் களஞ்சியசாலைகள் தயார்ப்படுத்தப்பட்டுள்ளன.
அவற்றில் முதற்கட்டமாக, வவுனியா உணவுக் களஞ்சியம் உட்பட இரண்டு முக்கிய களஞ்சியசாலைகளில் நேற்று முதல் நெல் கொள்முதல் பணிகள் ஆரம்பிக்கப்பட்டுள்ளன. ஏனைய களஞ்சியசாலைகளும் தேவைக்கேற்ப அடுத்தடுத்து திறக்கப்பட்டு நெல் கொள்முதல் செய்யப்படவுள்ளன.
அரசாங்கத்தினால் நிர்ணயிக்கப்பட்ட உத்தரவாத விலையின் அடிப்படையில் நெல் சந்தைப்படுத்தல் சபை (Paddy Marketing Board) இந்த கொள்முதல் நடவடிக்கைகளை நேரடியாக முன்னெடுத்து வருகிறது.
விவசாயிகளின் நலனைக் கருத்திற்கொண்டு அரசாங்கத்தினால் நிர்ணயிக்கப்பட்டுள்ள உத்தரவாத விலைகள் அறிவிக்கப்பட்டுள்ளன.
அந்த வகையில் நாடு நெல் (1 கிலோகிராம்) ரூ. 120.00 , சம்பா நெல் (1 கிலோகிராம்) ரூ. 130.00 , கீரி சம்பா நெல் (1 கிலோகிராம்): ரூ. 140.00 ஆக அரசாங்கத்தின் உத்தரவாத விலை வெளியிடப்பட்டுள்ளது
நெல் கொள்முதல் தொடர்பான மேலதிக விபரங்கள் மற்றும் வழிகாட்டல்களுக்கு அந்தந்தப் பகுதி விவசாய ஆராய்ச்சி உற்பத்தி உதவியாளர்கள் அல்லது மாவட்ட செயலகத்தின் விவசாயப் பிரிவைத் தொடர்புகொள்ள முடியும் என அறிவிக்கப்பட்டுள்ளது.
வவுனியா மாவட்டத்தில் 67 பேருக்கு டெங்கு தொற்று ஏற்பட்டுள்ள நிலையில் கட்டுப்படுத்த தீவிர நடவடிக்கை எடுக்கப்பட்டுள்ளதாக மாவட்ட ஒருங்கிணைப்பு குழு தலைவரும், பிரதி அமைச்சருமான உபாலி சமரசிங்க தெரிவித்துள்ளார்.
வவுனியா மாவட்டத்தில் டெங்கு ஒழிப்பிற்காக மேற்கொள்ளப்பட வேண்டிய குறுகிய கால மற்றும் நீண்ட கால திட்டங்கள் குறித்தான கலந்துரையாடலொன்று, கூட்டுறவு அபிவிருத்தி பிரதி அமைச்சர் உபாலி சமரசிங்க தலைமையில் இன்று (16) வவுனியா மாவட்ட செயலகத்தில் நடைபெற்றபோதே இவ்வாறு குறிப்பிட்டுள்ளார்.
மேலும் தெரிவிக்கையில், தற்போது வவுனியா மாவட்டத்தில் 67 டெங்கு நோயாளர்கள் பதிவாகியுள்ளதுடன், வவுனியா நகரத்தை சூழவுள்ள பகுதிகளில் டெங்கு நோய் வேகமாக பரவி வருகின்றமை கண்டறியப்பட்டுள்ளது.
முறையற்ற கழிவகற்றல், நீர் தேங்கி காணப்படல் மற்றும் டெங்கு நுளம்புகள் பெருகுவதற்கு ஏற்ற வாழ்விடங்கள் நகரத்தில் காணப்படுகின்றமை போன்ற காரணங்களால் வவுனியா மாவட்டத்தில் டெங்கு அபாயம் அதிகரித்துள்ளதாக இக்கலந்துரையாடலில் சுட்டிக்காட்டப்பட்டது.
இதற்கமைய அரச நிறுவனங்கள், பாடசாலைகள், மத ஸ்தலங்கள் மற்றும் பொது இடங்களை உள்ளடக்கும் வகையில் பல்வேறு டெங்கு ஒழிப்பு மற்றும் விழிப்புணர்வு வேலைத்திட்டங்களை முன்னெடுப்பதற்கு இங்கு தீர்மானிக்கப்பட்டது.
வவுனியா தெற்கு, வெண்கலசெட்டிகுளம் மற்றும் வவுனியா ஆகிய பிரதேச செயலாளர் பிரிவுகளில் டெங்கு நோய் பரவலில் அதிகரிப்பு ஏற்பட்டுள்ளதாக சுகாதார பிரிவினர் சுட்டிக்காட்டினர் என மேலும் தெரிவித்தார்.
இந்நிகழ்வில் வவுனியா மாவட்ட செயலாளர் பி.ஏ.சரத்சந்திர, மேலதிக மாவட்ட செயலாளர் நா.கமலதாசன் ஆகியோர் உட்பட முப்படை அதிகாரிகள், பொலிஸ் அதிகாரிகள், அரச அதிகாரிகள் மற்றும் சிவில் அமைப்புகளின் பிரதிநிதிகள் கலந்து கொண்டனர்.
