கர்நாடகவில்..

நாய் குறுக்கே சென்றதால் விபத்தில் சிக்கி இளைஞர் ஒருவர் உயிரிழந்த நிலையில், அவரது வீட்டுக்கே அந்த நாய் சென்று ஆறுதல் தெரிவித்த நிகழ்வு அனைவர் மத்தியிலும் நெகிழ்ச்சியை ஏற்படுத்தியுள்ளது. பொதுவாகவே அனைத்து உயிரினங்களுக்கும் அனைத்து உணர்வுகளும் இருக்கும் என பலரும் கூறுவர்.

அதில் முக்கியமாக நாய்களுக்கு மனிதர்களுக்கு இருக்கும் பல உணர்வுகள் இருக்கும். இதனால் தான் பலரது வீடுகளிலும் நாய்களை செல்ல பிராணியாக, தங்களுடன் தூங்கும் அளவுக்கு ஒரு நண்பர் போல் வளர்த்து வருகின்றனர். அதேபோல் உரிமையாளர் கோபத்தில் இருந்தால் அவர்களை சமாதானம் செய்வதும் நாய்கள் செய்வது வழக்கம்.

அந்த வகையில் இங்கு ஒரு நாய், தன்னால் இளைஞர் ஒருவர் உயிரிழந்த நிலையில், அவரது வீட்டுக்கே சென்று கண்ணீர் மல்க ஆறுதல் தெரிவித்துள்ள நிகழ்வு அனைவர் மத்தியில் நெகிழ்ச்சியை ஏற்படுத்தியுள்ளது.கர்நாடக மாநிலம் தாவணிக்கரை பகுதியை அடுத்துள்ளது ஹோன்னாளி காசினகெரே என்ற கிராமம். இங்கு திப்பெஷ் (21) என்ற இளைஞர் ஒருவர் தனது குடும்பத்தோடு வசித்து வந்தார்.

இந்த சூழலில் கடந்த 16-ம் தேதி இரவு வழக்கம்போல் தனது வீட்டுக்கு பைக்கில் சென்று கொண்டிருந்தார். அந்த சமயத்தில் குறுபரவித்லபுரா என்ற கிராமம் அருகே இந்த இளைஞர் வந்து கொண்டிருந்தபோது, திடீரென நாய் ஒன்று குறுக்கே வந்துள்ளது.இதனால் அந்த இளைஞர் நாய் மீது மோதிவிடக்கூடாது என்று தனது பைக்கை சற்று திருப்பிய நிலையில், கட்டுப்பாட்டை இழந்து விபத்து ஏற்பட்டுள்ளது.

இந்த விபத்தில் திப்பெஷின் தலையில் பலத்த காயம் ஏற்பட்டு இரத்த வெள்ளத்தில் உயிருக்கு போராடி கொண்டிருந்த நிலையில், அருகே யாரும் இல்லாத காரணத்தினால் சம்பவ இடத்திலேயே உயிரிழந்தார். இதைத்தொடர்ந்து சில மணி நேரம் கழித்து, இந்த விபத்து குறித்து தெரியவரவே, போலீசார் சடலத்தை மீட்டு உடற்கூறாய்வுக்கு அனுப்பி வைத்து விசாரணை மேற்கொண்டனர்.

தொடர்ந்து உயிரிழந்த திப்பெஷின் உடல் இறுதி சடங்கிற்காக அவரது வீட்டுக்கு கொண்டு செல்லப்பட்டது. அங்கே அனைத்தும் முடிந்த நிலையில், திபேஷின் உடலுக்கு இறுதி சடங்கு முடிக்கப்பட்டது.இந்த நிலையில், கடந்த 4 நாட்களுக்கு முன்னர் விபத்திற்கு காரணமான நாய், உயிரிழந்த திபேஷின் வீட்டுக்கு சென்று கண்ணீரோடு அவரது தாய் முன் நின்றது.

மேலும் தனது கால்களை உயர்த்தி, அவரிடம் மன்னிப்பும் கேட்டது. அந்த நாய் குறித்து விசாரிக்கையில், திபேஷின் விபத்திற்கு காரணம் அது என்று தெரியவந்தது. இதையடுத்து அந்த நாய்க்கு ஆறுதல் கூறிய, திபேஷின் தாய், அதையும் தனது வீட்டிலேயே தற்போது வளர்த்து வருகிறார். நாய் குறுக்கே சென்றதால் விபத்தில் சிக்கி இளைஞர் ஒருவர் உயிரிழந்த நிலையில், அவரது வீட்டுக்கே அந்த நாய் சென்று ஆறுதல் தெரிவித்த நிகழ்வு அனைவர் மத்தியிலும் நெகிழ்ச்சியை ஏற்படுத்தியுள்ளது.

வேலூரில்..

மன உளைச்சலில் இருந்த தினேஷின் மனைவி மோனிஷா வீட்டில் திடீரென வீட்டில் தூக்கிட்டு தற்கொலை செய்துகொண்டார்.குடியாத்தம் அருகே மூன்று குழந்தைகளின் தாய் வீட்டில் தூக்கிட்டு தற்கொலை செய்து கொண்ட சம்பவம் பெரும் அதிர்ச்சியை ஏற்படுத்தியுள்ளது.வேலூர் மாவட்டம் குடியாத்தம் அடுத்த சாமியார் மலை பகுதியைச் சேர்ந்தவர் தினேஷ்.

மேஸ்திரி வேலை செய்து வருகிறார். இவரது மனைவி மோனிஷா. இவர்களுக்கு 6 வருடங்களுக்கு முன்பு திருமணமான நிலையில் ஒரு பெண் குழந்தை இரண்டு ஆண் குழந்தைகள் உள்ளன.அதே பகுதியைச் சேர்ந்த மாலதி என்பவரிடம் சுமார் 10 மாதங்களுக்கு முன் 30 ஆயிரம் ரூபாய் 15 நாட்களுக்கு பத்து ரூபாய் வட்டி என்று வாங்கியுள்ளனர்.

முப்பதாயிரம் ரூபாய் கடனுக்கு மொத்தம் 70 ஆயிரம் ரூபாய் செலுத்த வேண்டும் என்றும் அதில் 30,000 செலுத்திய பிறகு பாக்கி 40 ஆயிரம் ரூபாய் தர சொல்லி அவதூறாக பேசி மிரட்டி உள்ளார்.இதனால் மன உளைச்சலில் இருந்த தினேஷின் மனைவி மோனிஷா வீட்டில் திடீரென வீட்டில் தூக்கிட்டு தற்கொலை செய்துகொண்டார்.

இந்த சம்பவம் தொடர்பாக போலீசாருக்கு தகவல் தெரிவிக்கப்பட்டது. சம்பவ இடத்திற்கு விரைந்த போலீசார் மோனிஷா உடலை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர்.

இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர். இதனிடையே, மாலதியை கைது செய்ய கோரி தினேஷின் உறவினர்கள் காவல் நிலையத்தை முற்றுகையிட்டு போராட்டத்தில் ஈடுபட்டததால் அங்கு பெரும் பரபரப்பு ஏற்பட்டது.

இந்தியாவில்..

இந்திய மாநிலம், குஜராத்தில் சம்பள பாக்கி கேட்ட 21 வயது பட்டியலின இளைஞரின் வாயில் செருப்பை திணித்த உரிமையாளர் மீது வழக்குப்பதிவு செய்யப்பட்டுள்ளது.குஜராத் மாநிலம் மோர்பியில் வெளிநாடுகளுக்கு டைல்ஸ் ஏற்றுமதி செய்யும் நிறுவனம் செயல்பட்டு வருகிறது.

இந்நிறுவனத்தை பெண் தொழிலதிபரான விபூதி படேல் நடத்தி வருகிறார். ராணிபா இண்டஸ்ட்ரீஸ் என்ற நிறுவனத்தை விளம்பரப்படுத்துவதற்காக ராணியா என்ற பெயரில் இன்ஸ்டாவில் செயல்பட்டு வருகிறார்.இவரது, டைல்ஸ் நிறுவனத்தில் ஒக்டோபர் 2 -ம் திகதி நிலேஷ் தல்சானியா என்னும் 21 வயது இளைஞர் பணியில் சேர்ந்தார்.

ஆனால், எதுவும் சொல்லாமல் தல்சானியாவை ஒக்டோபர் -18 ம் திகதி பணியில் இருந்து நீக்கியுள்ளனர்.இந்நிலையில், தான் வேலை செய்த 15 நாள்களுக்கான சம்பளத்தை விபூதி படேலுக்கு தால்சானியா போன் செய்து கேட்டுள்ளார். அதற்கு, தான் ஊர் திரும்பியதும் நேரில் வந்து சம்பளத்தை வாங்கிக் கொள்ளுமாறு விபூதி படேல் கூறியுள்ளார்.

இதனைத்தொடர்ந்து, சகோதரர் மெஹுல் மற்றும் பக்கத்து வீட்டுக்காரரான பவேஷ் மக்வானா ஆகியோருடன் நிலேஷ் தல்சானியா அலுவலகத்திற்கு சென்றுள்ளார். அங்கு, டிடி ரபாரி, ராஜ் படேல், ஓம் படேல், பரீக்ஷித் உள்ளிட்டோர் நிலேஷ் தல்சானியாவை தாக்கியுள்ளனர்.

மேலும், சாதி பற்றி அவதூறாக பேசி தல்சானியாவின் வாயில் செருப்பை திணித்து இது தான் உனக்கு ஊதியம் என விபூதி படேல் கூறியுள்ளார். அதன்பின், எதுவும் செய்ய முடியாததால் நிலேஷ் தல்சானியா அங்கிருந்து கிளம்பியுள்ளார்.பின்னர், உடன் இருந்தவர்களின் கட்டாயத்தின்படி விபூதி படேல் மீது பேரில் மோர்பி காவல்நிலையத்தில் தல்சானியா புகார் அளித்துள்ளார்.

அவர் அளித்துள்ள புகாரின் அடிப்படையில் இந்திய தண்டனைச் சட்டத்தின் பல பிரிவுகளோடு வன்கொடுமைத் தடுப்புச் சட்டத்தின் கீழும் வழக்குப்பதிவு செய்து தலைமறைவாகியுள்ள குற்றவாளிகளை பொலிஸார் தேடி வருகின்றனர்.

சென்னையில்..

சென்னையில், உடற்பயிற்சி செய்து கொண்டிருந்த பெண் மருத்துவர் மாரடைப்பால் உயிரிழந்த சம்பவம் சோகத்தை ஏற்படுத்தியுள்ளது.சமீப காலமாக உடற்பயிற்சி செய்துகொண்டிருக்கும் போதே மாரடைப்பு ஏற்பட்டு உயிரிழப்பு ஏற்படுவது அதிகமாகி கொண்டே வருகிறது.சென்னை கீழ்ப்பாக்கத்தைச் சேர்ந்தவர் அன்விதா(24).

இவர், தனியார் மருத்துவமனையில் பயிற்சி மருத்துவராக பணிபுரிந்து வந்துள்ளார். இவருடைய தந்தை பிரவீன் கண் மருத்துவராக பணிபுரிந்து வருகிறார்.இதில் அன்விதா, நேற்று இரவு 7.30 மணிக்கு நியூ ஆவடி சாலையில் உள்ள தனியார் உடற்பயிற்சி மையத்திற்கு சென்றுள்ளார். அங்கு, அவர் வார்ம் – அப் செய்து கொண்டிருந்த போது திடீரென மயக்கம் வந்துள்ளது.

அப்போது, ஜிம்மில் உடற்பயிற்சி செய்து கொண்டிருந்த மருத்துவர் ஒருவர், மயக்கம் அடைந்த அன்விதாவுக்கு முதலுதவி சிகிச்சை அளித்துள்ளார். ஆனால், அப்போதும் எந்தவொரு அசைவுமின்றி அன்விதா கிடந்துள்ளார்.இதனால், அதிர்ச்சியடைந்த ஜிம் ஊழியர்கள் அருகிலுள்ள தனியார் மருத்துவமனைக்கு அன்விதாவை கொண்டு சென்றனர்.

ஆனால், அங்கு மருத்துவர்கள் சிகிச்சை அளித்துக் கொண்டிருக்கும் போதே சிகிச்சை பலனின்றி அன்விதா உயிரிழந்தார்.இந்த சம்பவம் குறித்து கீழ்ப்பாக்கம் பொலிஸார் வழக்குப்பதிவு செய்து விசாரணை மேற்கொண்டு வருகின்றனர். உடற்பயிற்சியின் போது பெண் மருத்துவர் உயிரிழந்த சம்பவம் பெரும் சோகத்தை ஏற்படுத்தியுள்ளது.