அம்பாறை கல்முனை பாண்டிருப்பில் கணவன் உயிரிழந்த கவலையில் இருந்த மனைவி சில மணித்தியாலங்களில் உயிரிழந்துள்ளார்.
கணவர் கடந்த சில தினங்களாக கல்முனை ஆதார வைத்தியசாலையில் சுகவினம் காரணமாக சிகிச்சை பெற்றுவந்த சிகிச்சை பலனின்றி உயிரிழந்துள்ளார். இந் நிலையில் தனது கணவனின் உயிரிழப்பை தாங்க முடியாத மனைவியும் சில மணி நேரங்களில் உயிரிழந்துள்ளார்.
சாவிலும் இணைபிரியாத தம்பதிகளாக இணைந்துள்ளமை பாண்டிருப்பு மக்களை சோகத்தில் ஆழ்த்தியுள்ளது
சர்வதேச சந்தையில், தங்கம் மற்றும் வெள்ளியின் விலை இன்றும் வீழ்ச்சியை பதிவு செய்திருக்கிறது. இலங்கையில் தங்கத்தின் விலை இன்று (23.06.2026) குறைவடைந்துள்ளதாக அகில இலங்கை நகையக வியாபாரிகள் சங்கம் தெரிவித்துள்ளது.
நேற்று (22) 24 கரட் தங்கம் ஒரு பவுண் 386,000 ரூபாயாக விற்பனை செய்யப்பட்ட நிலையில், இன்று அதன் விலை 2,000 ரூபாயால் குறைந்து 384,000 ரூபாயாக பதிவாகியுள்ளது.
தற்போதைய சந்தை நிலவரப்படி, 22 கரட் தங்கம் ஒரு பவுண் 353,300 ரூபாயாக விற்பனை செய்யப்படுகிறது.
அதேவேளை, 24 கரட் தங்கத்தின் ஒரு கிராமின் விலை 48,000 ரூபாயாகவும், 22 கரட் தங்கத்தின் ஒரு கிராமின் விலை 44,163 ரூபாயாகவும் நிர்ணயிக்கப்பட்டுள்ளது.
சர்வதேச தங்க சந்தையில் ஏற்பட்டுள்ள விலை மாற்றங்கள் மற்றும் அமெரிக்க டொலரின் பெறுமதியில் காணப்படும் ஏற்றத் தாழ்வுகள், உள்ளூர் தங்க விலையிலும் தாக்கத்தை ஏற்படுத்தி வருவதாக சந்தை தரவுகள் தெரிவிக்கின்றன.
சிகிரியா பாறைக்கோட்டையின் நுழைவாயிலுக்கு அருகில் காட்டு யானை ஒன்றை எதிர்கொண்ட வெளிநாட்டு சுற்றுலாப் பயணிகள் குழுவினர், எவ்வித காயங்களுமின்றி நூலிழையில் உயிர் தப்பியுள்ள சம்பவம் இடம்பெற்றுள்ளது.
நான்கு பேரைக் கொண்ட சுற்றுலா பயணிகள் இன்று (23) அதிகாலை 4 மணியளவில் சிகிரியா கோட்டைக்குள் நுழைவதற்காகச் சென்றுகொண்டிருந்தபோதே காட்டு யானையை எதிர்கொண்டுள்ளனர்.
யானை வருவதனை அங்கிருந்த பாதுகாப்புச் சாவடியில் கடமையிலிருந்த பாதுகாப்பு அதிகாரி விடுத்த எச்சரிக்கையைத் தொடர்ந்து, அக்குழுவில் இருந்த பெண்கள் ஓடத் தொடங்கினர்.
அப்போது அந்த யானை அவர்களைத் துரத்தியுள்ளது. எனினும், அவர்கள் அனைவரும் எவ்வித ஆபத்துகளுமின்றி பாதுகாப்பாகத் தப்பியுள்ளனர். அந்த யானை பின்னர் அங்கிருந்து நடந்து செல்வது சிசிரிவி காணொளியில் பதிவாகியுள்ளது.
இலங்கை அரச ஊழியர்களின் சம்பளம் மற்றும் ஓய்வூதியம் தொடர்பான சிக்கல்களைத் தீர்ப்பதற்காக புதிய ஆணைக்குழுவொன்றினை நியமித்து ஜனாதிபதி அநுரகுமார திஸாநாயக்கவினால் வர்த்தமானி அறிவித்தல் வெளியிடப்பட்டுள்ளது.
சம்பளம் மற்றும் ஓய்வூதியம் தொடர்பான சிக்கல்கள் தொடர்பில் ஆராயும் வகையில் 15 உறுப்பினர்களைக் கொண்ட குறித்த ஆணைக்குழு நியமிக்கப்பட்டுள்ளது.
தெல்கே அசோக பீரிஸ் தலைமையில் நியமிக்கப்பட்டுள்ள இந்த குழுவின் ஊடாக, அரச ஊழியர்களின் சம்பளம் மற்றும் ஓய்வூதியம் தொடர்பான தற்போதைய சிக்கல்களுக்குத் தீர்வு காண்பது,
அரசுப் பணியாளர்களின் தொழில்முறையை மேம்படுத்துவது, உலகளாவிய போக்குகளுக்கு ஏற்ப பொதுச் சேவையை எவ்வாறு கட்டமைப்பு ரீதியாக சீர்திருத்துவது போன்ற பரிந்துரைகள் பெறப்படும்.
இலங்கை அரசியலமைப்பின் 33ஆவது பிரிவின்படி ஜனாதிபதிக்கு வழங்கப்பட்டுள்ள அதிகாரங்களுக்கு இணங்க இந்த குழு நியமிக்கப்பட்டுள்ளமை குறிப்பிடத்தக்கது.
இலங்கையில் வரி செலுத்துவோர் உள்நாட்டு இறைவரித்திணைக்களம் (IRD)திணைக்களத்திற்கு 550 பில்லியன் ரூபாய்க்கும் மேல் வரிகளை செலுத்த வேண்டியுள்ளதாக தெரியவந்துள்ளது.
சமீபத்திய வரித்திருத்தங்களை விளக்குவதற்காக நடத்தப்பட்ட சிறப்பு ஊடக சந்திப்பில், உள்நாட்டு இறைவரித்திணைக்களத்தின் சிரேஷ்ட அதிகாரிகள் இதனை வெளிப்படுத்தியுள்ளனர்.
இவ்வாறு செலுத்தப்படாத இந்த வரிகளில் ஏறக்குறைய 100 பில்லியன் ரூபாயை மீட்பதற்கு சட்டரீதியான நடவடிக்கைகள் ஏற்கனவே எடுக்கப்பட்டுள்ளதாக அதிகாரிகள் தெரிவித்துள்ளனர்.
மேலும், இந்த செலுத்தப்படாத வரிகளை மீட்பதற்கு திணைக்களம் பல பிற முறைகளையும் பயன்படுத்தி வருவதாகவும் கூறியுள்ளனர்.
இந்த நடவடிக்கைகளில், வங்கிக் கணக்குகளை முடக்குதல், சொத்துக்களைப் பறிமுதல் செய்தல் மற்றும் வரி செலுத்தத்தவறிய வரி செலுத்துவோருடன் கலந்துரையாடி உரிய நிலுவைத் தொகையைத் தீர்ப்பதற்கு உதவுதல் ஆகியவை அடங்கும் என கூறப்படுகின்றது.
வரி செலுத்துவோர் விபரம்
உள்நாட்டு இறைவரித்திணைக்கள சட்டத்தின் கீழ் உரிய விதிகள் செய்யப்பட்டுள்ளதால், வங்கிக் கணக்குகளை முடக்குவதற்கு திணைக்களத்திற்கு சட்டரீதியான அதிகாரம் உள்ளது என்றும் தெளிவுபடுத்தப்பட்டுள்ளது.
தற்போது இலங்கையில் சுமார் 1.3 மில்லியன் தனிநபர் வரி செலுத்துவோர் உள்ளதாகவும், மேலும் சுமார் 130,000 நிறுவனங்கள் வரி செலுத்துவோராகப் பதிவு செய்யப்பட்டுள்ளதாகவும் தெரிவிக்கப்படுகிறது.
புதிய இணைப்பு : தெல்தெனிய பகுதியில் நிறுத்தி வைக்கப்பட்டிருந்த வாகனமொன்றில் இருந்து வைத்தியர் ஒருவர் சடலமாக மீட்கப்பட்ட சம்பவம் தொடர்பான பிரதான சந்தேகநபரின் மனைவி குறித்தும் விசாரணைகள் ஆரம்பிக்கப்பட்டுள்ளன.
சந்தேகநபரின் தேசிய அடையாள அட்டை எண்ணைப் பயன்படுத்தி மேற்கொள்ளப்பட்ட விசாரணையில் பல மோசடியில் கண்டுபிடிக்கப்பட்டுள்ளது.
இதேவேளை, வெளிநாட்டு வேலைவாய்ப்பு மோசடி மற்றும் திருமணம் தொடர்பான நிதி மோசடி உள்ளிட்ட பல்வேறு குற்றச்சாட்டுகள் மற்றும் முறைப்பாடுகளுக்கு உள்ளாகியுள்ள சந்தேகநபரின் மனைவி குறித்தும் பல நிறுவனங்கள் மற்றும் பொலிஸ் நிலையங்கள் ஊடாக விசாரணைகள் தொடர்ந்தும் முன்னெடுக்கப்பட்டு வருகின்றன.
முதலாம் இணைப்பு : கண்டி – தெல்தெனிய பகுதியில் கார் ஒன்றுக்குள் மர்மமான முறையில் உயிரிழந்த நிலையில் சடலமாக மீட்கப்பட்ட இளம் பெண் வைத்தியரின் மரணம் தொடர்பிலான பிரதான சந்தேகநபர் குறித்து பல்வேறு தகவல்கள் வெளியாகியுள்ளன.
கடந்த வாரம் 17 ஆம் திகதி அம்பாறை வைத்தியசாலையில் பணியாற்றிய பெண் பௌதீக சிகிச்சை நிபுணர் (பிசியோதெரபிஸ்ட்) 33 வயதான ஷம்யா தர்ஷனி என்ற பெண் வைத்தியர் காரொன்றிலிருந்து சடலமாக மீட்கப்பட்டிருந்தார்.
இதேவேளை, இந்த கொலையைச் செய்ததாக சந்தேகிக்கப்படும் பெண்ணின் காதலனை தேடுவதற்கு பொலிஸார் பொதுமக்களின் உதவியை நாடியுள்ளதுடன், இதுவரை சந்தேகநபர் தலைமறைவாகியுள்ளார்.
இதனையடுத்து முன்னெடுக்கப்பட்ட விசாரணையில் சந்தேகநபர் தொடர்பான பல தகவல்களை விசாரணை அதிகாரிகள் கண்டறிந்துள்ளனர்.
இந்த நிலையில் சந்தேகநபருடன் தொடர்புடையதாகக்கூறப்படும் பாரிய அளவிலான நிதி மோசடிகள் மற்றும் ஏனைய குற்றச்செயல்கள் அடங்கிய வலையமைப்பொன்றை நுவரெலியா பொலிஸார் கண்டறிந்துள்ளனர்.
நுவரெலியா தலைமையக பொலிஸ் நிலையப் பொறுப்பதிகாரியினால், அதிகாரிகளுக்கு சமர்ப்பிக்கப்பட்ட விசேட விசாரணை அறிக்கையிலேயே இந்த விபரங்கள் வெளிப்படுத்தப்பட்டுள்ளன.
சந்தேகநபர் ஹொரம்பாவ, கொஸ்கொல்ல பகுதியைச் சேர்ந்தவர் என பொலிஸார் அடையாளம் கண்டுள்ளனர். இந்த மோசடி நடவடிக்கைகளில் அவரது மனைவிக்கும் நேரடித் தொடர்பு இருப்பதாக தெரிவிக்கப்படுகின்றன.
திருமணம் செய்து கொள்வதாகக் கூறி பெண்களை ஏமாற்றியமை, வெளிநாட்டு வேலைவாய்ப்பு வழங்குவதாகக் கூறி பணம் மோசடி செய்தமை மற்றும் வாகன இறக்குமதி தொடர்பான மோசடிகள் உள்ளிட்ட குற்றச்சாட்டுகளின் கீழ், சந்தேகநபருக்கு எதிராக நாடு முழுவதும் பல நீதிமன்றங்களில் வழக்குகள் நிலுவையில் உள்ளதாக விசாரணைகளில் இருந்து தெரியவந்துள்ளது.
இதன்படி, திருமணம் செய்து கொள்வதாகக் கூறி 11,873,000 ரூபாய் மோசடி செய்தமை மற்றும் மோட்டார் வாகனமொன்றை சட்டவிரோதமாகப் பயன்படுத்தியமை தொடர்பில் கம்பஹா மேல் நீதிமன்றத்தில் வழக்கு நிலுவையில் உள்ளது.
கடந்த 2023 நவம்பரில் பேலியகொட பொலிஸாராலும் மோசடி விசாரணைப் பிரிவினராலும் அவர் கைது செய்யப்பட்டிருந்தமை தெரியவந்துள்ளது.
கர்நாடகா மாநிலம் மைசூரு அருகே திருமணத்திற்கு இன்னும் ஒரே ஒரு நாளே இருந்த நிலையில், மணப்பெண் தனது பெற்றோருடன் சேர்ந்து தற்கொலை செய்து கொண்ட அதிர்ச்சியூட்டும் சம்பவம் அப்பகுதியில் பெரும் சோகத்தை ஏற்படுத்தியுள்ளது.
வாலிபர் ஒருவர் கொடுத்த கடுமையான மன உளைச்சல் மற்றும் தொல்லைகளே இவர்களின் இந்த முடிவுக்குக் காரணம் என்று தெரியவந்துள்ளது.
மைசூரு அருகே உள்ள கிராமத்தைச் சேர்ந்த சிவண்ணா, இவரது மனைவி நாகரத்னா மற்றும் இவர்களது மகள் ரக்ஷிதா (21). ரக்ஷிதாவிற்குப் பெற்றோரால் திருமணம் நிச்சயம் செய்யப்பட்டு, நாளை மறுநாள் திருமணம் நடைபெறவிருந்தது.
இந்நிலையில், அதே கிராமத்தைச் சேர்ந்த உல்லாஸ் கௌடா என்ற வாலிபர், ரக்ஷிதாவைத் தன்னைத் திருமணம் செய்து கொள்ளுமாறு தொடர்ச்சியாக வற்புறுத்தி, அச்சுறுத்தி வந்துள்ளார்.
ரக்ஷிதாவின் திருமணம் வேறு ஒருவருடன் நிச்சயம் ஆனதை அறிந்த உல்லாஸ் கௌடா, ரக்ஷிதாவைப் பற்றி அவதூறான தகவல்களைப் பரப்பியதுடன், மணமகனின் குடும்பத்தாருக்கு ரக்ஷிதாவின் புகைப்படங்களை அனுப்பித் திருமணத்தை நிறுத்த சதி செய்துள்ளார்.
திருமணம் தங்கிவிடுமோ என்ற அச்சமும், சமூகத்தில் ஏற்பட்ட கடுமையான அவமானமும் ரக்ஷிதாவின் குடும்பத்தாரைப் பெரும் மன உளைச்சலுக்கு ஆளாக்கியுள்ளது.
இதனால் வேதனையடைந்த ரக்ஷிதா, அவரது தந்தை சிவண்ணா மற்றும் தாய் நாகரத்னா ஆகிய மூன்று பேரும் தங்களது வீட்டில் தற்கொலை செய்து கொண்டனர்.
சம்பவ இடத்திற்கு விரைந்து வந்த டி. நரசிபுரா காவல் நிலைய போலீசார், மூன்று பேரின் உடல்களையும் கைப்பற்றிப் பிரேதப் பரிசோதனைக்கு அனுப்பி வைத்தனர்.
உயிரிழப்பதற்கு முன்பு அவர்கள் எழுதி வைத்துள்ள தற்கொலை கடிதத்தைக் கைப்பற்றிய போலீசார், அதனடிப்படையில் வழக்குப் பதிவு செய்து, தற்கொலைக்குத் தூண்டிய வாலிபர் உல்லாஸ் கௌடாவைத் தீவிரமாகத் தேடி வருகின்றனர்.
திருமணக் கொண்டாட்டத்தில் இருக்க வேண்டிய வீடு, ஒரே நாளில் சுடுகாடாக மாறிய சம்பவம் ஒட்டுமொத்த கிராமத்தையும் உலுக்கியுள்ளது.
2026ஆம் ஆண்டுக்கான மாகாண மட்ட பாடசாலைகளுக்கு இடையிலான பழுதூக்கல் (Weight Lifting) போட்டியில், வவுனியா இறம்பைக்குளம் மகளிர் மகா வித்தியாலய மாணவி மாகாண மட்டத்தில் முதலிடத்தைப் பெற்று சாதனை படைத்துள்ளார்.
20 வயதுக்குட்பட்ட பெண்களுக்கான 87 கிலோகிராம் (87kg Category – Under 20 Girls) எடைப் பிரிவில் போட்டியிட்ட ஏ. கவிஜெலிலினி (A. Kavijeliliny) என்ற மாணவியே, தனது திறமைகளை வெளிப்படுத்தி முதலாம் இடத்தைப்பெற்று பாடசாலைக்கு பெருமை சேர்த்துள்ளார்.
மாகாண மட்டத்தில் முதலிடம் பெற்று சாதனை படைத்த மாணவி ஏ. கவிஜெலிலினிக்கும், அவருக்கு பயிற்சியளித்த ஆசிரியர்கள் மற்றும் பயிற்றுவிப்பாளர்களுக்கும் பாடசாலை சமூகமும் விளையாட்டு ரசிகர்களும் தங்களது வாழ்த்துகளைத் தெரிவித்து வருகின்றனர்.
அண்மையில் நடைபெற்ற வடக்கு மாகாண மட்ட விளையாட்டுப் போட்டிகளில் வவுனியா இறம்பைக்குளம் மகளிர் மகா வித்தியாலய மாணவிகள் இருவர் வரலாற்றுச் சாதனை படைத்து, மாகாணத்தின் சிறந்த வீராங்கனைகளாகத் தெரிவு செய்யப்பட்டுள்ளனர்.
“உலகிற்கு ஒளியாய் இரு” (Be Light to the World) என்ற உன்னத வாசகத்தை முன்னிறுத்திச் செயற்படும் இறம்பைக்குளம் மகளிர் கல்லூரிக்கு, இந்த மாணவிகள் இருவரும் தங்களது அசாத்திய திறமையால் பெரும் பெருமையைத் தேடித்தந்துள்ளனர்.
இப்போட்டிகளின் பழுதூக்கல் (Weight Lifting) பிரிவில், கடுமையான போட்டிக்கு மத்தியில் 2026 ஆம் ஆண்டின் சிறந்த வீராங்கனையாக (Best Performer of 2026) இறம்பைக்குளம் மகளிர் கல்லூரியைச் சேர்ந்த செல்வி த.கோசியா (Miss T.Kosiya) தெரிவு செய்யப்பட்டுள்ளார்.
அதேபோல், இறகுப்பந்தாட்ட (Badminton) பிரிவில் மாகாண மட்டத்தில் தனது அசாத்திய திறமையை நிரூபித்து, 2026 ஆம் ஆண்டின் சிறந்த வீராங்கனையாக செல்வி டி.எம்.மெக்லின் பெரேரா (Miss T.M.Meklin Perara) தெரிவு செய்யப்பட்டு சாதனை படைத்துள்ளார்.
மாகாண மட்டத்தில் திறமைகளை வெளிப்படுத்தி, பாடசாலையின் விளையாட்டு வரலாற்றில் முத்திரை பதித்த இந்த இரு வீராங்கனைகளையும் பாராட்டி, வாழ்த்துவதில் வவுனியா இறம்பைக்குளம் மகளிர் கல்லூரிச் சமூகம் (அதிபர், ஆசிரியர்கள், மாணவர்கள் மற்றும் பழைய மாணவிகள்) பெரும் பெருமிதம் கொள்கிறது.
சாதனை படைத்த மாணவிகள் இருவரும் மேலும்
பல தேசிய மற்றும் சர்வதேச வெற்றிகளைப் பெற்று பாடசாலைக்கும் நாட்டிற்கும் பெருமை சேர்க்க வேண்டும் எனப் பலரும் தங்களது வாழ்த்துக்களைத் தெரிவித்து வருகின்றனர்.
இலங்கையின் வன்னிப் பெருநிலப்பரப்பில் அமைந்துள்ள சிறப்புமிக்க ஆலயங்களில் வவுனியா சாஸ்திரிகூளாங்குளம், சின்னப்புதூர் அருள்மிகு ஸ்ரீ தான்தோன்றி நாகதம்பிரான் ஆலயமும் ஒன்றாகும்.
இந்த ஆலயத்தின் வருடாந்தப் பொங்கல் மற்றும் தீர்த்தத் திருவிழாவின் போது, பார்ப்போரை வியப்பிலாழ்த்தும் வகையில் பல நூற்றாண்டுகள் பழமையான ஒரு நேர்த்திக்கடன் சம்பிரதாயம் இன்றும் பக்திப் பரவசத்துடன் கடைப்பிடிக்கப்பட்டு வருகின்றது.
ஆலயத் திருவிழாவின் முக்கிய நிகழ்வாக, தங்களுக்குக் குழந்தை வரம் வேண்டியோ அல்லது தங்கள் பிள்ளைகளின் தீராத நோய்கள், தோஷங்கள், மற்றும் கண்டங்கள் நீங்க வேண்டும் என்று நாகதம்பிரானிடம் வேண்டிக்கொண்ட பெற்றோர், தங்களது குழந்தைகளை ஆலயத்தில் ஒப்படைக்கின்றனர்.
இவ்வாறு நேர்த்திக்கடன் வைக்கப்பட்ட குழந்தைகள், ஆலய நிர்வாகத்தினரால் இறைவனின் சந்நிதானத்தில் முறைப்படி ‘ஏலம்’ விடப்படுகின்றனர். அந்த வகையில், இம்முறை நடைபெற்ற திருவிழாவில் ஒரு குழந்தை ஐம்பத்தி ஐயாயிரம் (55,000) ரூபாய்க்கு ஏலம் எடுக்கப்பட்டமை பக்தர்களிடையே பெரும் நெகிழ்ச்சியையும் வியப்பையும் ஏற்படுத்தியுள்ளது.
ஆலய அர்ச்சகர்கள் மற்றும் நிர்வாகத்தினரால் ஏலம் விடப்படும்போது, அந்தக் குழந்தையின் பெற்றோருடைய நெருங்கிய உறவினர்கள் 55,000 ரூபாய் செலுத்தி அந்தக் குழந்தையை ஏலம் எடுக்கின்றனர். பின்னர், ஏலம் எடுத்த உறவினர்களிடம் இருந்து, பெற்றோர் தங்களது குழந்தையைத் தங்களுக்குரிய முறைப்படி முறைமைகளைச் செய்து, மீண்டும் தங்களுடைய பிள்ளையாகப் பெற்றுக் கொள்கின்றனர்.
ஏலத்தின் மூலம் பெறப்படும் இந்தத் தொகை, நேர்த்திக்கடன் கட்டணமாக ஆலயத்தின் திருப்பணிகளுக்காகவும், ஏழைப் பெண்களின் வாழ்வாதார உதவி மற்றும் திருமணக் கொடுப்பனவுகளுக்காகவும் ஆலய நிர்வாகத்தினரால் அறக்கட்டளை நிதியாகப் பயன்படுத்தப்படுவது இச்சம்பிரதாயத்தின் மற்றொரு சிறப்பம்சமாகும்.
குழந்தைகளை இவ்வாறு இறைவனுக்குத் தாரைவார்த்து, மீண்டும் ஏலம் மூலம் வாங்குவதன் மூலம் பிள்ளைகளுக்கு ஏற்படவிருக்கும் அத்தனை ஆயுள் தோஷங்களும், கிரகக் குறைபாடுகளும் நீங்கிவிடும்” என்பது இப்பகுதி மக்களின் ஆழமான நம்பிக்கையாகும்.
நவீன உலகம் எவ்வளவோ மாறினாலும், வன்னி மண்ணின் பாரம்பரிய ஆன்மீக விழுமியங்களையும், வினோத வழிபாட்டுச் சம்பிரதாயங்களையும் பறைசாற்றும் ஒரு நிகழ்வாக சின்னப்புதூர் நாகதம்பிரான் ஆலயத்தின் இந்த “குழந்தை ஏல நேர்த்திக்கடன்” இன்றும் ஆன்மீகப் பெருமிதத்துடன் தொடர்கிறது.
கிளிநொச்சி, ஏ – 9 பிரதான வீதியில் பொலிஸ் நிலையத்துக்கு முன்பாக நேற்று திங்கட்கிழமை மாலை இடம்பெற்ற கோர வீதி விபத்தில், ஓய்வுபெற்ற பாடசாலை அதிபர் பரிதாபகரமாக உயிரிழந்துள்ளார்.
விபத்துக்குள்ளான அதிபர் வழமை போன்று தனது மாலை நேர நடைப் பயிற்சியை முடித்துவிட்டு வீடு திரும்பிக்கொண்டிருந்த போதே இந்தத் துரதிர்ஷ்டவசமான சம்பவத்துக்கு முகங்கொடுத்துள்ளார்.
கிளிநொச்சி பொலிஸ் நிலையத்துக்கு முன்பாக அமைந்துள்ள மஞ்சள் கோட்டு பாதசாரி கடவையில் அவர் வீதியைக் கடக்க முற்பட்ட வேளையில், அதிவேகமாக வந்த மோட்டார் சைக்கிள் ஒன்று அவர் மீது மிகக் கொடூரமாக மோதியுள்ளது.
இந்த விபத்தில் தூக்கி வீசப்பட்டுப் படுகாயமடைந்த அவர், உடனடியாக மீட்கப்பட்டு கிளிநொச்சி மாவட்ட பொது வைத்தியசாலையின் அதிதீவிர சிகிச்சைப் பிரிவில் ஆபத்தான நிலையில் அனுமதிக்கப்பட்டார்.
எனினும், அங்கு அவருக்கு வழங்கப்பட்ட தீவிர சிகிச்சை பலனின்றி நேற்று இரவு அவர் உயிரிழந்துள்ளார்.
ஓய்வுபெற்ற அதிபர் பெருமாள் கணேசனின் திடீர் மறைவு, கிளிநொச்சி மாவட்ட கல்விச் சமூகம் மற்றும் பொதுமக்கள் மத்தியில் பெரும் சோகத்தையும் அதிர்ச்சியையும் ஏற்படுத்தியுள்ளது.
கிளிநொச்சி மாவட்டப் பாடசாலைகளில் அதிபராகவும், ஆசிரியராகவும் பணியாற்றி ஆயிரக்கணக்கான மாணவர்களைச் சிறந்த நிலைக்கு உயர்த்திய பெருமைக்குரியவர் பெருமாள் கணேசன் ஆவார்.
ஓய்வுபெற்ற பின்னரும் சமூக மற்றும் கல்வி மேம்பாட்டுப் பணிகளில் அவர் தொடர்ந்து ஆர்வம் காட்டி வந்தார் என்பது குறிப்பிடத்தக்கது.
வவுனியாவில் உள்ள பிரபல ஆண்கள் பாடசாலை ஒன்றின் உயர்தர மாணவர்களால் நேற்று (22.06.2026) நடாத்தப்பட்ட அனுமதியற்ற வாகனப் பேரணி ஒன்றின் போது, போக்குவரத்து விதிமுறைகளை மீறிச் செயற்பட்ட குற்றச்சாட்டில் பலருக்கு எதிராக சட்ட நடவடிக்கை எடுக்கப்பட்டுள்ளதுடன், மோட்டார் சைக்கிள் ஒன்றும் பொலிஸாரால் பறிமுதல் செய்யப்பட்டுள்ளது.
குறித்த பாடசாலை மாணவர்களால் வவுனியா புகையிரத நிலைய வீதியில் பெரும் எண்ணிக்கையிலான மோட்டார் சைக்கிள் மற்றும் கார்களுடன் இந்த பேரணி முன்னெடுக்கப்பட்டது. இதன்போது, மாணவர்கள் கூட்டமாக வீதியை மறித்து, ஏனைய வாகனங்களுக்கும் பொதுமக்களுக்கும் பெரும் போக்குவரத்து இடையூறை ஏற்படுத்தும் வகையில் பயணித்துள்ளனர்.
அத்துடன், அதிவேக திறன் கொண்ட (High Capacity) மோட்டார் சைக்கிள்களில் அதிக சத்தத்தை எழுப்பக்கூடிய வகையில் ‘சைலன்சர்கள்’ (Silencers) பொருத்தப்பட்டிருந்ததோடு, வீதியில் ஆபத்தான முறையில் அதிவேகமாகவும் அவர்கள் வாகனங்களை செலுத்தியுள்ளனர்.
இது குறித்துக் கிடைத்த தகவலையடுத்து, வவுனியா பொலிஸ் நிலைய போக்குவரத்துப் பிரிவு பொறுப்பதிகாரி தலைமையிலான பொலிஸ் குழுவினர் சம்பவ இடத்திற்கு விரைந்து வந்து குறித்த பேரணியை வழிமறித்தனர்.
இதன்போது போக்குவரத்து விதிமுறைகளை மீறியமை தொடர்பில் போக்குவரத்து இடையூறு விளைவித்தல் (பொது வீதியில் ஏனைய வாகனங்கள் பயணிக்க முடியாதவாறு இடையூறு ஏற்படுத்தியமை), சட்டவிரோத மாற்றம் (வாகனங்களின் அசல் வடிவமைப்பு அனுமதியின்றி மாற்றியமைத்தமை), ஒலி மாசு ஏற்படுத்தல் (மோட்டார் சைக்கிள்களின் ஒலி அமைப்பை மாற்றி, அதிக சத்தத்தை எழுப்பியமை),
வேகமாக பயணித்தமை (பொது வீதியில் ஆபத்தான முறையில் வாகனங்களைச் செலுத்தியமை) தொடர்பிலான சட்டங்களின் கீழ் மாணவர்களுக்கு எதிராக பொலிஸாரால் நடவடிக்கை எடுக்கப்பட்டது.
இந்த சோதனையின் போது, விதிமுறைகளை அப்பட்டமாக மீறிய குற்றச்சாட்டில் ஒரு மோட்டார் சைக்கிள் பொலிஸாரால் பறிமுதல் செய்யப்பட்டு, வவுனியா பொலிஸ் நிலையத்திற்கு எடுத்துச் செல்லப்பட்டுள்ளது.
மேலும், போக்குவரத்து விதிமுறைகளை மீறிய பல மாணவர்களுக்கு எதிராக பவுனியா நீதிமன்றத்தில் வழக்குத் தாக்கல் செய்ய நடவடிக்கை எடுத்துள்ளதாக வவுனியா போக்குவரத்துப் பிரிவு பொலிஸார் தெரிவித்தனர்.
இவ்விடயம் தொடர்பாக பொலிஸார் மேலும் கருத்துத் தெரிவிக்கையில், மாணவர்கள் இவ்வாறான கொண்டாட்டங்களின் போது பொதுமக்களுக்கு இடையூறு விளைவிப்பதையும், வீதிப் பாதுகாப்புச் சட்டங்களை மீறுவதையும் எக்காரணம் கொண்டும் அனுமதிக்க முடியாது என எச்சரித்துள்ளனர்.
வவுனியாவில் பிரபல ஆண்கள் பாடசாலை ஒன்றின் பிரிவுபசார நிகழ்வில் கலந்துகொண்டுவிட்டு திரும்பிய மாணவர்கள் பயணித்த கார் ஒன்று, கட்டுப்பாட்டை இழந்து மதிலுடன் மோதி விபத்துக்குள்ளாகியுள்ளது. இவ்விபத்தில் அதிர்ஷ்டவசமாக எவருக்கும் காயங்களோ அல்லது உயிர்ச்சேதமோ ஏற்படவில்லை.
வவுனியாவிலுள்ள பிரபல ஆண்கள் பாடசாலை ஒன்றில், உயர்தர மாணவர்களுக்கான பிரிவுபசார நிகழ்வு (Farewell Party) நடைபெற்றது. இந்நிகழ்வில் கலந்துகொண்டுவிட்டு மாணவர்கள் காரில் திரும்பிக்கொண்டிருந்தனர்.
வாகனம் வவுனியா புகையிரத நிலைய வீதியில் (Station Road) பயணித்துக்கொண்டிருந்தபோது, திடீரென ஓட்டுநரின் கட்டுப்பாட்டை இழந்து அருகில் இருந்த மதிலுடன் பலமாக மோதியுள்ளது.
மதிலுடன் கார் மோதிய வேகத்தில், காரின் முன்பகுதி மற்றும் பக்கவாட்டுப் பகுதிகள் பலத்த சேதமடைந்துள்ளன. அத்துடன் காரில் மோதிய மதிலும் பகுதி அளவில் சேதமடைந்துள்ளது. எனினும், காரில் பயணித்த மாணவர்கள் அனைவரும் எவ்வித காயங்களுமின்றி நூலிழையில் உயிர் தப்பியுள்ளனர்.
சம்பவம் குறித்து தகவல் அறிந்த வவுனியா பொலிஸார் உடனடியாக விபத்து நடந்த இடத்திற்கு விரைந்தனர். விபத்துக்குள்ளான வாகனத்தை மீட்டதுடன், விபத்துக்கான காரணம் குறித்து மேலதிக விசாரணைகளை பொலிஸார் முன்னெடுத்து வருகின்றனர்.
டெல்லியில் வாகனங்களை நிறுத்துவது தொடர்பாக அண்டை வீட்டாருக்குள் ஏற்பட்ட சாதாரண வாய்த்தகராறு, கத்திக்குத்து மோதலாக மாறி ஒரு இளம்பெண்ணின் கொடூரக் கொலையில் முடிந்துள்ள அதிர்ச்சிச் சம்பவம் பெரும் பரபரப்பை ஏற்படுத்தியுள்ளது.
இத்தாக்குதலில் படுகாயமடைந்த பெண்ணின் கணவர் உயிருக்கு ஆபத்தான நிலையில் அரசு மருத்துவமனையில் அனுமதிக்கப்பட்டுள்ளார்.
தென்மேற்கு டெல்லியின் பிந்தாபூர் காவல் எல்லைக்குட்பட்ட பகுதியில் அரங்கேறியுள்ள இந்த கொலை சம்பவம் டெல்லி மக்களை அதிர செய்துள்ளது. டெல்லி பிந்தாபூர் பகுதியைச் சேர்ந்தவர் விக்கி.
இவரது மனைவி ஆர்த்தி (32). இந்நிலையில் நேற்று மதியம் 3 மணியளவில், தங்களது வீட்டின் முன்பாக பைக் நிறுத்துவது தொடர்பாக, பக்கத்து வீட்டில் வசிக்கும் பாப்பு (40) என்பவருடன் விக்கி மற்றும் ஆர்த்திக்கு இடையே வாக்குவாதம் ஏற்பட்டுள்ளது.
வாக்குவாதம் முற்றவே, ஆத்திரமடைந்த பாப்பு மற்றும் அவருடன் இருந்த ஒரு சிறுவன் ஆகிய இருவரும் மறைத்து வைத்திருந்த கூர்மையான கத்திகளை எடுத்து விக்கி மற்றும் ஆர்த்தியைச் சரமாரியாகக் குத்தத் தொடங்கினர்.
அப்பகுதியினரின் இருவரின் அலறல் சத்தத்தைக் கேட்டு ஓடிவந்து, இரத்த வெள்ளத்தில் கிடந்த தம்பதியரை மீட்டு உடனடியாக அருகில் உள்ள தீனதயாள் உபாத்தியாயா அரசு மருத்துவமனைக்கு அவசரச் சிகிச்சைக்காக அனுப்பி வைத்தனர்:
மருத்துவமனைக்குக் கொண்டு செல்லும் வழியிலேயே ஆர்த்தியின் உடலில் ஏற்பட்ட ஆழமான கத்திக் காயங்களால் அவர் பரிதாபமாக உயிரிழந்தார். அவரது கணவர் விக்கியின் வயிறு மற்றும் நெஞ்சுப் பகுதியில் பலத்த கத்திக்குத்து விழுந்துள்ளதால்,
அவருக்குத் தற்பொழுது தீவிர சிகிச்சை பிரிவில் அவசர அறுவை சிகிச்சை செய்யப்பட்டு, உயிருக்குப் போராடிய நிலையில் தொடர்ந்து மருத்துவர்களின் தீவிர கண்காணிப்பில் உள்ளார்.
இந்தக் கொலைச் சம்பவம் குறித்துப் பிந்தாபூர் போலீசார் உடனடியாகக் கொலை (பிரிவு 302) மற்றும் கொலை முயற்சி உள்ளிட்ட கடுமையான பிரிவுகளின் கீழ் வழக்குப் பதிவு செய்து விசாரணையை முடுக்கிவிட்டனர்.
தலைமறைவாக முயன்ற முக்கியக் குற்றவாளியான பாப்புவை (40) டெல்லி தனிப்படை போலீசார் இன்று காலை கைது செய்து அவரிடமிருந்த கொலைக் கருவிகளைப் பறிமுதல் செய்தனர்.
இந்தத் தாக்குதலில் பாப்புவுடன் இணைந்து செயல்பட்ட மற்றொரு சிறுவனைப் பிடிப்பதற்காகப் பிந்தாபூர் போலீஸார் தனிப்படை அமைத்துத் தீவிரமாக வலைவீசித் தேடி வருகின்றனர்.
ஹோமியோபதி மருத்துவர் ஒருவர் பக்கவாதத்தால் பாதிக்கப்பட்டு படுத்த படுக்கையான நிலையில், அவரை கண்காணிக்க தன் வீட்டில் சிசிடிவி கமெராக்களை பொருத்தியுள்ளார் அவரது மகன்.
ஆனால், அந்த கமெரா காட்சிகளில், தன் தந்தை தன் மனைவியால் கொல்லப்படுவதை நேரடியாக காண நேர்ந்ததால் அதிர்ச்சிக்குள்ளாகியுள்ளார் அவர்.
இந்தியாவின் ஜார்க்கண்ட் மாநிலத்திலுள்ள ராஞ்ச்சி நகரில் வழ்ந்துவரும் Dr குப்தா (Dr KP Gupta), ஒரு பிரபல ஹோமியோபதி மருத்துவர் ஆவார். திடீரென அவரை பக்கவாதம் தாக்கியதைத் தொடர்ந்து, கடந்த சில மாதங்களாக படுத்த படுக்கையாக உள்ளார் அவர்.
ஆகவே, தன் தந்தையின் உடல் நிலையை பணியிலிருந்தவண்ணமே கண்காணிப்பதற்காக வீட்டில் சிசிடிவி கமெராக்களை பொருத்தியுள்ளார் Dr குப்தாவின் மகனான சௌரப்.
சௌரப் கடை ஒன்றை நடத்திவரும் நிலையில், சனிக்கிழமை மதியம், சௌரபின் தாய் தன் மகனுக்கு மதிய உணவு கொடுப்பதற்காக அவரது கடைக்குச் சென்றுள்ளார்.
அப்போது கமெரா காட்சிகளை பார்த்துக்கொண்டிருந்த சௌரப், அதிர்ச்சியை உருவாக்கும் ஒரு சம்பவத்தைக் கண்டுள்ளார்.
ஆம், சௌரபின் மனைவியான நிகிதா, தன் மாமனார் முகத்தில் தலையணையை வைத்து அழுத்தி அவரைக் கொல்ல முயன்றதைக் கண்ட சௌரப், உடனடியாக வீட்டுக்கு விரைந்துள்ளார்.
ஆனால், ஏற்கனவே எல்லாம் முடிந்துவிட்டிருந்திருக்கிறது. ஆம், சௌரப் வீட்டுக்குத் திரும்பும்போது, ஏற்கனவே Dr குப்தாவின் உயிர் பிரிந்துள்ளது.
தன் தந்தையை, தன் மனைவியான நிகிதாதான் கொலை செய்துவிட்டதாகவும், சிசிடிவி கமெராக்களை அவர் சேதப்படுத்தியதாகவும், தன் தந்தையைக் கொல்ல பயன்படுத்திய தலையணையை அவர் எங்கோ எடுத்துச் சென்றதாகவும் சௌரப் பொலிசில் புகாரளித்துள்ளார்.
நிகிதாவுக்கும் அவரது மாமனாருக்கும் இடையே ஏற்கனவே பல விடயங்களில் கருத்து வேறுபாடு இருந்ததாக கூறப்படுகிறது.
பொலிசார் இரத்தம் படிந்த அந்த தலையணையை மீட்டுள்ளார்கள். ஆனால், சிசிடிவி காட்சிகளில், நிகிதா தன் மாமனாரின் அறைக்குள் செல்லும் காட்சியும், மீண்டும் வெளியேறும் காட்சியும்தான் பதிவாகியுள்ளன.
பொலிசார் நிகிதாவை கைது செய்துள்ள நிலையில், உண்மையாகவே நிகிதா தன் மாமனாரை கொலை செய்தாரா, அல்லது, ஏற்கனவே பல உடல் நல பாதிப்புகள் கொண்டிருந்த Dr குப்தா வேறு காரணங்களால் உயிரிழந்தாரா என்பது குறித்து விசாரணை மேற்கொண்டுவருகிறார்கள்.
சொத்துக்கள் மற்றும் பொறுப்புகள் குறித்த அறிக்கைகள் சரிவரத் தாக்கல் செய்யப்படாவிட்டால் வழக்குகள் பதிவு செய்யப்படும் என இலஞ்ச ஆணைக்குழு எச்சரித்துள்ளது.
இலஞ்சம் அல்லது ஊழல் குற்றச்சாட்டுகளை விசாரிக்கும் ஆணைக்குழு, அரசாங்க அதிகாரிகள் தங்களது ஆண்டு சொத்துக்கள் மற்றும் பொறுப்புகள் குறித்த அறிவிப்புகளை ஜூன் 30-ஆம் திகதிக்குள் சமர்ப்பிக்க வேண்டும் என்று கூறியுள்ளது.
விசேட அறிக்கையொன்றை வெளியிட்ட அதன் பணிப்பாளர் நாயகம் ரங்க திசாநாயக்க, அந்தத் திகதிக்கு முன்னர் தங்களது சொத்துக்கள் மற்றும் பொறுப்புகள் குறித்த அறிவிப்புகளைச் சமர்ப்பிக்காதவர்கள் நிச்சயமாக அபராதம் விதிக்கப்படுவார்கள் என்று கூறியுள்ளார். அந்த அபராதம் பாரியதொரு தொகையாக இருக்கும் என்றும் அவர் சுட்டிக்காட்டியுள்ளார்.
2023-ஆம் ஆண்டின் ஊழல் ஒழிப்புச் சட்டம் எண் 9-இன் பிரிவு 80(1)-இன் கீழ் சொத்துக்கள் மற்றும் பொறுப்புகள் குறித்த அறிக்கைகளைச் சமர்ப்பிக்க வேண்டிய நபர்கள், சம்பந்தப்பட்ட ஆண்டின் ஜூன் 30-ஆம் திகதிக்குள் அந்த அறிவிப்புகளைச் சமர்ப்பிக்க வேண்டும்.
தாமதம் செய்தால் அபராதம் மற்றும் சட்ட நடவடிக்கை எடுக்கப்படலாம் என்றும் பணிப்பாளர் நாயகம் ரங்க திசாநாயக்க எச்சரித்துள்ளார்.
சம்பந்தப்பட்ட சொத்துக்கள் மற்றும் பொறுப்புகள் குறித்த அறிவிப்புகள் மின்னணு முறை மூலமாக மட்டுமே சமர்ப்பிக்கப்பட வேண்டும். இந்த மையப்படுத்தப்பட்ட மின்னணு அமைப்பு 2026 மார்ச் 31 அன்று தொடங்கப்பட்டது.
இந்த அறிக்கைகளைப் பெறுவது, இலஞ்சம் அல்லது ஊழல் விசாரணை ஆணைக்குழுவின் செயல்பாடு அல்லது பொறுப்பு அல்ல என்றும், இது ஒரு பிரசையின் பொறுப்பு என்றும் அவர் வலியுறுத்தியுள்ளார்.
2023 ஆம் ஆண்டின் ஊழல் ஒழிப்புச் சட்டத்தின்படி, சொத்துக்கள் மற்றும் பொறுப்புகளைச் சமர்ப்பிக்க வேண்டிய ஒரு புதிய அதிகாரிகள் குழு உள்ளது என்றும் குறிப்பிட்டுள்ளார்.
அதன்படி, சுங்க கட்டளைச் சட்டத்தின் 115 ஆம் பிரிவின்படி, அனுமதி பெற்ற உப முகவர்கள் அல்லது கப்பல் துறை எழுதுவினைஞர்கள் (வார்ப் கிளார்க்) சொத்துக்கள் மற்றும் பொறுப்புகளைச் சமர்ப்பிக்க வேண்டிய ஒரு குழுவாகக் கருதப்படுகிறார்கள்.
மேலும், தொழிற்சங்கங்களின் நிர்வாக அதிகாரிகள், செய்தித்தாள் செய்தி கட்டளைச் சட்டத்தின் 2 ஆம் பிரிவின் கீழ் பதிவு செய்யப்பட்ட செய்தித்தாள் நிறுவனங்களின் உரிமையாளர்கள்,
ஆசிரியர்கள், ஆசிரியர் குழு உறுப்பினர்கள், அனுமதி பெற்ற ஊடக நிறுவனங்களின் உரிமையாளர்கள், ஆசிரியர்கள் மற்றும் ஆசிரியர் குழு உறுப்பினர்கள், விளையாட்டுச் சட்டத்தின் கீழ் நிறுவப்பட்ட விளையாட்டு சங்கங்களின் அதிகாரிகள்,
அத்துடன் பொதுச் சேவை மற்றும் மாகாண பொதுச் சேவையில் உள்ள அனைத்து பணியாளர் தர அதிகாரிகளும் இந்த சொத்து மற்றும் பொறுப்பு அறிக்கைகளைச் சமர்ப்பிக்க வேண்டும்.
இது சம்பந்தமாக மேலதிக தகவல்களைப் பெற, இலஞ்சம் அல்லது ஊழல் குற்றச்சாட்டுகளை விசாரிக்கும் ஆணைக்ழுவை 1954 என்ற குறுந்தொலைபேசி எண்ணில் அழைக்கலாம் என்றும் தெரிவிக்கப்பட்டுள்ளது.
