கண்டி மாவட்டம், பன்விலை பொலிஸ் பிரிவுக்குட்பட்ட பகுதியில் இளம் யுவதி ஒருவர் தனது வீட்டின் கட்டிலில் சந்தேகத்துக்கிடமான முறையில் சடலமாக மீட்கப்பட்டுள்ளார்.
நேற்று(17) புதன்கிழமை இடம்பெற்ற இந்தச் சம்பவத்தில், பன்விலை பிரதேசத்தைச் சேர்ந்த 22 வயதுடைய இளம் யுவதியே இவ்வாறு சடலமாக மீட்கப்பட்டவராவார்.
நேற்று மாலை மேற்படி யுவதியின் பெற்றோர், உறவினர் ஒருவரின் வீட்டுக்குச் சென்றிருந்தனர் எனத் தெரிவிக்கப்படுகின்றது.
இதன்போது, அந்த யுவதி மட்டும் வீட்டில் தனியாக இருந்துள்ளார். பின்னர், வெளியில் சென்றிருந்த பெற்றோர் இரவு மீண்டும் வீட்டுக்குத் திரும்பிய போதே, மகள் கட்டிலில் சடலமாகக் கிடப்பதைக் கண்டு அதிர்ச்சியடைந்துள்ளனர்.
சடலம் மீட்கப்படும் போது அந்த யுவதியின் வாய்ப் பகுதியில் இருந்து அதிகளவில் இரத்தம் வெளியேறியிருந்தது என்று பொலிஸ் தரப்புத் தகவல்கள் தெரிவிக்கின்றன.
யுவதியின் மரணத்தில் பலத்த சந்தேகம் காணப்படுவதால் பொலிஸார் மற்றும் தடயவியல் அதிகாரிகள் பூர்வாங்க விசாரணைகளை மேற்கொண்டு வருகின்றனர்.
மரணத்துக்கான உண்மையான காரணத்தைக் கண்டறிவதற்காகச் சடலம் உடற்கூற்றுப் பரிசோதனைக்காக வைத்தியசாலையில் ஒப்படைக்கப்பட்டுள்ளது.
நுவரெலியா நகரில் தனியார் விடுதி ஒன்றில் தங்கியிருந்த பெண் ஒருவர் கண்டி தெல்தெனிய வைத்தியசாலைக்கு அருகில் இருந்து (17) புதன்கிழமை மாலை காரொன்றிலிருந்து சடலமாக மீட்கப்பட்டதாக பொலிஸார் தெரிவித்தனர் .
தனது காதலனுடன் நுவரெலியாவிற்கு அண்மையில் வருகைதந்து தனியார் விடுதி ஒன்றில் தங்கியிருந்துள்ளார்.
இந் நிலையில் திடீரென்று (16) செவ்வாய்க்கிழமை விடுதியிலிருந்து இரவு 10:30 மணியளவில் பெண்ணை தூக்கிச் சென்று காரொன்றில் ஏற்றி செல்வது விடுதியில் பொருத்தப்பட்டிருந்த சிசிடிவி (CCTV) கேமரா காட்சியில் பதிவாகியுள்ளது.
கேமரா காட்சியை அடிப்படையாகக் கொண்டு பெண்ணின் மூத்த சகோதரன் நுவரெலியா பொலிஸ் நிலையத்தில் முறைப்பாடு ஒன்றினை பதிவு செய்திருந்தார்.
நுவரெலியா பொலிஸார் மேற்கொண்ட விசாரணையில் வெலிகம பகுதியை சேர்ந்த பி.ஆர். ஷ்யாமா தர்ஷனி (மருத்துவர், 33 வயது) மற்றும் கன்னொருவ பகுதியை சேர்ந்த அவரது காதலரான டி.எம்.எஸ். தினெத் திசநாயக்க (35 வயது) ஆகியோரும் நுவரெலியாவிற்கு கடந்த மூன்றாம் திகதி நுவரெலியாவிற்கு வருகை தந்து குறித்த தனியார் விடுதியில் தங்கியிருந்தனர்.
அதன் பின்னர் அவர்களுக்கிடையில் ஏதோனும் வாக்குவாதம் ஏற்பட்டதன் பின்னர் குறித்த பெண்ணை கொலை செய்து தங்கியிருந்த தனியார் விடுதியிலிந்து மீட்டு காரில் ஏற்றிச் சென்று கண்டி – தெல்தெனிய பகுதியில் விட்டுச் சென்றிருக்கலாம் என பொலிஸார் சந்தேகிக்கின்றனர்.
பெண்ணுடன் நுவரெலியாவில் உள்ள தனியார் விடுதிக்கு வருகைதந்த ஆண் சந்தக நபர் இதுவரை கைது செய்யப்படவில்லை எனவும் விசாரணைகளை மேற்கொள்ளும் நுவரெலியா பொலிஸார் தெரிவித்தனர் .
நுவரெலியா தடவியல் பொலிஸாரின் உதவியுடன் குறித்த இருவரும் தங்கியிருந்த தனியார் விடுதியில் சம்பவ இடத்திலுள்ள தடயங்கள் ,
சிசிடிவி (CCTV) காட்சிகள் சாட்சியங்களின் அடிப்படையில் விடுதி ஊழியர்களின் வாக்குமூலங்கள் பெற்று தொலைபேசி அழைப்புத் தரவுகளை சேகரித்து தீவிர விசாரணைகளை மேற்கொண்டு வருகின்றனர்.
குருநாகல், நிக்கவெரட்டிய பகுதியில் குளத்தில் பட்டம் விடும் நூல் ஒன்றில் சிக்கி குளத்தினுள் தத்தளித்துக்கொண்டிருந்த கொக்கு ஒன்றை காப்பாற்ற முயன்ற நபர் ஒருவர் நீரில் மூழ்கி உயிரிழந்துள்ளதாக பொலிஸார் தெரிவித்தனர்.
நிக்கவெரட்டிய பொலிஸ் பிரிவுக்குட்பட்ட நேபட குளத்தில் நபரொருவர் நீரில் மூழ்கியுள்ளதாக நேற்று (16) பொலிஸாருக்கு கிடைத்த தகவலின் அடிப்படையில்
பொலிஸ் உயிர்காப்பு பிரிவினர் மற்றும் பிரதேசவாசிகள் இணைந்து மேற்கொண்ட தீவிர தேடுதல் நடவடிக்கையின் பின்னர், குறித்த நபரின் சடலம் மீட்கப்பட்டுள்ளது.
இவ்வாறு நீரில் மூழ்கி உயிரிழந்தவர் நிக்கவெரட்டிய, திவுல்லகொட பகுதியைச் சேர்ந்த 43 வயதுடையவர் என அடையாளம் காணப்பட்டுள்ளார்.
இந்நிலையில் நேபட குளப்பகுதியில் பட்டம் விடும் நூல் ஒன்றில் சிக்குண்டு பறக்க முடியாமல் கொக்கு ஒன்று குளத்து நீரில் தத்தளித்துக் கொண்டிருந்துள்ளது.
இதனை அவதானித்த குறித்த நபர், மேலும் சிலருடன் இணைந்து அந்த கொக்கை காப்பாற்றுவதற்காக குளத்தினுள் இறங்கியுள்ளார்.
இதன்போது எதிர்பாராதவிதமாக குளத்தின் ஆழமான பகுதிக்கு இழுத்துச் செல்லப்பட்டு, அவர் நீரில் மூழ்கி உயிரிழந்துள்ளதாக பொலிஸார் மேற்கொண்ட ஆரம்பகட்ட விசாரணைகளில் தெரியவந்துள்ளது.
மேலும் இச்சம்பவம் தொடர்பில் நிக்கவெரட்டிய பொலிஸார் மேலதிக விசாரணைகளை மேற்கொண்டு வருகின்றனர்.
உலகிலேயே மிகச்சிறந்த சுற்றுலாத்தலமாக தரப்படுத்தப்படுவதற்கு தகுதியான ஒரு நாடாக இலங்கை விளங்குவதாக பாகிஸ்தான் கிரிக்கெட் அணியின் முன்னாள் தலைவர் வசீம் அக்ரம் புகழ்ந்து பாராட்டியுள்ளார்.
இலங்கையின் இயற்கை அழகையும், தமக்கு இந்த நாட்டுடன் இருக்கும் பல தசாப்த கால பிணைப்பையும் அவர் சுட்டிக்காட்டியுள்ளார். கொழும்பில் நடைபெற்ற நிகழ்வு ஒன்றில் கலந்துகொண்டு உரையாற்றியபோதே அவர் இதனைத் தெரிவித்துள்ளார்.
தாம் உலகம் முழுவதும் பரவலாகப் பயணம் செய்திருந்த போதிலும், தமக்கு மிகவும் பிடித்தமான சுற்றுலாத் தலங்களில் ஒன்றாக இலங்கை எப்போதும் இருந்து வருவதாக அக்ரம் குறிப்பிட்டுள்ளார்.
தமது பயணங்களின் போது தாம் கண்டவற்றில் இலங்கையின் இயற்கை நிலப்பரப்புகள், ஆறுகள் மற்றும் கடற்கரைகள் ஆகியவை மிகவும் அழகானவை என வசீம் அக்ரம் குறிப்பிட்டுள்ளார்.
இலங்கை ஏன் இன்னும் உலகின் முன்னணி சுற்றுலாத் தலங்களில் ஒன்றாகக் கருதப்படவில்லை என்பது குறித்துத் தனது வியப்பை வெளிப்படுத்தியுள்ளார்.
கடந்த 1985ஆம் ஆண்டில் ஒரு இளைஞனாக முதன்முதலில் இலங்கைக்கு விஜயம் செய்ததாகக் குறிப்பிட்ட அக்ரம், அதன் பின்னர் ஒரு வீரராக, வர்ணனையாளராக மற்றும் சுற்றுலாப் பயணியாகப் பலமுறை இங்கு வந்துள்ளதாகத் தெரிவித்துள்ளார்.
இலங்கைக்கு தொடர்ந்தும் வழக்கமாக வருகை தரத் திட்டமிட்டுள்ளதாகவும், எதிர்காலத்தில் இலங்கையின் கிழக்குக் கடற்கரைப் பகுதிகளை மேலும் சுற்றிப்பார்க்க விரும்புவதாகவும் வசீம் அக்ரம் மேலும் கூறியுள்ளார்.
யாழ்ப்பாணம் – கண்டி பிரதான வீதியின் பூனாவை, கும்புல்கொல்லேவ பகுதியில் இடம்பெற்ற விபத்தில் ஆசிரியை உயிரிழந்துள்ளார்.
இன்று காலை கண்டியிலிருந்து வவுனியா நோக்கி பயணித்த இலங்கை போக்குவரத்துச் சபைக்குச் சொந்தமான பேருந்து ஒன்று, மோட்டார் சைக்கிளுடன் மோதி விபத்துக்குள்ளாகியுள்ளது.
இதன் போது மோட்டார் சைக்கிளில் பயணித்த ஆசிரியை, பேருந்தின் பின் சக்கரத்தினுள் சிக்கி சம்பவ இடத்திலேயே உயிரிழந்துள்ளார்.
இவ்வாறு உயிரிழந்தவர் பூனாவை, கல்கந்தேகம வித்தியாலயத்தில் ஆசிரியையாகப் பணியாற்றிய 56 வயதுடைய பெண் என அடையாளம் காணப்பட்டுள்ளார்.
உயிரிழந்த பெண்ணின் சடலம் பிரேத பரிசோதனைக்காக வவுனியா வைத்தியசாலையில் வைக்கப்பட்டுள்ளதாக பொலிஸார் குறிப்பிட்டுள்ளனர்.
சம்பவம் தொடர்பாக பேருந்தின் சாரதி கைது செய்யப்பட்டுள்ளார். பூனாவை பொலிஸார் மேலதிக விசாரணைகளை மேற்கொண்டு வருகின்றனர்.
புது மனைவியை கண்காணிக்க சிசிடிவி கணவனான மருத்துவர் வீடு முழுவது சிசிடிவி மாட்டி பெண்ணை கண்காணித்து கொடுமை செய்தததால் திருமணமான 48 நாளில் பெண் தற்கொலை செய்த சம்பவம் அதிர்ச்சியை ஏற்படுத்தியுள்ளது.
மும்பை அருகே உள்ள தானே அம்பர்நாத் பகுதியை சேர்ந்த 26 வயது இளம்பெண் விசாகா தில்கர். இவருக்கும், மருத்துவரான நிதின் தில்கர் என்பவருக்கும் கடந்த ஏப்ரல் 30-ம் தேதி திருமணம் நடந்தது.
திருமணம் முடிந்த சில நாட்களிலேயே, வரதட்சணை குறைவாக கொடுத்ததாக கூறி விசாகாவை அவரது கணவர் மற்றும் புகுந்த வீட்டினர் சித்ரவதை செய்ய தொடங்கியுள்ளனர்.
விசாகாவின் சுதந்திரத்தை பறிக்கும் வகையில், அவரது கணவர் வீட்டின் உள்ளேயும் வெளியேயும் சிசிடிவி கேமராக்களை பொருத்தி, அவரது ஒவ்வொரு நகர்வையும் தீவிரமாக கண்காணித்து வந்துள்ளார்.
யாரிடமாவது பேசினால் கூட விசாகா அடித்து துன்புறுத்தப்பட்டுள்ளார். தற்கொலை செய்துகொள்வதற்கு இரண்டு நாட்களுக்கு முன்பு, பக்கத்து வீட்டு பெண்ணுடன் பேசியதற்காக விசாகா புகுந்த வீட்டினரால் மிக கொடூரமாக தாக்கப்பட்டுள்ளார்.
இந்த கொடுமைகளை தாங்க முடியாமல், திருமணமான வெறும் 48 நாட்களிலேயே விசாகா தூக்கிட்டு தற்கொலை செய்துகொண்டார்.
சம்பவம் தொடர்பில் விசாகாவின் பெற்றோர் அளித்த புகாரின் பேரில், அவரது கணவர் நிதின் தில்கர், மாமியார் சாயா மற்றும் மைத்துனர் நினத் ஆகிய மூவர் மீதும் சிவாஜிநகர் போலீசார் வழக்குப் பதிவு செய்து விசாரணை நடத்தி வருகின்றனர்.
இலங்கையில், இறக்குமதி செய்யப்படும் பயன்படுத்தப்பட்ட வாகனங்களின் விலைகள் கணிசமாக உயரக்கூடும் என இலங்கை வாகன இறக்குமதியாளர்கள் சங்கம் (VIASL) எச்சரித்துள்ளது.
பயன்படுத்தப்பட்ட வாகனங்களின் சுங்க மதிப்பை நிர்ணயிக்கும்போது முன்னர் வழங்கப்பட்டு வந்த 15 சதவீத மதிப்பீட்டுக்குறைப்பு நீக்கப்பட்டதை தொடர்ந்து இந்த தாக்கம் ஏற்பட்டுள்ளதாக தெரிவிக்கப்படுகிறது.
இந்த தாக்கம் சந்தை முழுவதும் உணரப்படும் என்றும், பிரபலமான வாகன வகைகளின் விலைகள் கணிசமாக உயரும் என எதிர்பார்க்கப்படுவதாகவும் VIASL-இன் துணைத்தலைவரும், செய்தித் தொடர்பாளருமான அரோஷா ரொத்ரிகோ கூறியுள்ளார்.
ஹொண்டா வெசல் Z பிளே SUV போன்றவை வேகமாக விற்பனையாகும் வகை என்றும், அவற்றின் விலை சுமார் 2 மில்லியன் வரை உயரக்கூடும், அதே நேரத்தில் சுசுகி வேகன் R-இன் விலை ஏறத்தாழ ரூ. 700,000 வரை அதிகரிக்கக்கூடும் என்றும் தெரிவிக்கப்படுகின்றது.
இறக்குமதி செய்யப்படும் பயன்படுத்தப்பட்ட வாகனங்களுக்குப் பயன்படுத்தப்படும் சுங்க மதிப்பீட்டு முறைகளில் செய்யப்பட்ட மாற்றங்களே இந்த விலை உயர்வுக்கு காரணம் என்று ரொத்ரிகோ கூறியுள்ளார்.
மோட்டார் வாகனங்களின் சுங்க மதிப்பை நிர்ணயிப்பதற்கு இரண்டு தனித்துவமான முறைகளை, 2016 ஜூன் 14 திகதியிட்ட வர்த்தமானி எண் 1971/10 பரிந்துரைக்கிறது என சங்கத்தின் செய்தித்தொடர்பாளர் குறிப்பிட்டுள்ளார்.
பிரிவு 1(A) புத்தம் புதிய மோட்டார் வாகனங்களுக்கும், பிரிவு 1(B) பயன்படுத்தப்பட்ட வாகனங்கள் உட்பட மற்ற அனைத்து மோட்டார் வாகனங்களுக்கும் பொருந்தும் என தெரிவிக்கப்படுகிறது.
மேலும், பயன்படுத்தப்பட்ட வாகனங்களுக்கு 15 சதவீத சலுகை வழங்கப்படுவதாகவும், இறக்குமதி விதிமுறைகளின் கீழ் தகுதி பெறுவதற்காக புத்தம் புதிய வாகனங்கள் முதலில் வெளிநாட்டில் பதிவு செய்யப்பட்டு,
பின்னர் பயன்படுத்தப்பட்ட வாகனங்களாக ஏற்றுமதி செய்யப்படும்போது அரசாங்கம் வருவாய் இழப்பைச் சந்திப்பதாகவும் மீண்டும் மீண்டும் குற்றச்சாட்டுகள் எழுந்துள்ளதாக அவர் கூறியுள்ளார்.
பெரிய அளவிலான ஏற்றுமதியாளர்களுக்கு கிடைக்கும் மொத்த கொள்முதல் தள்ளுபடிகள், சில்லறை விலைகளில் ஏற்கனவே சேர்க்கப்பட்டுள்ள டீலர் லாப வரம்புகள், உள்ளூர் வரிகள் மற்றும் இதர செலவுகள்,
மற்றும் சர்வதேச வணிகப் பரிவர்த்தனைகளில் பொதுவான வணிக விலை பேச்சுவார்த்தைகள் ஆகியவற்றின் காரணமாக, பட்டியலிடப்பட்ட சில்லறை விலைகள் பெரும்பாலும் இறுதி கொள்முதல் விலையை பிரதிபலிப்பதில்லை என்பதை அமைச்சகம் உணர்ந்திருந்தது.
இந்த குறைப்பை நீக்குவதால் ஏற்படும் விளைவுகள் குறித்து எச்சரித்த சங்கம், உயர்ந்த சுங்க மதிப்புகள் இறக்குமதி வரிகள் மற்றும் தீர்வைகள் அதிகரிப்பதற்கு வழிவகுக்கும் என்றும், இது இறுதியில் நுகர்வோருக்கான வாகன விலைகளை உயர்த்தும் என்றும் கூறியுள்ளது.
இந்த முடிவு, வாகனங்களை வாங்கும் திறனிலும் இலங்கையின் வாகன இறக்குமதித் துறையின் மீட்சியிலும் குறிப்பிடத்தக்க தாக்கத்தை ஏற்படுத்தக்கூடும் என்றும், முடிவை அதிகாரிகள் கவனமாக மறுபரிசீலனை செய்ய வேண்டும் என வலியுறுத்தப்பட்டுள்ளது.
இன்ஸ்டாகிராம் வழியாக பழக்கமான தனது ஆண் நண்பரை நேரில் சந்திப்பதற்காக, வீட்டை விட்டு வெளியேறி கேரளா செல்ல முயன்ற தமிழகத்தை சேர்ந்த இளம் பெண் ஒருவர் , சிங்கப்பெண் அதிரடிப்படையினரால் மீட்கப்பட்டுள்ளார்.
இன்ஸ்டாகிராம் போன்ற சமூக வலைத்தளங்கள் மூலம் அறிமுகமாகும் நபர்களை தீவிரமாக நம்பி, ஆபத்துகளில் சிக்கும் இளைஞர்களின் எண்ணிக்கை நாளுக்கு நாள் அதிகரித்து வருகிறது.
சென்னையை சேர்ந்த அந்த இளம்பெண், கடந்த சில மாதங்களாக கேரளாவை சேர்ந்த ஒரு இளைஞருடன் இன்ஸ்டாகிராமில் பேசி வந்துள்ளார்.
அந்த நபரின் ஆசை வார்த்தைகளை நம்பிய பெண், பெற்றோரிடம் சொல்லாமல் ரகசியமாக கேரளாவுக்கு பயணம் மேற்கொள்ள திட்டமிட்டுள்ளார்.
திடீரென மகள் காணாமல் போனதால் அதிர்ச்சியடைந்த பெற்றோர், உடனடியாக காவல் துறையில் முறைப்பாடு செய்துள்ளனர்.
முறைப்பாட்டினை அடுத்து உடனடியாக களம் இறங்கிய ‘சிங்கப்பெண் அதிரடிப்படை’ நவீன தொழில்நுட்ப வசதிகள் மற்றும் மொபைல் சிக்னல்களை கொண்டு தீவிர தேடுதல் வேட்டையில் ஈடுபட்டது.
அதிரடிப்படையினரின் மின்னல் வேக நடவடிக்கையால், அந்த பெண் கேரளா எல்லையை கடப்பதற்கு முன்பாகவே, எல்லையோர ரயில் நிலையத்தில் மீட்கப்பட்டுள்ளதாக இந்திய ஊடகங்கள் தெரிவித்துள்ளன.
இலங்கையில் வயதான பெற்றோர்கள் தங்களது சொத்துக்களை பிள்ளைகளுக்கு எழுதிய பின்னர், அவர்கள் பிள்ளைகளால் கைவிடப்படும் பட்சத்தில்,
அந்த சொத்துக்களை அரசாங்கம் தனது பொறுப்பில் எடுப்பதற்கான புதிய சட்டங்களைக் கொண்டு வர அரசாங்கம் தயாராகி வருவதாக ஆங்கில ஊடகமொன்று செய்தி வெளியிட்டுள்ளது.
அரசாங்கத்தால் பொறுப்பேற்கப்படும் சொத்துக்கள், பாதிக்கப்பட்ட அந்த முதியவர்களின் நலன்புரிச் செயற்பாடுகளுக்காகப் பயன்படுத்தப்படும் எனவும் தெரிவிக்கப்பட்டுள்ளது.
இது குறித்து கிராமிய அபிவிருத்தி, சமூகப் பாதுகாப்பு மற்றும் சமூக வலுவூட்டல் பிரதி அமைச்சர் வசந்த பியதிஸ்ஸ தெரிவிக்கையில்,
பல பெற்றோர்கள் தங்களது முதுமைக் காலத்தில் பிள்ளைகள் தங்களை அரவணைத்துக் கவனித்துக் கொள்வார்கள் என்ற நம்பிக்கையிலேயே சொத்துக்களை பிள்ளைகளின் பெயருக்கு மாற்றுகிறார்கள்.
சொத்துக்கள் கைக்கு வந்தவுடன் வயதான பெற்றோரைக் கைவிடுகின்ற அல்லது அவர்களுக்கு எந்தவித ஆதரவும் வழங்காமல் நடுத்தெருவில் விடுகின்ற ஏராளமான சம்பவங்கள் பதிவாகியுள்ளன. ”
பிள்ளைகள் தங்களது பெற்றோரைக் கைவிட்டுவிட்டு, அவர்களின் சொத்துக்களை மட்டும் தங்கள் கட்டுப்பாட்டில் வைத்திருப்பது முற்றிலும் ஒழுக்கமற்ற செயலாகும். பிள்ளைகள் தங்களைக் கவனிப்பார்கள் என்ற நம்பிக்கையில்தான் பெற்றோர்கள் சொத்துக்களை மாற்றுகிறார்கள்.
ஆனால் சில பிள்ளைகாள் பெற்றொரின் நம்பிக்கையினை காப்பாற்றுவதில்லை இந்த விவகாரத்திற்குத் தீர்வுகாண்பதற்கான தேவையான சட்டமூலங்களை வரைவாக்கம் செய்யும் பணிகளில் தற்போது அரசாங்கம் ஈடுபட்டுள்ளதாக பிரதி அமைச்சர் தெரிவித்தார்.
இந்த முன்மொழியப்பட்ட புதிய சட்டக் கட்டமைப்பின் கீழ், இவ்வாறான சூழ்நிலைகளில் பிள்ளைகளுக்கு மாற்றப்பட்ட சொத்துக்கள், சட்டப்பூர்வமாக அரசாங்கத்தின் காவல் அல்லது பொறுப்பின் கீழ் கொண்டுவரப்படும்.
அந்த சொத்துக்கள் மூலம் ஈட்டப்படும் வருமானம் அல்லது நிதியானது, பாதிக்கப்பட்ட பெற்றோரின் நலன்புரிச் செலவுகளுக்காகப் பயன்படுத்தப்படும்.
கைவிடப்பட்ட முதியவர்களைப் பராமரிப்பதற்காகப் பராமரிப்பாளர்களை நியமிக்க அல்லது தேவைப்படின் அவர்களைத் தரமான முதியோர் இல்லங்களில் சேர்ப்பதற்கான கட்டணங்களை இந்த நிதியின் மூலம் செலுத்த ஏற்பாடுகள் செய்யப்படும்.
அதேவேளை இலங்கையில் வேகமாக அதிகரித்து வரும் முதியோர்களின் சனத்தொகை, நாட்டின் சமூக நலன்புரி அமைப்பிற்குப் பெரும் சவாலாக மாறியுள்ளது.
பல வருடங்களாக தனியாக அல்லது போதிய குடும்ப ஆதரவின்றி வாழும் முதியவர்களின் எண்ணிக்கை அதிகரித்து வருவதால்,
சிரேஷ்ட பிரஜைகளுக்கான வலுவான சட்டப் பாதுகாப்புகள் மற்றும் மேம்பட்ட சமூகப் பாதுகாப்பு வழிமுறைகளுக்கான கோரிக்கைகள் தொடர்ச்சியாக முன்வைக்கப்பட்டு வருகின்றன.
இதேவேளை, நாட்டில் இயங்கி வரும் முதியோர் இல்லங்களின் தரம் மற்றும் நலன்புரி நிலவரங்களும் தற்பொழுது தீவிர கண்காணிப்புக்கு உட்படுத்தப்பட்டுள்ளன.
சில இல்லங்கள் முறையான தரநிலைகளைப் பின்பற்றாமல் இயங்குவது குறித்தும், அவற்றைக் கண்காணிப்பதற்கான முறையான ஒழுங்குவிதிகள் இல்லாமை குறித்தும் கவலைகள் வெளியிடப்பட்டு வருகின்ற நிலையில் அரசாங்கம் மேற்படி நடவடிக்கை எடுக்கவுள்ளமை குறிப்பிடத்தக்கது.
செக் குடியரசில் நடைபெற்று வரும் உலகப் புகழ்பெற்ற Ostrava Golden Spike தடகளத் தொடரில், இலங்கையின் முன்னணி ஈட்டி எறிதல் வீரர் Rumesh Tharanga தங்கப் பதக்கம் வென்று நாட்டுக்கு பெருமை சேர்த்துள்ளார்.
ஆண்களுக்கான ஈட்டி எறிதல் போட்டியில் பங்கேற்ற ருமேஷ் தரங்க, அபாரமான திறமையை வெளிப்படுத்தி போட்டியில் முதலிடத்தைப் பிடித்தார்.
போட்டியின் போது 86.57 மீற்றர் தூரத்திற்கு ஈட்டியை எறிந்த அவர், தனது சிறந்த செயல்திறனை வெளிப்படுத்தியதுடன், சர்வதேச அரங்கில் இலங்கைக்கு மற்றுமொரு முக்கிய வெற்றியையும் பெற்றுத் தந்தார்.
உலகின் முன்னணி தடகள வீரர்கள் பங்கேற்கும் இந்த உயர்மட்ட தொடரில் தங்கப் பதக்கம் வென்றிருப்பது, ருமேஷ் தரங்கவின் விளையாட்டு வாழ்க்கையில் முக்கிய மைல்கல்லாகக் கருதப்படுகிறது.
அவரது இந்த வெற்றி, எதிர்வரும் சர்வதேச போட்டிகளிலும் இலங்கைக்கு பதக்க நம்பிக்கையை அதிகரித்துள்ளதுடன், நாட்டின் தடகள விளையாட்டிற்கும் புதிய உற்சாகத்தை ஏற்படுத்தியுள்ளது.
ருமேஷ் தரங்கவின் இந்த சாதனைக்கு விளையாட்டு ரசிகர்கள் மற்றும் பல்வேறு தரப்பினரும் வாழ்த்துகளைத் தெரிவித்து வருகின்றனர்.
உலக சந்தையில் மசகு எண்ணெய் விலை தொடர்ந்து குறைந்து வரும் நிலையில், உள்நாட்டிலும் மக்களுக்கு நிவாரணம் வழங்கும் நோக்கில் எரிபொருள் விலையை குறைப்பதற்கான நடவடிக்கைகள் எடுக்கப்படும் என அமைச்சரவைப் பேச்சாளரும் அமைச்சருமான நளிந்த ஜயதிஸ்ஸ தெரிவித்துள்ளார்.
கொழும்பிலுள்ள அரசாங்க தகவல் திணைக்களத்தில் நடைபெற்ற அமைச்சரவை தீர்மானங்களை அறிவிக்கும் வாராந்த ஊடகவியலாளர் சந்திப்பில் கலந்துகொண்டு உரையாற்றிய அவர்,
அமெரிக்கா மற்றும் ஈரான் இடையிலான பேச்சுவார்த்தைகள் உலக எண்ணெய் சந்தையில் தாக்கத்தை ஏற்படுத்தியுள்ளதாக குறிப்பிட்டார்.
அவர் மேலும் தெரிவிக்கையில், அமெரிக்கா மற்றும் ஈரான் இடையே இன்னும் இறுதி உடன்படிக்கை எட்டப்படவில்லை என்றும், தற்போதும் ஒருவித நிச்சயமற்ற சூழ்நிலை நீடித்து வருவதாகவும் கூறினார்.
இதனால் எரிபொருள் விலை குறைப்பு தொடர்பில் குறிப்பிட்ட காலக்கெடுவை இப்போது அறிவிக்க முடியாது என்றும் விளக்கமளித்தார்.
“இந்த மாதத்திற்காக முன்பதிவு செய்யப்பட்ட அனைத்து எரிபொருள் கப்பல்களும் ஏற்கனவே நாட்டை வந்தடைந்துள்ளன. மேலும் ஒரு மசகு எண்ணெய் கப்பல் மாத்திரமே வரவுள்ளது.
அமெரிக்கா மற்றும் ஈரான் இடையிலான உடன்படிக்கையில் எதிர்வரும் வெள்ளிக்கிழமைக்குள் கையெழுத்திடப்படும் என எதிர்பார்க்கப்படுகிறது,” என அவர் தெரிவித்தார்.
அந்த உடன்படிக்கை நிறைவேறிய பின்னர் உலக பொருளாதார சூழ்நிலையில் சாதகமான மாற்றங்கள் ஏற்படக்கூடும் என்றும்,
அதன் பயன்கள் இலங்கை போன்ற நாடுகளுக்கும் கிடைத்தால் அவை மக்களுக்கு நிவாரணமாக வழங்கப்படும் என்றும் அமைச்சர் குறிப்பிட்டார்.
மேலும், ஏப்ரல் மாதம் வரை நடைமுறைப்படுத்தப்பட்ட முதற்கட்ட எரிபொருள் மானியத் திட்டத்திற்காக 100 பில்லியன் ரூபா ஒதுக்கப்பட்டிருந்ததுடன், அந்த மானியக் காலம் ஜூன் மாதத்துடன் நிறைவடைவதாகவும் அவர் சுட்டிக்காட்டினார்.
“தற்போது மாதத்தின் நடுப்பகுதியில் உள்ளோம். எனவே உலகச் சந்தை நிலவரங்களை தொடர்ந்து கவனிக்க வேண்டியுள்ளது.
இந்நிலையில் அவசரப்பட்டு முடிவுகளை எடுத்து மாத இறுதியில் என்ன நடைபெறும் என்று முன்கூட்டியே கூறுவது பொருத்தமற்றது,” என்றும் அவர் தெரிவித்தார்.
உலகச் சந்தையில் ஏற்படும் சாதகமான மாற்றங்களின் நன்மைகளை நேரடியாக மக்களிடம் கொண்டு சேர்ப்பதே அரசாங்கத்தின் நோக்கமாகும் என்றும்,
நாட்டின் பொருளாதார நடவடிக்கைகள் தடையின்றி முன்னெடுக்கப்பட வேண்டுமெனில் மக்களுக்கு தேவையான எரிபொருள் நிவாரணங்கள் வழங்கப்படுவது அவசியம் என்றும் அமைச்சர் நளிந்த ஜயதிஸ்ஸ வலியுறுத்தினார்.
சர்வதேச கால்பந்துப் போட்டிகளின் போது, மைதானத்தில் இருக்கும் ரசிகர்களின் உற்சாகமும், சில எதிர்பாராத நிகழ்வுகளும் உலகளாவிய கவனத்தை ஈர்ப்பது வழக்கம்.
அந்த வகையில், அமெரிக்காவில் இடம்பெற்று வரும் 2026 FIFA உலகக்கோப்பை கால்பந்து தொடரின் போது,
மைதானத்தில் தனது தன்னம்பிக்கை மிக்க தோற்றத்தாலும், இயல்பான அழகாலும் ரசிகை ஒருவர் ஒட்டுமொத்த கேமராக்களின் கவனத்தையும் ஈர்த்து சர்வதேச அளவில் தலைப்புச் செய்தியானார்.
அந்த ரசிகையின் புகைப்படங்கள் மற்றும் காணொளிகள் சமூக வலைதளங்களில் மின்னல் வேகத்தில் பரவின.
இது வெறும் ஒரு ரசிகையின் புகைப்படம் என்பதையும் தாண்டி, பிரதிநிதித்துவம் (Representation), சுய அன்பு (Self-love) மற்றும் மாறுபட்ட அழகுப் பிரமாணங்கள் (Diverse standards of beauty) குறித்த ஆரோக்கியமான உரையாடல்களை உலகளவில் முன்னெடுத்தது.
பெரிய அளவிலான கால்பந்துப் போட்டிகளின் போது, மைதானத்தில் நிலவும் மின்சாரம் போன்ற உற்சாகமான சூழலும்,
எதிர்பாராத விதமாக முன்னிலைக்கு வரும் ரசிகர்களின் சுவாரஷ்யமான தருணங்களும் பல நேரங்களில் போட்டியின் முக்கிய ஈர்ப்பாக மாறிவிடுகின்றன.
பாரம்பரிய ஊடகங்களை விட சமூக வலைதளங்கள் மற்றும் காணொளி தளங்களையே மக்கள் அதிகளவில் நாடுவதாக ‘ரொய்ட்டர்ஸ் நிறுவனத்தின் டிஜிட்டல் செய்தி அறிக்கை 2026’ தெரிவித்துள்ளது.
உலகெங்கிலும் உள்ள 48 நாடுகளில், சுமார் 1,00,000 மக்களிடம் நடத்தப்பட்ட இணையவழி ஆய்வுகளின் அடிப்படையில் இந்த அறிக்கை வெளியிடப்பட்டுள்ளது.
ஆய்வில் பங்கேற்றவர்களில் 54% பேர் செய்திகள் மற்றும் அன்றாடத் தகவல்களுக்காக சமூக வலைதளங்கள் மற்றும் காணொளி பகிர்வுத் தளங்களையே பயன்படுத்துவதாகக் குறிப்பிட்டுள்ளனர்.
இந்த மாற்றம் குறிப்பாக இளைய தலைமுறையினரிடையே மிகத் தீவிரமாக உள்ளது. இளைய தலைமுறையினர் பாரம்பரிய செய்தி இணையதளங்கள்,
தொலைக்காட்சி அல்லது நாளிதழ்களைப் பார்ப்பதைத் தவிர்த்து காணொளிகள், சமூக வலைதள இன்ஃபுளூன்சர்கள் (Influencers) மற்றும் ஒன்லைன் ஆளுமைகள் மூலமாகவே செய்திகளை தேடுகின்றனர்.
நடப்பு நிகழ்வுகள் குறித்து பொதுமக்களின் புரிதலை உருவாக்குவதில், தனிநபர் உள்ளடக்க உருவாக்குநர்கள் (Creators) மற்றும் சுயாதீன பதிப்பகங்களின் (Independent Publishers) பங்கு முன்னெப்போதையும் விட வேகமாக அதிகரித்து வருகிறது.
செய்திகள் தேடுவதில் ஏற்பட்டுள்ள இந்த டிஜிட்டல் மாற்றம், ஊடகத்துறையில் சில முக்கிய கவலைகளையும் தோற்றுவித்துள்ளது.
சமூக வலைதளங்களில் வேகமாகப் பகிரப்படும் செய்திகளில் உள்ள உண்மைத்தன்மையைச் சரிபார்ப்பதில் உள்ள சவால்கள் மற்றும் போலியான செய்திகள் (Misinformation) பரவுவது போன்ற அச்சுறுத்தல்களையும் இந்த அறிக்கை சுட்டிக்காட்டியுள்ளது.
மேலும் ஊடக நுகர்வு மற்றும் டிஜிட்டல் இதழியல் போக்குகள் குறித்து உலகளவில் மிக அதிகமாக மேற்கோள் காட்டப்படும் ஆய்வுகளில் ரொய்ட்டர்ஸ் நிறுவனத்தின் அறிக்கை முதன்மையானது.
கடந்த மே மாதம் 16 ஆம் திகதி கொஸ்கம – தவல்கொட ஓடையில் நீராடச்சென்ற இரண்டு இளைஞர்கள் நீரில் மூழ்கி உயிரிழந்ததை அடுத்து, அவர்களது உடல்கள் கொஸ்கம – பரணகம பொது மயானத்தில் புதைக்கப்பட்டன.
இந்நிலையில், அடையாளம் தெரியாத சிலர் சடலங்களை சுமார் 2 அடி ஆழத்திற்கு தோண்டி எடுத்துச்சென்றுள்ளதாக உயிரிழந்தவர்களின் பெற்றோருக்கு தகவல் கிடைத்துள்ளது.
இதனையடுத்து முன்னெடுக்கப்பட்ட விசாரணையில் மயானத்திற்கு அருகிலுள்ள ஒரு வீட்டில் பொருத்தப்பட்டிருந்த பாதுகாப்பு கமராக்களை சோதித்த போது மயானத்திலிருந்து லொரியொன்றும், மோட்டார் சைக்கிளும் ஏதோவொன்றை ஏற்றிசெல்வது கண்டறியப்பட்டுள்ளது.
சம்பவம் தொடர்பில் பொலிஸார் மேற்கொண்ட விசாரணையில் லொரியில் பயணித்த நபர் கைது செய்யப்பட்டுள்ளார்.
இந்த விசாரணையின் போது, தனது மனைவியின் உடல்நலக்குறைவு காரணமாக சில சடங்குகளை செய்ய தாம் திட்டமிட்டிருந்ததாகவும், அதில் மஹியங்கனை பகுதியை சேர்ந்த கும்பல் ஒன்று பங்கேற்றதாகவும் சந்தேகநபர் தெரிவித்துள்ளார்.
இதற்கமைய, சம்பந்தப்பட்ட கும்பலை கைது செய்து அவர்களை நீதிமன்றத்தில் முன்னிலைப்படுத்த கொஸ்கம பொலிஸார் நடவடிக்கை எடுத்துள்ளனர்.
இலங்கையில் இன்று (17.06.2026) நண்பகலுக்கு முன் மாற்றமின்றி தொடர்ந்த தங்கத்தின் விலையில் நண்பகலின் பின் சிறிய மாற்றம் பதிவாகியுள்ளதாக அகில இலங்கை நகையக வியாபாரிகள் சங்கம் தெரிவித்துள்ளது.
அதன்படி, 24 கரட் தங்க பவுண் ஒன்று 1000 ரூபாயால் விலை குறைந்துள்ளதாக கூறப்பட்டுள்ளது.
தற்போதைய சந்தை நிலவரப்படி, 24 கரட் தங்கம் ஒரு பவுண் 393,000 ரூபாயாக விற்பனை செய்யப்படுகின்றது.
அதேவேளை, 22 கரட் தங்கம் ஒரு பவுண் 361,500 ரூபாயாக விற்பனை செய்யப்படுவதாக தெரிவிக்கப்பட்டுள்ளது.
அத்துடன் கிராம் அடிப்படையில், 24 கரட் தங்கத்தின் ஒரு கிராம் 49,125 ரூபாயாகவும், 22 கரட் தங்கத்தின் ஒரு கிராம் 45,188 ரூபாயாகவும் விற்பனை செய்யப்படுகின்றமை குறிப்பிடத்தக்கது.
